معجزة الصبر زينب.. 
💧💧💧💧💧💧💧

بدءُ  الولادةِ  بالوفاة ِ ؟
هل أنتِ إحدى المعجزاتِ !

ُ شيخُ النبوةِ مًوقِنٌ
ما هَمّهُ نارُ البُغاةِ

موسى المُؤيَدُ بالعصا 
قد زلزلت قصرَ الطغاةِ

أم أنتِ عيسى لم يزل 
في رفعِهِ روحَ الحياةِ

أم انتِ نوح ُ الدهر ِ من
في نَوحِهِ فلك ُ النجاةِ

يطفو على دمعاتِهِ
يبكي إمامَ التضحيات ِ

أم وحيُ أحمد َ مُنزَلٌ
بالماء ِ للأرضِ المَواتِ

جدّدتِ حيدرَ في الورى
"ما مات من يلِدُ البناتِ"!


يا أم ّ كلِّ الصبرِ في
عصفِ الردى والنائباتِ

بايعتُ حزنكِ بلسماً 
ودواءَ حزنِ الكائناتِ

مدّي العباءة َ خيمةً
واستجمعي فيها شتاتي

فأنا المحاصَرُ باللظى
طُوّقتُ من كلِّ الجهاتِ

وغسلتُ وجهي من دمي
متوضئاً وقت الصلاةِ

في الصدرِ ألفُ رصاصةٍ
طعناتُ ظهري بالمئات ِ !


قدّيسةُ الحزنِ التي
قد هرولت نحو الفراتِ

عادت إلينا كفُّها
بحنان ِ كلِّ الأمهاتِ

وقفت بقامة ِ حيدرٍ
لتصدَّ أرتالَ الغزاة ِ

مع فتيةٍ قد آمنوا
بحسينها حتى المماتِ

قد ألهمتهم زينبٌ
بثباتها معنى الثبات ِ !!


جئنا لدفنِ حسيننا
المطروحِ في حَرِّ الفلاةِ

جئنا نشدُّ جراحنا
بعباءةٍ للطاهراتِ

جئنا لننصبَ خيمة ً
فوق الديارِ الدارساتِ

جئنا نلملمُ بعضَنا
ونلمُّ بعضاً من رفاتِ

جئنا لدفنِ أحبةٍ
قد أكملوا فرضَ الزكاةِ

جئنا نقول تقبّلي
قرباننا والأضحياتِ

جئنا نخزّنُ حزننا
ونصوغُ أحلى الأغنيات ِ

نتلو نشيدَكِ زينبٌ
"مهديُّنا الموعودُ آتِ'!!!

محمد طالب العاملي

اتلاگينه من بعد الموت
سولفنه بــهداي الصوت
وتعاتبينه.. وتعاتبينه
آنه اگله شلون عفـتوني سبـيــه
وهوه يعتب ليش عفتيني رميه
وتعاتبينه.. وتعاتبينه
ـــــــــــــــــــــــــــــــــــــــــــــــــ
من خلصت اسنين العمر.. وعيوني من سدوها
والموت اجـانـي ابـــغربتي.. وجــنازتي شالوها
  وبــيـد الغرب للمگبــــــره.. حدر الترب خلوها
شفت الاحسين وجبهته.. ابذاك الحجر صابوها


ويگلي ياضـي عينــاي
يم عون مشتاگ هواي
يبو اليمه گتله وعيون الزچـــيه
اتفارگينه خويه من غصبن عليه
ـــــــــــــــــــــــــــــــــــــــــــــــــ
عاتبـــني ابو اليمه وبچه.. وعتابه ايأذيني
اطـــــاچ گلبچ عالترب.. يازينب اتعوفيني
لاثوب ظل ولا هدم.. ياخويه ومسلبيني
اتمنيت من حر الشمس.. بحجابج تغطيني

عفـتينــــــي مسلوب الثوب
والخيل اجت من كل صوب
تسحك وترفس حـــوافر آل اميه
شلون عفتيني على اتراب الوطيه
ـــــــــــــــــــــــــــــــــــــــــــــــــ
يحسين مهضومه رحت.. والحادي سافر بيه
مسبيه كامت يالــولي.. اتنــــشف دمع مسبيه
الأجفوف مشدوده بحبل.. والسوط هد اعليه
وللشام يبن امي رحت.. وآنـــه اختك العلويه

ضليـــــــــت كلما اندار
يضربني شامت بحجار
وباليتامه اتحيرت وشلون بيه
والفواطم عينهـــن ضلت عليه
ـــــــــــــــــــــــــــــــــــــــــــــــــ
ويگلي ياباقي هلي.. اتمنيتچ اتـــحظريني
وي زين الاعباد بوكت.. دفني ردت تلفيني
وبيدچ تفصلين الچفن.. ياخويه واتدفنيني
ينطيچ گلبچ يالاخت.. فوگ الثره اتخليني

