اشو رحنه لأغلى المطاعم ولا يوم اتباهينه وخبصنه الدنيا بيهن، ورحنه لأرخص المطاعم وولا يوم ركبنه الموجة وصرنه ويه الترند بحجة شوفوني زاير هالمكان الرخيص بفلان منطقة تراثية، اشو ركبنه اغلى السيارات وأحدثهن وما خبصنه الدنيا ولا خلينه اغنيه احنه الهيبة من الله، اشو شجعنه أفضل الأندية ولا يوم استحقرنا نادي الخصم او صار عدنا تعصّب رياضي وگلنه فلان احسن من افلان، جبت عمري اشجع ريال مدريد واكول ميسي افضل لاعب بالعالم، اشو كل فترة مشترين شي غالي بس ولا مرة نشرناه واتباهينه بي بحجة شوفوني عندي شغلات غالية، أشو دخلنه بعلاقات وحبينه وضحينه، ما فديوم خبصنه احد ولا حجينه ولا استغلينه علاقتنه لغايات أخرى،

راح تنضج بهالحياة من تشوف أن الصمت واجب شرعي وأخلاقي وفريضة تحفظلك شخصيتك من التشوّه ومن عصر التكرار الممل، وراح تنضج من تتأكد أن أفضل صفة يتصف بيها الإنسان هي الهدوء وعدم مشاركة الحياة الشخصية "الطبيعية "مع الجميع،
وأن الدنيا كلها بأرضها وسماءها
ما راح توكف على ستوري بالأنستا.

وكلكم عيوني.

من اباوع على نفاق الناس وعلى جذبهم وعلى الأخلاق التعبانه، الحقد والنميمة والتنمر ، كره الخير للمقابل والحسد التارس گلوبهم، احتراف الجذب والخيانة وسرقة الأمانة وسوء المعاملة وعقوق الوالدين وغيرهن العشرات من الصفات الخبيثة.
مو غرور ولا تكبر من اكول شكد مختلف اني، شكد نقي من الداخل، فعلًا إنسان"حقيقي" بعيد كل البعد عن زيفهم، ومرات افكّر ، ليش اني هيج؟
ما جربت ابد احجي على احد بالسوء حتى عن الأشخاص الأذوني، حتى عن الأشخاص الأدري بشرهم، ما جربت ربع من الديسوونه الناس الذكرتهم فوك.
هل الموضوع نعمة وتوفيق من الله فقط! أم انهُ إجتهاد شخصي مبني على حسن التربية، وهل التربية شعور ذاتي أم سلوك عائلي ؟وهل نحنُ مخيرين أم مسيرين أمام فعل الخير والشر ؟
اسئلة كثيرة

وكلكم عيوني.

من أدركّت حقيقته ووعيت على معناه ولحد هاي اللحظة، اني عايش قصة حب وية القرآن.
وبالتحديد التوكيدات الي يأكدها الله سبحانَهُ وتعالى بالآيات، مثلًا " فإن معَ العُسرِ يُسرا" ويرجع سبحانهُ وتعالى يأكدها مباشرةً ويقول " إنَّ مع العُسرِ يُسرا"

صح الله ليسَ كمثلهِ شيء ، أي لا تنالَهُ الأوصاف ابدًا ، لكن مرات أحس هاي الآية تمثّل أب حاضن بنته وديطمنها ، تمثّل إنسان مؤمن حكيم دينصح شخص واكع بمشكلة جبيرة، تمثل تنهيدة الراحة التجي بعد لحظات صعبة.
لو من يذكر سبحانهُ وتعالى القصص المليانه عطف ورحمة من عنده،
شلون طفل عمره 7 سنين يوكع ببير 20 متر وراها يطلع بمعجزة ويصير نبي على الأمّة ؟ لو نبي كبير بالعمر ينتظر ابنه 30 سنة عاشها بالحزن والهَم والبجي حتى نعمت عيونه، وبعدين يشتم ثوب ابنه ويرجع بصره؟
لو طفل عمره أيام تضطر أمه تذبه بصندوق بالبحر لأن رادوا يكتلونه، والي حاول يكتله هو ياخذه ويربي ويصير نبي عليهم !
لو امرأة طاهرة تقيّة من عائلة دينية، ابوها ورجل خالتها انبياء، كرست حياتها لخدمة بيت القدس، وراها ينزل مَلَكَ من السماء يبشرها بأنها حامل بنبي وهيّ ما مزوجة اصلًا ؟ حتى بنص هل بلاء والإختبار الله ما تركها وحدها، گللها هزي بجذع النخلة راح ينزلج رطب تاكلين منه وتوكلين الجنين.
لو نبينا الكريم صلّ الله عليهِ وآله الي قال ( ما أوذيَ نبيٌّ مثلَما أوذيت )
النبي الي حياته من بدايتها لنهايتها مليانه قصص وحكم (وأختبار) حقيقي لإيمان الإنسان من عَدَمَه.

