💙فقرة تسليم الراية 💙

حاليا يا 025 بقيتوا سناير و في عاتقكم مسؤولية ما هينة تجاه أخوانكم من دفعة 027 ، في الفقرة دي حيستلموا منكم لواء الجهاد في الصف التالت و نسمع منكم نصائحكم ليهم

الوصية الأولى 💙:

السلام عليكم ورحمة من الله تغشانا وتغشاكم آل 027 الكرام حللتم اهلا ونزلتم سهلا
الرحلة امكن تكون من منظور اي طالب/ة شهادة شاقة بس لمن تحتسب الأجر من ربنا سبحانه وتعالى ح تهون جدا جدا جدا كلنا مرينا بلحظات كان فيها الهدف بعيد والرؤية شبه ضبابية بس معية ربنا كانت هي حجر الأساس والدافع عشان نكمل
هي فترة مصيرها تعدي مهما كانت بس خليها تعدي وانت راضي/ة عن نفسك كنا بنسمع كتير من السابقين انو لازم نستمتع بأي لحظة لانو ح تبقى ذكرى في رصيف الأيام ودا الحصل ح تمر وتتذكر قدر شنو انت كنت مستصعب الأمر بس طلع أهون بكتييير واخيرا البخلي النهايات هينة عليك هو الاستعداد الصح و الانضباط
لازم تكونوا موضحين كل أهدافكم في الفترة الجايه حتى لو ما عندكم جدول عشان ما تضغط على نفسك آخر فترة وتحس بعدم الإنجاز ( مع انو عادي جدا وطبيعي تحس بالشعور دا حتى لو منجز)
بر الوالدين اهم شيء لانو حياتك بدونو حتكون جحيم والعياذ بالله +أكثرو من الدعوااات وخلي اي زول يدعي ليكم
علاقتك مع ربنا هي البتخليك متصالح جدا مع نفسك واي ظرف طارئ وبتترجم في كل شؤون حياتك لانو بدون ربنا ماف حياة اصلا و التوفيق نعمة من ربنا اللي احد صفاته الواهّب ف وحاشاه يردك خائب

İnsan Rabbinden uzak yaşıyorsa yalnızdır``

منتظرين نسمع عنكم كل خير وتواصلوا المسير بأفضل النتائج وح تكونوا مسك الختام يا أبطال دعواتنا معاكم داااايماً بإذن الله تعالى وفقكم الله وسدد خطاكم وبلّغكم مُبتغاكم... والسلام عليكم

💙عُلا علي عثمان علي💙

الوصية الثانية💙 :

إلى أبطال دفعة 027..
​أهديكم هذه النصيحة من واقع تجربة شخصية وطويلة في الصف الثالث، وأشارككم فيها أخطاءً وقفتُ عليها لتعبروا أنتُم بأمان وتصلوا لأعلى الدرجات:
​1. لا تستهينوا بالدعاء والصلة بالله (سر التوفيق الأول):
اعلموا أن كل شيء في حياتكم توفيق من الله سبحانه وتعالى؛ تنفسكم، لسانكم حين يستغفر، وجهدكم.. كله بإذن الله.
​حافظوا على صلواتكم واجعلوا لكم ورداً يومياً من القرآن ولو آيتين، المهم ألا تنقطعوا.
​أكثروا من الدعاء فالدعاء يغير الأقدار، ولا تستهينوا بسبل القربات كقيام الليل وصلاة الزوال. ادعوا الله دائماً أن يوفقكم ويسدد خطاكم.
​2. اجتهدوا ولا تضيعوا الوقت:
استغلوا كل فرصة وزمن متاح عندكم، وابتعدوا تماماً عن المشتتات والسهر . الجوال لازم يكون مقفول تماماً وبدون أي تهاون.
​3. واجهوا نقاط ضعفكم والمواد الصعبة:
لا تتهربوا من المواد أو الأبواب التي لا تحبونها، ولا تتركوا المشاكل والدروس المعقدة تتراكم وتتأجل. المواجهة المبكرة هي الحل الوحيد.
​4. حل الامتحانات سرّ النجاح (القراءة شيء وحل الامتحان شيء آخر):
لا تكتفوا بالقراءة النظرية؛ القراءة تُعطي المعلومة، لكن حل الامتحانات هو ما يدرب عقلك على الاسترجاع والتعامل مع ورقة الامتحان.
​أول ما تخلصوا أي باب: طوالي حلوا أسئلته كاملة عشان تثبتوا المعلومة.
​حلوا امتحانات شهادة سابقة (أقل شيء 10 سنوات): وزعوا الامتحانات على جدول، وحلوها بشرط التزام زمن الامتحان الحقيقي وكأنكم داخل اللجان.
​5. تنظيم الوقت حسب نوع قراءتكم:
​لطلاب المنازل: استغلوا المساحة الزمنية الكبيرة في الحل المكثف والمراجعة المستمرة.
​لطلاب المدارس: راجعوا درس اليوم بيومه. وفي نهاية الأسبوع (الجمعة والسبت) خُصص وقت لمراجعة دروس الأسبوع كاملاً وحل امتحانات في المواد التي تميزتم فيها.
​استعينوا بالله، واعملوا بهذه الأسباب، وستفرحون بالنهاية بإذن الله! بالتوفيق يا أبطال.

