一年前嘅今日，武漢肺炎輸入個案出現，香港人人心惶惶。醫護為避免好似SARS大爆發嘅情況重現，逼不得已展開為期五日嘅罷工，期望能向政府施壓封關救港，堵截武漢肺炎源頭。當時特首表示封關「不切實際」，譴責醫護「以極端手法影響病人利益」。諷刺嘅係，一年後嘅今日，政府草率噉搞場大龍鳳出嚟，「不切實際」迅速噉封區。過去一年香港人因為武漢肺炎所帶來嘅損失，毫無疑問體現咗政府當初以「極端手法影響港人利益」。

如今一年過去，因為當初政府拒絕封關，導致香港中門大開，武漢肺炎肆虐。當中有184名香港人離世、過萬人受到感染、人民為自救為口罩等裝備頻撲、經濟停頓、無數餐廳補習社等小商戶因政府無能結業、院舍醫院等地方停止探訪令無數家庭被迫分離、學生因停課學習進度減慢，對有特殊教育需要嘅學生影響更甚，家長亦因此壓力倍增。

一年後，當時罷工嘅醫護被秋後算賬，除咗扣糧外，喺工作場所更要面對上司因罷工行動所施加嘅壓力同升遷上嘅留難等呢啲不為人知嘅辛酸。而武漢肺炎依舊纏擾住眾香港人，我哋每日更要面對因疫情同封區而帶嚟嘅不安。

的確，一年前嘅罷工未能成功向政權施壓，但毫無疑問，罷工運動創咗香港工運嘅先河，亦令大家反思到唔同專業喺推動社會進步嘅角色。而作為香港人，請唔好忘記過往一年政府點樣再次以政治凌駕香港人嘅健康同福祉，並請繼續緊守崗位，守護香港。

#罷工救港 #罷工不是缺勤 #武漢肺炎 #不切實際