》》》التعامل مع حالات ضيق التنفس

في ظل الظروف الراهنة ممكن كتيير يجيك أو يجي زول من الناس الحولك ضيق في التنفس. ودا عندو عدة أسباب:

_مشاكل في الرئة :
زي الربو(الأزمة) ، والإلتهابات وغيرو

_مشاكل في القلب والأوعية الدموية

_مشاكل في الجهاز العصبي

_مشاكل في الغدد:
زي الناس العندهم خلل في الغدة الدرقية

_حالات نفسية:
زي القلق والاكتئاب

_الحمل

⭕️فلو حصل ليك أو لغيرك ضيق التنفس دا وانت بعيد من المستشفى أو ما جمبك زول من المجال الطبي فمفروض تتبع الخطوات الجاية دي:

(1).أعمل نفسك كأنك داير تصفر واتنفس براحة براحة (الحركة دي بتخليك تستعيد التنفس بشكل طبيعي) ودي تفاصيلها

•أرخي عضلات رقبتك وكتفيك.
•اخد نفس براحة عن طريق أنفك وعد للرقم2 وخلي خشمك مقفول.
•أعمل خشمك كأنك داير تصفر.
•أخرج الهوا من رئتيك براحة براحة وانت لسة في حالة الصفير.

(2).الجلوس للأمام
(الإسترخاء أثناء الجلوس بساعد في راحة جسمك وعلاج ضيق التنفس) ودي تفاصيلها:

•أقعد في كرسي( خلي رجليك على الأرض، وصدرك يكون لقدام شوية)
•اسند يديك "الأكواع" على ركبك، أو أمسك دقنك بيدينك.
•وأهم شي أخد نفسك شوية شوية


(3).الهدوء
القلق والتوتر ممكن يتسببو في زيادة ضيق التنفس .

(4). أبعد عن المناطق الفيها دخان أو هواء غير نقي قدر الإمكان

(5).راجع العلاجات
ممكن عدم أخدك لأحد أدويتك الأساسية يكون عندو دور كبير في ضيق التنفس

(6).اشرب قهوة داكنة
شراب كباية من القهوة بساعد في تخفيف ضيق التنفس.
•فالكافيين الموجود في القهوة بساهم في التقليل من تعب عضلات الجهاز التنفسي وتحسين كفاءة الشعب الهوائية، كما يعمل على تقليل أعراض الربو).

(7).الزنجبيل
وهو مادة طاردة للبلغم وهي بتساعد في تقليل احتقان الصدر والأنف ، برضو الزنجبيل بحارب أي إلتهاب قد يصيب الحلق والجهاز التنفسي.


●ودايما خليك ساعي لأنك تصل لأي دكتور أو زول عندو خبرة في الإسعافات لأنو ممكن الموضوع دا يتطور.

حفظكم الله ورعاكم
اللهم أحفظ السودان وأهل السودان

#summary_squeezer
#التعامل_مع_الحالات

https://t.me/summarysquezer

⛔️التعامل الطبي مع الحالات بعد الإعتداء

⛔️التعامل الطبي مع الحالات بعد الإعتداء

في ظِل الأحداث نأسف على إنتشار حوادث الاغتصابات والاعتداءات الجنسية..

في البداية عايزين نذكركم بإنها للأسف الشديد وحدة من تبيعات الحروب، فكلام المجتمع العقيم وتعاملهم مع الحالات دي رجاءً ما تركزوا معاهُ شديد ومافي عيب أو نقص غير في اللي بدر منه فعل الإغتصاب.

في المُحتوى ده حنوريكم كيفية التعامل الطبي مع الحالات بعد الاعتداء، بحيث إنه تتجنبوا أيِّ تبيعات ليهُ..

⭕لازم المُعتدىٰ عليها تأخد الأربعة حاجات دي:-

1⃣موانع الحمل:-
في الصيدليات والمستشفيات موجودة موانع حمل طارئة emergency contraceptive pill بتجي في شكل حبة واحدة أو جهاز بتم إدخاله في الرحم:
🔻حبوب levonorgestrel تركيز 1,5 مجم.
🔻أو حبوب misoprtol، عدد 4 حبات مع بعض، مع التكرار في حالة عدم الإنزال.