💙رؤى كمال أحمد سعيد💙

الوصية الثالثة 💙:

نصيحة دايرة أوجهها للدفعة المتحنين السنة دي دفعة 27

عايزة اتكلم عن طريقة الدراسة :
أولاً : الطريقة دي اي زول بشوف الطريقة البتناسبو والهو بقدر يرتاح بيها انا م بجبرك انك تمشي ب طريقة معينة لا انت/ي شوفي البتناسبك.
ثانياً : إلا يكون عدد الساعات كتير هسي ممكن اكون بقرا ستة ساعات وفي النهاية م فهمت شي حشو بس نظام انتهيت لكن اخير اقرا ساعتين يكونوا مركزات وفاهمة اي حاجة يعني الكلام دا م معناهو انو بقول ليك اقري ساعتين المغذى أنو اقري بفهم م بوقت اقري بتركيز م بعدد الساعات ولو تعبت/ي اقفلي الكتاب طوالي
ارقد/ي لانو لو واصلت/ي ح تكون/ي ضاغط/ة على المخ وهو م مستقبل حاجة بس بتمشي عشان تقول/ي انتهيت لكن جرب/ي ارجع/ي اسألي نفسك ح تلق/ي روحك م فاهمة شي عشان كدا الراحة اهم والقراية يتركيز وفهم دي حاجة عظيمة يعني بتكون ثابتة لوقت طويل.
ثالثاً : اقرأ/ي كأنو في زول قدامك بتشرحي ليه في حاجة اربطي الحاجات البتقريها ب امثلة بالواقع.
رابعاً : لمن تقرأ/ي قسم/ي الصفحة وامسك/ي جزء جزء وبعد تخلص/ي اقفل/ي الكتاب حاول/ي اشرح/ي لنفسك كأنو استاذ/ة وكد بتشرح 🤣المهم اتكلم/ي عن الكلام القريتيهو في الصفحة واستفدت/ي شنو منها خامساً : اقرأ/ي بورقة وقلم م ساي اكتب/ي لخص/ي سمع/ي من راسك وكدا وزي ما قال الإمام الشافعي رحمه الله "العِلمُ صيدٌ والكتابةُ قيدُهُ * قيِّدْ صيودَكَ بالحبالِ الواثِقَهْ فمِنَ الحماقةِ أنْ تصيدَ غزالةً * وتتركها بين الخلائقِ طالقةً"
الحكمة: من يكتسب علماً ولا يكتبه، كمن يصيد غزالة ثم يتركها حرة طليقة تفلت منه بسهولة.
سادساً : انو اظبط/ي مواعيد النوم يعني قراية الصباح مفيدة اكتر من قراية الليل مثلاً تصحى/ي الساعة 4 ص تصلي ركعتين وتدعي ربنا يوفقك وتقول/ي أي حاجة نفسك فيها لأنو الدعاء في الوقت دا مستجاب ونصلِّ على الرسول وتستغفر/ي كتيرر لحدي م الصبح يأذن بعداك تصلي الصبح وكدا بتكون/ي شحنت/ي نفسك روحياً وبعدا تقوم/ي على القراية المهم تقرأ/ي فيها حاجات انت/ي م فاهماها لانو المخ ح يكون فاضي ي داب داير يستقبل الحاجات ف بستوعب بسرعة م بقول ليك اقرأ/ي حاجات فهم بس لا الحفظ يخخ حاجة عظيمة برضو يعني المهم تقري لحدي م تحسي روحك تعبتي وكدا تعملي ليك بريك ساعة او ساعة ونص المهم بشرط تنوم/ي فيها لا تمسك/ي تلفون لا تحضري عشان المخ يرتب المعلومات طيب بعداك ح تقومي تواصلي بنشاط، طيب مواعيد النوم لو بالغت/ي لو بالغت/ي تنوم/ي 10 ونص المهم ساعات النوم تكون كافية طيب يعني من 8 ل 7 ساعات وعندك ساعة او ساعتين بالنهار كدا الجسم بكون مرتاح والمخ قادر يستقبل المعلومات المهم تنوم/ي بدري وتاكل/ي وتشرب/ي كويس.
