تخيل شخص يكضي عمره راح بإنتظار السعادة، يتصور راح تجي ويه شخص محدد، او بالمال ، او بالنجاح والمنصب
وكل مرة يوصل لليريده يحس بفرح مؤقت وراها يرجع لشعوره بالفراغ ، مثل متسول باقي طول عمره يمد ايده للحياة .
بفلسفة شوبنهاور ، الحياة مو مسرح للسعادة، بكد ماهي معركة مستمرة بين الرغبة والمعاناة، ما تلهَف أمامَهُ يصبح بلا قيمة بمجرد حصولك علي ،
فتبقى بدائرة ماتنتهي من السعي والإحباط،

اليفهم الحقيقة ما يبقى عبد لرغباته،
يلگه الحكمة بتقليل التعلق،
وتقبل الألم جزء اصيل من الوجود
يمكن مانكدر نشرد من المعاناة
بس نكدر نعيش بدون مانصير خدم لأوهامنا.

وكلكم عيوني.

9:18 صباحًا
بهاي اللحظة وبدون سابق أنذار ، أني مشتاق لبغداد.

صح عايش بنصها بس مشتاقلها،
أريد ارجع أحس بيها من جديد
أريد أرجع أحس بطفولتي من جنت أزورها، اللهفة والذكريات الحلوة، بيت الخالة، بيت العم والجد , اللمة الحلوة والسوالف التخبل الي إلها بداية ومالها نهاية، حنين مو طبيعي للسنين السابقة، جان كل همّي تصير ب 3 العصر حتى انزل اشتري اني وأخويه وبت خالتي من اسواق ابو رواد، واذا سمحولنه اهلنه نروح للمحل الي ع شارع العام، جان بنظرنه مول كامل، يمكن چنه نشوفه هيج لأن بعيد شوي، متعة انُ تمشي مسافة بعيدة خارج حدود بيتك ب 2008 جانت متعة ومغامرة عظيمة.

نومة السطح ببيت جدو يعقوب، مثلجات الملكة، بركر الدب، الكيّة حمل مال عمو مؤيد، من تصعد وراها تحس نفسك باتمان طاير ديدور ذكرى حتى يصنعها بطفولته، ذكرى حتبقى بباله لحد الآن.
شكد اتمنى لو تنعاد دقيقتين فقط من الشعور القديم، لو أشوف بغداد وأحس بيها نفس قبل.

قبل شوي طلبت أكل من مسافة شوية بعيدة، دائمًا الطلبات البعيدة أنطيهم إكرامية زيادة، الطلب جان سعره 8 ونص ، نطيته 10 الاف وجانن اغلبهن خردة آلاف،
گلي بعدلك الف ونص كتله فدوه الك، واخذت الطلب تمشيت للمحل براس الشارع داجيب شي اشربه، وصلت للكاشير دا احاسبه ، سمعت واحد بصفه يگول "عادي هنه مليونين قابل شمقفص عليّ" ويرجع ذاك يجاوبه يگله اي اصلًا فلوسه ما تخلص
رجعت للشقة لكيت ابو الدلفري بنفس مكانه دا ينتظرني
گلي حبيبي ذني 11 ألف مو 10
منطيني ألف زايد اضافي بالغلط.

بقيت صافن شويه، رجعت للسؤال الأبدي، هل الإنسان مُخيّر أم مُسيّر بفعل الخير او الشر؟
ألف دينار فقط هيّ قيمة الإجابة عن هذا السؤال.
بهل اثناء گلي اخويه وين شردت
انتبهتله كتله اخذهن گلبي، وشكرًا الك گلي عليش؟ كتله على الجواب.
ضحك وراح.

وكلكم عيوني.

ليش اكثر العلاقات الحالية تنتهي بالفشل؟

النجاح بالعلاقات يكتمل من تفهم شخصية المقابل، شلون يحجي، وشلون يعبّر عن فرحه وحزنه، درجات حدود زعله، مقدار العطاء بالحب والتقدير الينطي الك ولغيرك، وكذلك إستعداده حتى يتغيّر علمودك
لأن فهمك للشخص يخلي حدود لتصوراتك الوهمية، وأول ماتعرف حقيقة وسلوك المقابل راح تريّح نفسك، أما تساعده وتتقبله أو ترفضه وتبحث عن شخص ثاني.

