بعد ما تم إجبارها من الاتحاد الأوروبي على التخلي عن منفذ الـLightning واستخدام منفذ شاحن USB-C.. شركة آبل بتخطط في حيلة جديدة من خلال استخدام منفذ USB-C في الآيفون القادم، لكنه مش هيشتغل بالطاقة القصوى إلا من خلال الشواحن الخاصة المعتمدة من الشركة MFi certification program !
يعني لو معاك آيفون وشاحن مش هتقدر تستفيد بالسرعة القصوى للشحن إلا لو كان شاحن معتمد من آبل.. ولا كإن الاتحاد الأوروبي عمل حاجة!
شركة مفيش عندها بربع جنيه سلكان..

إغلاق موقع Zippyshare بشكل نهائي ❌
الواحد زمان لما كان يحمل حاجة ويلاقي رابط التحميل Zippyshare كان بيفرح بسبب سهولة التحميل من الموقع من غير انتظار ولا ضغط على إعلانات ولا كابتشا ولا أي حاجة.. تدخل تضغط داونلود وتحمل..
الموقع اتقفل بسبب ارتفاع التكاليف وانخفاض أرباحه مع وجود منافسين بخدمات متطورة.. وكعادة أي بيزنس بيقف مكانه من غير تطوير هتكون نهايته الخروج من السوق.

الهواتف العادية ما زالت تحقق عدد ضخم من المبيعات، مع ارتفاع مستمر في نسبة زيادة المبيعات سنويا 📈
شركة HMD Global اللي ما زالت بتصنع هواتف نوكيا القديمة بتبيع سنويا ملايين النسخ.
أمريكا كانت من أكتر الدول اللي شهدت ارتفاع في حجم مبيعات الهواتف العادية خصوصا بين المراهقين والجيل زد Gen Z كمحاولة لتقليل الوقت اللي بيتم إضاعته على مواقع التواصل الاجتماعي.

معظم الناس عارفة ستيف جوبز أحد مؤسسي شركة آبل، وناس أقل عارفة ستيف وزنياك؛ المؤسس التاني والعقل المدبر للتكنولوجيا اللي قدمتها آبل في بدايتها.. لكن ناس كتير متعرفش إن آبل كان ليها مؤسس تالت وهو رونالد واين..
رونالد ده مشهور بواحد من أغبى القرارات الاستثمارية اللي حصلت في التاريخ.. لأنه قرر بعد 12 يوم فقط من تأسيس الشركة إنه يبيع حصته فيها.
باع رونالد حصته اللي حجمها كان 10% يوم 12 أبريل 1976 مقابل 800 دولار.
حصة رونالد اللي باعها من شركة آبل قيمتها الحالية 260 مليار دولار 🙂

شركة سامسونج رفعت الدعم عن 3 هواتف:
Galaxy S10
Galaxy A30
Galaxy A50
الموبايلات دي مش هيوصلها التحديثات الأمنية أو تحديثات السوفتوير والواجهة من سامسونج تاني.. لكن كالعادة ممكن يتم الاعتماد على الروت & الرومات..
ولا عزاء لبتوع التفاحة 👋

متجر شركة آبل في واشنطن اتعرض للسطو وسرقة 436 آيفون بقيمة 500 ألف دولار 😢
2 لصوص دخلوا كافيه مجاور وعملوا فتحة في الحيطة دخلوا منها للمتجر ولموا الموبايلات اللي كانت موجودة وهربوا 💔

شركة Home Security Heroes نشرت تقرير عن أداة لتخمين كلمات المرور مدعومة بالذكاء الاصطناعي اسمها PassGAN.. ومن خلال التجربة على قائمة فيها 15 مليون كلمة مرور قدرت الأداة تخمن:
▪️ نسبة 51% منهم في أقل من دقيقة
▪️ نسبة 65% منهم في أقل من ساعة
▪️ نسبة 71% منهم في أقل من يوم
▪️ نسبة 81% منهم في أقل من شهر
كلمات المرور الآمنة من التخمين بواسطة الأداة هي كلمات المرور المكونة من 18 خانة وبتضم حروف كبيرة وصغيرة وأرقام ورموز.
دي قائمة بتوضح قدرة الذكاء الاصطناعي على تخمين كلمة المرور حسب قوة الكلمة 👆

