شركة جوجل تخطط لتسريح 12 ألف موظف.
شركة أمازون تخطط لتسريح 18 ألف موظف.
شركة مايكروسوفت تخطط لتسريح 11 ألف موظف.
ده بخلاف تسريح شركات التقنية أكثر من 60 ألف موظف في 2022.
ده للأسف الوضع حاليا في مجموعة من أكبر الشركات على مستوى العالم، ومؤشر على الوضع الاقتصادي الحالي وفي المستقبل القريب.

شركة مايكروسوفت قررت وقف بيع ترخيص نظام ويندوز 10 بشكل رسمي بنهاية الشهر الحالي.
هيتم وقف الدعم نهائيا عن ويندوز 10 بتاريخ 14 أكتوبر 2025 🪦

شركة جوجل بتحضر للإعلان عن أكثر من 20 أداة ذكاء اصطناعي من ضمنهم شات بوت منافس لأداة ChatGPT 🤖
الشهرة الكبيرة اللي اكتسبتها أداة ChatGPT من وقت إطلاقها أدت لشعور جوجل بالخطر لدرجة تدخل مؤسسي الشركة لاري بايج وسيرجي برين بعد ما تركوا مناصبهم في 2019، واجتماعهم مع المديرين التنفيذيين في الشركة لمناقشة خططهم لمواجهة خطر أداة ChatGPT.
جوجل بتحضر لطرح منتجات AI أبرزها:
تطبيق لإنشاء وتعديل الصور (منافس MidJourney)
تطبيق لإنشاء الأكواد البرمجية (منافس Copilot)
أداة شات بوت مخصصة للبحث مع إمكانية دمجها مع محرك جوجل (منافسة ChatGPT)
منصة للمساعدة في برمجة تطبيقات الموبايل اسمها Colab
_____________
المنافسة القوية على تطوير تقنيات الذكاء الاصطناعي بالسرعة دي هتكون في مصلحة المستخدم أو هتسود عيشته لسه مش متأكد..

موبايل آيفون 4 انفجر أثناء عملية شحنه !!!
لا تعليق على جودة منتجات آبل !!

لما تشغل كراك على الكمبيوتر وتلاقي شكل الملفات اتغير وبطلت تفتح..

في تجربة بحثية أداة ChatGPT نجحت في اجتياز امتحان الترخيص الطبي الأمريكي USMLE 🙂
الطالب العادي بيحتاج حوالي 4 سنين دراسة + سنتين تدريب سريري عشان يقدر يجتاز الاختبار المكون من 3 أقسام.
حسب الباحثين فالأداة نجحت في الاختبار بدون تدريب مسبق، وأظهرت مستوى عالي من دقة الإجابات والتفسيرات على الأسئلة.

شركة مايكروسوفت أعلنت بشكل رسمي عن اتفاقها مع شركة OpenAI لاستثمار جديد تم تقديره بحوالي 10 مليار دولار.
مايكروسوفت مش هتقدم دعم مالي فقط لشركة OpenAI، ولكن هتوفرها حواسيب عملاقة بالإضافة إلى وصول غير محدود لخدماتها السحابية Azure، وده شيء مهم جدا لأن كل ما حجم مواد الحوسبة السحابية المتوفرة أكبر؛ كل ما زادت قدرة الذكاء الاصطناعي على معالجة بيانات بأحجام أكبر واستخدام نماذج AI أكثر تعقيدا.
مايكروسوفت بتخطط لدمج تقنيات OpenAI مع عدد كبير من خدماتها بداية من محرك البحث Bing لمنافسة محرك جوجل، بالإضافة لتوفير وصول مباشر للتقنية لعملاء خدماتها السحابية Azure للتفوق على الخدمات السحابية لأمازون وجوجل، وممكن نشوف تقنيات الذكاء الاصطناعي الخاصة بشركة OpenAI قريبا متوفرة في حزمة البرامج المكتبية لمايكروسوفت Microsoft 365 لتوفير سرعة أكبر وجودة أفضل في إنشاء المحتوى وتنظيمه على الوورد والباوربوينت وغيرها من الأدوات.

