‏الزمان يحد نفسي على اللي ماتريد
‏وساق هقواتي والاحلام صوب الهاويه

‏وكل ما اذكر ذكرياتي وارجّعها واعيد
‏ضاقت الديره من الزاويه لـ الزاويه

‏هيه ياوقت الحزن علّم الوقت السعيد
‏زانت او شانت تراها كلها متساويه .

نهار الخميس اللي مضى جدد ثيابه
ثلاثة عشر يومن وهذا يجي ويروح .

‏كيف أبيع الذكريات اللي وأنا قاعد لحالي
‏ جاتني كنها ترد الصوت و الأخبار عنه

‏حملها قيمة غلاه وداري إن الحمل غالي
‏ والغلا بموت ما بعته ولا سجيييت منه .

من تفارقنا وانا احساسي غريب
‏واشعر اني ما تخيرت الصواب

‏لا حشى ماهي فقط فرقى حبيب
‏اشعر ان الكون كله في غياب

‏عالعموم ان كان لي بقلبك نصيب
‏السنين المقبله فيها الجواب

‏وان تفارقنا عسى الجرح العطيب
‏بك يطيب ونجتمع يوم الحساب .

تصددت منه ودي ان خاطري ينساه
وأثر خواطر العشاق مهيب نسّايه .

و‏تذكر يوم أعذرك وأنت لا صادق ولا
‏معذور أدوّر لك عذر وأصدّقه وأكذّب أحداقي .

لو يهمك دمع عيني كان ماضحيت فيني
‏ولاتركت بيوم قلبي يشتكي ظلم الليالي

‏لاتعذرلي أمانه , لاتقول إنك تبيني
‏مات حبك ياحياتي من بعد ماكنت غالي

‏ضاعت أحلامي بقربك مابقى شي بيديني
‏حتى روحي عذبتني وكنت أداويها لحالي

‏ماخذلني شخص عابر ماخذلني إلا يقيني
‏يوم ظنيتك ربيع العمر تقطع فـ وصالي

اليالي والقصايد بالمفارق عاذريني
‏كمل الدنيا بدوني حاول تلاقي مثالي .

سقى الله زمان أول تجيني كلك من أقصاك
‏ويسقينا الغرام وتكبر أوراقك مع أوراقي

‏سهل جداً ألاقي من يعوض خيبتي وياك
‏صعب جداً مثل صبري على خيباتك تلاقي .

على صدري الضايق لاهب الهواء ذعذاع
تنهت من صادق ماكنيت في صدري  .

شاعرها تكتب الابيات من حر جوف
المواجع وسط القلب صارت ثقيله .

لا تعاتبني ترى ما على مثلي ملام
‏والحبيب اللي يغيب مايغيب بلا سبب

‏والله انك لو تحاول اني احكي ألف عام
‏بسكت ولو راعد الشوق في قلبي ضرَب

‏والغياب اللي تشوفه ماهو من قلّ إهتمام
‏الغياب اللي تشوفه شخص من همّه تعب.

على كثر الجروح اللي بصدري ماعرفت أعتاد
‏يجيني الجرح ما كن له دروب بداخلي رحبه

‏وعلى كثر المفارق في الزمان بخاطري مافاد
‏أنا للحين فيني من الموادع والحزن رهبه.

‏منّ رحل وغاب مني وكبدي في تقطاعي
‏اتصبر ومابه صبر دام عيني تهّل ماها.

قفت بالوداع ودمعتي ساكنه بالعين
وانا اقفيت وتوقيت ماعاد يرفاني .

‏ليت صدري من اوجاع الزمان استراح
‏كان ما هزه الذكرى و جرحه عطيب

‏كلما اذكر كلامه في هذاك الصباح
‏قلت ما عاد فوق الارض باقي قريب

‏هز جذع المفارق في يدينه وراح
‏واتساقط تعب من فوق قاعً خصيب

‏لي عيون التجافي والعتب والسماح
‏له ولا لي سوى ذر الرماد المريب .

كل ما أرمي رغبة النوم في حضن السهاد
‏يستحي وجه المعاذير من وجه العتب

‏لا تعاتب نبض قلبي على كبوة جواد
‏للوصال أسباب واجد و للفرقا سبب .

ياهواجيس الضمير الضايق .. المتحيّر
‏أرحمي حال .. الحزين اللي جفُوه أحبابه .

ياحبيبي ليش تتركني مخلا
تركت اللي صاح في ربعه وخلى .

‏علموه أني ذكرته بـ أول العام الجديد
‏وعلموه أن الجروح اللي بـ قلبي موجعه

‏ذاب قلبي في غيابه مثل ماذاب الحديد
‏يوم ولعني وخلا نار قلبي مولعه

‏أشهد أنه مارحمني يوم خلاني وحيد
‏طاوعه قلبه يغيب، وكيف قلبه طاوعه

‏ماسمعت الا شطر، ويحرّك شْعور البليد
‏ضاقت الدنيا بـ شاعر طيب قلبه ضيّعه

‏علموه أني فقدته، ياعسى عامه سعيد
‏وعلموه أن القصايد في غيابه تتبعه

‏كل عام يمرني .. ياللأسف مامن جديد
‏بالحزن أستقبله، وأصافحه، وأودعه .

‏عزيزة حزن : ما تشرح وش اللي في خواطرها
‏ تخاف إن حزنها ينقال على : صدرٍ ما يستاهل .