اول عام من نزل ايفون 13 الجديد اشتريته، اني مو من ذولة الاشخاص اليدورون اي شي ترند وجديد، لكن مبايلي السابق جان يعلگ فأضطريت أغيره، وإشتريت وياه سماعات آيربود الجديدة، مثلي مثل اي شخص مشتري حاجة ثمينة بالبداية يبقى يحافظ عليها ويشتريلها گفر يخاف عليها من الخدش ويلزمها بأيده زين خاف توكع وتنكسر، وهذا الشي السويته ويا هلشغلتين الاشتريتهن.

يوم من الأيام جنت ويه صديقي دا العب منضدة، حاط الآيربود بأذني وداسمع شغلات حماسية، فمن دا العب صارت حركة سريعة مني خلت وحده من السماعات توكع من اذني، اني بساع رحت شلتها من الكاع وفحصتها، لكيتها تشتغل الحمدلله، ومابيها اي خدش، ولمت نفسي لأن جنت لابسها والعب لعبة تطلّب حركة سريعة، وكلت لو نكسرت هسه شلون راح اسمع بالليل.

ورة فترة جنت دا اغسل سيارتنا ومنطرب ويا ام كلثوم، جان توكع وحده من السماعات بالسطل مال مي، كلبي عصرني عليها، طلعتها وكمت اهفي بداخلها حتى ما يطب المي لجوه بلكي تنشف بساع، مادري شجنت اسوي بوقتها،
وره شويه اشتغلت لكن بيها وشوشة، بيها صوت مو مثل الصوت السابق، هواي ضجت وكلت خلص عطلت، وبقيت اجلد بالذات لأن هملتها هيج، وتمنيت لو يرجع الوقت جان ابطل رعونية وما استخدمها من اسوي حركة او اشتغل بشي لأن احتمال اخسرها.
تركتها وشغلتها ثاني يوم، لكيتها رجعت طبيعية نفس صوت قبل! فرحت وكلت خلص هاي ماتريد تتركني، يمكن الله كاتبلها تصير سماعتي الوحيدة.

رحت بحثت ولكيت انها ضد المي وتتحمل السقوط على الأرض وضد الخدش كذلك
ذني المعلومتين ماجنت ادري بيهن، لذلك جنت خايف عليها
بس من دريت بيهن، استهرت كلش وكمت عادي اسبح واشغلها، وعادي توكع مني من العب منضدة ومن اشيلها ما اباوع عليها واشوف شصار ماصار، مباشرةً اخليها بإذني وترجع تشتغل غصبًا عليها، راح واهسي بيها لأن عرفت هيه ماتكدر بدوني، ولأن عرفت هيه صعب تعطّل بيوم.

الآيربود هو نفسه هذا الإنسان اليحبك من كل گلبه، هو نفسه المتحمل هفواتك واخطاءك ورعونيتك، هو نفسه الجان منبهر بيك بالبداية، الجان حاس بإمانك المُزيف، وراسم وياك مستقبل وردي، بس انت شسويت؟ من دريت بي مايكدر بدونك، كمت عادي تتجاهلة وعادي ما تهتمله، لان تدري شما جفصت ببطنه بكلمتين تقشمره ويرجع وياك، وانت مسوي بيها سر الحياة وسر الكون، وعبالك هو غبي وفقير وطيّب الگلب ويتقشمر بحجايتين،
هو متربي وأصيل ومايدور غاية ومصلحة وياك، هو مو بوجهين مثلك، هو صادق ويه نفسه وويه ربه
لا تحس ابدًا انتَ إنتصرت عليه بيوم من الايام لأنكَ مشوه وهو نقيّ
لأنك راح تعطل بيوم من الأيام
وراح يبقى مشتغل هوّ
مثل الايربود.

وكلكم عيوني.

