أحيانًا لا يرى الناس خطأ أفعالهم،
لأنهم محاطون بأشخاص جعلوا تلك الأفعال عادية، عندما تكون البيئة مشوهة، تصبح الأخطاء سلوكا مقبولاً، والتجاوزات تبرر، والانحرافات تعاد تسميتها، ولهذا لا يكفي أن تكون نقيًا،
يجب أن تحيط نفسك بمن يذكرك بالصواب،
لا بمن يطمئنك إلى الخطأ .

8/8 ❤️.

- الرساله ؛ اعرف قناتك من 2023 تقريباً وغيرت حسابي وضيعت القناة واليوم بالصدفة عن طريق تحويل من قناتك لكيتها وأخيراً 🙏🏻 ماتتخيل فرحتي والله

رغم انهُ مسج بسيط، مجرد قناة صغيرة مالها معنى بالنسبة الي ممكن،
خلت شخص ما بهذا الكون لمجرد شافها، فرح وميعرف شلون يعبر عن فرحته.


شنو هذا التقدير الإلهي ❤️
شكرًا والله

حين تفرَغ الأنثى من الداخل، وتغيب عنها الشخصية التي تمنح لحضورها معنى، تبحث حينها عن قيمتها في أكثر ما تملك وضوحًا أمام الآخرين - في مظهرها ومفاتنها -
فبدل أن تستعرض عقلًا يُلفِت، أو شخصيةً تُحترم، أو حضورًا يُذكَر، او حتى أنجاز بسيط، يصبح عندئذٍ الجسد هو اللغة الوحيدة التي تتحدث بها عن نفسها، لأنها لم تجد في داخلها ما تثق بأنه كافٍ ليُرى.

وحين يصبح الاستعراض وسيلتها الوحيدة لجذب الانتباه، يتحول الجمال من صفةٍ فيها إلى هويةٍ تختبئ خلفها.
والمؤسف أن الإنسان حين لا يعرف كيف يثبت ذاته بما هو عليه، يبدأ بمحاولة إثباتها بما يملكه.
فليست المشكلة في أن تكون جميلة، ولا في أن تعرف أنها جميلة، المشكلة حين لا يبقى لديها شيء آخر تريد أن تُعرَف به.

وكلكم عيوني.

وعلى سياقٍ متصل، يصبح التفاف الرجال حولها مصدرًا لغرورها، فتتشبع بنظراتهم وتعليقاتهم، وكأن كثرة من يريد التقرب عليها، شهادةٌ على قيمتها في نظرها، بينما هي في الحقيقة لا تفعل سوى تسليم صورتها لكل عابر حتى تصبح مألوفةً ومستهلكةً في أعينهم،
والأشد سذاجة أن تظن أن الرجل الذي ينظر إليها بشهوة قد منحها قيمة، فليس كل التفافٍ حول الإنسان دليلًا على ارتفاع شأنه، أحيانًا يكون مجرد اجتماع للغرائز حول ما عُرض أمامه.

أن المرأة التي تعرف - قَدرها -
لا تحتاج أن تجعل جسدها إعلانًا مفتوحًا كي تتأكد أنها مرغوبة، لأنها تدرك أن قيمتها أكبر من أن تختصرها عيون الرجال وكلامهم الرطب حولها، وأن الجوهرة لا تحتاج أن تكون في متناول كل عابر حتى تثبت أنها ثمينة.

أن الدين حاول أن يجعل المرأة محافظةً على نفسها، تعرف أن جمالها نعمةٌ تصونها، وأن حياءها وشخصيتها وعقلها هي الأشياء التي تجعلها جديرة بأن تُختار.
اللهم عافنا من امرأة تتغذى على هذا النوع من الاهتمام، وعافنا من امرأة تجعل إعجاب الرجال واستعراض مفاتنها جزءًا من تعريفها لنفسها.

وكلكم عيوني.

فرويد بكتابه قلق في الحضارة يكول، (الرجل شخصيته تنبني تحت الضغط )

