عملت النهاردة حساب على ChatGPT بطريقة سهلة وبستخدمه حاليا بدون VPN ❌
إن شاء الله هتأكد من عدم وجود مشاكل في الطريقة اللي استخدمتها وهعملها شرح.
لو مهتم اعمل كومنت عشان يوصلك الشرح لم أحدّث البوست إن شاء الله.
__________________________
تحديث: تم النشر ✅
شرح أسهل طريقة لإنشاء حساب على ChatGPT من أي دولة 👇
https://bit.ly/3GtvQk5

شرح أسهل طريقة لإنشاء حساب على ChatGPT من أي دولة 👇
https://bit.ly/3GtvQk5

شركة آبل بتجهز معالج الآيفون القادم A17 Bionic لحل مشكلة استهلاك البطارية.
حسب التقارير الأخيرة فالمعالج المتوقع يتم استخدامه في آيفون 15 هيعتمد على دقة تصنيع 3 نانومتر من إنتاج شركة TSMC.. وده هيسمحله بتقديم أداء أفضل بنسبة تصل إلى 35% من ناحية استهلاك البطارية، وفي نفس الوقت هيكون قادر على توفير أداء أفضل من الجيل السابق.

الشهر ده الحكومة الزيمبابوية فرضت حظر تصدير على الليثيوم الخام وطلبت من الشركات بناء مصانع عندها لمعالجة الليثيوم لتحقيق استفادة أكبر من أحد أهم ثرواتها، بالإضافة لمكافحة عمليات التهريب اللي بتحصل واللي خسرت بسببها 1.8 مليار دولار حسب تصريحات حكومية.
الليثيوم واحد من أهم العناصر الأرضية اللي بتدخل في صناعات كتير تكنولوجية وغير تكنولوجية.. ومع الانتشار اللي حصل لفكرة السيارات الكهربائية وزيادة عدد الشركات المهتمة بالصناعة ارتفعت قيمة العنصر بشكل ضخم لأنه أهم مكونات البطاريات الكهربائية.
زيمبابوي تعتبر سادس أكبر دولة مصدّرة لليثيوم في العالم والأولى على مستوى إفريقيا.
فكرة حظر التصدير والطلب من الشركات بناء إنفاق ملايين الدولارات لبناء مصانع لاستغلال أفضل لثروة قومية بدلا من تصديره خام فكرة ممتازة وإن كانت صعبة التنفيذ، خصوصا إن تشيلي -أكبر مصدّر ليثيوم في العالم- حاولت تنفذ فكرة مشابهة وفشلت.
الشركات والتكتلات العملاقة صعب توافق على إنفاق ملايين الدولارت وتأخير حوالي 3 سنين لبناء المصانع قبل ما تقدر تستورد العنصر.. واحتمال قريبا نسمع عن تحرك عسكري ولا انقلاب مدبر لإنقاذ حقوق الإنسان الزمبوئية.

بمناسبة الحديث عن ChatGPT وأدوات الذكاء الاصطناعي اللي بتستخدم لكتابة الأكواد البرمجية زي أداة Copilot بتاعت موقع GitHub..
مجموعة باحثين من جامعة ستانفورد عملوا دراسة للموضوع ده واكتشفوا إن أكواد المبرمجين اللي بيستخدموا أدوات الذكاء الاصطناعي في البرمجة زي أداة Copilot عندهم مشاكل أمنية وثغرات في أكوادهم بنسبة أعلى من المبرمجين اللي مش بيعتمدوا على أدوات AI.
المضحك في الموضوع إن من خلال عمل مقابلة مع المبرمجين من كلا الطرفين كان المبرمجين اللي بيستخدموا مساعدة الذكاء الاصطناعي عندهم ثقة أكبر إن أكوادهم أفضل وأقل من ناحية الأخطاء والثغرات الأمنية من المبرمجين اللي مش بيستخدموا أدوات الذكاء الاصطناعي 🙂

مفتاح السيرفر الجديد:
ss://Y2hhY2hhMjAtaWV0Zi1wb2x5MTMwNTpzNUZZdXZ6QUtSODJMSXBwNHJPNVZ0@46.101.23.207:53852/?outline=1