هاي مو بس قصص صارت وانكتبت بكتابنا الكريم، هاي أمثال ودلائل تثبتلك أن الله فعلًا قادر على كلّ شيء ، أن الله رحمَتَهُ وسعت كلّ شيء.

ف دير بالك تيأس
تره ازعل عليك

وكلكم عيوني.

السكوت مرات ضروري من يكون كلامك لا يقدم ولا يأخر.

إختيارك لشخص مناسب من بين هالناس،
صاير أصعب من إختيارك للرگية الحَمرة.

وأنتَ قيس صعوبة الموضوع.

إتقبل فكرة بأنه مو كل اللي تريده بالعلاقه حتلگي، الشخص اللي تريد حاله ينصلح ممكن ما ينصلح وهذا مو ذنبك، أكو أطباع متتغیر شگد ما حاولت، خصوصًا لو اللي گدامك مغمض عيونه عن عيوبه ولو شسويت مراح يتغير، خلص هو مقتنع بأن الديسوي مو غلط وعادي، حتى اذا جان حرام ويبغظه الله، تقبل فكرة أنُ مو شرط حبك يقابل بحب، ولا حرصك يُقابل بفهم وإدراك، وأنُ راح يساء فهمك وراح تُتَهم بالتخلف والجهل،
اللي خذلك مره فهذا راح يبهذلك بعدين وياه، لازم تتقبل بأن بعض الناس ميشوفون غير نفسهم وبس وأفكارك وخوفك وقلقك عليهم ما يفرق عدهم

هيَ جملة وحدة اكررها بمنشور انشره كل سنة
"بيع الما يقدر، واشتري نفسك"

وكلكم عيوني.

اغلب المشاكل الزوجية بالزمن السابق ما جانت تتعدى عتبة الباب، قبل الزوج يستحي يحجي مشاكله العائلية حتى لأهله ولأصدقائه، وكذلك الزوجة حياءها يمنعها من الكلام لعيالها، ويحسبون ألف حساب للعالم اذا عرفوا بمشاكلهم الشخصية، شيكولون علينا مخبايل لو مو خوش أوادم، ونوب يجون يتشمتون بينه.
كل مشاكلهم مهما كبرت ما تتعدى باب غرفتهم، يكملوها ويطلعون، والأحلى من هذا هو تَفَهُم المرأة لزوجها واحتواء غضبه.

أما هسه بفضل الأنترنيت وسوالف البلوكرات والشهرة السخيفة او مثل ما أسميها اني ( الشهيرة) مو الشهرة.
صرنا نشوف الكلام المفروض يدور بالغرفة الشخصية يدور بالبث، لو بستوري على الأنستا، وكمنه نشوف العياط تارس حساباتهم، والفضايح بيناتهم حدث بلا حرّج كدام الناس التعرفهم والما تعرفهم.

تخيل الانترنيت عبارة عن شارع ، وتخيل الينشرون مشاكلهم الزوجية مفتحين بسطية ( لايكات) واحد كدام الآخر وكاعدين على الرصيف ويتعاركون ويعيطون على بعض ، والناس تمر بيناتهم، هذا اليمشي ويضحك وهذا اليوكف يباوع حتى يملي غريزة الفضول، وهذا الواكف بعيد ويهز بإيده من الاشمئزاز عليهم.
هذا اني الأخير.

وكلكم عيوني.

بعلم الطب اكو فوق بين مصطلح العُقم والعُقُر

العُقم هو سبب لعدم الإنجاب، بس ويّه العلاج ومتابعة الدكتور مُمكن يصير إنجاب، طبعًا بأمر الله وقدرتَهُ.
أما العُقُر معناه مستحيل يصير ولادة وإنجاب، اصلًا خصوبة ما تصير حتى يتكونن البويضات وباقي الأمور.
فالعُقُر معناه لتحاول تفكر من الأساس، وأسبابه هواي منها الزوجة جبيرة بالعمر، او لا سامح الله فد مرض اصاب الرحم وباقي الأمور،

الجميل بالموضوع أنهُ في سورة مريم عليها السلام، النبي زكريا قال ( وكانت إمرأتي عاقرًا )
يدري بيها عاقر وعمرها چبير، ففرصة حصول الإنجاب مستحيلة منطقيًا وعلميًا.
مع ذلك النبي زكريا دعا الله بتضرع وخشوع على الرغم من الإستحالة، لكنه كان واثق من إستجابة الدعاء!

