قبل كم يوم جانت عندي شغلة بشارع الربيعي بزيونة وية صديقي، لاحظت ذولة الأطفال صايرين يم مول الجوهرة، واكو واحد هم ليغاد وحدة كاعد، كذلك يبيع مثلهم داطلي، وهم جان ديقره، رحت عليه داسولف وياه، كتله شلونك حبيبي بيش تبيع الداطلي، اني ما آكله ولا صديقي لكن حبيت اساعده، گلي الوحدة بربع عمو ، وراها مباشرةً گلي تكدر تتأكدلي من الحل بهاي الصفحة، كتله مو تدلل واخذت الكتاب جان الموضوع عن حروف الجر، من وعلى وإلى وفي، ولازم تخليهن بالمكان المناسب مثلًا "على" الرصيف، "في"المدرسة، الولد جان متردد بيهن كعدت يمه بالعشر دقايق شرحتله الموضوع وكمت اسأله وجاوبني صح، وشفت الحل هو اصلًا حالهن صحيحات بس حب يتأكد، وره ماكملت نطيته فلوس واخذت منه وحده حتى ما اكسر بخاطره وياها كم جملة تشجيعية لكن نسيتهن بالضبط.

هواي اطفال شايف مثله وبكل مرة ينكسر گلبي عليهم واحاول قدر الإمكان اترك أثر، هيج اطفال يحتاجون واحد يسولف وياهم بقدر ما يحتاجون للفلوس، طفل ومن حقه يحس اكو احد مهتم بأمره حتى اذا مستطرق، كلش انقهر لأن ما باليد حيلة وكل الاكدر عليه اسولف وياه بإبتسامة واغيرله جو، وانطيه فلوس.
هيج اطفال راح يصيرون شي بالمستقبل، لأن شايل مسؤولية نفسه وعائلته بالشي البسيط الديبيعه، بنفس الوقت مهتم بمستقبله وهو بهل عمر الصغير،
اكو ناس كبار بالعمر ومضيعة مستقبلها بأديها.
اوكف بكامل ضعفي ومشاعري كدام هيج اطفال، واعتبرهم مصدر قوتي وقدوتي بالحياة.

وكلكم عيوني

مشتاق لأيام الصداقه الحقيقية، للأيام بدون معرفة الأنترنيت والمبايل، لأيام بنات الطفولة، من چانت البنيه كائن عادي وطبيعي مو مثل ما تشوهت هسه بفعل الأفكار الغربية الشيطانية، مشتاق لأصدقائي الي ماغيرتهم الظروف والأيام من چنا نلعب حرب بالرشاشات بأول يوم العيد، وتصير بالقنا*** بينا وبين الطرف الاخر ومن نكمل نروح نشتري بوشار سويه ونتصالح لان گلوبنا نظيفة وطيّبة، ماعدنا حقد وماعدنا كُره لأحد، مشتاق لأيام الفزعات الزينه، من چان يجي خطار لبيت جيرانَه وتصيحني اجيبلها ببسي، تحس انطتَك مهمه تجيب كأس العالم ب3 دقايق، مشتاق للمطر مال قَبل، من تمطر واحنا بالمدرسة، او دنشتري من الحانوت، وبالحَله نلعب جوه المُطر ونتنكع، ونرجع للبيت وتتلگاني امي گبل تروح ع جنطه تشوف الكتب خاف تنكعت، ومن تتأكد مابيهن شي، تبتسم ويانه وتكول "رعنين"
مشتاق من چنه نجي لبغداد لبيت خالتي بذاك الوقت، عبالك مسافرين لباريس او سويسرا، ومن ناكل موطة من مرطبات الملكة بالشتة، اقصى درجات الإستمتاع ، ونبقى نفتر بالسيارة ونمر على الأعظمية،
مشتاق للأوقات الحلوه الما تتقدر بثمن، للنيّة الصافية البريئة، للطفولة، للحياة قَبل.
شكد اتمنى كل الذكرتهم فوك، بخير وصحة وعافية ويرزقهم الله بكد رحمته.

وشكد احبكم
وكلكم عيوني.

20 نوفمبر .. يوم الطفل العالمي.