🔻مرات نسبةً لأنو الحبوب اللي فوق ما متوفرة بكثرة فممكن تلجأوا لاستخدام حبوب famila بعدد جرعات كبيرة مقسمة كالآتي:-
4 حبات في البداية.
4 حبات بعد 12 ساعة.
وبعض المراجع بتقول 5 حبات كل 12 ساعة، ثلاثة جرعات (في حالة حدوث استفراغ خلال أقل من ساعتين نعيد الجرعة السابقة واللي هي 4 حبات تاني)

🔻أو حبوب ايلا / ulipristal إذا اتوفرت.
يُفضل تناول الحبوب علىٰ معدة ممتلئة، ويُفضل الإسراع في استخدامها خلال أول 5 أيام /120 ساعة.

ممكن بعد ما تاخد الحبوب تحس بأعراض جانبية
1/يعني إحتمال تحس بطمام ورغبة في الإستفراغ، لتجنبه ممكن تاخد حبوب توقِّف ليها إحساس الطمام وبعدها تجي تاخد حبوب منع الحمل

2/ ممكن برضو بعد تاخد الحبوب يحصل ليها نزيف، لكن دا طبيعي فما في داعي للخوف.

2⃣لقاح التهاب الكبد الوبائي Hepatitis B:-
تاني حاجة بعد العلاجات الإتذكرت فوق هو لقاح التهاب الكبد لأنه معدي، لو ما أخدته قبل كدا وهي صغيرة فتاخد 3 جرعات، الأولى تليها الثانية بعد شهر أو شهرين، ثم الثالثة بعد 4 _6 شهور.
وأسألوا الدكتور من مواعيد الجرعات

3⃣لازم برضو تاخد أدوية وقائية من الإيدز لمدة 28 يوم، أسألوا عليها في الصيدلية.

4⃣لازم تاخد مضادات حيوية:-
عشان تتجنب العدوى البكتيرية المنقولة جنسياً
▪️عشان تتجنب (الزُهري) :-
تاخد ceftriaxone, gentamicin +Azithromycine

▪️عشان تتجنب (السيلان) :-
تاخد doxycycline, tetracycline, amoxicillin, ceftriaxone.
ويُوصى بأخذ 200 mg من ال doxycycline خلال 24 _72 ساعة من التعرض للحادثة يعني ضروري نسرع في أخده‼️

⛔️تنبيهات هامة:
- في كل دواء نسأل الدكتور أو الصيدلي عشان يختار المضاد الحيوي المناسب، و يوضح الجرعة المناسبة

- في حالة كان للمعتدى عليها أمراض مثل الصداع النصفي، تجلط الدم أو مشاكل في الكبد يجب عليها إخبار الطبيب أو الصيدلي.

- ممكن لو مافي صيدلية قريبة منكم تسألوا على الأدوية في بوستات الحوجات، لكن ضروري أي حبَّة من الحبوب دي تتوفر وما نتجاهل الموضوع

حفظكم الله، ورعاكم وأعاد لنا الأمن والأمان💜.

#سامعنك_للصحة_النفسية
#صحتك_النفسية_هي_مبتغانا

》》》التعامل مع حالات نوبات الهلع


مع الوضع الراهن حق الحرب دي في كتيرين بتجيهم حاجة اسمها نوبة الهلع او panic attack هي شعور بالقلق المفاجئ والشديد .

● ممكن أنو  نوبات الهلع يكون عندها أعراض جسدية، بما في ذلك رجفة الجسم ، والشعور بالارتباك، ،الاحساس بي طمام  ، وعدم انتظام دقات القلب، وجفاف الفم، وضيق التنفس، والتعرق لفة الراس .

●أعراض نوبة الهلع:
ما خطيرة شديد  ولكن ممكن تكون مخيفة جدًا
• ضيق نفس
• الاحساس بالموت
• القلق الشديد وغير المبرر
• البكاء والاحساس بالوحدة
• الخوف من المستقبل
مرات بكون في هبوط في الدورة الدموية
وتستمر معظم نوبات الهلع من خمس دقايق إلى نص ساعة ومرات ممكن تستمر لاكتر من يوم.

●كيف اتعامل مع نوبات الهلع:
مهم جدا  عدم السماح لخوفك  انو يسيطر على الزول وتحاول بقدر الامكان تكون هادي وخليك عارف انو الأعراض  دي ما علامة  لأي شيء ضار قد يحدث وكمان الاعراض دي كلها ناتجة من القلق وبس .
مع مرور الزمن شوية شوية القلق ببدا يروح والأعراض بتروح بالتدريج .

ولو كان واحد من أفراد الأسرة جاته نوبة هلع لازم تكون جنبه وتطمنه وتخليه يهدا( ممكن تقرا ليه قرآن ) ويحاول يتنفس بشكل طبيعي وبراحة براحة (شهيق زفير ، شهيق زفير ).

