شركة ميتا أعلنت عن إضافة ميزة الاتصال بخدمة واتساب عبر بروكسي، ودي ميزة بتساعد على استخدام التطبيق حتى في حالة الحجب.
بالمناسبة الميزة دي موجودة في التليجرام من أيام ما الدولار كان بـ4 جنيه..

سيارة تيسلا مفعل عليها نظام Autopilot وقفت مرة واحدة على طريق سريع واتسببت في اصطدام 8 سيارات وإصابة 9 أشخاص.
خلال العام الماضي في أمريكا حصلت 329 حادثة سيارة بتستخدم نظام مساعدة أو قيادة ذاتية.. منهم 273 حادثة لسيارات Tesla فقط!

شركة Entop الأفغانية كشفت عن أول نسخة أولية من سيارة رياضية محلية الصنع.
العمل على سيارة (مدى 9) استغرق 5 سنوات من فريق مكون من 30 مهندس في معهد أفغانستان التقني المهني ATVI.
مواصفات السيارة الكاملة غير معروفة حتى الآن، لكنها بتستخدم محرك تويوتا كورولا معدّل، وبتعتمد على البنزين مع إمكانية التطوير لاستخدام المحركات الكهربائية، وبتعتمد على كاميرات وشاشات LCD بدلا من المرايا الجانبية.

أحد الدارسين في جامعة برنستون نجح في تطوير أداة تقدر تكتشف لو كان نص ما مكتوب بواسطة إنسان أو بواسطة الذكاء الاصطناعي.
الانتشار الواسع اللي حققته أداة ChatGPT سبب حالة من القلق على مستقبل الفروض والمهام اللي المفروض الطلبة يقدموها بسبب سهولة الاعتماد على أدوات زي ChatGPT لإتمامها.
أداة GPTZero بتقدر تكتشف النص البشري من النص الآلي من خلال Perplexity & Burstiness ودي مقاييس في علم الإحصاء والاحتمالات بتعتمد عليها الأداة لقياس أمور معينة بتميز النص البشري زي التباين في النص ما بين البساطة والتعقيد في الكتابة، على عكس النص الآلي اللي بيتسم بأسلوب ثابت واضح في الكتابة بتميل إلى عدم التعقيد.
الأداة حاليا متاحة بشكل مجاني، وما زالت تحت التطوير.

ليه لما بتنسخ ملف على الكمبيوتر عملية النسخ بتبدأ سريعة وبعد كدة سرعتها بتقل؟
كل وسيط تخزين بيكون فيه ذاكرة كاش Cache أو Disk Buffer. الذاكرة دي ذاكرة مؤقتة، وبتكون سرعتها في التعامل مع البيانات أعلى بكتير من سرعة وسيط التخزين نفسه، ولأن ذاكرة الكاش دي بتكون مكلفة فحجمها بيكون صغير مقارنة بحجم وسيط التخزين نفسه. غالبا بتكون مساحة الكاش من 8 ميجا إلى 1 جيجا.. وفي وسيط SSD ممكن توصل إلى 4 جيجا بايت أو أعلى.
لما بتنقل ملف للوسيط أول حاجة بتحصل إن بيانات الملف بتروح على ذاكرة الكاش. لو الملف حجمه أصغر من الكاش بتنتهي عملية النقل بسرعة، وبعد كدة البيانات دي بتتنقل من ذاكرة الكاش إلى وسيط التخزين عشان تفضي المساحة، والعملية التانية دي بتحصل في الخلفية من غير ما تشوفها، وبتحصل بعد ما عملية النسخ تنتهي.

لو كان الملف حجمه أكبر من حجم ذاكرة الكاش اللي بيحصل هو اللي في الصورة ده.. بتبدأ عملية النسخ سريعة لغاية ما تمتلئ ذاكرة الكاش نظرا لسرعتها، بعد كدة بتبدأ السرعة تقل وتوصل لسرعة الوسيط نفسه، لأن اللي بيحصل إن البيانات الموجودة في ذاكرة الكاش بالفعل بتنتقل إلى ذاكرة الوسيط حسب سرعته هو مش سرعة الكاش، ولما ذاكرة الكاش بيفضى منها مساحة بتدخل ليها البيانات الجديدة، وطبعا عملية النقل دي هتعتمد على مدى سرعة كتابة البيانات الخاصة بالوسيط نفسه بغض النظر عن سرعة الكاش.