احنه اغلبنا نختلف بطريقة العطاء وطريقة التعبير عن المشاعر، ممكن انت اذا حبيت شخص تعزمه بمطعم وغيرك من يحب يجيبه ورده،
ف إلمامك بحدود الشخصية المرتبط بيها وجوانبها يريحك بالتصرف وياها بعدين.

دائمًا انطي لنفسك وللمقابل فرصة يفهمك وتفهمه

وكلكم عيوني.

أحسن مكسب ممكن الإنسان يكسبه بهاي الحياة
هيّ امرأة شريفة وبنت أصول، تعرف شلون تحبك وتصون مكانتك بغيابك وبوجودك وياها، تعرف تقدّر وتحترم وماعدها بگلبها بس الضحكة والخير للكل
تسمع الكلام وتتجنب الشغلات الممنوعة عليها، وتتخلص من المشاكل بأقل الخسائر وأبسطها،
تهتم لصحتك ولنومتك وكعدتك، تحس يمها بأنك طفل صغير توّه إجه للدنيا.

امرأة حنونه 'وتفهمّك'
وتعرف الله ونبيّه وأهل بيته
هذا ما أتمناه ألكم أصدقائي الشباب.

وكلكم عيوني.

مو لازم كل شي حلو تسوي بحياتك راح يرجعلك
المقابل الحقيقي لأفعالك الطيبة هو راحتك النفسية وضميرك الحيّ
وهاي أكبر مكافأة.

تكدر تحارب الكل حتى تخلي علاقتك العاطفية تنجح وتحافظ عليها، إلا شخص واحد ماتكدر تحاربه علمود تحافظ على علاقتك
وهو الشخص التحبه والرايده بهل علاقة، ابد متكدر تجبره يكون وياك، ولا تجبره يصير زين وياك حتى ما يخسرك، ومستحيل تجبره حتى يسمع كلامك، لأن لو رايد هالعلاقة تنجح جان سمعه وحافظ عليك، او على الأقل جان حس بيك وقدّر القدمته اله.
لذلك اذا حسيت بنفسك ما قصرت ووضحت الأسباب وحاولت مرارًا وتكرارًا، لا تلوم نفسك ابد إذا إنتهت العلاقة، بل أشكر نفسك على حقيقتك ووضوحك أمام الله، ولأن ضميرك لسّه موجود.

عيد مبارك أصدقائي
وكلكم عيوني.

أللهم لك الحمدُ حتى ترضى ولكَ الحمدُ إذا رَضيتَ ولكَ الحمدُ بعد الرِضا، اللهم صلِّ على محمدٍ وآل محمد، واكفنا شرّ خلقِكَ، وأجمعنا بمن هم أحنُ منّا على أنفُسِنا، اللهم وفقنا على طاعتِكَ وتقواك، ولا تشغلنا في أمرٍ يضرنا ويبعدنا عنكَ يا رحيم يا كريم، اللهمَ أجعلها بدايةً تُرضيك وتُرضينا، ويسّر لنا أمرنا بما ترتضيهِ لنا، لا بما نرتضيهُ نحن، اللهم عاملنا برحمتكِ لا عدلكِ، وأعفو عنّا وأغفر لنا سوء جهالتنا بقدرنا، وثبتنا على نهجِ مُحمدٍ وآلهِ الطيبين الطاهرين
ولا حولَ ولا قوة إلا بالله العليّ العظيم.

