#عشان_قلبي
بقم: طارق اللبيب

الجزء 09


لما سماح قالت الكلام الغريب ده لي حمد .. حمد استاء استياء شديد وبطنو طمت .. وقال ليها خلاص ياسماح مافي مشكلة .. اقتراحك مقبول تب .بس عندي طلب ..

خليك قاعده في البيت .. لغاية ما تلدي الجنا الفي بطنك ..لانو ده جناي انا .. وكانك ما زوجتي .. مابقرب منك ولاتقربي مني .. ولاعندي معاك اي علاقة .. بس بعد تلدي مباشرة بطلقك اتفقنا ؟؟

قالت ليهو اتفقنا ..

شوية هدأت ودخلت جوه جابت ليهو أكل .. قال ليها مستحيل اكل من يدك تاني ..قالت ليهو يلا في ستين .. شالت الاكل رجعت بيهو ..

ما أخد ساعة ضرب لي الزاكي ..عشان يسأل من فدوى .. لقى التلفون مقفول ..

وقلق قلق شديد .. وتاني دقاهو .. مقفول .. وتالت ضربو جاب جرس بس الزاكي مارفع .. وحمد بقى مقلق يدخل ويمرق .. وضرب كم مرة والزاكي مارد ..

وماعارف الحاصل بيغادي شنو وكلام سماح ما هماهو شديد ..ليه ماعارف ..

بس هسي اهتمامو وقلقو كلو على فدوى ..

قامت سماح سألتو قالت ليهو ضربت لي منو .. الماردت ليك دي .. وخلتك مقلق كدي ؟.. قال ليها وانتي مالك ؟؟ وعلاقتك بالموضوع شنو .. ؟

مش اتفقنا اي زول في حالو ؟؟

قالت ليهو يعني اضرب للزول الحكيت ليك بيهو عادي ..؟

قال ليها اضربي ليهو لونفسك بتسمح ليك بالخيانة . وانتي في عصمة راجل .. وجناهو في بطنك .. لو اهلك ربوك على كدا؟ مافي مشكلة اعملي البريحك ..

بس لو سمحتي تاني ماتسأليني من حاجة بتخصني ..وماعندك علاقة بحياتي ..خليك في حالك وخليني في حالي ..

وتاني شال التلفون ضرب للزاكي المرة دي الزاكي رده ليهو ..

حمد قال ليهو انت وين يا الزاكي .. قال ليهو قدام مع ناس بكري .. حمد داير يسألو من فدوي .. عاين لي سماح كدا .. لقاها غازة كوعا تعاين ليهو ..

قال ليهو خلاص انا جاي عليك ..حضر لي حاجة اكلها لاني جيعان شديد ..

وطلع طوالي وعاين لي سماح ..قال ليها مع السلامة ياسماح خلي بالك من نفسك ..قالت ليهو وانت مالك ومالي .. امشي في حالك ..

قال ليها طيب .. طلع طوالي ركب العربية مشى على ناس الزاكي .. وبكري .. والمرة دي معاهم واحد اسمو نميري . برضو من ضمن الشلة ..

المهم الزول ده لمن جا للناس ديل قابلوهو مقابلة باردة شديد ..

حتى بكري الزول الفكاهي .. قابل حمد مقابلة سئيه .. ونميري ده رد ليهو السلام بي تحت نخريهو .. والزاكي مارد السلام ..اساسا صاري وشو ..؟

المهم حمد اتحسس شديد لكن ماعرف الحاصل شنو؟

قام نادى الزاكي قال ليهو الزاكي لو سمحت تعال دقيقة .. جاهو قال ليهو اها شنو؟

قال ليهو انتو مالكم في شنو ..؟ قال ليهو مافي شي ..

قال ليهو ياخي مقابلتكم لي كانت قاتلة والله ..

الزاكي قال ليهو قلت ليك مافي شي .. انت عايزني لشنو؟قول العندك وخلصني ..

قال ليهو انا بسأل من فدوى بقت كيف ؟

قال ليهو انا بٍسألك سؤال وجاوبني بصراحة ياحمد.. انت ليه مهتمي بي فدوى دي قدر ده ..

ياخي فدوى تطير وانت وراها ..

قال ليهو ده كلام شنو يا الزاكي ..؟ انت اخوي والله .. الزول مابسأل من اختو ..الزاكي قاليهو ياخي فكني من الحنك الماجايب حقو ده ..خوة من متين ؟؟

لو سمحت ياحمد .. ابعد من حياتنا وشوف ارزاقك ..

قال ليهو حاضر يا الزاكي .. وانا آسف شديد ..بس ياريت توريني الغلط الحصل مني شنو؟.. الزاكي فات منو طوالي

حمد من كلام الزاكي تاني مارجع للجلسة ..طوالي مشى منهم..وركب العربية ومن الاحراج والزعل قرب يبكي ..

واكتر شي هاميهو انو ماعرف فدوى الحاصل عليها شنو؟

وبتسأءل جواهو كيف يا الزاكي زوجتك مريضة قدر ده .. وانت قاعد تتونس ..ياربي هسي فدوى تكون كيفنها ..

ومشى بقى سايق الامجاد ولافي بالشوارع بدون وعي .. يمرق من شارع ويدخل في شارع .. وهو ماعارف ماشي وين ؟

في لفو داك جاء ماشي على السوق في الشارع بتاع حي العرب بورا هناك مع زريبة العيش وهو متجه جنوب ماشي على مسجد العرضة جا ماري في مراة كبيرة كدا اشرت ليهو ..وقف ليها ..

وقبل المراة دي .. في كم نفر اشرو ليهو ..ابدا ما وقف ..لانه ماعندو مزاج يشتغل ..

المراة قالت ليهو انا ماشة السلاح الطبي ..

قال ليها اركبي .. قالت ليهو اها بي كم ؟

قال ليها عليك الله ياحجة اركبي .. البتدفعيهو لي بشيلو .. انا ماقادر اجادل ..المراة ركبت طوالي .. وهو سايق وماشي .. قالت ليهو مالك ياولدي متضايق قدر ده ؟ الدنيا مابتستاهل ..

