Үрүҥ Айыыттан төрүттээх үтүө тылым өлбөтүн...

🔹🔹🔹Сүдү киһи Сергей Зверев айар үлэтигэр сүгүрүйээччилэр, олоҕун, айымньытын чинчийээччилэр кини төрөөбүт дойдутугар муһуннулар. Аар тайҕа ырыаһыта элбэх айымньытыгар туойбут тапталлаах Эбэтигэр арыылаах алаадьынан айах туттулар.

Айар илбистээх улуу киһи айымньытын кэм-кэрдиис аастар даҕаны саҥалыы арыйабыт. Ол иһин да кини олорон ааспыт олоҕун, суруйан хаалларбыт, этэн-тыынан таһаарбыт баай нэһилиэстибэтин үөрэтээччилэр, ырытан көрөөччүлэр элбээн иһэллэр. "Үрүҥ Айыыттан төрүттээх үтүө тылым өлбөтүн" республикатааҕы конференцияҕа наука дуоктардара, ону тэҥэ эдэр чинчийээччилэр кыттыыны ыллылар.

Тэрээһиҥҥэ Сергей Зверев төрөппүт оҕолоро Варвара Сергеевна Зверева уонна Төгүл Сергеевич Зверев ыалдьыттаатылар.

Биһирэммит дакылааттар салгыы бүтүн Арассыыйатааҕы Кэмпириэнсийэҕэ кыттарга мэктиэлэннилэр. Ону тэҥэ, бу күннэргэ Дьокуускай куоракка Тоҕус оһуордаах түһүлгэ төрүттэниэҕэ.

📽 Анал устууга С.А.Зверев -Кыыл Уолун аатынан норуот айымньытын киинин үлэһиттэрэ👆

🚀@suntaar_ulus

Кыыл Уолун баай нэһилиэстибэтин чинчийэллэр.

🔹🔹🔹Сергей Зверев - Кыыл Уолун үбүлүөйдээх 125 сылыгар араас таһымнаах тэрээһиннэр буола тураллар. Бүгүн Дьокуускайга бүтүн Арассыыйатааҕы научнай кэмпириэнсийэ саҕаланна.

Айар илбистээх сүдү киһи кэлэр көлүөнэҕэ хаалларбыт баай нэһилиэстибэтин, олорон ааспыт олоҕун үөрэтэр, чинчийэр дьон элбэх. Аныгы кэми кытта тэҥҥэ тутан научнай үлэлэр сурулуннулар.

Бүгүҥҥү конференцияҕа ХИФУ онтон да атын чинчийэр институттар профессордара, учуонайдара киэҥ далааһыннаах, анаарыылаах дакылааттары аахтылар. Манна Сергей Афанасьевич төрөппүт оҕолоро Төгүл Зверев уонна Варвара Зверева кыттыыны ыллылар.

Улуус баһылыга Анатолий Григорьев конференция кыттыылаахтарын эҕэрдэлээтэ, Кыыл Уолун албан аатын үйэтитиигэ тус этиилэри киллэрдэ.

🚀@suntaar_ulus

Култуура эйгэтин үлэһиттэрэ Улуу Кыайыы 80 сылынан бэтэрээни эҕэрдэлээтилэр.

🔹🔹🔹Икки кэм Дьоруойдара Филипп Евсеев уонна Аҕа дойду сэриитин бэтэрээнэ Мартын Григорьев биир түһүлгэҕэ көрсөллөр. Арассыыйа Дьоруойа ытык кырдьаҕаска үтүө тылын анаата, доруобай, чэгиэн-чэбдик буолууну баҕарда.

Быйыл 100 сааһын томточчу туолуохтаах ытык кырдьаҕас Сунтаар ылбаҕай ырыатын, тойугун истэн олус үөрдэ. Дьиэтин тэлгэһэтигэр тахсан, сылаас олбоҕор олорон ытыс тыаһынан доҕуһуоллата.

Бэтэрээн саҥата-иҥэтэ эрчимнээх, кэпсээнэ элбэх. Кэлбит дьоҥҥо махталын эттэ, сулууспатын туһунан кэпсээтэ.

1943 сыллаахха эдэркээн 18 сааһын саҥа туолбут уол армияҕа сулууспаҕа ыҥырыллан баран, устунан дьоппуон сэриитин түмүктэспитэ. Дьиэтигэр 1950 сыллаахха эргиллэн кэлэн, уһуннук бытовой кэмбинээккэ хаһаайыстыбаннай чааска үлэлээбитэ. Саамай баҕарар баҕата – эйэлээх халлаан анныгар дойдубут барҕара сайдыыта.

🚀@suntaar_ulus

Сунтаардар куорат устун...

🔹🔹🔹Муус устар 9-10 күннэригэр Дьокуускайга сүдү киһи Сергей Зверев тоҕус оһуордаах түһүлгэтэ төрүттэниэҕэ. Маныаха тэрийээччилэр алгыс ылан сахалыы таҥастаах сэлэлии хаамтылар, саҥардыллыбыт Республика болуоссатыгар оһуохайга эргийдилэр.

Доҕордоһуу болуоссатыттан Республика болуоссатыгар диэри сунтаардар сахалыы таҥаһы сайбаччы таҥнан сэлэлии хаамтылар. Ураты көстүүнү куорат дьоно сэргии көрдө, хаартыскаҕа түһэрдилэр, видеоҕа уһуллулар.

Республика болуоссатыгар тиийэн оһуохайы оройуттан туттулар. Эргииргэ олус элбэх киһи киирэн түһүлгэни киэргэттилэр, таһымы үрдэттилэр.

Төрүт култуураны өрө тутааччылары сомоҕолуур, биир түһүлгэҕэ түмэ тардар "Тоҕус оһуордаах түһүлгэ" быйыл төрдүс төгүлүн ыытыллар. Ааспыт сылга фольклор араас көрүҥнэригэр 900-тэн тахса киһи кыттыыны ылбыта.

Күрэх генеральнай спонсора биһиги биир дойдулаахпыт Матвей Евсеев. Кини өйөбүлүнэн кыайыылаахтар уу харчынан наҕараадаланыахтара.

Бу курдук алгысчыт Михаил Евсеев - Кураһаай Мэхээлэ оһуохайынан, алгыһынан тоҕус оһуордаах түһүлгэ аартыга арылынна.

📽Сэлэлии хаамыы уонна оһуохай кэрэ түгэнэ👆

🚀@suntaar_ulus