سابعاً : مواعيد الصلاة لازم الصلاة تكون في مواعيدها من تسمع/ي الله اكبر دي طوالي تقفل/ي الكتب دي وتمش/ي تتوضأ/ي م تقولي بس دقيقة النتم الصفحة دي والنحفظ التعريف دي اول حاجة ح تكون/ي خسرت/ي حاجتين أولها والأهم انو أخرت/ي مواعيد الصلاة والثانية أنو بتكون/ي قايل/ة نفسك حفظت/ي وانت/ي بتخم/ي فيها سريع عشان بتفكر/ي الصلاة يعني لا الصلاة في مواعيداها لا المعلومة ثابتة. وبرضو نخصص وقت معين نقرأ فيه قرآن لأن القرآن ما زاحم شيئاً إلا باركه.
ثامناً : ودي اهم نقطة انو تبعد/ي عن حاجة اسمها تلفون عديل اعتبر/ي م عندك تلفون بس ولا تشيل/ي وقت الفراغ ولا شي التلفون تعتبروا منبه بس لو شلتوا شيلوا لو داير/ة تحضر/ي حصة او داير/ة تسأل/ي عن مسألة او حاجات زي دي لكن نهائي م تعتمد/ي عليه لانو بالجد بدمر/ك وعندك بعدك ثالث وقت كافي انك تعوض/ي الفترة الم شلت/ي فيها التلفون التلفون والناس الفيه م طايرين قاعدين بإذن الله وبتلقوهم لكن لو شلتوا ممكن تضيع/ي تعبك وجهدك على الفاضي زي المثل الفي كتاب العربي "يداك اوكتا وفوك نفخ" يعني ح تكون/ي زي قصة الراجل النزل البحر وم ربط الوكاء كويس وح تكون/ي بتقرإ/ي وبتفضي ببسب التلفون انت/ي بتقول/ي اي بشيلو نص ساعة بس لكن ح تلق/ي الزمن جرا والوقت ضاع وح يبقى الزمن الضاع دا على حساب نومك وم ح تنوم/ي كويس وبكرة م ح تكون/ي نشيط/ة ولا اصلا ح تقدري تصحى/ي بدري واليومكلو ح يكون تعب وإرهاق المهم ابعد/ي من التلفون.
أخيراً : حلول الإمتحانات والمريحات كل ما تقرأ/ي ليك باب امش/ي حل/ي فيه بذات امتحانات شهادة والحل الكتير بثبت الإجابة وبعودك على طريقة الإمتحان يعني من ناحية أنا خايفة من الإمتحان دي م ح تكون في لأنو انت/ي بعد دا عارفة طريقة الإمتحان كيف وتكرار الاسئلة الفيها ولمن تكمل/ي المادة تحل/ي إمتحان كامل بزمن يعني كأنو خلاص دخلت/ي الإمتحان وتصحح/ي لنفسك من الإجابات النموذجية وتشوف/ي الأخطاء وين وبكدا بتكون/ي حليت/ي مشكلة الزمن وحددت/ي الزمن البتنتهي فيه يعني مثلا بعد تحل/ي كتير الزمن البتحل/ي فيه ح يكون ماشي ناقص لانو في تكرار كبير للاسئلة وبس.

دي نصيحتي لكم وإن شاء الله تستفيدوا منها وتكون لكم عبرة قدامكم تقتدوا بيها بإذن الله وربنا يوفقكم ويسهل امركم ويسدد خطاكم ويبلغكم مقاصدكم والسلام عليكم ورحمة الله❤️

💙ملاذ أسامة عثمان على💙

الوصية الرابعة💙:

حيّاكم الله و بيّاكم و جعل الجنَّة مأوانا و مأواكم..
و بعد : السلام عليكم ورحمة الله وبركاته

معاكم أختكم : مآب صلاح أحمد علي
امتحنت شهادة دفعة 25 و حابة أقول ليكم شذرات كدا من النصائح علّها تُضئ ليكم طريقكم و تكون مشعل لأحدكم.

