الشخص الي يسولف ويّ روحه دائمًا، لأن هو الوحيد اليفتهم نفسه، الي يحجي بالراح يصير بحياته وعلاقاته بالناس بالحرف الواحد، وما يوم خاب ظنه او توقعه بشي،
هذا يعرف المشوار من الخطوة الأولى، بعمره ما نكسر او حزن على فراق احد،
هذا انسان صعب، لا تتوقع من عنده موقف يرضيك، اذا مشيت عكس مزاجه.
لأن هو هيج هيج جان باقي وياك على مزاجه، لأنه
يعرف المشوار
من الخطوة
الاولى

وكلكم عيوني.

_لازم ننتبه أنهُ منبذل كل طاقتنا في علاقات
لن تجني لنا ثماراً ، علاقات غير مضمونة النهاية، وأشخاص غير مضمونين هل راح يقدرون الي گاعد تقدمة لو لا؟ أشخاص متدري راح يبقون
لازمين ايدك لو يهدوهه فجأة؟

وهنا ما أقصد بس العلاقات العاطفية ، كُل
العلاقات الأنسانية من صداقة وغيرها .

وقتك ثمين ،طاقتك ثمينة، ومشاعرك ثمينة، أستثمرها بناس أهل الهة وأولهم عائلتك شمراح تستثمر بيهم وقت وجهد ومشاعر راح ترجعلك ،
لانها ببساطة علاقة غير منتهية الصلاحية ودائمة بحياتك فمو خسارة ابداً .

_حلو ننطي ونقدم بدون مقابل ولوجه الله لكن الأستثمار المبالغ بي في غير موضعه سذاجة منا، لان حيجي وقت حتحس أنت مُستنزف و مراح تگدر تنطي للناس الي همة أولى وأحق بهذا العطاء.

غَدير.

البارحة اشتهيت كازو
شتريت جيس الكرزات المشكّل، طبيعي اول ما نفتحه ناخذ كرفه مال ايد صغيره وناكل، من يبدي يخلص الجيس والحبايات تصير محدودات ونكدر نفرق بينهن، حناخذ فقط الچنه مشتهينه بالبداية، ونترك باقي الاصناف للي يجي ورانه عود ياكلهن
عكس ما سوينه اول ما فتحناه، اخذنه عشوائي
بس من قلت الكمية، اختارينا النريده بعناية وفرزناه عن البقية.

ماكو حكمة بالموضوع تره
مجرد جيس كرزات.

وكلكم عيوني.

داگلب بالنت شفت ريلز مجموعة صور أب موجود بالرحلة مال ابنه المتوفي، والصوره البعدها الاب حاط الكتب المدرسية مال ابنه على قبره، وبعد صور بينهم، حاطين اغنية غيرك كلشي ما محتاج، بدونك روحي مو هيه.

حسيت بألم هذا الأب لأن عايش شعوره هواي، اعتبر هذا هو الألم الحقيقي
فرق جبير بين تشتاق لشخص وتريده بشدة وهو عايش وتكدر تشوفه، وبين تشتاقله وهو ميت، متكدر تشوفه وتحس بي، متكدر تسمع صوته ولا تطلع وتطب وياه نفس قبل، متكدر كلشي تسوي فقط تتخيله، الخيال هو كل ما يتبقى من عنده.

الفراق الحقيقي من تفارگ اليندفنون جوه التراب، صح اكو ناس تدفنهم بگلبك وهمه عايشين، بس اذا حنيت تكدر
اما هناك اذا حنيت، تروح تزور القبر فقط.

الله يصبر الأب
وكلكم عيوني.

الحياة بالنسبة الي مقاومة.

مقاومة لليأس اليصيبك منها، مقاومة لذاتك السيئة، مقاومة لغريزتك،
الرجل يقاوم غريزة الشهوة، والمرأة تقاوم غريزة الظهور بأجمل صورة، مرات نكول ليش البنيه محجبة ومطلعه شويه من شعرها وايدها، السبب بعدم قدرتها على مقاومة غريزتها، وكذلك الرجل ليش ممكن يخون وهو بين ايده احسن النسوان، لأن فشل بالمقاومة، ليش الناس تنتحر؟ فشلت بالمقاومة، ليش الناس تسمن؟ فشلت بالأكل الصحي، ليش الناس ضايعه؟ فشلت بالتقرب الى الله وليش وليش لهواي أمور

صح ماكو شخص يكدر يقاوم مغريات الحياة كلها، بس انت اختار الشخص اليعرف يقاوم اكبر قدر ممكن منها.

