⭕فتح مجرى الهواء... لاحظ دقنھ لفوق

اقعد في الوضعية دي وانت بتضغط.. ذراعك كلھا مستقيمة و اللي يتحرك جسمك من النص

بسم الله الرحمن الرحيم

》》》التعامل مع حالات كسور العظام


مع الحاصل في البلد حاليا ممكن الزول كتير يتعرض للكسور. فاعمل شنو اذا حصل كسر لي او لواحد من أفراد الأسرة؟


●الكسور هي إصابات شائعة ممكن اي زول يتعرض ليها في أي وقت. وطبعا  لو  حصل كسر لازم اتصرف بحذر وفورًا.



●أنواع الكسور:
(1).الكسر المغلق: العظم بكون مكسور لكن الجلد سليم .
(2).الكسر المفتوح: هنا العظم المكسور بطلع برة  الجلد، ودا بزيد من خطر الإصابة بالعدوى.


●كيف اتصرف في حالة حصل كسر  ؟
• اول شي اذا كان الكسر من النوع المفتوح يعني العظم طلع برة الجلد فهنا اكيد بقى عندي جرح  طيب الجرح دا اول شي لازمه نضافة بمنديل تكون نضيفة و معقمة او اي قماش نظيف ونلف الجرح كويس عشان نقلل من النزيف او انو تحصل عدوى للجرح .

• اذا كان الكسر من النوع المقفول فااا بحاول انو اثبت محل الكسر بانو مثلا اعمل جبيرة وما إلى ذلك .

• بخلي الشخص على وضعه وما بحركه الا اذا كان في حتة في اشتباكات او اي شي يعرض حياة الزول للخطر  لانو الحركة دي ممكن تزيد من خطورة الاصابة او زيادة الكسر او حتى حصول نزيف لا قدر الله .


●كيف اعرف الزول دا عنده كسر ؟
(1).تورم والم في مكان الكسر
(2).التشوه أو إزاحة العظم من مكانه
(3).صعوبة تحريك العضو المكسور

■الإسعافات الأولية للكسور:
•   التثبيت:
منع المزيد من حركة المنطقة المصابة عن طريق التجبير أو استخدام الدعائم.

•   الارتفاع:
ارفع الطرف المصاب عشان اقلل التورم.

•    الثلج
لازم اخت  كمادات من الثلج (ملفوفة بقطعة قماش) على المنطقة المصابة لمدة 15-20 دقيقة كل 2-3 ساعات.

■خيارات العلاج:

●الجبيرة أو التجبيرة:
•  بالنسبة للكسور المستقرة، (النوع المقفول ما فيه جرح) ممكن استخدم جبيرة أو جبيرة لتثبيت العظام وبكدة العضم بلتحم مع بعض اسرع .

• الجراحة:
بعض الكسور  بتتطلب التدخل الجراحي بالذات اذا كانت من النوع المفتوح وعملت جرح كبير شديد او كان العظم زح بشكل كبير من مكانه او كان في تلف في الأنسجة المحيطة.

• الأدوية:
يمكن وصف مسكنات الألم والأدوية المضادة للالتهابات للتحكم في الألم والالتهاب.

⭕️طبعا الخطوات الفاتت دي كلها لا تغني عن الذهاب الى المستشفى يعني كانت بس اسعاف للمصاب والتدخل الطبي الناس ممكن يقي كتير من المضاعفات المصاحبة الكسور.