شايفين المبنى اللي في الصورة ده 👇
المبنى ده عملته الإمارات باستخدام تقنية الطباعة ثلاثية الأبعاد، وهو مش مجرد نموذج شكلي زي ما ناس كتير هتفتكر؛ ده مبنى حقيقي زيه زي المباني اللي بتتعمل بالطوب والأسمنت، لكنه أرخص بكتير من حيث تكلفة مواد البناء والعمالة بنسبة تصل إلى 90%.
واحدة من أهم التقنيات اللي هنستخدمها في المستقبل القريب هي الطباعة ثلاثية الأبعاد واللي من خلالها نقدر حرفيا نطبع أي حاجة احنا عايزنها من أول ألعاب الأطفال إلى الاستخدامات الطبية زي صناعة الأعضاء والأدوية بل وحتى الصناعات الحربية.
لو عايز تعرف أكتر عن التقنية وازاي بتم عملية الطباعة وازاي هتأثر على مستقبلنا تقدر تقرأ أحدث مقال تم نشره على الموقع واللي شرحت فيه كل حاجة عن هذه التقنية العبقرية 👇
https://bit.ly/3eKUsUl

أصبح إيلون ماسك أول شخص في التاريخ يخسر 200 مليار دولار من ثروته 📉
انهيار سعر سهم شركة تيسلا كان العامل الأبرز في هذه الخسارة، حيث هبط سعر السهم بنسبة 74% من أعلى قمة له (414$) ليصل إلى 108$.
هبوط السهم أدى لهبوط ثروة ماسك من 340 مليار دولار إلى 137 مليار دولار فقط 🙂

تعمل إيه لو عندك شك إن موبايلك مخترق 🤔
في البوست ده إن شاء الله هتكلم عن الخطوات اللي لازم تعملها لو عندك شك إن في حد مخترق موبايلك.
ده مقال فيه أهم العلامات اللي ممكن من خلالها تعرف لو موبايلك مخترق 👇
https://bit.ly/37PfhMs
➖➖➖➖➖➖➖➖➖➖➖➖➖➖
⭕️ الحل الأفضل (للناس اللي خارباها)
- أفضل حل من وجهة نظري هو عمل سوفت للجهاز وفحص لجميع الملفات. الحل ده موجه للناس اللي عندها أكتر من علامة من علامات الاختراق اللي اتكلمت عنها أو الناس المهملة في استخدامها للموبايل وبيحملوا تطبيقات كتير من خارج المتجر. لازم تروح محل صيانة تطلب عمل سوفت للجهاز وتنقل أي ملفات من الجهاز لكارت خارجي وتعمل فحص للكارت بشكل منفصل. بعد ما يتم مسح الجهاز وعمل سوفت جديد وفحص للملفات تقدر تستخدم موبايلك بشكل طبيعي.
➖➖➖➖➖➖➖➖➖➖➖
⭕️ الحل التاني (لو عندك شك ضعيف أو مش عايز تعمل الحل الأول)
1️⃣ امسح أي تطبيقات نزلتها من خارج المتجر زي الواتساب الذهبي وخلافه.
2️⃣ نزل برامج أنتي فيرس واعمل فحص كامل.. أنا قولت برامج مش برنامج لأن الأفضل إنك تجرب أكتر من برنامج لأن كل واحد بيختلف في طريقة الفحص وقواعد البيانات بتاعته، هتلاقوا في الرابط ده مقال عن أفضل 5 تطبيقات نزل منهم على الأقل أول تلاتة وافحص موبايلك ولو فيه أي ملفات ضارة التطبيق هيحذفها تماما. https://bit.ly/39vcCr4
3️⃣ لو عندك مشكلة في المتصفح من المشاكل اللي اتكلمت عليها في البوست اللي فات امسح تطبيق المتصفح ونزله من جديد.
4️⃣ اتأكد إن كل التطبيقات اللي على الموبايل متحدثة بآخر تحديث خصوصا التطبيقات الهامة زي المتصفحات وتطبيقات المراسلة وخصوصا واتساب لو بتستخدمه.
5️⃣ امسح أي تطبيق تلاحظ إنه استهلاكه غير طبيعي للإنترنت أو للبطارية حتى لو كنت منزله من المتجر.
6️⃣ ممكن تختصر الخطوات اللي فاتت بإنك تعمل إعادة ضبط مصنع للموبايل.. لكن ساعتها هتفقد كل إعدادات الجهاز وكل بيانات الموبايل.
7️⃣ أخيرا راجع نسخة الأندرويد اللي بتستخدمها واتأكد إن موبايلك متحدث بآخر نسخة أندرويد شركة الموبايل وفرتها.