أكثر 10 كلمات مرور استخداما في عام 2022 حسب بحث لموقع NordPass.
تخمين معظمهم يستغرق ثانية واحدة فقط 🙂

دي الخطوات التجريبية لنظام الفاتورة الإلكترونية!
تخيل نفسك بتعمل الفليم الهندي ده في كل حاجة بتشتريها 🙂

ما هو الـRDP؟
كلمة RDP هي اختصار لمصطلح Remote Desktop Protocol، وهي تقنية طورتها شركة مايكروسوفت من أجل توفير بيئة اتصال آمنة بين الحواسيب، يمكن من خلالها الوصول إلى أي جهاز عن بعد للمساعدة في حل مشكلة معينة طرأت على الجهاز بدون حاجة إلى التواجد الفعلي.
لكن هذه التقنية أيضًا تم تطويرها لتوفير موارد حوسبية هائلة بتكلفة رخيصة، وسرعة اتصال بالإنترنت تصل إلى 1 جيجابت في الثانية الواحدة كما بالصورة 👇
تستخدم هذه التقنية في الكثير من المجالات أبرزها رفع الملفات لمواقع التحميل أو مواقع التخزين السحابي نظرًا لسرعة الإنترنت الهائلة والباندويدث الغير محدود.
يمكن استخدام هذه الأجهزة أيضًا في عمليات اختبار الاختراق واستضافة المواقع وتشغيل الأدوات الآلية وغيرها من الاستخدامات.
تعرف أكثر على تقنية الـRDP وما الفرق بينها وبين الـVPS؟ وما أبرز مميزاتها وعيوبها؟ وما هي أسعار هذه الخدمة؟ وكيف يمكنك امتلاك RDP من المقال التالي 👇
https://bit.ly/3GiKcCd

النهاردة مجموعة من الفنانين رفعوا قضية ضد 3 شركات مسئولة عن تطوير أدوات لإنشاء الصور بالذكاء الاصطناعي، وهي شركات Stability AI مطورة أداة Stable Diffusion، وشركة Midjourney المطورة لأداة Midjourney، وشركة DeviantArt المطورة لأداة DreamUp.
القضية بتدرو بشكل رئيسي عن المادة اللي الشركات الثلاثة استخدمتها لتدريب الذكاء الاصطناعي على توليد الصور، وإن الشركات دي حصلت على مليارات الصور من خلال الزحف على الويب لتدريب أدواتها بدون ما تحصل على رخصة استخدام من الفنانين أصحاب المحتوى.
من ناحية تانية نفس المحامين المسئولين عن القضية دي بيقاضوا شركات OpenAI، مايكروسوفت وGithub لسبب مشابه، وهو استخدام الأكواد مفتوحة المصدر على Github لتدريب أداة CoPilot المملوكة لمايكروسوفت واللي هي حاليا أصبحت أداة مدفوعة بتتربح منها الشركة.
موضوع أدوات الذكاء الاصطناعي والمواد اللي تم استخدامها في تدريبه هيحصل بسببها مشاكل كتير الفترة الجاية.. خصوصا إن معظم الأدوات دي هتتحول أو اتحولت بالفعل للربحية، ونظرا لدرجة تعقيد المشكلة احتمال نشوف قضايا تستمر لأكتر من 10 سنين بشكل مشابه لقضية جوجل مع أوراكل.

شركة مايكروسوفت بتخطط لتسريح 11 ألف موظف الأسبوع الحالي (حوالي 5% من إجمالي موظفي الشركة).
قرار التسريح هيتم اتخاذه في وقت مايكروسوفت بتتفاوض فيه مع شركة OpenAI لاستثمار 10 مليار دولار في تقنيات الذكاء الاصطناعي.

شركة مايكروسوفت شغالة على أداة ذكاء اصطناعي اسمها VALL-E هتقدر تنسخ أصوات البشر من مقاطع صوتية مدتها 3 ثواني فقط.
الأداة تم تدريبها على 60 ألف ساعة من المحتوى الصوتي لسبعة آلاف شخص، وهتكون قادرة على تقليد أصوات البشر وإنشاء محتوى بأصواتهم.
مطوري الأداة قالوا إنها حاليا بتتفوق بفارق شاسع عن أقرب الأدوات في المجال من ناحية دقة التقليد والأداء بشكل طبيعي.