ربنا يعافينا ويعافيكم

#summary_squeezer
#التعامل_مع_الحالات
https://t.me/summarysquezer

بسم الله الرحمن الرحيم

》》》التعامل مع حالات انخفاض أو ارتفاع سكر الدم

■بالنسبة للإنخفاض:
●دا بحصل لما مستوى سكر الجلكوز ينخفض لأقل من مستواهو الطبيعي

●أسبابو
• ممكن زيادة في جرعة الأنسولين أو علاجات السكري التانية.
• عدم تناول الأكل أو الشراب بصورة كافية.
• أنو الواحد يبذل مجهود عالي.
• وممكن يكون بسبب أمراض تانية(الكلى، الملايا، الكبد)

●أعراض إنخفاض السكر كتييرة لكن ممكن نذكر منها:
•التعرق •رجفة •شعور بالجوع •لفة راس •الصداع •التعب •عدم التركيز •عدم وضوح الرؤية(عيونو طاشات) •سرعة دقات القلب •التنميل •التهيج •وممكن تصل لأنو يفقد الوعي.

●طريقة التعامل في حال انخفاض السكر في الدم
•شوف أي حاجة فيها سكر سريع للمريض عشان ياكلها أو يشربها (بلح ،عصير، قطعة حلاوة ..الخ...)
•تاني ننتظر ربع ساعة ولو لقينا طريقة نفحص للمريض .. وفي حال عدم وجود جهاز فحص السكر بنعاين لحال المريض إذا بقت مستقرة مع وضعو تحت الرقابة.
• حقن الجلاكاكون (دا بالنسبة للناس الوصفها ليهم الدكتور مسبقا)

●الوقاية من الإنخفاض
•ندي المريض وجبات صغيرة متكررة في اليوم.
•تعديل الجرعة بناء على حسب توجيه الطبيب.


■بالنسبة للإرتفاع

●أما دا بحصل لما مستوى سكر الجلكوز يزيد لأعلى من مستواهو الطبيعي
• عدم تناول علاج الأنسولين أو علاجات السكري التانية.
• تناول أكل أو شراب في سكر بكمية كبيرة.
• عدم الحركة.
• بعض الحالات الطبية(الكلى والكبد)

●أعراضو
•عطش •التعب •التبول المتكرر •البول بكون فيهو ريحة غريبة.

●طريقة التعامل في حال ارتفاع السكر في الدم
•اخد دوا السكري على حسب ارشادات الطبيب
•كتر من شراب السوائل شديد


●الوقاية
•وازن في الأكل
•حاول مارس الرياضة أو على الأقل اتمشى
•اخد الأدوية زي ما وصفها ليك الدكتور
•كل ما تلقى فرصة أفحص.

⭕️خليك دايما متابع مع طبيب متخصص عشان تتجنب المضاعفات

وربنا يحفظكم
ويصلح حال البلد.. في رعاية الله

#summary_squeezer
#التعامل_مع_الحالات
https://t.me/summarysquezer

بسم الله الرحمن الرحيم

》》》التعامل مع حالات غيبوبة السكر

●غيبوبة السكر أو (كومة السكري)  دي بتحصل للزول العندو مرض السكري ويا كانت بسبب ارتفاع السكر في الدم أو بسبب انخفاضو.

⭕️ممكن كومة السكري تجي لزول ما عندو مرض السكري ودا بكون زول طبيعي لكنو ما أكل لفترة طويلة أو أنو بذل مجهود كبير.

●التعامل  مع غيبوبة السكر

لو عندك جهاز لقياس السكر في الدم شوفو سريع واعرف هل السكر منخفض ولا مرتفع (اقل من 60منخفض .. وأكتر من 140 مرتفع "بتحصل كومة السكري لما يتخطى ال 600")

■في حالة الغيبوبة بسبب الانخفاض
•حندي المريض دِرِب  ونديهو 125ml من جلكوز 20% ولو ما كان موجود نديهو 250ml من جلكوز 10%

⭕️أبعدو عن جلكوز 50%لأنو بهيج الأوردة وبتلفها

•بعد كدا  بندي المريض  10ml محلول ملح وننتظر عشرة دقايق لحد ما العيان يصحى
• ولو ما صحى حنكمل معاهو بالجلكوز

•لو ما بتعرف تركب الدرب أو خايف منو في حقن جاهزة اسمها (جلوكاجون) بنديها تحت الجلد أو في العضل


