🇺🇿 Саволномани хато ёки тўлиқ бўлмаган ҳолда тўлдирган фуқаролар учун автоматик огоҳлантириш тизими жорий этилди

Айрим ҳолларда саволнома фақат бир шахс номидан тўлдирилиб, у билан бир хонадонда яшовчи бошқа аъзолар киритилмаяпти.

Эслатиб ўтамиз: қариндошлик даражасидан қатъий назар, бир хонадонда яшайдиган барча шахслар бирга рўйхатга олиниши шарт.

Шунингдек, мавжуд ер майдонлари, етиштирилаётган маҳсулотлар, қорамол ва паррандалар сонини тўлиқ кўрсатмаслик ҳолатлари ҳам аниқланмоқда. Бундай камчиликлар ахборот тизими орқали текширилиб, саволномани қайта тўлдириш учун юборилади.

Онлайн рўйхатдан ўтиб, сертификат олган фуқаролардан платформага яна бир бор кириб, сертификат ойнасидаги огоҳлантиришларни диққат билан текшириб чиқишларини сўраймиз.

Агар хатолик мавжуд бўлса, саволномани қайта тўлдиришингизни тавсия этамиз. Акс ҳолда, 4–28 февраль кунлари маҳалла вакиллари томонидан қайта рўйхатдан ўтказиш ишлари амалга оширилади.

Қонунчиликка мувофиқ, ҳар бир фуқаро ўз маълумотларини тўлиқ ва тўғри киритиши шарт. Рўйхатга олишдан кўзланган мақсад — аҳоли ва қишлоқ хўжалигининг ҳақиқий ҳолати бўйича ишончли маълумот тўплашдир.

Айнан шу маълумотлар асосида таълим, тиббиёт, ижтимоий ҳимоя ва инфратузилма соҳаларида тўғри қарорлар қабул қилинади.

Шу боис барча юртдошларимизни онлайн рўйхатдан ўтишда саволларга масъулият билан, тўлиқ ва тўғри жавоб беришга чақирамиз.

💰 2025 йилда асосий капиталга инвестициялар 591,1 трлн сўмга етди

🏢 Миллий статистика қўмитаси маълумотларига кўра, иқтисодиёт ва ижтимоий соҳани ривожлантириш учун 2025 йил январь-декабрь ойларида барча молиялаштириш манбалари ҳисобидан 591,1 трлн сўм асосий капиталга инвестициялар ўзлаштирилди.

📊 Бу кўрсаткич 2024 йилга нисбатан 10,5 фоизга ошди.

💵 Мазкур даврда жами янги асосий фондларни яратишга қаратилган асосий капиталга хорижий инвестиция ва кредитлар 33,5 млрд АҚШ доллари ёки 422,1 трлн сўмни ташкил этди.

📊 Иқтисодий фаолият турлари бўйича асосий капиталга хорижий инвестиция ва кредитлар:

Ишлаб чиқариш саноати – 33,2 %;

Электр, газ билан таъминлаш – 17,1 %;

Тоғ-кон саноати – 11,9 %;

Қишлоқ хўжалиги – 9,2 %;

Қурилиш – 6,1 %;

Ташиш ва сақлаш – 5,3 %;

Сув билан таъминлаш ва канализация – 2,1 %;

Ахборот ва алоқа – 1,5 %;

Соғлиқни сақлаш – 1,7 %;

Бошқа фаолият турлари – 11,9 %.

🌋 Тоғ-кон саноати ҳажми 77 трлн сўмни ташкил этди

🏢 Миллий статистика қўмитаси маълумотларига кўра, 2025 йилнинг январь-декабрь ойларида саноат ишлаб чиқариши таркибида энг катта улуш ишлаб чиқариш саноати ҳиссасига тўғри келиб, ҳажми 947,2 трлн сўмни ташкил этди.