اني ليهسة ممتزوج وماعندي اطفال، بس لازم نعرف أن الجيل الجديد هذا جيل مختلف جذريًا وديسوء الموضوع سنة بعد سنة.
لازم تصير اكو رقابة عليهم، والأهالي يعرفون منو يمشي ويه ولدهم وبناتهم وشنو هي اخلاقهم واذا شافوهم اصدقاء سوء يتدخلون وميعوفون النار يم البانزين.
تشوف طفل عمرة 12 سنة كل ما أهله ينصحوه ويهذبوه يكلهم اني حر ويحسسهم هو كبر عالتربية .
منو كلك انت جبير ؟ أشفت من الدنيا حتى تعاند وتكابر وساد اذنك عالنصيحة ؟
انصدمت من أهالي اعرفهم كلولي لازم ننطي مساحة لأطفالنا يجربون ويتعلمون من اخطائهم، الكلام هذا صحيح لو تخيرهم يلعبون طوبة لو سباحة مثلًا
بس اخليهم يجربون امور فوك عمرهم حتى يتعلمون منها بطريق اليروح بي بعد ميرجع ! واذا رجع يبقى متدمر وميعرف يكمل حياتة مثل الاول.
فهموهم الفرق بين الستر والعيب، انطوهم ثقة بنفسهم بس عينكم تبقى عليهم، راقبوهم بس أبقوا قريبين حتى من يوكع بحفرة تكدر تلحك علّي وتطلعة.

التربية مو صياح وضرب، التربية زرع دين وانسانية و مبادئ وأفكار ناضجة حتى يبقى متحصن اذا طلع للشارع.
دوركم مو بس يطبون احسن مدارس وتلبسهم احسن لبس وياكل احسن اكل.
هذا الشي جيب اَي واحد من الشارع يسوي بس منو يبقى يربي ؟ ويعّرفه الحلال من الحرام
دورك الحقيقي تصير ويه ابنك الأمن والامان وويه بنتك السند والقدوة الصالحة مو تصير اخر واحد يدري .
غياب الاحترام والثقة بعمر صغير مع غياب دور الاب والام والتغاضي على تصرفات ميفيد تتغاضى عليها يصيرن معادلة خطرة تضيّع طفلك من ايدك.

ركزي ويه الخلفتي وركز ويا الشايل اسمك.

وكلكم عيوني

المشكلة بشكل رئيسي تجي من العائلة، كَوّن العائلة الها دور رئيسي بتحديد نشأة الطفل وترسيخ المفاهيم الصحيحة داخل عقله، وخلينه للحظة نشوف وضع اغلب عوائلنا، عوائل نسب الانجاب بيها عالية جدا، دتعاني من مشاكل وتخلف والتزام اعمى بالعادات والتقاليد.
وحتى لو مجانت العائلة تعاني من مشاكل، نسب الانجاب تمثل مشكلة بحد ذاتها، فلو فرضنا اكو علبة عصير (تمثل الاهل) واكو عدة گلاصات (تمثل الابناء)
كلما زادت عدد الكلاصات (عدد الابناء) كلما قلت كمية العصير بكل كلاص ( العصير اللي يمثل طاقة الاهل والاهتمام والعناية اللي ممكن يقدموها)، وهلشي رح يبدي يأثر سلبيا على الابناء.

اذا ردت تنجب اطفال، فلازم يكون عندك ما يكفي من الوعي والوقت والقدرة النفسية والمادية اللي تسمحلك الانجاب، بحيث تكدر تنقل للطفل كل تجربة وخبرة ومعلومة حصلت عليها خلال حياتك وتنطي كل حبك وأهتمامك وثقافتك بوضع يخليك توظف الفكرة داخله بشكل صحيح وتخليه على الاقل شخص مفيد بالمجتمع (منتج مو عبئ).

بعد الزيادة السكانية الجبيرة، صار من الضروري يصير تحديد للنسل (تحديد لعدد الابناء) لان كافي نشوف اطفال بالشوارع وعلى الترفك لايت يگدون لو يشتغلون لان عوائلهم فقيرة بدل ما يحصلون دفء ببيوتهم او تعليم جيد او فرصة للاستمتاع بطفولتهم.