اني اشوف المسؤولية هيّ التصنع رجل،
زحمة من تتعارك ويه زوجتك وتكطع عنها المصروف وتخلي اطفالك متبهذلين،
زحمة تبقى زعلان من صديقك وهو يمر بظرف حرج، زحمة ما تزور اقاربك بالمستشفى لأن نسى يباركلك بحفل تخرجك،
زحمة من تتخلى عن مسؤوليتك الدينية من تشوف الكل باع أخلاقه، وتبقى تكول يلا بقت عليه.
اي بقت عليك، ودائمًا تبقى عليك، زوجتك او صديقك او اقاربك او أمك وأبوك، تقصيرك إتجاههم بلحظات مهمة راح يشكّل فرق بنظرتهم ألك كرجل صاحب مسؤولية، من تتخلى عن مسؤوليتك تجاهم بلحظات مصيرية راح تفقد أهم ميزة الك، وهو شعورهم بالأمان نحوّك
وراح يصير العكس ويگومون همه يخافون منك، والأقسى من ذلك.
يگومون همه يصرفون اهتمامهم وفلوسهم عليك، عسى ولعل تصير رجال براسه خير.

فرّق بين زعلك وبين مسؤوليتك
حتى ماتفقد نفسك بزحمة اشباه الرجال.

وكلكم عيوني.

اتوفى قبل 3 سنين واحد بالفرع الجنت ساكن بي، ما اعرفه منو سألت عليه كالوا مأجر بالفرع صارله 5 سنين، كاعد بغرفة هي وملحقاتها طابق ثاني، بوقتها عايشين بفترة الوباء، اتخوفوا اهل المنطقة خاف بي كورونا ومات، حسيت تجاهه بنوع من العاطفة رغم ماشايفه، كلت لصديقي يونس خل نصعد يمكن متخربط لو بعده بي نفس ، المأجرتله المسيحية ردت: لاشفته ميت حركت ايده نزلت على الكاع ، طريقة كلامها والدموع وبجيها من شرحت نهاية الرجل الغريب بيها الكثير من العاطفة والصدق كأنه تذكر آلاآم المسيح، صعدت اني ويونس فتحنا الباب، الباب بيها شباك جامته مكسوره مغطيها بخاولي ماروني رطب لكينا جثة الرجل الغريب نايم على فراش اسفنج. ومخدتين جوه راسه وحده منهن خاسفة بسبب طويها وهذا الشي بسبب القلق والسهر والتفكير اثناء النوم تبقى تكلب بمخدتك حتى تقنع نفسك بأكثر من وضعية يمكن من وراها تنام

الرجل عمره بالسبعين طوله تقريبًا ١٧٠ ، ضعيف جسديًا ومدخن شره شفت فوك قنفته تكّه جكاير ايسي نعناع بيها ٤ باكيتات جدد و٣ باكيتات يم راسه واحد مفتوح باقي منه ٦ جكاير والثاني سرمهر والثالث مأخوذ منه بس جكارة بحكم نسيانه للباكيت الاول يمكن خلصان والدليل الباكيت الاول بي رماد جكاير وكطفين موجودات بداخله برغم وجود ٤ جكاير جدد، غرفته جانت بسيطة وحزينة، الطباخ علّي جذر بي شوربة عدس ناسي وصلة الطباخ عالقبق ، وكرصتين خبز حاطهن بجيس نايلون وحاصرهن بالقنينة ، اقتربت على جثته وباوعت بوجهه بجيت علّي ويونس رغم حياته القاسية العاشها والمفروض تخلي صلب بمواجهة الموت بجه اكثر مني وناح مثل طفل ضايع بسوك، من هدأت وبدون ارتباك وتردد وخوف واشمئزاز لزمت ايدي، ايده اليسره نحيلة وبمعصم ايدي استغربت يمكن بيها شظيه باقية من حرب الثمانين، عدلت نومته الابدية وطلعت من جيب دشداشته الزركه ٢٢ الف وجنسيته الكابسها مرتين وبعدها مهترئه وصورة لبنية شابة، مو زوجته يمكن بنته لان صورة جديدة، صورة شخصية لشابه عمرها بالثلاثينات
المشكلة ماعنده موبايل نتصل بأحد من اولاده او معارفه.

