ፅኑ ጥበብ

ክርር ባለ እውነታዋ ..
<< አዎና የእኔ ልጅ ለምን ተቸግረህ እንደሁ ባላውቅም እስካሁንም አለማግባትህ ይከነክነኛል። እድሜ እንደሁ መላ የለውም ቁጥር ብቻ ነው።ይሊቁንስ ስምህን ማስጠሪያ ለማፍራት ብታገባ ደስታዬ ነው።እኛ እንደሆንን ለአንተ ለበኩር ልጃችን አናንስም።ምን አለኝ..!! ወንድ ነኝ ..!! ገንዘብ ላፍራ ብለህ ከሆነ የምታስበው የዕድሜ ዘለላዎችህን በከንቱ እያሳነስካቸው ነው።የገንዘብ ረድኤት በመስራት ብቻ ሳይሆን ዋናው አያያዙ ነው ።ልጄ በቂ ገንዘብ የምታገኝበት ስራ አለህ ።እስከመቼስ የማይደረስበትንና የማያልቀውን ነገን ትጠብቃለህ። >> አለችው ።

   የእናቱ አነጋገር የእግሩን እሾህ አፍረጥርጣ ያወጣችለት ያህል እረፍት እና ሀሴት ተሰማውና ወደ ኋላ ተመልሶ እንጋባ እያለች ለሶስት አመት ስትጨቀጭቀው የነበረችውን ፍቅረኛውን ማስታወስ ጀመረ። እውነትም ፍቅረኛው እንጋባ እያለች መለመን የጀመረችው በፍቅር መኖር ከጀመሩ ከሁለተኛው አመት ጀምሮ ነበር። እሱም...

<< ቆይ.. የዛሬ አመት ቆይ... የዛሬ ሁለት አመት ጠብቂኝ እስከዛ ማሟላት ያለብኝን ነገር ላሟላ ካልሆነ ግን መጣደፍ አልፈልግም መታገስ ካቃተሽ የራስሽ ጉዳይ..>>
ብሏት ስለነበር ፍቅራቸው ጋዝ እንዳለቀበት ኩራዝ ደብዝዞ ነበር። እሷም መጨቃጨቋ የሴትነት ጊዜዋ አሳስቧት ብቻ ሳይሆን ከቤተሰብ ራስ ላይ ወርዳ በራሷ እግር ቆማ የምትራመድበትን እንዲሁም ቤተሰብ የምትመሰርትበትን ማዕልት ከመናፈቋም የተነሳ ነበር።

    በዚህ መካከልም ፍቅራቸው እየቀዘቀዘ ልባቸውም እየሻከረ ሲመጣ እንደ ቀድሟቸው እርስ በእርሳቸው መናበባቸውም ቀነሰ።እሱም ይስራ እንጅ እንደ ውሃ ገንዘቡን ለረባውም ላረባውም መርጨት ጀመረ።አስተሳሰቡም እየላላ << ገና ልጅ ነኝ ምን አቻኮለኝ ትዳር እንደሁ እስር ቤት ነው >>ማለት ጀመረ።

     ፍቅረኛውም የሚሰጣት ምላሽ እንደ ኮሶ ስለመረራት መቆጣጠሯን ችላ ብላውም ስለነበር ለዛ ነው የባህሪው መቀያየር ለአባቱ ጎልቶ የታየው። በስተ መጨረሻም እናቱ ምንም እንኳን ትዳር ይዞ ከቤቷ በቀን አስር ጊዜ አለማየቷን ስታስበው ቢያስጨንቃትም ትዳር ለወንድ ልጅ ሰብሳቢ መሆኑን ስለምታምንበት ነበር እንደ ቀልድ ሹክ ያለችው።

    እሱም ፊቱ በደስታ ወዝ እየጨቀየ ፍቅረኛ እንደ ነበረችው እንጋባ ስትለው አሁን አላገባሽም በቂ ሃብት እስኪኖረኝ ታገሽ ብሏት እንደተደባበሩም ሁሉንም ነገር ለእናቱ ነግሯት እናቱም ይህን ማለቱ ስህተት እንደሆነ ከነገረችው ቡሃላ ፍቅረኛውን ይቅርታ ጠይቋት እንደሚያገባትና ለቤተሰቦቿ ሽማግሌ ሊልክ ማሰቡንም እንዲነግራት አሳሰበችው።

    ከዛም እንደ ባህር ውሃ ያስፈራው የነበረው ትዳር በእናቱ ተወዶ በመገኘቱ ይህን ዜና ለፍቅረኛው ሊያበስራት ተቻኮለ። ከዛም እስከ ዛሬ ላላት ነገር ሁሉ ይቅርታ ጠይቋት ሊያገባት ማሰቡን ነገራት።እሷም የዘወትር ጥያቄዋ እልባት ስላገኘላት በሀሴት ተቀበለችው።ከዛም ሽማግሌ ተልኮ ድል ተብሎ ተደግሶላቸው ጉልቻቸውን ጀመሩ።