ميزة القنوات سيتم طرحها في واتساب قريبا 😒

بطل العالم للشطرنج النرويجي ماجنوس كارلسن خسر بطولة أساتذة الشطرنج اللي بينظمها موقع Chess .Com لصالح الياباني هيكارو ناكامورا بسبب غلطة من الماوس 🐭
ماجنوس (القطع باللون الأبيض) المفروض كان هيحرك الملكة للمربع b6 عشان يقضى على بيادق هيكارو.. لكن بسبب حركة الماوس الغلط حركها للمربع f6 وده خلالها بدون دفاع، وقضى عليها ملك هيكارو.
كارلسن خسر البطولة وجائزة المركز الأول 30,000$.

الشرطة الإسبانية نجحت في القبض على José Luis Huertas اللي كان معروف باسم Alcasec وكان بيعتبر أخطر هاكر في إسبانيا ☠️
خوسيه سبق واخترق شبكة الكمبيوتر الخاصة بالمجلس الوطني للقضاء في إسبانيا وسرق بيانات 575 ألف مواطن وعرضها للبيع، وانتحل شخصية باولو فاسيلي مدير قناة Telecinco وسرق 300 ألف يورو من حسابه.. ده غير إدعائه إنه بيمتلك وصول لبيانات أكتر من 90% من المواطنين الإسبان.
خوسيه كان ليه عمليات اختراق مضحكة.. منها إنه اخترق سيستم مطعم بيرجر كينج في مدريد وخلاه يوزع وجبات مجانية.. واخترق شركة HBO ووزع 150 ألف حساب مجاني على الإنستجرام.
المهم إنه اتقبض عليه من خلال تتبع المعاملات المالية اللي كان بيعملها والشرطة اتأكدت منه من خلال إنفاقه ببذخ على الملابس والرحلات والسيارات الرياضية.. وعاش حياة مش منطقية بالنسبة لشاب عنده 19 سنة ومش بيشتغل!
نصيحة: لما توصل متعملش زي صاحبنا.. خليك حويط وامسك إيدك في المصاريف 💰💰

دلوقتي تقدر تصنع صور بالذكاء الاصطناعي مباشرة من المتصفح العظمة Edge 🔥
تقدر تصنع الصور من خلال الضغط على أداة Image Creator من الشريط الجانبي للمتصفح.

تطبيق واتساب يطلق ميزة استخدام الحساب على هاتف آخر بشكل منفصل بدون حاجة إلى اتصال الهاتف الرئيسي بالإنترنت.
الميزة متاحة حاليا على تطبيق واتساب نسخة بيتا للأندرويد.
مميزات ثورية مبتكرة 🔥

حصري من الواشنطن بوست
أوووف 🔥🔥🔥🔥

شركة مايكروسوفت عالجت ثغرة في برنامج الحماية على ويندوز Windows Defender كانت بتسبب ارتفاع استهلاك متصفح فايرفوكس للمعالج.
المشكلة دي تم اكتشافها في 2018 وتم حلها الحمد لله بعد خمس سنين بس 🙂

جوجل أعلنت عن طرح ميزة جديدة في الأندرويد وهي ميزة Auto-Archive.. ودي ميزة بتساعد على تنظيف الموبايل من التطبيقات الغير مستخدمة.. ولأن معظم الناس مش بتمسح التطبيقات حتى لو مش هتستخدمها تاني، فالميزة دي هتقوم بالمهمة وهتساعد على توفير مساحة على الموبايل من خلال التخلص من حوالي 60% من المساحة اللي التطبيق مستخدمها.
الميزة لازم يوافق المستخدم على تفعيلها، ولازم يكون التطبيق بيدعمها.
باقي البيانات بتفضل موجودة عشان لو حبيت تستخدم التطبيق مرة تانية مش هتحتاج تنزل التطبيق بالكامل، وكل بياناتك اللي كانت موجودة بيتم حفظها.
تم استعارة الميزة من الآيفون 👈👉

