كل علاقة بالدنيا تمر بلحظات صعبة، اَي علاقة بالكون اطرافها يرتكبون اخطاء تنهي كل محبة وأيام عاشوها، العلاقات الحقيقية هي التستمر وتبقى أصلب، المزيفة تنهار لأن ماتحتمل الاختبارات، المشاكل ما مرغوبة بس حكمة وجودها تنطيك يقين مادام كادر تكمل بيها فأنت صح بصحبة الإنسان الردته
الإنسان اليستحق الواحد يصبر علموده.

أحسم الموضوع بالمواقف والاختبارات ولتغرك الألوان البراقة والصوت الناعم والوعود، الرحلة شاقة مو مال حمل زايد
واليكمل وياك راح يبين
واحد يخبل اسمه "ابن الأصول"

وكلكم عيوني.

تره عادي الإنسان يكدر يفرح بدون ما يركص ويتحوّل،
شو اشوفها حيل زحمة من طالب او طالبة يركصون وخاصةً البنات بحفلة تخرج
ومن هذا الركص المادري شلونه.

شكد يصير عمرك حتى تفتهم
مادري والله.

العالم مادري شبيها

يوم على يوم دتزيد التفاهة اكثر، ودا توصل لمستويات كارثية ما واصليلها قبل.
تريدني انظرلك بنظرة إحترام وتقدير وأحس بيك مثقف وأنتَ تنشرلي ريلزات لمصطفى الحجي ، لو تتلفظلي كلماته الصاعدة ترند ؟
تريدني أقدرك وانتَ شكو ريلز تافه وخادش للحياء والذوق العام ناشره بحسابك؟
مقطع شفته قبل شهرين لحد الآن يعصر بگلبي، طلاب احد الجامعات ولد وبنات مسجلين مقطع شنو أكثر الكلمات التحبها لمصطفى الحجي ! لك بابا انتو من يا خيسة طلعتولنا
من يا عصر متخلّف جايين !
اني ماراح احجي عن أهل البيجات الزعاطيط الي كل همه لايك وتعليق، هذولة مصيرهم واضح ومعلوم، داحجي عن الأشخاص المتأثرة بهاي التفاهة وضياع الأخلاق الديصير بشكل يخليك توكف وتكول، باجر عكبة من اتزوج واخلّف، اطفالي شلون راح احصنهم ضد هلكائنات الهمجية بالأفكار والتصرفات ؟ اطفالي شلون راح احميهم من كمية القذارة الموجودة هنا!
تره مو كلشي تشوفه تضحك عليه وتدزه لفلان لو تنشره، مو كل شي صعد ترند تروح تركض وراه مثل المجنون، وكأنوا شخصيتك الهزيلة عايشة على الترندات ! وشفايتلك لو شغلات زينه وبيها منفعة للناس، لو ينشرولي هذا اليجذب هواي لو ينشرولي مادري شنو،
يا أخوان والله ما مطلوب من عدكم تقرون ألف كتاب حتى تصيرون واعين ومثقفين، ياخي بس إرجع لدينك وراح تعرف انتَ شدتمصخ بحياتك.
وكافي تنشرون تفاهة دخيل النبي وأهل البيت ، هلفترة داسوي حملة أنفولو بالأنستكرام بشكل كارثي، واتمنى من الناس الخيرَّة المثقفة أن تخطو نفس خطوتي،
اتركوا المجاملة ، لأن صارت بلا ملح!

وكلكم عيوني.

هذا التفكير العدواني بمجتمعنا موضوع حزين بصراحة ، ويخليك تبتعد حتى عالناس التعرفهم، من تعرف بي يريد ينتقم من فلان بسبب ستوري لو بسبب علاقة عاطفية فاشلة او عمل ما انكتبله يتحققله نجاح .
بحيث اكثر من شخص يفوتلي يسألني شلون انتقم من فلان لأن يحاربني وأريد انتقم من فلان وأكسر عينه بسبب موضوع ديني او سياسي او عاطفي، ورسائل هواية من كلام هالضعفاء.

