صباح الخير طلاب شلونكم 🤍
اغلب اسئله الي دتسألوها

١)الهستري بالعربي اسأل المريض لو بلانكليزي ؟
بالعربي ولا حرف انكليزي
٢)من ابدي كبل بال cheif complain لو اسأل عال personal ؟
طبعا تبدون من بداية
السلام عليكم اني فلان طالب طب مرحله ثالثه اذا تسمحلي اخذ كم معلومه عن صحتك يكولك دكتور تفضل
اسمك ، عمرك ، متزوج……
٣) دكتور هم راح يكولي اكثر من عرض واني اكوله شنو اكثر سبب جابك؟
لا دكتور راح يكولك نفس مكتوب بالورقه بالضبط
٤)اجيب دفتر وقلم وياي واكتب وبالنهايه اقدم؟
كل شيء لتجيب بس سماعه طبيه خليها بجيبك والباج اهم شيء وهاهيه
٥)اسأل اسأله من يمي لو اكتفي بالجيك ليست؟
جيك ليست كافي واذا ردت تضيف عليها فلازم تكون اسئله الها علاقه بالحاله وميحتاج اصلا لان وقت محدود وميكفي ل اسئله زايده
٦)دكتور هم راح يكولي اي على كل شيء مثلا اي عندي تقيء واي عندي صخونه
لا اغلب دكاتره يكولون لا بس اذا كالك اي صار عندي تقيء
ف هنا انت تسأله كم سؤال عالتقيء بسرعه مثلا كم مره وشكد كميته وبيه دم او لا وشنو لونه وهاهيه ترجع تكمل عالسريع الاسئله الي بال جيك ليست

طلاب اغلبكم مدا يفتهم ليهسه طريقة امتحان وعبالكم نفس باطنية وشغله معقده وانو خمس دقائق متكفي
بس هيه كولش كافيه اذا چنت حافظ الجيك ليست ومركز زين من تسأل
وهنا اغلبكم راد مثال علامتحان ف راح احچي بالتفصيل بسنتنا شنو صار

بقاعة الزهراوي راح يصير التجمع
الفون والايباد والساعة الالكترونيه🚫
فقط سماعة طبية تخليها بجيبك مو بركبتك
والباج اهم شيء ✅
المراقبين راح يذيعون الاسماء علمود يتأكدون الكل موجود
هنا الي عليك تكعد تراجع checklist بدماغك او ويا صديقك/چ

بقاعة الزهراوي راح يذيعون بالتسلسل
بسنتنا كل 8 طلاب بس الي سمعته انتو 15 محطة ف كل 15 طالب
ياخذوكم المراقبين فوك ل ممر قاعة ابن زهر الي تاخذون بيها كميونيتي
وكل طالب يوكفوه يم باب لا انت ولا اني نعرف يا دكتور بداخل الباب بس رب العالمين والمراقبين ف لحد يحاول .. بس الي عليك تقرأ آيات وتتوكل على الله وتهدأ لحد ما تدخل

هنا راح نسوي مثال عن الحوار الي ديدور بهاي الصورة
راح نرمز للطالب ب هذا السمايل 👨🏻‍⚕️
وللدكتور هذا 👨🏽‍🦳

👨🏽‍🦳: شنو اسمك ؟ ويباوع للباج 👀
👨🏻‍⚕️: احمد محمد علي
👨🏽‍🦳: أقرأ الكيس وبلش
👨🏻‍⚕️: السلام عليكم اني احمد محمد طالب طب مرحلة ثالثة اذا تسمحلي اخذ كم معلومة عن حالتك الصحية
👨🏽‍🦳: اي نعم تفضل
👨🏻‍⚕️: اسمك
👨🏽‍🦳:محمود حميد احمد
👨🏻‍⚕️:عمرك
👨🏽‍🦳:42
👨🏻‍⚕️:متزوج
👨🏽‍🦳: اي

مراح اطول القصة باقي المعلومات الشخصية تعرفوها الي هيه عندك اطفال ؟ وين ساكن ؟شنو تشتغل ؟ شوكت اجيت للمستشفى ؟
وهاي كوله الدكتور ديأشر على ورقه يمه على كل سؤال تسأله حتى سلام عليكم عليها درجه