وكلكم عيوني.

هيه مو اسمها راحة لأن بالنسبة الي مالها وجود
بس احس الإنسان يحتاج الى شيء يشبه السكينة بين فترة وأخرى
الى مكان يرتمي اله بعد تعب وركض طويل في اللاشيء
يحتاج الإنسان احيانًا الى مكان، فكرة، او حضن، يفصل بي عن العالم
ويتوقف ولو لوهلة .. عن التفكير.

مادري بس
كلكم عيوني.

_عزيزي المقاوم،
أعتذر لك، لكن الحقيقة الوحيدة التي ينبغي أن تدركها بوضوح هي أنك لا تملك ترف مغادرة الحكاية.
سلاحك الأوحد الآن هو أن تواصل مقاومتك.
في الليل قد تبكي حتى تَتنهّد روحك وتظن أن سقف الغرفة سينهار عليك ليخنقك وينهي صراعاتك،
لكن مع أول خيط للفجر ستجد نفسك ما زلت هنا،
… لا السقف انهار فوقك، ولا الحزن التهمك، وما زلت حيًّا…

أشبه لك الأمر بما مررنا به جميعًا:
حين يصف لنا أحدهم كتابًا أو فيلمًا أو مسلسلًا بأنه أعظم ما قد تراه في حياتك، وأنك إن فوَّته فقد ضيَّعت جزءًا من عمرك.
فتبدأ القراءة أو المشاهدة، لتكتشف أن الساعة الأولى مملة، سردٌ بطيء رتيب، وتظل تهمس لنفسك:
متى يحب البطل البطلة؟
متى يلتقي المسكين بمن ينقذه؟
متى سيهز الحدث العظيم مجرى القصة؟

في تلك اللحظة، أمامك خياران:
إما أن تطفئ الشاشة، فتتخلى عن الحكاية قبل أن تبلغ ذروتها، وقد تخسر شيئًا كان عظيمًا بالفعل.
أو أن تتحمل ملل البداية، وتواصل، فيكون لك في النهاية مكسب الوصول إلى الحبكة المُسلية.

حياتك لا تختلف كثيرًا عن هذا المثال.

فاصبر أيها المقاوم…

غَدير.

طبيعي تسمع كلام عنك اول مره تدري بي، وطبيعي هالكلام السيء الي نگال بحقك يصدر من شخص جان عزيز عليك، طبيعي جدًا إتهامك بالخيانة والكذب وهاي الأمور، طبيعي تنظلم وطبيعي ما تكدر ترجع حقك ولا تدافع عن نفسك، طبيعي يتم الفبركة عليك، وطبيعي يُساء الظن بيك لو مهما سويت خير.
اخي انتَ عايش بالدنيا يعني ادنى شي بالوجود، لتتوقع الكلام عنك يخلص ولا الشكوك والظنون السيئة عليك تخلص، لتتوقع المقابل يبقى صاين الوّد ويقدّر الخصوصية.

أهم شي لا تفكر وتشيل هم للرد على هيج امور، عيشها ببساطة واشتري راحة بالك تره الدنيا كلها لحظتين
لحظة تجي بيها ولحظة تروح بيها
أهم شي .. عيشها بضمير
دير بالك تكتل ضميرك، تره ازعل عليك

وكلكم عيوني.

شكسبير بأحد مسرحياته تحدّث عن قائد روماني عظيم ومحارب شجاع خله العالم يخضع اله، هذا القائد اسمه قيصر جان عنده صديق عزيز عليّ ومعتبره شريك نجاحه وكل شيء اسمه بروتس،
بينهم عشرة ومواقف جميلة هواي مثل ما وصفها شكسبير، بيوم من الأيام مجلس الشيوخ الروماني حس بأن قيصر بده نفوذه يقوى اكثر واكثر فقرروا يغدروه ويقتلوه، منو جان مشارك بالغدر ؟ صديقه العزيز بروتس.