قال ليها والله ياحجة انا ما الزول البهتم بالدنيا لكن الظلم حار ؟

قالت ليهو انا مراة قدر امك احكي لي ..

حكى ليها .. مرض فدوى زوجة صاحبو ..وقصة المقابلة القبل شوية ..

وقال ليها انا ماعارف ذنبي شنو؟ ..بعدين اكتر شي مضايقني ماعرفت المراة العدتني زي اخوها ..الحاصل عليها شنو ؟ ..وكيف هي عيانه وراجلها قاعد يتونس؟

المراة الراكبة معاهو دي دي قعدت تبكي .. وتقشقش في دميعاتها ..

قالت ليهو سبحان الله ياولدي .. غايتو حوا والده .. انا من معاملة راجل بتي ليها ..

قنعت من الرجال كلو كلو .. وقلت البلد دي مافيها رجال .. لكن انت بكلامك

ده ..غيرت راي ..انا بتي عيانة وراقدة في المستشفي .. وراجلها جدعها وهرب ..

وانا هسي بمشي الثورة وبجي المستشفى تلاتة مرات في اليوم .. بمشي لاولاد بتي الصباح .. والبسهم واعمل ليهم الاكل .. اجي المستشفى اقعد مع بتي .. لما الاولاد يجو راجعين من المدرسة برجع تاني .. بديهم الاكل واجي راجعة المستشفى ..

وامشي ليهم المغرب اعشيهم .. وانومهم واجي راجعة المستشفى المرة التالتة ..

عشان ابوهم هارب من المسؤولية .. وكت مرق قال لي ان شاء الله بتك تموت ..

لكن الحمد لله ياولدي ترا صابرة وراجيه الله ..

قال ليها ماتشيلي هم ياحجة .. انا بحاول اساعدك والله ..

بس انتي ادعي لي فدوى ربنا يشفيها .. وتقوم بالسلامة لوليداتها ..

اها يازول لامن وصلو المستشفى .. نزلت المراة وحلف من القروش اداها تلفونو ..وقال ليها الصباح لمن تجي للاولاد اضربي لي ..

شالت منو التلفون وهو رجع على البيت .. في الطريق تلفونو ضرب ..

الرقم ماغريب عليهو .. لكن مامسجل ..

حمد فتح الخط وقال الو مرحبا ..

جاهو صوت فدوى المابغبى عليهو وصوتها واضح فيهو التعب والاعياء .قالت ليهو ..حمد انا اختك فدوى ..

حمد انت قلت لي انت اخوي .. حمد انا محتاجة ليك شديد ..

حمد انا تعبانة شديد ..

يتبع....

#عشان_قلبي
بقلم: طارق اللبيب

الجزء 10


طبعا حمد لمن سمع صوت فدوى ..وقف العربية على جانب الشارع .. وقال ليها ..قبل ما أسالك انتي لمن تعبانة ...ليه ما اتصلت على الزاكي؟ اهو قاعد قدام مع الشباب ..

قالت ليهو الزاكي ما برد علي ..وانا ما بتكلم معاهو انا .. الزاكي بدا يشك فيني ياحمد .. مرة يقول لي حمد مهتمي بيك ليه؟؟ .. ومرة يقول لي الدكتور بتكلم عنك كدا ليه ؟

واساسا الزاكي من زمان شكوكو كتيرة وقلبو وسخان .. بس ماكان بصرح لي بالحاجة دي ..

المهم هسي انا بجيني الهبوط مرتين تلاتة في اليوم . ..وكم مرة بقول ليهو وديني الدكتور .. بقول لي الدكتور قال ماعندك حاجة ... وانا تعبانة ؟ اعمل شنو ..؟

قال ليها .. اسمعي يافدوى انا مابقدر اعمل ليك حاجة.. الا بطلب من الزاكي ..

وماعندك حل غير تواجهي مشكلتك .. حتى لو مشيتي الدكتور براك.. ولو مشيتي مع جارتك ..ماتهملي روحك .. بس عندي منك طلب اخير .. واعتبريهو طلب من اخوك البخاف عليك ..

امسحي رقمي وتاني ماتتصلي علي نهائيا" .. بس لازم تقابلي الدكتور وضروري جدا" كمان .. بس معاك انا لا ..

قالت ليهو بس ليه؟.. انا مالي عملت شنو غلط؟ ..قال ليها انتي ماعملتي شي بس انا عايز كدا .. قالت ليهو خير ومشكور كتير ..

وقفل منها الخط ..وقلبو كان بتقطع .. وحس انو الاتصال ده ربما يزيد عليها الهبوط ..

لانو نفسيا عمل ليها ضربة سيئة .. انسانة صحت امالها ..بانها لقت اخو بعد اخوها المات .. والليلة فقدتو..

بالتأكيد المسأله حتأثر عليها نفسيا ..والاثر ينعكس على صحتها .. ده كلو كان تفكير حمد ..وبسأل في روحو كم سؤال ..ياربي ليه الزاكي قال ليها الدكتور قال ماعندك حاجة .؟؟

الزول ده كدا بخت المراة دي فى فك الخطر .. وهي اساسا حالتها حرجة ..

المهم قال الله كريم عليك يافدوى ومشى .. اشتغل مشاوير لغاية الساعة 11

وصل البيت لقى سماح قاعدة صاحية . قالت ليهو اتأخرت ليه ؟

قال ليها كنت شغال ..

قالت ليهو انا عايز اقول ليك كلام .. قال ليها اها قولي.. تاني في كلام يتقال ..؟

قالت ليهو حمد انا بالمناسبة لاعندي زول عندي معاهو علاقة ولاشي ..

وانا اساسا لو ماجيت عرستني انت.. ماكان في زول دايرني ..

وانا ماعايزة اتطلق منك ..

بس انا كنت عايز اغيظك .. واحرق قلبك .. زي مابتحرق قلبي كل يوم ..

.. لكن انت زول بارد ودمك بقري اصلو الكلام ما أثر فيك ..

