КОМИССИЯИ КФО БА "ТАЛКО-АРЕНА" ТАШРИФ ОВАРД

Имруз, 17 июл, комиссияи Конфедератсияи футболи Осиё ба варзишгоҳи “ТАЛКО-Арена”-и шаҳри Турсунзода ташриф оварда, аз омодагии варзишгоҳ ба мусобиқаи дар пешистодаи Лигаи чемпионҳои 2 Осиё дидан намуд.

Роҳбари комиссия Михаил Толкачёв аз Қирғизистон тамоми гӯшаю канори “ТАЛКО-Арена” ва дигар иншооти ёрирасони варзишгоҳро аз назар гузаронида, аз корҳои анҷомёфта
изҳори қаноатмандӣ намуд. Аз ҷониби роҳбарияти даста иттилоъ дода шуд, ки то бозии марҳилаи интихобӣ бо дастаи "Аҳал"-и Туркманистон рӯшноии варзишгоҳ ба талаботҳои КФО барои бозиҳои байналмилалӣ мутобиқ карда мешавад. Инчунин комиссари КФО барои бартараф намудани баъзе аз камбудиҳои ҷузъии ҷойдошта ба роҳбарияти дастаи “Регар-ТадАЗ” тавсияҳо дод.

Дар рӯзҳои наздик роҳбари комиссия пешниҳодҳои худро ба Конфедератсияи футболи Осиё ирсол мекунад ва сипас масъулини ин ниҳод хулосаи ниҳоии худро оид ба роҳандозӣ намудани бозиҳои марҳилаи интихобӣ ва гурӯҳии Лигаи қаҳрамонҳои 2 Осиё дар мавсими 2025/26 дар варзишгоҳи "ТАЛКО-Арена" то охири моҳи июл нашр мекунад.