أرفعوا الهلاهل يا أهل السمة
أعظم عريسين علي وي فاطمة ❤️

1 ذو الحجة
يوم زواج النور من النورِ
فقد روي عن النبيّ صلى الله عليه وآله
أنّه قال: "إنّما أنا بشر مثلكم، أتزوج فيكم وأزوّجكم إلا فاطمة، فإنّ تزويجها نزل من السماء".

وقالَ الإمام علي بوصفِ فاطمة عليهما السلام:
وما رأيتها يومًا إلا وذهب الهَمُ الذي كان في قلبي.

مُتباركين بهذا اليوم العظيم.

طول عمرنا وعمر اطفالنا واحفادنا مُدينين بالفضل والشكر والإمتنان لكل عائلة تجلس على طاولة المائدة وينقصها أحد ابناءها، شهيد لأجلنا ولأجل العراق.

سبايكر او غيرها من الآف المجازر بحق شهداء جان اكبر احلامهم وطن.
جان اكبر احلامهم عائلة صغيرة.

من جملة إن شاء الله
الى جملة الحمدلله يا رب

اكو رحلة شاقّة مليانه تعب وصبر وحزن وفرح ويأس وأمل، مليانه ضغوطات نفسية وأمور محد يدري بيها بس الخالق وأنتَ.
تسألني اذا الرحلة تستحق؟ كلش تستحق اذا وراها حلم ينتظرك تحققه، إذا وراها چف البنيه التحبها وهو ينتظرك تلزمه بالحلال، اذا وراها رضى الله وأهلك عليك.

من إن شاء الله الى الحمدلله
هذا ما أتمناه الكم أصدقائي
كل عام وأنتو بألف خير يارب ❤️

أخوكم الصغير احمد قاسم.

مانريد عيدية
نريد وطنية.

جنت صاعد ويه واحد من تكسي كريم شكله وأسلوبه مال ابن ناس، كلي إذا تريد تدخن عادي، كتله لا ممنون ما ادخن،
فاتت من يمنه سيارة يمكن موجود منها ٢ لو ٣ بالعراق كال ماشاء الله،
الله ينطينا مثلها، كتله مو شرط صاحبها يطلع مرتاح، يمكن يطلع مبتلي بواحد من أطفاله او زوجته او نفسه.. رد عليه كلي اهم شي بالدنيا هي الزوجة، كلي صارت مشاكل بيني وبين زوجتي وانفصلنا سنة، بهالسنة كرهتها من وره الخلافات، بقيت هالمدة كلها ما اكدر اشوف أولادي غير إذا يصدف يوم مناسبة او عيد ميلادهم، عندي توأم، خابرتها ردت اشوفهم وجابتهم ، شفتهم ورجعنا سويه لخاطر الجهال ، ماجنت اكدر اتعامل وياها ولا اصفالها لحد ايام كورونا من صارت بيه ، كتلها اخذي الجهال وروحي لبيت اهلج لتنعدون لحد ما فترة العزل تخلص وارجعي، كلتلي ماشي اخذت الجهال لبيت اهلها الغير مصابين ورجعت هيّ يمي بالبيت، حارت شتسوي بأيام مرضي آخر شي انعدت مني والحمدلله طلعنا من الأزمة على خير
كلي اخوتي من دروا بيه مصاب محد اجاني محد ظل باله يمي بس هي،
حجاها وهو مبتسم، كلي حبيتها من جديد
صارت عندي اغلى شي بالحياة حتى اغلى من جهالي الرجعت لخاطرهم ،

ماكو شي بالدنيا يوكفلك ويصبر لك غير ام جهالك، اي واحد ثاني وكت الجد يختار نفسه، محد يبقى وياك تالي عمرك بس ام جهالك ومحد يختارك مرتين بالحياة بس هيّ.

وكلكم عيوني.

ب2016 بالليل قبل 8 سنين چنت ويه صديقي بالكرادة داخل، تعشينه من كباب زرزور ودا نمشي بين البسطيات مال هدوم، جان اباله يشتري قميص رصاصي طوخ لأن حبيبته دازتله صورته.
اني ودامشي وياه وندور سمعت صوت بجي مال طفل، البچي جان بحركة گلب قوية، بالبداية ماركزت وياه لكن بعدين ركزت وكمت ادوّر على مصدر الصوت من بين البسطيات والشارع المتروس ناس تروح وتجي ومحد مهتم للصوت.
بحثت دقيقة لحدما شفت طفل ميتجاوز 5 سنين هدومة مشككة اغلبها ونايم على بطنة بالكاع وإيديه على عيونه ويبجي