وياريت ماي اتجيبين
وعالگبر خويه ترشين
وكون اشوفچ لازمه ابـنـيـــــــتـي رقيه
اشجابهه اعله الموت خويه ازغيره هيه
ـــــــــــــــــــــــــــــــــــــــــــــــــ
آنه التمنـيتك تـجـي.. ياخـــــــــويه وتشيعني
تجيب الهواشم والاهل.. وكت الدفن تحظرني
وبيدك يبو اليمه ردت.. حــــــدر الترب تدفني
وياسين تقره اعلى الگبر.. يالجــيتك اتفرحتي

وياريت عباس ويـــــاك
ابتشيعي موجود اهناك
الشام ما بيها عرف يـــاخويه ليه
ترضه غربه تشيل نعش الهاشميه
ـــــــــــــــــــــــــــــــــــــــــــــــــ
حيدر بشار الدراجي

‏مقطع صوتي من حيدر بشار الدراجي

قصيدة للسيدة زينب للناس اليتمنون يزوروها وماتوفقو

جديد💔💔

چنت اتمنه ازورچ يالعقيله
ماصارتلي فرصه ولاوسيله
ندمانه اعله الأيام
صارت مثل الاحلام
چنت اتمنه ازورچ يالعقيله

•───✧◐◐✧───•

الوب بروحي واذرف دمع العيون
ماحسبت هيج يصير يـم عــون
وترجع آآل أميه وبيها يسبــون
والمرقد يسدوه - كفار ويهدموه
بصدري نار تسري اعله الجليله

•───✧◐◐✧───•

حلم اوصل ضريح ام المصايب
واكض شباچها واقـــره النوايب
واكلها من اخوتچ هالرايه جايب
بيها عطر الحسين - وعطر عباس الحنين
بلهفه وشوك شباچچ اجيلــه

•───✧◐◐✧───•

هـــم ترجع يزينب ذيچ الأيام
نوصل مرقدچ نلطم عله الهام
نتعنه ونجي ونتحزم احــزااام
ترد الروح بينه - لو مره اجينه
واحدنــه عليچ انهدم حيلــه

•───✧◐◐✧───•

عليچ ارواحنه ملهوفه تشتاك
وتدرين البُعد مولاتي حراااك
ياذينه الهجــر للروح فـتـاك
علينه الظيم مكتوب - هاي ارواحنه تلوب
لله ارفعنه چفنــه ونشتكيلـه

•───✧◐◐✧───•

ندعي الله ورسوله يخت الحسين
يحفظ مرقدچ مــن الملاعين
وتتعنــه الـــچ كل المحبيـن
وتعود الزياره - كلمن يجي لداره
تزول ان شاء الله ايام الثكيله

•───✧◐◐✧───•


بقلم المله والشاعره ام علي الأماره
غير مبري الذمه اليحذف اسم الشاعره وينسب الكلام له
العمل مهدات الى مولاي صاحب الزمان عج
🚫لايجوز حذف اشكال الذمه من القصيدة

           غافي الحزن بعيوني
           أهلي بـغرب عـافوني
عشت بمصيبه............ميته وغريبه
==============================================================================
1️⃣
كضيت عمـري بغربتي هواي الزمن اذاني
امشي سـبيه عالهـزل بيـن الغرب خـلاني
بالغربه دمـعاتي تهل والكلب يـبقه متاني
محد حضر يم الكـبر ليـش الاهل تنساني
                       ~~~
            هاي السنه بدمـعاتي
            اكضيها وي حسراتي
بحسره عجيبه.............ميته وغريبه
=========================
2️⃣
كلما يمر عام الحـزن يفتح جرح ما يشفه
نار الخيم من تشـتعل نار الـكلب ما تطفه
يومـيه مسـبيه بـغرب حـته الدمع ما كفه
منتظره وعيوني تصد والحزن بيهن يغفه
                       ~~~
               تاليـها ويـه الـغربه
               ايامي كلش صعبه
كلبي ونحيبه..............ميته وغريبه
=========================
3️⃣
ياشيعه عذبني الهجر تكـضي بقهر ايامي
سافر ضـواي من الزغر وتـهدمت أحلامي
دلالي ابد ما يرتوي يبقه لصورهم ضامي
كلـهم سـويه تذبـحوا صـار الذبح كـدامي
                       ~~~
           بهـاي الصـور مهـضومه
           عشت الحزن من يومه
وكلمن نصيبه...............ميته وغريبه
=========================
4️⃣
ودعـني كـافل عالنهر طـول العـمر كفـالي
دللني ما يـقبل اذا واحـد يـشوف خـيالي
عكبه صفيت محيره والناس تهضم حالي
ترميني بحجار وحجي شكد عذبوا دلالي
                        ~~~
               درب الـهزل حـيرني
               وعباس ما يحضرني
وشلون اجيبه................ميته وغريبه
=========================
5️⃣
شيخ العشيره الما يرد يومـيه احير بأمره
وتخيلت نحره التفت والسيف كطع نحره
بصدره سوالفـنه كبل تاليـها رضـوا صدره
شميت عطره وميزت ماعرفه لو ماعطره
                         ~~~
            راح وتـركـهـا سـنـيـني
            وجروحه ترست عيني
الجثته سليبه.................ميته وغريبه
=========================
6️⃣
بأخر حياتي تحسرت محد حضر ودعني
والغربه زادت هلوكت ليش الزمن لوعني
زينب غريبه مـحيره وين الكمـر يسمعني
يحسين لو رد السبي ورد الزمن يفجعني
                       ~~~
              وين التـفت يالغالي
              بالغربه يهضم حالي
لجانت حبيبه..............ميته وغريبه
=======================================
           محمد خشان ✍️.              
======================================

