مثل ما تحب الإمام بكلامك الظاهر إلنا وستورياتك المتعاطفة مع الفاجعة، لازم تقتدي بأفعاله وبسيرته وبأخلاقة ولو بالجزء القليل، لأن هذا القليل من الأمير هو كثير جدًا علينا.
فيلا يا بطل المُحب للإمام گوم احيي شعائر يوم القدر هسه ، واتذكر.
الإمام كل غايته وهمّه هو وصول الدين الك، الدين الي عاموده الصلاة.

قبل ساعة اني وأسوي أعمال ليلة القدر ويّ الوالدة، بدعاء الجوشن الكبير استوقفتني جُملة ( يا مَن لا يَخافُ إلا عَدلُه).

جملة مُخيفة لو أتمعنت بيها وبمعناها، وهيّ تثبتلنا أن الله اذا عاملنا بالعدل فإحتمال كلنا بالنار، لذلك إحنا نخشى هذا العدل الإلهي، لأنهُ يعطي كل ذي حقٍّ حقَهُ، وإحنه مقصرين دائمًا بكل مراحل حياتنا وبكل أوقاتنا، ناس مغرورة متسلطنه متكبرة متعجرفة عدها الحلال والحرام نكتة، عدها مخافة الله موضوع كلاسيكي صار، عدها الصلاة تعب وهّم زايد على الگلب، عدها التبرج والإستهتار موضة وحرية شخصية، عدها السب والحقد والنميمة أمور طبيعية ولا بُد منها للتخفيف من كاهل المشاعر.
عدها كلشي سيء محط فخر وإعتزاز، وعدها الخوش انسان مكرود وخطيه وعلى نياته.

الله اذا عاملنا بالعدل غالبيتنا بالنار، لذلك الله أرحم من انُ يعاملنا بالعدل لأن يعرف بينا راح نخسر، فهذا القول بالدعاء (يا مَن لا يخافُ إلا عَدلُه) هو خوفنا لو طبق العدل علينا، ونأمل ونرجو أن يطبّق رحمَتهُ علينا، لأنَ رحمتهُ وسعت كلّ شيء، وسعت ذنوبنا وغرورنا وتكبرنا وفسادنا في الأرض.

وكلكم عيوني.

اليوم بعد صلاة الظهر من ماعندي شي أبقى أشغّل محاضرات السيّد موسى العلي ( هذا الإنسان جدًا متعلّق بي بالفترة الحالية ويحمّل من المعرفة والثقافة بالقدر الذي يهز كياني)
فمن طبيت لليوتيوب دابحث عن إحدى محاضراته بعنوان 'دور الفقه في حياة الإنسان'
قبل ما اشغل المقطع طلعلي بصفة مقطع لواحد ديغسل فاكهة الكيوي حتى ياكلها.

مقطع عادي جدًا لكن خلاني أشتهي الكيوي رغم هالفاكهة نادرًا ما آكلها لأن مو من مفضلاتي، بس مادري ليش اشتهيتها.

قبل نص ساعه تذكرتها وگلت انزل اتمشى اشتريها، رحت لمحل جبير مال فواكهة بحي دراغ والحمدلله لكيتها واخذت كيلو.
وجنت فرحان بيها لدرجة صورتها قبل ما آخذها.

يمكن انت تشوفها فاكهة عادية، إنسان اشتهاها واشتراها، وغيرك يگول هذا صدك بطران.
بس اني اشوفها فضل ورزق من الله تسوى الحياة ومابيها، لوهلة حسيت نفسي أغنى واحد بالكوكب من لزمت الكيوية الصغيرونة، ابدًا ما فرحت بالفاكهة بكد ما فرحت لأن جبت شي اشتهيته، وهالنقطة بالتحديد هيّ أعظم رزق ممكن الإنسان يحصله بحياته.

لذلك أخي وأختي. من تحس بنعمة أنك تكدر تشتري شي ابالك وما يبقى بنفسك، سواء نستلة بربع او سيارة حديثة، فلازم تخلي بعين الإعتبار شغلتين:
1:- الإيمان بأن هذني هنه رزق من الله ولازم تشكره عليهن حتى يزيدَن، والشُكر هو أقل خدمة تقدمها للهِ عزّ وجل.
2:- مادام انتَ بهل مرحلة من الرزق، خلي كل مرادك ومشتهاك وآمالك بالدنيا هو رضا الله عليك، عسى ولعل الله يرزقك هالرضا نفس ما رزقك كيوية صغيرة قد لا تساوي شيء !
لأن هذا الرضا هو المفتاح حتى يدخلك الجنة الي هيّ غاية كل مؤمن.
والگلبه مو سليم ، مستحيل يحصل رضا الله عليه.