يوم 20 يناير شركة Riot Games أعلنت إنها تعرضت لحادثة اختراق وتم سرقة الكود المصدري للعبة League of Legends بالإضافة لمحرك Packman المكافح للغش.
الهاكرز تواصلوا مع الشركة وطلبوا فدية 10 مليون دولار لمنع تسريب الكود، لكن الشركة رفضت.
الهاكرز امبارح عرضوا كود اللعبة والمحرك في مزاد يبدأ من 1 مليون دولار.
سرقة الكود المصدري للعبة هيؤدي إلى تطوير طرق مختلفة للغش في اللعبة غير قابلة للاكتشاف من المحرك، ده غير طبعا إمكانية اكتشاف ثغرات أمنية RCE وتنفيذها عن بعد لاختراق أجهزة اللاعبين.

شركة آبل أصدرت تحديث أمني لنظام iOS إصدار 12.5.7 اللي لسه بيشغل بعض الأجهزة القديمة لترقيع بعض الثغرات الأمنية في النظام.
لو معاك آيفون بيشتغل بنفس الإصدار حدث نظام جهازك.
أقدم جهاز وصله التحديث كان آيفون 5S اللي صدر عام 2013.

وزارة العدل الأمريكية بالإضافة إلى 8 ولايات رفعوا قضية ضد شركة جوجل بسبب احتكارها لسوق الإعلانات.
شركة جوجل باختصار بتسيطر على النسبة الأكبر من المعلنين والناشرين. بمعنى أي شخص محتاج يشتري إعلان أون لاين غالبا هيستخدم إعلانات جوجل "Google Ads" لأنها بتوفرله عرض الإعلانات على:
محرك جوجل
قنوات اليوتيوب
تطبيقات الموبايل
معظم مواقع الويب
وأي شخص محتاج يحصل على دخل من قناته أو موقعه أو تطبيقه بيستخدم منصة جوجل أدسنس Adsesne نظرا لامتلاك جوجل أكبر قدر من المعلنين.
بالطريقة دي جوجل محتكرة جزء كبير من سوق الإعلانات على مستوى العالم، وبتستخدم أي طرق متاحة لمنع أي منافس ليها.
الاحتكار ده مساعد جوجل على تحقيق أرباح ضخمة لأنها بتخلي المعلن يدفع تكلفة أعلى للإعلان، والناشر بيحصل على عائد أقل من عرض الإعلانات على محتواه لأن مفيش منافسة. (جوجل بتاخد حصة 32% من أرباح الناشرين).
وزارة العدل بتطالب في القضية بإجبار جوجل على تفكيك احتكارها للسوق عبر بيع منصاتها الإعلانية.
دي خامس قضية في آخر 3 سنين من الحكومة الأمريكية ضد جوجل بسبب ممارساتها الاحتكارية.

ميزة تقسيم النافذة قادمة لمتصفح Edge.
الميزة هتسمحلك بفتح تبويبين والانتقال بينهم بسهولة، بحيث تقدر تتابع أكتر من موقع في نفس الوقت.
المميزات اللي بيقدمها متصفح Edge تخليه يتفوق بمسافة على كروم ومعظم المتصفحات الحالية.

الولايات المتحدة وقعت اتفاق رسمي مع هولندا واليابان لحظر تصدير آلات صناعة الرقائق المتقدمة للصين.
أمريكا بتعمل أقصى جهد ممكن لمنع امتلاك الصين قدرات لصناعة شرائح متطورة محليا، كان آخرها حظر المهندسين الأمريكان من العمل في شركات صينية، وتهديدهم بسحب الجنسية.
امبارح في اتفاق لم يتم الإعلان عنه نجحت أمريكا في الاتفاق رسميا مع هولندا واليابان لمنع شركات ASML - Nikon - Tokyo Electron من تصدير الآلات اللي بيصنعوها للصين.
الشركات دي بتمتلك أعلى تقنية تم التوصل إليها في مجال أشباه الموصلات، خصوصا شركة ASML الهولندية اللي بتمتلك الآلة الأكثر تطورا في مجال صناعة الرقائق المتطورة بتقنية الليثوجرافيا فوق البنفسجية الفائقة.