    ከእሷ ጋር መኖር ከጀመረ ቡኋላ መጠጣቱን፣ብኩንነቱን እና ማምሸቱን ተወ።በአስተሳሰቡም እየበሰለ መጣ።ራሱን ጥንቅቅ አድርጎ ማኖር ሲጀምርም ከአባቱ ጋር መናቆሩ ቀረ።እንዲያውም ትዳር መያዙ እያስወደደው እና እያስከበረው መጣ። እናቱም በልጇ ህይወት ተደሰተች።ሃሳቡ ቀረላት።አደራዋንም ለልጇ ሚስት አስረከበች።

    እሱም በሰአቱ ስራውን ሰርቶ ለቤታቸው ደግሞ የሚያስፈልገውን ነገር አሟልቶ ባለቤቱንም ማስደሰት ጀመረ።እሷም እጅግ ትሁትና ጠንቃቃ ሚስት ስለነበረች ትዳራቸውን ለማቅናት ድካም እንዳይሰማው ዘወትር ታበረታዋለች።ወደ ስራ ከመሄዱ በፊት በስርአት ቁርሱን አብልታ፣ የስራ የደምብ ልብሱን ና ከረባቱን እንደ ህፃን ልጅ አስተካክላ አልብሳና አሱባ በደስታ ትልከዋለች።ከመመለሱ በፊትም ቤቷን አፀዳድታ ምግቧን ሰርታና ቡናዋን አፍልታ በገጉት ስትጠባበቅ ቆይታ ሲመጣ በፍቅር ተቀብላ ታስተናግደዋለች።በስራው ኪሳራ ሲደርስበት ሁል ጊዜም ጠንካራና ስኬታማ እንደሆነ ትነግረዋለች።ምን አለፋችሁ በአይኖቿ አይታ ስሜቱን አንብባ ሃዘን መከፋቱን ፥ማግኘት ማጣቱን የምትረዳው እናም የምታጀግነው እንቁ ሚስት ሆነችለት።

    እሱም በሚስቱ መበረታታቱ ይበልጥ ጥንካሬን እንዲላበስ አደረገው።ብቻውን እየኖረ አልባረክለት እና አልበቃው ያለው ገንዘብ ተባርኮ ቤታቸውን በበረከት ሞልቶት ሲያይ <<ልስራ ጠብቂኝ.!!>> እያለ እሷን ያመናጨቀበትንና ያስከፋበትን ቀናቶች እያስታወሰ ተፀፀተ።ሊክሳትም በቁርጥ ተነስቶ በስራውም እጅግ ስኬታማ ማናጀር ሆነ። ከተጋቡ አመት እንደሞላቸውም ሴት ልጅ ወለዱ።እሱም እናቱን አያት በማድረግ አስደሰታት። በአጠቃላይ ሁለቱም በኑሯቸውም ሆነ ልጅ በማፍራታቸው ቤተሰቦቻቸውን አስደሰቷቸው። ልጃቸውን እያሳደጉ ራሳቸውንም ችለው መኖራቸው ለቤተሰቦቻቸው ትልቅ እረፍት ሆነላቸው። እነሱም በደስታ ሙሉ ሆነው ወልደው ከብደው ጥሩ ኑሮን መኖር ቀጠሉ።

     ምንም እንኳን ትዳር ብስለትን ብጠይቅም የሃብት አለመትረፍረፍ ግን ሊያግደው እንደማይችል አመነበት። ትዳርም እስር ቤት አለመሆኑን ራስን ማግኛ መንገድ መሆኑን እና የስኬት መሰላል መሆኑን ተረዳበት።

" ከአንድ ስኬታማ ወንድ በስተ ጀርባ አንዲት ጠንካራ ሴት አለች..!!" የሚሉ ብዙዎች ቢሆኑም እሱ ግን
ያች ጠንካራ ሴት ከጀርባው ሳትሆን ከጎኑ ናት ሲል ይደመጣል።ለአብዛኛው የወንድ ልጅ ጥንካሬ ራሱ ብቻ ሳይሆን ከጎኑ ያለችዋ የሴት ልጅ መሆኗንም በገዛ ሚስቱ ይመሰክራል።እዚህ ለመድረሱም ጉልህ ሚና ያላት በመሆኗ እጅግ ይኮራባታል።ከዚህም የተነሳ

የሱ የስኬት ምንጭ እሷ መሆኗን ሲመሰክር

"ከአንድ ስኬታማ ወንድ ጎን አንዲት ጠንካራ ሴት አለች..!!"

ሲል በብዙዎች ዘንድ ይደመጣል።

            ✍ ማዕረግ ፀደቀ

       ግንቦት /08/2018 ዓ.ም
       ባህር ዳር ዩኒቨርስቲ

❤3👏2🥰1

192 viewsedited 15:48