𝗧𝗔𝗝𝗦𝗖𝗢𝗥𝗘

🇹🇯

💔 Дар рӯзҳои охир футболи тоҷик бо ду устураи худ — Шариф Назаров ва Муҳсин Муҳаммадиев — хайрухуш намуд.

Шариф Назаров — мураббии машҳури тоҷик буда, солҳои тӯлонӣ бо дастаи овозадори «Помир» (Душанбе) фаъолият кардааст ва дар рушди футболи миллӣ саҳми бузург гузоштааст. Маҳз зери роҳнамоии Назаров «Помир» соли 1988 ғолиби Лигаи якуми Иттиҳоди Шӯравӣ гардида, ба Лигаи олӣ роҳ ёфт.
Инчунин, мунтахаби Тоҷикистон маҳз зери мураббигии Шариф Назаров соли 2006 ғолиби Ҷоми даъвати КФО (AFC Challenge Cup) гардида, яке аз муҳимтарин дастовардҳои байналмилалии футболи кишварро ба даст овард.

Муҳсин Муҳаммадиев — ҳамлагари маъруфи тоҷик, ки дар ҳайати дастаҳои «Помир» (Душанбе), «Локомотив» (Маскав) ва «Спартак» (Маскав) бозӣ кардааст. Корномаи футболбозии худро ӯ дар дастаи «Пахтакор» (Қӯрғонтеппа) оғоз намудааст.

Муҳаммадиев аз 31 октябри соли 2016 то 22 майи соли 2018 дар вазифаи сармураббии дастаи «Истиқлол» фаъолият карда, зери роҳнамоии ӯ ин даста ба финали Ҷоми КФО-2017 роҳ ёфт. Инчунин ӯ аз соли 2022 то 2024 дар «Истиқлол» ҳамчун ноиби аввали президенти бошгоҳ кор ва фаъолият намудааст.

Дар солҳои 2008–2012 Муҳаммадиев вазифаи директори варзишии «Рубин» (Қазон)-ро ба уҳда дошт. Маҳз дар ҳамин давра «Рубин» бори аввал дар таърихи худ қаҳрамони Чемпионати Русия гардид ва дар доираи Лигаи Чемпионҳо пирӯзии таърихӣ бар «Барселона» ба даст овард.

Аз соли 2024 Муҳаммадиев директори варзишии дастаи «Вахш» (Бохтар) буд. Моҳи феврали соли 2025, ҳангоми ҷамъомади тамринӣ дар Туркия, ӯ сактаи мағзӣ гирифт. Баъдан ба шаҳри Маскав интиқол дода шуд ва мутаассифона, дар он ҷо боз чандин ҳамлаи дигари сактаи мағзиро аз сар гузаронд. 1-уми январи соли 2026 қалби Муҳсин Муслимович барои абадан аз таппиш боз монд.

🖤 Номи ин ду устура ҳамеша дар таърихи футболи тоҷик бо ҳарфҳои заррин боқӣ мемонад.
Рӯҳашон шод ва ҷояшон ҷаннат бод.

🇹🇯

Ба Score обуна шавед!

Please open Telegram to view this post