●الطريقة الافضل للتنفس:
  اول شي لاوم تغمض عيونك وتركز على التنفس بتاعك
تنفس ببطء، بعمق وبلطف من خلال أنفك او خشمك
وممكن كمان تعد من واحد لحد خمسة مع كل شهيق و زفير
بعد شوية زمن بتبدا تحس انو نفسك بقى احسن ومرات ممكن تحس بتعب برضو لكن اهم شي ما توقف لازم تتنفس .
شراب كمية كافية من الموية بتخليك تهدا شوية.

●كيف اتجنب نوبات الهلع؟
•قبل اي شي الحفاظ على قراءة القرآن يوميا والتحصين
•ممارسة الرياضة بانتظام
•وممارسة تمارين التنفس المذكورة فوق تاخد نفس عميق و ببطء وتطلعو وتكرر التمرين كم مرة في اليوم
•كمان برضو الحفاظ على تناول الأطعمة المفيدة عشان نحافظ على مستوى السكر في الدم وكمان الحفاظ على ضغط دم طبيعي .
•أخد الكفاية من النوم وعدم الارهاق والتعب.

وخليك عارف انو " قل لن يصيبنا الا ما كتب الله لنا"
ربنا يعافي الجميع
ويصلح حال البلد
#summary_squeezer
#التعامل_مع_الحالات

》》》التعامل مع حالات عضة الثعبان


لو كنت ماشي في الطريق أو في البيت وعضاني دبيب ( ثعبان) اعمل شنو في الحالة دي ؟ الخطوات الجاية تتعمل أثناء انتظار المساعدة الطبية، لو  أمكن:

• ابتعد عن المكان الفيه  الثعبان.
• خليك هادئ وثابت.
• طلع أي  حلي( اساور ، حجل)  او  ساعات أو ملابس ضيقة قبل ظهور التورم.
• اقعد  أو أرقد بحيث يكون موضع اللدغة في وضع محايد ومريح.
• نظِّف موضع اللدغة بالموية والصابون. وغطِّيه أو لفَّه بضمادة او شاشة  نظيفة وجافة من غير ما تربطها شديد.

⭕️تنبيه
• ما تستخدم الأربطة الضاغطة أو الثلج عشان ما تمنع وصول الدم لي باقي العضو المصاب لانو ممكن يعفن.
• ما  تفتح محل اللدغة ( ما تفصد المكان بي موس )أو تحاول إخراج السُم بخشمك اوعك لأنو خطر شديد.
• ما  تشرب قهوة  أو كحول.
• ما  تاخد مسكنات الألم زي  الأسبرين أو الأيبوبروفين،لانو ممكن يزيد خطر التعرض للنزيف.
•  وحاول أنو  تتذكر لون وشكل الثعبان العضاك بحيث ممكن توصفها للدكتور ولو أمكن، حاول أنو تصورها صورة  من مسافة آمنة. فمعرفة نوع الثعبان  الدغك ممكن  يساعد في العلاج بصورة فعالة .

●الأعراض
•معظم لدغات الثعابين بتكون  في الذراعين أو الرسغين أو اليدين او الرجلين وممكن تكون سامة او غير سامة . ومن الأعراض الشائعة للدغة الثعبان غير السام الشعور بألم ووجود إصابة وخدوش في موضع اللدغة.

•أما لو كان الثعبان  ثعبان سام، فالمصاب بحس  بألم شديد بالذات لو هبش الحتة حقت اللدغة. ويمكن أنو تتفاقم الحالة وتسبب حدوث تورّم وكدمات في موضع اللدغة وربما بطول الذراع أو الساق.

•في أعراض تانية زي منها الطمام  وصعوبة التنفس والشعور بالضعف و  بكون في طعم غريب في الفم.

•في بعض الثعابين  بتأثر سمومها على الدماغ والأعصاب، ودا يؤدي إلى ظهور أعراض زي تدلي الجفن العلوي والشعور بوخز ( تنميل ) في أصابع اليد أو القدم وصعوبة في البلع وضعف في العضلات.

•مرات  ممكن أنو  الثعبان السام دا يلدغ الزول من غير ما يضخ السم، وهو ما يُعرَف باللدغة الجافة( بقولو الزول دا شماه دبيب ) بتكون الاسنان موجودة لكن من غير السم .

●العلاج:
الذهاب فورا الى اقرب وحدة مركزية او مستشفى وهم بدوك العلاج المناسب أو لو صعبت عليك فتش زول في المجال الطبي وهو بساعدك.

