2025 сылга үлэҕэ киирбит эбийиэктэр:

- Сунтаарга тыа сирин территорияларын кэлимник сайыннарыы тосхолунан тыа сиригэр чугаһынан суох “Байҕал” Бассейннаах спортивнай комплекс үгүс дьон үөрүүтүн үрдэтэ үлэҕэ киирдэ.

- Кириэстээххэ “Саргы түһүлгэтэ” Социальнай-култуура киинин 1-кы уочарата бу ахсынньы ыйга үөрүүлээхтик аһылынна.

- Сунтаарга “Хаарбах дьиэттэн көһөрүү” тосхолунан үс дьиэ тутулунна. Уопсайа 170 квартираҕа ыаллар көһөн киирдилэр.

- Саҥа түөлбэлэргэ тыа сирин территорияларын кэлимник сайыннарыы тосхолунан “Сунтарэнерго” тэрилтэ олохтоох матырыйаалынан бэйэтин үлэһиттэригэр 6 олорор дьиэни тутан үлэҕэ киллэрдэ.

Тутулла турар эбийиэктэр:
- Сунтаарга 450 миэстэлээх политехническай лицей республика инвестиционнай программатынан тутулла турар. Тутуу бүтэр болдьоҕо 2026 сыл балаҕан ыйын 1 күнэ.

🚀@suntaar_ulus

Суол-иис хаһаайыстыбата

🔹🔹🔹Бу сылга республикатааҕы Суол-иис пуондатын үбүлээһининэн Сардаҥа-Тэҥкэ учаастагар 6,5, Тойбохой-Дьаархан 5,5 мөл тахсалаах өрөмүөн барда, уопсайа 5 км уһуннаах кэрчик.

Устье-Кэмпэндээйи республиканскай суолталаах суолугар “Строймост” тэрилтэ Улахан Харыйа муостатын реконструкциятын түмүктээтэ.

Сунтаравтодор тэрилтэ “Бүлүү” федеральнай суол Күккүрэ-Бэс үрэҕэ кэрчигэр 6 км, Айан-Суол тэрилтэ 6,5 км суол кэрчиктэрин асфальт бүрүөһүн ууран, сырыы-айан биллэ сыыдамсыйда.

🚀@suntaar_ulus

Промышленность

2025 сылга Кэмпэндээйигэ туус хостонор буолбута 385 сылын туолла.

Бу сыл 11 ыйын түмүгүнэн “Кэмпэндээйи” туус хампаанньата 1654 т техническэй тууһу хостоото. Итинтэн 785 т батарда. Аһылыкка туттуллар туус линиятын ылан, ахсынньы 1 күнүнээҕи турунан 51 т аһылыкка туттуллар тууһу бэлэмнээн, суулаан-хаалан атыыга таһаарда.

“Сунтарцеолит” тэрилтэ 52 тыһ 800 т таас чоҕу хостоото, итинтэн 36 400 т туһаҕа таҕыста. Сүрүн туһанааччы - Сунтаардааҕы ЖКХ филиала, итини тэҥэ чоҕу Өлүөхүмэ, Мирнэй уонна Ленскэй тэрилтэлэрэ ылаллар. 28 тыһ 317 т цеолит хостонно, сүрүн туһанааччынан АЛРОСА хампаанньа буолар.

🚀@suntaar_ulus

Энергетика

2025 сылтан Сунтаар подстанциятыгар улахан модернизация үлэтэ саҕаланна. Урут үлэлии турбут икки транформаторнай подстанцияҕа эбии үһүс подстанцияны миэстэтин буллардылар. Билигин таҥыы үлэлэрэ саҕаланнылар. Оччотугар Бүлүү бөлөх уотунан туһанааччылара балтараа төгүл күүһүрбүт энергиянан туһаныахтара.

Хаачыстыбалаах хомунаалынай өҥөнү оҥорууга
сөптөөх усулуобуйаны тэрийии.

ОДьКХ Сунтаардааҕы филиала улуус үрдүнэн 29 хочуолунайы, 9 ууну ыраастыыр станцияны (итинтэн 1-рэ модульнай ВОС ) үлэлэтэр. Чааһынай ыаллары киин ититиигэ холбуур тосхол сөргүтүллэн, Бүлүүчээҥҥэ 2, Хороҕо 2, Маар Күөлгэ анал байыаннай дьайыы кыттыылаахтарын дьиэлэрэ киинтэн ититиигэ, ыраас ууга холбонон, дьон олоҕун хаачыстыбата тубуста.

🚀@suntaar_ulus

Доруобай киһи – чэгиэн уопсастыба

“Доруобуйа” Национальнай бырайыак, региональнай, муниципальнай тосхоллор тиһиктэринэн доруобуйа харыстабылын эбийиэктэрин тутуу, саҥардыы, автопааркатын анал техниканан хааччыйыы, саҥа оборудованиелары ылыы оҥоһуллар. Ол курдук Региональнай Модернизация тосхолунан Бүлүүчээн, Куокуну балыыһаларыгар саҥа массыыналар кэлэн үлэлии сылдьаллар. 2025 сылга 8 быраас, ол иһигэр хирурдар, реаниматолог-анестезиолог, харах врачтара, стоматолог, рентгенолог, Куокунуга, Устьеҕа, Бордоҥҥо орто сүһүөх медицинскэй үлэһиттэр кэллилэр.

🚀@suntaar_ulus

Үөрэҕирии

2025 сылга оскуоланы 270 выпускник бүтэрдэ. Выпускниктартан 173 оҕо орто-анал, 87 оҕо үрдүк үөрэх кыһаларыгар киирдилэр, үөрэххэ киирии 96 бырыһыаҥҥа тэҥнэһэр.
Үөрэх ситимигэр сүрүн болҕомто мэлдьи буоларын курдук билии хаачыстыбатыгар уонна идэни талыыга туһаайыллар.

Оскуолаларга араас фирменнэй кылаастар баар буолуулара – саҥа көстүү: Жатай техникума Арыылаах оскуолатыгар “Сестринское дело” кылааһы аспыта, онон оҕолор оскуоланы бүтэрэллэригэр идэлээх, бэлэмнээх бүтэриэхтэрэ.

Сунтаардааҕы технологическай коллежка АЛРОСА-кылааска, 6 оскуола 13 үөрэнээччитэ прокурорскай кылааска үөрэнэр кыахтаннылар. Сунтаар 1-кы-дээх уонна Элгээйи оскуолаларыгар аһыллыбыт педагогическай кылаастарга 36 оҕо үөрэнэр.

Сайыҥҥы өттүгэр улуус үрдүнэн 19 лааҕыр үлэлээтэ, итинтэн 4-рэ хонуктаахтар. Лааҕырдарга 810 оҕо сырытта. Спортивнай, предметнэй, МЧС линиятынан лааҕырдарга оҕолор сөбүлээн дьарыктаналлар.

Оскуолаларга патриотическай тыыҥҥа иитиигэ улахан болҕомто ууруллар. Хас оптуорунньук аайы үөрэх күнэ оһуокайынан саҕаланар, гимн толоруллар.

Сунтаардааҕы гимназия уонна политехническай лицей “Сонор” поисковай этэрээтэ үһүс сезонун Ильмень күөл Старай Русса эргин чинчийэр-көрдүүр үлэлэргэ сырыттылар. Кинилэр Аҕа дойду сэриитин сылларыгар кыргыһыы хонуутугар охтубут саллааттар кырамтатын, туттар тэриллтэри, сэрии сэбин таһааран, историяҕа суолталаах булумньулары оҥордулар.

🚀@suntaar_ulus