1⃣6⃣

رمضان آخر روقان 🎆🌜

تابع توصيات عملية

✅المعصية مش بتيجي من الصدفة

بل لها مقدمات وأسباب زي أي حاجة في الدنيا .. فلو عرفت تمنع الأسباب دي ، يبقى إنت كده قطعت الحبل اللى بيشد رجلك لها كل شوية ..
يعني خلّي بينك وبين المعصية :
"عزلة شعورية" و "عزلة جسدية"
يعني تبعد عن الحاجات اللي بتوقعك في المعصية، وكذلك الحاجات اللي حتى ممكن تفكرك بها وتثير مشاعرك لها ..
اقفل أي باب🚪 ممكن يوصلك للمعصية تمااااما .. وسد نقط ضعفك اللي إنت عارفها كويس أوي وحافظها كويس، ومع ذلك سايبها بتوقعك كل مرة .. وكل واحد طبيب نفسه دي أهم نقطة عملية في روشتة العلاج .
دي الدليل الأكيد إنك عايز تتوب بجد، مش كلام وخلاص ..


✅اشغل نفسك
الواحد نفسه يصرخ بأعلى صوته ويقول لكل
الشباب إن الفراغ الفكري والفراغ العملي هو سبب كل مصيبة !!
معادلة الهلاك :
فراغ + شيطان + نفس = مصايب وبلاوي سودا
ونفسك لو لم تشغلها بالطاعة ، فتأكد مليار % إنها هتوديك للمعصية !
فحاول تشغل نفسك بأي شئ مفيد في الدنيا!!


✅المعصية بتبدأ من فكرة صغنووووونة قد كده، سبتها إنت تسرح في دماغك لحد ما كبرت واتحولت لإرادة ثم فعل !
فـ قاوم الفكرة من بدايتها، وحاول تهرب منها وتلغيها بإنك تفكّر في حاجة تانية تعملها
◀️ولو معرفتش وسيطرت هي عليك ، يبقى تعمل هجوم مضاد عليها وتواجه الفكرة بواقعية، وتعمل موازنة ومقارنة بين مقدار لذة المعصية ومدتها وتكلفتها، والعواقب اللي هتجنيها بعدها في دنيتك وآخرتك ومقدار لذة الإقبال على الله ومدتها، والعواقب اللي هتفوز بيها في دنيتك وآخرتك، و تحكم عقلك وتختار بنفسك ساعتها .. وإنت سيد قرارك !

✅لما تبقى ناوي تعمل ذنب وعارف إن اللي بتعمله ده غلط وحرام وتقول هتوب بعدها وربنا هيغفرلي، اعرف وقتها إن ده من تزيين الشيطان علشان يخليك تعمل خطوة يسحب رجلك منها للمعصية، وبعدين يغرقك في بحورها لحد ما تدمنها وتعيش أسير وعبد لها !
وبعدين يودِّيك لمعصية تانية أكبر، وهكذا لحد ما تموت وإنت على معصية وسوء خاتمة في نهاية الأمر ! وهي دي خطته المحفوظة اللي ربنا حذرنا منها ومع ذلك محدش عايز يتعظ !


#يتبع غداً بإذن الله
#رمضان_آخر_روقان
#مصطفى_زايد
#افتح_لي_قلبك

https://bit.ly/3jlHlO7

1⃣7⃣

رمضان آخر روقان 🎆🌜

تابع توصيات عملية

✅لما توصل لمرحلة إنك خلاص مش قادر تقاوم وخلاص هتعمل المعصية، اركب تاكسي الزمن واطلع به للمستقبل، لقدام ساعتين من
عمرك، وشوف بعد المعصية إيه اللي حصل ؟؟ ولا أي شئ !!!
المعصية اتعملت واللذة انتهت ومبقاش غير الحسرة والذنب !! وبس!!
كل اللي إنت عملته كانت آخرته شهوة وعدت وانتهت من غير أي فايدة!!
وطالما الموضوع كده كلم نفسك وقولها
ببساطة هعتبر نفسي زي ما بعملها كل مرة وبتعدي وتنتهي ، كأني عملتها المرة دي وشبعت منها وعدت خلاص ..!