سألت ابو البسطية البصفه گتله ليش يبجي؟ گلي هذا اسمه علي ابوه جان عنده كشك مال چاي هنا، وجان متعلق بأبوه ويحبه حيل، بيوم من الأيام مات ابوه بحادث، وامه تزوجت وتركته وصار مصيرة الشارع، يجمع فلوس من الناس التمشي، واصدقاء ابوه اهل المحلاتت ينطون فلوس من يشوفونه، وبنهاية اليوم يجون اطفال اكبر من عنده ياخذون فلوسه الي جمعها ويكتلوه ويروحون، كل يومية نفس الحال وتعبنه من الوضع

الكلام الگلياه هذا الشخص مو بس أثر بيه، بل ذكرني بنفسي من جنت بعمره، عشت هالشعور واني بهذا العمر خاصة بعد استشهد والدي بعمر ال5سنين.

رحت على الطفل وكتله كوم، رفض يكوم بالبداية، كتله كوم بصوت أعلى، گلي عوفني عمو
كتله ابوك ديباوع عليك ..
وكّف بجي ورفع راسه من الكاع، گلي ها؟
كتله ديباوع عليك هسه
التفت يمنه ويسره ما شاف احد كلي ليش تجذب عليه ؟
كتله ديباوع عليك من فوك، ديباوع على أبنه اليحبه والما يريده يبچي ويصير ضعيف،
كتلة تريد ابوك يفتخر بيك؟ گلي اي
كتله ممنوع تبجي مرة اخرى، وممنوع تخلي أحد ياخذ حقك، ذولة اليجون ياخذون فلوسك المرة الجاية شيل عودة واضربهم على راسهم وكسرهم تكسّر
"اذا ما صارت قوي هسه راح تعيش عمرك كله ضعيف"
ابوك هنا (أشرت على گلبه) وهناك ( أشرت على السمه)
ابوك بكل مكان موجود داير مدايرك، صحيح مايكدر يساعدك لكن يدزلك ملائكة توكف بظهرك
بهل اثناء كلي اني رجال ما احتاج يدز شي بس يباوع عليّ
كتله عفيه اني اريدك هيج، اريدك تعرف حجم المسؤولية العليك، وتعرف الصح من الخطأ من هذا العمر لأن محد راح يعلمك وينكسر گلبه عليك بس انتَ، ماريدك تعيش ظالم، بس ابد لتعيش مظلوم
كتله وين تنام كلي يم جيرانه اصدقاء بابا،
انطيته مبلغ جبير من الفلوس وكتله يلا روح للبيت
باسني من خدي وكلي شكرًا عمو وراح.

قبل فترة جنت ضايج حيل، من اضوج اطلع وحدي دا اتمشى بالكرادة بنفس ذاك الشارع، شفت اطفال هم مبينين مشردين عمرهم 10 سنين ديركضون فرحانين عبالك شايلين كاس العالم، واحد ضرب جتفي بالغلط
كتله ليش مستعجل، كلي اعتذر عمو بس لازم ننطي فلوس اليوم لأخونه الجبير حتى يصرفهن علينه
كتله شسمه اخوكم الجبير
كال علي ..

ابتسمت هواي.

وكلكم عيوني

الحنيّه اصعب شي يمتلكه الإنسان، وبنفس الوقت هيّ اجمل شي يمتلكه.

لكن للأسف بالوقت الحالي غالبية الناس مو حنينين، لذلك صار الإنسان الحنين نادر بل يعتبرونه الناس معجزة وشي مميز جدًا
اني اقسم الحنيّه لنوعين،
اولًا الحنيّة المرتبطة بمشاعر الحب: يعني تصير حنين ويه الإنسان التحبه في حال مازعاجك وما مكرهك بعيشتك، هو زين وياك؟ انتَ حنين وياه وتحبه، هو مو زين؟ انتَ تبطل تمارس وياه دور الحنين
شيء مقابل شيء، وهذا غلط.
أما النوع الثاني: الأصح بالنسبة الي لتوضيح معنى الحنيّة، هو الإنسان الحنون على اليحبهم والمايحبهم واليعرفهم والما يعرفهم، حنيته تكون سابقه مشاعره، مو شرط يحبك ولا شرط تبادله نفس المشاعر حتى يكون حنين عليك، وبالأخص والأهم أنهُ يكون حنين عليك حتى وهو ضايج ومتنرفز منك، كلت الحنيّة اصعب شي لأن اصحابها الحقيقيين يدوسون على نفسهم في سبيل يقدمون كل الحنيّه والحب للمقابل، حتى اذا مضوجهم.
وديقدمون الحنيّة مو من باب العطف او الشفقة للمقابل، بل هاي فطرتهم الإنسانية، لأنهم فعلًا مصدر أمان مريح.
هيج اشخاص ضامن وجودهم ومشاعرهم إتجاهك، لأن تعرف گلبهم حنين وما يتركوك وحدك تعيش قسوة الحياة بالباقي من عمرك.

