ال checklist الخاصة ب امتحان اوسكي الجراحه ك مرحلة ثالثة ميطلعون الدكاتره عن هذني المواضيع ف احفظوهم نصًا

صباح الخير طلاب شلونكم🤍
ليوم نحچي عن اوسكي الباطنية
اول شيء اوسكي الباطنية يختلف جذريًا عن اوسكي الجراحه
الباطنيه تكون بالمستشفى وعلى پيشنت حقيقي اما ك تقسم الكروبات ف الكروب الواحد راح يتقسم الى قسمين او ثلاثه
خلي ناخذ مثال على العام
على ما اذكر اول 17 اسم من كروب b امتحن يوم الاحد
وكذلك اول 17 من كروب C و A

القسم الثاني من الطالب يمتحنون الاحد الي وراه
هاي شنو؟ يعني عدهم اسبوع اضافي؟ يقرون بيه اكثر منا احنا الاسماء الاولى ؟
اي نعم .. ويعرفون طبيعة الامتحان
احنا نسمي الكروب الاول (كبش الفداء)
بس لتخافون تره بالحالتين تعامل الدكاتره ميتغير وكذلك طبيعة الامتحان وكذلك الدرجات نفسها والاسئله نفسها

الامتحان حيكون انو دكتور الي دياخذكم حاليا لكل كروب هوه الي يمتحنكم مثلا كروب دكتور فائز امتحنهم دكتور فائز وهكذا بس هذا الشيء ميطبق على الكل لان كروب A العام تم تغيير كل الدكاتره وامتحنوهم دكاتره الي يدرسون مرحلة رابعة

كل دكتور وحسب هوه شنو يريد مثلا ناخذ مثال انو دكتور عبد الله العام كال للطلاب اتجمعو الساعه 7 والامتحان يبدأ ب 9 هنا يجوون طلاب من سبعه او قبلها يفترون على مرضى وياخذون كيس ويكعدون على راحتهم يحولوه انكليزي واكو يمك فونك ومترجم وكل شيء .. شطارتك تعتمد على انو انت ماخذ كيس قبل وتعرف ترتب هستري او لا ؟

طبعا لنفرض انو 10 طلاب يمتحنون يم دكتور فائز ميصير 2 طلاب من ضمن ذوله العشره ماخذين من نفس الپيشنت يعتبر صفر
اما مثلا صديقين واحد يمتحن يم دكتور فائز وواحد يم دكتور عبد الله وعدهم نفس الهستري عادي ماكو مشكله

من يبدأ الامتحان الدكتور يذيع اسم اسم وتدخل يمه بيدك الدفتر وتقرأ الهستري
ممكن يسألك سؤال من داخل الهستري يسأل عن فارما او تشخيص هوه بكيفه وكل دكتور يخلي الدرجه حسب هوه قناعته بالهستري مالتك


هسه تكولون الله شكد حلو يعني فون يمي وصديقي يمي وساعات كومه اكتب بيها واخذ هستري
اي عزيزي الطالب بس هاي الطريقه مع احترامي (فاشلة)
هسه تكولون ليش؟

اني من الناس الي امتحنت يم دكتور عبد الرحمن الي راح ياخذكم كورس ثاني

دكتور عبد الرحمن عادل جدًا وينطي كل شخص حقه مثلا هوه ملتزم بالحضور اليومي يحفظك اذا مشارك او لا ويمه ورقه الحضور
مبدأ امتحاني كان انو دكتور هوه الي يحدد الي اسم پيشنت وهل اني بردهة القلبيه او الديلزه( غسيل الكلى)

هسه تكولون شنو فرق ؟
الفرق انو القلبية معروفه احسن من ديلزه لان ديلزه هستري مالتها يكون صعب وخاصة اذا اجاك واحد مرتفع عنده يوريا بالدم تسأله شنو اسمك يكولك بيتنا بفلان مكان
ف دكتور خابر الممثل وكال فلان اسم فلان اسم بالقلبيه وباقي ديلزه الي همه محاضرين يومي ولا شايفهم ولا مقدمين هستري ولا مره ..

كدام اسمي مثلا مكتوب المريضه سميه وغصبا ما عليه هاي مريضتي مو بكيفي اختار وعندي 20 دقيقه فقط اخذ واكتب واترجم الهستري وراها يبدي دكتور يذيع الاسماء وتدخل ويشوفك اول شيء جنت حاضر يومي او لا وهنا يكولك قدم ويسألك كم سؤال وتروح

هاي الطريقة الصحيحه لان انتَ من توصل رابع دكتور واكف فوك راسك وهو يختار بيشنت وينطيك اربع دقائق تسأله كل شيء
هنا دكتور يشوفك تعرف تاخذ وتنطي ويا مريض ماخذ هستري قبل بالثالث لو هيج جاي

كروبات بقيه من حصلو درجات مو مرضيه اغلبهم كالو اي ليش دكتور عبد الرحمن انطه ل ( بعض) طلابه فول مارك واحنا لا؟

