#بعد_التخرج 2

بسم الله
🩸 أنت كطبيب في السودان بعد تتخرج وقبل تحصل على التسجيل الدائم في المجلس الطبي لازم تقضي فترة اسمها فترة إمتياز،واجبة عليك سواء قريت طب بنظام الخمس سنوات أو الست سنوات، الفترة دي مدتها سنة كاملة ١٢ شهر، مقسمة على الأربعة أقسام الكبيرة، (باطنية-جراحة-بدياتريك-أوبس)، كل شيفت من الأربعة ديل مدته ٣ شهور.

🩸يلا متين بيتم توزيعك لأداء فترة الإمتياز؟؟ للأسف في السنوات الأخيرة التوزيع بيكون بعد فترة طويلة شديد من أداءك للقسم، مدة قد تصل لعامين كاملين 💔بالذات بعد الحرب.... وحتى التسجيل التمهيدي المفروض تحصل عليهو بعد القسم مباشرة والحتتوزع بيهو للإمتياز بقو ما بدوك ليهو، والكلام دا حاصل من شهر فبراير أو مارس القبل الحرب، لأسباب لا نعلمها...

🩸في السنوات الأخيرة وبسبب التأخر دا بقوا الطلاب بعد يتخرجوا مباشرةً بمشوا المستشفيات عشان ينزلوا فيها كـ"أطباء إمتياز متعاونين" وهو ما يعرف بالattachment أو الأتاش... بقولوا عشان فترة السنتين دي ما يقعدوا ساي أو ينشغلوا بحاجة تبعدهم عن جو الطب، والموضوع بيتم كاتفاق بينك وبين المستشفى أنه أنا حأشتغل معاكم فترتي المقررة دي في الشيفت المعين أو الشفتات المعينة، بورق رسمي من المستشفى استلام عمل وإخلاء سبيل (ريليز)، وحتى الطبيب بيشتري logbook ويوقّعوا عند الأخصائي الاشتغل معاهو وكذلك المدير الطبي ويختمه بختم المستشفى، عشان مستقبلاً لمن يتم توزيعه لنفس الشيفت في نفس المستشفى يجي يقابلهم ويكلمهم أنه اشتغل معاهم الشيفت دا ودي إثباتاته، وهم على ذلك برفعوا بياناته في موقع الوزارة بالتواريخ الجديدة البيتم إجازتها واعتمادها من قِبل إدارة الإمتياز. والحاجة دي بسموها (التفريغ) فبتلقى الواحد مثلاً بيقول ليك اشتغلت إمتياز أتاش وحأفرغوا لمن أتوزع...

🩸إذن فعليه طبيعة الشغل في المستشفى ليك أنت كطبيب إمتياز متعاون (أتاش) أو طبيب إمتياز (ريقيولار) موزع رسمي من قِبل الوزارة =same same. ماف أي فرق.

حنتوقف لحدي هنا وفي البوست الجاي حأتكلم عن بعض الحاجات المتعلقة بالأتاش ونظرتي ليهو بالذات في فترة الحرب دي... إن شاء الله لنا لقاء.

-طبيب على الدرب 🎒🇸🇩

بما أنه اليوم جمعة حنتكلم عن الأتاش في ميزان الشرع وفي ميزان القانون.
ونشوف هل في حاجات غلط بتتعمل في فترة الأتاش دي!
والمخالفات الشرعية البتخلي الأتاش أو الإمتياز عموماً تدخل فيهو الحُرمة..
تابعونا
وقبلها شوفو المنشورات السابقة.

#بعد_التخرج 3

بسم الله
🫀كتير من الناس المهتمة بالحلال والحرام بتسأل أنه هل حلال أنا أقضي فترة الإمتياز دي كأتاش، وهل الموضوع دا قانوني؟ صراحة ما لقيت عالم اتكلم عن الموضوع دا بالتحديد، بالذات وأنه الموضوع دا موضوع جديد نوعاً ما والناس ما مركزة معاهو، لكن حسب تحليلات ورؤى مختلفة بنقدر نصل لرأي، وحسب ما نحن عارفين وقلنا قبل كدة أنه الأتاش دا فترة إمتياز بس قبل ما الوزارة توزعك، فأنت مفروض تكون مستوفي شروط أداء فترة الإمتياز، اللي هي أبسطها أنك تكون متخرج من كلية الطب ويكون عندك مستند (إفادة أو شهادة) تثبت تخرجك، ومفروض المدير الطبي في المستشفى المعين ما يقبل أنك تنزل في المستشفى إلا تبرز ليهو المستند دا.

