بحكم علاقتي بالكهوة، ام أحد اصدقائي القدماء كل فترة توصيني أجيبلها كهوة من نوع فاخر، محد يبيعها بس أسواق وحده بالأعظمية كل فترة امرله أخذ الكهوة واوديلهياه.
قبل كم يوم رحت للأسواق نفسها بالليل،
اكو شايب عجوز انتبهتله يمشي وراي داخل المحل، اني واكف يم الكاشير ادفع فلوس الكهوة، والرجال جبير مشيب مبين حالته تعبانه، يريد شي بس يستحي يطلب، الواكفين اغلب ردود فعلهم معتادة، هذا أغنى مني ومنك، لو عنده شقق بالصالحية، لو شريك بمجمع سكني.
اني ابتسمت للرجال طلعت فلوس من جيبي وانطيته
عفته ورحت أخذ الكهوة، انتبهت عالرجال بالفلوس رايح للكاشير يريد يشتري من نفس الكهوة الاخذتها، شايل بيده فلوس تكفي فنجانين او ٣ بالزايد.
سعرها شوي غالي، رجعت كتله مادام انت هيج صاحب مزاج وعندك ذوق تستاهل من هالكهوة اكثر، بقيت فلوسه بجيبه ووصيتله نص كيلو، ماصدك نفسه برغم متأكد هو بس راد يشتري شي ويطمئن نفسه حاله حال العالم البقية
اله الحق بكل شي نشتهي ونريده، طلعنا سوه من الاسواق اني وياه
احساس الرجل بكمية الكهوة بيده ما تتصدَّك،
اذا تشوف نظرته وفرحته الحققها بشي مامحتاجة كمذاق بكد مامحتاج تلبية رغبة اتمناها من ابن ماتحققت.
طلعنا سوه سولفنا على هالكهوة، تحبها وسط لو ساده لو حلوة ؟
طلعنا بشر، متساوين بالكهوة، والمزاج والمحبة والحالة النفسية والبساطة
طلعنا اثنينه فرحانين.

وكلكم عيوني.

مع الأسف ..

منشور ماله علاقة بالسابق*

في مساء كل جمعة، أجدد كرهي الشديد للحسابات الروحانية وبالاخص حساب بت عامر والى متابعيها الأغبياء والى كل من يؤمن او يعتقد بالطاقات والنوايا وهالخريط.

عافانا الله مِما ابتلاهم.

اكو نوع مميز من الراحة اسمه راحة التحرير.

هذا النوع أكتشفته قبل شوي من جنت فوك جسر الشهداء ، شمرت شغلتين بدجلة جانن مأرقاتني هالفترة، وراها حسيت بخفة وتحرر بالروح، شعور خالي من أي مسؤولية تجاه الذات اولًا وتجاه أي موضوع ثانيًا.

احيانًا الإنسان يحتاج هالنوع من الراحة، ويحتاج يبدي دائمًا من الأول لحدما يختار النهاية التليق بي.

وكلكم عيوني.

أسوء شكل من أشكال الإنتظار
من تنتظر شي ما تريده يصير.

"وَهُوَ الَّذِي يُنَزِّلُ الْغَيْثَ مِن بَعْدِ مَا قَنَطُوا وَيَنشُرُ رَحْمَتَهُ ۚ وَهُوَ الْوَلِيُّ الْحَمِيدُ".

صدق الله العليّ العظيم.

تقولين أنَّكِ تُحبينَ المَطر
وحينَ تمطُر
تحملينَ المظلة
لهذا أنا أخاف
حين تقولين أُحِبُكَ.

صوم بدون صلاة
صوم بدون حجاب
صوم بدون أخلاق

نخلطهن بالخلاط
يطلعَن رجيم حلو برمضان.

عندي قناعة مرتبطة بين الفكر والملامح، من شخص تعجبني أفكاره أرتاح لملامحة وأحس بيها إنعكاس للفكر الراقي،
اكو إنسان تشوف ملامحة حلوه وشكله مقبول لكن تتفاجئ بعقله الصغيّر وشخصيته تعبانه، فتلقائيًا راح يختفي إعجابك بشكله لو جان ملك جمال،
وكذلك نفس الشي ينطبق على البنية.

صح للجمال سطوة، بس سطوة الفكر والروح أكبر وأرقى.

وكلكم عيوني.