أسوأ شغلة تسويها لشاب مراهق هو ان تعوده ما يتحمل تبعات افعاله، صارت مشكلة بسيطة بالمدرسة تروح انت تحلها،
محتاج يدور شغل تكعد تسأله فلان وفلان حتى يشغله،
كسر حاجة من البيت يكعد اخته من النوم تجيب ماسحة حتى تنظفله،
صرف كل فلوسه تجي امه بكل مرة تنطي فلسين من وره ابوه،
لهلسبب كلمة فرويد عظيمة، الرجل شخصيته تنبني تحت الضغط،
وعلى ارض الواقع حتى يبقى مدرك تبعات كل قرار ياخذه او فعل يسوي هذه بوصلة توجه الأنسان بأول ٢٥ سنة يعيشها لحد ما يتطبع على هالسلوك وينضج ويكدر يتحمل الحياة
من الأم تبقى تغطي على كوارث ابنها وبالأخير تكول اني بهذلته، هي تحرم الأبن يصير رجال وصاحب قرار وشخصية الناس تقبلها بالمجتمع، لازم ينحط تحت ضغط بس بالمعقول وبالمنطق
جوعان ؟ الاكل بالمطبخ كوم صبلك
هدومك مو نظيفة، خليهن بالغسالة لتشمرهن بالكاع
صرفت كل فلوسك ؟ اتحمل تعيش بدون فلوس حتى تعرف شلون تقسم مصروفك،
لازم يدرك جزء من حياته هو رعاية الناس القريبين عليّ، اهله ، امه ، خواته ،اصدقائه ، وفوك كل هذا تراعي نفسك لو شاب عمره ٢٠ ومايعرف ياخذ قرار بسيط ماراح يعرف يعيش بهالحياة الصعبة، شخصيتك كرجل تنضج تحت ضغط الأختيار والمسؤوليات.

وكلكم عيوني.

اكو شخص يدخل لحياتك أول ما تلتقي وياه تحس براحة مو طبيعية،
عبالك تعرفه صار سنين ومتربي وياك بنفس البيت، تنتظر مع مرور الأيام والمواقف حتى تستكشفه، تلگاه بكل مرة احسن من القبلها، خلوق ومؤدب لدرجة تخليك تقتنع فعلًا الناس بعد بيها زينين،
واحد من ذوله الأشخاص هو صديقي الأحبّه كلش بالجامعة، دكتور محمد جواد
محمد بعمره وحياته كلها ما ضوجني بموقف ولا زعجني بشي، معروف عليّ بالكلية بأخلاقة العالية حيل وهدوءه ورزانته، بأيام الإمتحانات العملي قبل ما يبدي هو
جان يجي يسألني اذا محتاج شي لأن مرات يكون عندي نقص بالأدوات، أكلنه سوية وسهرنه سويه، طلعنه هواي سوية وزرنه الأئمة، هو يحب يخدم الإمام الحسين عليهِ السلام، وبكل محرم يكون هناك.

محمد مات اليوم
بدون سابق أنذار، بدون مرض بدون أي شي، راح وترك كل الذكريات وراه، ترك ضحكتنه سويه وخلّه بس الحزن رفيق الي

محمد، الله يعلم شكد موجوع بفقدانك وشكد گلبي متفطر هسه،
وشكد أتمنى لو أكدر أرجع ولو لحظة وحدة من أيامنا حتى أشوفك بيها وأحچي وياك.
الله يرحمك يا صديقي، ويغفر الك، ويجعل كل الخير اللي شفته منك شاهدًا الك، وكل الأثر الطيب اللي تركته بقلوبنا وقلوب زملاءك نورًا يرافقك

راح تبقى بذاكرتي دائمًا
الى الملتقى يا حبيبي.

ب 2012 جان يفوت واحد بمنطقتنا يبيع ناي خشب ، جنت صغير نروح نوكف يمة نشوفه شلون يعزف اغاني واللحان نبقى صافنين علّي، من يخلص كل واحد يروح لأهله يجيب فلوس حتى يشتري منه، اشتريت من عنده قبل لينطيناه عزفلي بي اغنية حلوه، اخذت الناي ورجعت للبيت كعدت وحدي حتى اعزف
لزمت الناي مثل ماجان لازمه اللحن طلع نشاز !
بقيت احاول ماكو شي، غسلته وخليته بالشمس رجعت اعزف ماطلعت الأنغام الجانت ببالي ،
ثاني يوم رجع الرجال للمنطقة وديتلة الناي كتله هذه ميشتغل ماريدة بعد، ابتسم بوجهي كلي متأكد ميشتغل ؟ ليش متكول اني مافاهم الناي الهالسبب ميطلع العزف التريدة،
اخذه مني باوع علي ، لزمه بيدة عزف بي اللحان احلى من الألحان العزفها قبل ، اخذته منه لزمته مثل ماهو لازمه استغربت ليش مايطلع الشي الاريده مثل ماهو يريد
من خلص كلي مابي شي، اذا تريد أرجعه عادي هسه ارجعلك فلوسك، كتله لا ماريد الفلوس اريد الناي مالتك التعزف علّي يمكن هو احسن من ذني التبيعهن النه،
انطاني الناي مالته هم عزفت بي ماصار شي بين الحزن بوجهي
كلي لتزعل أبني ، الناي اعتبره مثل اَي شي بحياتك
لازم تحبه وتنطي من روحك حتى من تلزمة راح تعرف
شلون ينطيك من روحة،
حاله حال البشر لتنتظره يضحيلك وانت مافاهمه وفاهمك،