وشربتني الموية الحارة براي ..

قال ليها بس انا لسه ما مصدقك .. وانا خلاص قنعت منك .. وخلاص الشكوك بدت تحوم حولك .. ومن جواهو بضحك عليها وبسخر منها ..

وبقول بينو وبين نفسو .. بالله شوف العبيطة دي .. انا كنت متأكد انك بتتعاوري ساي .. انا لو كنت شاكي بنسبة عشرة في المية انو كلامك صاح كنت طلقتك في نفس اللحظة ..

قامت هي قطعت عليهو افكارو بي كللاما وقالت ..

قالت ليهو لالالالا ياحمد عليك الله تصدقني وتسامحني والله انا ندمت ..

قال لالا مافي اي تسامح يا سماح الابشرط واحد..

قالت ليهو قول اي شرط انا معاك .. قال ليها انا الليلة ركبت معاي مرة كبيرة في السن

وحاصل حاصل عليها .. بس دايرك انا وانتي نمشي نقعد ليها في البيت مع اطفالها لغاية البت مايخرجوها من المستشفى ..وترجع لوليداتها رايك شنو؟

قالت ليهو لو بتسامحني ماعندي مانع ..اساسا انا ماعندي برنامج.. كونو القا لي شفع والبسهم واعمل ليهم الاكل دي براها قصة حلوة .. وبرنامج زابط ..

قال ليها خلاص باكر المراة بتتصل علي وبنسق معاها ..

قالت ليهو ياحمد الكلام ده انا حاسه بيهو ماجاي كدا .. قال ليها كيف؟

قالت ليهو يعني حجه انت لاقيتها في الشارع .. واول مرة تلاقيها .. تقوم طوالي تتكفل بي اولاد بتها ونمشي نراعيهم ونقعد في بيتهم انت ماشايف الحاجة تلافه ساي؟

قال ليها .. نحن دايرين نساعدها وبس وانا حسيت بيها تعبانة ..

وفي النهاية بكرة الصباح انا بتكلم معاها في الموضوع واشوف رايها ..

هي لو ماعندها مانع نحن البمنعنا شنو؟..

الظاهر العلاقة رجعت طبيعية بين سماح وحمد ..ولكن العلاقة انقطعت بين حمد والزاكي واسرته تماما" ..

بس حمد جواهو مشغول على فدوى ..وقدر ماحاول يتناسى الموضوع ماقدر كلو كلو .. وحاسي بأحاسيس هو زاتو مافاهمها ..بس اهم ااحساس طاغي عليهو ..هو انو خايف عليها من اهمال الزاكي .. وطبعا ماجاب اي سيرة تاني لي سماح . عن فدوى ..ولاعن الزاكي ..

اها باكر الصباح المراة اتصلت عليهو .. وقالت ليهو اناحجه نصره انت الامس ركبت معاك للسلاح الطبي .. قال ليها ايوة ياحجة انا كنت منتظر اتصالك ..

انتي وين ؟ وصفت ليهو ..مشى ليها سريع وركبها .. وموديها على السلاح الطبي .. وبدو يتكلمو في موضوع امبارح بالليل ..

وقال ليها انا وزوجتي مستعدين نجي نقعد ليك في البيت مع الاطفال لغاية ما امهم تتخرج .. قالت ليهو والله انا زاتي كنت عايز اطلب منك الطلب ده ..

وحمد ده فرح فرح بموافقة المراة دي على الموضوع .. كانها حلت ليهو مشكلة هي .. ما كانو حلا ليها المشكلة هو ..

وقال ليها خلاص بعد

ين المساء بعد المغرب نحن بنجيك في البيت ..

وادتو وصف البيت ومشت ..وهو طالع من قدام السلاح الطبي قطع الكبري بتاع الحديد وخاشي الخرطوم يشوف ارزاقو ..

لاقاهو زول كان بتمنى في اللحظة دي انو يلاقيهو ..

الزول ده كان بكري صاحب الزاكي ..حمد وقف العربية.. وعايز يسلم عليهو ..هو كان واقف بي يمين الشاع جنب السياج بتاع الحدايق ..

بكري اول ما شاف حمد .. قبل غادي كدا وعايز يمشي .. حمد قال ليهو يابكري لو سمحت دقيقة انا عايزك .. بكري لو سمحت ..

يتبع....

#عشان_قلبي
بقلم: طارق اللبيب

الجزء 11

بكري وقف . وقال لي حمد .. نعم يا استاذ .. في حاجه ؟ حمد قال ليهو .. بكري الله

يخليك .. سألتك بالله وروني انا عملت شنو؟

قال ليهو انت طلعت انسان خاين.. وماعندك ضمير .. كيف بتعمل علاقة مع زوجة

الزاكي .. وتتصل عليها من وراهو ..

قال ليهو كيف الكلام ده ؟.. والله ماصح .. هي كان تعبانة .. والتلفون بتاع الزاكي كان

واقع في العربية . وهي اتصلت فيهو ..

قال ليهو ابدا ..الزاكي قال غير كدا قال قال انت التلفون دسيتو منو .. ولمن جا ينزل في شارع الوادي قلت ليهو انزل سريع .. وعادة لمن تنزل الزاكي .. بتقيف معاهو شوية حتى تودعو ..

قال اليوم داك فحطت بالعربية سريع ..وبعدين قال في التلفون لقى مكالمة صادرة

قبل خمس دقايق لي تلفون فدوى .. عشان هي تتصل .. واتصلت واتفقتو على كدا ..

والدكتور زاتو متفق معاكم .. ومخصوص الدكتور قال نادو لي الزاكي بعد المغرب ..

عشان يكضب عليهو .؟؟ ويقول ليهو الزولة حالتها خطرة ..

وهي كضابة ساي .. لاعيانة ولاحاجة .. ودي مرة الزاكي .. وبعرفها اكتر منك ..

قال ليهو .. نسأل الله السلامة .. يا بكري ..