شركة مايكروسوفت بدأت بالعمل على إطلاق نسخة من محرك البحث الخاص بها Bing مدعومة بخدمة ChatGPT لمنافسة محرك جوجل.
الإصدار ده هيعتمد على توفير نوع جديد من البحث وهو توفير إجابات دقيقة ومباشرة للمستخدم بدل توفير روابط لمحتوى على مواقع الويب زي محركات البحث الحالية بما فيهم جوجل.
احتمال كبير نشوف أول إصدار من محرك Bing مدعوم بتقنيات ChatGPT في شهر مارس القادم.

مجموعة باحثين صينيين نشروا بحث عن نجاحهم في كسر خوارزمية التشفير الشهيرة RSA باستخدام حاسوب كمومي!
خوارزمية التشفير RSA (Rivest–Shamir–Adleman) واحدة من أشهر خوارزميات التشفير المستخدمة في الوقت الحالي، وبتعتمد عليها كتير من الخدمات الأونلاين اللي بتحتاج تشفير خصوصا الخدمات البنكية.
البحث ذكر إن كسر الخوارزمية تم على تشفير بقوة 48 بت باستخدام حاسوب كمومي بقوة 372 كيوبت (بت كمومي)، لكن الفريق البحثي لم يحاول توسيع التجربة ومحاولة كسر الخوارزمية على مستوى أعلى من 48 بت.
البحث عمل جدل كبير في مجال الأمن المعلوماتي وتعمية البيانات، لأن من كسر خوارزمية RSA تعتبر خطر غير مسبوق، وبعض الخبراء شككوا في صحة التجربة.
من المسلم به إن الحوسبة الكمومية في مرحلة ما في المستقبل هيكون عندها القدرة على كسر معظم إن لم يكن جميع وسائل التشفير المستخدمة حاليا، لكن لسه أمامنا سنين على ما التقنية توصل للمرحلة دي.
في نفس الوقت اللي الحوسبة الكمومية فيه بيتم تطويرها؛ بيتم تطوير تقنيات التشفير عشان تبقى مقاومة أو آمنة من الحواسيب الكمومية، وعندنا حاليا علوم تشفير زي Quantum-Proof & Quantum-Resistant بيتم تطويرها لتوفير تشفير آمن للمستقبل.

شركة Ant Group أعلنت عن تخلي مؤسسها الملياردير الصيني جاك ما عن سيطرته على الشركة، وإن هيتم عمل إعادة هيكلة للأسهم لسحب معظم حقوقه في التصويت على قراراتها.
أحدث عقاب يتعرض له جاك ما من الحزب الشيوعي الصيني بعد ما انتقد في 2020 بعض الإجراءات الاقتصادية اللي عملتها الحكومة، ومن وقتها أصبح مستهدف هو وشركاته.
بدأ العقاب الحكومي بإلغاء اكتتاب شركة Ant Group بقيمة 37 مليار دولار، واللي كان هيبقى أكبر اكتتاب في التاريخ، تبعه غرامات وتدقيق غير مسبوق في أداء شركاته بحجة مكافحة الاحتكار.. بعدها جاك اختفى لعدة شهور، ويقال إنه كان محبوس أو قيد الإقامة الجبرية، وبعدها خرج من الصين واتنقل بين عدة دول لغاية ما استقر في اليابان.
جاك كان بيمتلك +50% من حق التصويت في شركة Ant Group من خلال الأسهم اللي بيمتلكها مباشرة أو بتمتلكها شركات تابعة له، ودلوقتي فقد القدرة على التحكم في الشركة اللي أسسها!

