"Муус устар" бэстибээл ыччаты ыҥырар, угуйар, кыайыыга сирдиир.

🔺🔺🔺 Республикатааҕы "Муус устар" ыччат бэстибээлэ быйыл 5-с төгүлүн ыытыллар. Барыта 23 хайысханан уонна 12 трегынан үрдүк таһымнаах тэрээһин күүтэр. Манна олус интэриэһинэй, сэргэх күрэхтэр, куонкурустар ыытыллыахтара. Ону тэҥэ, үөрэх интенсивтара, биллэр дьону кытта көрсүһүү, маастар-кылаастар, квиз-оонньуулар тиһигин быспакка нэдиэлэ устата барыаҕа.

Ааспыт нэдиэлэҕэ муниципальнай отбор ыытыллан 254 киһиттэн сүүмэрдэнэн 64 ыччат, бу тэрээһиҥҥэ кыттыыны ылыахтара. Улуус баһылыга Анатолий Григорьев бэстибээл кыттыылаахтарын түмэн, тэрээһин боппуруоһун кэпсэттилэр, ситиһиини баҕарда, эрэлин биллэрдэ - "МУУС УСТАР бэстибээлгэ улуус ыччата, бу сыллар устата сэмэйдик кыттан кэллэ. Оттон дьэ, быйыл күүскэ бэлэмнэнэн, олус күүстээх хамаанда туран бастыыр туһугар туруннубут. Онон талыллыбыт ыччат туох баар дьоҕургутун, талааҥҥытын, сатабылгытын толору көрдөрөн, арыйан көхтөөх кыттыыны ыларгытыгар ыҥырабыт".

🚀@suntaar_ulus

Анал байыаннай дьайыыга сулууспалыы сылдьар уолаттар дьиэ кэргэттэригэр олус сэргэх тэрээһин ыытылынна.

🔹🔹🔹Эйэҕэс эбэлэр, истиҥ ийэлэр, тапталлаах кэргэннэр С.Зверев - Кыыл Уолун аатынан култуура киинигэр күргүөмүнэн түмүстүлэр. Манна медицинскэй көмө оҥоһулунна, куту-сүрү ыраастаатылар, сиэри-туому тутуһууга, норуот ырыаларыгар о.д.а. хайысхалаах маастар кылаастар ыытылыннылар.

Саха дьоно буоларбыт быһыытынан омук итэҕэлин бэйэлэригэр иҥэринэн, дьон үксэ кут-сүр ыраастаныытыгар сырытта. Илбиһит, эмчит Анна Егорова хомус тыаһатан, эмтээх оту уматан, сыт таһааран, хас биирдии киһини кытта олус истиҥник кэпсэттэ, саарбахтыы сылдьар ыйытыктарыгар хоруйдаата.

Маастар кылаастар барыта дьон арылларыгар аналлаахтар. Холобура, хомуһу тардыыга, тойукка, норуот ырыатыгар ыллаан-туойан, доргуччу этинэн санааларын сааһылаатылар, тууйулла сылдьыбыт эргиири өһүллүлэр.

Иис абылаҥар кэлбит дьон таҥас-сап төрүт үгэһин туһунан элбэҕи биллилэр. Ол курдук, маастар кылаас быһыытынан анал үөрэх буолла. Биһирэнэрэ диэн быйылгы ыһыахха сахалыы халадаайы, кэһиэччиги тигиигэ анал түмсүүнү төрүттээтилэр. Онон култуура киинин костюмернайын салайааччыта Ирина Митина көмөтүнэн тустаахтар сахалыы таҥаһы тиктэн саҕалыахтара.

Бу курдук Сунтаар улууһун баһылыга Анатолий Григорьев дьаһалынан сыл ахсын ыытыллар тэрээһин уратытык тэрилиннэ. Мантан салгыы ылбаҕай ырыалаах, сэргэх үҥкүүлээх кэнсиэр буолуоҕа.

🚀@suntaar_ulus

💐💐💐 Сунтаар улууһун баһылыга Анатолий Григорьев анал байыаннай дьайыыга сулууспалыы сылдьар уолаттар дьиэ кэргэттэрин сааскы бырааһынньыгынан эҕэрдэлээтэ. Хас биирдии ыалдьыкка сибэкки дьөрбөтүн туттардылар, сэртипикээттэри бэлэхтээтилэр.

Мааны далбардар маннык тэрээһин ыытыллара олус үчүгэй дииллэр. Биир кэм дьиэҕэ тууйуллан олорбокко, дьон ортотугар сылдьан, аралдьыйан, олус наадалааҕын бэлиэтииллэр.

🚀@suntaar_ulus

"Якутлесресурс" тэрилтэ Сунтаардааҕы салаата 100 тыһыынча маһы үүннэриэҕэ.

🔹Экология уонна ойуур хаһаайыстыбатын министиэристибэтин көҕүлээһининэн 2023 сыллаахха республикаҕа лесопитомниктары тутан үөрэтэн көрүү, чинчийии үлэтэ саҕаламмыта. Ол курдук ойуур баһаарыгар эмсэҕэлээбит сирдэри чөлүгэр түһэрэр сыаллаах теплицалары тутан, сиэмэ ыһан, мас үүннэрэн көрбүттэрэ. Бу үлэ көдьүүһэ, туһата табыгастааҕынан сиэттэрэн, бу бырайыагы олоххо киллэрэр сорук турар.

🔹Лесопитомник "Якутлесресурс" тэрилтэ Сунтаардааҕы салаатын территориятыгар улуус дьаһалтатын көмөтүнэн оҥоһулунна. 100 тыһыынча хвойнай үүнээйини үүннэрэр кыамталаах барыта 12 х 30 квадратнай миэтэрэ иэннээх теплица тутулунна. Сиэмэлэрин киин регионнартан аҕалан сезон саҕаланыыта үүннэрэн саҕалыахтара.

🔹Маннык теплицалар эксперимент быһыытынан Алдаҥҥа уонна Табаҕаҕа тутуллан тураллар. Эбии Лиэнскэй оройуонугар былаанныыллар. Пилотнай бырайыак олоххо киирдэҕинэ бэйэ усулуобуйаҕа үүннэриллибит үйэлээх мастары эмсэҕэлээбит сирдэргэ олордуохтара.

Бу туһунан ыксаллаах быһыы-майгы хамыыһыйатын мунньаҕар кэпсэттилэр.

🚀@suntaar_ulus