حفظكم الله ورعاكم 🤲
وأعاد الله للسودان أمنه وأمانه🤲

#summary_squeezer
#التعامل_مع_الحالات

    [﷽]

      》》》التعامل مع الحالات القلبية التنفسية الطارئة


اليوم عاوزين نتكلم عن موضوع لا بد انھ كل مواطن ما طبيب بس يعرف خطواتو بالتحديد في الأيام الي الوطن بيمر فيھا بالوضع الي كلنا شايفينو😔


●المھارة الي ھنتعلمھا الليلة باذن الله ھي
🎯دعم الحياة الأساسي.
او ممكن نخصصھا حبة ونسميھا
🎯الإنعاش القلبي الرئوي.

من اسمھا احنا في زول لا قدر اللھ أثناء ضرب النار دا جزء من مبنى وقع عليھو او رصاصة دخلت في جزء من جسمو دا بيزيد لينا احتمالية انو القلب يقيف ✋😕



عشان كدا ھناخد كم خطوة عشان نساعد قلبھ والرئة انو يواصلو الشغل لحد ما الإسعاف يجي او يتنقل لأقرب مستشفى او غيرھ🔁

📌الخطوات الي المطلوب منك تعملھا للزول دھ كالآتي:


🔸اول شي:
هتھز الزول الي قدامك دا وتسالو عن أي حاجة يا عمو انت بخير؟ انت واعي ؟ عمو قول اي شي؟... المھم اديھو اي شي ممكن انو يرد عليك

🔸نفترض انو الزول دھ والحمد لله رد ليك دھ كدا انقلو اقرب مستشفى او اتصل بالإسعاف 🤛🤜

🔸طيب ولنفترض انھ الزول دھ ما رد ليك🥺... ھنا ھننتقل للنقطة التانية للأسف😢والي ھي..

🔸الخطوة التانية :
بنفتح مجرى الھواء حق الزول دھ
طيب بنفتح مجرى الهواء كيف؟🤔
تمسك فكھ وترجعو لورا يعني ھتبعد فكھ عن رقبتو



🔸تالت شي:

تتأكد سريع جدا إذا كان الزول دا
١. بيتنفس (ودھ عن طريق إنك تحس بالھواء مارق من خشمو او من نخرتو او تشوف حركة الصدر)
٢. تتأكد انھ لسة الدورة الدموية والنبض حقو شغال(بتاجي مع أصبع الإبھام وتطلع مع اليد لفوق بتلات أصابع من يدك ھتحس بنبض في وريد وحاليا انا ما عاوزك تحسب عدد النبضات خاااااالص✋❌ عاوزك بس تعرف لسة فيھ نبض ولا لا)


🔸رابع شي:

خلاص والحمد لله لسة الزول دا بيتنفس و الدورة الدموية شغالة ھنبدأ إنعاش القلب والرئة وعشان نبدأ لازم تعمل زي ما ھنقول ھسي بالنقطة والشولة


🎯خت يدك في نص صدر الزول دھ(فيھ عظمة في صدرھ لو قدرت تحسھا خط ايديك الاتنين فوق بعض في نھاية العظمة دي) لو لا يبقى في نص الصدر وخلاص

🎯 ھنبدأ نضغط على المنطقة دي من ١٠٠ لحد ١٢٠ مرة في الدقيقة ⭕️خلي ذراعك كلھ مستقيم ووسطك من الي يتحرك يعني اياك مفصل من ذراعك يتحرك وانت بتضغط ❌

🎯بعد كل ٣٠ ضغطة أقفل نخرة الزول دھ بأصبعك وافتح مجرى الهواء زي ما اتعلمنا واديھ نفسين وواصل باقي المية ضغطة ولو وصلت ١٢٠ يا حبابھ..

🎯ھتستمر على الوضع دھ لحد ما الإسعاف ياجي او لو انت شايلھ معاك في عربيتك ھتستمر لحد ما تصل المستشفى

⭕️في صور تحت بتوضح الخطوات دي👇


⭕️تنويه الإنعاش دا بتستخدمو في حالات كتيرة منها (السكتة القلبية،الاختناق، الغرق ، الصدمة الكهربائية، وممكن في حالة توقف التنفس أثناء النوم)

وبسسس في رعاية الله وحفظه
اللهم احفظ أوطاننا بحفظك واصلح حال البلاد واحفظ العباد

#summary_squeezer
#التعامل_مع_الحالات

⭕فتح مجرى الهواء... لاحظ دقنھ لفوق

اقعد في الوضعية دي وانت بتضغط.. ذراعك كلھا مستقيمة و اللي يتحرك جسمك من النص

بسم الله الرحمن الرحيم

》》》التعامل مع حالات كسور العظام


مع الحاصل في البلد حاليا ممكن الزول كتير يتعرض للكسور. فاعمل شنو اذا حصل كسر لي او لواحد من أفراد الأسرة؟


●الكسور هي إصابات شائعة ممكن اي زول يتعرض ليها في أي وقت. وطبعا  لو  حصل كسر لازم اتصرف بحذر وفورًا.