ميزة الاتصال بالأقمار الاصطناعية قادمة إلى الأندرويد 🛰
عملاق أشباه الموصلات Qualcomm دخل في شراكة مع Iridium واحدة من الشركات الرائدة في مجال الاتصالات الساتلية لتوفير ميزة الاتصال بالأقمار الاصطناعية لهواتف الأندرويد بنهاية العام الحالي.
ميزة Snapdragon Satellite هتسمح بتوفير اتصال في حالة الوجود في مكان منعدم التغطية، ودي بتكون حاجة مهمة جدا خصوصا في حالات الطوارئ.
الميزة اللي متوفرة حاليا في الآيفون في بعض الدول بتسمح بإرسال الرسائل النصية فقط، لكن ما زال بيتم العمل على تطويرها للسماح بإرسال ملفات الميديا، وإن الخاصية تكون متاح للاستخدام العادي وليس للطوارئ فقط.
من المتوقع إن الميزة مش هتكون حصرية لشركة معينة، ولكنها هتكون حصرية على فئات الفلاج شيب الخاصة بكل شركة من شركات الأندرويد؛ على الأقل في البداية.

يومين فقط على وقف الدعم بشكل كامل عن ويندوز 8.1 🪦

زي النهاردة من 16 سنة (9 يناير 2007) قدم ستيف جوبز المدير التنفيذي السابق لشركة آبل أول هاتف أيفون.
الموبايل اللي أحدث ثورة في عالم الهواتف الجوالة نجح في تحقيق 6.1 مليون مبيعة من الإصدار الأول، ووصلت مبيعات الآيفون منذ إطلاقه بمختلف الإصدارات إلى 2 مليار آيفون وأكتر من 800 مليون مستخدم حول العالم.

اللجنة الوطنية للمعلومات والحريات في فرنسا غرمت شركة آبل 8.5 مليون دولار بسبب جمعها بيانات مستخدمي الآيفون لأغراض إعلانية بدون الحصول على موافقة منهم!

لماذا عليك أن تتعلم لغة Go؟
لغة جو هي لغة برمجة مفتوحة المصدر من تطوير شركة جوجل، وتعد واحدة من أهم لغات البرمجة الموجودة في الوقت الحالي.
تجمع هذه اللغة بين سهولة البنية البرمجية وكتابة الأكواد مثل بايثون؛ لكن في نفس الوقت تتفوق عليها في سرعة التنفيذ لتضاهي لغات السي والسي بلس بلس.
لغة جو أيضًا من اللغات متعددة الأغراض. فيمكن استخدامها في مجالات:
▪️ الروبوتكس
▪️ علوم البيانات
▪️ الحوسبة السحابية
▪️ تطوير ألعاب الفيديو
▪️ تطوير تطبيقات الويب
▪️تطوير تطبيقات الذكاء الاصطناعي
تعرف أكثر على لغة جو ومميزاتها ومجالات استخدامها، وأفضل مصادر عربية متوفرة لتعلمها 👇
https://bit.ly/3N0sIg5

شركة مايكروسوفت قدمت عرض للاستحواذ على 49% من أسهم شركة OpenAI المطورة لخدمة ChatGPT مقابل 10 مليار دولار.
مايكروسوفت سبق واستثمرت مليار دولار في OpenAI في 2019، ويبدو إن بعد النجاح الضخم اللي حققته أداة ChatGPT دفعت مايكروسوفت للتخطيط لدمج الخدمة مع بعض منتجاتها زي محرك البحث Bing لمنافسة جوجل، بالإضافة لحزمة البرامج المكتبية "Microsoft Office".
عرض مايكروسوفت تضمن شرط الحصول على 75% من أرباح OpenAI حتى استعادة قيمة الاستثمار، لما تبدأ الشركة في تحقيق أرباح من خدماتها.

المرحوم مفيش حد كان بيطيقه..