На беларускіх жанчынах трымаецца ўсё: і побыт, і сям’я, і адукацыя, і медыцына. І калі мы згадаем 2020 год, ніхто не скажа супраць таго, што жанчыны ў выніку зрабілі рэвалюцыю.
Я сама маці дваіх дзяцей, у эміграцыі, у разводзе. І я разумею: калі табе трэба нароўні бадацца з нейкім мужчынам, у якога ёсць жонка, якая ўжо ўзяла на сябе большасць побытавых пытанняў, то гэта няроўныя ўмовы. Таму мы ўпэўненыя, што беларуская жанчына заслужыла права быць прадстаўленай на палітычнай арэне.

Нашая палітычная прагарама базуецца ў першую чаргу на каштоўнасцях незалежнасці, суверэнітэту Беларусі, але і на каштоўнасцях правоў чалавека, роўнасці і верхавенства закона і салідарнасці. Гэта тыя каштоўнасці, якія ў многім вызначылі пратэст 2020 года. І мы выдатна памятаем, як гэта было. І тое, што заяўляць пра нашае патрабаванне грамадзянскіх свабодаў і нашых правоў, у першую чаргу – права на справядлівыя сумленныя выбары, было вельмі важна, а таксама каштоўнасць той велізарнай салідарнасці, якая аб’ядноўвала нас тады.

Грамадзянскі ўдзел — наша права, але нас гадамі метадычна абмяжоўвалі ў гэтым. Я зноў балатуюся ў КР дзеля таго, каб прадстаўляць інтарэсы розных беларусаў_ак, з якімі працую праз арганізацыі і ініцыятывы трэцяга сектара. Зараз мы развіваем палітычную культуру, веру што ў нас пачне працаваць інстытут рэпутацыі, і хачу быць часткай гэтых зменаў. Я хачу бачыць больш празрыстасці і справаздачнасці ўжо зараз, сёння працаваць над выкараненнем дыскрымінацыі і дасягненнем роўнасці. КР дае для гэтага пляцоўку, а астатняе ўжо залежыць ад нашай працы.