ماكو شي اخلاقي اسمه انتقام، الأنتقام يحق من تاخذ حق لفقير او عاجز من شخص ظالم مايردعه عن ظلمه اله فعل يشبه فعله، بس العلاقات الانسانية، الحب، الأسرة، الصداقة ، العمل، ماكو بقاموسها كلمة انتقام ، سميها تجارب فاشلة ، ناس مزيفة، تفكيرك بالأنتقام استهلاك للعقل ونزيف للمشاعر

تريد تنتقم اسعد نفسك وقدّر الانسان الصدك يستحقك والمكان اليريدك ومرتاح انت بي، الانتقام من تختار ناس صح وتشوف نفسك محظوظ بيهم، الانتقام تنسحب من اَي موضوع وجدل وعلاقة تستهلكك وتأذيك، تطلع واحد من عقلك وتعتبره مامخلوق، تصير ذكي وتبتعد عن المهازل ويه السذج اليجروك لمنطقتهم،
الانتقام تنجح بشغلك وتعوفهم بالشوارع والكهاوي كاعدين ، هذا الأنتقام عمل تنجح بي، وياه صديق يقدرك وحبيب يفتخر بيك

مجرد لحظة من راحة بالك وسعادتك هي اكبر انتقام .

وكلكم عيوني.

نسبة جبيرة من العالم بمجتمعنا مدري منين جابوا هالثقة بالتصنع والتكلف حتى تكتمل شخصيتهم
ترى الموضوع مو هيج، والثكل شي اصيل بالإنسان ميجي من النقص والتصرفات الطفولية، انت عايش بعذاب حتى ضحكتك مو هي ولا ردة فعلك نفسها، تحسب للحجاية شلون تنحجي والخاشوكة شلون تنلزم، والجرأة المفرطة قلة ذوق واخلاق مو شغلة حميده وانجاز ينحسبلك بالعكس
هواي عالم تضحك عليك وانت تتصوره اعجاب وهنيال الكون بوجودك بس الكون يشوفك عبارة عن جيس حب.
ماكو مخلوق يكدر يسعى للكمال بس الله وانتَ انسان مخلوق من نطفة الك عمر محدد وتموت تاليتك تصير جيفة وياكلك الدود، الله منطيك مزيج من الطيبة ومزيج من الغضب والكدامك مو معصوم هم مثلك فأذا ردت شخصية قوية تنال اعجاب انسان ويصير شريك حياتك أبقى على طبيعتك وحدود قابليتك ليش ياخذك وبعدين ينصدم بيك او انت تنصدم بي اذا طلع هو اضرب منك.

عيشوا حياتكم بهدوء لتقيدون الروح، هو الطبيعي ويضحك بهل بلد ممتحمل نفسه، شلون تتحملون نفسكم بالتصنّع ماادري.

وكلكم عيوني.

اني اشوف افضل استثمار تسوي بحياتك أن تستثمر بأطفالك
تعلمهم القيم الطيّبة والأخلاق النبوية المهدوية، تعلمهم شلون يتصرفون ويه الغرباء وشلون يحترمون الناس بأفعالهم وكلامهم، تزرع بيهم نبتة الحنان والعطف على الآخر، تزرع روح المساعدة بيهم، تمنعهم عن الأنترنيت والمبايل وتخصص اغلب يومك الهم، لتكلي مشغول وعندي دوام ومادري شلون، اهالينا هم جانوا موظفين وهم جانوا مشغولين لكن عرفوا شلون يربونا بطريقة نتمنى العالم كلها مثلنا، ونتمنى العالم كلها حتربي مثلنا.
موضوع التربية تحسه صار جزء تراثي قديم، ليش هيج ؟ وعلويش كل هذا؟

استثمر بأطفالك وازرع بداخلهم الحب،
راح تحصد كلشي من يكبرون،
وراح تسمع رحم الله والديك على التربية.