شغلات يومية ذكّر نفسك بيها

- العلاقة التستنزف طاقتك والمتضايق منها اتركها لو روحك بيها
- لا تكرر طلبك مرتين، ولا تكرر المسامحة مرتين
- نام مظلوم ولا تنام ظالم
- قدّر المواقف والأفعال اليسووها الك اليحبوك، وسجلها بورقة لأن راح تنساها بعدين
- غادر من كل مكان تحس وجودك مو مهم بي
- شكد ما تكدر لا تطلب شي من الناس
-إتحكم بردات فعلك وسيّطر على عصبيتك، اليزعجك أتجاهله ولا كأن موجود.
- دائما راح تسمع كلام مو حقيقي عليك حتى من أقرب الناس، اتجاهله تمامًا.
- شكد مابيك لا تكتل ضميرك الداخلي، لأن هو اليحسسك بالإنسانية والأخلاق.
- ساعد الناس لوجه الله شكد ماتكدر، ولا تنتظر رد او تقدير.
- ابد لا تخلي أحد يقلل من كرامتك ويحسسك أنت لا شيء ، كرامتك هيّ سلاحك الوحيد بالحياة.
- دير بالك تضعف وتنقهر بسبب علاقة عابرة، كل الشغلات الراحت مصيرها تروح، هذا قرار من السماء، راحت لأن حتمًا بيها أذية وبيها قهر مستقبلًا.
-لا تدخل طب أسنان
- ولا تشجع برشلونة

وكلكم عيوني

ها نسيت أهم وحده

- لا ترتبط ببنيه عدها أفكار نسويّة

بشرفك

الشي الي مابي خير الك راح تشوف رب العالمين يسده بوجهك لو مهما سويت ومهما حاولت تسوي ومهما جان بنيتك تسوي !
بالاخر راح تشوف نفسك تستسلم وره كل محاولاتك، وواكف بالنص متعرف شتتصرف لأن من البدايه مجان هالشي خير الك، بس أنت الي عاند وضليت تجرب وتحاول وتقاوم، مع أنه كل الدلائل تكلك أنه هالشي مو زين
ومو خير الك وأنتَ تستاهل الأفضل ...

لهذا السبب ادعي الله يرزقك بالخير وبس،
لأن سبحانه هو الوحيد الي يعرف وين مصلحتك
وشوكت و ويه منو!

وكلكم عيوني.

الأنسان بحاجة للراحة شوية، تستريح من الخوف والقلق ومن عناء التفكير والمعارك التخوضها بالتوازي.
ما تمنحك الحياة اكثر من المكتوبلك
ومحد يمنع عنك شي مكتوبلك، ف اهدأ.
تصالحك وي ابتلائاتك الماتكدر تغيرها، يبين الكلام سهل بس الحقيقة ماكو بديل.
إما التصالح لو يمشي بيك العمر بدون ماتلتقط أنفاسك وتحس بشي حلو ولو للحظات.
تعامل ويه الحياة بقناعة، هي مو دار راحة، مو مكان للسلام النفسي المطلق،
ولا للطمأنينة الما يشوبها قلق، هي مجرد حياة، لحظاتها تتبدل وأحوالها تنغير،
يمكن تضحك هواية ومرات ما تبتسم وبكل أحوالها راح تمشي
انت تحتاج لوسادة يغفو عليها عقلك،
علمود يرتاح حتى يمنحك لحظات من الأمان، لحظات من شعورك بأنّك اختاريت الشي الصح إلك
حتى تكمل الطريق.

وكلكم عيوني.

الى طلاب السادس ..

(ولقَد خلقنا الإنسان ونعلمُ ما توسوس بهِ نفسُه، ونحنُ أقربُ إليهِ من حبل الوريد)
إلى نهاية الآية الختمها الله سبحانه وتعالى بِ ( وما أنا بظلامٍ للعبيد)

من فكرت أكتب رسالة لطلاب السادس قبل شوي، ما اجت ببالي غير هاي الآية، مو فقط مواساة ولا فقط اطمئنان، بل تنقلنا حقيقة واضحة وصريحة مفادها أن أحنا البشر نقلق ونوهس بينا وبين نفسنا، والله سبحانه يعلم بهذا القلق وبهذا الخوف البينا ، لذلك شنو يگللنا
ونحنُ أقربُ إليهِ من حبل الوريد، يعني اني اقرب الك حتى من نفسك، أقرب الك حتى من هاي أفكارك وقلقك، دا يوصلّك رسالة مفادها، انتَ ما مخلوق لوحدك، اني خالقك وأني وياك وقريب جدًا عليك، ومو بس هيج
يگللنا بنهاية الآية اني مو ظالم لبشر ، وحاشى الله من أن يظلم احد طبعًا،
يعني تعبك وقرايتك راح تتجازى عليها بعدين 100‎%‎ ، ما راح يظلمك ابدًا الله ( حاشاه ) ولا راح يكسر بخاطرك طول ما أنتَ مؤمن بي ومسلم نفسك بيد الله ومتوكل عليه.