عدا الامور الذكرتها ماشفنا شي ، بقينا اني ويونس فوك الساعة بغرفته قبل مانچفنه بقماش ابيض وناخذه بسيارة احد الخيرين بالفرع، من نزلته بيدي اجتي سيارة شرطة بيها ضابط وشخصين وياه شباب طيبين استفسروا وعرفوا الموضوع بحيث اتأثروا واجوي ويانه دفناه بمقبرة الغزالي بالشيخ عمر، رجعت وراها لحياتي، التهيت بالدراسة واعمالي الخاصة بس باقي ببالي الرجل، رجل عاش سبعين سنة ونهايته يموت وحده يجي غريب يدفنه ومحد من عائلته وياه.

اليوم الثاني والثالث والرابع اشتغل وميروح من بالي، وصارلي واهس بس ازكي اي شي الله خالقة تفوت بزونة اصبلها مي ببطل مي صغير اكصه واترسه واخلي ، افتر على اي سندانة اشوفها كبال المحلات بيدي بطل مي واسكيها، اشتريت من سوك الغزل اكل للحمام ونثرته على رصيف شارع الرواد علمود ياكلن الحمام بتموز،

اليعرفني ماكلي شدسوي، شكرني واستغرب بيهم مايعرفوني كلي بس ممنون،
بقيت شهر مو طبيعي. يومية اطلع ارش اي زرع وورد اشوفه كبالي بحيث وصيت ٤ سنادين من بيج عالفيسبوك، صاحبي ابو مشتل بالأعظمية، جابولياها يومية اسكيهن، خابرت ابو المشتل ثاني يوم كتله اريد بعد ٢ لكن حطلي بيهن بس بذور.
بقيت اسكي بيهن نفسيتي ارتاحت وكل زرع سكيته بده يخضّر والشوارع صارت احلى من قبل ٣ اسابيع وبده گلبي ترجع نبضاته طبيعية بعد شهر من المراجعات يم الدكتور علي آل ياسين.

اجيت وره كم يوم شفت البذور طاكه وكبرانه وابو المشتل صدفة جاي قريب على مكاني ،
كلي شوف شكد حلوه زهرة الأوركيد الطالعة ببياضها وحمارها المتداخل بعمقها،
ذكرتني بزبون عايش وحده جان ياخذ باقة لبنته المتوفية كل شهر يروح يخليها على كبرها.
مادري وين راح صارله شهر ما جايني.

وكلكم عيوني.

الحياة مو مال ثقل زايد
إذا المكان مو إلك لا تحارب ، غادر

اكو نقطة ظهرت مؤخرًا لهواي من رجال المجتمع العربي وبالتحديد بعد دخول الأنترنيت، أفتقارهم لأهم ميزة بالرجل الحقيقي وهيّ الغيرة على مرته.

الصراحة اني لو أخطب او اتزوج الإنسانة الاحبها سواء جنت ومشهور او معروف، من سابع المستحيلات كل شوية انزل وياها فيديو او صورة وأخلي العالم تشوفها، لأن اغار عليها وهاي الأمور الزوجية احلى شي بيها خصوصيتها، زحمة من انزل مقطع بي شكلها او صوتها حتى اصعد مشاهدات ويصعد حسابي.
الحب بمفهوم ذوله الي هم عالأساس شخصيات عامة، ننخطب ونسوّق لقصة حبنا فتصير عليها بوستات بصفها گلوب بنفسجية ويصير الفيديو هاشتاك بالانستكرام وينشرنه البنات الحالمات بستورياتهن ويطلع كبالك اول ماتفتح يوتيوب ووراها يجونا اصحاب القطاع الخاص نسويلهم اعلان بالملايين.
من حقكم ، بس قصص الحب الماسخة المثل هاي متهزني وماشوف بيها اَي شي رومانسي وعبقري،