*شذرات على طريق الأمل*

يا أصحاب الهمم العالية والقلوب الصادقة، إن مرحلة الشهادة السودانية ليس مجرد امتحان عادي، بل هي ميدان تربوي عظيم يُهذب النفوس، ويُعلمنا معنى الاعتماد الحقيقي على رب العالمين قبل الأسباب. ومن واقع التجربة والمسير، أضع بين أيديكم هذه الأضاءات لعلها تكون لكم مشعلاً يُبدد عتمة التوتر والقلق:

*التوكل الحقيقي (سرّ الطمأنينة):*

اعلموا أن الأخذ بالأسباب واستذكار
الدروس واجب، لكن القلب يجب أن يبقى مُعلقاً بمُسبب الأسباب. ضعوا نصب أعينكم دائماً قول الله تعالى: {وَتَوَكَّلْ عَلَى الْحَيِّ الَّذِي لا يَمُوتُ} . حين تتزاحم الكتب وتضيق الساعات، تذكروا أن النجاح ليس بحولكم ولا قوتكم، بل بتوفيق الله وفضله وحده.

*قوة الدعاء وسلاح اليقين:*

لا تُقللوا أبداً من أثر الدعاء، اجعلوا لكم مع الله خلوة، ولو بركعات قليلة في جوف الليل، وبسجدات صادقة تَبثون فيها شكواكم وعجزكم. ادعوا بيقين الإجابة، فوالله ما خاب من استند إلى ركن الله الشديد. تذللوا إليه في كل مسألة صعبة، وستجدون لُطفه يسبق سعيكم.

*إدارة الذات قبل إدارة الوقت:*

المرحلة تحتاج إلى نَفَسٍ طويل وصبر جميل. لا ترهقوا أنفسكم بالمقارنة مع الآخرين؛ فلكل منا رحلته الخاصة وبصمته الفريدة. اجعلوا جدولكم متوازناً يجمع بين الجد واجتهاد المذاكرة، وبين الراحة التي تُجدد طاقتكم.

*اليقين بالخير فيما اختاره الله:*

اسعوا واجتهدوا، واعلموا أن ما قدره الله لكم هو الخير المحض، حتى لو خالف ما تظنونه. فقلوبنا لا تدرك عواقب الأمور، وتدبير الله لنا أعظم بكثير من كل أحلامنا.

ثقوا بأنفسكم، وأحسنوا الظن بربكم، وكونوا على أتم الاستعداد لنيل ثمرة تعبكم قريباً بإذن الله. نسأل الله أن يفتح عليكم فتوح العارفين، وأن يُنير أبصاركم وبصيرتكم لكل خير. و بإذن الله ح نكون معاكم في الرحلة متى ما احتجتوا لينا ح تلقونا معاكم بإذن الله، حبيت اذكر الجوانب دي لأنها هي فعلاً فارقة في المرحلة دي و كل مراحل الحياة، لكن الكلام عن الدراسة و طرقها ح تلقوا منصات كتيرة و حتى المدرسة بتقولها ليكم و إن شاء الله يارب نسمع بيكم في أعلى المقامات 💙💙💙.

💙مآب صلاح أحمد علي💙

الوصية الخامسة💙:

قبليها في صورة لطيفة من تالت لصاحبة الوصية حبت تشاركها معاكم 💙

السلام عليكم ورحمة الله وبركاته
مساءكم خير وبركة يا مِسك الختام 🤍
معكم أختكم أمنية أحمد حسن مية من دفعة 25 لله الحمد من نعم الله علي قدرت أدخل ثالث ثانوي وقدرت أجلس لإمتحان الشهادة وأتفوق ومن نعمه علي الحمدلله وفقني لمشاركة رسالتي التي تحمل بعض النُصح 🤍 ، كون الواحد يدخل ثالث ويختار مساقه وينضم لقناة مثل هذه القناة دي كلها نِعم تسكُننا ونجهلُها لازم نحنا كبشر نستشعر نعم الله علينا ونحمده ، فالحمد لله حمداً لا يبلغُ منتهاه .