انجاب طفل ونقل نفس الفقر والبؤس والمعاناة اللي دتحس بيها اله هلشي ما رح يقل مقدارًا عن اي جريمة ممكن ترتكبها، شلون الأهل يستخدمون الأطفال كوسيلة للطشة اولًا وكأداة للتعذيب.

فالموضوع ان ظروف النشأة الها تأثير جبير على الشخص بمرحلة طفولته وشي يكتسب خلاله جزء جبير من افكاره وشخصيته واسلوب حياته، واحتمال هالامور تكمل وياه لحد ما يموت، فالنشأة الخاطئة تولّد مجتمع يعاني من مشاكل وجهَل وفقر
ليش العائلة طرف مهم؟ لان اهتمام العائلة بالاطفال، تعليمهم ومتابتعهم وتوفير ظروف صحية الهم امور ممكن تأثر على طبيعة الاشخاص وتخليهم افضل بالمستقبل وقت يكونون شباب او بالغين.


وكلكم عيوني.

منشور حساس ..

اعتذر مسبقًا على التجريح بالمشاعر لكنّي لن أُجامل واتستر عن الخزي والعار الديصير، واجبي كأحمد التطرّق لهيج مواضيع، مو لأجل الناس فقط بل لأجل الله سبحانَهُ وتعالى لأن الساكت عن الحق شيطان اخرس،

نهائيًا ماكدر اشوف أي صفة او رابطة من صفات وروابط الحب "بالزوج"الذكر الي يسمح "لزوجته"تكون متبرجة وسافرة.
لم ولن اؤمن أن هيج اشخاص يحبون بشكل حقيقي وخالص ونقي 100‎%‎ ،

منين ما تجيبها ما تجي، اذا ناخذها من باب بعيد عن الدين، فالإنسان بطبيعته الفطرية يحب التملُك، يحب يمتلك بيت وحده وسيارة وحده وعائلة وحده، ماسمعتوا بيوم من الأيام شخص تشارك سيارته او عائلته لشخص اخر، فطبيعة التملُك موجودة بدون ما يتعب نفسه، فجاوبني شلون تحس نفسك تملكها وتملك كيانها وشخصيتها وعواطفها ورأيك وكلامك عليها وانتَ فاضحها كدام الناس وخال اليسوه والميسوه يباوع على جسمها وعلى شعرها ؟ مو ذني المناظر المفروض تكون خاصة بيك فقط ؟ بيتك انت مو حاطله سياج ؟ ليش حاط السياج؟ غير حتى يستر عن الخصوصية الموجودة بالبيت؟ غير يستر عن عرضك؟ تكدر هسه انتَ تسوي بيت بدون جدار؟ مو تحس نفسك كاعد بنص الشارع! اكلك وشربك وامورك الشخصية تكون متاحة للناس ويكدرون يشوفوها ؟ هذا المثال بالضبط ينطبق على الذكر الي يسمح لزوجته بأن تكون "سفردحي"!
أما لو نجيها من الجانب الديني، فإذا جان الأخ الذكر مسلم، فهو يعرف كلش زين أن الله والنبي وأهل البيت وحتى الصحابة عمي، يرفضون وينهون نهي قاطع عن التبرج وعن إظهار الزينة سواء للزوجة او للعازب، فهذا الشي حرام عليك لأن انتَ المسؤول عليها، ربما تكون هيّ في غفلة او عقلها بعده ما مهيئ لدرجة إدراك الأمر، بعدها كتكوته وعبالها الحرية بالخلع والدلع، بس انتَ المحاسب الأول على كل نظرة نظروها الناس الها، وعلى كل تخيُل قذر اجه ببالهم بخصوصها.

أما رأيي، فگلته بالبداية واعيد ذكرة بشكل مختصر، الذكر الي يسمح لزوجته وبناته بالتبرج، هذا ما يحبهم "وماعنده غيره نهائيًا" بأي شكل من الأشكال، لا الإثبات الفطري الذكرته فوك يسمح ولا الإثبات الديني، فمنين ما يجيبها مسدوده.

