47人案港島初選6人今求情　被告友：佢哋已經冇咗擔心，聽天由命

攝：Nasha Chan、Fung Ka Kei

47 名民主派被控「串謀顛覆國家政權」罪一案，第二批罪成被告、初選時參選港島區的 6 人，周二（2 日）處理求情。早上近 7 時，有約 40 人排隊輪候旁聽，大批警員巡邏。

昨日現身銅鑼灣的李盈姿、「劉公子」劉定成，分別於清晨近 5 時及 7 時到庭外輪候，兩人均表示深夜才回家，亦「瞓得唔好」，故提早出門排隊。「大黃伯」亦有到場。

李盈姿昨遭警方截查，今日堅持往法庭旁聽，「咁旁聽都係我哋嘅權利嚟，佢又冇話唔畀我哋旁聽，佢暗示叫我低調、乖」。她又指，曾協助徐子見選區議員，亦有留意袁嘉蔚的新聞，盼望「有真香港人入到去正庭，唔係想畀啲排隊黨霸晒啲位」。

「劉公子」則表示是楊雪盈的朋友，兩人在 2019 年初選時認識，上周曾往收押所探望對方。劉形容，「佢喺我面前梗係好堅強啦，但喺我面前堅強...返到囚室就另一個樣」。他稱，「我哋只係旁觀者，憑個心去支持佢」。

3 名不願上鏡的徐子見友人亦到場旁聽。蘋果（化名）表示早前曾探望徐，形容他精神不俗，希望前來旁聽，「show 吓個樣畀佢睇，我哋仲存在嘅」。阿肥（化名）亦於近日探望徐，同樣稱他精神不俗，「唔會好憂愁...佢哋唔識去擔心，已經冇咗擔心兩個字㗎啦，聽天由命...你一定要樂觀啲面對」。

她又指，徐子見「困咗咁耐咩都磨滑晒，無奈、望天打卦，你點諗都唔知個官係點判」。阿肥再稱，旁聽是支持，「畀佢哋知道我哋仲記得」。細 May 姐（化名）亦稱，「最主要唔想忘記，再唔嚟成件事會不了了之」。

另外，其中一名被告的友人阿輝（化名）亦指，有寄信及探望對方，形容對方精神不俗，「同我認識嘅佢都冇變...佢都叫我哋記得飲水」，希望精神上支持對方。

港島6人求情前報道：
https://bit.ly/3xQ8EuO