اني عندي الإنسانة الانتظرت حبيبها سنين حتى يكوّن نفسه، والولد الي اشتغل شفتين حتى يقلل من فترة الخطوبة ويكمل حاجتة.
ومن اتزوجوا كعدوا بمشتمل بمنطقة شعبية لأن ماعدهم يكعدون بمناطق راقية.
ومن يريدون يطلعون للسوك يحميها من الرايح والجاي بنص الازدحامات وإذا كعدوا بمطعم يطلبلها أغلى وجبة ويكلها اشرب جاي لأن قبل شوية أكلت بس بالحقيقة متكفي فلوسه يطلب إله هم.
والي بنفسها ملابس جديدة بس تكله اني عندي بالكنتور ليش نشتري جديد،
مع انه هي تدري الناس حفظت لبسها نفسه كل ما تطلع،
هاي قصص الحب لناس بسيطة ووفيّة التستاهل مليون اعلان
قصص الحب لناس الحياة ما وفرت الهم ظروف مناسبة فقرروا يبدون من الصفر سويّه ويعاندون المستحيل.
قصص الحب الوره الكاميرات الماتجيب مشاهدات لأنها صادقه ونقيّة ومو لأي لحد
هاي قصص الحب التستاهل
الي تكون خاصة بس الهم ثنينهم.

بس الهم!
شكد صارت نادرة هالجملة.

وكلكم عيوني.

شعورك بأن السنوات تتشابه، السنة القادمة نفس القبلها، والقبلها نفس القبلها، والديتغير فقط الرقم
هذا يدل على عجزك وفشلك تجاه التغيّير.
التغيير ما يجي بالتمني والرغبة، يجي بالعمل.
اشتغل على نفسك هلسنة، لا تنتظر ايد تنزلّك من السمه، ولا تنتظر الظروف تتحسن حتى تبدي، ظروفك هيّ هيّ بكل سنة.
مادام عندك صحة وعافية ، ابدي
واتوكل على الله
لأن محد باقيلك بهل دنيا بس انتَ.

كل سنة وأنتم طيبين
أحبكم.

وكلكم عيوني.

لو تخيّرت بين شي مهم وبين مبادئك
فمهما يكن لا تتخلى عن مبادئك
لأن هنه سلاحك الوحيد بمواجهة حرب الحياة المتعبة.

وكلكم عيوني.

لا تستغرب من شعب يخلي شخص جذاب ترند ويتابع سوالفه وبثوثه ويتداول كلماته بأرض الواقع، هذا الشعب اتعوّد على ناس تضحك عليّ صار 20 سنة، وصار الجذب هويّة رسمية للكثير من العراقيين مع الأسف.

بيني وبينكم
اليحجي صدك بهل وكت مالي خلگه
شلون الكم خلك تتابعون واحد جذاب!

وكلكم عيوني.

الحمدلله لأن اهلنه ربونه تربية صحيحة وما طلعنه نتمركص بالتيك توك او ننشر التفاهات بباقي البرامج حتى نستجدي اللايك والتعليق علمود نطش، الحمدلله لأن كل اليعرفنه يعرف أخلاقنه وتفكيرنه، ولأن كل الما يعرفنه راح يحبنه ويرتاح ويانه من أول نظرة، الحمدلله لأن ما أكلنه مال يتيم، ولا ظلمنه حق أحد، ولا أستغلينه احد لمصالح شخصية ودونية، ولا جاهرنه بالمعصية ولا أفتخرنه بالخطأ، ألحمدلله لأن ربونا على الطيبة والتسامح والإبتسامة ويه الكل، ولأن علمونه أن الدنيا زائلة وكل مافيها فانٍ، وأنها دار تعب ومشقّة لا راحة واطمئنان، وهلمعرفة خلتنه نصبر ونحمد الله دائمًا على التعب قبل الراحة.
الحمدلله على القناعة الي إكتسبناها من أهلنه، على الكرم وعلى مساعدة الناس، على كل كلمة حلوه طلعت من عدنه وراحت لشخص محتاجها، على كل نيّة حقيقية وصادقة إتجاه أشخاص نحبهم ونقدرهم، ألحمدلله لأن طلعت گلوبنه نظيفة، ولأن النفاق والكذب أبعد مايكون عنّا.
الحمدلله دائمًا وابدًا.

