Харысхаллар КЫАЙЫЫЛААХТАР.

🔹🔹🔹Республикатааҕы "МУУС УСТАР" ыччат бэстибээлин чэрчитинэн патриотическай көҕүлээһин компетенциятыгар "Харысхал" общественнай тэриллии кыайыылааҕынан буолла. Кинилэр Аҕа дойдуну көмүскээччилэр дьиэ кэргэттэрин кэмитиэтин Сунтаардааҕы салаатын быһыытынан үлэлииллэр. Салайааччы "Корона фирма" дириэктэрэ Надежда Львова, координатор Жанна Макарова.

Волонтердар сыл устата анал байыаннай дьайыыга о.д.а. олох-дьаһах боппуруостарыгар күүскэ үлэлээн кэллилэр. Онон маннык ситиһии кэлиэҕин кэллэ👏👏👏

🚀@suntaar_ulus

Куокуну диэни иһиттэхпинэ харахпар Николай Андреевич көстөр.

🔹Республикаҕа биир холобур буолар агро хайысхалаах оскуоланы төрүттээбит, сайыннарбыт, үөрэҕирии эйгэтигэр сүҥкэн кылааты киллэрбит Иванов Николай Андреевич дириэктэр быһыытынан олус таһаарыылаахтык үлэлээбитэ. Кини салайааччы быһыытынан сатабыллаах, үлэһит быһыытынан сүрэхтээх, бэйэтин хары күүһүн ууран туран оҕолору үлэҕэ уһуйбута.

🔹Бүгүн Куокунуга ааттаах-суоллаах дириэктэр аатын үйэтитиигэ олус сэргэх, истиҥ тэрээһин ыытылынна. Биир сүрүн соругунан "Сүрэхтээх киһи сүгүн олорбот" диэн ахтыылартан турар кинигэ сүрэхтэннэ. Манна кэлбит ыалдьыттар үтүө киһини ахтан-санаан аастылар, олус элбэх түгэннэри кэпсээтилэр. Улуус баһылыга Анатолий Григорьев Николай Андреевич кэргэнигэр Антонина Ивановаҕа махтал суругу, сибэкки дьөрбөтүн туттарда.

🔹Кырдьыга да Куокуну нэһилиэгин дорҕоонноохтук ааттаппыт туруу үлэһит киһибит оҥорбут өҥөтө элбэх. Оҕолору кытта тэҥҥэ үлэлээн, куулунан хортуоппуйу, хаппыыстаны санныгар сүгэн, биир сиргэ сүгүн олорбот киһи этэ. Оҕуруот аһын ботуччу үүннэрэн, атыылаан, эргинэн мөлүйүөнүнэн сууммалаах үбү киллэрэн оскуола бүддьүөтүн бөҕөргөтөллөрө. Онон кинигэ сүрэхтэниитигэр кэлбит дьон - "Куокуну нэһилиэгин иһиттэхпинэ харахпар Николай Андреевич көстөр", дииллэрэ оруннаах.

🔹Ахтыы киэһэтигэр үөрэҕирии уонна тыа хаһаайыстыбатын управлениеларын салайааччылара, оскуола дириэктэрдэрэ уонна оччолорго улуус депутаттарын Сэбиэтин бэрэссэдээтэлинэн үлэлээбит Борис Герасимов кыттыыны ыллылар.

🚀@suntaar_ulus

Сунтаарга республикатааҕы дуобат күрэҕэ саҕаланна.

🔹🔹🔹Иван Токусаров, Гаврил Колесов, Степанида Кириллина курдук республика бастыҥ гроссмейстердарын бириистэригэр ыытыллар дуобат турнира саҕаланна. Манна Сунтаартан, Мииринэйтэн, Амматтан, Хаҥаластан, Уус-Алдантан, Кэбээйиттэн, барыта 75 дуобатчыт кыттыыны ылар.

Сунтаар улууһун баһылыга Анатолий Григорьев турниры үөрүүлээх быһыыга арыйда уонна спортсменнарга ситиһиини баҕарда. Күрэх төрүттээччилэриттэн биирдэстэрэ - биһиги биир дойдулаахпыт Владимир Петров - Бордоҥ Болуодьата буолар.

Дуобатчыттар бырааһынньыктарыгар Саха сирин дуобатын федерациятын аатыттан, бу эйгэҕэ сүҥкэн кылааттарын киллэрэр дьоммутугар махтал суруктар туттарылыннылар.

🚀@suntaar_ulus