📊 Секциялар бўйича саноат ишлаб чиқариши ҳажми қуйидагича:

— ишлаб чиқариш саноати – 947,2 трлн сўм (86 %)

— тоғ-кон ва очиқ конларни ишлаш – 77 трлн сўм (7 %)

— электр газ буғ билан таъминлаш ва ҳавони кондициялаш – 70,8 трлн сўм (6,4 %)

— сув билан таъминлаш, канализация тизими, чиқиндиларни йиғиш ва утилизация қилиш – 6,1 трлн сўм (0,6 %)

🇺🇿 Аҳолидан келган саволларга жавоблар

Нима учун саволномада уй қандай материалдан қурилгани ва ҳожатхона шароитигача сўралмоқда?
Барча давлатларда бундай кўламдаги йирик рўйхатга олиш тадбирларини ўтказиш Бирлашган Миллатлар Ташкилотининг Аҳолишунослик жамғармаси ва бошқа халқаро ташкилотлар тавсияларига кўра ишлаб чиқилган саволномалар асосида ўтказилади.

Уй-жойнинг қандай материалдан қурилгани ва ҳожатхона шароити каби саволлар аҳолининг яшаш шароитларини холис ва тўғри баҳолаш мақсадида киритилган.
Ушбу маълумотлар:
- аҳолининг турмуш даражасини аниқлаш;
- коммунал хизматлар, уй-жой ва инфратузилмани яхшилаш бўйича лойиҳаларни амалга ошириш;
- ҳудудларни ривожлантириш дастурларини режалаштириш учун зарур.

Маълумотлар солиқ солиш, жарима ёки текширув мақсадида эмас, балки фақат умумий статистик таҳлил ва давлат режалаштируви учун қўлланилади.

Ушбу рўйхатга олиш тадбири учун сарфланаётган маблағга мактаб ёки боғча қурса бўлмайдими. Нега керак бу тадбирни ўтказиш?
Рўйхатга олиш — давлатнинг стратегик режалаштириши учун асосий ахборот манбаи ҳисобланади.

Айнан шу маълумотлар асосида қаерга мактаб, боғча, шифохона, уй-жой ва инфратузилма объектлари қурилиши аниқ белгиланади.

Аҳолини рўйхатга олиш орқали:
- қайси ҳудудда болалар сони кўплиги;
- қаерда мактаб ёки боғча етишмаслиги;
- аҳоли қандай шароитда яшаётгани аниқ маълум бўлади.

Агар бундай аниқ маълумотлар бўлмаса, мактаб ёки боғчалар нотўғри жойда ёки эҳтиёждан кам ёки ортиқ қурилиши мумкин. Шунинг учун рўйхатга олиш — бу алоҳида харажат эмас, балки давлат маблағларини тўғри ва самарали сарфлашга хизмат қиладиган муҳим асос ҳисобланади. Шундай экан, бир неча миллиард сўмлик рўйхатга олиш тадбири келгуси ўн йилликларда давлат маблағларини тўғри йўналтириш имконини беради.

Нима учун давлатга менинг уйим, ишим ва боғим ҳақида бунча маълумот керак?
Давлатга уйингиз, ишингиз ва боғингиз ҳақидаги маълумотлар солиқ ёки текширув учун эмас, балки аҳолининг турмуш даражаси ва яшаш шароитини тўлиқ ўрганиш, шунингдек, инфратузилма эҳтиёжларини аниқлаш учун керак.
Бу маълумотлар орқали қайси ҳудудда уй-жой ва коммунал хизматлар етишмайди, аҳоли турмуш даражаси қандай ва болалар мактаби, боғча ёки қишлоқ хўжалиги инфратузилмасини қаерда ривожлантириш кераклиги аниқланади.

Яъни, рўйхатга олиш давлатнинг ижтимоий ва ривожлантирувчи дастурларини самарали режалаштириши ва ресурслардан тўғри фойдаланиши учун муҳим асос бўлиб хизмат қилади.

Мен талабаман ва олий таълим ташкилотининг ётоқхонасида яшайман. Мен рўйхатдан ўтиш жараёнида “Турар жой манзили” сифатида қайси манзилни кўрсатишим керак, доимий яшаш жойимними ёки ётоқхона манзилиними?
Талабалар ўқиш давомида яшаб турган манзилида рўйхатдан ўтадилар. Агар талаба олий таълим муассасаси ётоқхонасида яшаса - у ҳолда шу ётоқхона манзили бўйича рўйхатга олинади. Агар талаба ижара уйда ёки қариндошининг уйида яшаса - у ҳолда айни шу манзил бўйича рўйхатдан ўтади.

Бу қоида барча олий таълим муассасалари талабаларига тааллуқлидир.

Онлайн рўйхатдан ўтишда фаол иштирок этинг!
Эътиборингиз учун раҳмат!