شركة جوجل طرحت نسخة البيتا من أندرويد 14 بشكل رسمي لهواتف جوجل بيكسل بداية من Pixel 4A.
النسخة النهائية من أندرويد 14 هيتم طرحها في النصف الثاني من العام إن شاء الله.

مجموعة من ملاك سيارات تيسلا رفعوا قضية ضد الشركة بعد ما تم اكتشاف إن موظفي الشركة كانوا يقدروا يوصلوا للبث المباشر لكاميرات سيارات الشركة، وكانوا بيشاركوا صور وفيديوهات المستخدمين في جروبات خاصة!
سيارات تيسلا مزودة بكاميرات بيتم استخدامها في المساعدة على القيادة والقيادة الذاتية.. والموظفين كان عندهم وصول غير محدود للكاميرات دي عن بعد.. وكانوا بيشاركوا فيديوهات للحوادث وصور للمستخدمين منها صور حساسة من داخل سياراتهم وبيوتهم !

من حوالي ساعة مكتب التحقيقات الفيدرالي الأمريكي FBI قبض على موظف في الحرس الوطني بالقوات الجوية الأمريكية بتهمة تسريب وثائق دفاع واستخبارات أمريكية شديدة الحساسية
جاك تيكسيرا (21 عام)، عضو في جناح المخابرات في الحرس الوطني الجوي لولاية ماساتشوستس، متهم بتسريب أكثر من 100 وثيقة تشمل معلومات مخابراتية عن الحرب في أوكرانيا ومعلومات تجسس عن بعض الدول الحليفة لأمريكا.
جاك كان مسئول عن جروب شات على تطبيق ديسكورد عدد أعضائه حوالي 25 عضو.. ونشر الوثائق على الجروب لدعم وجهة نظره عن نتائج الحرب الروسية الأوكرانية.. وبعدها بدأت الوثائق يتم تسريبها إلى منتدى 4chan ومجموعات تليجرام.
تم تصنيف التسريب كأسوأ خرق للأمن القومي الأمريكي خلال آخر 10 سنوات.

شركة Western Digital مطلوب منها فدية من 8 أرقام 💲💲💲
شركة Western Digital الشهيرة في مجال صناعة الهاردوير اتعرضت لاختراق في بداية الشهر نتج عنه سرقة 10 تيرابايت من بيانات الشركة.
البيانات بتضم شهادات توقيع رقمية، بيانات شخصية لكبار الموظفين في الشركة.. بالإضافة لبيانات ضخمة تم سرقتها من البنية التحتية للشركة.
الهاكرز حاليا ما زالوا داخل نظام وشبكات الشركة.. وحاليا بيحاولوا يتفاوضوا معاها للحصول على فدية للخروج من الشبكة وعدم تسريب البيانات المسروقة!
الهاكرز طالبين من الشركة فدية من 8 أرقام 💲💲💲

قتل 5 بطلقة واحدة CS:GO 😲😲😲

تويتر دلوقتي بيسمح للمستخدمين إنهم يحصلوا على أرباح مقابل مشاركة المحتوى على تويتر 💲💲💲
المستخدمين يقدروا يشاركوا محتوى نصي مطوّل أو مقاطع فيديو مدتها ساعات.. والمحتوى ده بيكون حصري للمشتركين فقط.. حاجة شبه ميزة الانتساب في يوتيوب.
تويتر مش هياخد نسبة من أرباح صنّاع المحتوى في أول 12 شهر.