شكرًا موسى العلي .. شكرًا للكيوي!

وكلكم عيوني.

لا حوَل ولا قوة إلا بالله العليّ العظيم ، وإنا للهِ وأنا اليهِ راجعون ، يعجز الكلام عن وصفِ الحادثة وعن الألم الذي بداخلي ،، حادثة دهس أطفال ابتدائية في البصرة اليوم المغرب ، اكثر من 20 طالب يرفرفون في الجنة اليوم. في أجمل ليالي الله ليلة القدر، دعواتنا وأمنياتنا من الله أن يلهم ذويهم الصبر على هذهِ الفاجعة المأساوية، واجدد اقصى كلمات الشتم والذم بحق الحكومة الملعونة، ألا لعنة الله عليهم بحقِ من طَلَب العلم وجعَلَهُ فريضة علينا.

لا تنسوهم اليوم من دعاءكم في آخر وأهم ليلة من ليالي القدر.

وإلى الله المُشتكى.

الأصدقاء الأحبّه .. شكرًا جزيلًا على الكم الكبير من رسائلكم الجميلة، وعلى حرصكم عن السؤال بكل فترة غياب.
أعتذر جدًا للما مجاوبهم بسبب كثرة الرسائل
الإنسان يحتاج الى فترة نقاهة بين مدة وأخرى، للتخلص من تفاهة الأنترنيت قدر الإمكان.
عدنا والعودُ أحمَدُ.

وكلكم عيوني .

4/28
🕯️

كل دقيقة تمر بحياتي يزداد عندي يقين تام أن الرجل الديوث ( الماعنده غيره على عرضه) هو أقذر ما أنجبت البشرية على مر التاريخ.

هالكائن الغريب من تصفن بي تحير، وهاي الحيرة نابعة من إشمئزاز تام اله وللبقره التمشي وياه، وعلى الغالب هاي البقرة هيّ مرته، يعني عَرضه، يعني المرأة اليشوفها بغرفة نومه!
انتو متخيلين إنعدام الغيره ليوين وصل بالمجتمع العراقي ؟
اسبوع الفات وزارة الداخلية أقرّت وبشكل واضح أن موضوع ( تبادل الزوجات) موجود وبكثرة ويزداد يوم بعد يوم.
يعني شنو ؟ يعني انطيك مرتي وتنطيني مرتك ليلة وحدة، كنوّع من الإنفتاح الثقافي والتَحرُر من (العُقد المجتمعية والدينية) وأن المرأة عليها قيود ولابُد لها التحرر.

ولك شتتحرر اكثر من هيج ؟ ولك دتشوف اللبس الديلبسوه لولا ؟ بالشارع ولا بالمول ولا بالجامعة الصارت بؤرة لتجمَع حثالة ووساخة الأفكار الغربية!

قبل شوي شفت هذا الحفل مال هلال الذهبي، يجمعون بي اشخاص يصيحولهم ممثلين وينطوهم جوائز على طيحان حظهم، فكل (گرن) يجي گايد بقرته ويستعرض بجسمها وفستانها للتلفزون وللسوشل ميديا حتى يحصلولهم كم مسبة من الناس.
شفت هذا واحد جنت ماخذه بالعين الجبيرة شوية، لابس قاط وردي وگايد حبيبته وفخور بنفسه لأن ماكو تفصيله بجسمها ما ظاهرة للكل، حتى صرتها طابعه على الفستان !
الله يطيح حظه وحظ كل ديوث ديظهر بهل مجتمع المتعطّب اخلاقيًا ..
جدًا اعتذر على المصطلحات بهذا البوست لكن حيل غاثني الموضوع، دا اشوف هالمناظر يوميًا اصدقائي ، يوميًا.

بقت حجاية أخيرة ونصيحة مني للمتبقي من البنات الأصيلات الخلوقات الي كل همهن يسترن نفسهن، اذا بعدج ما متزوجة فلا تقبلين بزوج ما يركز على لبسج وما يمنعج من اي موديل او ستايل طالع بي ولو سانتيم من جسمج، واذا شفتي موضوع الملابس عنده طبيعية وما يدقق او يحجي ، فأتركي واطفري.