مولاتنا الحوراء ام المصائب ع

أون وماشفت مثلي بَشَر وَن
ومثل خُوَّاني وين الگه بَشَر وين
اگولن بالله ابن حَذلَم بِشِر وين
ينعه موتتي بالغاضريه

وسيعه وأبد ماتشفه يروحاي
متت والناس جثماني يَرَوْ حي
بعد شمتانيه بالله يروحاي
هلي وماظن هلي يلفون اليه

ماضل عندي لا خاطر ولا كف
وجور الوكت من عندي ولا كف
لا رفَّت علي رايه ولا كف
امن اخوتي ايهيل ترباني عليه

حرت مابين ابو اليمه وَضَعنه
وعگب عينه تطشَّرنه وَضِعنه
السبي ودرب السبي غَيَّر وَضِعنه
ورزيتنه فلا منهه رزيه

....................................

يازينب ابنبرة حزن صِحناچ
يم خير ويضل متروس صَحناچ
وسف يختلف هاي السنه صَحناچ
فرق عن كل سنه يالهاشميه

وسف حزنچ مُرد روحچ وَفَتها
يمن للخُوَّه بالدمعه وِفتها
مثلچ يامَره حانت وفتها
ابغربه ولا نواعي ولا عزيه

أضل أنحب على الحُرَّه ورثهه
الوكت ناره ابگلب زينب ورثهه
خذت من فاطمه أمهه ورثهه
الحزن والنوح والدمعه الجريه


زينب كل عمرهه شامل احزان
تنوح ومن زغرهه شامَّه الاحزان
اشما ينجاب طاري شام الاحزان
نجر حسرات عالراحت سبيه

سيد علي الموسوي

اخر لحضات مولاتنا الغريبة عليها السلام...

عيوني تتلفت عليهم
ها اجو ها ماجو خواني ليه
حضرو بكل المتتهن
وانه من ماتو جنت راس ورقيه
جربت كل المنايه
وفوگ كل واحد طحت منهم منيه
الودعاني بتسع اصابع
ودعيته اعله الهزل مجتوفه اديه

مادام هذا الموت وازاني
جه غير يسكت كلبي شيتاني
تنشدني روحي وين خواني

كلساع انادي ياحسين الخوه معيوفه
مارايده تنسدلي عين وانه ماشوفه
اخته وطالب منه دين ايسدها بجفوفه
__
كوه من يمهم خذوني
ميته لكن جثه مشيوله بهزيله
اليحدي كتال الجنازه
وغربوني وشيعو اسم العقيله
الموت مو هذا يروحي
الموت صاحو طلعوها ومالي حيله
تدخل الوادم بختنا
يعني ماترهم ابد اصبح دخيله

لو ميته يم اخواني اشوالي
هذا السبي لمغير احوالي
خلاني اشدهن بيدي احبالي

الراي صاير مو بأدي ماتنعقل هايه
اسمي الگبل سماه علي يتغير ابرايه
كالو غريبة ياهلي من طاحت الرايه
__
موتي يتگرب عليه
وانه گرب ذكرياتي الچنت اميره
ليش موتي يصير سكته
وانه خواني تره شيوخ العشيره
يميل تابوت العزيزه
وانه لا تابوت لمني ولا حصيره
حتى فاتحتي اليمرها
يكول ميتتكم اضن ميته اسيره

المات ماشيعوه خوانه
مدفون تلگا هوه بمچانه
يلحضرت سلمان جه وانه

ذكرني المناداة بيش الوكفه عالتله
ابّين خيل ابّين جيش ورايده اوصله
حسبالي اخوي انه يعيش واحتمي بضله
__
عيونه مفتوحه اليتاني
الا واحد منهم ايغمضها بيده
الروح اذا منتضره غالي
الچفن يستاحشها يبقه ومو بعيده
من شفت عباس طايح
روحه ماطلعت لمن جاله عضيده
راح اموت وما اجوني
الغربه يخواني علي ماهي جديده

هل راح اموت وانه محتاره
الشام مايرحم ابخطاره
والكلب مات وماطفت ناره

ما ودعتكم ياحنان الملتقى ابموتي
لو بينكم هسه انه چان انشال تابوتي
بس غرباني هل مچان وانسمع صوتي
__
اللـهم عـجـل لـوليـك الفـرج

محسن الحمداني

الشاعر الحسيني ظاهر حبيب الهليجي (للسيدة زينب ع)