أكتب لكم بعض النصائح من خلال تجربتي مع رحلة ثالث ، ثالث مرحلة ليست بالصعبة وأيضاً ليست بالهيّنة فأتمنى من كل طالب/ة موجود بالقناة وأنا على يقين إنه كل طالب /ة من إنضمامه للقناة إلا عنده هدف ، فأنتو كممتحنين شهادة بتمنى بتمنى من كل واحد فيكم يدخل المرحلة دي يدخل و يكون كله *"يقين بثلاث أمور ولا أكثر "* وهي :
1- *(اليقين بالله)*
حقيقةً يا مِسك الخِتام اليقين بالرب له حيّز كبير في تفوقك في ثالث وليس نجاحك نعم تفوووق عديل فبتمنى منكم تدخلوا المرحلة دي وأنتو كلكم يقين بربكم موقنين أنه الله جل وجلاله مهما كان إجتهادكم قلَّ أو كثُر الله معكم وأنتو بتسأل من بيده ملكوت السموات والأرض وكونو نجاحك أو تفوقك أو النسبة الأنت بتتمناها ما بتنقص من ملكوت ولا شيء أنت وبتسأل ربنا سُؤلك أسأله من فضله وكرمه ولطفه ، وكون على يقين بـ إجابة الله لك وإيتآءك سُؤلك وبتمنى قبل ما تدعي تكون عارف أنواع الإجابة "نلت سُؤلك ، أُجلَ لك للآخرة ، دُفع به أذى كاد أن يمسّك" ، وأيضاً يا شباب قبل ما تدعو كونو عارفين اركان الدعاء كيف ! يعني قبل ما تدعي في حاجات يفضل تعملها وهي : حمد الله والثناء عليه ، والصلاة على نبيه وختام الدعاء بالصلاة أيضاً وأهم ما في ذالك اليقين بالإجابة.

2- *(اليقين بالنفس)* : الإنسان حتى يصل لمراده لازم لازم يكون موقن بنفسه كيف يعني !؟ يعني أنت تكون واثق بنفسك أنت قد الموضع الوَضعت نفسك فيه فأنتو الآن وضعتو نفسكم في موضع التفوق وليس النجاح لأنو أي طالب/ة وجوده في القناة بدل على مدى حلمه وغايته ، المطلوب منك تقول لِنفسك أنا مدام دا حلمي وانا وضعت نفسي أمام الغاية دي فأنا ح أقدر *بإذن الله 💛*.

3- *(اليقين بِقدراتك)* : كيف اليقين بالقدرات مش هو نفسه اليقين بالنفس!! متأكدة السؤال خطر على بال الكثيررر منك بس لأ اليقين بالقدرات بمعنى كونك دخلت ثالث واتخذت خطوة تحديد المساق دي براها يقين بقدرة انك قد المجال فيا غاليين أكملو بنفس المنوال كونو على يقين بأنه أنت زي ما اخترت مساقك قادر تتجاوز اي عترة فيه فناس العلمي الواحد بقول أنا م بقدر على التيارية ليه يا طالب أنت نسيت كل الفصول في الفيزياء وركزت على هذا الفصل كونك قدرت تحل كل مسألة في اي فصل دي قدرة فأكمل وقول انا قدها وأبداً ما تثقلها وتصعبها على نفسك وأنت قبل ما تختار مساقك رجاءً رجاااءً إستخيروا ايوه إستخيروا فيمكن أنت رغبتك مساق علمي وربي كاتب ليك الخير في المساق الادبي فإذا إستخرت الرؤية بتضح ،
*﴿ولا يُكلف الله نفساً إلا وسعها ﴾* الكثير له فهم خاطيء للآية بقولو معناها الحاجه دي انا ما قدها ف اخليها لا يا الغالي أنت اذا م قدها ربنا أبداً ما بضعها قدامك .
وأسفة جداً على الإطالة وبتمنى تكونو إستفدتوا من رسالتي ، وربي يوفقكم أين ما كنتو ويكتب لكم الخير ويرضيكم به ، وإن شاء الله نشوفكم في أعلى المراكز ، وأسأل الله أن يجبر بخاطركم جبراً يتعجب منه أهل السموات والأرض ، ويَبشِّركم بالنجاح الباااهر المُدمع ويبلغكم يوم النتيجه وكل واحد فيكم نال سُؤله و راضي بنسبتو وأسأل الله رب العرش العظيم أن يبلغكم ذاك اليوم أنتو وأهلكم في عفو وعافية ❤️.