■ في حالة الغيبوبة بسبب الإرتفاع
•كإسعاف حتديهو 15 وحدة انسولين وتجري بيهو للمستشفى
•أديهو درب ملح

□□□في حال ما عندك جهاز فحص السكر في الدم حنتصرف كيييف؟

• حنتعامل معاها على أنها غيبوبة انخفاض عشان هي الأخطر وبتتسبب في موت الدماغ
•و عشان الجسم في الغالب بقدر يتخلص من السكر الزايد بالسوائل حقت المحلول الملحي اللي نحن أساسا شغالين بيهو في الإجراءات دي

⭕️طبعا كونو يكون في دكتور متخصص الحاجة دي حتفيد شديد وتجنبنا المضاعفات

حفظ الله البلاد والعباد

#summary_squeezer
#التعامل_مع_الحالات
https://t.me/summarysquezer

https://youtu.be/EsA19Ulybqo?feature=shared

بالنسبة للناس البتسأل من طريقة فحص السكر في الدم الفيديو دا حيفيدكم بإذن الله

https://youtu.be/8Hk7ZwkbQDs?feature=shared

وبالنسبة للناس البتسأل من طريقة استخدام حق الجلوكاجون الفيديو دا مفيد جدا

بسم الله الرحمن الرحيم

》》》التعامل مع حالات الصرع


●هو عبارة عن نوبات عصبية لا ارادية بتكون في المخ وما معروف سببها للان وممكن تجي في اي وقت كان وتستمر لمدة قصير ( ثواني او دقايق كدة )

●الاعراض
• الصراخ :
يصرخ بعض الأشخاص في بداية نوبة الصرع.

• فقدان السيطرة على التبول والتبرز:
 ممكن يحصل أثناء نوبة الصرع أو بعدها لانو بكون اصلا ما واعي فاا بكون ما قادر يتحكم في الامعاء وعموم اعضاء جسمه.

• عدم الاستجابة بعد التشنجات:
ممكن الشخص المصاب يفقد وعيه لعدة  دقايق بعد انتهاء نوبة التشنجات.

• التشوش الذهني:
 غالبًا  المصاب بكون مشوش بعد  والارتباك بعد التعرض لنوبة الصرع .

• الإرهاق:
ودا ناتج من الحركة الاهتزازية للجسم فاا بكون مرهق ونعسان .

• الصداع الشديد:
بعض الاشخاص ممكن يعتني من الصداع بعد نوبة الصرع .

●محفزات الصرع :
بتختلف المحفزات من زول لي زول لكن في محفزات مشتركة في كل الحالات  تشمل:
• الإجهاد والإرهاق.
• عدم النوم.
• القلق.
• الضغوط العصبية.
• ارتفاع درجة حرارة الجسم
• القهوة(الكافيين) الزائد
• الأضواء الساطعة.
• الكحول.
• عدم تناول الدواء الخاص بالصرع.

●اعمل شنو اذا كانت في حالة صرع قدامي ؟
• اول شي لازم تكون هادي وما تخاف من المصاب عشان تعرف تتصرف صاح
• من المهم انو الناس ما تتجمع حول المصاب ويكون في مساحة واسعة عشان النوبة بتخليه يتنفض وعشان يقدر يتنفس بشكل افضل
• ابعد اي حاجة ممكن تأذي المصاب اثاث او اي ادوات حادة وغيرو
• ازالة اي شي حول الرقبة ملابس او كرفتة او سلاسل لانها بتعيق مجرى التنفس 
• لازم اخت حاجة ناعمة تحت راس المصاب عشان ما يضرب راسه ويتضرر

●أشياء ممنوع عملها اثناء النوبة :
• اياك تحاول تثبت المصاب خليه على راحته
• اياك تحاول تدخل اي شي في خشمه او انك تدخل يدك عشان ما يبلع لسانه خليه على وضعه لحد ما النوبة تنتهي
• اياك تديه اكل او شراب لحد ما يوعى بشكل تام عشان ما يختنق