إيلون ماسك باع عفش تويتر!
امبارح انتهى مزاد لبيع مجموعة كبيرة من أدوات المكتب والمطبخ والإلكترونيات خاصة بموقع تويتر بعد بيع كل المعروض.
ما زالت الشركة بتعاني على المستوى المالي بشكل واضح بعد عملية البيع اللي تمت، بل والوضع بقى أسوء بسبب توقف شركات كبيرة عن الإعلان على تويتر.
بعد محاولات كتير لتحسين الوضع المالي من خلال فصل عدد ضخم من الموظفين وبيع علامة التوثيق مقابل 8$ شهريا والضغط على الموظفين الموجودين حاليا للعمل لساعات أطول لتعويض عمليات التسريح ما زال الوضع المالي سيء.
أحدث خطوات عملتها الشركة للحصول على أموال في أسرع وقت كانت بيع علامة التوثيق باشتراك سنوي مقابل 84$ بدلا من 96$ وبيع جزء من أصول الشركة في مزاد عام.
الشركة كمان توقفت عن دفع الإيجار لبعض مقراتها الرئيسية وحاليا عليها قواضي من الملاك!

الدين العام في أمريكا وصل النهاردة للسقف بتاعه (31.4 تريليون دولار)!
سقف الدين الأمريكي ده كان لسه مرفوع بمقدار 2.5 تريليون دولار قبل سنتين فقط في 2021.
الأيام الجاية هنشوف خناقة لطيفة بين الحكومة الديموقراطية اللي هتطلب رفع سقف الدين عشان تستمر في الاقتراض وتسيير أعمالها وبين مجلس النواب الجمهوري اللي مش هيوافق على الرفع إلا بعد تخفيض الإنفاق السفيه للحكومة والمليارات اللي عمالة تبعزقها يمين وشمال.
في حالة عدم الوصول لاتفاق هيحصل إغلاق حكومي زي اللي حصل في عهد ترامب 2019.. وده هيكون تأثيره سيء جدا على الاقتصاد العالمي.
المهم في الآخر هيرفعوا سقف الدين والحكومة تستمر في الاقتراض ويطبعوا دولارات بالطن زي ما هما عايزين وبعد كدة يوصلوا للسقف فيرفعوه ويقترضوا ويطبعوا دولارات بالطن ودوخيني يا لمونة..

شركة جوجل تخطط لتسريح 12 ألف موظف.
شركة أمازون تخطط لتسريح 18 ألف موظف.
شركة مايكروسوفت تخطط لتسريح 11 ألف موظف.
ده بخلاف تسريح شركات التقنية أكثر من 60 ألف موظف في 2022.
ده للأسف الوضع حاليا في مجموعة من أكبر الشركات على مستوى العالم، ومؤشر على الوضع الاقتصادي الحالي وفي المستقبل القريب.

شركة مايكروسوفت قررت وقف بيع ترخيص نظام ويندوز 10 بشكل رسمي بنهاية الشهر الحالي.
هيتم وقف الدعم نهائيا عن ويندوز 10 بتاريخ 14 أكتوبر 2025 🪦

شركة جوجل بتحضر للإعلان عن أكثر من 20 أداة ذكاء اصطناعي من ضمنهم شات بوت منافس لأداة ChatGPT 🤖
الشهرة الكبيرة اللي اكتسبتها أداة ChatGPT من وقت إطلاقها أدت لشعور جوجل بالخطر لدرجة تدخل مؤسسي الشركة لاري بايج وسيرجي برين بعد ما تركوا مناصبهم في 2019، واجتماعهم مع المديرين التنفيذيين في الشركة لمناقشة خططهم لمواجهة خطر أداة ChatGPT.
جوجل بتحضر لطرح منتجات AI أبرزها:
تطبيق لإنشاء وتعديل الصور (منافس MidJourney)
تطبيق لإنشاء الأكواد البرمجية (منافس Copilot)
أداة شات بوت مخصصة للبحث مع إمكانية دمجها مع محرك جوجل (منافسة ChatGPT)
منصة للمساعدة في برمجة تطبيقات الموبايل اسمها Colab
_____________
المنافسة القوية على تطوير تقنيات الذكاء الاصطناعي بالسرعة دي هتكون في مصلحة المستخدم أو هتسود عيشته لسه مش متأكد..

موبايل آيفون 4 انفجر أثناء عملية شحنه !!!
لا تعليق على جودة منتجات آبل !!

لما تشغل كراك على الكمبيوتر وتلاقي شكل الملفات اتغير وبطلت تفتح..

في تجربة بحثية أداة ChatGPT نجحت في اجتياز امتحان الترخيص الطبي الأمريكي USMLE 🙂
الطالب العادي بيحتاج حوالي 4 سنين دراسة + سنتين تدريب سريري عشان يقدر يجتاز الاختبار المكون من 3 أقسام.
حسب الباحثين فالأداة نجحت في الاختبار بدون تدريب مسبق، وأظهرت مستوى عالي من دقة الإجابات والتفسيرات على الأسئلة.