وبالفعل دخلوا مجلس الشيوخ على قيصر وبدوا يضربون بي ووجهة صار دم، واجه قيصر على صديقه بروتس يحتمي بيّ، فبروتس طلع سجينه وضربها بصدره
قيصر باوع على صديقه وگال جملته الشهيرة "حتى انت يا بروتس ؟ فل يمت قيصر إذن"

تحالف مجلس الشيوخ وغدرهم وضربهم للقيصر ما هزه، جان يكدر يكتلهم ويستعيد قوته، بس لحظة الانكسار الحقيقية الي قتلت قيصر هيّ خيانة صديقه اله، بحيث من شاف خيانته كال "فل يمت قيصر إذن" يعني ماله داعي اعيش بعد.

شكم بروتس عايش ويانه وبلحظة خلاف او لحظة حقد يطلع وجهة الحقيقي، رغم كل القدمناه، الأصل غلّاب.

وكلكم عيوني.

_الأشعة الي گاعد ندرس عليهه بروتة الكسور بالمرحلة الخامسة في كلية الطب، غالباً أول متباع عليهه عينك حتدور على الخط الأسود وسط العظم الأبيض، باحثاً عن كسر لمحاولة إصلاحه كطبيب.
نحاول نخلي الأشعة على مكان بي ضوة (مصدر ضوء)، حتى نلگف الكسر، خصوصاً إذا چان شي ما مبين وطفيف.

الموضوع جداً مُشابه لمحاولة معرفة كسور أرواحنا وعيوب ذواتنا الي غايبة عنة ، هواي منهه مشايفي بالظلمة، يحتاج ضوة زين.
والضوة هنا مراح يكون شمس، ولا لوحة مضيئة مثل الموجودة عند طبيب الكسور، لا، حيكون “مشكلة” تعصفك وتضويلك كل العيوب والرضوض الدقيقة الموجودة بيك، حتى تعرف تعالجهه.

فلتضوج من شي يساعدك على التشخيص، لأن هاي أول خطوة للعلاج بدونهه حتبقى مريض .

غَدير

اليوم جنت افكر بموضوع، شنو اليخلي 2 يبقون سوه 3 سنين او اكثر ، صديق او حبيب
علاقة بدون مصلحة، بدون أقنعة، من غير مايمَل احد من الثاني.
ماكو غير اجابة وحده، ذوله صاروا عائلة ،

العائلة مو دائمًا الي تَربيت وياهم بنفس البيت، العائلة مرات تنخلق من غير بيئة، من الشارع ، من المواقف، من الوجع والحلم المشترك.
الي يبقى وياك سنين شافك وانت صاعد، وانت واكع، وسَكّت على هواي امور حتى مايخسرك.
الي يعرف ضوجتك من صوت الموبايل، ويدزلك رسالة وانت ساكت،
مو حتى يسألك شبيك، يريد يِكَلك اني هنا
هذا مو مجرد واحد من الناس، هذا شخص صار جزء منك، صار مرايتك وملجأك وأمانك النفسي .

يا كلّ اشيائي.

وكلكم عيوني.

اكو 3 حرامية.

واحد يبوگ هوش والثاني يبوگ غنم والثالث يبوگ دواب، مشهورين بالقرية بفسادهم وخمطهم لحلال العالم،
يوم من الأيام أعلنوا توبتهم گدام الناس...فالناس البسيطة أمنت بيهم وخلوا حلالهم يسرح بأمان، اخذولهم چم يوم ماكو شي اﻻمور طبيعية
وره فتره بعد آمنت الناس إنباگت هایشه ركضت الوادم على حرامي الهوش التايب حلف الف يمين ما بايگ الهایشه 
ثاني يوم انباگت نعجه هم ركضوا على حرامي الغنم التايب نفس الحجي ونفس الشي هم حلف ما يدري وطلع تايب
ثالث يوم إنباگن ثنين من الدواب ركضوا على حرامي الدواب هم حلف الف يمين ما بايگهن،
بعدين الشيخ وده رجل من غير قرية يطب وياهم ويشوف شنو السالفه....رجع الرجل اللي وداه الشيخ تدرون شلگه ؟
لگه حرامي الهوش فعلاً تايب من بوگ الهوش بس صاير حرامي غنم وحرامي الدواب صاير حرامي هوش وحرامي الغنم صاير حرامي دواب...يعني مغيرين اختصاصهم ومسوين تحالف جديد على حيله.

بس اهل القرية يتوبون منهم؟
باجر تشوف هههه.

وكلكم عيوني.