كلمة الهُدى تواردَت بالقرآن الكريم على هيئة الكثير من المعاني ، فمثلًا إجتي معناها بالطريق المستقيم الي ينّجي الناس من عذاب جهنم ( إهدِنا الصراط المُستقيم)
واجتي بمعنى الطاعة بقولهِ تعالى ( أُولئك الذين هَدى اللهُ فَبِهُداهُم اقتَدِهِ)
وأجتي معناها الشريعة الإلهية بقولهِ تعالى ( قُل أن هدى الله هو الهُدى )
وأجتي الهدى بمعنى كتاب الله القرآن الكريم بأكثر من موضّع
قال تعالى ( شهر رمضان الذي أُنزلَ فيهِ القرآن هدى للناس، وبيّنات من الهدى والفرقان)
إذن الهُدى بالمعنى الإصطلاحي الديني: هي سلوك الطريق الذي يوصل الإنسان الى غايتهِ، وهي إتباع شرع الله، وسُميّ إتباع شرع الله هداية، لأنَّهُ يرشد الإنسان الى الحقِ ويبصرهُ بهِ، فيميزهُ بين الخير والشر.

أنتَ تخيّل هالكلمة العظيمة جدًا، الي انجمع بيها معنى القرآن ومعنى الصراط المستقيم
گالها جبرائيل بثانية وحده واصفًا بيها أقسى مصيبة وفاجعة مرّت بتأريخ البشرية
حيثُ نادى من السماء عندما ضُرِبَ الإمام علي (عليهِ السلام) على رأسهِ وهو راكع يُصلي
قال جبرائيل بصوتٍ عالٍ من السماء هزّ الكون ( تهدَّمَت والله أركان الهُدى)

تعرف شنو معنى كلمة أركان ؟ يعني الركيزة والقوة المستندة عليها كلمة الهُدى، يعني قوة القرآن وإسناده، قوة الصراط المستقيم وركيزته، كلها مرتبطة بهذا الإنسان قسيم الجنةِ والنار، فمن انضرب روحي لهُ الفداء، تهدّمت كل أركان الهُدى، أذ أن عليّ هو الهدى للبشرية من بعدِ خاتم الأنبياء وحبيب الله وأبن عم الهُدى، رسول الله محمد صلّ الله عليهِ وآلهِ.

الإمام علي ، هذا الإنسان لا يُمثِّلُ نفسه فقط، بل يُمثّل الدين والعروة الوثقى، أذكر حادثة عمرو بن ود العامري من خرج الإمام لمحاربته ، قال رسول الله روحي لهُ الفداء ( برَزَ الإيمان كُلّهُ، الى الشركِ كُلَّهُ)
فعليّ هو الإيمان الحقيقي، الذي يُميز من خلالهِ الناس، طريق الحقِ والباطل.
قال رسول الله صل الله عليهِ وآله ( علي مع الحق، والحَقُ مع علي)

لعن الله من قتل الحق، ومن قتل أولادك وأهل بيتك، ولعن الله من سمع بذلك فرضيَّ بهِ،
لا يومَ كيومك يا وسيلتنا إلى الله.
ولا حول ولا قوة إلا بالله العلي العظيم.

أحمد قاسم.

الليلة حتى العنده أهل ينام يتيم
الليلة كل اليتامة مجتمعين بباب حوش الإمام
شايلين حليب لأن سمعوا عبالهم يطيّب جرح الإمام
الليلة كل الناس فطرة وتدعي لو راسها ولا راس الإمام
الليلة كل الناس مكسورة
الليلة حتى الورد يبجي
الليلة بيها الگمر أسود
الليلة حتى الصخرة الچان يشدها الإمام بحبل على بطنه إذا جاع
تبجي عليّ.
الليلة ما بقى ملك بالسماء
إلا وأذرف الدموع عليك يا أبا الحسنين
الليلة ثاني ليلة ينكسر بيها ظهر النبي
حتى وهو شهيد.
الليلة أول مرة ينام جوعان اليتيم
أول مرة.

مثل ما تحب الإمام بكلامك الظاهر إلنا وستورياتك المتعاطفة مع الفاجعة، لازم تقتدي بأفعاله وبسيرته وبأخلاقة ولو بالجزء القليل، لأن هذا القليل من الأمير هو كثير جدًا علينا.
فيلا يا بطل المُحب للإمام گوم احيي شعائر يوم القدر هسه ، واتذكر.
الإمام كل غايته وهمّه هو وصول الدين الك، الدين الي عاموده الصلاة.

قبل ساعة اني وأسوي أعمال ليلة القدر ويّ الوالدة، بدعاء الجوشن الكبير استوقفتني جُملة ( يا مَن لا يَخافُ إلا عَدلُه).