●النوبة انتهت خلاص تاني اعمل شنو ؟ 
• خليك جنب المصاب لحد ما يستعيد وعيه وطمنه لانه بكون مشوش وما عارف هو حصل ليه شنو 
• خليه يرقد على جنبه اليسار او اليمين بكون مرتاح اكتر
•اتحقق بلطف من فم المصاب بعد انتهاء النوبة بحيث انو ما يكون في حاجة بتمنع مجرى التنفس زي الاكل أو الأسنان(سقوط الأسنان).

●متين بحتاج امشي المستشفى ؟
في الغالب النوبات دي ما بحتاج للمستشفى لكن اذا استمرت لاكتر من ٥ دقايق او في حالة ضيق نفس المصاب لازم تمشي المستشفى.

وربنا يحفظكم ويرعاكم
#summary_squeezer
#التعامل_مع_الحالات
https://t.me/summarysquezer

بسم الله الرحمن الرحيم

》》》التعامل مع إصابات الطلق الناري


● بما أنو الوضع حاليا في البلد ما مستقر فكتيير من الأحيان بنتعرض للإصابة بالرصاص الحي (الطلق الناري).

●لا بد أن نعرف أن أغلب الأحيان هناك مخرج للرصاصة.
•المخرج اكبر من المدخل.
•المخرج ليس مستويا دائما خصوصا إذا أصيب العظم.
•النزف الداخلي وتمزق الأنسجة أكبر مما تراه عينك خصوصا في البطن.

●علامة النزيف الداخلي:
•هو الانتفاخ البطني وتغير لون الجلد إلى وردي وعندما تكون الإصابة جديدة ملمس البطن يكون وكأنك تضع يدك على كوم من القطن
•أما إن كانت الإصابة قديمة فيكون ملمس البطن متحجر ولونه بنفسجي على ازرق وهذا الحال ينطبق على منطقة العضلات أيضا فالعضلة ستتقلص ويقسى مكان الجرح نتيجة لھذا.

●إسعاف المصاب من الرصاص:


⭕قبل أن نبدأ الخطوات إليك ملاحظة مھمة جدا⭕

•أهم خطوة في التعامل مع الجرح النازف هو الضغط عليه بضمادة أو باليد لمدة 10 دقائق لكي يتخثر الدم وإذا امتلأت الضمادة بالدم فإياك أن تستبدلها، بل قم بوضع الضمادة الجديدة عليها.
•بإمكانك أن تستخدم قميصك الداخلي كضمادة بعد طيه.


١- قم بإبعاد المصاب عن مرمى النيران.

٢- على المصاب أن يبقى ثابتاً قدر الإمكان كي لا تتضاعف الإصابة.

٣- ليكن الرأس ممدداً على نفس مستوى بقية الجسم إلا إن كانت الإصابة في الرأس أو العنق.

٤- تحدث مع المصاب واسأله لترى إن كان واعياً أم لا، فإن لم يستجب حاول إيقاظه.

٥- إن لم يفق فتأكد من أنه يتنفس وذلك عبر فتح فمه ووضع إذنك فوق فتحة فمه لسماع أي صوت للتنفس أو اصطدام للهواء الخارج من الفم بأذنك  وفي نفس الوقت حدق في صدره لمشاهدة أي انخفاض أو ارتفاع للصدر.

٦- إن كان المصاب يتنفس ولكن غائب عن الوعي، قم بفتح فمه وتأكد أن اللسان لا يعيق التنفس فإن كان يعيق التنفس فإن إدارة الرأس إلى اليمين أو اليسار تحل المشكلة ثم قم كذلك بتعديل وضعية رأسه بحيث تصبح ذقنه مرفوعة للأعلى لأ هذا يفتح مجرى التنفس بأفضل شكل وقد يكون الأنف أو الفم ممتلئاً بالدم، فإن كان كذلك قم بإفراغ هذا الدم كي لا يختنق المصاب.