وكلكم عيوني

قبل فترة وگف گدامي شخص بجسمه المكوّن من عشرين ترليون خلية، وكل خلية تحتوي على جسور ومصانع ونظام تشفير معقد بالشيفرة الوراثية
باوعلي بعيونه الي دقتها 576 ميكا بكسل، الّي تحتوي على نظام تصوير متقن للألوان وبدقة مذهلة ويه آلية لتخزين الصور المتحركة والساكنة
واله قدرة على تفسير الصور بواسطة الدماغ وتحليلها بأقل من ثانية ! الدماغ البي خلايا اذا جمعت طولهن تكدر تحاوط الكرة الأرضية 3 مرات ناهيك عن المخ البي 100 مليار خلية عصبية
وگف گدامي بقوامه الّي يُدار من قِبل 640 عضلة
گلبه ينبض ويشتغل منذ أكثر من ثلاثين سنة بالليل وبالنهار بدون صيانة خارجية سواءً جان نايم أو گاعد
وأخيراً نطق الشاب وحرك لسانة المرتبط بالفك بـ17 عضلة بطريقة هندسية فائقة للجمال
سألني بذكاء خارق وبكل برود :
شنو الدليل على وجود الخالق؟

جمعة مباركة
وكلكم عيوني.

أضوج من كلمة "استاذي او استاذ" اليگولها الي النادل البعمري او أكبر مني بالمطعم او المقهى من يقدملي الطلب، حيل أتحسس منها.
على شنو اني استاذك؟ لأن الحياة خلتك بمكانة أقل من عندي بشوية فصرت استاذ
؟ ومن يمتى مكانة الإنسان بالحياة تتحدد بقيمتة المادية أو هندامة بالرسمي؟

اذا أكو استاذ هنا فهو انتَ فقط، وأذا اكو إنسان مكانتة عالية بينه فهو انتَ فقط، أنتَ استاذي لأن من عندك اتعلم شلون الإنسان يشتغل ويتعب على نفسه ويواجهة الحياة بكامل اخلاقه وأحترامه.
وكلكم عيوني.

كد مابيك صير انسان يعرف قيمته
كد مابيك صير انسان صعب الواحد يوصلّه
دير بالك تركض وره واحد مهما يكن
دير بالك ترخص نفسك بأفعالك
اعرف شنو تنشر
واعرف ويامن تمشي

وتذكر
الرخيص ماله قيمة.

إبتعد عن البنيه الي تكون يتيمة الأب، او البنيه الأبوها بعيد عنها، او الأبوها وياها مجرد اسم لا اكثر.
هاي البنيه يكون عدها نقص وحرمان بالحنيّه والمشاعر وتبحث عن الإهتمام والأمان دائمًا، لا تتقرب من بنيه ماعدها سند، وانت تعرف بنفسك مو كد مسؤولية الإرتباط والزواج، وجاي فقط تستغلها وتروح،

هاي البنيه بالبذات يكون عدها خوف ورهبة بمشاعرها، تخاف لو تتعلق وتتركها مثل ما تركوها السابقين، هي وره الصراع النفسي بين گلبها وعقلها تتبع گلبها وتحبك، وانتَ بكامل رعونية معتبرها فترة وغاية من غاياتك السخيفة.

لا تضحك على بنيه ماكو أب بحياتها
لا تستغلها .. اعتبرها اي شي
اعتبرها صدقة جارية لحياتك المليانه ذنوب.

وكلكم عيوني.

اكو 3 حرامية.

واحد يبوگ هوش والثاني يبوگ غنم والثالث يبوگ دواب، مشهورين بالقرية بفسادهم وخمطهم لحلال العالم،
يوم من الأيام أعلنوا توبتهم گدام الناس...فالناس البسيطة أمنت بيهم وخلوا حلالهم يسرح بأمان، اخذولهم چم يوم ماكو شي اﻻمور طبيعية
وره فتره بعد آمنت الناس إنباگت هایشه ركضت الوادم على حرامي الهوش التايب حلف الف يمين ما بايگ الهایشه 
ثاني يوم انباگت نعجه هم ركضوا على حرامي الغنم التايب نفس الحجي ونفس الشي هم حلف ما يدري وطلع تايب
ثالث يوم إنباگن ثنين من الدواب ركضوا على حرامي الدواب هم حلف الف يمين ما بايگهن،
بعدين الشيخ وده رجل من غير قرية يطب وياهم ويشوف شنو السالفه....رجع الرجل اللي وداه الشيخ تدرون شلگه ؟
لگه حرامي الهوش فعلاً تايب من بوگ الهوش بس صاير حرامي غنم وحرامي الدواب صاير حرامي هوش وحرامي الغنم صاير حرامي دواب...يعني مغيرين اختصاصهم ومسوين تحالف جديد على حيله.