أما "الرجُل" الزوج الحقيقي، فهو الما يسمح لمرته بإظهر شعراية ولا بلبس قصير او ضيّق، هذا الفعلًا يرضى عليه الله ورسوله وأهل البيت، ويكون زواجهم مبارك وحتى بيناتهم مودة ورحمة، لأن الي يطلع خارج تعاليم دينه، ما راح يلگه المودة والرحمة الي وعدها الله للمتزوجين بكتابه الكريم!
اتمنى وصلت الفكرة ،، وكل الحب للأزواج الملتزمين، والهداية الهداية للطرف الآخر.

وكلكم عيوني.

حتى تعرف كتاب الله شكد عظيم وشكد هو معجزة وبنفس الوقت رحمة إلنا.

اكو آية بسورة الأعراف احبها وارددها يوميًا بيني وبين نفسي، الآية تكول ( إنَّ رَبكَ لسريع العقاب وإنَهُ لغفورٍ رحيم)
"انتبهولي على لام التوكيد بكلمة "سريع"
الآية تبيّن النا أن الله مثل ما هو سريع العقاب، بنفس الوقت هوَ غفور رحيم، آية رائعة وواضحها من كلامها
مسألتي مو هنا ..
البارحة قبل ما انام كالعادة مشغّل المنشاوي، وفاتح سورة الأنعام
وصل بالترتيل الى آية تكول ( إنَّ رَبكَ سريع العقاب وإنَهُ لغفورٍ رحيم )
ما موجود لام التوكيد بكلمة "سريع"
اني استغربت وكلت معقولة المنشاوي نساها او خطأ بالآية ! مستحيل هلشي
صحصحت ورحت بحثت وبحثت
واكتشفت إعجاز قرآني رائع كَثُرَ نظيرهُ كالعادة!
ورحت مباشرةً على شرح العلامة الدكتور فاضل السامرائي وطلع كلامه بالضبط نفس الجنت متوقعه.

اكو آيتين ، ثنينهن نفس الكلام بإستنثاء أن الآية الأولى بيها حرف اللام الي يفيد توكيد الكلام ، والآية الثانية مابيها حرف اللام.
بالسورة الأولى مال أعراف (إنَّ رَبكَ لسريع العقاب وإنَهُ لغفورٍ رحيم)
ليش الله أكد سرعته بالعقاب هنا ؟ لأن قبل هذهِ الآية كان يتحدث عن غضبه بخصوص أصحاب السبت واتخاذهم العجل وحرم عليهم الصيد لكنهم مكروا على الله.

أما بالآية الثانية الي مابيها لام التوكيد في سورة الأنعام ( إنَّ رَبكَ سريع العقاب وإنَهُ لغفورٍ رحيم )
الله سبحانه ما أكد الكلام بالآية
لأن سبقها قولهُ تعالى ( ومن جاءَ بالحسنةِ فلَهُ عشرَ أمثالها، ومن جاءَ بالسيئةِ فلا يجزى إلا مثلها وهم لا يظلمون)
وهذا يشير الى كَرَم وإحسان ورحمة الله عزّ وجل، ترك توكيد العقاب وفضَّل توكيد المغفره الى سائر البشر ، لأنهُ سبق كلامه برحمه فما سوه تأكيد للعقوبة بالسطر الآخر.

قال تعالى (قُل للهِ ۚ كَتَبَ عَلَىٰ نفسِهِ الرَّحْمَةَ )
تأملوا بيها
جمعة مباركة ❤️

وكلكم عيوني

مع الأسف الناس صار بيها مرض الترند على كلشي حتى على الميت!
الميّت إله حرمته
مو كلشي يصير ترند تعال جربه، ونوب على أشخاص ماتوا وغادروا الى رب رحيم.
افعالكم مخزية جدًا
تعبت واني اتفشل بدالكم.