وفعلًا بأمر الله ورحمته وقدرته صارت امرأة النبي حامل وأنجبت نبي الله يحيى عليهِ السلام.

سطر واحد اريدك تحفظه وتعتبره ملجئ الك باللحظات الصعبة.
( عامل الله باليقين - يُعاملك بالمعجزات )

جمعة مباركة
وكلكم عيوني.

اليوم اكدر اگول واحد من أجمل ايام حياتي اذا مو أجملها كلها.

شعور مُميز من يحصد الإنسان ثِمار تعبه، الحياة تاخذ وتنطي، بأخذها اكو حكمة وبعطاءها اكو سعادة، ومثل ما تاخذ منك اليوم تنطي الك باجر، يحتاجلك بس تصبر وتتوكل على الله.
وألحمدلله إنطتني احلى مفاجئة اليوم.

من إحنه صغار نحب الإهتمام
وخاصة الإهتمام اليكون خاص بس النه،
لساعني اتذكر من امي جانت تخبز بالتنور وتسويلي گرصة خبز صغيرة اليّه بس، جنت آكلها اني وفرحان، صحيح ماتفرق عن گرص الخبز الكبار الباقيات وصحيح من نفس مكونات العجينة،
بس جان الها طعم مُختلف، إلها لذة خاصة لأن سوتها الي بس وبالحجم الأريده.

كبرنا وتعلمنه أن الإنسان اليميزنا واليهتم بينه واليقدملنا تضحيات يمكن ما نستحقها بس يقدمها لأن يحبنا ولأن يريدنا نكون جزء رئيسي بحياته، راح نحس يمه بنفس إحساسنه من جنه صغار، احساس الأمان والحنيّه التقدمه الأم بكرصة خبزها الصغيرة.

شكرًا لكل إنسان يهتم لأمرنا، بزعلنه وبحزنّه وبفرحنه وبمشاكلنا، شكرًا لكل إنسان ماعنده نية ومصلحة ويانه، وكل همّه شلون يسعدنا.

وكلكم عيوني.

أرفعوا الهلاهل يا أهل السمة
أعظم عريسين علي وي فاطمة ❤️

1 ذو الحجة
يوم زواج النور من النورِ
فقد روي عن النبيّ صلى الله عليه وآله
أنّه قال: "إنّما أنا بشر مثلكم، أتزوج فيكم وأزوّجكم إلا فاطمة، فإنّ تزويجها نزل من السماء".

وقالَ الإمام علي بوصفِ فاطمة عليهما السلام:
وما رأيتها يومًا إلا وذهب الهَمُ الذي كان في قلبي.

مُتباركين بهذا اليوم العظيم.

طول عمرنا وعمر اطفالنا واحفادنا مُدينين بالفضل والشكر والإمتنان لكل عائلة تجلس على طاولة المائدة وينقصها أحد ابناءها، شهيد لأجلنا ولأجل العراق.

سبايكر او غيرها من الآف المجازر بحق شهداء جان اكبر احلامهم وطن.
جان اكبر احلامهم عائلة صغيرة.

من جملة إن شاء الله
الى جملة الحمدلله يا رب

اكو رحلة شاقّة مليانه تعب وصبر وحزن وفرح ويأس وأمل، مليانه ضغوطات نفسية وأمور محد يدري بيها بس الخالق وأنتَ.
تسألني اذا الرحلة تستحق؟ كلش تستحق اذا وراها حلم ينتظرك تحققه، إذا وراها چف البنيه التحبها وهو ينتظرك تلزمه بالحلال، اذا وراها رضى الله وأهلك عليك.

من إن شاء الله الى الحمدلله
هذا ما أتمناه الكم أصدقائي
كل عام وأنتو بألف خير يارب ❤️

أخوكم الصغير احمد قاسم.

مانريد عيدية
نريد وطنية.

