بسم الله الرحمن الرحيم
منشور رقم(85)

🌹السلام عليكم ورحمة الله وبركاته🌹
شباب حلوين 🤩اخباركم ان شاء الله كلكم بخير، ربنا يرفع البلاء عن بلادنا وجميع بلاد المسلمين🤲.

موضوعنا الليلة ما محتاج ليه مقدمات تشويقية اسمه براااهو يكفي تشويق، جاهزين؟ 🔥

》》》PEPTIC ULCER

وعشان نفهمه بطريقة سهلة و مبسطة، حنتناوله على شكل نقاط ظريفة كده زيكم😍، عشان نطلع من هنا كلنا عابرين في الموضوع💪🔥😎.

🔹1-Definition :
تعريفه ببساطة هو خلل أو تقرح في الغشاء المخاطي لأي جزء من الجهاز الهضمي المعرض لإفراز حمض البيبسين (acid-pepsin).

🔹2-Site:
بتواجد في اماكم كثيرة أشهرها هي /
(A) First part of duodenum/
بتحصل فيهو بنسبة ٪95 وهو الاكثر شيوعا.
(B) Antrum part of stomach.
(C) Lower part of esophagus(due to GERD).

🔹3-Pathophysiology :
•ممكن حمض البيبسين بسبب لينا القرحة، لمن يحصل عدم توازن بين حاجتتين هم /
(a) Aggressive factor (acid, pepsin, H pylori).
(b) mucosal defenses(secretion of bicarbonate, mucus, Prostaglandins).

حلوين لحد هنا؟ 💜👍

🔹4-Causes:
•اسبابه ممكن اختصرها في ٥ اسباب بسيطة /
(A) H. Pylori infection /
ايضا هو الشائع لحصول القرحة.
(B) Smoking and alcohol consumption.
(C) Drink caffeine like (coffee & tea).
(D) Aspirin and NSAIDS intake.
(E) Spicy and hot food.
(E) Spicy and hot food.


🔹5-Symptoms :
A/Abdominal pain (الم شديد في المعدة) 😵‍💫🤒.
B /Feeling of fullness, bloating (الشعور بالامتلاء او الانتفاخ).
C/Nausea (غثيان).
•وفي حالات ال severe sign ممكن نلقى /
D/vomiting blood( استفراغ دم)🤮.
E/Dark blood in stoolsوجود دم غامق في) البراز).


🔹6-Pathogenesis :
•لو لا قدر الله وحصل ليك تلف في الغشاء المخاطي ده، بمجرد تلف الطبقة المخاطية السطحية، ستصبح الطبقات الداخلية عرضة للحموضة،غير كده،انه قدرة الخلايا المخاطية على إفراز البيكربونات تكون معرضة للخطر.


🔹7-Epidemiology :
•حوالي 70% من المرضى بتحصل ليهم القرحة وهم في أعمار من 25 إلى 64 سنة.


🔹8-Important associated condition :
(A) Zollinger - Ellison syndrome /
•لمن يحصل افراز كبير لحمض الجاسترين، بحصل للمريض ورم في المعدة يسمى Gastrinoma, اللي بسبب لي مشاكل افراز بكمية اكبر، فبتعمل لي الم شديد في المعدة وبتعمل تقرحات في اماكن عديدة، منها المريء والمعدة و الاثني عشر، بتكون مصاحباهم اعراض تانية زي ال diarrhea و ال heartburn🤢.
(B) Crohn disease/
•ممكن يشَمل لينا في التقرحات من تقرحات الفم الى تقرحات المستقيم، لكن من النادر انها تعمل تقرحات في المعدة بالرغم من انها عادي جدا تعمل تقرح في الاثني عشر.


🔹9-Management :
•بعتمد العلاج دايما على السبب، يعني لو السبب البكتريا حنقتلها، ولو السبب الادوية الكتيرة بالذات الناس اللي مجرد ما يصدع يبلع بندول و اسبرين (عارف روحك 😂😉) بنوقفها منك ،بعدها بنديك ادوية تساعدك انه تقلل من القرحة لحد ما تمشي منك ان شاء الله.
معلومة خلوها في بالكم لقدام إنه ال
the first - line to treatment is( PPI = Proton Pump Inhibitor).