بس بسألك سؤال.. الزاكي مشى عمل تخطيط لي فدوى؟

قال ليهو تخطيط شنو ؟ووهم شنو ؟.. قلت ليك فدوى ماعندها اي حاجة .. وده حنك

منها انت عبيط ..ولا بتستعبط فيني انا ..

قال ليهو والله في قياس الضغط عند الدكتور.. فعلا كان عندها هبوط .. والله ماكضابة

.. قال ليهو حمد انا وريتك بالحاصل .. ودي فكرة الزاكي عنك.. وفكرتنا كلنا فنرجوك

ابعد من الموضوع او مابحصل ليك خير ..

قال ليهو خير يا بكري انا يادوب فهمت الحاصل ..

مشى منو .. وقلبو بتقطع من اتهام الباطل ليهو للزولة البريئة .. وقال في نفسو لاحسرة ولاندامة .. انا زمني ده كلو بعيد من الاصدقاء .

اول ما لقيت اخوان واصحاب وحبيتهم من كل قلبي وضميري .. واتعاملت معاهم

معاملة الاخوان يحصل علي كدا ..؟؟؟

انا ما مشكلة.. المشكلة كلها الزولة المسكينة الطيبة المتهمة بالباطل ..

وهسي هي عيانة وحالتها خطرة .. ومافي زول مصدقها .. والله دي مشكلة كبيرة ..

انا اتصرف كيف ..؟؟

المهم كل لحظة حمد يزداد خوف وشفقة على فدوى ومابيدو حيلة .. وماعارف

يتصرف كيف ..

بس قرر انو يرحل من الحلة تماما .. ويبعد كلو كلو .. عشان مايعمل مشكلة لي فدوى ..وواصل شغلو لغاية المساء رجع البيت ..

وقال لي سماح يلا جهزي حاجاتك نحن بكرة الصباح .. حنمشي لبيت المراة القلتها

ليك ..

قالت ليهو معليش ياحمد .. انا ماعندي رغبة من المشية دي .. ومعليش غيرت راي ..

قال ليها بس انا سامحتك على على غلطتك معاي بالشرط ده ..

قالت ليهو يعني حترجع تحاربني تاني .. ماخلاص انا اطمأنيت انك سامحتني ..

بس ماتجبرني على حاجة انا ماعايزاها ..

قال ليها خير ياسماح .. ماقصرتي معاي .. بس انا وعدت المرة وهسي اقوليها شنو؟

قالت ليهو سوق ليها واحدة صاحباتك البركبن معاك في الامجاد..

قال ليها خلاص كويس .. انا زاتي مابجبرك على حاجة انتي ماعاوزاها ..

الحاجات الزي دي مابتنفع الا الزول يكون عندو فيها نية ورغبة ..

وماتشيلي هم انا بتصرف ..

يلا عندي ليك فكرة مبالغة .. ان شاء الله توافقيني فيها ..

البيت ده نحن طالعين منو .. رايك شنو؟؟

قالت ليهو ما مشكلة انا زاتي ما مرتاحة فيهو..

قال ليها خلاص.. حأوديك الهجرة وافتش بيت غيرو ..

المهم طلع طوالي بدون ماياكل اي حاجة ..

ومشى انتظر الحجة قدام المستشفى.. ودق ليها تلفون جاتو بره .. قال ليها اها بتك كيف ؟

قالت ليهو الليلة بالذات الحمد لله بتي في احسن حال ..

وانا لمن كلمتها بي انكم جايين تقعدو مع الاولاد رفضت ..

هي مابتحب اي زول يراعي اولادها غيري انا وبس .. وكدا كدا بكرة ان شاء الله

حيخرجونا .. وانت ومرتك بارك الله فيكم .. وماقصرتو

وموقفكم ده ما حأنساهو ليكم مدة ما انا حية ..

قال ليها ياحجة انا بس عندي منك طلب ..

قالت ليهو انت تطلب عويناتي ديل ياولدي .. والله اقلعن اديك ليهن ..

قال ليها بعد تتخرج بتك بالسلامة .. عايزك تمشي تطمني لي على فدوى وتجيبي لي خبرها .. وهل عملت التخطيط ولا لا ..

والحاصل شنو والله انا مقلق عليها لدرجة ماتتصوريها ..

واصلك ما تقولي ليها انا بعرف حمد .. قالت ليهو بس كدا ؟؟ انت بس وصف لي بيتها

..المهم وصف ليها البيت وقال ليها يوم تدوري تمشي ليها كلميني انا بجي اوصلك

لراس الشارع ..وتتمي الباقي بي كرعيك ساي .. هم قريب الظلط ..

قالت ليهو تمام واتفقو على كدا .. وصلها وبقى منتظر تلفونها ..

المهم باختصار ياجماعة عشان ما نفصل كتير .. في ظرف ايام حمد ودى سماح لبيت اهلها في الهجرة ..

ورحل من الحلة وفكا البيت لسيدو اساسا البيت ايجار .. ومشى اجر بيت في ود

البخيت .. بيت احسن وواسع ..

وبعد كم يوم اتصلت عليهو الحجة وقالت ليهو.. الحمد لله انا بتي اتخرجت وبقت في احسن حال .. وابشرك انا مشيت بنفسي وقابلت فدوى ..

لاني خفت انو اقوم اركب معاك .. يشوفني زول

من الناس البعرفوك .. ويشك في حاجة ..

وتاني المشاكل تجي لفدوى ..

اول حاجة ياحمد انا عايزاك تطمن .. انا سقت فدوى ووديتها المستوصف ..

والدكتور كلمها .. قال ليها انا كلت زوجك واخوك .. يعملو ليك تخطيط للقلب ..

وهي عرفت انو الزاكي راجلها دسى عليها الموضوع .. واتضايقت شديد من القصة دي .. وقالت حتضرب لاختها الوحيدة في سنجة .. عشان تجي تقعد معاها وتتابع معاها الفحوصات.. لانو الزاكي اليومين ديل لافي مع اخت صاحبو ..وخبرو مالي الحله .. وهي عارفة . واظنو عامل ليها الشي دا مكايدة ..ومافاضي ليها كلو كلو ..