بس اهل القرية يتوبون منهم؟
باجر تشوف هههه.

وكلكم عيوني.

القصة والحوار الصار بين العبد الصالح (الخضر) وبين النبي موسى عليهِ السلام بسورة الكهف، أشوفها من المواقف الرائعة المذكورة بالقرآن الكريم.

اثناء الرحلة بين الخضر والنبي موسى عليهِ السلام، كلكم تعرفون ال 3 شغلات الصارت
من الخضر زرف السفينة وقتل الغلام وفلّش الجدار ، وجان بكل فعل يسويه العبد الصالح
النبي موسى يسأله يگله شدسوي وليش هيج وشنو الحكمة من الموضوع؟ والخضر يگله اصبر .. راح تعرف بعدين
النبي ماصبر وجان كثير السؤال فبالأخير قرر العبد الصالح يترك النبي موسى عليهِ السلام، ولكن ما تركه بدون ما يجاوبه ويوضحله.
اجه كعد وياه وگله زرفت السفينة لأن هيج وهيج راح يصير بعدين، وقتلت الغلام لأن هيج وهيج راح يصير، وفلّشت الجدار لأن هيج وهيج.
وره ما بينّله الأسباب واقتنع النبي موسى يله الخضر عافه.

حلو من تشرح سبب الفراق للآخر، خاصةً من اكو شغلات الطرف المقابل يكون غافل عنها فيتوهّم انتَ تركته بدون سبب واضح ومنطقي،
مسؤوليتنا من تنتهي علاقتنا بأحد نجي نوضحله الأسباب ونگله هيج وهيج السالفة، ميصير نتركه والأفكار تآكل براسه وحسبه توديه وحسبه تجيبه.

"ذلك تأويل ما لم تستطع عليهِ صبرًا"

وكلكم عيوني.

الصوت هذا موضوعه لطيف صراحة،

ماعتقد اكو شاعر أو أديب عربي او اجنبي انولّد على سطح الكرة الأرضية ما كتب نص او قصيدة يوصف بيها جمال صوت حبيبته او البنيه الانعجب بيها.
وحتى احنا الناس الفقرة، من ننعجب بشخص او نحبه راح نركز بصوته ونلاحظ كلمات الغزل تخرج من عدنه بشكل فطري، سواء سمعنا صوت هلإنسان بالحقيقة او بمكالمة اعتيادية.

اكو نص لحسين بن حمزة يمثّل شكد احنا ناس فطيرة وبريئة من نسمع صوت النحبهم
يگول بي؛
صوتكِ
هو هذه اليد
التي تَعثرُ على طفولتي
وتُعيدُها إلى البيت!

المهم اني فرحان اليوم، واستقبل كل انواع العرايك والرسائل الجارحة للمشاعر والخادشة للحياء بكل رحابة صدر وابتسامة، لأن مزاجي بأعلى مستويات الروقان.
وهذا مصطلح الروقان اول مرة استخدمه بحياتي

وكلكم عيوني.

