حتى مع نفسي،
نحس لو كنت لون كنت حنكون أخضر أو أزرق لأن فعلًا نشوف فيهن يجسدني ومربوطات بشخصيتي بغض النظر ع ان اللون الاخضر مش لوني المُفضل اصلًا

المُعاناة تولد إنسان عظيم فالعالم.

احيانًا الصمت أبلغ من الكلام

لما الموضوع يتعلق بسواقة سيارة او عمل في مكان ما تشوفهم يقروا ويعرفوا عن يلي يبو يديروه قبل ، الا في الانجاب زيهم زي القطط او اي حيوان ثاني يولدو الطفل بدون معلومات مسبقه عن كيف نربيه وعن السيكولوجية متاعته ولما تسألهم شن تعرف عن تربية الطفل؟ يقولك زي ما تربينا وكبرنا نحن ومع العلم انه اي سلوك تزرعه في الطفل وهو صغير يأثر على حياته كامله وتصرفاته وحتى على نمو عقله

الاطفال مسؤولية كبيرة، كبيرة بطريقة ماحد يقدر يتوقعها وأرواح جديدة تبي تجيبها للحياة، مش مجرد زيادة عدد فالدنيا وخلاص، روح جديدة معناها كيان جديد وأمل وطموح وأحلام جديدة، وامانة من الله انك تحسن فيهم التربية وتلبي طلباتهم بدون ما تمن عليهم كل شوية لان هذا فرض مش كرم منك

طبعًا مش معناها تلبي كل شي معناها حتخربهم كيف ما اغلب الناس يفكروا، لا نقدر نربي ع القيّم والحكم والدين والمبادئ ومانحرمهم من شي وفنفس الوقت يطلع طفل سويّ نفسيًا، لان فوجهة نظري الشر ينصنع من الاهل واحيانًا هما السبب،هذا سبب خراب نص المجتمع توا التربية الغلط والقاسية

وهما نص المجتمع متربي غلط،وكلهم يعاودوا فنفس الغلطه من اجدادهم وهلهم كأن شي متوارث ولازم كلهم يربوا زي بعضهم

تقريبًا نادر تلقى إنسان سويّ نفسيًا في مجتمعنا توا الا من رحم ربي

للحظة لوهلة ننصدم أني كاتبة كمية الكلام يلي فالقناة هذا كله سواءً كان من تجاربي الشخصية او من اراء وأحلام مزال ما عشتهن وجربتهن،

باهي الموضوع مش هنا نقدر في يوم نحذف القناة والكلام يلي فيها يعدي في حاله بس هل بعد تفريغي فالكلام يلي فالقناة هذا كله حيخليني ننسى ويطلع الكلام يلي كتبته من راسي نهائيًا ؟ الجواب لا، باهي شن الفائدة وانا عليش نكتب اصلًا ؟ هل عشان عقلي يصيرله تفريغ وننسى ويكون اخف؟ او عشان الكتابة شعور يخليك احسن؟

نحس حيكون الجواب الثاني، باهي ليش؟ لان التجارب جزء من الذكريات هل حنقدروا ننسوا تجربة عشناها؟ لا

لكن أنا كنت نتمنى يكون الجواب الأول لأن كمية الكلام يلي كاتبته فالقناة كله قاعد متراكم فراسي بطريقة اديرلي في صداع، صح أنا منذكرش في أي شي كتبته فالقناة ويمكن حتى الكلام يلي نكتب فيه توا ننساه بعد ايام بس برضوا بطريقة ما قاعد فراسي حتى لو منفكرش فيه نحس فيهن كأنهن معلومات راقدة بس حملهن فراسي قاعد

نحس كل بداية شهر جديد بداية جديدة وكأن الحياة تعاودت من أول نقطة وكأن ما عشنا شي وما درنا شي،

شعور الشهر الجديد غريب جدًا

"لا تُطعم طعامك لمن لا يشتهيه"

عن البذل في غير موضعه، وأيضاً عن مشاركة إنجازاتك وخطواتك مع مَن لا يأبه لها (أو بالأحرى لا يأبه لك أنت)