وكلكم عيوني.

صديقي يحجيلي
يگلي مرة صاعد بكوستر على اليسار كاعدة بنية محجبة متوسطة الشكل حاطه جنطتها بحضنها، صعد واحد مبين مو راحة اول ما صعد باوع عليها وكعد بصفها كامت غيرت مكانها، بنهاية الشارع اول مانزل هالشخص كلها على اساس انتي شلونج وخايفة واحد يتحارش بيج ونزل هو متنرفز.
هو شايف البنت اذا مو بمستوى من الجمال فمو من حقها تدافع على نفسها وتتعامل كأنثى من الأساس
وأتذكر بأيام 2014 ايام المتوسطة سمعت واحد من جماعة حلّة المدارس سولف بسياق هزلي اذا شاف ٣ بنات يتمشن يروح يتحارش اقل وحده جمالاً بيهن لأن بنظرة هي الراح تتقبل حجايته وتنطي مجال.

اذا سويت سيرج لكل مسلسل او إعلان عراقي او اجنبي راح تشوف البنت لازم تكون على مستوى معين من الجمال والجاذبية ومثالية الجسم والقوام
عبالك البنت اذا يختاروها عادية ماراح تكون مقنعة للجمهور بدور واجهة العمل والتمثيل والحب والرومانسية.
طبعاً هالموضوع مامتعلق بس بنظرة بعض الرجال حتى نظرة المرأة للمرأة .
اذا تشوفين صورة عروسة لأمج راح تسمعين تعليقات من نوع، كصيرة، سمينة، راسها جبير، حلكها اعوج، مع العلم يمكن الأم نفسها كصيرة وسمينة وهذا شي يصعب على امثالي فهمه.
شوف برامج التلفزيون والدعايات التقدم على فرص عمل والرايديها تشتغل على رأس الأولويات لازم حسنة المظهر وصاحبة شكل وجسم معيّن، حتى الشغل صار على اساس الجمال، بإعتبار الزبون يهتم ويركز بالجمال اكثر من القيمة.

عملية تمييز المرأة بمجتمعنا وحصرها بالمواصفات الشكلية وحرمان اصحاب الكفاءات والمواهب من لا تنطبق عليها ذني الشروط وحرمانها من الانوثة بالعمل والحب والزواج هي عملية مؤذية وغير انسانية وتخليك تتساءل عن سوء نفسية البشر ومدى وضاعة تفكيرهم واخلاقهم.

وكلكم عيوني.

وبسياق متصل مع الموضوع السابق

اكو إقبال مخيف للبنات على مراكز التجميل بالسنين الأخيرة
والعجيب كل سبوع ألكه 3 مراكز تجميل على الأقل مفتحات جديد، ومقاطع الفيديو لذني ليشرحن على طريقة التاتو واللينسز وفاونديشن،

الصراحة كل انسان يحب يهتم بنفسه بس اكو شي معقول واكو شي مبالغ بي، اني كرجل يهمني الجمال بس تهمني تربيتها وشخصيتها قبل جمالها
باجر التحبي لحيته توكع وبطنه المقسمة تصير كرش نازل من قميصة، رموشج راح ترجع طبيعية وحواجبج ترجع نفسها وجفنج يهدّل والهالات مبينه، واهسة يقل كبال المراية وتگومين يادوب تستخدمين الغسول.

باجر راح تبقون انتي وياه كبال صينية تاكلون كباب عروگ وطمامه، وقوري چاي فوك الصوبة ديحمه
وميبقى من البشر غير الأصل والمعدن الطيّب.

أتمنى وصلت.

وكلكم عيوني.

الناس صارت نسخ متكررة من الآخرين، اي ترند يصير كلها تسوي، أي سفينه تركب الموجة كلها تصعد بيها، سواء فيديو او صورة او لبسة او كلمة گالها واحد تافه، او حتى من الجانب الديني، صار الموضوع تصنّع علني بالمشاعر.
صرت نادرًا ما اشوف المميز والمُختلِف بهل كومة من البشر.
وهاي أحد الأسباب التخليني شخصيًا أعتزل الناس، وما اتقرب بس من اليسوّه.