البشر اليحبك من ماتعرف قيمتة تظل تشوفة حاله حال خشبة الناي تعزف بي ومن متعرفله تعوفة ويمكن تكسرة وتشمرة،
لزم ايدي وعلمني شلون اعزف وشلون احط اصابيعي وصدك اتعلمت ، علمني بأي بداية يمكن ماراح تنجح وتعاني بس من تسعى راح تتعلم وتعرف قيمة الشي البيدك،
عافني وراح بطريقة

من ذاك الوكت عرفت مو كل شي تشوفة حلو راح يبقى نفسه اذا صار الك
امتلاكك للأشياء مو بالضروره تتأكد انت ملكت روحه
يبقى قريب ويعيش وياك بس روحه غايبة، يبقى وياك ومتسمع صوته ،

من تفهمه وتتعب وياه راح يعزفلك وينطيك من روحه اكثر
ومو بعيدة ينطيك روحه كلها

وكلكم عيوني.

علاقات المراهقين بالعادة ما تستمر، مو بس لان هم صغار وانما بسبب عامل مهم وهو ان المراهقين بمرحلة استكشاف لنفسهم.
الموضوع كأنو تقدم اكلة لشخص اول مرة يجرب الاكل وتگله التزم بهل اكلة طول حياتك.
البشر يتغيرون باستمرار، سواء تغيرات عاطفية او مزاجية او حتى تغيرات بالشخصية والتفكير اللي ممكن تغير وياها معايير اختيارك للإنسان اللي تريده وي الوقت.
وبالحقيقة، هذا التغيير رح يستمر لنهاية حياة الانسان وممكن جدا بعشرينياتك عندك معايير رح تختلف تماما وي ثلاثيناتك.
هذا الشي ممكن يدمر او يضعف علاقات حتى لو جانت متزنة لسنوات طويلة.
حتى الاشخاص اللي استمروا وي بعض As a lifetime، ايضا مروا بنفس المرحلة بس يا اما تغيرهم جان بنفس الاتجاه او المحبة بينهم خلتهم يتعايشون وي هل تغيير.

الموضوع بالنهاية يحدده قابليتك على استكشاف نفسك وتحديدك لأولوياتك بالمستقبل.

وكلكم عيوني.

القباني عنده قصيدة من أكثر القصائد الحزينة بالنسبة الي، غناها الكبير عبد الحليم حافظ، تكول "إن كنتَ حبيبي ساعدني كي أرحل عنك، أو كنتَ طبيبي ساعدني كي أشفى منك"

يمكن أصعب شي بالعلاقات مو الفراق، أصعب شي من تبقى تحاول تفترق عن شخص وبكل محاولة تكتشف إنك بعدك تحبه اكثر من قبل،
نزار بالقصيدة كأنهّ يسأل ويكول، شلون تريدني أرحل عنَك، وإنتَ المكان الوحيد اللي كل ما أتعب أروحله؟
وشلون تريدني أشفى منك، وإنتَ بنفس الوقت الشي الوحيد اللي يهدّيني؟

أكو ناس ما نكدر نكرههم حتى لو أذونا، وما نكدر نبقى وياهم لأن يتعبونا، فنظل بالنص لا إحنا گدرنا ننسى، ولا إحنا گدرنا نكمل.
وأعتقد هذا هو أصعب أنواع الحب
من تعرف إن بقاءك ويا شخص يأذيك،
ورحيلك عنه يأذيك أكثر.

مرات الواحد ما يريد من حبيبه يرجع،
يريد بس يساعده حتى يتركه.
وفعلًا مو كل فراق سببه إن الحب خلص…
مرات نفترق والحب بعده موجود،
بس مو كافي ابدًا حتى نعيش سوه

وكلكم عيوني.

جات Gpt: لترجع شي

لا ذكرياتي، لا إسمي ولا ملامحي السابقة، ماريد تسوي شي صار قبل ثانية وراح بالماضي
لأن ذني كلهن رصيد أنتهى عندي ومراح ترجعه أنت بذكاءك المصطنع،
كل دقيقة مرّت دفعت الها قلقي وهمّي حتى تروح وتخلص.