فالشخص الحنون رزق.
مثلي يعني ^^

وكلكم عيوني.

اصدقائي نصهم دا يخطبون بالصيف
عود صايرين لواته حتى ماجيبلهم بطانية ام النمر

تحية حب وإحترام وتقدير وشُكر وعرفان لكل أم وأخت تشتغل بالمطبخ بهل حر وتسوي أكل لأهلها، شخصيًا اعتبر الموضوع بطولة وتضحية لازم الواحد يوكف إجلال وإحترام و(تقدير) إلها.
كل المطابخ بالعراق حاره واغلبهن حتى بنكة مابيهن، والجو اصلًا مشتعل، وكل هذا وهنه واكفات كدام عين الطباخ ويسون أكل لأشخاص كاعدين كدام المبردة او السبلت.
وهذا مو واجبهن بل متفضلات بي، وهنه هم بشر وهم يحسّن بالحر وبالتعب وبالحيرة مال الطبخ يومية، وغسل المواعين والتنظيف والوكفة بالساعات.

أرجو من كل شخص يكدر يساعد أمه او اخته لا يقصر وياهن، ولا يحس كبريائه ورجولته بخطر اذا سوه هيج، بالعكس هالمساعدة ما تنزلك بل ترفع من شأنك كدامهم وكدام الله.
وكذلك أتمنى من كل بنية تبقى نايمة للظهر وتنزل تلكى الاكل جاهز، انُ تعيد نظرها بنفسها

امك وأختك ومرتك هم ناس مثلك، مو خدامات جايبهن بفلوس علمود يحللن خبزتهن، لوما يحبنك يبقنّك معفن وجوعان طول العمر، فلا تبخل بالمساعدة.

وكلكم عيوني.

طاسه اترسها مي وبصفها فتافيت خبز أو هل موجود
وخليهن بالطرمة او بباب المطبخ

خلونه نتكاثف سويه وننشر رحمتنا المحدودة على مخلوقات الأرض، البزازين والعصافير وكل حيوان ممكن يستفاد من هذا الفعل البسيط.
بلكي الله يرحم بحالنا ويخفف من شدّة هالحر.

في سورة غافر قالَ تعالى
( رَبَّنَا وَسِعْتَ كُلَّ شَيْءٍ رَحْمَةً وَعِلْمًا فَاغْفِرْ لِلَّذِينَ تَابُوا وَاتَّبَعُوا سَبِيلَكَ وَقِهِمْ عَذَابَ الْجَحِيمِ)

جمعة مباركة

وكلكم عيوني.

يالتبغض علي محنتَك محنة
گطنه وشيلها من أذنك الجنة.

الدين كله في كفة ميزان ، ويوم الغدير في كفة ميزان آخر.

حيث نزلت الآية المباركة وفيها أمر للنبي من الله، قال تعالى - "يا أيُها الرَسولُ بَلِّغْ ما أنُزل إليكَ من رَبِّكِ وإن لَمْ تَفعل فما بلَغتَ رِسَالَتَهُ"
وهذا التبليغ الإلهي هو ولاية أمير المؤمنين وسيّد الوصيين وإمام المُتقين عليّ بن ابي طالب عليهِ السَلام.

وقف النبي صلى الله عليه وآلهِ أثناء عودتهِ من حجة الوداع في صحراءٍ ملتهبة الحر في وادي الغدير مخاطبًا اكثر من 50 ألف من المؤمنينَ والصحابة
حيثُ قالَ سيد الخَلق: "إن الله مولاي وأنا مولى المؤمنين وأنا أولى بهم من أنفسهم فمن كنت مولاه فعليٌ مولاه، اللهم والِ من والاه، وعادِ من عاداه، وأحبَّ من أحبّه، وأبغض من أبغضه، وانصر من نصره، واخذل من خذله، وأدر الحق معه حيث دار، ألا فليبلغ الشاهد الغائب".