أتذكر دائمًا أن الله ما يضيع تعبك ولا يظلم حقك ويطلب منك فقط السعي ومن عنده النتيجة، لتفكر بالبعدين فكر هسه ، فكر شنو راح تقدم ،، وأصبر .. دائمًا خليك صبور
قال تعالى ( وأصبِرْ، فأنَّ الله لا يضيع أجر المُحسنين)
يعني يا حبيبي تعبك ما يضيع فما حاجة ابد للتوتر والقلق ،، حتى اذا تحس نفسك ما مضبط المادة وما قاري زين ، گول دائمًا بينك وبين نفسك
ليغلبنَّ لطفهُ خوفي .. الله لطيف بعبادة وما راح يسمح لخوفك بأن يتغلب عليك، ولا لضعفك بأن ينتصر عليك، الله قوي فما يخلق إنسان ضعيف ابد، كل من آمن بهِ وتوكل عليهِ بمطلق التوكّل فهو قوي..
ولا قوة إلا بالله..

كل التوفيق ألكم أصدقائي، والسادس ماهوَ إلا محطة صغيرة جدًا من محطات الحياة
وكادرين تجتازوها بسهولة نفس ما اجتازوها غيركم، ونفس ما أنتو اجتازيتوا كل تحدي مر بحياتكم.

وكلكم عيوني.

بكل صراحة

إيران هي الند الوحيد لإسرائيل بالعالم، رأينا بالحب او الكره السياسي تجاه إيران مو مهم حاليًا ولا بمقدار ذرة، لأن إحنه كدام مسألة وجودية تهدد وجودنا العراقي بالدرجة الأولى، اسرائيل عازمة على تحقيق مشروع الفرات والنيل، يعني تضم الدول العربية كلها الها، تخيل تكعد الصبح تلكه جندي صهيوني بباب بيتك، بوقتها حتى باليوتيوب ما تكدر تزور الأئمة عليهم السلام، منو جان متوقّع يطلع كل هالفعل من اسرائيل ؟ قبل جان عبالنا قوتهم تكفي بس غزة، لكن بشهر واحد قضوا على لبنان وسوريا، دول كاملة استحلوها وقتلوا قادتها، حتى بمواجهتها ضد ايران، بأول 10 دقايق من الحرب تكتل 20 قائد من أكثر القادة المهمين بإيران ؟ شنو هالإستخبارات والقوة الواصليلها.

لذلك من الأخير، مصلحتنا كعراقيين او مسلمين شتريد تعتبرنا اعتبرنا، مصلحتنا هيّ إنتصار ايران فقط، اما سقوط إيران وهزيمتها معناها سلملي رسميًا.
هالمرة لا داعش ولا القاعدة ولا الطائفية ، هلمره الصانعهم كلهم راح يجيك بنفسه.

أفتهم شوي وخليك متيقن يقين تام، إذا خسرت إيران الحرب، ماكو دولة عربية وحده راح توكفلك، أنسى شي اسمه العرب، العروبة كذبة أطلقها الملعون الراحل، وأنتَ كعراق ما تكدر تصمّد 3 دقايق كدام اسرائيل وطياراتها، صاروخ واحد ببغداد يكفي بإنهيار العراق كله لا سامح الله.
أصحى على زمانك وأعرف ويامن توكف، هسه الحرب فوك سماءك، باجر بأرضك.

قَاتِلُوهُمْ يُعَذِّبْهُمُ اللَّهُ بِأَيْدِيكُمْ وَيُخْزِهِمْ وَيَنْصُرْكُمْ عَلَيْهِمْ وَيَشْفِ صُدُورَ قَوْمٍ مُؤْمِنِينَ

وكلكم عيوني..

بالأذان حاليًا ديصيح أشهد أن عليًا ولي الله
وبالمبايل ايران حركت اسرائيل بصواريخها


هَرمنا من أجل هذهِ اللحظة.

الدين كله في كفة ميزان ، ويوم الغدير في كفة ميزان آخر.