•طيب يا دكتور كده خلصنا، اي بس باقي اخر حاجة وانا قاصد اخليها اخر حاجتين وحنتكلم عنهم بتوسع شوية اللي هم /
1-Duodenal ulcer.
2-Gastric ulcer.

طيب نبدأ ب ال Gastric ulcer /
•بتكون في ال old thin man يعني رجل كبير سن وضعيف، الشخص المصاب بجيهو الم بعد ما يشبع اسمها (satiety pain), وانه بس 1٪ من الأشخاص المصابين القرحة عندهم بتتحول الى malignant.😬

•نجي نشوف ال Duodenal ulcer /
بتكون عند ال young obese man يعني شاب صغير سن و سمين، الشخص المصاب بجيو الالم لمن يكون جائع تسمى (Hunger pain), في مراجع بتقول سببها الرئيسي H. Pyloric infection, ودي غير ممكن تتحول إلى malignant.👍

كده خلصنا من موضوعنا ان شاء الله تكونو استفدتم وربنا يوفقكم واذا في سؤال او اي شيء محتاجين تعرفوهو طوالي ارسلو وأسألو.. نحن اخوانكم🫡،
نشوفكم على خير❤️.

وبسسسس سلاااام😁✋


#GIT
#pathology
#summary_squeezer
#summary_squeezer_team
#enjoy_medicine

https://t.me/summarysquezer

اللهم احفظ أهل السودان 🤲

يا ناس ال musculoskeletal system
القراية كيف معاكم 🤔
دايرين مساعدة في القراية؟
+دايرين مفاجآت؟

طبعا نحن عارفين اللوكوموتر حفظو كتير وداير قراية وتركيز ومصادر😬

نخليكم تعملو دا كلو براكم؟!

لا والله.. لازم نعزكم ونساعدكم في القراية والمراجعة وعشان كدا عملنا ليكم قناة متخصصة في شرح ال musculoskeletal system🤩🔥

وزي ما بنقول طوالي خشو بيدكم اليمين وما تنسو تشيرو 😁

ودا الرابط👇

https://t.me/summarysqueezermusculoskeletal

في رعاية الله ✨

#summary_squeezer_team
#muscloskeletal_system
#enjoy_medicine

لو في أي حوجة أو أي زول عندو حاجة مفيدة يرسلها هنا

0116722664 عسى تنفع زول
وربنا يصلح حال البلد ويحفظ أهلو

#summary_squeezer

سيتم نشر كل الحالات و الحوجات على قروب قوم أمشي اقرأ
بنتمنا الناس تشير وتساهم بالبتقدر عليه رابط القروب في أول تعليق
ربنا يصلح حال البلاد و العباد 💙

أتصرف كيف لو في زول جمبي إتعرض لإصابة بطلق ناري؟

⛔️أتصرف كيف لو في زول جمبي إتعرض لإصابة بطلق ناري؟

لو في زول قريب ليك حصلت ليه إصابة، إنت الوحيد الحتكون قادر على مساعدته في إنه يبقى كويس فركِّز في البوست دا لأنه ما معروف يحصل شنو!

أهم حاجة ما نخاف وما نهلع ننقل المصاب لمكان آمن ونسعفو كالآتي:

💢 نضِف مكان الجرح من أيِّ أوساخ وحتى الملابس نزحها منو، نفتش ونتأكد إنه مافي أي إصابات تانية

💢 إذا كان في جرح بآلة، يعني طلقة أو زول وقع وصابته حديدة، أو سكين لا قدر الله نحاول ماااااا نطلِّعها، ما تطلعها لأنه كده بنزيد النزيف ونزيد الوضع خطورة

💢 نجيب قماش نضيف ولو مافي معقمات ممكن نعمله بموية ملح، ونضغط بيها على الجرح ونربطه كويس شديد، لو النزيف لسه ما وقف، ما تفك القماشة الأولى لالا نربُط عليها ونجيب غيرها، كل ما تتملي دم بس نجيب قماش بي فوق زيادة عشان لو فتحنا الجرح للهوا ممكن يتلوث.