🫀قد يتبادر سؤال إلى عقول الناس أنه ليه لازم تبرز مستند؟ هو في شخص ما طبيب بجي يقول أنا طبيب وداير اشتغل؟ بالذات وأنه شغل الإمتياز في المستشفى شاق وما فيهو عائد مادي مجزي بالذات الأتاش...
سؤال حلو... بس كتير من الطلاب في فترة إجازاتهم وعطلاتهم بمشو المستشفى عشان يستفيدوا، ودي طبعاً حاجة كويسة شديد وما كعبة...
🖇بس الما كويس أنه الطالب دا يجي المستشفى ويستغل تساهلهم في المطالبة بالمستندات البتثبت أنه طبيب واتخرج، أو بسبب تهاون بعض النواب وحتى الأخصائيين في قبول عمل الطلاب كإمتياز... ويقوم يقول ليهم أنا طبيب وداير اشتغل أتاش، وينزل يشتغل 💔و دا موضوع فيهو غش لعدة جهات، أولها إدارة المستشفى البتكون في الغالب ما عارفاهو طالب، وأهمها المريض نفسه الما حيرضى أنه طالب يعالجه أو يكشف عليهو على أساس أنه طبيب... والعلماء مغلظين الفتوى في الموضوع دا أنه لا يجوز أنه شخص ما طبيب يدعي أنه طبيب ويكشف على الناس ويباشر عوراتهم وعلاجهم ويكشف سترهم، إلا زي البحصل في راوند المستشفى وأنه دا بتم بإذن المريض وعلمه بأنه ديل طلبة، وطبعاً ليهو الحق يرفض... وبروفاتنا الكبار حتى في الامتحانات لمن تعرف نفسك للمريض أنا الطالب الفلاني داير أكشف عليك، لو المريض قال ليك لا، البروف حيقول ليك خلاص خليهو، فما بالك بعلاج عديل.. فالموضوع غش وتوغل شديد في حرمات بعضها أظلم من بعض، وللأسف الموضوع دا كتير وشائع ويتم التساهل فيهو والتغطية عليهو، ودي أولى خطوات الحرام في الطب 💔
فأنت كطالب أي أمش المستشفى واستفيد واتعلم ما دام المستشفى حكومي وتعليمي بس تعليمك دا تحت إشراف الأطباء وتعريفك كطالب طب، ما ك طبيب إمتياز.

🍂في بعض الناس بتقول الأتاش أصلاً حرام، وأنا طالب فما دام كدة كدة حرام أحسن أقضيهو وأكسب زمني...
في رأيي أنه لو أنت خريج بتجي المستشفى دغرررري بتقول أنا متخرج وداير أشتغل أتاش، بدون كذب و لا تورية، وللمستشفى والوحدة الخيار أنها تشغلك أو ترفض، ويا دار ما دخلك شر، بس الطالب من البداية ببدأ يكذب أو يواري، وطول فترة شغلو بيكون يكذب ويغش عشان الناس ما تعرف أنه طالب، ولو عرفت حيقعد يبرر التبريرات المعهودة أنه أنا ما قاعد أضر مريض وماف فرق بيني وبين الخريج وكدة...
ودي كلها تبريرات ما فايتة على العلماء الاتكلموا في الموضوع وحرّموه قولاً واحداً، فأنت ما دام عايز تشتغل اشتغل وأنت ساكت على الأقل، وما دام رضيت تشتغل بالباطل ما تروج ليهو.

والله تعالى أعلم 🖤.

