#Admin專欄 #戰爭無可避免各位應有所準備 @Windseasonbro

TLDR：以下內容皆為風巴不專業鳩噏，如果想睇專業嘅內容，請Follow @HKMilitary

如果大家一直有Follow本Channel，都會知道我由2019年開始，都喺唔同嘅 #Admin專欄 或平時嘅Post都有講過要大家為戰爭準備，例如儲糧。

而近一年烏俄爆發戰爭，有好多Channel友都有同我傾過戰爭嘅話題，最近亦有一個Channel友PM我問我幾時會爆發戰爭，對於呢個話題，我一直無寫太多深入嘅文章，因為我自問自己對軍事嘅知識都只係九牛一毛，例如唔同國家嘅軍事有咩優勢，坦白講我唔係追得好貼。

關於軍事上嘅知識，風巴建議大家去香港軍事臺 @HKMilitary 觀看最update同比較專業嘅意見，但如果想睇下 #風巴鳩噏 ，可以繼續睇落去(建議大家搵多D 唔同Sources例如英文報章、香港軍事臺、Twitter等等)

嗱，戴穩咗頭盔，就等我呢個唔專業嘅鳩噏佬講兩句啦，以下我會以唔同嘅問題引導大家思考：

1⃣ 俄羅斯核威脅可能引致美軍選擇精準刺殺普京結束戰事
自烏俄之戰俄羅斯失利後，俄羅斯有意無意成日講如果呢個世界無俄羅斯，就無意義喇，俄羅斯會鳩射核彈云云，而喺2023年2月21號，俄羅斯總統普京單方面宣佈暫停同美國新削減戰略武器條約，並且要求俄軍就恢復核試爆做好準備，風巴鳩估，美國唔可能再容忍核威脅，有可能以AGM-114 R9X嘅精準導彈將普京斬首 ，事實上，窮兵黷武嘅普京早已不得俄羅斯人心，而殺咗佢係結束俄烏戰爭唯一出路（有人話美國不知幾想繼續打，賣武器賺錢，我同意，但前提係俄羅斯唔玩核武，但今日普京如此，美國唔引刀成一快，要冒太大風險。

2⃣ 如果中国打臺灣，日韓會唔會幫臺灣手？
臺灣同日韓係唇齒相依，而美國都唔想失去第一島鏈，連日韓呢兩個世仇都被美國勸掂聯手對付中国，萬一臺灣出事，兩國唔會坐視不理。

3️⃣ 戰爭會喺邊度發生？
無疑，俄羅斯同烏克蘭打得水深火熱，而同時印度同中国邊境已經打緊冷兵器戰爭，伊朗同土耳其、以色列果度都好緊張，如果講未來嘅戰場喺邊度，臺海會係一個可能性，而如果臺海一打，涉及九段線爭議嘅亞洲眾國都可能係戰場。

4⃣ 中国未必主動打臺灣
要視乎臺灣捱到中国幾耐嘅攻勢，如果中国以幾小時內嘅閃電戰取得成功，拎咗臺灣，美國同亞洲各國要面臨人性考驗———解放軍會喺臺灣本島上扮成臺灣人，埋伏各大鄉鎮市內，美軍轟炸佢嘅時候，中国會向臺灣民眾大肆宣傳美國屠殺臺灣同中国人；但如美軍對中国解放軍視而不見，中国好大機會借攻佔臺灣長期進駐解放軍，其爪牙直逼第一島鏈。

如果成事，美國不得不出手打中国。

然而，我並唔認為中国會主動打臺灣，原因係：
中国睇到契哥俄羅斯連烏克蘭都對付唔到，其實佢無可能有信心自己可以對付有日韓甚至美國撐腰嘅臺灣。

但習近平想做民族偉人係不爭事實，所以我認為佢會將目光放喺俄羅斯、印度身上。俄羅斯已成世界公敵，今次俄羅斯同烏克蘭一戰，對中国嚟講係千載難逢嘅機會『解放海參崴』。

如果襯俄羅斯同烏克蘭甚至同俄羅斯自己請嘅僱傭兵都打到元氣大傷時，借機會收復返海參崴，對習近平嘅歷史名望不下於收復埋臺灣，而臺灣好似香港一樣，對中国嚟講係轉移民憤同建立民族認同感嘅假想敵，加上中国派去嘅臺奸太多，從文化入侵，大可確保幾十年內『拎返臺灣』，不急於一時。

事實上，近日中共下令海參崴在內嘅中俄邊境八個地名都加註中國舊稱，或者就係等緊俄羅斯焫着歐美而相爭時，襯亂拎返海參崴。

5⃣ 中国氣球事件有乜啟示？
中国氣球入侵美國國境一事，其實反映出佢除咗收集情報，更加係以升到60000呎高空嘅氣球，去測試美國第五代戰機高空攔截能力，又如果佢可盛載核彈，並駛到臺灣上空，喺60000呎高空free fall的話，到時就算將佢擊落，都會構成不可逆轉嘅傷害。

6⃣ 如果中国唔入侵臺灣，有無可能會打仗？
FBI同唔同國家都開始叫中国向武肺一事埋單，以中国性格一定死口唔認同唔還錢；又或者講到明唔畀用熱兵器嘅中印邊境有人用槍射殺敵國，會唔會就係因為呢D小事引起戰爭呢？

7⃣ 如果真係打仗，香港會點？
無水、無電、到時大家都需要關注衛生同儲糧；會有人搶劫同無地方安全。

同時中国一定會立緊急法並喺香港『實行全國性法律』；財產不得自由進出；新聞比而家更低透明度、更與事實相違背，普通人更易犯下国安法。

同時，應該會上唔到網，大家接收資訊嘅渠道變得更窄更少。

而軍管香港、入屋免搜查令更加係預料之內，而2022年政府發放緊急SMS、2020至2022動員『檢測站』、『方倉醫院』及最近政府以動員公務員『海嘯演習』等事可以預計，呢堆嘢根本就係為打仗而演習。

同時，其實中国人都憎香港，中国都想以深圳、上海等地取代香港。如果戰爭開打，佢有誘因炸埋香港，以今時今日香港媒體已死、距離真相愈來愈遠嘅社會嚟講，到時只會有大量報導指美國向香港轟炸，而轟炸嘅目標應該係港英建築物，方便之後『重建』時一併消滅『殖民地Symbol』。

8️⃣ 最佳避難地點？
香港無一度安全，比較安全係移民西方國家。

9⃣ 我可以準備d咩？
一個求生背囊、屋企儲水容器、急救包、罐頭，如果戰爭係講打一個月以上，呢堆嘢無乜用，如果係講緊一個星期左右，都叫頂到下。

如果有朝一日打仗，香港會係喺軸心國控制嘅地方，各位好自為之。

關於打仗，歡迎有識之士pm糾正同屌鳩風巴。

而如果你中意聽風巴 @Windseasonbro 鳩噏，請你Follow本Channel @Windseasonhk ，並叫多兩個朋友玩TG Follow風巴，感謝=)！