حمد قال ليها خلاص مادام اختها جاياها تاني مافي مشكلة .. وانا اطمأنيت عليها ..

وفعلا حمد بدأ بالو يهدأ .. من الخوف والزعزعة والشفقة من مرض فدوى ..

وبدا يشتغل بي مزاج .. وكل مايتذكر فدوى يتبسم براهو ..

وكدا حمد بكون انقطع من فدوى بي بعد المكان وحيلولة الظروف.. وانتهى الموضوع ..بس الاقدار عندها مفاجآت اخرى ..

بعد كم يوم ضربت ليهو حجة نصرة وقالت ليهو حمد كيف حالك ..

حمد والله عندي ليك خبر ما عارفة اقولو ليك كيف ..

بس خبر ماكويس والله .. حمد التلفون وقع من يدو .. وختفو سريع ..

وقال ليها ان شاء الله خير يا امي .؟؟قولي في شنوووو؟؟

يتبع....

#عشان_قلبي
بقلم: طارق اللبيب

الجزء 12

قالت طبعا ياحمد فدوى بقت زي بتي ..وهسع بقت صاحبة سلمى بتي ..الكانت عيانة في المستشفى .. اها يا حمد الخبر الموسمح ..اخت فدوى الفي سنجه ابت تجي ..وقالت ضرب لها الزاكي.. وقال ليها فدوى عاملة علاقة مع صاحبي .. وهسي فدوى حالتها زي الواطه دي ..صاحبك المحترم المربا الزاكي سوالو سواتن مي سمحة تب . . المراة قبال تسلم على اختها.. قالت لها راجلك جايب فوقك قواله . وتاني ماتضربي لي .. ولا انتي اختي ولابعرفك .

وقالت لها .. الزاكي قال لمن كشفكم انتي وصاحبو .. صاحبو خجل من روحو لامن رحل من الحلة .

وانا طبعا ياحمد زي المابعرفك .. سألت فدوى.. قلت ليها صاحبو ده منو؟ والقصة شنو؟ ..قعدت تبكي .. في جنس بكى لامن انا قلبي ده وجعني ..وقالت لي دي قصة وهجيمة وتهمه.. في زول مايستاهل الا الخير ..

المهم هسع فدوى حالتها صعبة شديد .. وانقسمت النص وباكر نحن مودنها المستشفى برانا . لكن والله ما معانا حق الفحوصات.. والتخطيط والحاجات دي ..(ده كلام حجة نصره)..

قال ليها خير انا بتصل عليك المساء ويحصل خير ان شاء الله ..

حمد قال للحاجة انا عايز اقول ليك حاجة . والله الظاهر ياحجة علاقتك بفدوى اتطورت شديد.. لكن انا ماسألت كيف قدرتي تخشي فيها بالطريقة دي ..وفي فترة بسيطة تصلو الدرجة ..

قالت ليهو والله دي قصة تسمعها تضحك لامن تقع على قفاك ..بحكيها ليك يوم تاني..

هسع ماعندي رصيد .. لكن بس فدوى دي زولة بسيطة وبريئة وبتثق في الناس بسرعة وبتحب الخير للناس .. ومابتحمل في قلبها اي حقد على انسان ..والله البت يا حمد ياولدى التقول اختك بصح بصح ..

خلاس ودعتك الله موش قت بتضرب لي فليل .؟

قال ليها بضربلك قبال المغرب .

وقفلت .شوف حمد بعد ما اطمأن على فدوى .تاني دورت فوقو القصة .اها يازول حمد كان عندو باقي قروش

خاتيهم لي مقاضي الولادة بتاعة سماح ..والسماية وكدا .. بقى متردد يرسلا لي حجة نصرة ولا لا ؟

قال ياجماعة دي مسألة موت وحياة . والسماية والحاجات دي ما مهمة زي حياة الانسان ..

شال ليهو جزء كبير من القروش .وطوالي دور العربية ومشى على بيت حجة نصرة .

وقف قدام الباب ودق البوري . جاتو الحاجة مارقة .. وقالت ليهو ادخل قال ليها ابدا والله مابقدر .. وفي قلبو قعد يقول هسع راجل سلمى يسمع اني دخلت البيت يطلعوني خاين ,,

قال ليها حبابك يا امي .. انا جبت ليك القريشات لاختي فدوى ..

قالت ليهو انت عارف قبالك بي خمسة دقايق ربنا فرجها .. انا كنت دايرة اضربلك بس انت جيت طوالي ..

قال ليها فرجت كيف نقول الحمد لله ..

قالت ليهو راجل سلمى بتي ..عندو ودخالتو رجل اعمال كبير .. سمع بي قصة ودخالتو هرب وخلا مرتو في المستشفى .. قبال كدي هو كان شغال معاهو هرب منو ..

وهسع جانا زيارة واعتذر لينا ..والله ياولدي ادانا قروش كتيرة ..ونحن حلفنا نعالج منها فدوى..ومابنشيل منك و لاقرش .. زي مافدوى اختك بقت بتي .. وبعدين كلمناهو بي قصتك ..ووقفت معانا ومع

فدوى .. وشال تلفونك .. وقال ده زول يستحق الخوة والصحبة ..

حمد ده فرح لامن داير يبكي ..بس رفع يديهو وقال ياما انت كريم يارب ..

ونحن ياجماعة كلنا ماعندنا خبر هسي عن فدوى.. والحاصل عليها شنو مع الزاكي

وطبيعة العلاقة بينهم وصلت وين ..الا بناخد الاخبار مع حمد من كلام نصرة ..

وحمد شكر الحجة ..وقال ليها الحمد لله ..ربنا عوضنا ام لي فدوى ..وانا اطمأنيت وتاني مابشيل همها تب ..

حمد خلاص طلع على الشارع شغال بي مزاج ينوني .. وفجأة يسكت .. ويتخيل لو انو فدوى عندها مرض قلب ..وتمسخ عليهو الدنيا ويسكت من النونايه ..

