【 抗疫援助只援老闆，公平咩？ 】

阿通係點心師傅，疫症爆發之下，突然遭逢失業。喺2月7日佢俾老闆裁咗出嚟，留低嘅同事亦唔好過，被迫放成20日無薪假。

佢原本係家中經濟支柱，每個月要俾家用7000蚊，又要交保險，呢樣果樣費用，仲要供養父母。

阿通想過停供份保險，經紀勸他唔好，肺炎肆虐，萬一有事就乜保障都無。佢唯有叫弟妹幫手頂住啲家用先，要頂到幾時？佢自己都答唔到。

點算好？點算好？明知市道差，仍然硬著頭皮搵工，一口氣見咗五份工，全部係填Form等消息無回音。佢好嬲呢個政府無理過工人死活，怒斥勞工處係「瞓咗覺，重未醒」。

疫症肆虐，打擊各行各業，好似阿通一樣處境嘅人，不計其數。林鄭設立250億抗疫基金，食肆、零售店舖和旅行社通通無差別一律派發八萬大元，但工人被迫放無薪假、停工、甚至裁員，政府就乜都無支援，公平咩？

#僱員經濟支援
#支援失業開工不足放無薪假
#不要救市不救人