قبل سبوع راجعت صديقي عبدلله دكتور أورام بالحارثية، جنت اعاني من وجع خفيف، كمل الفحوصات وره ساعة دخلتني السكرتيرة وشفت وجهة اصفر، كلي احمد ماعرف شديصير خل اعيد الفحوصات، وره ما عادها گلي فطرت كلبي، بيك مرض خطير وحضني وكام يبجي.
ماكتله شنو هو المرض، كتله عندي وكت اعيش ؟
كلي على الأكثر شهرين ، وآخر شهر ماراح تكدر تكوم من الفراش، الك شهر واحد تعيش كأنسان طبيعي
رحت زرت كبر ابوية، صارلي سنة ما زايره، رحت مستحي، گمت اسولف وياه وأول مرة بحياتي انطق كلمة بابا لأن أول مرة بحياتي اكون خايف، الفرحة الوحيدة بزيارتي اله جان اكو مكان فارغ بصف قبره حجزته الي،
اعتذرت هواية لحبيبة مجهولة برغم متعاوفين صار فترة ، اتمنيتلها الخير وتأسفت منها على اسلوبي الجاف، طفيت النت حتى لا توصلني رسالة منها واقراها.
رجعت لبغداد اتمشيت بالشوارع الجنت اضيع بيها سابقًا، مشيت فوك السياج مال جسر الصرافية اني ومغمض، حسيت نفسي حر لأول مرة
رحت لأماكن احبها، يم المسرح الوطني ابو المطعم صديقي اجيته قبل 9 سنين على شغل ورفض لأن مايعرفني زين، بقينا نسولف وكلي بالضحك مكانك موجود اذا تحب تشتغل، رحت كعدت يم مكاني الخاص بالجعيفر على دجلة، دخنت جكاير وشربت ببسي ابو الگزاز هذا القديم، يبيعهن رجال محتفظ بيهن عنده دكان بالشورجة، خابرت اصدقائي وطلعنه للبيروتي نستذكر أيامنا وطبتنه ومواقفنا المحرجة والذكريات التخبل. من التقينا ما سولفتلهم عن وضعي حتى الكعدة تبقى حلوة،
حجيت ويه اخويه الوحيد وكتله كل اسراري، بكل معلومة احجيها اله يگلي وين رايح؟ بالأخير حضنته ومشيت، صعبة من مرة وحده بحياتك تحضن اخوك، وهيّ المرة الأخيرة.
رحت للشعب يم الأسواق المركزية من جنت انتظر صاحبي هناك يرجع من الشغل حتى ارجع وياه للبيت، بس تذكرت صاحبي عافني وراح،
رحت لسوك شلال اتذكرت اول ملابس جديدة اشتريتها للعيد وشكد جان ذوقي يضحّك بالأختيار ، بهل اثناء سيارة مال شايب وهو وعائلته عطلت، رحت صحت كم واحد من الشارع ودفعناها
وشربت عصير رخيص من ابو الكشك لأن مشغل اغنية حلوة تذكرني ببنية مستحيل تكون الي بيوم من الايام، رجعت فتحت نت همزين ماواصل رد منها.
لغيت كل بلوك سويته واعتذرت حتى للمتجاوز بحقي ومن ردت استوعب نهاية ايامي حتى اكتب هذا البوست ، رجعت لديالى يم أهلي حتى اكون مستعد لمصيري.

خابرني الدكتور وحجيتله على السويته فوك. كلي هذا الردته منك من زمان
روح ارتاح مابيك شي،
ماحجيت وياه رحتله الصبح للبيت حتى ارزله طلع اخوه گلي احمد شبيك!
صديقك عبدلله استشهد ب2016 كدام عينك.

وكلكم عيوني.

اول عام من نزل ايفون 13 الجديد اشتريته، اني مو من ذولة الاشخاص اليدورون اي شي ترند وجديد، لكن مبايلي السابق جان يعلگ فأضطريت أغيره، وإشتريت وياه سماعات آيربود الجديدة، مثلي مثل اي شخص مشتري حاجة ثمينة بالبداية يبقى يحافظ عليها ويشتريلها گفر يخاف عليها من الخدش ويلزمها بأيده زين خاف توكع وتنكسر، وهذا الشي السويته ويا هلشغلتين الاشتريتهن.

يوم من الأيام جنت ويه صديقي دا العب منضدة، حاط الآيربود بأذني وداسمع شغلات حماسية، فمن دا العب صارت حركة سريعة مني خلت وحده من السماعات توكع من اذني، اني بساع رحت شلتها من الكاع وفحصتها، لكيتها تشتغل الحمدلله، ومابيها اي خدش، ولمت نفسي لأن جنت لابسها والعب لعبة تطلّب حركة سريعة، وكلت لو نكسرت هسه شلون راح اسمع بالليل.

ورة فترة جنت دا اغسل سيارتنا ومنطرب ويا ام كلثوم، جان توكع وحده من السماعات بالسطل مال مي، كلبي عصرني عليها، طلعتها وكمت اهفي بداخلها حتى ما يطب المي لجوه بلكي تنشف بساع، مادري شجنت اسوي بوقتها،
وره شويه اشتغلت لكن بيها وشوشة، بيها صوت مو مثل الصوت السابق، هواي ضجت وكلت خلص عطلت، وبقيت اجلد بالذات لأن هملتها هيج، وتمنيت لو يرجع الوقت جان ابطل رعونية وما استخدمها من اسوي حركة او اشتغل بشي لأن احتمال اخسرها.
تركتها وشغلتها ثاني يوم، لكيتها رجعت طبيعية نفس صوت قبل! فرحت وكلت خلص هاي ماتريد تتركني، يمكن الله كاتبلها تصير سماعتي الوحيدة.