💙أمنية أحمد حسن 💙

الوصية السادسة💙:

الحمدلله ربِّ العالمين ربنا أكرمني و وفقني الحمدلله كثيرًا 🤍..
شوية كلام ممكن يفيدكم يا 2027 و للجميع .
عايزة أقول ليكم ما تتعبوا في التفكير في اللي ح يحصل قدر ما أنتم بتعملو عشانه ، و الله لو أحسنتم الظن بالله ح تنجو و ربنا رحيم و ح يوفقكم ويعينكم، صح هي سنة صعبة أو هي الأصعب بالنسبة للبخوضها هي أول عقبة في حياته لكن ما دمت دعيت و سعيت و دعيت و دعيت ح تتوفق بغير حول منك و لا قوة الله أرحم بك من أمك الله و فضله واسع بس أنت أسأل و أعمل و ما توقف عمل مهما كانت القراية صعبة بالنسبة ليك استمر ما توقف و ادعي الله في قرايتك دي إذا في شيء وقف ليك و تذكروا دائما أن لا حول و لا قوة إلا بالله  .

لصاحبته💙

( حبت ما يتذكر اسمها ياريت تضموها في دعواتكم و انه ربنا يسهل أمرها و ينولها مرادها💙💙 )

💙التكريم في دقيقة💙

فيه حتمروا على كل الشهادات ، و مقتطفات من الجزء الأول من التكريم ،عشان نوثق بيه مجهود جميع طلاب القناة
اخليكم مع الفيديو🤩

الفقرة دي و فقرة تسليم الراية بالجد هم كنز قيم نلناه جميعا ، حتلاقوا قصص بتلامس الفؤاد و حتكون قريبة لواقع أي طالب ممتحن أو طالبة ممتحنة. و النصائح دي كانت خلاصة سنتين كاملات من الخبرة فبالجد يا بختكم بيها يا 027 و يا بختكم يا 025 بالأجر ، حقيقي الزول سعيد بكمية الوعي و المثابرة الشافها و اتعلم منها معاكم ... اخليكم مع فقرة:

قصص تروى و يبقى الأثر 💙

القصة الأولى 💙

فقرة نصوص توثيقية كتبتها في ثالث 💕.

دا لمن جيت ماشّة الامتحان مسافرة ليه من الخرطوم لي مروي.
عشان رقم جلوسي طلع هناك.

-خطوة أخرى-

صباح الخير
أتمنى أن يكون صباحكم جيداً، و أن تكونوا جميعاً بخير.
كنت أود إخباركم، اليوم أخطو بخطى ثابتة نحو مدينةٍ، أعتقد أنّها المدينة التي سأحقق فيها حلمي، لا أعلم هل سأحققه أم لا، لكنني أعلم أنّه حتى و لو لم يتحقق، فهو الخير لي، فأنا لا أعلم الغيب، و لست بحكيمةٍ، و لست بعالمةٍ للخير و الشر، أنا مجرد إنسان جهول و كل البشر جهولون.
تزورني الأسئلة أحيانًا، هل سيتحقق؟ أم لا؟ كيف
سأشعر عند تحققه؟ و ماذا عن عدم تحققه؟ لا أعرف حقًّا. و لكنّي لست مهتمة بتلك اللحظات، ليس لدي الوقت لأفكر فيها، و لا أقوى على تخيلّها.
تأتيني عند الحماس لحظات تحقيق الحلم التي لونها خيالي بأبهى الألوان، و عند اليأس لحظات الحزن و الخيبة حين العجز، حين أعجز عن الوصول إلى ما أصبو إليه، و قد سودتها ظلمتي بلونٍ، لم يتطرق العالم إلى تسميته؛ لشدة غموقه. و هذا أكثر من طبيعي، فقد خُلِقنا مستجيبين للخير و الشر، تطلى وجوهنا بإبتسامة عريضة عند التعرض لما نحب، و جزوعين عند التعرض لمصاعب الحياة، إلا القليلون ممن منّ عليهم الخالق - سبحانه وتعالى - بالثبات و الصبر. ولله الحمد و المنّة، لأنّني أسترجع إيقاعي سريعاً.
أودّ منكم الدعاء لي، رجاءً.. فإنّ دعواتكم هي التي تحركني و تدفعني كالصاروخ إلى تقليب الصفحات، و مراجعة الوحدات، و مقارعة الرياضيات.
و السّلام.