حيث نزلت الآية المباركة وفيها أمر للنبي من الله، قال تعالى - "يا أيُها الرَسولُ بَلِّغْ ما أنُزل إليكَ من رَبِّكِ وإن لَمْ تَفعل فما بلَغتَ رِسَالَتَهُ"
وهذا التبليغ الإلهي هو ولاية أمير المؤمنين وسيّد الوصيين وإمام المُتقين عليّ بن ابي طالب عليهِ السَلام.

وقف النبي صلى الله عليه وآلهِ أثناء عودتهِ من حجة الوداع في صحراءٍ ملتهبة الحر في وادي الغدير مخاطبًا اكثر من 50 ألف من المؤمنينَ والصحابة
حيثُ قالَ سيد الخَلق: "إن الله مولاي وأنا مولى المؤمنين وأنا أولى بهم من أنفسهم فمن كنت مولاه فعليٌ مولاه، اللهم والِ من والاه، وعادِ من عاداه، وأحبَّ من أحبّه، وأبغض من أبغضه، وانصر من نصره، واخذل من خذله، وأدر الحق معه حيث دار، ألا فليبلغ الشاهد الغائب".

ثمَ نزل جبريل الى النبي ليخبرَهُ بما قالَهُ الله تعالى بعد حديث النبي : "اليومَ أكملتُ لَكُم دينَكُم وأتمَمتُ عَليكُم نِعمَتي وَرضيتُ لَكُم الْإِسْلَامَ دينًا"

فأكتمل الميزان وتبيّن أن ولاية علي هيّ حجة واجبة ومشروطة على كل مسلم يؤمن بأن الله ربه وأن محمد نبيّه.

اللهم نشَهدُ أن نبيَّكَ مُحمد صلى الله عليهِ وآلهِ - في يوم الغدير - قد بلغَنا بما أنزلتَهُ عليهِ، وقد أكمل رسالَتَهُ وأمرنا بإتباع ولاية أمير المؤمنين من بعدهِ.
فعندها رضيتهُ يا الله دينًا لنا، اللهَم فأشهد أنَّ عليًا بالحقِ ولي الله، وان الحقَ مع علي يدورُ معهُ حيثما دار "وأن والله هذهِ هي العصمة الإلهية".

أللهم فصلِ على محمدٍ وآل محمد وثبتنا على ولاية أمير المؤمنين، وأجعلنا مِمن يتشرفون برؤية حبيبَك رسول الله بجانبِ وليَّك في الدنيا والآخرة علي بن أبي طالب عليهِ السلام.

متباركين بأعظم الأعياد ❤️

(وكلكم عيوني)

أحمَد قاسم.

اكو إقتباس قريته قبل كم يوم وحبيت أشاركه وياكم، أعتبرته برأيي أحلى شي ممكن أقراه بحياتي

الإقتباس يكول : ‏“إذا كنت تستطيع أن تُحب الشخص الخطأ إلى هذا الحد ،فتخيل كم سيكون مقدار حُبك
‏للشخص المناسب”.


مرات نصنع ذكريات وننطي حب وجهد غير مسبوق ، وياها معاناة وأمل بالمستقبل، كلهن ذني لأشخاص خطأ ومؤقتين جدًا يادوب سنة سنتين، مع علمك بأنهم غير مناسبين لكن مابخلّت عليهم بصدق مشاعرك ولا بصدق نواياك أمامهم وأمام الله، اتعاملت وياهم بمبدأ "صح همه ناس غلط بس ميخالف اكمّل حتى ابري ذمتي امام الله" الى أن الله يكلك هذا الإنسان الخطأ خلص وقته بحياتك، فمن تحمد الله تجيك لحظة الإدراك هاي
كل السويته جان علمود شخص تعرف بي مايسوه، فتخيّل شنو ممكن تسوي للشخص الصح والمناسب والضامنَه دنيا وآخره، شنو ممكن تقدم من إمكانيات لذاك اليسوَه
شعور جميل والله ❤️

وكلكم عيوني.