رحت بحثت ولكيت انها ضد المي وتتحمل السقوط على الأرض وضد الخدش كذلك
ذني المعلومتين ماجنت ادري بيهن، لذلك جنت خايف عليها
بس من دريت بيهن، استهرت كلش وكمت عادي اسبح واشغلها، وعادي توكع مني من العب منضدة ومن اشيلها ما اباوع عليها واشوف شصار ماصار، مباشرةً اخليها بإذني وترجع تشتغل غصبًا عليها، راح واهسي بيها لأن عرفت هيه ماتكدر بدوني، ولأن عرفت هيه صعب تعطّل بيوم.

الآيربود هو نفسه هذا الإنسان اليحبك من كل گلبه، هو نفسه المتحمل هفواتك واخطاءك ورعونيتك، هو نفسه الجان منبهر بيك بالبداية، الجان حاس بإمانك المُزيف، وراسم وياك مستقبل وردي، بس انت شسويت؟ من دريت بي مايكدر بدونك، كمت عادي تتجاهلة وعادي ما تهتمله، لان تدري شما جفصت ببطنه بكلمتين تقشمره ويرجع وياك، وانت مسوي بيها سر الحياة وسر الكون، وعبالك هو غبي وفقير وطيّب الگلب ويتقشمر بحجايتين،
هو متربي وأصيل ومايدور غاية ومصلحة وياك، هو مو بوجهين مثلك، هو صادق ويه نفسه وويه ربه
لا تحس ابدًا انتَ إنتصرت عليه بيوم من الايام لأنكَ مشوه وهو نقيّ
لأنك راح تعطل بيوم من الأيام
وراح يبقى مشتغل هوّ
مثل الايربود.

وكلكم عيوني.

اني اشوف المسؤولية هيّ التصنع رجل،
زحمة من تتعارك ويه زوجتك وتكطع عنها المصروف وتخلي اطفالك متبهذلين،
زحمة تبقى زعلان من صديقك وهو يمر بظرف حرج، زحمة ما تزور اقاربك بالمستشفى لأن نسى يباركلك بحفل تخرجك،
زحمة من تتخلى عن مسؤوليتك الدينية من تشوف الكل باع أخلاقه، وتبقى تكول يلا بقت عليه.
اي بقت عليك، ودائمًا تبقى عليك، زوجتك او صديقك او اقاربك او أمك وأبوك، تقصيرك إتجاههم بلحظات مهمة راح يشكّل فرق بنظرتهم ألك كرجل صاحب مسؤولية، من تتخلى عن مسؤوليتك تجاهم بلحظات مصيرية راح تفقد أهم ميزة الك، وهو شعورهم بالأمان نحوّك
وراح يصير العكس ويگومون همه يخافون منك، والأقسى من ذلك.
يگومون همه يصرفون اهتمامهم وفلوسهم عليك، عسى ولعل تصير رجال براسه خير.

فرّق بين زعلك وبين مسؤوليتك
حتى ماتفقد نفسك بزحمة اشباه الرجال.

وكلكم عيوني.

اتوفى قبل 3 سنين واحد بالفرع الجنت ساكن بي، ما اعرفه منو سألت عليه كالوا مأجر بالفرع صارله 5 سنين، كاعد بغرفة هي وملحقاتها طابق ثاني، بوقتها عايشين بفترة الوباء، اتخوفوا اهل المنطقة خاف بي كورونا ومات، حسيت تجاهه بنوع من العاطفة رغم ماشايفه، كلت لصديقي يونس خل نصعد يمكن متخربط لو بعده بي نفس ، المأجرتله المسيحية ردت: لاشفته ميت حركت ايده نزلت على الكاع ، طريقة كلامها والدموع وبجيها من شرحت نهاية الرجل الغريب بيها الكثير من العاطفة والصدق كأنه تذكر آلاآم المسيح، صعدت اني ويونس فتحنا الباب، الباب بيها شباك جامته مكسوره مغطيها بخاولي ماروني رطب لكينا جثة الرجل الغريب نايم على فراش اسفنج. ومخدتين جوه راسه وحده منهن خاسفة بسبب طويها وهذا الشي بسبب القلق والسهر والتفكير اثناء النوم تبقى تكلب بمخدتك حتى تقنع نفسك بأكثر من وضعية يمكن من وراها تنام

