Кыыл Уолун баай нэһилиэстибэтин чинчийэллэр.

🔹🔹🔹Сергей Зверев - Кыыл Уолун үбүлүөйдээх 125 сылыгар араас таһымнаах тэрээһиннэр буола тураллар. Бүгүн Дьокуускайга бүтүн Арассыыйатааҕы научнай кэмпириэнсийэ саҕаланна.

Айар илбистээх сүдү киһи кэлэр көлүөнэҕэ хаалларбыт баай нэһилиэстибэтин, олорон ааспыт олоҕун үөрэтэр, чинчийэр дьон элбэх. Аныгы кэми кытта тэҥҥэ тутан научнай үлэлэр сурулуннулар.

Бүгүҥҥү конференцияҕа ХИФУ онтон да атын чинчийэр институттар профессордара, учуонайдара киэҥ далааһыннаах, анаарыылаах дакылааттары аахтылар. Манна Сергей Афанасьевич төрөппүт оҕолоро Төгүл Зверев уонна Варвара Зверева кыттыыны ыллылар.

Улуус баһылыга Анатолий Григорьев конференция кыттыылаахтарын эҕэрдэлээтэ, Кыыл Уолун албан аатын үйэтитиигэ тус этиилэри киллэрдэ.

🚀@suntaar_ulus

Култуура эйгэтин үлэһиттэрэ Улуу Кыайыы 80 сылынан бэтэрээни эҕэрдэлээтилэр.

🔹🔹🔹Икки кэм Дьоруойдара Филипп Евсеев уонна Аҕа дойду сэриитин бэтэрээнэ Мартын Григорьев биир түһүлгэҕэ көрсөллөр. Арассыыйа Дьоруойа ытык кырдьаҕаска үтүө тылын анаата, доруобай, чэгиэн-чэбдик буолууну баҕарда.

Быйыл 100 сааһын томточчу туолуохтаах ытык кырдьаҕас Сунтаар ылбаҕай ырыатын, тойугун истэн олус үөрдэ. Дьиэтин тэлгэһэтигэр тахсан, сылаас олбоҕор олорон ытыс тыаһынан доҕуһуоллата.

Бэтэрээн саҥата-иҥэтэ эрчимнээх, кэпсээнэ элбэх. Кэлбит дьоҥҥо махталын эттэ, сулууспатын туһунан кэпсээтэ.

1943 сыллаахха эдэркээн 18 сааһын саҥа туолбут уол армияҕа сулууспаҕа ыҥырыллан баран, устунан дьоппуон сэриитин түмүктэспитэ. Дьиэтигэр 1950 сыллаахха эргиллэн кэлэн, уһуннук бытовой кэмбинээккэ хаһаайыстыбаннай чааска үлэлээбитэ. Саамай баҕарар баҕата – эйэлээх халлаан анныгар дойдубут барҕара сайдыыта.

🚀@suntaar_ulus

Сунтаардар куорат устун...

🔹🔹🔹Муус устар 9-10 күннэригэр Дьокуускайга сүдү киһи Сергей Зверев тоҕус оһуордаах түһүлгэтэ төрүттэниэҕэ. Маныаха тэрийээччилэр алгыс ылан сахалыы таҥастаах сэлэлии хаамтылар, саҥардыллыбыт Республика болуоссатыгар оһуохайга эргийдилэр.

Доҕордоһуу болуоссатыттан Республика болуоссатыгар диэри сунтаардар сахалыы таҥаһы сайбаччы таҥнан сэлэлии хаамтылар. Ураты көстүүнү куорат дьоно сэргии көрдө, хаартыскаҕа түһэрдилэр, видеоҕа уһуллулар.

Республика болуоссатыгар тиийэн оһуохайы оройуттан туттулар. Эргииргэ олус элбэх киһи киирэн түһүлгэни киэргэттилэр, таһымы үрдэттилэр.

Төрүт култуураны өрө тутааччылары сомоҕолуур, биир түһүлгэҕэ түмэ тардар "Тоҕус оһуордаах түһүлгэ" быйыл төрдүс төгүлүн ыытыллар. Ааспыт сылга фольклор араас көрүҥнэригэр 900-тэн тахса киһи кыттыыны ылбыта.

Күрэх генеральнай спонсора биһиги биир дойдулаахпыт Матвей Евсеев. Кини өйөбүлүнэн кыайыылаахтар уу харчынан наҕараадаланыахтара.

Бу курдук алгысчыт Михаил Евсеев - Кураһаай Мэхээлэ оһуохайынан, алгыһынан тоҕус оһуордаах түһүлгэ аартыга арылынна.

📽Сэлэлии хаамыы уонна оһуохай кэрэ түгэнэ👆

🚀@suntaar_ulus

Муус устар 9 күнэ - Сибиэрэп күнэ.

🔹🔹🔹Сунтаар улууһун баһылыга Анатолий Григорьев уонна улуус депутаттарын быһаарыыларынан муус устар 9 күнэ Сибиэрэп күнүнэн бигэргэтиллибитэ. Маннык үтүө күҥҥэ Өксөкүлээх Өлөксөй аатынан норуот доҕордоһуутун дьиэтигэр "Тоҕус оһуордаах түһүлгэ" көрүү-күрэс үөрүүлээх арыллыыта буолла.

Өрөгөйдөөх күн Сибиэрэп тоҕус мэҥэ хамсаныытынан саҕаланна. Манна икки күн устата республика фольклористара 9 араас көрүҥҥэ күөн көрсүөхтэрэ.

Анатолий Григорьев - Төрүт култуураны өрө туппут, норуокка тарҕаппыт, духуобунас сайдыытын иҥэрбит сүдү киһи аатын үйэтитэр, ытыгылыыр биһиги ытык иэспит. Ол иһин да сунтаардар Сибиэрэп аатын үйэтитиигэ үтүмэн үгүс үлэни ыыталлар.

🚀@suntaar_ulus

Оһуохай түһүлгэтэ.

🔹️🔹️🔹️ "Тоҕус оһуордаах түһүлгэ" биир сүрүн хайысхата уонна саамай элбэх кыттаачылаах оһуохай буолар. Манна оҕолорго уонна улахан дьоҥҥо тус-туһунан түһүлгэ төрүттэннэ.

Улуус баһылыга Анатолий Григорьев кырачаан этээччилэри кытта көрүстэ. Оҕолор күрэх таһымын сэҥээрдилэр, бука бары кыайардыы-хотордуу тэринэн кэлбиттэр.

Сэргэй Сибиэрэп икки атахтаахха иннин биэрбэтэх дэгиттэр оһуохайдьыт. Бэйэтин үйэтигэр Чааркааннаах Даарыйаны кытта куоталаһан куоһаран турардаах диэн кэпсииллэр.

🚀@suntaar_ulus