ماتت هل يوم بنت المعصوم
واخت المظلوم واخت المظلوم
دفنوج بدمعت عينج
يل باقي الهسه ونينج
ماتت هل يوم
*

ذابت بل حزن زينب ألم وهموم
بمسيل الخد گضتها ولگلب مهظوم
من هام وضلع تبدي وجبد مسموم
وأخيام وسبي ونحور تجري دموم
نيران خيام وصوات ايتام
واهات الشام واهات الشام
خلصتي بدمعه سنينج
يل باقي الهسه ونينج
ماتت هل يوم
*
سلام الله عليها بكل نفس زينب
عن دنياهه راحت والگلب يلهب
عن ياقصه نحجي ويا ألم نكتب
الي ابطن امه والله بضيمها يشيب
بسمار الباب ودم المحراب
ونحور اخضاب ونحور اخضاب
ومحد بل غربه يعينج
يل باقي الهسه ونينج
ماتت هل يوم
*
يگولون اليموت اهمومه ينساها
لجن زينب تظل موجوده اوياها
تبجي منل صبه الحد يوم مثواهها
الزمن قاسي وختمها الغربه وداها
فگدة جم حيد ودروب البيد
مجتوفه بگيد مجتوفه بگيد
وگبالج راس حسينج
يل باقي الهسه ونينج
ماتت هل يوم
*
بخيال الفاگد احبابه تظل ذكره
صور الهم تعيشه سنين بل عبره
وزينب ذكرياتج كلها عل الغبره
جثث إحباب عل رمضاء متوذره
بمتنج اثار ظلت تذكار
من الاشرار من الاشرار
وقاسي الكيد بجفينج
يل باقي الهسه ونينج
ماتت هل يوم
*
لون ايوب صبره أنقارنه يمج
يجزع ما يقاوم لحظه من همج
يل همج يزينب يمشي وي دمج
يل شفتي الضحايه ونار بخيمج
لو جان أيوب هم گلبه ايذوب
بلوعة محبوب لوعة محبوب
يازينب الله يعينج
يل باقي الهسه ونينج
ماتت هل يوم

الشاعر الحسيني ظاهر حبيب الهليجي (للسيدة زينب ع)

يا صدعه ولوعه منل بين
زينب بيها تغمض العين
*

نبدي أبهاي إلأول جمره
من هجموا علدار الزمره
ويوم الكسروا ضلع الزهره
والمحسن طاح تنظرين
*
لو لجمة حيدر ويامه
برمضان وماتم صيامه
من رد ليج بدم الهامه
واحظنتيه وانتي تونين
*
كل هذا الهَم وترد جعده
تسم العود وتمرد جبده
وشفتي شلون السم يمرده
صوره الجبده الماتنسين
*
من طعنات الطف وآهاته
الظلن ما راحن حسراته
وصدرج مافارگ عبراته
الهن كل لحضه تنوحين
*
يلجرحج ما ينفع روفه
بلشام وايدج مجتوفه
يازينب وايتام بخوفه
وفرحة شمات تشوفين

الشاعر الحسيني ظاهر الهليجي (مولاتي زينب ع)

يازينب وداعأ وداعأ
يازينب وداعأ وداعأ
يل عـشتي بمحن -مثل أم الحسن يازينب وداعأ
---
بالغربه أندفنتي وشفتي لوعات
زينب ياغريبـه بكلبــج أهـــــات
ذليـتي الصبــر رغــم المعانــات
بليلج ما طلع فجـــر المســـرات
لاويتي الزمن --- مثل أم الحسن يازينب وداعأ. يا زينب وداعأ
---
نسمع من ضريحج صوت الونين
يل عشتي أبمـرار بكُـــل الأسنيــن
مـن ضلع الزجيــه المذبح حـسيـن
جـم جـرح وجـرح خلالــج البيـــن
حسراتج صفن --- مثل أم الحسن يازينب وداعأ. يا زينب وداعأ
---

عن أهلج بعيـده بديـرت أغــراب
وبساعة وفاتج حضـرت أجنــاب
دمعج ما نشف من هاي الاسباب
الناس الغــريبــه أتهيــل التــراب
دمعاتج مزُن --- مثل أم الحسن يازينب وداعأ يا زينب وداعأ
---
بمتونــج علامــه وظلــت أثــار
ياهيبه علي أمن أسياط الاشرار
وبجفوفج أثر گيد من الاسفـــار
ميتـه والعيـون تفيض مـــــدرار
جروحج ما شفن ---مثل أم الحسن
يازينب وداعأ يا زينب وداعأ
---
عـادت ال أميـه الكبـرج اليــوم
مطلبهـم يزينب كونــه مهــدوم
ما عاش اليمسه وأمـره محتوم
كلنه انصيــر الـج عباس لــدوم
عبراتج بقن --- مثل أم الحسن يازينب وداعأ يا زينب وداعأ