غايتو حمد ده جواهو بالضبط شنو تجاه فدوى الله اعلم ...

كدي نشوف لي قدام ..

زي الساعة 9 مساء كدا حمد جاهو تلفون من رقم خط .. استاذن من الناس

الراكيبين معاهو ..ووقف العربية على جنبة الشارع..

رد على التلفون الو ..

قال ليهو حمد انا صديق ..وشلت التلفون ده من خالتك نصرة.. ام سلمى ..

قال ليهو نعم حكت لي بيك ..وجزاك الله الف خير .. وربنا يبارك ليك ياصديق ..

قال ليهو حمد انا عايز الاقيك الليلة ..

حمد قال ليهو حاضر انت وين ؟هسي انا في شارع الستين ..

قال ليهو خلاص بعد ساعة تلاقيني قدام بوابة منتزه الرياض العائلي ..

قال ليهو حاضر على الوقت انا معاك ..

المهم وصل على الوقت تمام ..

ولاقى صديق رجل يساوي قبيلة من الرجال .. هيبة وطيبة ..

واتعارفو واتطايبو .. وقال ليهو احكي لي الحاصل المراة العيانة دي منو؟ وبالتفصيل ..

حكا ليهو بتفصيل اكتر من الحكتو ليهو نصرة .. واهم حاجة قالها ليهو .. قال ليهو انو فدوى من يوم قالت لي انا اختك .. احساس انها اختي ماقادر اتخلص منه ..

صديق قال ليهو يعني عايز تقنعني انو الزولة دي مابتحبها حب الاثنى ؟؟

حمد قال ليهو اعوذ بالله ياخ .. انا مابقدر افكر في مراة متزوجة ..تفكير زي ده ..

بعدين دي زوجة صديقي واخوي .. قال ليهو صديقك واخوك بعد العمايل دي كلها .. قال ليهو هو بكون معذور لانو مف

تكر مرتو خاينة . بعدين ضف على ذلك .انا متزوج يا الحبيب ..

وهسي لو فدوى بقت كويسة تاني مابجيب خبرها صدقني .. غير احساس الخوة العادي ..

صديق قال ليهو المهم انت هسي ماتشيل هم اختك ..

انا وصيت عليها .. باكر الصباح حيمشو ليها زوجتي ..وسلمى ..وحجة نصرة بعربية خاصة.. ويودوها احسن مستشفى في البلد.. ويعملو ليها كافة الفحوصات والتحاليل..

والموضوع ده اسهل ما تتصور ..بس انت ادعي ليها تطلع سليمة ..

الموضوع الضروري والمهم العايزك فيهو انا .. هو ..

انا عندي فرع للشركه بتاعتي في ام درمان ..كان ماسكو ود خالتي اللهو زوج سلمي دي ..

وكان زول خاين وغدار ..وخسرني خسارات فادحة ..

وهسي هارب من مسؤليات بيتو بالرغم من اني عفيتو من كل شي ..

والفرع مقفول ليهو تلاتة شهور ..وكنت كايس لزول راجل وانا لقيتك ..!!

نحن شغالين في مجال استيراد زيوت السيارات . ووكلاء لشركات عالمية .

قال ليهو لكن انا ماعندي خبرة في الشغل ده ..

قال ليهو ماداير خبرة ..داير امانة ..ونشاط ياحمد النحلة ؟؟

قال ليهو الكلمك منو اني اسمي حمد النحلة .. قال ليهو انا في الساعة الهسي دي..

جبت كل اخبارك من يوم كنت شغال البناء في صالحة هههههه ..

قال ليهو والله خوفتني .. انت بتاع امن ولاشنو؟

قال ليهو المهم تمشي تدي عبد اللطيف عربيتو ..وباكر الصباح تلاقيني في سوق امدرمان في الحتة الفلانية ..

قال ليهو كمان بتعرف عبد اللطيف ؟؟ والله دي قصة دي ..!!!

عبد اللطيف ده ود اللبيب زاتو ماكان بعرفو هههه ..

المهم ياجماعة ..حمد فرجت عليهو فرج عجيب .. وفتحت ليهو ابواب السماء ..

باكر الصباح مشى حمد سلم العربية لعبد اللطيف .. وحمد فارق حاجة اسمها امجاد .. الى الابد .. وجا السوق .

اها في نفس الوقت الاتلاقو فيهو حمد وصديق .. كانت فدوى تحت عناية

امهر الاطباء .. واجريت عليها كافة التحاليل ..

والزاكي وين؟ بنعرف بعدين ..

المهم اليوم ده كلو عداهو حمد مع صديق.. بفهم فيهو في طريقة الاستلام والتوزيع وبكرة حيباشر العمل ..

وحمد كان مستعجب من طيبة صديق وبراءته .. وبقول في قلبو بالله لسع فضلو في الدنيا ناس زي ديل؟

وصديق كان مستعجب في طيبة حمد وجواهو بقول في نفس الكلام ..

قام صديق قال لحمد.. بغض النظرعن الشغل ياحمد اخوي ..انا عايز اكون لك صاحب واخ ..قال ليهو وانا برضو عندي نفس الاحساس .. بس خايف اقول ليك وتفهمني غلط ..

تقول الزول الفلسان ده عايز يصاحبني ويستغلني هههه

الصديق قال ليهو ههه لالا ياخي .. الزول الاستقلالي ده ظااااااااااهر..

اها يازول الناس ديل خلاص الساعة اتنين جات ..وماشين ..

كرررر تلفون حمد ضرب ..

عاين للرقم لقاهو رقم حجة نصرة ..

قلبو عمل شححححح ..

يتبع...

#عشان_قلبي
بقلم: طارق اللبيب

الجزء 13


حجة نصرة قالت لي حمد ..ياحمد البشارة ..والله الدكتور طمنا على اختك تب .. وقالو الزولة عندها شنو كدي مابعرفو .. .. هاك النديك سلمى ..باقي بتعرف كلامن المقلبن ده .. استلمت التلفون سلمى ..وقالت ليهو كيف حالك ياحمد .. قالت ليهو الله يجزيكم خير انت والصديق اخوي ..ماقصرتو تب .. فدوى قالو عندها اضطراب بسيط في افرازات الانسولين من البنكرياس .. يعني زياده .. ودي حاجة عرضية ..ومابتعمل حاجة بس وصاها بانها تاكل كويس .. وكل ماتشعر بالحاجة دي تسف ليها حبة سكر ..