وكلكم عيوني.

مهما تحاول تبذل جهد حتى تقدّم نفسك للعالم بصورة معيّنة، او تحاول تبرر لفكرة إنفهمت خطأ عنّك، فكل واحد راح يشوفك بقناعتة وعلى مزاجة ومثل ميريد هوَ، كلامك لا يقدم ولا يأخر، لأن هالموضوع للمقابل تحكمة عدّة عوامل نفسية، فلتموّت نفسك حتى ترضي فلان واحد او تتمنى ينعجب بيك علّان واحد، إتصرف على طبيعتك وفطرتك الإنسانية الخلوقة وبدون تكلّف، حتى لو تستعجل وتغلط مرة ومرتين،
خليهم يحسبون حسابهم مثل ميردون، وعيش انتَ حياتك مثل ما تريد والله يريد.
ورة فترة راح تكتشف المكسب الحقيقي مو كلمة إطراء ولا ضحكة أحد
المكسب الحقيقي أنُ تعرف شلون تكسب روحك.

وكلكم عيوني.

إذا شفت بنية حلوة بالشارع او بأي مكان عام، گول الله يحفظها ويستر عليها ويبعد عَنها ولد الحرام، وإذا شفت بيت ركن چبير بالمنصور كول الله يرزقهم، واذا شفت سيارة أحلامك گول الله يجفي شرها ويرزقه أضعافها، واذا شِفت شخص أكثر منك مكانة بالمجتمع ومتوفرتله كل الأمور الأنتَ تسعى الها، كول الله ينوّر طريقه اكثَر ويوفقه بحياته، واذا جانت صديقتج او گرايبج احلى منج وبشرتها صافية، لا تغارين منها وتضوجين، واذا شفتي شَخص طلب من عندج مساعدة بالخاص أو بالشارع، ساعديه ولا تحسين انتِ الوحيدة المخلوقة بهذا الكوكب وكل الناس مو زينين،
ومهما يكون المقابيل فَقير وملابسه متواضعة فأنتَ مجبور تحترمة وما تستهزء بي ابدًا، ولتصير متكبر ومغرور وشقاوجي كدام شخص متواضع وبسيط وعارف قيمة نفسة، لأن راح تبيّن گدامه اصفر من الصفر، واذا شفت شخص لابس احلى من ملابسَك او جسمه افضل منك، لا تحسّ بنقص داخلَك وتتمنى تكون كامل ومِثالي، عُمر الملابس والشكل ماتسوي الواحد مِثالي،

احترم الناس وحبهم وأتمنالهم كُل الخَير واشكر الله دائمًا على حالَك مهما يَكُن حتى يوفقَك ويرزقك اكثَر.
واتذكّر مقولة الإمام علي "عليهِ السَلام"
(من لم يرحم الناس منعَهُ الله رحمتَهُ)

وكلكم عيوني.

واتذكر
لا ملابسك الماركة ولا صورك يم برج خليفة او بالخضراء بفلان مكتب، ولا صورك بالجم وانت تشوفنا عظلة التراي او صورك وره سيارة جيكلاس، ولا عمك النائب او مضيف جدك الشيخ ولا فلوسك والسلطة العندك ولا حتى شهادتك ومكانتك العلمية هي التحدد منو انتَ، لأن كل الذكرتهن قبل شوي، انتَ راح تفقدهن بمجرد ما تقلل احترامك وتظهر شخصيتك الحقيقية للمقابل، راح تتجرد من الالقاب ومن الهيبة الوهمية الصانعها لنفسك لمجرد ما تحتقر وتتهجم على إنسان آخر، إنسان ضعيف الحياة جبرته يكون بمستوى أقل من مستواك،

الحقد والكره اذا جانن بيك راح تفقد كلشي تمتلكه
والبساطة والروح الحلوة اذا جانن بيك راح تكتسب كلشي مفتقدة
وأولهم حب الناس.

وكلكم عيوني.