ثغرة Wi-Fi Protected Setup أو ما يُعرف بـ WPS 📶
واحدة من معايير الاتصال بالشبكة اللي تم إنشائها من أجل تسهيل عملية الاتصال بالواي فاي بدون حاجة إلى باسورد، ولكن باستخدام كود مكون من 8 أرقام فقط.
محاولة تخمين كود مكون من 8 أرقام تعني أن هناك 100 مليون احتمال، وهذا يجعل الأمر صعب جدا، لكن آلية تحقق الراوتر السيئة من صحة الكود عبر التحقق أولا من صحة أول 4 أرقام يقلل عدد الاحتمالات إلى 11 ألف احتمال فقط !
عدد الاحتمالات القليل يجعل هذا الكود سهل جدا للاختراق ببعض الأدوات الآلية 🤖
بالرغم من وجود بعض أجهزة الراوتر التي لديها آلية للكشف عن محاولات الاتصال بالشبكة عبر ثغرة WPS، لكن الأفضل هو إغلاق هذه الميزة بالكامل لحماية شبكة الواي فاي ❌
في هذا المقال مزيد من المعلومات عن بروتوكول WPS وكيفية إغلاقه بسهولة من صفحة إعدادات الراوتر 👇
https://bit.ly/3jZIGbf

الشهر ده شركة Bitdefender نشرت أداة لفك تشفير فيروس الفدية MegaCortex واستعادة الملفات المشفرة.
لو سبق واتعرضت لفيروس فدية وملفاتك اتشفرت بفيروس غير موجود أدوات لفك تشفيره وكان عندك ملفات مهمة.. احتفظ بيها على هارد خارجي لأن الشركات باستمرار بينشروا أدوات لفك تشفير بعض أنواع فيروسات الفدية.
طريقة فك التشفير إما بتكون من خلال القبض على المسئولين عن الفيروس وإيجاد مفاتيح التشفير الخاصة بالفيروس، أو من خلال إيجاد ثغرة في طريقة التشفير المستخدمة.

ما هو الباد سيكتور Bad Sector؟
الباد سيكتور أو القطاع التالف هي مشكلة تحدث في وسائط التخزين بجميع أنواعها، وهي أكثر شيوعا في الأقراص الصلبة.. وينتج عنها التوقف استخدام هذا القطاع في قراءة أو كتابة البيانات.
القطاع هو أصغر وحدة للتخزين، وغالبا ما يكون حجم القطاع الواحد 4 كيلوبايت. قد يتعرض القطاع للتلف لعدة أسباب منها:
▪️ تعرض الهارد للصدمات
▪️ الانقطاع المفاجئ للتيار الكهربائي
▪️ زيادة شدة التيار بشكل غير طبيعي
▪️ ارتفاع كبير في درجة حرارة الهارد
▪️ يكون القطاع تالفا بسبب مشكلة في التصنيع
▪️ مشكلة على مستوى السوفتوير مثل وجود فيروسات
▪️ انتهاء العمر الافتراضي للقطاع وغيرها من الأسباب
➖➖➖➖➖➖➖➖➖➖➖➖➖➖➖
في حالة تلف مجموعة كبيرة من القطاعات؛ قد يفشل الكمبيوتر في الوصول إلى الملفات المخزنة عليها وقراءة البيانات منها.. وفي حالة انتشار هذه المشكلة قد يتوقف الهارد عن العمل بشكل كامل.
فقدان البيانات تعتبر من أسوء المشاكل التي قد يؤدي إليها تلف قطاعات الهارد، خصوصا في حالة تلف عدد ضخم منها.
القطاع التالف على مستوى الهاردوير (يعني تضرر مساحة القطاع على الهارد بسبب صدمة أو مشاكل في التيار أو عيب صناعة) لا يمكن إصلاحها.
على العكس؛ يمكن إصلاح القطاعات التالفة على مستوى السوفتوير، والتي قد تحدث بسبب انقطاع مفاجئ في التيار أو وجود فيروسات أو حدوث مشكلة في الفيرموير أدت إلى تحديد القطاع على أنه قطاع تالف.
➖➖➖➖➖➖➖➖➖➖➖➖➖➖➖
يمكنكم مراجعة هذا المقال لمزيد من المعلومات عن مشكلة الباد سيكتورز وأسباب حدوثها وأنواعها، وكيفية فحص الهارد الخاص بك للتأكد من عدم وجود قطاعات تالفة به، وكيف تقوم بإصلاح الباد سيكتورز في حالة وجودها 👇
https://bit.ly/3DgqIyO

الأسبوع ده قوة أمنية مشتركة من عدة دول أعلنت عن اختراقها لجروب الهاكرز المعروف باسم Hive ومصادرة الموقع الخاص بيهم على الدارك ويب.
فريق Hive كان واحد من أكتر مجموعات الهاكرز النشطة في مجال استهداف الشركات والمؤسسات بفيروسات الفدية، وخلال سنتين من ظهورهم نجحوا في جمع أكتر من 130 مليون دولار من 1500 ضحية في 80 دولة ما بين شركات تجارية وبنوك ومستشفيات ومؤسسات تعليمية.
القوة الأمنية المشتركة نجحت في اختراق موقع Hive والحصول على مفتاح فك التشفير، لكنها لم تنجح في القبض على أي عضو من أعضاء الفريق.