واحد من طلاب كال اني وصديقي نفس هستري وهوه انطاه درجه دكتوره واني غير درجه
اي نعم عزيزي لان دكتور يعرف بيك صديقك العزيز هوه الي مسوي الهستري هذا مو انتَ من خلال تقديمك للهستري مبين واحد مو يم سالفه ولا ماخذ هستري قبل
ف يا طلاب محد راح يفيدك باچر عكبه غير نفسك شكد ماتكول هذا صديقي او صديقتي مستحيل تاذيني ف عوفو العواطف الجانبيه بالدراسه وبالدراسه خلو نفسكم اولى بكل شيء
مو صديقي اخذ صفر يلا اني هم عالواهس لان هوه مثل اخويه .. لا وانما اشوف فلان او صديقي اخذ درجه اني مو اقل منه ولا هوه احسن مني (انتَ طبيب) هاي جمله كولش كبيره اني جاي للكلية هنا صدوك رايد اصير طبيب لتعتمد على فلان وفلان محد يفيدك
مو لازم دائما درجاتك كولها فول مارك عادي كلنا تجي علينا ايام نقرا ومنجاوب بس مو نعوف القرايه وانما اشوف اني ليش جبت درجه قليله بهلامتحان ادرس اخطائي وبنفس هاي ماده مره جايه اجيب درجه عاليه

اسفه علاطالة بس حبيت اكول الكم كل التفاصيل الي تخص الامتحان
وياريت تروحون من هسه للمستشفى تاخذون عشره عشرين هستري بس ضلو ادربو قبل الامتحان علمود تروح الخوفه وتكون مسيطر
كل التوفيق الكم واي سؤال اني ماقصر ان شاء الله♥️

صباح الخير طلاب 🩵
طلاب اغلبكم ديسأل عن اوسكي باطنية وشلون الكيسات قليلة وخاف منلحك والخ..
ف احب اكوللكم راح تصير هيچ:

مو شقه حرفيا هاي الوضعيه 😂 ماريد اكذب واكول اكو كومه كيسات وخير من الله لان تعتمد على الايام وعلى عدد حالات ب هذا اليوم ف كل الي عليكم انو الي ياخذه مثلا دكتور عبد الرحمن او نفس طريقته ف هذا مرتاح لان دكتور هوه الي يحدد اله الپيشنت ومع العلم اذا دكتور عبد الرحمن لا شايفك ولا يعرفك ولا مقدم ولا حاضر هنا اسمك كبل عالديلزه الي هوه يعتبره عقاب لان اصعب من كيسات بقيه واحتمال تدخل يمه تريد تقدم يكولك عوف الهستري مالتك واخذ مني هستري عال jaundice
اما بقيه الدكاتره ف انت بكيفك تختار البيشنت ف تعالو الصبح حتلو كل خمس طلاب على بيشنت بس تكونون واحد مختلف عن الثاني بالكروبات وبالدكاتره الي يمتحنوكم علمود ليصير تشابه وواحد زين يبدي يسأل وانتو بقيه اي سؤال تحبون تضيفوه علمود الهستري مالتكم تكدرون بالسره تسألون المريض ولتعقدوه شويه رفعوا من معنوياته وبطريقه لطيفه اسألوا مو بعصبيه وخوف من امتحان
واذا لكيت بيشنت وحدك ف خير على خير
ملكيت اطبك ويا اي احد مو من كروبك لان اذا خلصو ورحت لنفس المريض يجوز المريض يتعب او مو حباب وتطلع روحك ومتكدر تقنعه تاخذ منه ف اذا بنيه مثلا كوليله عمو/حجيه اني مثل بنتك او بنتچ و مستقبلي معتمد عليك وارسب اذا ماحصل معلومات هسه واهلي شديدين اذا رسبت يكعدوني بالبيت ويحرموني من الدراسة .. هذا الحچي مو من يمي تره دكتور جمال كال النا هيچ نكول

السلام عليكم طلاب شلونكم🤍
طلاب الي سمعته الاسبوع الجاي امتحانكم الاوسكي اول شيء بالتوفيق للجميع ان شاء الله🤍
وثانيًا الي مماخذ بعده هستري وممتدرب هواي ف عنده حلين
الحل الاول انو تروح من هسه ل اي مستشفى نعمان /كندي /مدينه الطب/يرموك / كاظمية اي مستشفى قريبة عليك تروح تاخذ اكثر من هستري من اكثر من مريض وكيسات مختلفه ويمك فون تسجل بيه صوت علمود ترجع للبيت تشوف شنو سؤال نسيته علمود بلامتحان لتغلط

الحل الثاني تدرب على اهلك او صديقك وهم تسجل صوت وتسوي نفس طريقه الفوك

اني افضل اكيد الحل الاول وبما انو باجر دوام فتكدرون ترحون للنعمان وتدربون

اني اعرف اول مره تجربون اوسكي وحقهم خايفين بس حتشوفوه شيء طبيعي وابسط من الي متوقعيه بس المهم الثقة

اي احد عنده سؤال يكدر يدزلي على معرفي بالبايو وعذروني اخاف مرات اتاخر عليكم بالرد بسبب ضغط الدراسة او مرات تدزولي شيء وانسى ف مو متقصدة اغلس او شيء وان شاء الله ماقصر وياكم 🤍✨

مرحبًا طلاب شلونكم🤍
طلاب بس اريد انطيكم نصيحة اخيره بخصوص الاوسكي .. لتجادلون الدكاترة ابد مهما يحچون وياكم مهما يصير ظلم لتجاوب الدكتور ابد لو شنو يحچي عليك ويرزلك لان عندك خيارين يا اما تسكت وتكمل الي تعرفه وعلاقل تحصل درجه مو لا شيء
يا اما تاخذ صفر علمود نقاش لا يحل ولا يربط
وهالشيء صار عدنا لذلك واجب عليه انبهكم من كل النواحي