✅أول ما تقع في أي معصية اجري على التوبة .. أتبع السيئة الحسنة تمحها

زي ما ربنا عزوجل قال: ﴿ثُمَّ يَتُوبُونَ مِنْ قَرِيبٍ}
ف متستناش لحظة بعد الذنب .. متفكّرش كتير .. متروحش حتة، قوم فوراً، اتوضا أو اغتسل، وهات السجادة وصلي ركعتين توبة لله
واسجد وابكي.. اسجد لربك وقوله
"ياربي أذنبت .. وقعت غصب عني يارب .. وجايلك وأنا معترف وندمان وذليل .. رجعتلك يارب لأني عبدك الضعيف ومليش رب غيرك ..
وكلي أمل ويقين إنك هتقبلني وتتوب عليا وتغفر لي يا أرحم الراحمين "

✅على وضعك
اثبت على الطريق واوعى تفكر تسيب أي طاعة بسبب الذنوب اللي بتعملها .
واعرف إن فعلك للمعصية مش معناها إنك انتكست؛ لأن مصطلح الانتكاس معناه إنك سيبت الطريق خالص ورميت طوبة الموضوع !!
إنما الضعف والعودة للذنب معصية زي أي معصية ، هتتوب منها وبإذن الله هتقدر تبعد عنها في يوم ما..

#يتبع غداً بإذن الله
#رمضان_آخر_روقان
#مصطفى_زايد
#افتح_لي_قلبك

https://bit.ly/3jlHlO7

1⃣8⃣

رمضان آخر روقان 🎆🌜

تابع توصيات عملية

✅متجلدش نفسك .. متحطمش حياتك

طبيعي إنك ممكن تقعد فترة كويس جدا وبايمانيات عالية كمان، ولكن تقع بعدها في أي معصية
كل بني آدم خطاء.. كلنا بشر وبنغلط.. مفيش حد معصوم من الغلط....كل الناس بتغلط

ومش معنى الكلام إني بهوّن الموضوع أو بقولك إعمل اللي إنت عايزه، لأ طبعاً، المقصد هو إنك مش المطلوب منك إنك متغلطش، المطلوب إنك تجاهد نفسك على قد ما تقدر، ولو وقعت في أي وقت تقبل الواقع وتقوم بسرعة وتكمل طريقك ..

✅إيااااااااك واليأس

إياك والإحباط .. إياك والقنوط .. إياااااك
تقول مفيش فايدة !! إياااااااك تقول أنا مش نافع !! إياااااااااااااك تقول تعبت وكرهت نفسى وكرهت حياتى !!
اليأس ده أكبر جريمة وأبشع ذنب ممكن تعمله في حياتك !!
فإوعى تيأس حتى لو وقعت في جميع الكبائر.. ارجع وتوب وربك هيقبلك مهما عملت .. وافضل كده لحد آخر نفس في عمرك.. لحد ما تلقى الله وإنت بتجاهد نفسك وبتتوب.. اغلط وتوب.. واغلط وتوب .. واغلط وتوب مليون مرّة .. وافضل كده طول عمرك تتوب وتندم وتستغفر
بس المهم إنك لا تتمادى في أي ذنب وتتوب بسرعة أول ما تقع فيه

✅خليها لازمة على لسانك " اللهم طهرني" ، اللهم "قني شرَّ نفسي وألهمني رشدي" ، وصدقني هييجي الوقت وربنا هيتقبل منك..


#يتبع غداً بإذن الله
#رمضان_آخر_روقان
#مصطفى_زايد
#افتح_لي_قلبك

https://bit.ly/3jlHlO7

1⃣9⃣

رمضان آخر روقان 🎆🌜

تابع توصيات عملية 🍃

٢_قراءة قرآن .. بروقان..

رمضان هو شهر القرآن، وكتيييييير مننا لما بيسمع إن فيه ناس بتختم القرآن أكتر من مرة في رمضان، بيبقى عايز يعمل زيهم وأكتر منهم كمان

ولكن للأسف حرصه على الختم بيخليه يقرأ بسرعة، وياكل الحروف، ويضيّع التجويد، ويعطل العقل عن إنه يفهم، والقلب عن إنه يتدبر ولو آية واحدة !! لأن كل همه وقتها بيبقى نهاية الصفحة أو نهاية السورة !!

