Оһуохай түһүлгэтэ.

🔹️🔹️🔹️ "Тоҕус оһуордаах түһүлгэ" биир сүрүн хайысхата уонна саамай элбэх кыттаачылаах оһуохай буолар. Манна оҕолорго уонна улахан дьоҥҥо тус-туһунан түһүлгэ төрүттэннэ.

Улуус баһылыга Анатолий Григорьев кырачаан этээччилэри кытта көрүстэ. Оҕолор күрэх таһымын сэҥээрдилэр, бука бары кыайардыы-хотордуу тэринэн кэлбиттэр.

Сэргэй Сибиэрэп икки атахтаахха иннин биэрбэтэх дэгиттэр оһуохайдьыт. Бэйэтин үйэтигэр Чааркааннаах Даарыйаны кытта куоталаһан куоһаран турардаах диэн кэпсииллэр.

🚀@suntaar_ulus

Сэргэй Сибиэрэп албан аата үйэлэргэ ааттаныа.

🔹️🔹️🔹️Ил Дархан Айсен Николаев дьаһалынан саха норуотун саарына, дэгиттэр талааннааҕа Сергей Зверев - Кыыл Уолун үбүлүөйдээх 125 сылын тэрийэн ыытыыга оробуочай бөлөх тэриллэн үлэ барар. Бүгүн Правительство бэрэссэдээтэлин солбуйааччы Сергей Местников салайааччылаах бөлөх тэрээһин тула дьүүллэстилэр.

Сүдү киһи аатын-суолун үйэтитиигэ сыл устата барыта 28 тэрээһин ыытыллыаҕа. Ол иһигэр кинигэлэр сүрэхтэниилэрэ, култуура эбийиэктэрин өрөмүөнэ, араас таһымнаах күрэстэр, научнай үлэлэр.

Култуура миниистирэ Афанасий Ноев көҕүлээһининэн "Ытык бэлиэ айана" төрүттэнэн аҕыс улууһу хабан үлэ барар. Бүгүҥҥү күҥҥэ Сэргэй Сибиэрэп төрөөбүт дойдутуттан - Ыгыттаттан, олорбут дьиэтин холумтаныттан саҕыллыбыт Ытык бэлиэ Уус Дьааҥы улууһугар тиийдэ.

Быйыл төрдүс төгүлүн ыытыллар "Тоҕус оһуордаах түһүлгэ" көрүү-күрэһигэр республика араас муннугуттан, барыта 575 төрүт култуураны өрө тутааччылар кыттыыны ылаллар.

🚀@suntaar_ulus

Тыа хаһаайыстыбатын сайыннарыыга, тупсарыыга үлэ барар.

🔹🔹🔹Бу күннэргэ тыа хаһаайыстыбатын министиэристибэтигэр бэйэ оҥорон таһаарыынан дьарыктанар хаһаайыстыбалары кытта сүбэ-мунньах ыытылынна. Мунньаҕы миниистир 1-кы солбуйааччыта Анна Стручкова туруорда.

Олохтоох бэйэ бородууксуйатынан нэһилиэнньэни хааччыйыыга, үлэтин тупсарыыга, сайыннарыыга туһуламмыт мунньахха "Тускул", "Ал-Су", МУП "Хочо" тэрилтэлэрин уонна Элгээйитээҕи үүт кэмбинээтин бэрэстэбиитэллэрэ кыттыыны ыллылар.

Сунтаар улууһун баһылыга Анатолий Григорьев тыа сирин дьоно-сэргэтэ чопчу хаһаайыстыба тэринэн сайдыыга тиийиэхтэрин сөбүн уонна олох хаачыстыбата тупсара мантан тутулуктааҕын бэлиэтиир.

🚀@suntaar_ulus

Тоҕус оһуордаах түһүлгэ үтүө түмүктээх буолла.

🔹🔹🔹Дьокуускайга икки күннээх тоҕус оһуордаах түһүлгэ бэрт сэргэхтик, көдьүүстээхтик ыытылынна. Уус-уран айымньы 9 араас көрүҥэ Сибиэрэп айар талаанын арылхайдык көрдөрдө, төрүт култуураны өрө тутааччылары сомоҕолоото.

Сунтаар улууһун култууратын биир сүрүн тэрээһинигэр республика араас муннугуттан барыта 797 киһи, ол иһигэр 347 оҕо кыттыыны ылла.

Түһүлгэни түмүктүүр тэрээһиҥҥэ сунтаардар тумулук туттар киһибит политическэй-общественнай деятель Климент Иванов ыалдьыттаата, аан тылы арыйда, эҕэрдэтин эттэ. Кини Сэргэй Сибиэрэп олоҕун бэлиэ түгэннэрин ахтан-санаан ааста, олус элбэх чахчылары кэпсээтэ.

Сүдү киһи үбүлүөйдээх сылын республика таһымыгар бэлиэтиир туһугар Ил Дархан Айсен Николаев анал хамыыһыйаны тэрийэн турар. Хамыыһыйа салайааччыта, Правительство бэрэссэдээтэлин солбуйааччы Сергей Местников - Кыыл Уола саха норуотун дьолугар төрөөн-үөскээн ааспыт улуу киһи. Онон кини аатын үйэтитэр биһиги ытык иэспит.

Маннык үрдүк таһымнаах тэрээһини ыытыыга биһиги биир дойдулаахпыт, "Арктик Капитал" промышленнай тэрилтэ салайааччыта Матвей Евсеев генеральнай спонсорынан буолар. Кини быйылгы тэрээһиҥҥэ 2 мөл. 200 тыһ. солкуобайы үбүлээтэ. Аны эһиил түһүлгэ 5 сыллаах үбүлүөйүгэр 3 мөл.солк. туруоруом диэн мэктиэлээтэ.

9 көрүҥ ахсын кыайыылаахтар 20-лии, 30-туу, 50-нуу тыһ.солк онтон да атын араас сууммалаах уу харчынан наҕараадаланнылар. Ону тэҥэ, муҥутуур кыайыылаахтар сэрэбиэй быһыытынан 400-түү, 200-түү тыһ.солк тардан ыллылар.

Сунтаар улууһун баһылыга Анатолий Григорьев - тоҕус оһуордаах түһүлгэ Сибиэрэп 125 сылын бэлиэтиир тэрээһин үлэлэртэн биирдэстэрэ буолар. Инникитин да киэҥ далааһыннаах, былааннаах дьаһаллар, бырайыактар олоххо киириэхтэрэ. Ол чэрчитинэн, сынньалаҥ пааркабыт саҥардыллыаҕа, култуура эбийиэктэрэ тутуллуохтара, өрөмүөннэниэхтэрэ. Бу барыта биһиги сүдү киһибит Сэргэй Сибиэрэп дьоһуннаах өҥөтө буолар.

Бу курдук, сунтаардар Дьокуускайга төрүт түһүлгэни олохтоон, уус-уран айымньы муҥутуур туонатын төрүттээн Кыыл Уолун албан аатын уруйдаатылар.

🚀@suntaar_ulus

✨️✨️✨️"Тоҕус оһуордаах түһүлгэ" күрэҕэр саамай кыра уонна саамай аҕа кыттааччылары чиэстиир үтүө үгэс баар🙌

Быйылгы күрэххэ кырачаан кыттааччынан Дьокуускай куораттан "Чугдаар" ансаамбыл кэрэчээн кыыһа, 5 саастаах Анита Назарова буолла. Оттон саамай аҕа саастаах ытык кырдьаҕаһынан 87 саастаах оһуохайдьыт Прасковья Машкарова буолла👍👍👍

🚀@suntaar_ulus