СӨ СИТЭРИИЛЭЭХ БЫЛААҺЫН 2024 СЫЛЛААҔЫ ҮЛЭТИН-ХАМНАҺЫН ОТЧУОТА ➡️ УҺУН КҮӨЛ.

🔹Отчуоту истэ урукку сыллардааҕар элбэх киһи кэлбитин бэлиэтиэххэ сөп. Атын Хочо нэһилиэктэригэр курдук, олохтоохтор сүрүн кыһал5аларынан заправкалыыр тэрилтэ үлэтэ, бензин, уот тарыыба буолар. Альтернатива да, олох сайдыытын да быһыытынан газ кэлиитин туоһуластылар. Онуоха Сунтаар улууһугар приоритет быһыытынан уотунан ититии буоларын, газ кэлиитэ 2030 сылга диэри суох диэн чуолкайдык быһаарда.

🔹Tыа хаһаайыстыбатын линиятынан, элбэх оҕолоохторго анаан дьиэни элбэхтик туттахха эрэ, тыа сиригэр дьон олохсуйуоҕа, олох сайдыаҕа. Онон бу хайысхаҕа үлэ салгыы барыаҕын иһитиннэрдилэр.

🔹Доруобуйа харыстабылын, улуус киинигэр балыыһа тутуутун боппуруостара эмиэ тумнуллубатылар. Маныаха сытар да, көрдөрүнэр да балыыһалары тутуу "Доруобуйа" Национальнай бырайыагынан былаан быһыытынан бара турар. Чуолаан, Уһун Күөлгэ фельдшер-акушер пууна тутуллан толору кыамтатынан үлэлии турара биир үтүө көстүү буолар.

Олохтоохтор отчуоту туруорбут Георгий Степанов уонна кэлбит специалистар ыйытыыларга сиһилии, толору хоруйдарын, элбэх туһалаах иһитиннэриилэрин иһин махтанан туран, ситиһиилэри баҕардылар уонна отчуоту биһирииллэрин биллэрдилэр.

🚀@suntaar_ulus

СӨ СИТЭРИИЛЭЭХ БЫЛААҺЫН СЫЛЛААҔЫ ҮЛЭТИН-ХАМНАҺЫН ОТЧУОТА ➡️ ТҮБЭЙ.

🔹Бүгүн саха дьонугар күндү, сахабыт уһуктар, санаабыт саргыланар күммүт - төрөөбүт тыл, сурук-бичик күнэ. Дьиҥ сахалыы куттаах, сүдү киһи Сэргэй Сибиэрэп-Кыыл Уолун дойдутугар кэлбит ыалдьыттары арчылаан, алгыстаан, арыылаах алаадьынан, кымыһынан айах тутан көрүстүлэр. Бөлөх салайааччыта Георгий Степанов поэт Күндэ төрөөбүт тыл туһунан хоһоонунан отчуоту са5алаата.

🔹Уустук сырыылаах-айаннаах кырыы нэһилиэк кыһал5алара, туруорсуулара бу түгэннэри кытта сыһыаннаа5а биллэр. Биир өттүгэр иккитэ эбэни туораан, 1500 борогуону төлөөн бүтүн күнү бараан сылдьаллар. Онон уматык, уот-күөс сыаната үүнэ-тэһиинэ суох үрдүү турара чаҕытар. Дьон, ыччат олохсуйуута а5ыйаата, ынах, сылгы сүөһүнү иитэр дьон сааһыран, бу төрүт дьарыгы ким тутан хаалыай диэн дьиксинэллэр. Оҥоһуллар өҥөлөргө, ыал балаһыанньатынан, социальнай араҥаларга көмө, субсидиялар, чэпчэтиилэр, кырыыба сирдэри эбии үбүлээһин тустарынан ыйыталастылар, туруорустулар.

🔹Нэһилиэнньэ мунаарара, билбэтэ да үгүс. Холобурга, уот төлөбүрүгэр олохтоммут диапазоннар, сорох субсидиялар, кэнники киирбит чэпчэтиилэр тустарынан сырдатыы ситэ барбата көһүннэ. Бу түгэннэргэ олохтоохтор хомуур санааларын Светлана Илларионова туомтуу тутан кэпсэттэ. Биир ытыктанар кырдьа5ас "нэһилиэнньэ ахсаанын элбэтиэххэ, дьону олохсутуохха диигит эрээри, харчы биэрэ-биэрэ дьону куоракка көһөртүү тура5ыт" диэн хомуруйар кэриэтэ этэрэ толкуйдаан көрдөххө эмиэ да сөп курдук. Атын нэһилиэккэ турбатах этиилэр эмиэ киирдилэр- быстах байыаннай дьайыы, сахалыы тылы сайыннарыы, эйгэни үөскэтии, ветеринарнай өҥө сыаната, каадырдара, уматыгынан хааччыллыыга урукку станциялары сөргүтүүнү сэргэ, саҥа хайысхалары тобулууну ыйдылар.

Олохтоохтор отчуоту бол5ойон истэн, санааларын тириэрдэн баран, отчуоту биһирээтилэр.

🚀@suntaar_ulus

СӨ СИТЭРИИЛЭЭХ БЫЛААҺЫН СЫЛЛААҔЫ ҮЛЭТИН-ХАМНАҺЫН ОТЧУОТА ➡️ ТҮБЭЙ ДЬААРХАН.