وكتب ليها ادوية ..

يقول الكاتب : معلومة طبيه صغيرة ..

احيانا زيادة في مستوى الأ نسولين . (وهو ماده يفرزها البنكرياس لتنظيم السكر في الدم ) هذا الارتاع يودي الى انخفاض مستوى السكر في الدم .. مما ينتج عنه الهبوط والدوار والغثيان وغيره من الاعراض المصاحبة .. وقد يسبب ارتفاع مستوى الانسلين في تكيس المبايض ايضا . وزياده هرمون الذكورة عند النساء ..ويوصف له علاج( جلوكوفاج 500) .. والله اعلم ..

المهم .. انو فدوى ماعندها اي مشكلة في القلب وده المهم .. صديق وحمد اتلقو الخبر بي كل فرحة ..

وحمد ده مافاضل ليهو الا ينطط من الفرح ..وظهرت اسارير البهجة والارتياح فوق وشو ..

ومشى البيت فرحان وطبعا غالبية وقتو قاعد براهو في البيت الاجرو جديد .. وسماح غالبية وقتها مع ناس امها .. بتجي بالليل ..مرات بغشاها يسوقها معاهو ومرات بمشي يبيت براهو .. ويخليها تبيت مع ناس امها ..

اها اليوم ده بالذات مشى غشا سماح ..وسماح كانت زهجانة ومرهقة ماقدرت تمشي معاهو ..خلاها تبيت مع امها ..ومشى يبيت في البيت براهو ..

...

الزول ده الليل كلو مانام من الفرحة .. وبفكر طول الليل .. وكل مرة يقول لنفسه ..

خلاص مادام فدوى طلعت سليمة .. تاني انا بكون مرتاح وبشوف اشغالي..

لكن في حاجة جواهو غالبة عليهو شديد .. قدر ماقاوم ماقدر .. وهو انو خيال فدوى ما داير يروح من قدامو .. والغريب انو فرحتو بي سلامة فدوى اكبر بي كتير من فرحتو بي شغلو الجديد .. اللهو حيكون تحول في حياتو ..

وظهرت جواهو تيارين كل واحد شايت على اتجاه .. اتجاه تفكير دايم في فدوى .. والسرور بي ذكرياتها .. يبدو كانه عشق يتيم ..

وتيار آخر تيار العقل والمنطق .. كيف انا طول الوقت بفكر فيها .. وماعندي حق في الحتة دي ..

وتاني يرجع يقول خلاص هي في النهاية ختتني ليها اخو والاخو مافي اشكال يتذكر اختو ..

تاني يقول بس انا ما حاسي القصة كدا؟؟

واستمر في المنازعة النفسية وقت ..وخيال فدوى مابي كلو كلو يفارقو ..

وهو مرات يتضايق من مجرد الاحساس .. ومرات يسرح معاهو ..

بس اتأكد انو اصابه عشق فدوى ود الحاجة المضايقاهو ..

.لانو عارف العشق ده مخطئ ومستحيل في نفس الوقت ..

ونحن طبعا ماعندنا اي فكرة عن نفسيات فدوى ومشاعرها تجاه حمد شكلها شنو ؟؟

وهل فرضت عليها الظروف مثل هذه الذكريات ..؟ ولا خلاص حمد اصبح بالنسبة لفدوى ماضي جميل في فترة وجيزة ؟

نحن مجبورين نخلي حمد في بيتو الجديد وشغلو الجديد .. ونرجع الحلة ونشوف الحاصل بالتفصيل بهناك شنو ؟

نحن فارقنا فدوى يوم رحلنا مع حمد وتاني ماعارفين اخبارها الا عن طريق حجة نصرة

اول حاجة تتذكرو بعد ما حمد طلب حجة نصره تمشي لي فدوى .

اها جاتها الصباح زي الساعة 9 شايله ليها توبين .. ودقت الباب اول من فدوى فتحت ليها الباب . قالت ليها ممكن ادخل .انا تعبانة وكانت بتناهد ..

فتحت ليها الباب وجابت ليها موية وعملت ليها عصير ..

وقالت ليها انتي منو ماعرفتك ..قامت حجة نصرة تبكي وتقشفش في دموعها ..

فدوى قالت ليها مالك ياخالة احكي لي .. قالت ليها انا سمعت بي طيبتك من جيرانك وجيت احكي ليك لكن خجلت والله يابتي ..

بس طالبة منك طلب .. عندي توبين واحد حقي .. واحد حق بتي .. ومالبسناهن اكتر من لبستين .. وانا دايرة ابيعن ..ومافي زول اشتراهن مني ..

وانا محتاجة للقروش شديد ..

وواصلت في البكاء ..فدوى قامت وجات قعدت جمبها ..وقشت ليها دموعها وقالت ليها ماتبكي .. انا والله ماعندي في يدي ولاتعريفة ..

حجة نصرة قالت ليها .. بتي راجلها هرب وخلاها عيانة ..وخلا وليداتو لا قرش لاتعريفة ..

وانا بنيتي واحدة وابوها ميت وساكنين غربا في الحلة ..

وحكت ليها التعب الهي بتواجهو .. في اثناء مابتحكي فدوى بكت ..

وقالت ليها ربنا كريم عليك ياخالتي ..

وانا والله قصتي قريبة لقصتك دي .. وانا بحكي ليك احتمال تشوفي مصيبتي تهون عليك ..حجة نصرة قالت ليها قولي لي يابتي ..

قالت ليها .. نحن اصلا كنا بتين وولد ..وابونا جا من سنجة زمان ..وسكن هنا في امدرمان .. امي اتوفت بالسرطان ..وابوي مات بالمغسة عليها ..وبقى اخوي في راسنا وهو الربانا

اختي اتزوجها واحد من ممعارف ناس ابوي في سنجة ..