اذا نقارن بين
- اثنين نجحت علاقتهم واتزوجوا عن حب
- وبين اثنين متفاهمين اتزوجوا عن توافق بالشخصيات

الثاني راح ينجح اكثر من الأول بحياته واستقراره، قبل چنه نسمع اذا اثنين اتزوجوا عن حب ماكو اَي مبرر يخليهم يتعاوفون، بس طلع هالموضوع وَهَم نشوفه بس بالأفلام،
واذا قارنا الحب كدام توافق الشخصيات ماراح تشوفله اَي وزن وقيمة، لأن اذا تحب من كل كلبك وطبعك مو زين ممكن بسهوله تضيع حب عمرك

الحب مايغير واحد بكد مايخلي العاشق يتنازل عن طبعه المرفوض، لأطول فتره لحد مايتخلص منه وكتها يكدر يضمن الكدامه ويثق بي
ونكدر هسه نكول اَي اثنين شخصياتهم متوافقه ومتفاهمين يعيشون سعداء اكثر من اليعرف بس يحب. لأن راح تقتنع الحب وحده مو كل شي وهذا هو قمة الوعي ويخليك تعرف الحب نهايته نضج واحترام حتى تتهيأ علمود تصير شريك حياة ناجح.

وكلكم عيوني.

ألف دينار ،، ثمين جدًا

اني باليوم اصرف كذا مبلغ، الرقم الأصرفه احيانًا هواي واحيانًا طبيعي، بس ما اوكف على خمسة او عشرة الاف بتفاصيل اليوم، يعني اذا ردت شغلة او طلبت أكله وشفتها اغلى من قيمتها ب١٠ الاف فأشتريها عادي، وهذا الكلام بشكل يومي مو مناسبات او كذا.
اليوم كالعادة طبيت على رضا علوان داشرب كهوتي المفضلة الي صار سنين اشربها، اكتشفت من دا احاسب مصعدين قيمتها ألف دينار زيادة، استغربت،
ومادري ليش انقهرت.
شي صار سنين يومية اطلبه ب٣ الاف ونص، فجأة وبدون سابق انذار صعد سعره الف دينار فقط، رغم ان هذا المبلغ لاشيء مقارنةً بالاصرفة يوميًا، بس تغيير السعر خلاني اتراجع عن فكرة شراء القهوة يوميًا، اكتشفت شغلتين، الأولى اني شخص فعلًا كلاسيكي، من النوع الي يرفض التغيرات المفاجئة، ويحب يبقى على سستم شبه ثابت حتى يريّح باله
والشغلة الثانية الاكتشفتها
جانت بأول رشفة للقهوة المفضلة مالتي،
اجاني الشعور اليجيني بكل مرة اشربها، شعور المتعة الكونية الرهيبة
اما بخصوص الشغلة الثانية الاكشتفتها، كهوتي لو يصير سعرها مليون هم اشتريها يومية الصبح، والفوك جان مجرد تمسلت كتبته واني دانتظر تكسي بلي، صار لازم اشتري سيارة.. حتى مايصير عندي فراغ اكتب هُراء ثاني.

وكلكم عيوني.

‏"مؤخرا، اتسعت دائرة تسامحي مع المواقف والأفكار وأنماط السلوك التي أختلف معها.
نتج عن هذا؛ دخولي في حالة عميقة من السكون والطُمأنينة.
لا أترصّدُ للأشياءِ ولا أسائلها؛
ما دامت لا تُعَرِضُ أحدًا، لخطرٍ حقيقي."

علاء الخاين مو هو العار الوحيد

علاء مجرد شخص تم توثيق خيانته، قضيته مو مجرد فضيحة أخلاقية، بل هيّ فضيحة إجتماعية
المشكلة الحقيقية مجتمعنا الي صار عبارة عن تمثيلية چبيرة،
بره البيوت إحنا أهل الغيرة والشرف، ومن ينسد الباب تلكى عائلة مفككة من الداخل وماعدها اي مبدأ.
الزواج صار مثل الهدنة، واحد يتحمل الثاني بس علمود كلام الناس والأطفال، حتى الخيانة صارت طبقيّة، بالبيوت المترفة تصير بسكوت وبشكل راقي، أما بالبيوت الفقيرة تصير بهوسة ومحتوى ينزل على التيك توك
إحنا مجتمع ينتج الف علاء يومية، بس الباقين ينتظرهم القدر حتى يفضحهم
فبطلوا تمثلون الصدمة وتصعدون كل علاء ترند، لأن لو كل الكاميرات تنفتح، چان نص البيوت تهدمت.