-طبيب على الدرب 🎒

لو في سؤال أو أي حاجة مفيدة بخصوص الإمتياز أو القناة راسلوني:

@doc7as

شيرك بنفع غيرك
https://t.me/tabeebme
شوف فردك وناس دفعتك

أنت كطبيب كل قضايا الأطباء بتمسّك
وأي تعطيل في أي مرحلة أنت بتضرر منه
القسم تعطيل وإجراءات عقيمة ودفع قروش
لو مريت منه عندك عقبة التمهيدي
لو مريت منه عنده عقبة فتح الملف
لو فتحتو عندك عقبة الباسوورد
لو جاك عندك عقبة الإمتياز ذات نفسه
لو خلصتو عندك عقبة البيرمننت
وما أدراك ما البيرمننت!
لو نجحت بقولو ليك إلا تقضي الخدمة
وهكذا من دوامة لدوامة ومن حيلة لحيلة
لحدي ما تلقى نفسك زهجت وعمرك فات
وأنت واقف في نفس الحتة وعقبة المجلس قدامك
عشان كدة الناس تشد حيلها وتنشر
وما توقف مناشدات عشان المشكلة تصل
عسى ولعل تجد آذان صاغية.

https://youtu.be/SQeubqE0xLE?si=DLzWCXYrA8uJ3apG


طلبة الطب في السنوات الأولى الذين يخيطون المرضى، ماذا تقول فيهم ؟

إجابة الشيخ الشيخ أبو بكر الحنبلي (في دولة مصر)

طبعا قال لا ينبغي (بمعنى لا يجوز).

لكن قال حاجة مهمة قال:
لأنه غير مسموح قانوناً

فالفيصل في الموضوع القانون،
القانون في السودان بيقول أنت غير بامتياز ما تخت يدك في عيان وتشوفه وتعالجه كطبيب، حتى لو بينك وبين التخريج يوم، والإمتياز طبعا تحت إشراف وحدة عديل بسنايرها ونوابها وبوصاتها.
والله أعلم.

*في ناس بتحتج أنه هو وينو القانون ووينا الدولة!
أنت بتعرف الدولة والقانون لمن تلقى زول عارف ويشتكيك، وقتها بتفتش للرشاوي والواسطات عشان تحلك🙂

وفي الأول والآخر الحمد لله العلماء قاعدين، اسألهم، شوف رأي الشرع عندهم، قبل يسألوك هناك... وعشان حتى لو الدولة ما عرفتك أو الواسطة حلتك حيجي يوم ترقد في قبرك براك وتُبعث براك وتقيف يسألوك براك. فـ أعِد للمسألة جواباً.

كان السؤال

وكانت الإجابة

الأتاش مشكلته شنو

مسألة أنك تعيد الإمتياز دي أبداً ما ساهلة
لو عدت شيفت واحد (٣ شهور) حتكون صعبة عليك، لأنه في حساباتك دي مرحلة أنت اتخطيتا، وخضت غمار التجربة دي وما داير تكررها رغم حلاوتها.
خلال ال١٢ شهر الفاتو ديل كمية من المستشفيات خرجت عن الخدمة، فالناس العملو فيها أتاش حالياً بعد اتوزعوا رسمي بقى ليهم موضوع التفريغ في مستشفى تاني في ولاية تانية صعب عديل وفي أغلب الأحيان مستحيل.
فنصيحتي أنت لو داير تكسب زمنك جد جد اقرأ وامتحن أي معادلة أو زمالة أو أعمل ماستر حسب المتوفر عندك، أو ادخل مجال العمل واكسب حلال من أي شغلة، بدل مرمطة الأتاش والتفريغ، وما معروف لمن أنت تتوزع القرارات الجديدة حتكون شنو، احتمال يوقفوا الموضوع دا نهائي، ماف حاجة مضمونة.

حتشوف زميلك طالع ونازل من وإلى المستشفى
حتلقى ناس البيت والجيران يقولو ليك فلانة صاحبتك بقت دكتورة شغالة في المستشفى
معظم الشلة ونستهم حتكون الديوتي والمستشفى والعيان والبوص والمستر

طالعين ونازلين خلاص دخلوا الحقل الطبي

فعلاً دا كرت ضغط عليك أنك تنزل أتاش، بس صدقني سنة الأتاش دي أنت لو عندك طريقة تعمل فيها أي واحدة من الplans B الأنا ذكرتهم ديل أنت حتطلع كسبان أكتر منهم.

حنواصل إن شاء الله
خليكم قريبين وجيبوا أصحابكم🔥

من أجمل أنواع اللطف الإنساني أن تكره وقوع الناس فيما وقعت فيه، وتقدم لهم النصيحة التي توفر عليهم ما لم تستطع توفيره لنفسك.