الشاعر الحسيني ظاهر حبيب الهليجي

تعمه العيون لجلج ام عون
نعشج انشال فوگ المتون
*
ماتت امنل الحزن زينب موعليله
المرن أعليها مصايب مو قليله
من زغرها والدمع من دم تسيله
شنهو طعم الدنيه للفارگ خليله
شافت احباب بدم الخظاب
صبرج بهاي زينب شلون
*
آه جم آه أعله زينب بنت الاطياب
الذايبه مثل الشمع لفراگ الاحباب
الهاشميه المحد الها ايهيل التراب
فارگتهم وانسبت لديار الاجناب
عافت بدور تدمي النحور
وياهه شمات تحدي الظعون
*

يل دفعتي الدم لجل دينج ضريبه
زينب تموتين وبديره غريبه
وشيعوج اجناب مولاتي عجيبه
وانتي بت حيدر علي هاي المصيبه
عشتي بجروح سنينج بنوح
حسرتج نار بيها يدرون
*
الحملت الماينحمل بل غاضريه
راحت الرب السمه بدمعه جريه
عله العافتهَم وذر فوگ الوطيه
لو عله دروب السبي وموتت رقيه
لحرگ الخيام وصوت الايتام
وهيه بحبال تشگف شلون
*
الماتت بغربه وأبد ماكف بجيها
وهيه ميته والحزن باين عليها
وباقي أثار السبي الظلن بديها
والزراگ البل متن لي هسه بـيها
عاشت سنين حسره وونين
الها يا ناس ينحب الكون

الشاعر الحسيني ظاهر حبيب الهليجي

تقره العديله تمنيت والنعش انت تشيله
وتدفني بيدك عباس وترابي خويه تهيله
*
عباس خويه يلي تمشي بدمي
اختم حياتي بجلمه ريتك يمي
گبل المنيه واشكي حالي وهمي
يايوسف انت ويعگوب گلبي الحزن هد حيله
*
طيف بمنامي لو تمر يل غالي
ماتعرف اختك من تشاهد حالي
من عاشر وظيم السبي اليبرالي
وانه على فراش الموت اذكر خيم والعيله
*

بأخر انفاسي وانه الك اتنطر
ياروح اخيتك ريت لختك تحظر
حرمه وغريبه والدمع لون احمر
الساني يلهج عباس لكن حزن ترتيله
*
اتمنه تسمع كافلي هل طلبه
انه الاميرة وهسه وحدي بغربه
لا من اهل ياحيف لامن گربه
اتمنه لو حته بطيف يتعنه لي واشكيله
*
بيدك يخويه تسدها كون عيوني
وتشيع اختك ويه اليشيعوني
وانت التهيل اترابي لو دفنوني
كل هذا بفكاري يدور بأخرنفاسي الليله

الشاعر ظاهر حبيب الهليجي

يــاسـنـيـن الالــم --- مـاتـت الـصـابـره
جـم جـرح يـلجــم --- بـزينب الطاهــره
---
شافت أهموم ومأسي من زغراهه
من مصاب أمهه الزجيه ولخدرهه
ساجبه العين أبمدامع كل عمــرهه
مـا يفاركهه البجـي حتى بكبـرهــه
يبجي حتى القلم --------- وسيرتج حاضره
جــم جرح يلجــم --------- بــزينب الطاهـره
---





يا سنين الصابره ماتــت غــريبــه
جم مصيبه أندفنت وياهه ومصيبه
قصه زينب بالحزن صارت عجيبه
جرح زينب بالخلـك ماصح طبيبــه
من مأسي الخيم ---------- والعليهه الـجـره
جــم جرح يلجـم ---------- بـزينب الطاهـره
---
ظـلت أثار الحرك بجفوف أديهـه
والعبايـه ريحـة الـدخُـان بيهـــــه
العاشت ابيت الرساله من يجيهه
ماتت وحتى الحزن يبجي عليهـه
ترجه راعي العـلم --------- على الجـره تخبره
جـــم جـرح يلجـــم --------- بـــزينب الطـاهـره
---


الفاكـده ديـج البـدور الهـاشـمـيــه
شافت أخوتهه ضحايه عل الوطيه
مكيده وفوك الهـزل راحـت سبيــه
هــل المصايـب رافـكتهــه للمنيـــه
بجفهه كيد أنرسـم --------- يبقــى للاخـــره
جــم جــرح يلجــم --------- بزينب الطاهره
---
بأخـر انفـاس وتنادي بأسم أخوهـه
أختــك أتناشــد أهـلهـه الفاركوهـــه
صعبه زينب ناس غـربه أيشيعوهـه
والله تبره أجروح أختكم من تجوهـه
بيهـه نوح وهظـم ---------- فـاق أهــل الـثــره
جــم جــرح يلجــم ---------- بــزينب الطاهــره
-------
تمت والحمد للـه