ثمَ نزل جبريل الى النبي ليخبرَهُ بما قالَهُ الله تعالى بعد حديث النبي : "اليومَ أكملتُ لَكُم دينَكُم وأتمَمتُ عَليكُم نِعمَتي وَرضيتُ لَكُم الْإِسْلَامَ دينًا"

فأكتمل الميزان وتبيّن أن ولاية علي هيّ حجة واجبة ومشروطة على كل مسلم يؤمن بأن الله ربه وأن محمد نبيّه.

اللهم نشَهدُ أن نبيَّكَ مُحمد صلى الله عليهِ وآلهِ - في يوم الغدير - قد بلغَنا بما أنزلتَهُ عليهِ، وقد أكمل رسالَتَهُ وأمرنا بإتباع ولاية أمير المؤمنين من بعدهِ.
فعندها رضيتهُ يا الله دينًا لنا، اللهَم فأشهد أنَّ عليًا بالحقِ ولي الله، وان الحقَ مع علي يدورُ معهُ حيثما دار "وأن والله هذهِ هي العصمة الإلهية".
أللهم فصلِ على محمدٍ وآل محمد وثبتنا على ولاية أمير المؤمنين، وأجعلنا مِمن يتشرفون برؤية حبيبَك رسول الله بجانبِ وليَّك في الدنيا والآخرة علي بن أبي طالب عليهِ السلام.

متباركين بأعظم الأعياد ❤️

(وكلكم عيوني)

أحمَد قاسم.

يا نعمة الله الوسيعة …

الحُسين الحُسين الحُسين
الحُسين

ويبقى السؤال اليتكرر ببالي كل سنة بهيج وقت،
شلون إنسان استشهد قبل اكثر من 1400 سنة، والناس الحالية ما شايفته ولا حاجيه وياه، والعدنا بخصوصه فقط روايات وأحاديث،
شلون هيج إنسان بقى عايش بداخلنا كل هل مئات من السنين ؟ شنو الخلاه بهاي المنزلة العظيمة عند المسلمين الحقيقيين الي ربهم الله ونبيهم محمد؟ لحد هل لحظة الناس تقدم الغالي والنفيس علموده، بغض النظر عن تبرعاتهم بالفلوس لمساعدة الفقراء علموده وبغض النظر عن الأكل المجاني النشوفه بعاشوراء وعن المشاعر والدموع، بغض النظر عن إنهم متخذينه كمنهج ومشروع إستشهادي لكل خطر يهدد دينهم ووطنهم وعرضهم، وبغض النظر عن وفائهم إله وتجديد وتعظيم شعائرهم بخصوصه كل سنة، كما أمر الله بقولهِ ( ومن يُعظّم شعائر الله فإنها من تقوى القلوب )
سؤالي مختلف شوية، لأن مابي إجابة،
سؤال معنوي بي تعمّق بالفكرة وسرح بالخيال، خاصة كسؤال عظيم مثل : شنو السر والعلاقة الخاصة بين الإمام الحسين وبين الله عزّ وجل ؟ شنو هاي العلاقة المقدسة الي ماعتقد أكو بشري بعد النبي والإمام علي حصلها ؟
شنو السر الي خلّه أعظم بشر بالكوكب وسيّد الخلق وحبيب الله النبي محمد صل الله عليهِ وآله وسلَّم يقول ( حسينٌ مني وأنا من حسين، أحب الله من أحب حسيناه )
يعني شنو حسينٌ مني وأنا من حسين ؟
إتعمق بهذا المعنى 10 ثواني بس، راح تنصدم من الحجم المهول لمكانة الحسين بن علي عند الله وعند النبي،
حسينٌ مني وأنا من حسين ، كلمات عظيمة وكبيرة جدًا گالها النبي ووصف بيها هذا الإنسان الماله مثيل، لا بفاجعته إله مثيل ولا بمكانته وقدسيته.
"حسينٌ مني وأنا من حسين" جملة تخليك تحس أن الجان يحارب وحده بمعركة الطف، هو النبي محمد مو فقط شخص الإمام الحسين، جملة تأخذك لمعاني بعيدة وعظيمة، لكن قليل بحقها الشرح، ومو كل الناس تستوعب المعنى،
شنو القدمه والسواه الإمام الحسين للصحابة الأوفياء الجانوا موجودين وياه من طلب من عدهم يتركوه ويرحون حتى ما يموتون، لكنهم رفضوا رفض قاطع وجانوا ينتظرون الشهادة على أحر من الجمر !
وكفوا وياه لآخر نفس، وگفوا وياه وحموه نفس ما وگف الإمام علي بالمعارك وحمى النبي محمد صل الله عليهِ وآلهِ وسلّم، نفس المشهد انعاد، نفس خوف الإمام علي على النبي همه خافوا على الإمام الحسين،