●أنواع الكسور:
(1).الكسر المغلق: العظم بكون مكسور لكن الجلد سليم .
(2).الكسر المفتوح: هنا العظم المكسور بطلع برة  الجلد، ودا بزيد من خطر الإصابة بالعدوى.


●كيف اتصرف في حالة حصل كسر  ؟
• اول شي اذا كان الكسر من النوع المفتوح يعني العظم طلع برة الجلد فهنا اكيد بقى عندي جرح  طيب الجرح دا اول شي لازمه نضافة بمنديل تكون نضيفة و معقمة او اي قماش نظيف ونلف الجرح كويس عشان نقلل من النزيف او انو تحصل عدوى للجرح .

• اذا كان الكسر من النوع المقفول فااا بحاول انو اثبت محل الكسر بانو مثلا اعمل جبيرة وما إلى ذلك .

• بخلي الشخص على وضعه وما بحركه الا اذا كان في حتة في اشتباكات او اي شي يعرض حياة الزول للخطر  لانو الحركة دي ممكن تزيد من خطورة الاصابة او زيادة الكسر او حتى حصول نزيف لا قدر الله .


●كيف اعرف الزول دا عنده كسر ؟
(1).تورم والم في مكان الكسر
(2).التشوه أو إزاحة العظم من مكانه
(3).صعوبة تحريك العضو المكسور

■الإسعافات الأولية للكسور:
•   التثبيت:
منع المزيد من حركة المنطقة المصابة عن طريق التجبير أو استخدام الدعائم.

•   الارتفاع:
ارفع الطرف المصاب عشان اقلل التورم.

•    الثلج
لازم اخت  كمادات من الثلج (ملفوفة بقطعة قماش) على المنطقة المصابة لمدة 15-20 دقيقة كل 2-3 ساعات.

■خيارات العلاج:

●الجبيرة أو التجبيرة:
•  بالنسبة للكسور المستقرة، (النوع المقفول ما فيه جرح) ممكن استخدم جبيرة أو جبيرة لتثبيت العظام وبكدة العضم بلتحم مع بعض اسرع .

• الجراحة:
بعض الكسور  بتتطلب التدخل الجراحي بالذات اذا كانت من النوع المفتوح وعملت جرح كبير شديد او كان العظم زح بشكل كبير من مكانه او كان في تلف في الأنسجة المحيطة.

• الأدوية:
يمكن وصف مسكنات الألم والأدوية المضادة للالتهابات للتحكم في الألم والالتهاب.

⭕️طبعا الخطوات الفاتت دي كلها لا تغني عن الذهاب الى المستشفى يعني كانت بس اسعاف للمصاب والتدخل الطبي الناس ممكن يقي كتير من المضاعفات المصاحبة الكسور.

ربنا يعافينا ويعافيكم

#summary_squeezer
#التعامل_مع_الحالات
https://t.me/summarysquezer

بسم الله الرحمن الرحيم

》》》التعامل مع حالات انخفاض أو ارتفاع سكر الدم

■بالنسبة للإنخفاض:
●دا بحصل لما مستوى سكر الجلكوز ينخفض لأقل من مستواهو الطبيعي

●أسبابو
• ممكن زيادة في جرعة الأنسولين أو علاجات السكري التانية.
• عدم تناول الأكل أو الشراب بصورة كافية.
• أنو الواحد يبذل مجهود عالي.
• وممكن يكون بسبب أمراض تانية(الكلى، الملايا، الكبد)

●أعراض إنخفاض السكر كتييرة لكن ممكن نذكر منها:
•التعرق •رجفة •شعور بالجوع •لفة راس •الصداع •التعب •عدم التركيز •عدم وضوح الرؤية(عيونو طاشات) •سرعة دقات القلب •التنميل •التهيج •وممكن تصل لأنو يفقد الوعي.