الرجل عمره بالسبعين طوله تقريبًا ١٧٠ ، ضعيف جسديًا ومدخن شره شفت فوك قنفته تكّه جكاير ايسي نعناع بيها ٤ باكيتات جدد و٣ باكيتات يم راسه واحد مفتوح باقي منه ٦ جكاير والثاني سرمهر والثالث مأخوذ منه بس جكارة بحكم نسيانه للباكيت الاول يمكن خلصان والدليل الباكيت الاول بي رماد جكاير وكطفين موجودات بداخله برغم وجود ٤ جكاير جدد، غرفته جانت بسيطة وحزينة، الطباخ علّي جذر بي شوربة عدس ناسي وصلة الطباخ عالقبق ، وكرصتين خبز حاطهن بجيس نايلون وحاصرهن بالقنينة ، اقتربت على جثته وباوعت بوجهه بجيت علّي ويونس رغم حياته القاسية العاشها والمفروض تخلي صلب بمواجهة الموت بجه اكثر مني وناح مثل طفل ضايع بسوك، من هدأت وبدون ارتباك وتردد وخوف واشمئزاز لزمت ايدي، ايده اليسره نحيلة وبمعصم ايدي استغربت يمكن بيها شظيه باقية من حرب الثمانين، عدلت نومته الابدية وطلعت من جيب دشداشته الزركه ٢٢ الف وجنسيته الكابسها مرتين وبعدها مهترئه وصورة لبنية شابة، مو زوجته يمكن بنته لان صورة جديدة، صورة شخصية لشابه عمرها بالثلاثينات
المشكلة ماعنده موبايل نتصل بأحد من اولاده او معارفه.

عدا الامور الذكرتها ماشفنا شي ، بقينا اني ويونس فوك الساعة بغرفته قبل مانچفنه بقماش ابيض وناخذه بسيارة احد الخيرين بالفرع، من نزلته بيدي اجتي سيارة شرطة بيها ضابط وشخصين وياه شباب طيبين استفسروا وعرفوا الموضوع بحيث اتأثروا واجوي ويانه دفناه بمقبرة الغزالي بالشيخ عمر، رجعت وراها لحياتي، التهيت بالدراسة واعمالي الخاصة بس باقي ببالي الرجل، رجل عاش سبعين سنة ونهايته يموت وحده يجي غريب يدفنه ومحد من عائلته وياه.

اليوم الثاني والثالث والرابع اشتغل وميروح من بالي، وصارلي واهس بس ازكي اي شي الله خالقة تفوت بزونة اصبلها مي ببطل مي صغير اكصه واترسه واخلي ، افتر على اي سندانة اشوفها كبال المحلات بيدي بطل مي واسكيها، اشتريت من سوك الغزل اكل للحمام ونثرته على رصيف شارع الرواد علمود ياكلن الحمام بتموز،

اليعرفني ماكلي شدسوي، شكرني واستغرب بيهم مايعرفوني كلي بس ممنون،
بقيت شهر مو طبيعي. يومية اطلع ارش اي زرع وورد اشوفه كبالي بحيث وصيت ٤ سنادين من بيج عالفيسبوك، صاحبي ابو مشتل بالأعظمية، جابولياها يومية اسكيهن، خابرت ابو المشتل ثاني يوم كتله اريد بعد ٢ لكن حطلي بيهن بس بذور.
بقيت اسكي بيهن نفسيتي ارتاحت وكل زرع سكيته بده يخضّر والشوارع صارت احلى من قبل ٣ اسابيع وبده گلبي ترجع نبضاته طبيعية بعد شهر من المراجعات يم الدكتور علي آل ياسين.