نعم الإمام الحسين ،
عجزت ألكه تعريف او وصف يليق بهذهِ الشخصية الثائرة الشجاعة العارفة بالدين والمضحية لأجل إستقامت هذا الدين
وديمومته لحد هذهِ اللحظة،
كلما أقرأ عن الإمام الحسين وعن تفاصيل معركة الطف، احسه رسّام !!
اشوفه وهو يرسم لوحة الفداء والإخلاص بكل أريحية، ينتقل بالأحداث الحزينة وهو صابر بقضاء الله وقدره، يفقد أهله وأصحابة واحد ورة الأخر، وهو مستعد وكأنما رسام وديكمّل لوحته، وكأنما شهد هاي الأحداث مسبقًا، وكأنما شهد لحظة إستشهادة.
لكن هيهات هيهات، ويخسأ من يقول أن الحسين قد مات، الحسين حيٌ يرزق عند الله ورسوله، كما قال الله
( ولا تحسبنَ الذينَ قتلوا في سبيل الله أمواتًا، بل أحياءٌ عند ربهم يرزقون)

الحمدلله الذي وفقنا بحب حفيد النبي وروح النبي الإمام الحسين عليهِ السلام والذي أنار بصيرتنا وثبَت ديننا بطريق الإمام الحسين، الحمدلله على نعمة الإسلام، الحمدلله على نعمة الحسين بن علي
ولعن الله من ظلمك ومن قتلك ومن سمع بذلك فرضيّ بهِ
ولاحول ولا قوة الا بالله العليّ العظيم.

نعاهدكَ يا أبن رسول الله، أن نمضي كلَّ سنةٍ على منهجكِ "عقيدةً وفكرة"

أحمَد قاسم.

(الهي ماذا وجَدَ من فقدَك، وما الذي فقدَ من وجدَك).

هذا السطر فيهِ من البلاغة ما يكفي لكي يُعادل كتُبُ دينية كاملة، سطر ذو معنى عميق جدًا وقالهُ شخص عظيم جدًا، شخص لَنُ يُكررهُ التأريخ مُطلقًا
فكيف يُمكن تكرارهُ وهو أبا عبدالله الحسين بن علي (عليهِ السلام)

الهي ماذا وجدَ من فقدَك ؟ ومعناه أن فقدان العبد لخالقهِ (الله) لن يسد محلهُ أي مكتسب قد يكتسبه هذا العبد، وسيبقى ما وجدهُ من الدنيا هو الفراغ لأنهُ فقدَ علاقتَهُ مع ربهِ.

وما الذي فقدَ من وجدَك؟ ومعناه أن الذي يبني علاقة قوية مع ربهِ ويجد الله في قلبهِ وفي أعمالهِ وفي إيمانهِ ويتضرع لعبادتهِ فأنهُ لن يفقد أي شيء مهما كان.

هذهِ البلاغة وهذا الإيمان لا يصدر من شخص إعتيادي، ولا يُمكن أن يصدر من غير الإمام الحسين.
يُعلمنا هذا الشهيد الشُجاع درسًا آخر من دروس الحياة، فلم يكتفي بالثورة ضد الظلم ولم يكتفي بأن يغرس في عقولنا ومبادئنا أن لا نصمت على الحاكم الظالم ولم يكتفي بأن يُقتل في سبيل إستقامة الدين، بل علمنا أن العلاقة مع الله هي أساس الدنيا والآخرة، وأن لولا علاقتهِ العظيمة مع ربهِ، لما إنتصر هذا الإنتصار العظيم الذي إستغرق ساعات قليلة، ساعات نستذكرها كلَّ عامٍ وعلى مدار ألف واربعمائة سنة.

هنيئًا لكَ الجنة، وهنيئًا لنا المضي في ثورَتِكَ (منهجًا وفكرةً) وهذا والله ماكُنتُ تطمحُ بهِ في دين جدِكَ رسول الله.
فأشهدُ أنَّكَ ولدتَ حرًا ومُتَ حرًا يا أبا عبدلله، وأن لا يوم كيومك يا أبن فاطمة، وأشهدُ أنَّكَ قاتلتَ من أجلنا، فأشهد لنا عند ربِكَ، إننا ماضون على دربِك.

أحمَد قاسم.