●طريقة التعامل في حال انخفاض السكر في الدم
•شوف أي حاجة فيها سكر سريع للمريض عشان ياكلها أو يشربها (بلح ،عصير، قطعة حلاوة ..الخ...)
•تاني ننتظر ربع ساعة ولو لقينا طريقة نفحص للمريض .. وفي حال عدم وجود جهاز فحص السكر بنعاين لحال المريض إذا بقت مستقرة مع وضعو تحت الرقابة.
• حقن الجلاكاكون (دا بالنسبة للناس الوصفها ليهم الدكتور مسبقا)

●الوقاية من الإنخفاض
•ندي المريض وجبات صغيرة متكررة في اليوم.
•تعديل الجرعة بناء على حسب توجيه الطبيب.


■بالنسبة للإرتفاع

●أما دا بحصل لما مستوى سكر الجلكوز يزيد لأعلى من مستواهو الطبيعي
• عدم تناول علاج الأنسولين أو علاجات السكري التانية.
• تناول أكل أو شراب في سكر بكمية كبيرة.
• عدم الحركة.
• بعض الحالات الطبية(الكلى والكبد)

●أعراضو
•عطش •التعب •التبول المتكرر •البول بكون فيهو ريحة غريبة.

●طريقة التعامل في حال ارتفاع السكر في الدم
•اخد دوا السكري على حسب ارشادات الطبيب
•كتر من شراب السوائل شديد


●الوقاية
•وازن في الأكل
•حاول مارس الرياضة أو على الأقل اتمشى
•اخد الأدوية زي ما وصفها ليك الدكتور
•كل ما تلقى فرصة أفحص.

⭕️خليك دايما متابع مع طبيب متخصص عشان تتجنب المضاعفات

وربنا يحفظكم
ويصلح حال البلد.. في رعاية الله

#summary_squeezer
#التعامل_مع_الحالات
https://t.me/summarysquezer

بسم الله الرحمن الرحيم

》》》التعامل مع حالات غيبوبة السكر

●غيبوبة السكر أو (كومة السكري)  دي بتحصل للزول العندو مرض السكري ويا كانت بسبب ارتفاع السكر في الدم أو بسبب انخفاضو.

⭕️ممكن كومة السكري تجي لزول ما عندو مرض السكري ودا بكون زول طبيعي لكنو ما أكل لفترة طويلة أو أنو بذل مجهود كبير.

●التعامل  مع غيبوبة السكر

لو عندك جهاز لقياس السكر في الدم شوفو سريع واعرف هل السكر منخفض ولا مرتفع (اقل من 60منخفض .. وأكتر من 140 مرتفع "بتحصل كومة السكري لما يتخطى ال 600")

■في حالة الغيبوبة بسبب الانخفاض
•حندي المريض دِرِب  ونديهو 125ml من جلكوز 20% ولو ما كان موجود نديهو 250ml من جلكوز 10%

⭕️أبعدو عن جلكوز 50%لأنو بهيج الأوردة وبتلفها

•بعد كدا  بندي المريض  10ml محلول ملح وننتظر عشرة دقايق لحد ما العيان يصحى
• ولو ما صحى حنكمل معاهو بالجلكوز

•لو ما بتعرف تركب الدرب أو خايف منو في حقن جاهزة اسمها (جلوكاجون) بنديها تحت الجلد أو في العضل


■ في حالة الغيبوبة بسبب الإرتفاع
•كإسعاف حتديهو 15 وحدة انسولين وتجري بيهو للمستشفى
•أديهو درب ملح

□□□في حال ما عندك جهاز فحص السكر في الدم حنتصرف كيييف؟

• حنتعامل معاها على أنها غيبوبة انخفاض عشان هي الأخطر وبتتسبب في موت الدماغ
•و عشان الجسم في الغالب بقدر يتخلص من السكر الزايد بالسوائل حقت المحلول الملحي اللي نحن أساسا شغالين بيهو في الإجراءات دي

⭕️طبعا كونو يكون في دكتور متخصص الحاجة دي حتفيد شديد وتجنبنا المضاعفات

حفظ الله البلاد والعباد

#summary_squeezer
#التعامل_مع_الحالات
https://t.me/summarysquezer

https://youtu.be/EsA19Ulybqo?feature=shared

بالنسبة للناس البتسأل من طريقة فحص السكر في الدم الفيديو دا حيفيدكم بإذن الله

https://youtu.be/8Hk7ZwkbQDs?feature=shared

وبالنسبة للناس البتسأل من طريقة استخدام حق الجلوكاجون الفيديو دا مفيد جدا