٧- أثناء نقل المصاب تأكد من إسناد الرقبة كيف لا يحصل اختناق بالدم أو اللسان.

٨- إن لم يكن المصاب واعياً جرده من ملابسه لتتأكد من عدم وجود إصابات نارية أخرى.

٩- قم بالضغط بشكل قوي على مكان الإصابة بقطعة قماش أو حتى باليد لإيقاف النزيف أو إبطائه يجب أن يستمر هذا الضغط لمدة عشرة دقائق على الأقل كي يتمكن الدم من التخثر فيتوقف النزيف. بإمكانك خلع قميصك الداخلي ومن ثم طيه لتستخدمه للضغط على الجرح الشاش أو المنشفة هما الخيار الأفضل في حالة توفرهما.

١٠-إذا امتلأت الضمادة بالدماء، لا تقم أبداً باستبدالها، بل قم بوضع الضمادة الجديدة عليها فإزالة الضمادة ستؤدي إلى إزالة ما تشكل من تخثرات للدم على الجرح.

١١- إن كان الثلج متوفراً، قم بوضع ثلج في كيس ومن ثم وضع الكيس على الجرح هذا يساعد على إغلاق الشرايين المتضررة.

١٢- بعد أن يتوقف النزيف، قم بلف الجرح بالشاش أو بقطعة قماش... بإمكانك أن تشق قميصك من قمته إلى منتصف أسفله وبالتالي تصبح لديك قطعة قماش عريضة ومن ثم بإمكانك بعد طيها أن تلفها حول الجرح بإحكام و لا تركز جميع اللفات على موضع الجرح فليشمل بعض اللف يمين ويسار مكان الإصابة.

١٣- إن كانت الإصابة في الذراع أو الرجل فيجب رفع الطرف المصاب فوق مستوى القلب فمثلاً لو كانت الإصابة في الرجل فعلى المصاب وهو مستلقي أن يرفع رجله ويسندها على الجدار أو وسادة أو أي شيء آخر مما يقلل من تدفق الدم إلى الرجل فيقل النزيف.

١٤- الإصابة في الذراع أو الرجل من الممكن أن تؤدي إلى الكسر لذلك تثبيت الرجل أو الساق بأي قطعة صلبة كالخشب أو الحديد يقلل الضرر والنزف، خاصة قبل عملية النقل.


١٥- إن كانت الإصابة في الرأس أو الوجه أو العنق فإن الاستلقاء يزيد من النزيف، يجب أن يكون المصاب في وضعية الجلوس أو الوقوف.


١٦- إن كانت الإصابة في العنق فكن حذراً ألا يؤثر ضغطك على الجرح على التنفس أو على تدفق الدم إلى الرأس عبر الشريانين الموجودين في طرفي الرقبة.

١٧- إن كانت الإصابة في الصدر استخدم قطعة مصمتة خالية من الفجوات مثل البلاستيك أو الكيس قم بقص القطعة على شكل مربع ثم ضع القطعة على الجرح  و باستخدام شريط لاصق قم بلصق ثلاثة جوانب متجاورة للقطعة على الجلد بحيث يتم ترك جزء من أجزاء القطعة الأربعة دون لصق ليتم السماح بمرور الهواء الخارج من الجرح أثناء الزفير.


حفظ اللھ  البلاد والعباد وعجل بيوم يلتقي فيھ الناس على أرض الوطن سالمين آمنين غانمين🤲🏻

#summary_squeezer
#التعامل_مع_الحالات

بسم الله الرحمن الرحيم

》》》التعامل مع حالات ألم الأسنان

الأيام دي ممكن يجيك وضع أسنان وما تعرف تمشي بيهو لدكتور بالذات مع الوضع الحالي للبلد

●ألم الاسنان هو ألم بيحصل في الاسنان بسبب التسوس بشكل عام أو بسبب شقوق في السن وغيرها

●انواع ألم الاسنان :
1. آلام الاسنان الصادرة من العاج :

في الحالة دي الوجع بكون مع البارد والحار والحلو، و بيكون مدة قصيرة وبيختفي مع زوال المؤثر .

