هنا راح نسوي مثال عن الحوار الي ديدور بهاي الصورة
راح نرمز للطالب ب هذا السمايل 👨🏻‍⚕️
وللدكتور هذا 👨🏽‍🦳

👨🏽‍🦳: شنو اسمك ؟ ويباوع للباج 👀
👨🏻‍⚕️: احمد محمد علي
👨🏽‍🦳: أقرأ الكيس وبلش
👨🏻‍⚕️: السلام عليكم اني احمد محمد طالب طب مرحلة ثالثة اذا تسمحلي اخذ كم معلومة عن حالتك الصحية
👨🏽‍🦳: اي نعم تفضل
👨🏻‍⚕️: اسمك
👨🏽‍🦳:محمود حميد احمد
👨🏻‍⚕️:عمرك
👨🏽‍🦳:42
👨🏻‍⚕️:متزوج
👨🏽‍🦳: اي

مراح اطول القصة باقي المعلومات الشخصية تعرفوها الي هيه عندك اطفال ؟ وين ساكن ؟شنو تشتغل ؟ شوكت اجيت للمستشفى ؟
وهاي كوله الدكتور ديأشر على ورقه يمه على كل سؤال تسأله حتى سلام عليكم عليها درجه

👨🏻‍⚕️: شنو صار وياك وخلاك تجي للمستشفى
👨🏽‍🦳: والله عندي وجع ببطني
👨🏻‍⚕️: صارله شكد
👨🏽‍🦳: يومين
👨🏻‍⚕️: وين مكان الالم
👨🏽‍🦳هنا باليمنه
👨🏻‍⚕️الم بدأ فجأة لو شوي شوي وكام يزيد
👨🏽‍🦳شويه شويه
👨🏻‍⚕️الم يروح يجي لو مستمر
👨🏽‍🦳يروح ويجي
👨🏻‍⚕️تكدر توصفلي الالم شلونه تحس بحركه او مثل سچينه او ثگل
👨🏽‍🦳هيچ يعني مثل نغزات
👨🏻‍⚕️يضرب على غير مكان جتفك ضهرك
👨🏽‍🦳لا
👨🏻‍⚕️اكو شيء يزيد عليك الالم من تتحرك من تكح
👨🏽‍🦳لا
👨🏻‍⚕️اكو شيء سويته خفف عليك الالم مثلا ابره حبايه
👨🏽‍🦳يي مسكن اخذت
👨🏻‍⚕️جايتك نفس هاي حاله قبل
👨🏽‍🦳لا
👨🏻‍⚕️زين شنو صار عندك اعراض ثانية ويا
👨🏻‍⚕️زوعت؟
👨🏽‍🦳: اي
👨🏻‍⚕️كم مره
👨🏽‍🦳مرتين
👨🏻‍⚕️كميته شكد هواي قليل بكد كلاص
👨🏽‍🦳لا يعني مو هواي
👨🏻‍⚕️وياه دم
👨🏽‍🦳لا
👨🏻‍⚕️شنو لونه؟
👨🏽‍🦳اصفر
👨🏻‍⚕️زين صخنت
👨🏽‍🦳لا
واكو دكتور يكولك اي ف انت هنا عالسريع تسأله مستمره طول يوم لو بس صبح او بس ليل؟ قستها؟ تعرك وياها؟ رجفه ؟

وترجع تكمل الاسئله الي بالجيك ليست
👨🏻‍⚕️:صار عندك لعبان نفس؟
👨🏽‍🦳لا

👨🏻‍⚕️شهيتك شلونها قلت او لا
👨🏽‍🦳لا طبيعي اكل
👨🏻‍⚕️ صار عندك امساك او اسهال
👨🏽‍🦳لا
👨🏻‍⚕️خروجك شلونه طبيعي لونه لو وياه دم
👨🏽‍🦳طبيعي
👨🏻‍⚕️وزنك زاد نقص
👨🏽‍🦳نفسه
👨🏻‍⚕️صار عندك ابو صفار بجلدك بعينك
👨🏽‍🦳لا
👨🏻‍⚕️حكه بالجلد
👨🏽‍🦳لا
👨🏻‍⚕️كم مره تدرر باليوم
👨🏽‍🦳 خمس ست مرات هيج شي
👨🏻‍⚕️وياه حركه الم
👨🏽‍🦳لا
👨🏻‍⚕️لون الادرار طبيعي
👨🏽‍🦳اي
(لهنا خلصت بس اذا كانت female اسألها اسئله تخص الدورة الشهرية الي هيه دورتج منتظمه ؟كل شكد تجي ؟ ومن تجي كم يوم تطول ؟ واخر مره شوكت اجتها؟ وياها افرازات او لا ؟ كمية دم هواي او قليل ؟ وياها كتل دم او لا ؟وهكذا..)
طلاب لحد يستحي يسأل الدكتور هاي اسئله لان هوه يريد يوكعك الدكتور بكلمة فيميل ف الي مجاب فول مارك جان تقصير منه لان والله استحي شون اسوي الدكتور فيميل واكوله شوكت اجتج الدوره احنا هنا اطباء جايين نتعلم وراك باجر عكبه بالمستشفى تتعامل ويا الكل مو والله استحي ف متستاهل الفول مارك بهاي الحاله