💢 لو الإصابة في مكان حسَّاس زي الراس أو العين!
نربُطها عشان نوقف النزيف، بدون ما نضغط عليها بس خفيف خفيف بي فوق ولو في شي زي حديدة أو طلقة ما نحاول نطلعها أو ندخلها لجوا، لأنه كدا المريض إحتمالية موته بالنزيف أكبر، فقط أسعفوا المصاب إنكم تقللوا الدم وأمشوا بيه لأقرب وحدة صحية.

💢نبعد تماااااماً عن السوائل مثلاً زي الموية، عصاير حتى لو هو قال ليكم داير موية! لأنه كدا بزيد النزيف وممكن يتعرض للوفاة.

💢نهدِّي المصاب ونوريه إنه كل شيء حيكون تمام إن شاءالله، ونرقِّده في بطانية عشان ما يبرد

⛔️ نعمل شنو إذا كان النزيف داخلي؟؟؟؟

أحياناً الضربات القوية ما بتعمل نزيف ظاهر، لكن في علامات بتساعدنا نعرف احتمالية النزيف الداخلي وهي:

١. المصاب برعف من أنفه وبقية فتحات الجسم
٢. ممكن يستفرغ ويكُح دم
٣. جسمه بكون ورمان!
٤. حيقول ليك بطني بتوجعني
٥. حيعرق وجسمُه من برا باااارد
٦. لونه شاحب
٧. بكون مُطشِّش وبهلوس شوية

دي كلها علامات ممكن تدلَّنا على وجود نزيف داخلي، كل الفي يدنا إنه نعرف العلامات دي كويس ونجري بيه على أقرب وحدة صحية.

ولا حول ولا قوة إلا بالله!

ساعدنا في إسعاف المصابين بالرصاص
قول لينا في الكومنتات شنو النصيحة الممكن تزيدها على البوست عشان نتعامل في حالة الطلق الناري؟ ولو في زول اتعرض لإصابة قدامك عملتو ليه شنو؟

#لازم_تقيف
#قوم_أمشي_أقرا

..

ضروري جدا تقرو البوستات دي وتنشروها
(التكملة في قناة "قوم أمشي أقرأ" ) لأنها ممكن تكون سبب في انقاذ حياة

🔸التعامل مع حالات ضيق التنفس

》》》التعامل مع حالات ضيق التنفس

في ظل الظروف الراهنة ممكن كتيير يجيك أو يجي زول من الناس الحولك ضيق في التنفس. ودا عندو عدة أسباب:

_مشاكل في الرئة :
زي الربو(الأزمة) ، والإلتهابات وغيرو

_مشاكل في القلب والأوعية الدموية

_مشاكل في الجهاز العصبي

_مشاكل في الغدد:
زي الناس العندهم خلل في الغدة الدرقية

_حالات نفسية:
زي القلق والاكتئاب

_الحمل

⭕️فلو حصل ليك أو لغيرك ضيق التنفس دا وانت بعيد من المستشفى أو ما جمبك زول من المجال الطبي فمفروض تتبع الخطوات الجاية دي:

(1).أعمل نفسك كأنك داير تصفر واتنفس براحة براحة (الحركة دي بتخليك تستعيد التنفس بشكل طبيعي) ودي تفاصيلها

•أرخي عضلات رقبتك وكتفيك.
•اخد نفس براحة عن طريق أنفك وعد للرقم2 وخلي خشمك مقفول.
•أعمل خشمك كأنك داير تصفر.
•أخرج الهوا من رئتيك براحة براحة وانت لسة في حالة الصفير.

(2).الجلوس للأمام
(الإسترخاء أثناء الجلوس بساعد في راحة جسمك وعلاج ضيق التنفس) ودي تفاصيلها:

•أقعد في كرسي( خلي رجليك على الأرض، وصدرك يكون لقدام شوية)
•اسند يديك "الأكواع" على ركبك، أو أمسك دقنك بيدينك.
•وأهم شي أخد نفسك شوية شوية


(3).الهدوء
القلق والتوتر ممكن يتسببو في زيادة ضيق التنفس .