🔹Отчуоттуур биригээдэни нэһилиэк олохтоохторо арчылаан, алгыстаан, алаадьынан, кытыан ута5ынан күндүлээн көрүстүлэр.

🔹Урукку сылларга отчуокка оскуола тымныытын, ыраас уу тириэрдиитин туһунан боппуруостар тураллара. Бу сырыыга ити туһунан туруорсубатылар, таайдахха кэм кэрдии орун-оннугар туруорда5а. Ол оннугар спортивнай сааланы тутууну туруорсаллар. Маныаха Георгий Степанов республика5а инвестиционнай программаны кэтэспэккэ, баар кыахтарынан федеральнай таһымнаах Национальнай бырайыактарынан, атын да тосхоллорго киирсэн тутууну ыларга сүбэлээтэ.

🔹2023 сылга оскуолаҕа аныгы сайдыы тэтиминэн "Точка роста" кабинет бэриллибитэ да5аны, ситэритэ суоҕунан, үчүгэйдик туһаныллыбакка турар. Бу боппуруоһу улуус үөрэ5ириитин салаатыгар быһаарарга сорудахтаата.

🔹Дьахталлар тоҕо Сунтаарга төрөөбөттөрүн, уот, уматык тарыыптарын, дьону олохсутарга уопсай дьиэ тутуутун, анал байыаннай дьайыы туһунан туоһуластылар. Сүдү биир дойдулаахтара С. А. Зверев үбүлүөйүгэр бэлэмнэниинэн, музейдарын өрөмүөнүн бэйэлэрин күүстэринэн са5алаабыттар. Уһун кэмнээх туруорсуу быһыытынан саҥа музей дьиэтин, уруккуттан баҕа санааларын - Сибиэрэп олобурдарыгар туристическай маршруту киллэрэргэ транспорт, айар, сыньанар дьиэ тутуутун туһунан эттилэр.

Правительство ааспыт сыллаа5ы үлэтин биир санаанан биһириибит диэтилэр.

🚀@suntaar_ulus

🎭 Саха тыйаатырыгар Сунтаар артыыстара сонун испэктээкили көрдөрдүлэр

🔹 Бүгүн, төрөөбүт төрүт тыл уонна сурук-бичик күнүн көрсө, Былатыан Ойуунускай аатынан Саха тыйаатырыгар Владимир Николаев аатынан Сунтаардааҕы норуот тыйаатыра Анемподист Иванович Софронов-Алампа суруйбут «Олох дьэбэрэтэ» драматын туруорда.

🎭 Режиссер Динислам Тууйас уонна артыыстар бэйэлэрин талааннарын уонна уус-уран көрүүлэрин испэктээкилгэ киллэрэн, көрөөччүлэргэ ураты киэһэни бэлэхтээтилэр.

Сиhилии ↩️

📲 Подпишись на @ulusmedia

СӨ СИТЭРИИЛЭЭХ БЫЛААҺЫН СЫЛЛААҔЫ ҮЛЭТИН-ХАМНАҺЫН ОТЧУОТА ➡️ СИЭЙЭ.

❇️Олохтоохтор хас сыл аайы правительство отчуотугар тымныытынан салытыннарар
оскуолаларын оннугар саҥа оскуола тутуутун туруорсаллар. Республика үрдүнэн араас туруктаах эргэ эбийиэктэр элбэхтэр. Инньэ гынан сиэйэлэр оскуолалара өссө да 49-с уочаракка турар диэн буолла, өр кэтэһиилээх буолсу диэн хомойдулар. Арай соторунан уһуйааннара капитальнай өрөмүөнэ былааннаммытыттан эгди буоллулар.

❇️ Урукку кэмҥэ Прокопий Көҕөннүүрэп диэн бэрт сытыы туруорсуулардаах, эппитин ыһыктыбат кырдьаҕастаахтара. Кини өҥөтүнэн ордук сир-дойду уутун түһэриигэ, ханааллары тутууга элбэх үлэ барбыта дииллэр. Кинини солбуйуох Александр Николаевич Алексеев, Алексей Филиппов курдук туруорсуулаах дьон бааллара киһини үөрдэр, сэргэхситэр: тыа хаһаайыстыбатыгар агрокластердары,агрохолдиннары, оҥорон таһаарыыны тэрийии, сир-уот, уматык-оттук, уот-күөс, ууну түһэрии боппуруостара, почтаны таһыы, демография көстүүлэрэ, үлэлээх-дьарыктаах буолуу, эдэр специалистары олохсутуу туһунан сытыы кэпсэтиилэр таҕыстылар.

❇️ Атын нэһилиэктэргэ ааспыт сыллардааҕы отчуоттарга бэлиэтэммит туруорсуулары эридьиэстээһин суох буоллаҕына, манна уонча сылтан бэттэх туох уларыйыы буолбутун ааҕа билэллэрэ сөхтөрдө. Бу күннэргэ айан суолугар ыал сылгыларын массыына түҥнэри көтөн, ииппит-харайбыт баайдарыттан көрө матыы дьону улаханнык аймаабыт. Онон тыастаах-уустаах кэпсэтиилэр тахсыбыттара баа буолбатах. Биир тылынан 3 чаас устата салҕаммыт бэрт интэриэһинэй, астык мунньах буолла.

"Өссө тугу кэпсиигит, ыытыахпытын баҕарбаппыт" диэн тыллара сиэйэлэр отчуоту олус биһирээбиттэрин ырылыччы көрдөрөр.

🚀@suntaar_ulus