و الاستياك استعمال السواك قبل الوضوء.

و كلها مستحبات.

راجوا مزال نسيت في مستحبات ثانيات سقطوا سهوا معليشي هي كملوا معاي المستحباب مزال ما تموش.

المستحب الرابع:

البدء بمقدم الأعضاء و حدود كل عضو.

الوجه تبدأ فيه من فوق من منبت الشعر الإعتيادي إلى طرف الذقن و العرض من الأذن إلى الأذن.

المنبت الإعتيادي يشمل حتى الأصلع.

و يخلل شعر اللحية الخفيف و اللحية الكثيفة لا تُخلل -علىٰ قول مالك-.

و البدء بالميامن مستحب، و هو موضع خلاف طويل، الأصح توضأ باليمين أولا طبعا.

المستحب الأخير: تخليل أصابع الرجلين.

هي قريب نكملوا مزال الفرائض بس ركزوا هما أهم شيء.

فرائض الوضوء:

غسل الوجه.
غسل اليدين إلى المرفقين.
مسح الرأس.
غسل الرجلين إلى الكعبين.

يعني لو جبت أهما الأربعة فقط وضوءك صحيح بإذن اللّٰه.

و قبلهم الأربعة أول و أهم فريضة هي:

النية.

غسل الوجه تفاهمنا من منبت الشعر للذقن ومن الأذن للأذن.

غسل اليدين إلى المرفقين:

تبدأ بغسل يديك و تخلل أصابعك و التخليل يكون من الظاهر مش من الباطن يعني متشبكش يديك لأن التشبيك مكروه.
و تغسل يديك لعند مرفقيك و المرفق يدخل في الغسل و الخطأ الي ديما يصير هو السهو عن تعميم المرفق بالماء، فـ ديروا بالكم يا شباب من الشيء هذا وبارك الله فيكم.

مسح الرأس: من المنابت إلى القفا.

طبعا المسح بأي طريقة يمشي لكن ركزوا معاي شوي في الطريقة المزبوطة

تغسل يديك بالماء و تقرن صوابعك ببعض يعني تربط يدك اليمين و اليسار في بعض و تحط ابهاميك على صدغيك و تمشي بصوابعك المقرونات لفة لقفاك و ترجع.

و تمسح أذنيك من الظاهر و من الباطن تبي بـ نفس الماء ماشي تبي تجدد ماشي.

أخواتنا النساء:
نفس الشيء مسح الرأس و بالنسبة للشعر امسحي الشعر الي على راسك و الي مسترسل مش واجب عليك تمسحيه.

للتنبيه، في النقطة أهيا خرجت عن النص، لأن عند المالكية تمسح المرأة جميع شعرها، و الواجب مسح الرأس لأن الآية تقول و أمسحوا برؤوسكم مش شعوركم و كيف الحال مع الأصلع و غيره فـ المسألة خلاف مذهبي و إن شاء الله وصل الصح.

و الفرض الأخير غسل الرجلين و التخليل مستحب و لو بتخلل مستحب تخلل بيدك اليسار و الغسل يكون إلى الكعبين انتبهوا و بارك اللّٰه فيكم.

بعد الوضوء تقدر تذكر الله و تقول الشهادة و الحديث عند مسلم.
و تقدر تقول اللهم اجعلني من التوابين و اجعلني من المتطهرين، و الحديث عند الترمذي، و تقدر تقول سبحانك اللهم و بحمدك أشهد أن لا إله إلا أنت أستغفرك و أتوب إليك، و الحديث عند النسائي.
و تقدر تجمعهم كلهم.