تسمعه وهو بيقرأ وكأنه في سبق و حد بيجري وراه !!!

يا أخي ده إنت لو بتقرأ خبر في جريدة هتركّز فيه وتقرأه باهتمام وتمعن أكثر من قراءتك للقرآن بالطريقة دي !

لو بتقرأ مذكرات الدراسة مش هتقراها بالشكل ده !!!

يا شباب .. لازم نعرف إن ختم القرآن مش مطلوب لذاته !! يعني مش هو الهدف !!

مش مطلوب إني أقعد ساعة واتنين وتلاتة كل اللي بعمله إني بقلب في صفحات ورق ورا بعض، وبعدين أقفل المصحف وأقول الحمد لله ختمت القرآن !!

✅ الهدف يا حبيب قلبي هو إنك تقرأ بتركيز وخشوع، وتحاول تفهم وتتدبر، وتعمل باللي فهمته، وبالتالي يأثر فيك القرآن ويغير
حياتك للأفضل طبعاً
كما قال تعالى :
{كتَابٌ أَنزَلْنَاهُ إِلَيْكَ مُبَارَكٌ لِيَدِّبِّرُوا آيَاتِهِ وَلِيَتَذَكَّرَ أُولُو الْأَلْبَابِ}

✅ يعني إنك تقرأ آية واحدة بتدبر وتأمل وفهم وتعمل بها أفضل من إنك تختم القرآن كله من غير ما تكون فاهم ولا واعي أي شئ من اللي بتقرأه !!
ولذلك كان بعض الصالحين يقول :
[ آية لا أتفهمها ولا يكون قلبي فيها، لا أعد لها ثوابا !]
✍ قال الإمام ابن القيم رحمة الله في مفتاح دار السعادة :
[ لو علم الناس ما في قراءة القرآن بالتدبر، لاشتغلوا بها عن كل ما سواها ؛ فقراءة آية بتفكر خير من ختمة بغير تدبر وتفهم، وأنفع
للقلب، وأدعى إلى حصول الإيمان وتذوق حلاوة القرآن ]
فمتخليش تفكيرك وهمّك كله في عدد الختمات، مش مهم هتختم كام مرة

🟢 المهم هو قلبك هيدخل فيه كام آية من القرآن ويتعلق بيها ؟؟؟

🟢 المهم هو هتقرّب من ربنا قد إيه بسب القرآن ؟؟؟

🟢 المهم هو حياتك كام حاجة هتتغير فيها بسبب القرآن ؟؟
عايزين نخرج من رمضان متعلقين بكل سورة من القرآن

فلو قولتلك انطباعك عن السورة ديه إيه؟، يكون في قلبك مشاعر ومعاني ناحيتها يكون فيه بصمات سابتها السورة على قلبك
يكون فيه آيات منها أصبحت شعارات تعيش بها حياتك



#يتبع غداً بإذن الله
#رمضان_آخر_روقان
#مصطفى_زايد
#افتح_لي_قلبك

https://bit.ly/3jlHlO7

2⃣0⃣

رمضان آخر روقان 🎆🌜

تابع قراءة قرآن .. بروقان..


✅ عايزك تقف مع آيات القرآن.. تفهم وتخرج بتوصيات، وبعدها تطبق عملي في حياتك .. يعني تخلي القرآن هو خُلقك وفعلك

❎ مش تقرأ {وبالوالدين إحسانًا} ، وتطلع تقول لأمك وأبوك إنتو دقة قديمة ومش بتفهموا حاجة ..!!

❎ مش تقرأ ﴿وَعَاشِرُوهُنَّ بِالْمَعْرُوفِ} ، وبعدها تطلع تزعق لزوجتك وتهملها وتعاملها أسوأ معاملة ..!!