العار الحقيقي هو المجتمع،
الأفكار الغربية الي نزرعت للطرفين، صارت كلمة العيب نكتة، والحرام شي سخيف من الماضي، صارت مواقع التواصل ساحة للإحتراف بالخيانة، او على الأقل ساحة للتحفيز الجنسي على الخيانة، ريلزات الرقص وبنات الملاهي والكثير الكثير، المجتمع همه الصعدهم وسواهم واجهة يتصدرون بيها المشهد.

وَمَا أَصَابَكُم مِّن مُّصِيبَةٍ فَبِمَا كَسَبَتْ أَيْدِيكُمْ
صدق الله العليّ العظيم

وكلكم عيوني.

ملاحظة: هذا المنشور لا يُبرر الفعل.

ارجع على نفس موضوع الخيانة، لأن الشعب العراقي عجبه يصعد هالموضوع ترند ويوميه ناشر شي.

بكل مسائل الخيانة يتم التركيز على الرجل وعلى خيبة زوجته، المُشاهدين من البنات يفعلون مود الخيال الوهمي ويتخيلون مكانهم بمكان الزوجة ويحقدون على الرجال اكثر وتزيد بعقيدتهم العاطفية فكرة أن جميع الرجال خونَه، لأن هالبنيه تشبعت من احاديث الخيانة الشافتها سواء بالواقع او بالأنترنيت، وطبعًا كلامهم الثابت أن الصوج بالرجال وخطيه المرة والمرة مالها ذنب، وتبدي سلسلة من التعليقات العاطفية منها؛ القانون مع الرجال، والمذهب الجعفري، وحقج ضاع ومجتمع ذكوري ومن هالسوالف.

أما المشاهدين من الشباب فأول شي يفكرون بي هو غباء الرجل الخاين،
لأنه خان "وانكشف" مو لأنهُ خان !!
بإعتقادهم أن اليخون لازم يكون ذكي ويرتب وضعه ويقفل الباب على الاقل، مو نفس ما سوه علاء.
ثاني شي يباوعون عليّ هو البنيه الجايبها حتى يخونها وية مرته، اذا حلوه واذا تستاهل ف عاشت ايدك، لأن اذا طلعت مو حلوه فهاي كارثة عدهم، ليش تخون وجايب بنيه مو حلوه.

ميحتاج اكول ان الطرفين على خطأ واضح، والطرفين عبارة عن اشخاص اغبياء ما راح ينجحون بتحقيق علاقة زوجية صحية وعاطفية، مُستحيل وانا مسؤول عن كلامي.
بس الكارثة تعرف وين؟ أن الزوج ديخون زوجته ويّ بنيه .. فيجن البنات يحجن على الرجل .. وهاملات وتاركات بشكل متقصد انُ اكو بنيه تره من جنسهن هي صاحبة الخيانة!

يعني اذا كل الرجال خونة ومابيهم ثقة، فبحسبه بسيطة نكتشف أن كل النساء خونه، لأن الديخون هو اساسًا ديخون ويه بنيه من نفس صنف البشر الديلوم الخاين !!

وهذا الكلام الطرحته فوك،
يحاولن النسويات جاهدات بكل اساليبهن وكلامهن انُ يخفنّه ويبررنله بأي علاقة خيانه، يذبن الصوج والمشكلة والعار والخزي على الخاين فقط، ويتجاهلن متقصدات وجود البنيه الاخرى،
وسؤالي الك، هم سمعت فد يوم امرأة نسويه تحجي بشكل سلبي عن النساء الي يخونن ؟ طبعًا لا
هي عدها اوردو واحد فقط .. وهو شلون نطلع الرجل أسوء شي بالدنيا حتى باقي البنات يقتنعن.
لذلك ارجع واكول، اذا انتَ انسان محترم ومتربي وتخاف الله، وماعندك سوالف يمنه يسره، لا تتزوج وحده نسويّة او عدها افكارهم، صدكني قضيت على نفسك.

قبل لا ينتهي الكلام
معالجة الخيانة تجي بمعالجة المجتمع
و
ارجع اقره اول سطر كتبته..

وكلكم عيوني.