الشاعر الحسيني ظاهر حبيب الهليجي

آه يازينب غمظن اعيونج
اه يازينب ويدمن امتونج
موتج وكل الالم من بعد راعي العلم
*
انكتبت أبدمعج حكايه وأرخت ذيج المحن
وبين اسطرها المريبه أتبين اهات الزمن
كل حرف بيها مأسي يعني تاريخج شجن
أمن الدلال وتالي أنتي لاخوان ولا وطن
اه يازينب سيرتج صعبه
آه يازينب وغربتج غربه
عمرج ابدونه عدم من بعد راعي العلم
*
اتبدن اسنينج يزينب من مشيتي مكبله
وعفتي جم جثه خضيبه عل التراب بكربله
وحدج انتي وخيل ترهب جم يتيمه وثاكله
رغم هذا وگلتي ابقه بعد اخوي الكافله
آه يازينب جمره انفاسج
آه يازينب عفتي عباسج
گلبج ابعبره انجسم من بعد راعي العلم

انمرد جبدج يزينب والحزن بيج انطبع
ذبل عودج بلمناحه مثل ميذوب الشمع
ميته وعيونج يسيلن فوگ خدينج دمع
وصوت ياعباس وينك نبض گلبج ينسمع
آه يازينب نوحج وهمج
آه يازينب يمشي ودمج
همج الما مثله هم من بعد راعي العلم
*
أمنل سبي وذيج الصحاري خلن بجدمج اثر
وكعدتج ونتي العقيله بل خارايب والسهر
وطبت الشام وفرحهم گلبج بحسره انصهر
وذاك ديوان الشماته من وگفتي بيا قهر
آه يازينب شخلن بعمرج
آه يازينب وشعظم صبرج
حسرتج والدمعه دم من بعد راعي العلم
*
رحتي مسبيه بهزيله والدرب گاظيته هم
وروس اخوتج عل عواسل ونواظر تبجي دم
انتي اول كعبه جانت عل المحامل تنشتم
مملكه ويا وسفه هسه تقودچ ارذال الزلم
اه يازينب شنهي موضوعج
اه يازينب محنيه ضلوعچ
شچم جرح بيچ انلچم من بعد رعي العلم

الشاعر ظاهر حبيب الهليجي

هليله امصابج يا زينب --- بدموع نواسيج وننحب
بدمعه وعبره ----- انواسي الزهره
-----
للشـــام ابوفائج نرســــل الدمعه
يبت حيـدر عليج الشيعه منفجعه
بهالليله نواسي امـــــــج البضعه
ونين امج يزينب لجلــــج انسمعه
حظرت امج هذا الماتم --- جنه اعله امصابج تتهظم
واحنه بحسره ----- نواسي الزهره
-----
اهات وحزن عمرج خلص زينب
جـــــم جرح بجرح دلالج تصوب
مـن ضلع البتول وحسرتج تلهب
يا مهجت علي شكـد كلبج تعــذب
من طبرة حيدره وصوابه --- دمعاتج عالخد سجابه
بدمعه الحمره ----- نواسي الزهره



لوعات الزمن موجــــوده بمصـابج
جم قصه الـم مرويــــــــــــه بكتابج
تبدي من الضلـع ولطيحت احجابج
وبكبرج ونين لفركــــــــــــــه لحبابج
والكافل حاضر والسانه ----- وحسين يردد ويانه
لفكد الحره --- نواسي الزهره
---
عهد هذا الحزن يبقه بشعائرنه
ولبيكي عهد تلهـــــج حناجرنه
مئاتمكم امانه بدمنـــــــه وقعنـه
نحييهه بمدامع ويـــــــه قائمنـه
والمهدي الياخذ ثاراتج ----- ويبرد نارج واهاتج
بطلبت امره --- نواسي الزهره
---
صبر ايوب مو مثلج يبت حيدر
من كثر المصايـــب ياكلب يكدر
ركع صبر المأسي ويمـــج تعذر
غمضت الجفن واني الكلب يسعر
بكبرج وناتج مسموعه ----- والشيعه الونتج مفجوعه
بهاي الذكره --- نواسي الزهره

الشاعر الحسيني ظاهر حبيب الهليجي

بكبرج والكلب بي هم من طبره وضلع وخيم
وعاشر والسبي للشام وانحور ابمسيل الدم
*
خلص عمرج وانتي مرافكه الحسره
من زغرج يزينب عشتي بل عبره
يسر الله العظيم المحد ايفسره
صبرج عل الجرالج ياعظم قدره
شمعه ذايبه بل نوح دمعج مايكف مسفوح
واحد واحد اتفكدين ياجرح الذي يلتم
*
جلبابج هظم مولاتي يازينب
أظن بلكون وحدج حالج الاصعب
يمج والقلم محتار من يكتب
لان كل لحظه عشتي كلبج اتعذب
ابالج جم نحر دامي جم طفله وطفل ضامي
وعله أسنان الرماح الروس وسوط الطاغي مايرحم