❎ مش تقرأ {فامشوا فِي مَنَاكِبِهَا وَكُلُوا مِن رِزْقه}، وبعدها تخرج تجري على الدنيا جري الوحوش وتتكالب عليها

❎ مش تقرأ {إِنْ مَعَ الْعُسْرِ يُسْرًا ﴾، وانت لسه قاعد حزين ومهموم وشايل مشاكل الدنيا كلها فوق كتافك !!

❎ مش تقرأ ﴿ هُوَ عَلَيَّ هَيِّنٌ }، وترجع تقول ده مرضي صعب وملهوش علاج !! أنا فقير ومستحيل هقدر أتجوز !!

❎ مش تقرأ {قل اللهُ يُنجِيكُم مِّنْهَا وَمِن كُلِّ كَرَّب}، وتسئ الظن بالله في كل أزمة تقع فيها وتقول أنا ضعت خلاص !!

فين بقى أثر القرآن في حياتك ؟؟
فين كل الختمات اللي قرأتها ؟؟!

انسی بقى كل اللي فات
وإبدأ حياة جديدة تماماً مع القرآن ..

وهنقسم النصائح في موضوع القرآن إلى ٤ عناصر :

• أولاً : القراءة

⭐️ لو عرفت تخلي القرآن هو رقم واحد في أولوياتك في رمضان قبل أي شئ تاني فافعل .. خليه شغلك الشاغل أطول وقت ممكن في الشهر ده.. خليه صاحبك ورفيقك في كل زمان ومكان .. أكثر حاجة تركز
عليها طول رمضان هي القرآن ..

⭐️ خصص وقت مناسب للقراءة ، وليكن مثلاً بعد كل صلاة .. المهم تحاول إنه وقت يكون ذهنك فيه صافي ومهيئ نفسياً زي ما اتفقنا
وأي حد بيزهق بسرعة، ممكن يوزع الكمية اللي هيقراها على أوقات الصلوات الخمس لو خصص (١٥) دقيقة بعد كل صلاة ..هيكون قرأ على آخر اليوم ٧٥ دقيقة، وده وقت كويس جداً للمشغولين .

⭐️ جدد وضؤك لو تقدر قبل ما تبدأ قراءة، واستخدم السواك، وحاول تستقبل القبلة ، وابدأ بالاستعاذة ثم البسملة، واستحضر في نيتك فضل وثواب قراءة القرآن .

#يتبع غداً بإذن الله
#رمضان_آخر_روقان
#مصطفى_زايد
#افتح_لي_قلبك

https://bit.ly/3jlHlO7

#رمضان_آخر_روقان
#مصطفى_زايد
#افتح_لي_قلبك
https://bit.ly/3jlHlO7

2⃣2⃣
رمضان آخر روقان 🎆🌜
تابع قراءة قرآن .. بروقان..

ثانياً التفسير:

🟢 لازم تخصص وقت ثابت يوميًا تقرأ فيه في التفسير علشان تفهم اللي إنت هتقرأه واللي هتسمعه في التراويح ..بجد متعة ولذة جميلة جداً إنك تفهم القرآن وتتذوق معانيه وتعرف بعض من أسراره التي لا تنتهي
وكل التفاسير هتلاقيها موجودة على النت، وأوصيك بكتاب (زبدة التفاسير)من أفضل الكتب المبسطة في التفسير

🟢 لو مش بتحب القراءة في الكتب و بتحب تسمع وعايز تشغل وقتك بحاجة مفيدة اسمع دروس تفسير القرآن البسيطة السهلة زي دروس الدكتور محمد علي يوسف أو الدكتور أحمد عبد المنعم وغيرهم كثير

ثالثاً : الحفظ :

🟢 جرب تحفظ ولو آيتين كل يوم، بس إنت واظب واستمر .

🟢 الأفضل طبعاً إنك تحفظ مع حد سواء في مسجد أو مع أصحابك أو حتى مع اخواتك في البيت علشان تشجعوا بعض، ويبقى في إلتزام
بجد بأجزاء ومواعيد محددة !!