جملة مُخيفة لو أتمعنت بيها وبمعناها، وهيّ تثبتلنا أن الله اذا عاملنا بالعدل فإحتمال كلنا بالنار، لذلك إحنا نخشى هذا العدل الإلهي، لأنهُ يعطي كل ذي حقٍّ حقَهُ، وإحنه مقصرين دائمًا بكل مراحل حياتنا وبكل أوقاتنا، ناس مغرورة متسلطنه متكبرة متعجرفة عدها الحلال والحرام نكتة، عدها مخافة الله موضوع كلاسيكي صار، عدها الصلاة تعب وهّم زايد على الگلب، عدها التبرج والإستهتار موضة وحرية شخصية، عدها السب والحقد والنميمة أمور طبيعية ولا بُد منها للتخفيف من كاهل المشاعر.
عدها كلشي سيء محط فخر وإعتزاز، وعدها الخوش انسان مكرود وخطيه وعلى نياته.

الله اذا عاملنا بالعدل غالبيتنا بالنار، لذلك الله أرحم من انُ يعاملنا بالعدل لأن يعرف بينا راح نخسر، فهذا القول بالدعاء (يا مَن لا يخافُ إلا عَدلُه) هو خوفنا لو طبق العدل علينا، ونأمل ونرجو أن يطبّق رحمَتهُ علينا، لأنَ رحمتهُ وسعت كلّ شيء، وسعت ذنوبنا وغرورنا وتكبرنا وفسادنا في الأرض.

وكلكم عيوني.

اليوم بعد صلاة الظهر من ماعندي شي أبقى أشغّل محاضرات السيّد موسى العلي ( هذا الإنسان جدًا متعلّق بي بالفترة الحالية ويحمّل من المعرفة والثقافة بالقدر الذي يهز كياني)
فمن طبيت لليوتيوب دابحث عن إحدى محاضراته بعنوان 'دور الفقه في حياة الإنسان'
قبل ما اشغل المقطع طلعلي بصفة مقطع لواحد ديغسل فاكهة الكيوي حتى ياكلها.

مقطع عادي جدًا لكن خلاني أشتهي الكيوي رغم هالفاكهة نادرًا ما آكلها لأن مو من مفضلاتي، بس مادري ليش اشتهيتها.

قبل نص ساعه تذكرتها وگلت انزل اتمشى اشتريها، رحت لمحل جبير مال فواكهة بحي دراغ والحمدلله لكيتها واخذت كيلو.
وجنت فرحان بيها لدرجة صورتها قبل ما آخذها.

يمكن انت تشوفها فاكهة عادية، إنسان اشتهاها واشتراها، وغيرك يگول هذا صدك بطران.
بس اني اشوفها فضل ورزق من الله تسوى الحياة ومابيها، لوهلة حسيت نفسي أغنى واحد بالكوكب من لزمت الكيوية الصغيرونة، ابدًا ما فرحت بالفاكهة بكد ما فرحت لأن جبت شي اشتهيته، وهالنقطة بالتحديد هيّ أعظم رزق ممكن الإنسان يحصله بحياته.

لذلك أخي وأختي. من تحس بنعمة أنك تكدر تشتري شي ابالك وما يبقى بنفسك، سواء نستلة بربع او سيارة حديثة، فلازم تخلي بعين الإعتبار شغلتين:
1:- الإيمان بأن هذني هنه رزق من الله ولازم تشكره عليهن حتى يزيدَن، والشُكر هو أقل خدمة تقدمها للهِ عزّ وجل.
2:- مادام انتَ بهل مرحلة من الرزق، خلي كل مرادك ومشتهاك وآمالك بالدنيا هو رضا الله عليك، عسى ولعل الله يرزقك هالرضا نفس ما رزقك كيوية صغيرة قد لا تساوي شيء !
لأن هذا الرضا هو المفتاح حتى يدخلك الجنة الي هيّ غاية كل مؤمن.
والگلبه مو سليم ، مستحيل يحصل رضا الله عليه.

شكرًا موسى العلي .. شكرًا للكيوي!

وكلكم عيوني.

لا حوَل ولا قوة إلا بالله العليّ العظيم ، وإنا للهِ وأنا اليهِ راجعون ، يعجز الكلام عن وصفِ الحادثة وعن الألم الذي بداخلي ،، حادثة دهس أطفال ابتدائية في البصرة اليوم المغرب ، اكثر من 20 طالب يرفرفون في الجنة اليوم. في أجمل ليالي الله ليلة القدر، دعواتنا وأمنياتنا من الله أن يلهم ذويهم الصبر على هذهِ الفاجعة المأساوية، واجدد اقصى كلمات الشتم والذم بحق الحكومة الملعونة، ألا لعنة الله عليهم بحقِ من طَلَب العلم وجعَلَهُ فريضة علينا.

لا تنسوهم اليوم من دعاءكم في آخر وأهم ليلة من ليالي القدر.

وإلى الله المُشتكى.