......
بحبّ العربي شديد قمت كتبت دا يوم العربيّ

بنت عدنان

سلامٌ من الله يغشاكم ورحمته ترعاكم، وبركاته تحفّكم.
و صلاةٌ و سلامٌ على خير من وطِئ الأرض، وخطا عليها، محمد صلّ الله عليه وسلم، وعلى أصحابه و آل بيته أجمعين.
أمّ بعد...
فقد طرقت حروف الشعراء مدخلنا، و حيانا البيان و المعاني، و أقنعنا حسن التعليل بحجته، و أدهشنا المعنى البعيد للتورية، و فُرِض على كلامنا القواعد، فها هي بنت عدنان آتيةٌ، و تسألنا عن مدى محبتنا لها، بورقةٍ تسطر أعلاها اسم اللغة العربية.
أتتك الضاد بذاتها.. تختال ضاحكةً
من الحسن حتى كادت أن تتكلما
و زارتك التورية مقهقةً
لم تظنّ أنك بحيلتها ستُخدعا
و تكلمت حروف التوكيد قائلةً
أي واحدةٍ منا ستؤكدا؟
و جاءتك القوافي مهرولةً
أي واحدٍ منا ستُفضلا؟


دا يوم الكيمياء صحباتي كل واحدة في ولاية بطمّن فيهم كنت 😂.

كُتب عليها الكيمياء

سلامٌ من الله يهدأ به موضع القلق و التوتر، و يذهب به الخوف و الضعف، يعقبه سلامُ شخصي الضعيف و العاجز، و الذّي يرجو ويحلم بتسهيل الأحوال والأوضاع، و تلطيف الأجواء.
صلّوا و سلّموا على أشرف خلق الله، سيّد قريش، محمد صلّ الله عليه وسلم.
لا أودّ أن أطيل عليكم المقدمات، فالإيجاز هو خير الكلام.
قد حيتني أطياف مخاوفكم طوال هذا اليوم، و زارني توتركم، فأسال الله التخفيف عليكم. وأنّي لمدركة لأسباب خوفكم و قلقكم، وهي "العضوية" التى طرقت ابوابنا، و"الأكسدة" التي أذهبت نعاسنا، و التركيز المولاري الذي ألمنا وأزهق أرواحنا.
و لكن لن يفيد الخوف، أوصيكم بالتوكل، و التسبيح و التحميد و التهليل، و لا إله إلا أنت سبحانك إني كنت من الظالمين.
و تذّكروا... فقد كان في بطن الحوت أمل، فما بالكم بورقةٍ كتب عليها الكيمياء؟

{ وَذَا ٱلنُّونِ إِذ ذَّهَبَ مُغَـٰضِبࣰا فَظَنَّ أَن لَّن نَّقۡدِرَ عَلَیۡهِ فَنَادَىٰ فِی ٱلظُّلُمَـٰتِ أَن لَّاۤ إِلَـٰهَ إِلَّاۤ أَنتَ سُبۡحَـٰنَكَ إِنِّی كُنتُ مِنَ ٱلظَّـٰلِمِینَ (87) فَٱسۡتَجَبۡنَا لَهُۥ وَنَجَّیۡنَـٰهُ مِنَ ٱلۡغَمِّۚ وَكَذَ ٰ⁠لِكَ نُـۨجِی ٱلۡمُؤۡمِنِینَ (88) }
..........
ودا آخر يوم في الامتحانات

آخر خطوة

سلامٌ من الله تطمئن به القلوب، يعقبه سلام أمةٍ ترجو فرحتكم.
والصّلاة و السلام على ابن سادات قريش، النبيّ الاميّ محمدٍ بن عبدالله.
آخر خطوة نحو الأحلام، نحو لحظةٍ عشناها كثيراً في الخيال، آخر ورقةٍ تسطر أعلاها اسم امتحان، و آخر أسئلةٍ نحلّها في الصف الثالث. طوال هذه السنتين و نحن نحلم، بمجيئ هذه اللحظات، و كتابة آخر إجابات، والتوقف عن ترديد المعلومات.
وأخيرًا، أكتب لكم هذه الحروف المصبوغة بمشاعري المتضاربة، من حماسٍ وخوف، و فرحٍ و حزن. من رغبةٍ في مجيئ الغروب، ومن رغبةٍ في العودة إلى شروق أول يومٍ في الصّف الثالث، و من أملٍ في توفقنا و تفوقنا.
آنساتي صوحيباتي، هذا يومنا، كل أيام الامتحانات هذه، كانت لهم ، لمن ينظرون في ورقنا، و يرسمون عليها بأقلامهم الحمراء.
لكن هذا يومنا، يوم تحريرنا، يوم بهجتنا، اليوم الذّي نتذكر كيف الاستمتاع بالحياةِ، وكيف الفرح مع الصديقاتِ.