🟢 أقرأ من حفظك في صلاتك وجدّد مع كل حفظ .. لأن من أفضل الطرق اللي الكل جربها في التلذذ بالقرآن وتثبيت حفظه في نفس الوقت، هي الصلاة به

رابعاً : السماع

🟢 حمّل القرآن على موبايلك بصوت الشيخ اللي بتحبه، وأوصيك بالشيخ ماهر المعيقلي، ولو مش مركّز أو مش لك نفس إنك تقرأ، خلّي
الموبايل شغال قرآن على طول وعيش بقى مع الجمال والمتعة .
جرب كده تخلي الهاند فري دايما في ودانك شغالة قرآن صدقني هتبقى مدمن قرآن وهتنسى الأغاني وتكرهها

🟢 لما تكون تعبان ومخنوق ومكتئب ومش عارف تعمل إيه، جرب كده تدخل أوضتك وتطفي النور وتشغل قرآن، واقعد اسمع كده، وشوف بعدها راحتك واطمئنان قلبك ونفسيتك هتبقى شكلها إيه ! هتدعيلي بإذن الله

٣_صيام ....بروقان

📢الصيام عبادة ملائكية .. بتخليك شبه الملائكة یعنى بتتجرد وتترك كل متع الدنيا الأساسية، مفيش أكل ولا شرب ولا شهوة .

✅ والصيام عبادة فيها كل معاني الحرّية، بيحرر فيها الإنسان روحه من قبضة الطين اللي بتجذبه لشهوات الأرض، يعني الصيام بيخليك حر، مش أسير ولا عبد لأي شهوة مهما كانت، بيخليك عبد خالص لله.

✅ والصيام الحقيقي يعني إمتناع عن كل حاجة تغضب ربنا سواء فعل أو قول أو حتى نيّة لا ترضي الله .

✅ الصيام الحقيقي يعني اخلاص ومراقبة وحب وتعظيم وامتثال وحمد وشكر وقمة العبودية لله عزوجل .

🤎 الصيام الصح = إنك تصوم بقلبك قبل جوارحك .

🤎 ف القلب الصائم : قلب صايم عن التعلق بالدنيا، معرض عن الهمم الدنيئة والأفكار التافهة طلباً للنعيم الأعلى والراحة الدايمة في
الآخرة ..

🤎 القلب الصائم قلب مشغول وبيفكر في الآخرة، وإيه اللي هيقوله لربنا عزوجل لما يقف بين إيديه ؟؟

وخد شوية النصايح دي لعلها تنفعك بإذن الله:

🍴اتسحر سحور خفيف علشان بطنك متتعبكش أثناء الصيام، وفي نفس الوقت حاول يكون مُغذي وبيديك طاقة علشان تقدر تبذل مجهود في شغلك وعبادتك وإنت صايم
_زي إيه ؟؟
زي الألياف اللي موجودة في أغلب الخضروات والفاكهة وأشهرهم التمر.. وياريت بلاش الحوادق الشديدة زي الجبنة الحادقة
والمخللات، أو الحاجات اللي فيها سكريات شديدة زي الكنافة والبسبوسة والقطايف علشان جسمك بيحرقها بسرعة وهتعطشك جامد جدا !!

🍴بلاش كلام كتير مع أي حد، علشان اللي بيتكلم كتير لازم هيغلط كتير، وخلّي لسانك مشغول بذكر الله أفضل !!

🍴أي حد ينرفزك أو يحاول يستفزك أو يغضبك فامسك نفسك، واوعى تتكلم وترد عليه، واسكت خالص خالص
زي ما النبي ﷺ قال : ( إذا غضب أحدكم ؛ فليسكت ) .. ولو هترد، تقول زي ما النبي ﷺ علمنا : " إني صائم" ...

🍴بلاش خروج كتير إلا للضرورة، علشان تحافظ على صيامك من الفتن اللي في كل مكان حواليك، وكمان علشان متخرجش في الحر فتتعب وتعطش، وتعرف توفر طاقتك ومجهودك بقدر الإمكان للطاعة والعبادة .



#يتبع غداً بإذن الله
#رمضان_آخر_روقان
#مصطفى_زايد
#افتح_لي_قلبك

https://bit.ly/3jlHlO7
.

2⃣3⃣
رمضان آخر روقان 🎆🌜

تابع صيام .. بروقان..