ما يُعجِبُني بالإمام العَباس عليهِ السلام، هيّ صفاتٌ كثيرَة ولكنّي أفيضُ عشقًا بالكبرياء وعزّة النفس التي يمتلكها، قرأتُ بما فيهِ الكفاية من أبطال الشخصيات التأريخية، لَم أجد أحدًا منهم فَعل ما فَعلهُ العباس بن علي حينما كانت الجيوش والكتائب أمامَهُ لتمنعهُ من الوصول الى النهرِ، ولم يشرب الماء هو وأهل بيتهِ لمدة يومين كاملين، فوصَّل بشجاعتهِ وعنفوانهِ الى النهرِ، ثُمَ وضع الماء على يديهِ، وهو ينظرُ الى الجيوش التي جاهدَت لتمنعهُ من الوصولِ، نظرةَ كبرياءٍ وشموخ، كأنَّهُ يقولُ لَهم، أهذا النهرُ الذي منعتموني منهُ؟ ها أنا العباس بن عليّ بن ابي طالب، والماءُ فوقَ يديّ، لكنَ لحظة الكبرياء الحقيقية تَكمُن بعدها، في رميهِ للماء وعَدم شربه، مُطلقًا السبب ليس لأنهُ تذكرَ عَطش الحسين لأنَ العباس لا ينسى عطشهم، لكنَهُ وصلَ الى النهرِ وأخذ حفنة الماء تلك ثم رماها، ليوصل رسالة الى الكَفرة المشركين، أنّ من أبيهِ عليّ بن ابي طالب وأخيهِ الحسين عليهم السلام، لا أحد يستطيع مَنعهُ من أي شيء، لا أحد!

السَلامُ على العباسِ بن علي عليهِ السلام، يومَ ولد ويوم استشهد، ويوم يُرزقُ حيا

أحمَد قاسم.

ظاهرة إنتشار المواكب الحسينية للأطفال في الأحياء السكنية ، هيّ من أروع وأجمل ظواهر شهر محرم الحَرام، فهؤلاء الأطفال الصغار لا يُقدمون الطعام والشراب الى الحسين فقط، بل يُروضون أنفسهم منذُ الصغر على فكرة الكَرمِ والعَطاء للمقابل، فما أزهد المُعطي في سبيل الله وما أخلَصَهُ إيمانًا!

عَجِبتُ من قدسية ورسالة الإمام الحسين عليهِ السلام، حتى في الخدمة لأجلهِ، هُنالِكَ دروس وحِكَم للأطفال.

السَلامُ على سفينة النجاة.

أغدًا يستَشهدُ الحُسين ؟

في الحقيقة الموت هو إنتهاء الحياة، ولا أعتقد بأن هذهِ الصفة - إنتهاء الحياة - يتصفُ بها الإمام الحُسين بن علي عليهِ السلام، أكادُ أجزم بأن تلكَ الصرخة التي نادى بها الإمام - فيا سيوفُ خذيني - سيبقى صداها يرنُ أبدَ الدهرِ، وهذا الصَدى يتمثلُ بالموالين الحقيقين، يتمثلُ بأجيالٍ وأجيال من الأطفال الذَين تشّبَعَ الحُسين بداخلهِم منذُ الصغر، فالحسين الآن عادة مجتمعية قائمة على الإيمان والشجاعة، على رفض الظلم، على الكَرمِ والعطاء الوفير، على المسامحة والعفوّ، على الإلتزامِ بدينِ نبي الله محمد صلّ الله عليهِ وآلهِ وسلَّم، أن صدى صرخة الحسين باقٍ لأنهُ أمرٌ إلهيٌ بحت، ولأن الذي يحدَثُ كل سنَّةٍ ليسَت من تدابير البشر، فما الموتُ الذي لامسَ الحُسين ؟ أهوَ إنتهاءُ فِكرةٍ ؟ لَم ولَن تنتهي فكرة الحسين وثورَتهِ، أهوَ إنتهاءُ عَهدٍ ؟ كل الأزمان وكل الأمكان تصرخُ بإسمهِ،
أهوَ إنتهاءُ جَسَدٍ ؟ كُلّ الملايين تأتي زاحفةً على قبرهِ الشريف.

أنَ الموتَ الذي لاحَ الإمام، أبقاهُ حيًا الى الأبدِ.

احمَد قاسم.