جنت صاعد ويه واحد من تكسي كريم شكله وأسلوبه مال ابن ناس، كلي إذا تريد تدخن عادي، كتله لا ممنون ما ادخن،
فاتت من يمنه سيارة يمكن موجود منها ٢ لو ٣ بالعراق كال ماشاء الله،
الله ينطينا مثلها، كتله مو شرط صاحبها يطلع مرتاح، يمكن يطلع مبتلي بواحد من أطفاله او زوجته او نفسه.. رد عليه كلي اهم شي بالدنيا هي الزوجة، كلي صارت مشاكل بيني وبين زوجتي وانفصلنا سنة، بهالسنة كرهتها من وره الخلافات، بقيت هالمدة كلها ما اكدر اشوف أولادي غير إذا يصدف يوم مناسبة او عيد ميلادهم، عندي توأم، خابرتها ردت اشوفهم وجابتهم ، شفتهم ورجعنا سويه لخاطر الجهال ، ماجنت اكدر اتعامل وياها ولا اصفالها لحد ايام كورونا من صارت بيه ، كتلها اخذي الجهال وروحي لبيت اهلج لتنعدون لحد ما فترة العزل تخلص وارجعي، كلتلي ماشي اخذت الجهال لبيت اهلها الغير مصابين ورجعت هيّ يمي بالبيت، حارت شتسوي بأيام مرضي آخر شي انعدت مني والحمدلله طلعنا من الأزمة على خير
كلي اخوتي من دروا بيه مصاب محد اجاني محد ظل باله يمي بس هي،
حجاها وهو مبتسم، كلي حبيتها من جديد
صارت عندي اغلى شي بالحياة حتى اغلى من جهالي الرجعت لخاطرهم ،

ماكو شي بالدنيا يوكفلك ويصبر لك غير ام جهالك، اي واحد ثاني وكت الجد يختار نفسه، محد يبقى وياك تالي عمرك بس ام جهالك ومحد يختارك مرتين بالحياة بس هيّ.

وكلكم عيوني.

ب2016 بالليل قبل 8 سنين چنت ويه صديقي بالكرادة داخل، تعشينه من كباب زرزور ودا نمشي بين البسطيات مال هدوم، جان اباله يشتري قميص رصاصي طوخ لأن حبيبته دازتله صورته.
اني ودامشي وياه وندور سمعت صوت بجي مال طفل، البچي جان بحركة گلب قوية، بالبداية ماركزت وياه لكن بعدين ركزت وكمت ادوّر على مصدر الصوت من بين البسطيات والشارع المتروس ناس تروح وتجي ومحد مهتم للصوت.
بحثت دقيقة لحدما شفت طفل ميتجاوز 5 سنين هدومة مشككة اغلبها ونايم على بطنة بالكاع وإيديه على عيونه ويبجي

سألت ابو البسطية البصفه گتله ليش يبجي؟ گلي هذا اسمه علي ابوه جان عنده كشك مال چاي هنا، وجان متعلق بأبوه ويحبه حيل، بيوم من الأيام مات ابوه بحادث، وامه تزوجت وتركته وصار مصيرة الشارع، يجمع فلوس من الناس التمشي، واصدقاء ابوه اهل المحلاتت ينطون فلوس من يشوفونه، وبنهاية اليوم يجون اطفال اكبر من عنده ياخذون فلوسه الي جمعها ويكتلوه ويروحون، كل يومية نفس الحال وتعبنه من الوضع

الكلام الگلياه هذا الشخص مو بس أثر بيه، بل ذكرني بنفسي من جنت بعمره، عشت هالشعور واني بهذا العمر خاصة بعد استشهد والدي بعمر ال5سنين.

رحت على الطفل وكتله كوم، رفض يكوم بالبداية، كتله كوم بصوت أعلى، گلي عوفني عمو
كتله ابوك ديباوع عليك ..
وكّف بجي ورفع راسه من الكاع، گلي ها؟
كتله ديباوع عليك هسه
التفت يمنه ويسره ما شاف احد كلي ليش تجذب عليه ؟
كتله ديباوع عليك من فوك، ديباوع على أبنه اليحبه والما يريده يبچي ويصير ضعيف،
كتلة تريد ابوك يفتخر بيك؟ گلي اي
كتله ممنوع تبجي مرة اخرى، وممنوع تخلي أحد ياخذ حقك، ذولة اليجون ياخذون فلوسك المرة الجاية شيل عودة واضربهم على راسهم وكسرهم تكسّر
"اذا ما صارت قوي هسه راح تعيش عمرك كله ضعيف"
ابوك هنا (أشرت على گلبه) وهناك ( أشرت على السمه)
ابوك بكل مكان موجود داير مدايرك، صحيح مايكدر يساعدك لكن يدزلك ملائكة توكف بظهرك
بهل اثناء كلي اني رجال ما احتاج يدز شي بس يباوع عليّ
كتله عفيه اني اريدك هيج، اريدك تعرف حجم المسؤولية العليك، وتعرف الصح من الخطأ من هذا العمر لأن محد راح يعلمك وينكسر گلبه عليك بس انتَ، ماريدك تعيش ظالم، بس ابد لتعيش مظلوم
كتله وين تنام كلي يم جيرانه اصدقاء بابا،
انطيته مبلغ جبير من الفلوس وكتله يلا روح للبيت
باسني من خدي وكلي شكرًا عمو وراح.