👨🏻‍⚕️: شنو صار وياك وخلاك تجي للمستشفى
👨🏽‍🦳: والله عندي وجع ببطني
👨🏻‍⚕️: صارله شكد
👨🏽‍🦳: يومين
👨🏻‍⚕️: وين مكان الالم
👨🏽‍🦳هنا باليمنه
👨🏻‍⚕️الم بدأ فجأة لو شوي شوي وكام يزيد
👨🏽‍🦳شويه شويه
👨🏻‍⚕️الم يروح يجي لو مستمر
👨🏽‍🦳يروح ويجي
👨🏻‍⚕️تكدر توصفلي الالم شلونه تحس بحركه او مثل سچينه او ثگل
👨🏽‍🦳هيچ يعني مثل نغزات
👨🏻‍⚕️يضرب على غير مكان جتفك ضهرك
👨🏽‍🦳لا
👨🏻‍⚕️اكو شيء يزيد عليك الالم من تتحرك من تكح
👨🏽‍🦳لا
👨🏻‍⚕️اكو شيء سويته خفف عليك الالم مثلا ابره حبايه
👨🏽‍🦳يي مسكن اخذت
👨🏻‍⚕️جايتك نفس هاي حاله قبل
👨🏽‍🦳لا
👨🏻‍⚕️زين شنو صار عندك اعراض ثانية ويا
👨🏻‍⚕️زوعت؟
👨🏽‍🦳: اي
👨🏻‍⚕️كم مره
👨🏽‍🦳مرتين
👨🏻‍⚕️كميته شكد هواي قليل بكد كلاص
👨🏽‍🦳لا يعني مو هواي
👨🏻‍⚕️وياه دم
👨🏽‍🦳لا
👨🏻‍⚕️شنو لونه؟
👨🏽‍🦳اصفر
👨🏻‍⚕️زين صخنت
👨🏽‍🦳لا
واكو دكتور يكولك اي ف انت هنا عالسريع تسأله مستمره طول يوم لو بس صبح او بس ليل؟ قستها؟ تعرك وياها؟ رجفه ؟

وترجع تكمل الاسئله الي بالجيك ليست
👨🏻‍⚕️:صار عندك لعبان نفس؟
👨🏽‍🦳لا

👨🏻‍⚕️شهيتك شلونها قلت او لا
👨🏽‍🦳لا طبيعي اكل
👨🏻‍⚕️ صار عندك امساك او اسهال
👨🏽‍🦳لا
👨🏻‍⚕️خروجك شلونه طبيعي لونه لو وياه دم
👨🏽‍🦳طبيعي
👨🏻‍⚕️وزنك زاد نقص
👨🏽‍🦳نفسه
👨🏻‍⚕️صار عندك ابو صفار بجلدك بعينك
👨🏽‍🦳لا
👨🏻‍⚕️حكه بالجلد
👨🏽‍🦳لا
👨🏻‍⚕️كم مره تدرر باليوم
👨🏽‍🦳 خمس ست مرات هيج شي
👨🏻‍⚕️وياه حركه الم
👨🏽‍🦳لا
👨🏻‍⚕️لون الادرار طبيعي
👨🏽‍🦳اي
(لهنا خلصت بس اذا كانت female اسألها اسئله تخص الدورة الشهرية الي هيه دورتج منتظمه ؟كل شكد تجي ؟ ومن تجي كم يوم تطول ؟ واخر مره شوكت اجتها؟ وياها افرازات او لا ؟ كمية دم هواي او قليل ؟ وياها كتل دم او لا ؟وهكذا..)
طلاب لحد يستحي يسأل الدكتور هاي اسئله لان هوه يريد يوكعك الدكتور بكلمة فيميل ف الي مجاب فول مارك جان تقصير منه لان والله استحي شون اسوي الدكتور فيميل واكوله شوكت اجتج الدوره احنا هنا اطباء جايين نتعلم وراك باجر عكبه بالمستشفى تتعامل ويا الكل مو والله استحي ف متستاهل الفول مارك بهاي الحاله

👨🏻‍⚕️ عندك ضغط سكر او اي امراض مزمنه
👨🏽‍🦳سكر
👨🏻‍⚕️صار شكد
👨🏽‍🦳10 سنين
👨🏻‍⚕️تاخذ اله ادويه لو ابر انسولين
👨🏽‍🦳ادويه
👨🏻‍⚕️مسيطر عليه او لا
👨🏽‍🦳مسيطر
👨🏻‍⚕️مسوي عمليات قبل
👨🏽‍🦳اي
👨🏻‍⚕️شنو هيه وبيا سنه
👨🏽‍🦳قسطرة ب 2015
👨🏻‍⚕️عدكم وراثه بالعائله امراض مزمنه ضغط سكر او غيرها
👨🏽‍🦳لا
👨🏻‍⚕️تدخن
👨🏽‍🦳لا
👨🏻‍⚕️العفو منك عالسؤال بس هم تشرب كحول
👨🏽‍🦳لا استغفر الله
👨🏻‍⚕️عدكم تكرم حيوانات بالبيت
👨🏽‍🦳لا
👨🏻‍⚕️ هم عندك ادويه تاخذها ومستمر عليها
👨🏽‍🦳لا
👨🏻‍⚕️شكرا جزيلا وسلامتك ان شاء الله
👨🏽‍🦳مع السلامة

طلاب الي يقرأ الجيك ليست الي منزلتهم بالقناة مره وحده ويدرب مره وحده
اضمنلك الرسوب
لحد يسوي هاي السالفة رجاءً اكعد من هالساعة ادرخ حرف حرف بالجيك ليست وخلي الك وقت وادرب عليه او على صديقك او على اهلك بس لحد يكعد وكل شيء ميسوي رجاءًا هاي مو باطنية تره وتسأل سؤال الي يعجبك
هنا على كلمة شكرًا عليها درجه وتتحاسب عليها واسهل من باطنيه بهواي يعني مجرد جيك ليست جاهز تدرخه وتروح يعني ماكو اسهل من هيچ شيء

الامتحان اذا كان على پيشنت حقيقي او على دكتور متفرق نفس الشيء طريقة الامتحان وخمس دقائق تكفي وزايد ل الطالب الي {مدرب اكثر من مره ومركز}