يسالوفة مدامع صرتي للفاكد
والفاكد عزيزه دمعه ما راكد
وانتي إلي فكدتي اعزاز مو واحد
يدماهم والدمع مابطل يعاند
يزينب ياعظم نوحج يشح ادواهن اجروحج
همج ماتحمله اجبال وحكج منه تتهدم
*
الموت ارحم مولاتي عله الشفتيه
الكافل و العلم عل كاع خليتيه
ساعتها الأجل بل طف تمنيتيه
نهار وليل بعده بل دمع عشتيه
ميته انتي الف مره اميره ورحتي متيسره
وانتي هيبة الكرار هنانه موتج اتحتم
*
عله انفاسج سلام الله يبت حيدر
غمظتي الجفن وكليبج اموجر
حته الموت أظنه الحالج اتاثر
متنج والضلع والهام والمنحر
بكلبج خلن اللوعه رحلتي بروح مفجوعه
يازينب سلام الله عليج الليله نتالم

الشاعر الحسيني ظاهر حبيب الهليجي

وين الكفل حان الاجل حلت منيتي
يابن علي محد الي يحضر رزيتي
يابو الحميه الليله المنيه
*
الليله زينب يابوفاضل حان اجلها
وصعبه بت حيدر يخويه ابلايه اهلها
ناس غربه وديره غربه ومحد الها
عوف گبرك وحظر اختك يا املها
انه ارتجي ريتك تجي وتغمض الاعيون
وسادة ألم والدمعه دم واهات المتون
ضاكت عليه الليله المنيه
*
يل بقه الفگدك لحد هسه ونيني
بأخر انفاسي اريدنك تجيني
اتسبل أيدي خويه وتغمضلي عيني
ومااريدن غيرك اليمسح جبيني
تالي صفن بختك محن ظيم ومصايب
غربه ويسر وابلا خدر عشت بخرايب
انه الابيه الليله المنيه

حته لو موتن تظل اجروحي بيه
جرح راسك عل الرمح وانه سبيه
وجرح ثاني ماتت گبالي رقيه
وجرح راس حسين يم ابن الدعيه
دمعي يصب تدري بغرب وانه الاميره
دار الوكت بيه وصرت خويه الاسيره
عشت برزيه الليله المنيه
*
غسل اختك خويه بلدمع التصبه
وادري آثار المتن گلبك تعذبه
ورايتك جفني بيها وهاي طلبه
ومن ابو اليمه حنوطي اتخلي تربه
شح الهوه مات الضوه بعيوني خويه
بيدك تسد باب الحد يا ابن ابويه
وسوي العزيه الليله المنيه
*
كربله والشام خلت بيه لجمات
من كثر مامر عليه احسد المات
لأن كل لحضه عشتها بيها مأسات
سنيني خلصن يابو فاضل بل معانات
دمعي دمه و مألمه من وادي الا طفوف
جرحي ابد ماله ضمد وماينفع الروف
انطرلي جيه. الليله المنيه

لحن....جرح المدينة....الحاج باسم الكربلائي



بالغاضـــرية        زينب سبيــة
*****
آنه الچنت وي أخوتي ما اطلــع من البــاب
مثلــي أبد يابالـــفضل ماكــو مــرة تنهــاب
بعد الخدر فوكَ الهزل راح أمشي وي اجناب
چم لوعة باچر بالسبي وبكَلبي چم اصواب
تنزل عليـــة       زينب سبيـــة
*****

يبدي مصابي وحيرتي  بس ما يهل عاشور
بعيني أشوفن چم نحــر وشچــم ظلع مكسور
شمالة الحزن من الزغــر كلسا عليــة يدور
يوميــة مـوت وفاجعة صارت حياتي كَبــور
هم تدري بيــة        زينب سبيـــة
*****

ضيمي يشّيَب چم نبي ويعميــلة چم يعكَوب
حتى الصبح لمن يهل بي وحشه مال غروب
باچـر يخوتي بالسبي شكَد راح أطب دروب
شيصبرة كَلبي والصبـر رايدلة عشر كَلوب
وآنه شبديـــة        زينب سبيــــة
*****
بعيوني ما شفت الشمس عندي الخدر قُرآن
باچــر اديــة مچتفـــه لا خيمـــة لا خــــوان
والچنها سورة (هل أتى) يشتمها ياهو الچان
كل دكَه من كَلبي ألم وأنفاسـي كلها أحـزان
شفت المنيـــة      زينب سبيــــة
*****
يعادل قهر چـم كربلة ياخوية سبـــي الشام
بروحي يبات شكَد حزن وبعيني نار خيـام
كل ليلة باچر بالسبي تعادل يخوتي اعوام
لو وحدي يمكن ينحمل بس ضعني كله أيتام
شلون برقيـــة        زينب سبيــــة
*****
كون بوسط روحي السهم موش ابدليل حسين
لــو ميته يم المشرعة وبكَلبي سهم العيــن
لــو عمري واكَـــع عالنهر ويظلــن الچفــين
باچـر بنات المصطفى تدري يروحن ويــن
وية آل أميــــة        زينب سبيــــة
*****  
باچــــر أكَلّلمــن أذا شتمونـــي يا عبـــاس  
الحركَو خيم زينب أمــس يابالفضل حراس
لريتــي اجيبن يا هوى من توكَف الأنفــاس
بكــل الشوارع تنتظر ضعن العقيلة النـاس
الچنها الزجيــــة       زينب سبيـــــة
                 حيدر حسين الكرعاوي