قبل فترة جنت ضايج حيل، من اضوج اطلع وحدي دا اتمشى بالكرادة بنفس ذاك الشارع، شفت اطفال هم مبينين مشردين عمرهم 10 سنين ديركضون فرحانين عبالك شايلين كاس العالم، واحد ضرب جتفي بالغلط
كتله ليش مستعجل، كلي اعتذر عمو بس لازم ننطي فلوس اليوم لأخونه الجبير حتى يصرفهن علينه
كتله شسمه اخوكم الجبير
كال علي ..

ابتسمت هواي.

وكلكم عيوني

الحنيّه اصعب شي يمتلكه الإنسان، وبنفس الوقت هيّ اجمل شي يمتلكه.

لكن للأسف بالوقت الحالي غالبية الناس مو حنينين، لذلك صار الإنسان الحنين نادر بل يعتبرونه الناس معجزة وشي مميز جدًا
اني اقسم الحنيّه لنوعين،
اولًا الحنيّة المرتبطة بمشاعر الحب: يعني تصير حنين ويه الإنسان التحبه في حال مازعاجك وما مكرهك بعيشتك، هو زين وياك؟ انتَ حنين وياه وتحبه، هو مو زين؟ انتَ تبطل تمارس وياه دور الحنين
شيء مقابل شيء، وهذا غلط.
أما النوع الثاني: الأصح بالنسبة الي لتوضيح معنى الحنيّة، هو الإنسان الحنون على اليحبهم والمايحبهم واليعرفهم والما يعرفهم، حنيته تكون سابقه مشاعره، مو شرط يحبك ولا شرط تبادله نفس المشاعر حتى يكون حنين عليك، وبالأخص والأهم أنهُ يكون حنين عليك حتى وهو ضايج ومتنرفز منك، كلت الحنيّة اصعب شي لأن اصحابها الحقيقيين يدوسون على نفسهم في سبيل يقدمون كل الحنيّه والحب للمقابل، حتى اذا مضوجهم.
وديقدمون الحنيّة مو من باب العطف او الشفقة للمقابل، بل هاي فطرتهم الإنسانية، لأنهم فعلًا مصدر أمان مريح.
هيج اشخاص ضامن وجودهم ومشاعرهم إتجاهك، لأن تعرف گلبهم حنين وما يتركوك وحدك تعيش قسوة الحياة بالباقي من عمرك.

فالشخص الحنون رزق.
مثلي يعني ^^

وكلكم عيوني.

اصدقائي نصهم دا يخطبون بالصيف
عود صايرين لواته حتى ماجيبلهم بطانية ام النمر

تحية حب وإحترام وتقدير وشُكر وعرفان لكل أم وأخت تشتغل بالمطبخ بهل حر وتسوي أكل لأهلها، شخصيًا اعتبر الموضوع بطولة وتضحية لازم الواحد يوكف إجلال وإحترام و(تقدير) إلها.
كل المطابخ بالعراق حاره واغلبهن حتى بنكة مابيهن، والجو اصلًا مشتعل، وكل هذا وهنه واكفات كدام عين الطباخ ويسون أكل لأشخاص كاعدين كدام المبردة او السبلت.
وهذا مو واجبهن بل متفضلات بي، وهنه هم بشر وهم يحسّن بالحر وبالتعب وبالحيرة مال الطبخ يومية، وغسل المواعين والتنظيف والوكفة بالساعات.

أرجو من كل شخص يكدر يساعد أمه او اخته لا يقصر وياهن، ولا يحس كبريائه ورجولته بخطر اذا سوه هيج، بالعكس هالمساعدة ما تنزلك بل ترفع من شأنك كدامهم وكدام الله.
وكذلك أتمنى من كل بنية تبقى نايمة للظهر وتنزل تلكى الاكل جاهز، انُ تعيد نظرها بنفسها

امك وأختك ومرتك هم ناس مثلك، مو خدامات جايبهن بفلوس علمود يحللن خبزتهن، لوما يحبنك يبقنّك معفن وجوعان طول العمر، فلا تبخل بالمساعدة.

وكلكم عيوني.