النوتس الحقيقي مش قناتي ولا حتى محفظة تليفوني ولا دفتر التدوين متاعي الواقعي، مشاعري الحقيقية غير مرئية الا في داخلي معمريش فكرت اني نطلعهن الا بيني وبين نفسي، الاشياء يلي نكتب فيهن فالقناة ميطقنش 5% وجزء ناقص من الحقيقة الأصلية والتجربة يلي مريت بيها سوا هالشي جميل او سيئ، المواقف، الكلمات، الأحلام، التجارب، مشاعري وعاطفتي، وحتى ذوقي بشكل العام تجاه كل شيئ، ف يبدوا عندكم ان ديما نحكي فالقناة وانكم تعرفوا عليا كل شي بس هذا كله من ال5% يلي انا نبي نبينه عن قصد أما عن الأشياء الثمينة يلي معمريش قررت نحكيهن هنا ال95%

اللحظة اللي تحس فيها انك فعلًا نضجت هي اللحظة اللي توقف فيها تعطي مساحة لقلبك للكره وتفهم أن الوقت والطاقة اللي تستهلكها في المشاعر السلبية مجرد نزيف عبثي ما له أي عائد باختصار يا حب يا ما عندك مشاعر عندي

عبودية أزلية لجاكة الترانشكوت

infp = overthinking

الشي يلي نحبه ف نفسي إني تعلمت منكونش شخص يخاف أو يحب يزيف نفسه، نحكي عيوبي بصوت عالي وأغلاطي وأفكاري ومشاعري بدون خوف من حكم الناس عليا أو نظرتهم تجاهي، نظرتهم مهما كانت مش حتكون أسوء من إنكار الذات أو العيش ف جهل

بلعكس، نظرة الناس الطبيعيين يلي مش متخلفين أو منغلقين زي الأجيال القديمه ف المجتمع حتكون أحسن لما تشوفك شخص منفتح ع نفسه وفاهم إن المثالية مشروع زائف وإنه برضو عادي لو فيه ناس كانت أقرب للمثالية ف عين ناس ثانية وأني منكونش منهم

وزيادة عليها منعرفش شن الشي يلي يخليني ديما نطلع سلبياتي وعيوبي قدام الناس يلي في حياتي ونقعد حريصة مانطلعش أي جانب جميل ليا متاع نشوف هل هالشخص حيرضى بعيوبي قبل مميزاتي؟
,هما عرم أسباب يخلوني مانبينش الصفات لكويسة فيا اولهم مش كيف يلي حبك عشان صفاتك جميلة كيف يلي حبك بعيوبك وسلبياتك, الأول عادةً ما يادوم عكس الثاني ديما يطول لوقت اكثر يلي تعود عليك ديما جميل ومثالي لو جا يوم وشاف منك شوية نقص حينقد عليك ويمكن شعوره تجاهك ما يكونش كيف المعتاد, عكس لما من البداية توري الجانب السلبي حتلقي فئة من الناس يرضو بيك والفئة الثانية لا وهذا المطلوب الشفافية

بما أني إنسانة شغوفة بالكرتون ونفضل فيهن اكثر من باقي المحتويات، فيلم (all dogs go to heaven1989) لفت نظري فالريلز أكثر من مرة قررت نقرا قصته ونتفرج عليه، الطفلة الي ادت صوت البنت الصغيرة فالفيلم آن ماري اسمها جوديث بارسي اخر صوت تسجله فالفيلم قبل ما ينعرض،
جوديث وأمها انقتلوا على يد باتها في سنة 1988 وبعدها انتحر، وكان عمر جوديث وقتها عشر سنوات تقريبًا وكان سيئ وديما مش في وعيه

بيرت رينولدز الي كان يأدي في صوت تشارلي(الكلب) عرف بخبر وفاة جوديث قبل تصوير المشهد متاعه وصادف نهاية الفيلم مع موت جوديث ويُقال ان المشهد كان صعب عليه لدرجة استغرق 60 محاولة عشان ينجح بسبب حزنه ع موت جوديث

شي مُزعج وأناني إنك تحكم على إنسان متعرفش من تجارب الناس التانين، سواء بشي سيّئ أو حتى بشي كويس،
لأن كل واحد يشوفك من الزاوية اللي وقف فيها معاك، مش من حقيقتك الكاملة، الإنسان مش نسخة وحدة اتكرر مع الكل، كل علاقة تطلع منها جانب مختلف ع حسب الظروف والشخص يلي قدامك،
لو سمعت إن فلان كويس،خلاص تصدّق وتبني صورة مثالية، وما تسألش كويس مع من؟ وفي أي ظرف؟
ولو سمعت إنه سيّئ، ما تفكّرش ان يمكن هذا كان ردة فعل على شي سيئ صارله من الطرف التاني،
الأحكام الجاهزة وتجارب غيرك يلي تستمد بيهن لنفسك تقتل الحقيقة، وتظلم الإنسان قبل ما تعرّفه

70% لو جيت خضت تجربتك مع الإنسان هذا مش حتكون نفس يلي قبلك، تجربتك مش نفس تجربة غيرك الإنسان ما ينقاسش من حكاية وحدة ولا بتجربة متاع غيرك

⁣💌 وصلتك رسالة جديدة
⏱ وقت الرسالة: 2025/12/27 - 01:41:15 AM
----
الجمال هذا كله وانخانت
"ديانا"
----

- تبرع لإستمرار عمل بوت صارحني 🎁

مكانش يحبها ولا يبيها تزوجها بسبب ضغط العائلة الملكية لان ديانا كانت تناسب معايير العائلة الحاكمة كانت صغيرة فالعمر ومن عائلة نبيلة ومعروفة ومعندهش علاقات عاطفية من قبل ف كانت الاميرة المثالية بنظر القصر، قبل زواج الامير تشارلز من الاميرة ديانا كان في علاقة ويحب كاميليا لكن هله كانوا رافضينها لأنها مُطلقة وكانت في علاقات عاطفية واجد من قبل ف كانت مرفوضة انها تقعد زوجة الامير تشارلز طبعًا هوا لبى طلب العائلة الحاكمة وتزوج ديانا واستمر في حبه لكاميليا ويخون في الاميرة ديانا معاها ومرت بمرض نفسي واكتئاب وهذا ما سبب انهم ينفصلوا واطلقوا ويُقال ان حادث موتها كان مُدبر والله أعلم