و بيكون متوسط والعيان بيواجه صعوبة في تحديد محل الألم،
وبيتم علاج النوع دا بالحشوات وبيختفي الالم.

2. آلام الصادرة من لب السن ( العصب)

ودا بيكون التسوس وصل عصب السن وبيكون وجع شدييد. و الوجع دا بيستمر من دقائق لساعة كاملة وبيزيد مع الحاجات الباردة والحارة ومع المضغ. ومن اهم الحاجات البتأكد لينا انو التسوس وصل العصب العيان بيقول ليك الالم بيصحيني من النوم وبكون في صداع قوي ، ودا علاجو بيكون تعمل للسن علاج جزور أو قلع السن .

3. آلام الاسنان الصادرة من اللثة:

النوع دا بيكون جاي من اللثة وبيكون متواصل وبيشتد اثناء المضغ وبيكون مكان الالم محدد وبتحس انو السن دا طالع لي بره كده وبيكون في تورم في الوجه، دا بيكون بي سبب تلوث اللثة أو التهاب اللثة وبيكون عادة من الفراغات الموجودة بين السن واللثة.

●اعراض ألم الاسنان:
•ألم في الاسنان والفك.
•حساسية الأسنان.
•نزيف او إفرازات في اللثة حول السن.
•جروح في المنطقة المصابة.
•سوء رائحة الفم.
•ألم الرأس (صداع ).
•حمى .
•تضخم الغدد.

●أسباب ألم الأسنان:
•تسوس الاسنان ( الأكثر شيوعاً)
•السن المتأثر وعادة بيكون ضرس العقل عالق جوا انسجة اللثة والعظام قايم غلط يعني .
•التهاب الجيوب الانفية : عشان الجيوب الانفية قريبة لجذور الأسنان حقت الفك العلوي فممكن بي سبب إلتهابها يحصل الم الاسنان.

●مضاعفات الم الاسنان :-
لو كان السبب جرثومة مسببة لالتهاب وانت ما علاجتا الموضوع دا ببساطة حيحصل كالاتي:-
1.التهاب العظم ودا يا طويل العمر بيكون في العظم المحيط بالسن المصاب.
2.خثار الجيب الكهفي : التهاب الاوعية الدموية.
3. الخراجات.
4.فقدان الاسنان
وغيرها من المضاعفات الممكن تؤدي لمشاكل أكبر لا سمح الله.


●العلاج :-
1. العلاج المنزلي :-
•مضمضة موية دافيه بالملح.
حسب الحالة لو الألم شديد ممكن بعد كل وجبة وصباح ومساء أما لو الألم خفيف ممكن مرتين أو ثلاثة مرات في اليوم .
لو مافي ملح مضمضة بالموية فقط خاصة بعد كل وجبة .
• زيت القرنفل بيخفف الإلتهاب.
مافي زيت ممكن تعضي قرنفلة أو تدقها وتخليها مدة في السن .
2. علاج طبيب الأسنان :-
• الخطة العلاجية ( الخلع، الحشوة، علاج جزور، نظافة لثة.....) والخطة بتتحدد اعتمادة على السن ونوع الألم و حجم التسوس.

●الأدوية : وعندنا في الم الاسنان بنحتاج مسكن أو مضاد حيوي في حال في الإلتهاب :
•اذا عندك التهاب في المنطقة حولين السن فلازم تأخد مضاد حيوي
1.Amoxicillin 500mg (1×3×5)
بتأخد حبة واحدة كل 8 ساعات لمدة 5يوم، بس ما كل الناس بينفع معاهم لان في ناس عندها حساسية من الاموكسللين ف موجود بدائل ليهو أما الاطفال فبيأخده شراب علي حسب الوزن والعمر بتاعهم.

