Bilasizmi, kutilgan javobni olmaslik sizni nimaga olib keladi?

Bu sizga ayni paytda kimdan nimani kutish mumkinligini — yoki umuman hech narsa kutmaslik kerakligini — o‘rgatadi.

Avvallari bunday gaplarni faqat nazariy qabul qilardim, lekin endi ularni yuragim bilan his qila olyapman.

Boshlanishda sizga aziyatdek tuyulgan narsa zamirida aslida butunlay boshqa ma’no yotadi.
Har bir bizga yoqqan yoki yoqmagan voqea-hodisada albatta biror hikmat, biror hayr bordir.

Aynan shuni chiroyli tarzda ifodalagan “Jumali” asari menga juda ma’qul bo‘lgan edi.

@susambil_lik

Imom Ahmad Abdurrohman ibn Jubayr ibn Nufayzdan u esa otasidan rivoyat qiladi. U dedi:
Kunlarning birida Miqdod ibn Asvad huzurida o'tirgan edik, oldimizdan bir kishi o'tib qoldi va: Rasululloh sallallohu alayhi vasallamni ko'rgan mana shu ikki ko'zga havasim keladi. Biz ham siz ko'rgan holatni ko'rsak, siz guvoh bo'lgan narsaga guvoh bo'lsak edi, - dedi. Uning so'zlaridan Miqdodning achchig'i chiqdi, men esa bundan ajablanmadim, chunki u yomon gap gapirmadi. Miqdod haligi kishiga yuzlanib dedi:

Kishini Alloh uning bo‘lishini istamagan o‘rinda "Qaniydi, men ham bo‘lsam edi", deb orzu qilishga nima majbur qildi? Axir u o‘sha yerda bo‘lsa, holati qanday bo‘lishini bilmaydi-ku. Allohga qasamki, Rasululloh sallallohu alayhi vasallam huzurlariga shunday bir qavmlar hozir bo‘ldiki, Alloh ularni yuzlari bilan jahannamga uloqtirdi.

Bu holat hammamizda bo‘lgan, to‘g‘rimi? “Falon davrda, falon joyda, saodat asrida yashaganimda edi”, deb orzulaganmiz yoki hech bo‘lmasa bunday so‘zlarni boshqalardan eshitganmiz. Albatta, bu so‘zlar muhabbatdan kelib chiqadi, lekin o‘ylamaymizmi?

Keling, hayotimizga yaqinroq misollar keltiray:
“Falon lavozimda bo‘lsam”, “faloncha boyligim bo‘lsa”, “ana undan keyin falon ishlarni, falon yaxshiliklarni qilaman”, deydi odam. Birodar, o‘sha o‘ringa chiqib, o‘sha niyat qilgan ishlarni qiling — tamom. Chunki sen qayerdan bilasan, o‘sha darajaga chiqqaningda, nafsing senga bu ishlarni qilishga yo‘l berarmikin? Axir bugungi amaldorlar, boylar ham bir paytlar hozirgi amallariga zid bo‘lgan niyatlarni qilgan bo‘lishlari mumkin-ku.

O‘zimdan misol keltiraman: bir necha bor o‘ylaganman — “Koshki, men G‘azoda bo‘lsam edi”, deb. Lekin keyin o‘yladim: ular sabr qilgan sinovlarga men sabr qila olarmidim? Shundan keyin tavba qildim.

Xulosa shuki, inson o‘zi egallamagan o‘rinlarni orzu qilib, hayol surib, vaqti va qalbini sarf etmasin. Chunki u bilmaydi — aynan o‘sha holatda uning holi qanday bo‘lardi.

@susambil_lik

Odamlar butun boshli tuyg'ular olamini bitta so'zga qamab qoʻyishadi - masalan, tashvish, sogʻinch, alam.

Lekin bu hissiyotlar dushman emas.
Sogʻinch zaiflik belgisi emas.
Alam - magʻlublik emas.

Ular - yashaganing, sevganing, biror narsa sen uchun muhim boʻlganining isbotidir.

Ularga qarshi kurashma.
Ularni tingla. Ular oʻrgatadi.

@susambil_lik