اني اكول لو تاخذ الأمور ببساطة اكثر ، هواي احسن الك وللداير مدايرك
ماله داعي تكون متشنج ومتوتر دائمًا، الحياة مو سهلة لكنها مو معقدة بالشكل الأنتَ متخيّله
ماله داعي تقره مئات الكتب الفلسفية حتى يكون عندك مخزون معرفة تكدر تناقش بي واحد فارغ بالأنترنيت، وكلش ما مجبور تقرالي نصوص وقصائد وروايات مال اجانب حتى تعرف شنو معنى الحب، الحب كلشي تقدمه للآخر، الحب إبتسامة وكلمة طيبة وموقف تنفرد بي ويه المقابل، من الكل يخذله وما يتواجد وياه، الحب هو أفعالك للكلام التحجي.
ميحتاج تدخّن ولا يحتاج تثبرين الناس بالستوريات لأن عدكم فلان امتحان لو فلان شغلة، امشي ويه الحياة مثل ما مكتوبلك راح تشوفها تمشي وياك غصبًا عليها، واذا ما جان يعجبك المكتوب، شخبط واكتب فوگاه ترك.
بس لا تنقهر وتتوتر وتبقى بمود حزين.

اتذكر كلامي دائمًا “take easy”
وگوم صلي اذا مغلّس على المغرب والعشة

وكلكم عيوني.

صار فترة أمر بحالة غريبة بس مريحة، ملخصها الزهد بإنتظار أي شي من البشر، حياتي اليومية متلخصة بصديقين تقريبًا مكتفي بيهم، البقية مانتظر منهم شي حتى لو واحد مقصّر بحقي، ماصرت اخذ خطوة للعتاب تجاه أي مخلوق ولا عندي رغبة اصلًا، اتعامل بمنطق الهدوء والإستبعاد، حالة سلام نفسي حلوة، اكو هواي ناس تترجمها قسوة او جفاء، بس يكفي اني مرتاح بيها.
وما مهتم بعد لغير شي.

وكلكم عيوني.

ماكو شي مكتوب الك فاتك
كل الفات ما مكتوب الك
لا تبقى ضايج عل فاضي.

الإنسان يبقى جاهل بحياته، إلى ان يتوصل لنتيجة أن أهم شي لازم يهتمله هو صحته.
ساعتها يله اعتبره ناضج.

وكلكم عيوني.

ابد ماحب الأشخاص اليثيرون البلبلة والإنتباه بشكل مزعج، احب الإنسان الهادئ بمنشوراته وبحضورة بالواقع ، الإنسان الماينسمع اله صوت، واذا حجه يحجي كلام بحيث بداخلك تگول فدوه ل الله
صاير حيل اتنرفز من سوالف بعض البنات بالتحديد
واجدد مطلبي كل يوم بالعثور على كوكب بي اني وكم بزونه.

كلما يزيد اعجابك بالشخص .. كلما تزيد تفاهتك.

ومرات برتقالتك.

ماكو كتالوك للمشاعر الانسانية ولاقاعدة تنطبق على كل البشر
والحب تجربة ذاتية وشديدة الخصوصية وحتى لو تشابهت امور بتجارب غيرك راح تبقى علاقتك مختلفة ميدركها بس اليعيشها.
فلتستورد خبرات شخص وتحاول تطبق ظروفه عليك بس بصفة عامة حتى تعرف اذا ماشي صح لو غلط شوف نفسك انت مرتاح بهالعلاقة لو لا ؟ احنه نحب حتى نفرح ونتكامل، نحب حتى رؤيتنا الباجر تتسع واحساسنا بالجمال يزيد وثقتنا بنفسنا ترتفع، حتى نحس بالأمان والراحة، حتى نقدر ذواتنا، فأذا العلاقة تخصم من رصيد اَي شغلة تستنزفك وتأذيك فهنا اكو شي غلط ونحتاج وكفة.
ومو شرط تكمل المجرد صارلك سنين حبيت،، گلبك مو معمل تجارب، تجيب هاي على هاي وبلكت الله يشتغل، گلبك سلاحك الوحيد بمعركة الحياة المابيها عدالة، وإله طاقة شحن يجي يوم وتخلص، فلتخسره من وكت او تنطي للميستاهل
ياخذ منه اليريده ويروح، خلي لليستاهل صح حتى تكدر تحس، وتبقى إنسان!

وكلكم عيوني.