🍴كل ما تحس بجوع أو عطش أو تعب وإرهاق، صبر نفسك إنك بتعطش النهارده علشان تتروي يوم العطش الأكبر وتهرب من عطش النار.. النبي ﷺ قال إن صيام يوم واحد بيبعدك عن النار ٧٠ سنة
فلو يوم الصيام ١٦ ساعة، يبقى كل ساعة صيام بتبعدك "٤ سنين" عن نار جهنم.. فـ صبر نفسك

🍴وكل ما تحس بجوع أو عطش أو تعب وإرهاق، إفتكر قول الله عزوجل في الحديث القدسي : ( يَدَعُ شهوته من أجلِي ) و بص للسما وابتسم وقول في سرك " كله من أجلك ياربي، هستحمل علشانك ياربي بس إنت ترضى وتتقبل يا حبيبي يا الله" وساعتها هتلاقي كل التعب راح واختفى بفضل الله

🤎 وكل ما تقابلك فتنة ونفسك تميل لها .. أغاني، أفلام، مواقع، بنات، غيبة،نميمة، مال حرام .. إلخ قاوم وجاهد نفسك وشهوتك
وافتكر كلمة "من أجلي" .. وقول لنفسك هصبر وهستحمل، وكل حاجة هتهون علشانك يا ربي

🍴قبل المغرب تكون في المسجد، ومعاك تمر تفطر عليه وتفطَّر عليه الناس و طبعا تصلّي المغرب الأول جماعة، وبعدين تروح تكمل أكل في البيت

4⃣ صلاة .. بروقان..

🤎 الصلاة هي حياتك، هي راحتك، هي سعادتك، هي قرة عينك، صلتك بربك، وعلشان كده لازم تكون محافظ عليها على أكمل وجه
علشان تقربك من حبيبك عزوجل

⬅️ وربنا سبحانه وتعالى شَرَع الصلاة تقريبًا في كل أمور الحياة ..فهنلاقي عندنا صلاة التوبة وصلاة الاستخارة وصلاة العيد وصلاة
الاستسقاء وصلاة الكسوف والخسوف وصلاة الجنازة وصلاة قضاء..وده أكبر دليل على أهمية الصلاة وتأثيرها واحتياجنا لها في كل حاجة في حياتنا

⬅️ والنبي ﷺ كان إذا حصل له أي أمر أو أفزعه في أي وقت، لجأ إلى الصلاة

وإنت كمان لو تعبان أو مهموم، قوم صلي

🤎 لما تكون تايه ومش عارف تعمل إيه وتروح فين ؟؟!
أول وأهم حاجة تعملها إنك تلجأ لربك ومولاك وتقوم تصلي وتحكيله .. حتى لو مش عارف إنت هتقول إيه
بالظبط ! صدقني هترتاح جدًا وتلاقي الدنيا نوّرت.

✅ وفي رمضان عندك صلوات الفرائض
والنوافل اللي تقدر تكون بها من
السابقين إلى الله عزوجل لو أقمتها حق
إقامتها .

وخد شوية النصايح دي لعلها تكون سبب في استمتاعك بالصلاة واقامتها حق اقامتها بإذن الله:

🕌 علشان تروح للصلاة بقلب مشتاق، لازم تحب الصلاة، وتعرف قيمتها وأهميتها في حياتك وفضلها وثوابها عند الله، وتعظم قدرها في قلبك، لو عرفت قدر الصلاة وحبيتها مش هتبطل صلاة !، وياريت لو تقرأ كتابي ( جرب تقرّب ) هيفيدك في الموضوع ده بإذن الله .