البنية من هيَ طفلة بطبيعتها الفطرية تمنح الحب والحنان لكلشي كدامها، حبها لوردة شافتها بالشارع وتخاف تشلعها، او لبزونه تجيهم يوميًا توكف بباب المطبخ لأن هيّ معودتها على الأكل، او لطفل اصغر منها اجه للدنيا، تلقائيًا راح تعيش دور الأمومة حتى وهيّ طفلة، تشوفها تسوي ممة وتشرب الطفل هي وحاضنته، تشوفها مهتمة بالترتيب، هادئة بتواجدها وبلعبها وعدها قدرة على صنع سيناريوهات بعقلها، فتكدر تبقى تلعب ويه نفسها اذا مو احد وياها، ممكن تضوج منك لأن عقجت حاجبك عليها او على واحد من أهلها، غيورة على الأشخاص التحبهم، فما تعرف تعبر عن هالغيرة، لو تسكت لو تبجي، لو تكتلك وانتَ الممنون
ورغم نعومة هالطفلة تفزعلك اول بشر اذا تعرضت للأذى سواء مزح او حقيقة، تبجي حتى على الما يخصها، وعدها الأب بحياتها اله مكانة خاصة جدًا، لأن هو اول ذكر راح تتعامل وياه وتحبه من الجنس الآخر، فكل قوتها تستمدة من ابوها وكل ضعفها تفرغة يم أمها.

البنية مشروع دخولك للجنة اذا صنتها وربيتها عدل، كل استثمار بيها ما يخسرك شي، انتظر من تكبر وراح تشوف منو يشيلك بعيونها، حتى اذا بعدت عنها عيونك بفترة شبابها، حنانها يجبرها تكون ام للكل، حتى لأهلها.

وكلكم عيوني
أحمد قاسم.

الناس كامت تقيس انحطاطها، ثقافة ووعي
والإنسان الطبيعي المو منحط مثلهم، هذا جاهل ومتخلّف وما من حقه ينتقدهم.

الناس دا تخرب أخواني
احفظلك شكم واحد من هل أوادم واكتفي بيهم،
وأسفي على البعض اليتابع نمونات زفرة ويكبّر روسهم.

الوضع لا يطاق، والتربية بهل زمن صارت اصعب من صنع قنبلة نووية.
وهذا أصدق مثال حزين.

وكلكم عيوني.

من الأمور المؤسفة التي لاحظتها وتوصلت لها بسبب عراقيتي، انه لايمكن تغيير مجتمع رث، منحط، متعجرف ومتنمر. إلا من خلال استخدام نفس الوسائل التي يمارسها.. كالتنمر عليه وأهانتهُ
فهي اللغة او الثقافة الوحيدة التي يفهمها.. إذ لايمكن ان تقنع دب الپاندا في تغيير أساليبه من خلال اقتباس لمارك توين او تتعامل معه بأداوت منطق آرسطو..
لهذا تلاحظ كيفية هبوط الفن على صعيد التمثيل او الغناء او الكتابة او البرامج المتنوعة حد الرثاثة والسخافة وينزل لمستوى الدهماء، ليلقى رواجًا وقبولاً من قبلهم..

خذ رحلة سريعة في مواقع التواصل، تيك توك مثلًا وقارن بين عدد مشاهدات التفاهة وبين مشاهدات برامج ذات قيمة فكرية وتنويرية..
ستجد ان (معظم او أغلب) المشاهير لديهم جوائز نوبل في التفاهة والإنحطاط..

قارن بلوكر لديها 18 الف عملية تجميل او مطرب فاشل وبين فيلسوف او مؤرخ يطرح برنامجا تاريخيًا او فلسفيًا يصب في فائدة الناس وتنوير العقول لكنه يتحدث بطريقة رسمية وجدية..

طالما يوجد جمهور يشجع التفاهة والسخافة والإنحطاط الخُلقي والقيَمي، سيتكاثر (الطاشين) بأخس وأرذل الأنواع.

الى الله المُشتكى ...
وكلكم عيوني.