(4). أبعد عن المناطق الفيها دخان أو هواء غير نقي قدر الإمكان

(5).راجع العلاجات
ممكن عدم أخدك لأحد أدويتك الأساسية يكون عندو دور كبير في ضيق التنفس

(6).اشرب قهوة داكنة
شراب كباية من القهوة بساعد في تخفيف ضيق التنفس.
•فالكافيين الموجود في القهوة بساهم في التقليل من تعب عضلات الجهاز التنفسي وتحسين كفاءة الشعب الهوائية، كما يعمل على تقليل أعراض الربو).

(7).الزنجبيل
وهو مادة طاردة للبلغم وهي بتساعد في تقليل احتقان الصدر والأنف ، برضو الزنجبيل بحارب أي إلتهاب قد يصيب الحلق والجهاز التنفسي.


●ودايما خليك ساعي لأنك تصل لأي دكتور أو زول عندو خبرة في الإسعافات لأنو ممكن الموضوع دا يتطور.

حفظكم الله ورعاكم
اللهم أحفظ السودان وأهل السودان

#summary_squeezer
#التعامل_مع_الحالات

https://t.me/summarysquezer

⛔️التعامل الطبي مع الحالات بعد الإعتداء

⛔️التعامل الطبي مع الحالات بعد الإعتداء

في ظِل الأحداث نأسف على إنتشار حوادث الاغتصابات والاعتداءات الجنسية..

في البداية عايزين نذكركم بإنها للأسف الشديد وحدة من تبيعات الحروب، فكلام المجتمع العقيم وتعاملهم مع الحالات دي رجاءً ما تركزوا معاهُ شديد ومافي عيب أو نقص غير في اللي بدر منه فعل الإغتصاب.

في المُحتوى ده حنوريكم كيفية التعامل الطبي مع الحالات بعد الاعتداء، بحيث إنه تتجنبوا أيِّ تبيعات ليهُ..

⭕لازم المُعتدىٰ عليها تأخد الأربعة حاجات دي:-

1⃣موانع الحمل:-
في الصيدليات والمستشفيات موجودة موانع حمل طارئة emergency contraceptive pill بتجي في شكل حبة واحدة أو جهاز بتم إدخاله في الرحم:
🔻حبوب levonorgestrel تركيز 1,5 مجم.
🔻أو حبوب misoprtol، عدد 4 حبات مع بعض، مع التكرار في حالة عدم الإنزال.

🔻مرات نسبةً لأنو الحبوب اللي فوق ما متوفرة بكثرة فممكن تلجأوا لاستخدام حبوب famila بعدد جرعات كبيرة مقسمة كالآتي:-
4 حبات في البداية.
4 حبات بعد 12 ساعة.
وبعض المراجع بتقول 5 حبات كل 12 ساعة، ثلاثة جرعات (في حالة حدوث استفراغ خلال أقل من ساعتين نعيد الجرعة السابقة واللي هي 4 حبات تاني)

🔻أو حبوب ايلا / ulipristal إذا اتوفرت.
يُفضل تناول الحبوب علىٰ معدة ممتلئة، ويُفضل الإسراع في استخدامها خلال أول 5 أيام /120 ساعة.

ممكن بعد ما تاخد الحبوب تحس بأعراض جانبية
1/يعني إحتمال تحس بطمام ورغبة في الإستفراغ، لتجنبه ممكن تاخد حبوب توقِّف ليها إحساس الطمام وبعدها تجي تاخد حبوب منع الحمل

2/ ممكن برضو بعد تاخد الحبوب يحصل ليها نزيف، لكن دا طبيعي فما في داعي للخوف.

