➡️Shu nuqtayi nazardan, «Toshkent shahar elektr tarmoqlari» MCHJda 2023–2025-yillarga mo‘ljallangan jamoa shartnomasining 2025-yildagi ijrosi yuzasidan mehnat jamoasi konferensiyasi yuqori tashkiliy saviyada tashkil etildi. Tadbirda soha vakillari, jamiyat rahbariyati, kasaba uyushmasi tashkiloti mas’ullari hamda hududlardan saylangan delegatlar ishtirok etdi. Kun tartibiga muvofiq, jamiyat rahbariyati hamda kasaba uyushmasi qo‘mitasi raisi tomonidan jamoa shartnomasining ijrosi yuzasidan batafsil hisobotlar taqdim etildi.

➡️Hisobotlarda xodimlar uchun munosib mehnat sharoitlarini yaratish, ularning ijtimoiy himoyasini kuchaytirish, rag‘batlantirish va har tomonlama qo‘llab-quvvatlash borasida amalga oshirilgan chora-tadbirlar keng qamrovda yoritildi.

➡️Tahlillarga ko‘ra, 2025-yil davomida xodimlarni ijtimoiy qo‘llab-quvvatlash yo‘nalishida sezilarli ishlar amalga oshirilgan. Jumladan, 47 nafar ishchi-xodimlarning farzandlari «VEST KAMP», «Konstruktor», «Ugam» va «Anor» bolalar dam olish oromgohlarida sog‘lomlashtirildi. Yil davomida bo‘lib o‘tgan konsert dasturlarida xodimlar maroqli hordiq chiqardilar. Bundan tashqari, bayram sanalari munosabati bilan kam ta’minlangan hamda boquvchisini yo‘qotgan oilalarga oziq-ovqat mahsulotlari yetkazib berilgan.

➡️Shuningdek, jamoa a’zolari uchun ichki turizmni rivojlantirish maqsadida Namangan, Buxoro va Xorazm viloyatlariga sayohatlar tashkil etilgani xodimlarning ijtimoiy faolligini oshirish va jamoaviy muhitni mustahkamlashga xizmat qilgani ta’kidlandi. Konferensiya davomida kun tartibidagi masalalar yuzasidan atroflicha muhokamalar o‘tkazildi. Savol-javoblar jarayonida mavjud yutuqlar bilan bir qatorda ayrim dolzarb masalalar ham ko‘tarilib, ularni hal etish bo‘yicha aniq taklif va tavsiyalar ilgari surildi.