الماعنده غيره على عرضه، حيل أشك برجولته.
(اذا عنده يعني)

وكلكم عيوني.

ما حط شرط او سبب إعجازي للإستجابة
ولا فرّق بين ولد وبنيه، ولا بين أسود وأبيض، طويل وقصير، سني وشيعي،
كلامه جان للكل لأن هو ربّ الكل.

(وقال ربكم أدعوني أستجب لكم)

شكد خطيه الما شايف الله بعين قلبَه…

جمعة مباركة
وكلكم عيوني.

اشو رحنه لأغلى المطاعم ولا يوم اتباهينه وخبصنه الدنيا بيهن، ورحنه لأرخص المطاعم وولا يوم ركبنه الموجة وصرنه ويه الترند بحجة شوفوني زاير هالمكان الرخيص بفلان منطقة تراثية، اشو ركبنه اغلى السيارات وأحدثهن وما خبصنه الدنيا ولا خلينه اغنيه احنه الهيبة من الله، اشو شجعنه أفضل الأندية ولا يوم استحقرنا نادي الخصم او صار عدنا تعصّب رياضي وگلنه فلان احسن من افلان، جبت عمري اشجع ريال مدريد واكول ميسي افضل لاعب بالعالم، اشو كل فترة مشترين شي غالي بس ولا مرة نشرناه واتباهينه بي بحجة شوفوني عندي شغلات غالية، أشو دخلنه بعلاقات وحبينه وضحينه، ما فديوم خبصنه احد ولا حجينه ولا استغلينه علاقتنه لغايات أخرى،

راح تنضج بهالحياة من تشوف أن الصمت واجب شرعي وأخلاقي وفريضة تحفظلك شخصيتك من التشوّه ومن عصر التكرار الممل، وراح تنضج من تتأكد أن أفضل صفة يتصف بيها الإنسان هي الهدوء وعدم مشاركة الحياة الشخصية "الطبيعية "مع الجميع،
وأن الدنيا كلها بأرضها وسماءها
ما راح توكف على ستوري بالأنستا.

وكلكم عيوني.

من اباوع على نفاق الناس وعلى جذبهم وعلى الأخلاق التعبانه، الحقد والنميمة والتنمر ، كره الخير للمقابل والحسد التارس گلوبهم، احتراف الجذب والخيانة وسرقة الأمانة وسوء المعاملة وعقوق الوالدين وغيرهن العشرات من الصفات الخبيثة.
مو غرور ولا تكبر من اكول شكد مختلف اني، شكد نقي من الداخل، فعلًا إنسان"حقيقي" بعيد كل البعد عن زيفهم، ومرات افكّر ، ليش اني هيج؟
ما جربت ابد احجي على احد بالسوء حتى عن الأشخاص الأذوني، حتى عن الأشخاص الأدري بشرهم، ما جربت ربع من الديسوونه الناس الذكرتهم فوك.
هل الموضوع نعمة وتوفيق من الله فقط! أم انهُ إجتهاد شخصي مبني على حسن التربية، وهل التربية شعور ذاتي أم سلوك عائلي ؟وهل نحنُ مخيرين أم مسيرين أمام فعل الخير والشر ؟
اسئلة كثيرة

وكلكم عيوني.

من أدركّت حقيقته ووعيت على معناه ولحد هاي اللحظة، اني عايش قصة حب وية القرآن.
وبالتحديد التوكيدات الي يأكدها الله سبحانَهُ وتعالى بالآيات، مثلًا " فإن معَ العُسرِ يُسرا" ويرجع سبحانهُ وتعالى يأكدها مباشرةً ويقول " إنَّ مع العُسرِ يُسرا"