2⃣لقاح التهاب الكبد الوبائي Hepatitis B:-
تاني حاجة بعد العلاجات الإتذكرت فوق هو لقاح التهاب الكبد لأنه معدي، لو ما أخدته قبل كدا وهي صغيرة فتاخد 3 جرعات، الأولى تليها الثانية بعد شهر أو شهرين، ثم الثالثة بعد 4 _6 شهور.
وأسألوا الدكتور من مواعيد الجرعات

3⃣لازم برضو تاخد أدوية وقائية من الإيدز لمدة 28 يوم، أسألوا عليها في الصيدلية.

4⃣لازم تاخد مضادات حيوية:-
عشان تتجنب العدوى البكتيرية المنقولة جنسياً
▪️عشان تتجنب (الزُهري) :-
تاخد ceftriaxone, gentamicin +Azithromycine

▪️عشان تتجنب (السيلان) :-
تاخد doxycycline, tetracycline, amoxicillin, ceftriaxone.
ويُوصى بأخذ 200 mg من ال doxycycline خلال 24 _72 ساعة من التعرض للحادثة يعني ضروري نسرع في أخده‼️

⛔️تنبيهات هامة:
- في كل دواء نسأل الدكتور أو الصيدلي عشان يختار المضاد الحيوي المناسب، و يوضح الجرعة المناسبة

- في حالة كان للمعتدى عليها أمراض مثل الصداع النصفي، تجلط الدم أو مشاكل في الكبد يجب عليها إخبار الطبيب أو الصيدلي.

- ممكن لو مافي صيدلية قريبة منكم تسألوا على الأدوية في بوستات الحوجات، لكن ضروري أي حبَّة من الحبوب دي تتوفر وما نتجاهل الموضوع

حفظكم الله، ورعاكم وأعاد لنا الأمن والأمان💜.

#سامعنك_للصحة_النفسية
#صحتك_النفسية_هي_مبتغانا

》》》التعامل مع حالات نوبات الهلع


مع الوضع الراهن حق الحرب دي في كتيرين بتجيهم حاجة اسمها نوبة الهلع او panic attack هي شعور بالقلق المفاجئ والشديد .

● ممكن أنو  نوبات الهلع يكون عندها أعراض جسدية، بما في ذلك رجفة الجسم ، والشعور بالارتباك، ،الاحساس بي طمام  ، وعدم انتظام دقات القلب، وجفاف الفم، وضيق التنفس، والتعرق لفة الراس .

●أعراض نوبة الهلع:
ما خطيرة شديد  ولكن ممكن تكون مخيفة جدًا
• ضيق نفس
• الاحساس بالموت
• القلق الشديد وغير المبرر
• البكاء والاحساس بالوحدة
• الخوف من المستقبل
مرات بكون في هبوط في الدورة الدموية
وتستمر معظم نوبات الهلع من خمس دقايق إلى نص ساعة ومرات ممكن تستمر لاكتر من يوم.

●كيف اتعامل مع نوبات الهلع:
مهم جدا  عدم السماح لخوفك  انو يسيطر على الزول وتحاول بقدر الامكان تكون هادي وخليك عارف انو الأعراض  دي ما علامة  لأي شيء ضار قد يحدث وكمان الاعراض دي كلها ناتجة من القلق وبس .
مع مرور الزمن شوية شوية القلق ببدا يروح والأعراض بتروح بالتدريج .

ولو كان واحد من أفراد الأسرة جاته نوبة هلع لازم تكون جنبه وتطمنه وتخليه يهدا( ممكن تقرا ليه قرآن ) ويحاول يتنفس بشكل طبيعي وبراحة براحة (شهيق زفير ، شهيق زفير ).

●الطريقة الافضل للتنفس:
  اول شي لاوم تغمض عيونك وتركز على التنفس بتاعك
تنفس ببطء، بعمق وبلطف من خلال أنفك او خشمك
وممكن كمان تعد من واحد لحد خمسة مع كل شهيق و زفير
بعد شوية زمن بتبدا تحس انو نفسك بقى احسن ومرات ممكن تحس بتعب برضو لكن اهم شي ما توقف لازم تتنفس .
شراب كمية كافية من الموية بتخليك تهدا شوية.