اجيت وره كم يوم شفت البذور طاكه وكبرانه وابو المشتل صدفة جاي قريب على مكاني ،
كلي شوف شكد حلوه زهرة الأوركيد الطالعة ببياضها وحمارها المتداخل بعمقها،
ذكرتني بزبون عايش وحده جان ياخذ باقة لبنته المتوفية كل شهر يروح يخليها على كبرها.
مادري وين راح صارله شهر ما جايني.

وكلكم عيوني.

الحياة مو مال ثقل زايد
إذا المكان مو إلك لا تحارب ، غادر

اكو نقطة ظهرت مؤخرًا لهواي من رجال المجتمع العربي وبالتحديد بعد دخول الأنترنيت، أفتقارهم لأهم ميزة بالرجل الحقيقي وهيّ الغيرة على مرته.

الصراحة اني لو أخطب او اتزوج الإنسانة الاحبها سواء جنت ومشهور او معروف، من سابع المستحيلات كل شوية انزل وياها فيديو او صورة وأخلي العالم تشوفها، لأن اغار عليها وهاي الأمور الزوجية احلى شي بيها خصوصيتها، زحمة من انزل مقطع بي شكلها او صوتها حتى اصعد مشاهدات ويصعد حسابي.
الحب بمفهوم ذوله الي هم عالأساس شخصيات عامة، ننخطب ونسوّق لقصة حبنا فتصير عليها بوستات بصفها گلوب بنفسجية ويصير الفيديو هاشتاك بالانستكرام وينشرنه البنات الحالمات بستورياتهن ويطلع كبالك اول ماتفتح يوتيوب ووراها يجونا اصحاب القطاع الخاص نسويلهم اعلان بالملايين.
من حقكم ، بس قصص الحب الماسخة المثل هاي متهزني وماشوف بيها اَي شي رومانسي وعبقري،

اني عندي الإنسانة الانتظرت حبيبها سنين حتى يكوّن نفسه، والولد الي اشتغل شفتين حتى يقلل من فترة الخطوبة ويكمل حاجتة.
ومن اتزوجوا كعدوا بمشتمل بمنطقة شعبية لأن ماعدهم يكعدون بمناطق راقية.
ومن يريدون يطلعون للسوك يحميها من الرايح والجاي بنص الازدحامات وإذا كعدوا بمطعم يطلبلها أغلى وجبة ويكلها اشرب جاي لأن قبل شوية أكلت بس بالحقيقة متكفي فلوسه يطلب إله هم.
والي بنفسها ملابس جديدة بس تكله اني عندي بالكنتور ليش نشتري جديد،
مع انه هي تدري الناس حفظت لبسها نفسه كل ما تطلع،
هاي قصص الحب لناس بسيطة ووفيّة التستاهل مليون اعلان
قصص الحب لناس الحياة ما وفرت الهم ظروف مناسبة فقرروا يبدون من الصفر سويّه ويعاندون المستحيل.
قصص الحب الوره الكاميرات الماتجيب مشاهدات لأنها صادقه ونقيّة ومو لأي لحد
هاي قصص الحب التستاهل
الي تكون خاصة بس الهم ثنينهم.

بس الهم!
شكد صارت نادرة هالجملة.

وكلكم عيوني.

شعورك بأن السنوات تتشابه، السنة القادمة نفس القبلها، والقبلها نفس القبلها، والديتغير فقط الرقم
هذا يدل على عجزك وفشلك تجاه التغيّير.
التغيير ما يجي بالتمني والرغبة، يجي بالعمل.
اشتغل على نفسك هلسنة، لا تنتظر ايد تنزلّك من السمه، ولا تنتظر الظروف تتحسن حتى تبدي، ظروفك هيّ هيّ بكل سنة.
مادام عندك صحة وعافية ، ابدي
واتوكل على الله
لأن محد باقيلك بهل دنيا بس انتَ.

كل سنة وأنتم طيبين
أحبكم.

وكلكم عيوني.

لو تخيّرت بين شي مهم وبين مبادئك
فمهما يكن لا تتخلى عن مبادئك
لأن هنه سلاحك الوحيد بمواجهة حرب الحياة المتعبة.

وكلكم عيوني.