🕌 الخشوع في الصلاة هو روح الصلاة، و الخشوع ببساطة هو إنك تلاقي في قلبك لين ورقة وهدوء .. إن ييجي في قلبك خوف من النار وشوق للجنة .. إن الآيات اللي بتقرأها تلامس قلبك وتحس بالحنين والقرب من ربنا

وطبعاً موضوع الخشوع كبير ويطول شرحه هنا فأنصحك بكتابي ( جنّة الدنيا ) هتلاقي فيه شرح بسيط لكيفية الخشوع، ووسائل عملية للوصول الخشوع في الصلاة بإذن الله

🟢 وعلى ما تحمل الكتاب وتقرأه هذكرلك بعض النقاط اللي ممكن تساعدك على الخشوع بفضل الله:

1⃣ من أهم وسائل الخشوع في الصلاة إننا نزرع حب الله في قلوبنا، لحد ما يبقى شجرة متفرعة في كل مكان في قلبك

ولما حب الله يملا قلوبنا ، ساعتها هتتغير صلاتنا جذرياً !

🤎 ساعتها هتجري على الصلاة جري لأنك رايح لحبيبك..
🤎 ساعتها هتنتظر معاد الصلاة بالدقيقة لأنه معاد مقابلة حبيبك..معاد اللقاء والقرب ومناجاة حبيبك
🤎 ساعتها هتحضّر قلبك وعقلك وتركز بكل طاقتك وتبقى حاسس بكل كلمة بتقولها لحبيبك وكل حركة بتعملها
🤎 ساعتها مش هتمل ولا هتزهق ولا هتتعب مهما طال اللقاء بينك وبينه لأن مشاعر الحب بتطغى على كل ده
🤎 ساعتها بس هتفهم ليه فيه ناس بتقف تصلّي بالساعات يومياً وبتبقى في عالم تاني أثناء الصلاة ..
طيب ... نزرع حب ربنا في قلوبنا إزااااي ؟؟
الجواب بكل بساطة : بإننا ......

#يتبع غداً بإذن الله
#رمضان_آخر_روقان
#مصطفى_زايد
#افتح_لي_قلبك

https://bit.ly/3jlHlO7
.

2⃣5⃣
رمضان آخر روقان 🎆🌜
تابع صلاة.. بروقان..

🕌وأيضاً من الحاجات اللي هتخليك تصلي بشكل مختلف وتخشع في صلاتك وتحس بها، التنويع في أذكار الصلاة، وسور القرآن
اللى بتقرأها، لأن بدون التنويع إنت أصبحت عبارة عن آلة مُبرمجة إنها تقول كلام معين وتعمل حركات معينة ثابتة !!

⬅️فأصبحت حتى لو إنت سرحان ودماغك في حتة تانية بتلاقيك بتقول الفاتحة وبعدها "قل هو الله أحد" وتركع وتسجد عادي جداً مع إن دماغك في حتة تانية خالص !!
ولو حد سألك بعد الصلاة إنت قرأت بسورة إيه ممكن تكون مش عارف!!
وده لأنك اتعودت خلاص على كده وبقيت بتردد كلام وتعمل حركات بشكل تلقائي ، لا إراديا !!

✅التنويع في الأذكار هيخليك مركّز وإنت بتقول كل ذكر وهتحاول تفهم اللي بتقوله وتتدبر معناه وتخشع

✅نوَّع من أول أذكار الاستفتاح وصيغ الاستعاذة وأذكار الركوع والرفع من الركوع لحد أذكار ما قبل التسليم
وكل الأذكار دي هتلاقيها موجودة في كتاب حصن المسلم أو مختصر النصيحة أو ابحث عنها على النت وهتلاقيها بسهولة جداً، وكل يوم حاول تحفظ ذكر جديد منها وتقوله في صلاتك لحد ما تحفظها كلها..

✅وكذلك سور القرآن لازم تنوّع فيها مينفعش كل الصلاوات تكون بسورة الاخلاص وسورة الكوثر !!

نوَّع في السور القصيرة حتى لو مش حافظ غيرها، وإبدأ احفظ ولو كل يوم ٥ آيات واعرف معناهم وكرّرهم في كل صلواتك، هتلاقي نفسك مركّز فيهم كويس أوي ..

🟢فوصيتي لك بالتنويع في أذكار الصلاة
والتنويع في سور القرآن في كل صلاة،
وهتشوف النتيجة الرائعة بنفسك


#يتبع بإذن الله
#رمضان_آخر_روقان
#مصطفى_زايد
#افتح_لي_قلبك

https://bit.ly/3jlHlO7