●كيف اتجنب نوبات الهلع؟
•قبل اي شي الحفاظ على قراءة القرآن يوميا والتحصين
•ممارسة الرياضة بانتظام
•وممارسة تمارين التنفس المذكورة فوق تاخد نفس عميق و ببطء وتطلعو وتكرر التمرين كم مرة في اليوم
•كمان برضو الحفاظ على تناول الأطعمة المفيدة عشان نحافظ على مستوى السكر في الدم وكمان الحفاظ على ضغط دم طبيعي .
•أخد الكفاية من النوم وعدم الارهاق والتعب.

وخليك عارف انو " قل لن يصيبنا الا ما كتب الله لنا"
ربنا يعافي الجميع
ويصلح حال البلد
#summary_squeezer
#التعامل_مع_الحالات

》》》التعامل مع حالات عضة الثعبان


لو كنت ماشي في الطريق أو في البيت وعضاني دبيب ( ثعبان) اعمل شنو في الحالة دي ؟ الخطوات الجاية تتعمل أثناء انتظار المساعدة الطبية، لو  أمكن:

• ابتعد عن المكان الفيه  الثعبان.
• خليك هادئ وثابت.
• طلع أي  حلي( اساور ، حجل)  او  ساعات أو ملابس ضيقة قبل ظهور التورم.
• اقعد  أو أرقد بحيث يكون موضع اللدغة في وضع محايد ومريح.
• نظِّف موضع اللدغة بالموية والصابون. وغطِّيه أو لفَّه بضمادة او شاشة  نظيفة وجافة من غير ما تربطها شديد.

⭕️تنبيه
• ما تستخدم الأربطة الضاغطة أو الثلج عشان ما تمنع وصول الدم لي باقي العضو المصاب لانو ممكن يعفن.
• ما  تفتح محل اللدغة ( ما تفصد المكان بي موس )أو تحاول إخراج السُم بخشمك اوعك لأنو خطر شديد.
• ما  تشرب قهوة  أو كحول.
• ما  تاخد مسكنات الألم زي  الأسبرين أو الأيبوبروفين،لانو ممكن يزيد خطر التعرض للنزيف.
•  وحاول أنو  تتذكر لون وشكل الثعبان العضاك بحيث ممكن توصفها للدكتور ولو أمكن، حاول أنو تصورها صورة  من مسافة آمنة. فمعرفة نوع الثعبان  الدغك ممكن  يساعد في العلاج بصورة فعالة .

●الأعراض
•معظم لدغات الثعابين بتكون  في الذراعين أو الرسغين أو اليدين او الرجلين وممكن تكون سامة او غير سامة . ومن الأعراض الشائعة للدغة الثعبان غير السام الشعور بألم ووجود إصابة وخدوش في موضع اللدغة.

•أما لو كان الثعبان  ثعبان سام، فالمصاب بحس  بألم شديد بالذات لو هبش الحتة حقت اللدغة. ويمكن أنو تتفاقم الحالة وتسبب حدوث تورّم وكدمات في موضع اللدغة وربما بطول الذراع أو الساق.

•في أعراض تانية زي منها الطمام  وصعوبة التنفس والشعور بالضعف و  بكون في طعم غريب في الفم.

•في بعض الثعابين  بتأثر سمومها على الدماغ والأعصاب، ودا يؤدي إلى ظهور أعراض زي تدلي الجفن العلوي والشعور بوخز ( تنميل ) في أصابع اليد أو القدم وصعوبة في البلع وضعف في العضلات.

•مرات  ممكن أنو  الثعبان السام دا يلدغ الزول من غير ما يضخ السم، وهو ما يُعرَف باللدغة الجافة( بقولو الزول دا شماه دبيب ) بتكون الاسنان موجودة لكن من غير السم .

●العلاج:
الذهاب فورا الى اقرب وحدة مركزية او مستشفى وهم بدوك العلاج المناسب أو لو صعبت عليك فتش زول في المجال الطبي وهو بساعدك.

حفظكم الله ورعاكم 🤲
وأعاد الله للسودان أمنه وأمانه🤲

#summary_squeezer
#التعامل_مع_الحالات