مسك الختام، و بهجة الأنام، امتحان اللّغة الإنجليزية، الذّي لطالما عددنا كم بَقِي لقدومه، و لطالما خطّطنا ماذا سنفعل بانتهائه. هذا هو اليوم، الذّي زار خيالاتنا باللّيل والنهار، فعيشوه كأنّكم لن تعيشوا يوم مثله أبدًا، و افرحوا و انسوا الماضي، واجعلوا آمالكم في المستقبل، و ارموا الندم جانبًا، وضعوا الأمل قالبًا.

القصة الثانية💙

السلام عليكم ورحمه الله وبركاته
انا نغم أو كما يحلو لي دكتور نغم 😂❤️
حاختصر ليكم حكايتي و يمكن تكون دافع لشخص ما
انا كنت زيي زي اي طالبة نزلت ثالث ثانوي بشكل روتيني و بدأت دراسة كنت بدرس عادي و أحياناً لا يعني ما كنت ضاغطة نفسي جداً للأمانة
طبعاً نزلنا ثالث في نهاية شهر أربعة و في شهر عشرة اضطريت اسافر و اوقف دراسة لظروف خارجة عن إرادتي فتوكات و سافرت و في الفترة اللي ذكرتها دي كانت المدرسة مخلصة جزئية جداً صغيرة و كانت أغلب الفترة دي احتفالات بالدفعة السابقة فما كنت منجزة شي اقدر امتحن بيه و ما كانت معاي كتب و البلد اللي سافرت ليها ما كنت حاقدر اوفر كتب اختصاراً كنت ما مهيئة خالص لا نفسياً ولا مادياً 🤣
حاولت ارجع السودان عشان اقدر اكمل دراسة لأنه زي ما ذكرت البلد اللي كنت فيها لا متوفر أساتذة للمنهج ولا كتب و لا كان معاي فلاش
و بعد تعب قدرت ارجع لكن للاسف كان نهاية يناير يعني باقي للامتحانات ثلاثة شهور تقريباً
ما كنت مكلمة زول اني حارجع بس كلمت المديرة و كانت رافضة رفض باتاً أنه تنزلني نظامي خوفاً أنه انزل المدرسة ولما رجعت الكل استغرب و الكل كان مقتنع اني مستحيل تفوت السبعين دا لو أنجزت
المهم ضغطت نفسي في الفترة الضيقة دي و استعنت بربنا اولا ثم ماما و اجتهادي لاني ما كنت بمشي لأساتذة كتير
كنت لحد بكرة اول يوم امتحان في مواد ما كنت جاهزة ليها و متجاوزة دروس توكلت على الله و امتحنت و الحمد لله ربنا جبر خاطري و نتيجتي طلعت 84.3 🥹❤️
الحمدلله حمداً كثيراً طيباً مباركاً ❤️
اللي عايزة اقوله للدفعة المُمتحَنة اتوكلوا على رب العالمين و اعملوا العليكم و ما تشككوا في قدراتهم و الله لا يكلف نفساً إلا وسعها لو ما كنتوا قدرها ما كان رب العالمين وضعكم في الموقف دا
و موفقين يارب ❤️
و حاجة اخيرة اكتشفت المديرة كذبت علينا و طلعت منزلاني اتحاد معلمين 🥲
لكن الحمدلله على كل حال 😂❤️

💙 نغم بشير احمد حسن💙

القصص في وحدات لسة ما اتستلموا، لكن حنرجع ليهم بإذن الله متى ما يترسلوا ، نمشي لفقرة تانية

الفقرة دي اكتر وحدة حتحبوها أم شور

💙فقرة أرشيف الذكريات💙

هنا حنسترجع لحظات يمكن كنا في أشد لحظات التعب و الشتات ، حسيتوا فيها بالوحدة ، و انه تالت دي ابت تخلص ، و ما اتخيلنا في يوم انه تبقى حتبقى ذكريات و مجرد صور بس في البوم . لكن ورا كل صورة مجاهد مغوار حارب اليأس و انتصر على الخوف و الحمد لله الذي جعل النصر حليفكم أحبتي💙💙
اخليكم مع الفيديو