2. Metroendzole 500mg (1×3×5)

•اما المسكنات :
1. Ibroprofen 400mg
هو من اقوى المسكنات المستخدمة لعلاج الم الاسنان لكن ما بينفع مع ( مرضى الضعط، مرضى الكلى ، مرضى سيولة الدم)
2. Paracetamol 500mg
(بندول الدكان😅) ودا اكثر مسكن آمن لكل الاعمار وكمان الحوامل.
3. Diclofenac k 50mg
دا اقوى من Ibuprofen وparacetmol وبيعمل كمسكن ومضاد حيوي وخافض للحرارة، ودا بينفع مع ناس الضغط ومرضى القلب.

🔴 طرق الوقاية :
1. غسل أسنانك صباح ومساء بمعجون فيهو فلورايد . أو المعجون المتوفر عندك المهم السؤاك صباح ومساء ومضمضة بالموية بعد الوجبات .
3. فرشه أسنانك تكون متوسطة م خشنة عشان م تضعف قوة الطبقة الخارجية .
(مافي حاجة اسمها الفرشه الخشنة بتنظف الاسنان المعلومة دي غلط الفرشة الخشنة أكبر مسبب لالتهاب وانحسار اللثة) .
4. نظف أسنانك بحركة دائرية وبرااااااحة ما بقوة. والمعجون كحبة الفاصوليا بس ما تملأ الفرشه
5. ما تدخل حاجات قوية في فمك ( حديد مثلا) وما تحاول تفتح كيس أو علبة بفمك عشان م تكسر أسنانك أو تتسبب ليها بضرب

اللهم احفظ هذا البلد وسائر بلاد المسلمين، ربنا آتنا في الدنيا حسنة وفي الآخرة حسنة وقنا عذاب النار وادخلنا الجنة مع الأبرار يا عزيز يا غفار

#summary_squeezer
#التعامل_مع_الحالات
https://t.me/summarysquezer

بسم الله الرحمن الرحيم

》》》التعامل مع حالات نزيف الدم

في حاجات كتيرة ممكن تتسبب لينا أنو الشخص يتعرض للإصابات تؤدي للنزيف.

●النزيف هو من الحالت المفروض نتعامل معاها بسرعة وحذر شديدين لأنو ببساطة ممكن يسبب لينا الموت في حال ما قدرنا نوقفو.


●ودي الإجراءات المفروض نتبعها:

•تقييم الحالة: وهنا بحاول نحصر مكان الإصابات وعددها والأشياء الممكن تهدد حياة المصاب.

•وقف النزيف: ودا لازم يكون في أسرع وقت ممكن . ودا عن طريق الضغط المباشر على الجرح بضمادة أو قماش (نظيفة إذا توفر). واذا ما وقف ممكن تقلل جريان الدم للمنطقة المصابة ودا عن طريق الضغط على الشرايين الرئيسية الواقعة فوق محل الإصابة.

•حماية الجرح:وهنا بتحاول تحميهو من التلوث ودا بكون عن طريق تغطيتو بقطعة قماش نظيفة(عشان نتجنب مضاعفات التهاب الجرح).

⭕️•وأهم شي تطلب المساعدة الطبي

●اجراءات اضافية:

•رفع الأطراف: ودا بقلل من جريان الدم للعضو المصاب وبالتالي النزيف حيوقف أسرع.

•تخفيف الألم: ندي المصاب مسكنات
•الحفاظ على دفء الجسم: عشان لو درجة الحرارة انخفضت فدا ممكن يتسبب للمريض بصدمة.

حفظ الله البلاد والعباد .. في رعاية الله

#summary_squeezer
#التعامل_مع_الحالات