👨🏻‍⚕️ عندك ضغط سكر او اي امراض مزمنه
👨🏽‍🦳سكر
👨🏻‍⚕️صار شكد
👨🏽‍🦳10 سنين
👨🏻‍⚕️تاخذ اله ادويه لو ابر انسولين
👨🏽‍🦳ادويه
👨🏻‍⚕️مسيطر عليه او لا
👨🏽‍🦳مسيطر
👨🏻‍⚕️مسوي عمليات قبل
👨🏽‍🦳اي
👨🏻‍⚕️شنو هيه وبيا سنه
👨🏽‍🦳قسطرة ب 2015
👨🏻‍⚕️عدكم وراثه بالعائله امراض مزمنه ضغط سكر او غيرها
👨🏽‍🦳لا
👨🏻‍⚕️تدخن
👨🏽‍🦳لا
👨🏻‍⚕️العفو منك عالسؤال بس هم تشرب كحول
👨🏽‍🦳لا استغفر الله
👨🏻‍⚕️عدكم تكرم حيوانات بالبيت
👨🏽‍🦳لا
👨🏻‍⚕️ هم عندك ادويه تاخذها ومستمر عليها
👨🏽‍🦳لا
👨🏻‍⚕️شكرا جزيلا وسلامتك ان شاء الله
👨🏽‍🦳مع السلامة

طلاب الي يقرأ الجيك ليست الي منزلتهم بالقناة مره وحده ويدرب مره وحده
اضمنلك الرسوب
لحد يسوي هاي السالفة رجاءً اكعد من هالساعة ادرخ حرف حرف بالجيك ليست وخلي الك وقت وادرب عليه او على صديقك او على اهلك بس لحد يكعد وكل شيء ميسوي رجاءًا هاي مو باطنية تره وتسأل سؤال الي يعجبك
هنا على كلمة شكرًا عليها درجه وتتحاسب عليها واسهل من باطنيه بهواي يعني مجرد جيك ليست جاهز تدرخه وتروح يعني ماكو اسهل من هيچ شيء

الامتحان اذا كان على پيشنت حقيقي او على دكتور متفرق نفس الشيء طريقة الامتحان وخمس دقائق تكفي وزايد ل الطالب الي {مدرب اكثر من مره ومركز}

هذني كل الجيك ليست المطلوبة من عدكم وبالتوفيق للجميع🤍🫶🏻

❗️طلاب اخر نصائح ومهمه لازم تتبعوها تره تضيعيون والله
١) ركزو على git ومن متوقع باجر يجيكم jaundice او abdominal pain او frequent bowel motion
٢) رجاءا طلاب كونو سريعين من تحجون ويا دكتور تره وقت يركض بيكم اذا تماطلون يعني اسمك ،عمرك .. هذني مفروض تاخذ منك نص دقيقه واقل اصلا
٣)اذا هستري مثلا وجع بطن ومن وصلت وكتله عندك تقيء مثلا .. اكو دكتور يكولك لا علمود يسهل عليك واكو يكولك اي ف انت هنا من تتفصل بالتقيء مو تكعد الي ساعتين وتقيء شلونه وقبل الاكل لو بعد الاكل وياه خيوط دم لو كتل دم 🚫🚫🚫🚫 ابد لتسوون هاي سالفه والله العظيم وانت هنا يكولك خلص الوقت ف عالسريع اسأل كم سؤال مثلا كم مره وكميته ولونه ووياه دم واعبر عالسريع ومانتضر شيكولي الدكتور ولا يهمني اصلا ايا كان جوابه
٤)اذا نسيت تكمله الاسئله كبل حول على past medical وباقيات وكلمة شكرا لان عليها كومه درجات ف لتضل تصفنلي تذكر باقي اسئله يلا تحول عالنهايه ويخلص الوقت
٥)اكو دكتور ميحچي اي شيء ولا يجاوب مجرد يأشر ف لا تخاف وعبالك دنحجي خطأ انت كمل كل الاسئله عالسريع واطلع وخليه ساكت احسن
٦) للمره الالف عوفو رڤيو اوف سستم رجاءًا ( اللهم اني بلغت اللهم فشهد) هاي مو باطنيه هذا focus history
٧) اذا هستري هوه vomiting اتفصلو بيه على راحتكم اما جان تقيء او صخونه او اسهال او اي شيء من ضمن كيس مثلا ابدومن ف ديرو بالكم من تفصيل الزايد لان الوقت يطير

صباح الخير طلاب 🤍
اجه هذا الكيس ناشرته بالقناة واجه النا العام .. اتمنى تكونون قريتوه وجابتوا 🤍