صح الله ليسَ كمثلهِ شيء ، أي لا تنالَهُ الأوصاف ابدًا ، لكن مرات أحس هاي الآية تمثّل أب حاضن بنته وديطمنها ، تمثّل إنسان مؤمن حكيم دينصح شخص واكع بمشكلة جبيرة، تمثل تنهيدة الراحة التجي بعد لحظات صعبة.
لو من يذكر سبحانهُ وتعالى القصص المليانه عطف ورحمة من عنده،
شلون طفل عمره 7 سنين يوكع ببير 20 متر وراها يطلع بمعجزة ويصير نبي على الأمّة ؟ لو نبي كبير بالعمر ينتظر ابنه 30 سنة عاشها بالحزن والهَم والبجي حتى نعمت عيونه، وبعدين يشتم ثوب ابنه ويرجع بصره؟
لو طفل عمره أيام تضطر أمه تذبه بصندوق بالبحر لأن رادوا يكتلونه، والي حاول يكتله هو ياخذه ويربي ويصير نبي عليهم !
لو امرأة طاهرة تقيّة من عائلة دينية، ابوها ورجل خالتها انبياء، كرست حياتها لخدمة بيت القدس، وراها ينزل مَلَكَ من السماء يبشرها بأنها حامل بنبي وهيّ ما مزوجة اصلًا ؟ حتى بنص هل بلاء والإختبار الله ما تركها وحدها، گللها هزي بجذع النخلة راح ينزلج رطب تاكلين منه وتوكلين الجنين.
لو نبينا الكريم صلّ الله عليهِ وآله الي قال ( ما أوذيَ نبيٌّ مثلَما أوذيت )
النبي الي حياته من بدايتها لنهايتها مليانه قصص وحكم (وأختبار) حقيقي لإيمان الإنسان من عَدَمَه.

هاي مو بس قصص صارت وانكتبت بكتابنا الكريم، هاي أمثال ودلائل تثبتلك أن الله فعلًا قادر على كلّ شيء ، أن الله رحمَتَهُ وسعت كلّ شيء.

ف دير بالك تيأس
تره ازعل عليك

وكلكم عيوني.

السكوت مرات ضروري من يكون كلامك لا يقدم ولا يأخر.

إختيارك لشخص مناسب من بين هالناس،
صاير أصعب من إختيارك للرگية الحَمرة.

وأنتَ قيس صعوبة الموضوع.

إتقبل فكرة بأنه مو كل اللي تريده بالعلاقه حتلگي، الشخص اللي تريد حاله ينصلح ممكن ما ينصلح وهذا مو ذنبك، أكو أطباع متتغیر شگد ما حاولت، خصوصًا لو اللي گدامك مغمض عيونه عن عيوبه ولو شسويت مراح يتغير، خلص هو مقتنع بأن الديسوي مو غلط وعادي، حتى اذا جان حرام ويبغظه الله، تقبل فكرة أنُ مو شرط حبك يقابل بحب، ولا حرصك يُقابل بفهم وإدراك، وأنُ راح يساء فهمك وراح تُتَهم بالتخلف والجهل،
اللي خذلك مره فهذا راح يبهذلك بعدين وياه، لازم تتقبل بأن بعض الناس ميشوفون غير نفسهم وبس وأفكارك وخوفك وقلقك عليهم ما يفرق عدهم

هيَ جملة وحدة اكررها بمنشور انشره كل سنة
"بيع الما يقدر، واشتري نفسك"

وكلكم عيوني.

اغلب المشاكل الزوجية بالزمن السابق ما جانت تتعدى عتبة الباب، قبل الزوج يستحي يحجي مشاكله العائلية حتى لأهله ولأصدقائه، وكذلك الزوجة حياءها يمنعها من الكلام لعيالها، ويحسبون ألف حساب للعالم اذا عرفوا بمشاكلهم الشخصية، شيكولون علينا مخبايل لو مو خوش أوادم، ونوب يجون يتشمتون بينه.
كل مشاكلهم مهما كبرت ما تتعدى باب غرفتهم، يكملوها ويطلعون، والأحلى من هذا هو تَفَهُم المرأة لزوجها واحتواء غضبه.

أما هسه بفضل الأنترنيت وسوالف البلوكرات والشهرة السخيفة او مثل ما أسميها اني ( الشهيرة) مو الشهرة.
صرنا نشوف الكلام المفروض يدور بالغرفة الشخصية يدور بالبث، لو بستوري على الأنستا، وكمنه نشوف العياط تارس حساباتهم، والفضايح بيناتهم حدث بلا حرّج كدام الناس التعرفهم والما تعرفهم.

تخيل الانترنيت عبارة عن شارع ، وتخيل الينشرون مشاكلهم الزوجية مفتحين بسطية ( لايكات) واحد كدام الآخر وكاعدين على الرصيف ويتعاركون ويعيطون على بعض ، والناس تمر بيناتهم، هذا اليمشي ويضحك وهذا اليوكف يباوع حتى يملي غريزة الفضول، وهذا الواكف بعيد ويهز بإيده من الاشمئزاز عليهم.
هذا اني الأخير.