- محمود توفيق

(من تطبَّبَ ولم يُعلمْ منهُ طبٌّ فهوَ ضامِنٌ)

الراوي : [جد عمرو بن شعيب] | المحدث : ابن حجر العسقلاني | المصدر : هداية الرواة | الصفحة أو الرقم : 3/392 | خلاصة حكم المحدث : [حسن كما قال في المقدمة]


(أيُّما طبيبٍ تَطبَّبَ على قَومٍ لا يُعرَفُ لهُ تَطَبُّبٌ قبلَ ذلكَ فأعْنَتَ فهوَ ضامِنٌ)

الراوي : بعض الوفد | المحدث : الألباني | المصدر : صحيح أبي داود
الصفحة أو الرقم: 4587 | خلاصة حكم المحدث : حسن


في هذا الحديثِ يُحذِّرُ النَّبيُّ صلَّى اللهُ عليه وسلَّم الإنسانَ مِنَ الإقدامِ على شيءٍ يَجهَلُه، حيثُ يقولُ صلَّى اللهُ عليه وسلَّم: "أيُّما طَبيبٍ"، الطَّبيبُ هو العارفُ بالطِّبِّ ومُعالجتِه للأمراضِ، "تَطَبَّبَ على قومٍ لا يُعْرَفُ له تَطَبُّبٌ قبْلَ ذلك"، أي: جَعَلَ يُمرِّضُ في قومٍ ويُعالِجُ مريضَهم ولم يَشْتَهِرْ بينهم بأنَّه ذو معرفةٍ وخِبرةٍ بالطِّبِّ، "فَأَعْنَتْ، فهو ضامِنٌ"، أي: أَضَرَّ بالمريضِ، فالطَّبيبُ هو الضَّامِنُ بالدِّيَةِ بالقَدْرِ الَّذي أضَرَّ به المريضَ.

وودتني قصة حزينة اليوم 💔
عن شاب يمكث مع أسرته في منطقة سيطر عليها الدعم السريع، فأصابوه برصاصة اخترقت رجله وخرجت، فذهب به أهله إلى المستشفى الخارج عن الخدمة أصلاً الخالي من الأطباء، فيه بعض الممرضين وطلاب التمريض وبعض المجالات الطبية الأخرى، يمارسون الطب كأنهم أطباء، فقام أحدهم بخياطة الجرح 💔الذي ما لبث أن اجتمع فيه القيح والصديد من العدوى، وتفاقم الأمر إلى أن بُترت ساق الشاب. 💔💔💔
نسأل الله له تمام العافية وأن يعوضه ربنا خيراً.
حسبنا الله ونعم الوكيل.

#بعد_التخرج 4

السلام عليكم
لو داير تنزل تتوزع في مستشفى سواء ريقيولار أو أتاش يُفضل أنك تمش المستشفى عديل تشوف الشغل كيف، والوحدات، والأيام، وتفهم آلية الشغل في المستشفى.
زمن الجامعة لو حدك مع المستشفى الحاجات الرسمية بتاعة الجامعة حيكون غائب عنك كتير من فهم المستشفيات.
يعني شنو ديوتي، ويعني شنو نبطشية، وهل بتسد ٢٤ ساعة ولا ١٢، والفرق شنو؟؟؟ ويعني شنو الوحدة الفلانية والUnit الفلانية؟ والفرق شنو بين كل يونت والتانية؟ ومواصفات كل يونت ومميزاتها وعيوبها بالنسبة ليك ولأهداف الإمتياز وأهدافك أنت في شخصك كطبيب.
وشغلك حيكون شنو بالضبط في المستشفى، وحدودك شنو والحاجات المسموح ليك تعملها شنو، وإلزامي عليك تعمل شنو و المحظور شنو؟
وعلاقتك حتكون كيف مع الأطباء المعاك، سواء كانوا أطباء إمتياز (هاوس أوفيسرز) زيك، ولا عموميين (ميديكال أوفيسر) ولا نواب (رجسترارز) وأخصائيين (بوص&مستر).

الحمد لله أنا وقتها في طبيب صاحبي زول خدوم شديد شغال في المستشفى، اتفقت معاهو على يوم مشيت ليهو في المستشفى مررني عليها قسم قسم، أطفال.. باطنية.. جراحة..نساء وتوليد... وفي كل قسم وراني عدد الوحدات ومواصفات كل وحدة وأيام نبطشياتهم وترك لي حرية الاختيار، فجزاه الله عني خير الجزاء 🍃🖤.