آه على زينب بـت علي آه
آه على زينب بـت علي آه
**
يبچي الزمـــان عليــچ للآن
الله يضيمــــچ يــّم الأحـــزان 
ضعنــچ يزينب كلـــه نسوان
بس المصــايب چـــانت وياه
**
احنــه؟ وقهرنـه يوم عــاشور
لا سبــي شفنه ومثلــچ نحــور
مو حكَــه كَلبــچ لســه مقهور
يبَچيچ لســــه حسين فركَـــاه
**
ما متي مدري بكربلة شلـون
وشفتي اخوتچ كلهم يموتـون
كَلبــــچ وياهم لســـه مدفـون
مثلـــچ ولا ننســــه حُسينــاه
**
من شفتــي من التــل الخيول
الچانت على صدر النبي تجول
ما وكَف كَلبـــچ يعنــي معقــول
وشفتـي المثلث حــافر چــــلاه
** 
يا نوم هــــوه المثلــچ ينــــام
ومحروكَــه زينب كل الخيـــام 
مچتــوفه أديهــا تروح للشــام
كــل القهر والضـــيم تلكَـــــاه
**
ليــل ومصيبة وفكَد الأحبــاب
كَلبچ أكيد من الحــزن شـــاب
ضعن البــلاية زلام ينهــــاب؟
بين الشماتة شلون ممشــاه
**
من چنتي زينب وي عبـــاس 
أي بشــر ما شافچ من الناس
الذبحو أخـــوچ وياچ حــراس 
والشتم أمچ صرتـــي بحمــــاه
**
يلومونه من نلطم على حسين
مــن عدنـه زينب قـهر ميتيـن
مطلــوبة هاي اركَابنـــه ديـــَن 
مذهبكم أهـــل الــبيت نفــــداه 
**
حيدر حسين الكرعاوي

اكبر جريمة بالدهر.
يسبون عمت المنتظر.
الوالد ولي والجد نبي.
وأخوتهه اسباط وگمر.
،،،،،،،،،،،،،،،،،،،،١،،،،،،،،،
سيدت نساء أهل الأرض. والسمه أمهه فاطمة
زينب رسالت كل نبي.
حفظت قرارات السمة
أم الخدر وام الصبر.
تعدد ألقاب العالمة
تشبه علي بنت النبي.
تحمل مئات الأوسمة.

لولاهه راحت كربله.
وحسين أخفوا مقتله.
ومشكات زينب كالفجر.
تشرق نهار اعله الصور.
وأخوتهه اسباط وگمر.
،،،،،،،،،،،،،،،،،، ٢ ،،،،،،،،،

ياوسفه بت سيد البشر. بالصوط يضربهه النذل.
المخطوط اسمهه اعله العرش.
ايصعدونهه فوگ الهزل.
الكاسر ظهرهه والگلب. عباس اخوهه ينچتل.
ضلت اچفوفه اعلنهر. وبچفوفهه ظل الحبل.

اشچم طيحه طاحت عالارض.
بس تاجهه ظل بلحفض.
ماطاح تاج أخت البطل.
ضلت أميره اعله البشر.
أخوتهه اسباط وگمر.
،،،،،،،،،،،،، ٣،،،،،،،،،،

للشام تمشي ميسره. العدوان ترميهه بحجر.
القصر ال أمية ابلا رحم.
زينب يشبعوهه قهر.
يضرب يزيد بعصته. شفاف الحسين المن درر
ويشمت بزينب والحرم .
وبقتل الحسين افتخر.

گالتله لا تفرح أبد.
ايامك وحكمك عدد
ييزيد كل جمعك بدد
كل التحداهه عثر.
وأخوتهه اسباط وگمر.
،،،،،،،،،،،،،٤،،،،،،،،،،،،،،،
زينب أميره مدللـــــــه.
ويابس وجهه من الشمس.
الحرية صارت تنسجن ابوصط الخرايب تنحبس.
تودع رقية بياگلب.
شبگت الراس وبي تحس.
ماتت رقية ابلا حضن.
من الحرگه كتلوا چم نفس.

بأي ذنبن قوتلت
رقية ليش أتعذبت.
راحت لبوهه شاكيه.
وزينب دمعهه كالمطر.
وأخوتهه اسباط وگمر.
،،،،،،،،،،،،،٥،،،،،،،،،،،،،
بالغربة زينب تحتضر.
لا أخو يمهه ولا ولد.
ماتو أهلهه بكربله.
ومسبيه يومية البلد.
بالشام ماتت والحزن.
ماتت غريبة ابلا سند.
عن كربله بعيد الگبر.
مو يمهه عباس الأسد.

بكل عزه زينب تنذكر.
بكل مجلس أسم أم الخدر.
كل ناعي يازينب قره.
زينب غريبة وبالخطر.
وأخوتهه اسباط وگمر.
،،،،،،،،،،، ،،،،،،،،،،،،

حيدر موسى الرميثي