اليومين اللي فاتوا انتشرت مقاطع صوتية لعدد كبير من المشاهير بيتكلموا فيها بشكل عنصري وبيوجهوا إساءات وتشجيع على العنف.
المقاطع الصوتية دي انتشرت بفضل أداة الذكاء الاصطناعي الخاصة بشركة ElevenLab واللي بتسمح بنسخ أي صوت واستخدام محتوى مكتوب لإنشاء تسجيل بنفس الصوت بدقة لا يمكن للبشر تمييزها.
الشركة حاليا بتفكر تطلب توثيق الهوية KYC من أي شخص عايز يستخدم الميزة بعد ما تم إساءة استخدامها.
كدة الحمد لله بقى عندنا أدوات مجانية متاحة لتزييف الصور والصوت والفيديو.
أي حاجة تشوفها على الإنترنت بعد كدة اوعى تصدقها 😂

شركة OpenAI عملت أداة اسمها AI Classifier بتقدر تحدد إذا كان النص مكتوب بواسطة إنسان أو أداة ذكاء اصطناعي.
الأداة مش بتقدر تحدد الفرق بدقة إذا كان النص أقل من 1000 حرف، أو إذا تم التعديل على نص مكتوب باستخدام أداة AI لكن تم التعديل عليه بواسطة بشر.
اللي بيعمل التاسكات والأبحاث بـ ChatGPT يخلي باله بقى 😅

من أكتر البرامج المزعجة اللي كتير بيستخدمها برنامج التحميل المشهور إنترنت داونلود مانجر IDM واللي ناس كتير بتعتمد عليها في التحميل من الإنترنت 👨‍💻
طبعا مشكلة البرنامج إنه مش مجاني وبالتالي الناس بتفضل تدور على كراك عشان تفعل البرنامج وجهازها يتملى فيروسات ☠️
تقدر تستغنى تماما عن البرنامج ده وتستخدم برنامج مجاني بسيط جدا لكن بنفس إمكانيات IDM وأفضل كمان تقدر من خلاله تحمل أي ملف من الإنترنت، كمان تقدر تحمل تورنت بنفس البرنامج، ده غير إن البرنامج بيدعم اللغة العربية وليه إضافة تقدر تركبها على أي متصفح عشان تحمل منه زي IDM + إن البرنامج بيدعم تعدد مسارات التحميل وده بيساعده على توفير أعلى سرعة تحميل ممكنة ومميزات تانية كتير.
ده مقال بسيط عن البرنامج فيه شرح عملي لطريقة تنزيله واستخدامه في التحميل من النت بسهولة 👇
http://bit.ly/3YkGhwF

تطبيقات فيسبوك بتستنزف بطارية موبايلك بشكل متعمد ⛔️
في قضية رفعها عالم بيانات وموظف سابق في شركة ميتا اسمه George Hayward بسبب رفضه المشاركة في تجارب تسمى "Negative Testing".
تجارب الاختبار السلبي هي عملية بتقوم فيها الشركات باختبار بعض المميزات أو التعديلات الجديدة لتطبيقاتها بشكل سري على أجهزة المستخدمين بدون موافقتهم.
التجارب دي ممكن تؤدي لمشاكل على أجهزة المستخدمين زي استنزاف البطارية لغاية 0%.
جورج لما اعترض على المشاركة في عمليات الاختبار السلبي لأنها ممكن مؤذية، المدير قاله إن احنا بنؤذي قلة لصالح العدد الأكبر من المستخدمين !!
القصة دي منتشرة بقالها 5 أيام، وكنت مستني الشركة تصدر نفي ولا حاجة قبل ما اكتب عنها، لكن يبدو إن الكلام صحيح.
أنا نصحت الناس كتير تمسح تطبيقات فيسبوك من موبايلها بسبب التجسس وسرقة البيانات اللي بيعملوها. لو الموضوع ده مش فارق معاك دلوقتي التطبيقات دي هتجيب أجل بطارية الموبايل.