وكلكم عيوني.

بعلم الطب اكو فوق بين مصطلح العُقم والعُقُر

العُقم هو سبب لعدم الإنجاب، بس ويّه العلاج ومتابعة الدكتور مُمكن يصير إنجاب، طبعًا بأمر الله وقدرتَهُ.
أما العُقُر معناه مستحيل يصير ولادة وإنجاب، اصلًا خصوبة ما تصير حتى يتكونن البويضات وباقي الأمور.
فالعُقُر معناه لتحاول تفكر من الأساس، وأسبابه هواي منها الزوجة جبيرة بالعمر، او لا سامح الله فد مرض اصاب الرحم وباقي الأمور،

الجميل بالموضوع أنهُ في سورة مريم عليها السلام، النبي زكريا قال ( وكانت إمرأتي عاقرًا )
يدري بيها عاقر وعمرها چبير، ففرصة حصول الإنجاب مستحيلة منطقيًا وعلميًا.
مع ذلك النبي زكريا دعا الله بتضرع وخشوع على الرغم من الإستحالة، لكنه كان واثق من إستجابة الدعاء!

وفعلًا بأمر الله ورحمته وقدرته صارت امرأة النبي حامل وأنجبت نبي الله يحيى عليهِ السلام.

سطر واحد اريدك تحفظه وتعتبره ملجئ الك باللحظات الصعبة.
( عامل الله باليقين - يُعاملك بالمعجزات )

جمعة مباركة
وكلكم عيوني.

اليوم اكدر اگول واحد من أجمل ايام حياتي اذا مو أجملها كلها.

شعور مُميز من يحصد الإنسان ثِمار تعبه، الحياة تاخذ وتنطي، بأخذها اكو حكمة وبعطاءها اكو سعادة، ومثل ما تاخذ منك اليوم تنطي الك باجر، يحتاجلك بس تصبر وتتوكل على الله.
وألحمدلله إنطتني احلى مفاجئة اليوم.

من إحنه صغار نحب الإهتمام
وخاصة الإهتمام اليكون خاص بس النه،
لساعني اتذكر من امي جانت تخبز بالتنور وتسويلي گرصة خبز صغيرة اليّه بس، جنت آكلها اني وفرحان، صحيح ماتفرق عن گرص الخبز الكبار الباقيات وصحيح من نفس مكونات العجينة،
بس جان الها طعم مُختلف، إلها لذة خاصة لأن سوتها الي بس وبالحجم الأريده.

كبرنا وتعلمنه أن الإنسان اليميزنا واليهتم بينه واليقدملنا تضحيات يمكن ما نستحقها بس يقدمها لأن يحبنا ولأن يريدنا نكون جزء رئيسي بحياته، راح نحس يمه بنفس إحساسنه من جنه صغار، احساس الأمان والحنيّه التقدمه الأم بكرصة خبزها الصغيرة.

شكرًا لكل إنسان يهتم لأمرنا، بزعلنه وبحزنّه وبفرحنه وبمشاكلنا، شكرًا لكل إنسان ماعنده نية ومصلحة ويانه، وكل همّه شلون يسعدنا.

وكلكم عيوني.

أرفعوا الهلاهل يا أهل السمة
أعظم عريسين علي وي فاطمة ❤️

1 ذو الحجة
يوم زواج النور من النورِ
فقد روي عن النبيّ صلى الله عليه وآله
أنّه قال: "إنّما أنا بشر مثلكم، أتزوج فيكم وأزوّجكم إلا فاطمة، فإنّ تزويجها نزل من السماء".

وقالَ الإمام علي بوصفِ فاطمة عليهما السلام:
وما رأيتها يومًا إلا وذهب الهَمُ الذي كان في قلبي.

مُتباركين بهذا اليوم العظيم.

طول عمرنا وعمر اطفالنا واحفادنا مُدينين بالفضل والشكر والإمتنان لكل عائلة تجلس على طاولة المائدة وينقصها أحد ابناءها، شهيد لأجلنا ولأجل العراق.

سبايكر او غيرها من الآف المجازر بحق شهداء جان اكبر احلامهم وطن.
جان اكبر احلامهم عائلة صغيرة.