وبقيت انا واخوي بس ..واخوي جاهو عقد من السعودية .. وقال مابخليني اسكن مع اختي في البيت .. عشان راجلها غريب .. عندو صاحبو كهربجي اسمو الزاكي ..

شافني واقال ع

ايزني ..بدون ما اتعرف عليهو كويس .. اخوي وافق عليهو ..

وانا قبلت عشان ما اكون عارض لاخوي ..وامنعو من السفر .. اها ياخالتي اخوي سافر يكون نفسو ويرجع عشان يتزوج ..

ولمن اتزوجت الزاكي لقيتو زول شكاك وظنان .. وبتخيل حاجات في راسو وبصدقها ..

وكل مرة القاهو متغير مني بلاسبب ..

بعد فترة اكتشف انو كان شاكي فيني في حاجة اصلا مابتخطر على البال .. وكلو كلو مابسألو .. ده كلو عشان اخوي ..وانا لو طلبت الطلاق ماعندي حتة امشي عليها.. واخوي لو سمع باي مشكلة ممكن ينهي اقامتو ويرجع .. وعشت معاهو كدا طيلة السنوات دي في عذاب والم وهو ماحاسي بيهو ..

اها اخوي اتوفي الله يرحمو .. السنة القبل الفاتت ..في السعودية بحادث . بس لم اتوفى انا كنت والدة بالبت .. وعندي الولد الكبيرة ده ..

وهسي اتقيدت بالولد والبت ..وبقيت مجبورة استحمل كل العذاب والاهانة ..

انا كان مشيت معاهو لي دكتور .. بقول لي الدكتور ده بعاين ليك ليه؟

انا يا خالتي مالاقية لي زول احكي ليهو المغس الممغسني ليهو الزاكي ..

وماعارفة حكيت ليك كيف ..؟

انا هسي عيانة وقاعد يجيني هبوط .. وحلف تاني ما امشي الدكتور .. عشان ركبت مع واحد بتاع امجاد . وعشان مشيت معاهو الدكتور براي .. وقصة طويلة وعريضة..

وهسع انا تعبانة وما قادرة اتصرف وخايفة امشي براي يجي يطلقني ..

اها طوالي هنا حاجة نصرة قالت ليها ممكن تسمحي لي انا ابقا لك امك ؟

قالت ليها والله ده مناي يا خالتي ..

قالت ليها خلاس من الليلة تاني اوعك تقولي لي خالتي .

وباكر جاتها وساقتها الدكتور بدون علم الزاكي ..والزاكي اساسا بالنهار في الشغل وبالليل بتونس مع اصحابو في الزلط ..

ولامن الدكتور قال لازم من التخطيط .. اتصلت على اختها في سنجة وكان الزاكي ملا راس اختها بالكلام الفيهو خيانة فدوى مع صاحب الزاكي .. اها حجة نصرة سألتها

من صاحبو ده منو ..

قامت فدوى حكت ليها عن حمد.. ومن خلال حكي فدوى عن حمد حنعرف بالضبط شكل الاحساس البتحسو فدوى تجاه حمد النحلة ..

يتبع....

#عشان_قلبي
بقلم: طارق اللبيب

الجزء 14


فدوى لمن بدات تحكي لي حاجة نصرة عن حمد كانت حكايتها عجيبة وغريبة .. قالت

ليها .. ده الزول الوحيد الحسيت فيهو نقاء البشر .. والخوة الصادقة والاخلاص والوفاء ..

قالت ليها احكي لي كيف..؟. .. قالت ليها الزول ده صديق الزاكي وبتاع امجاد .. رجل ..في روح ملاك .. الزاكي يوم ركب معاهو .. وووو .. المهم حكت ليها اليوم داك وفالت ليها اها . انا لمن لقيت تلفون الزاكي معاهو عادي ..

كنت قايلة على حسب ما الزاكي بحكي عنو وعن طيبتو وامانتو .. معناها بثق فيهو

برضو .. وعلى اساس هو اساسا زول بتاع امجاد .. يعني انا ممكن اركب مع بتاع

امجاد غيرو وغريب وغير معروف .. لاني كنت مضطرة للمروق ..

بس لمن شفت اهتمامو الزائد بي ،، شكيت فيهو في البداية قبل مانطلع من البيت ..

وقلت ده زول قلبو وسخان .. وكنت ناوية ازفتو لو جاب لي كلمة كدا ولا كدا..

بس مما ركبنا في العربية .. ماعاين في وشي .. الا مرة واحدة وقال لي طوالي غطي راسك والبسى التوب كويس وماتتبشتني .. بنفس طريقة اخوي المرحوم ونبرة صوته ..

والله انا لامن قلبي شحححا وخفت ..

ومن الوقت داك اتزرعت جواي حاجة انو حمد اخوي .. وقدر ماحاولت اقنع نفسي

انو ده راجل غريب .. وماعندي معاهو علاقة .. القى نفسي ماقادرة وكلما الزاكي

يظلمني وابكي بتذكر حمد .. قبل ما اتذكر اختي ..

وربنا يعلم ماحصل يوم فكرت فيهو كرجل اجنبي .. ولو انا كنت فتاة وما معرسه ..

احساسي بي حمد مابسمح لي اتزوجه حتى . لانو احساس اخوي .. خلى انا متزوجة .. وهو زي اخوي ..

لكن الزاكي هو القلبو وسخان ..اتخيل انو بيني وبين حمد في حاجة ماكويسة ..

وصدق الخيال وبدا يتكلم بيهو .. وكمان زاد عليهو .. ربنا يسامحو ..

انا ياخالتي ماحصل اتصلت على حمد الا مرة واحدة في حياتي .. يوم الزاكي نبذني في شرفي ووصفني باوصاف يعف عنها اللسان .. وخلاني ابكي وطلع على اصحابة

ونسى التلفون في البيت .. انا شلت تلفونو وفتشت على رقم حمد واتصلت عليهو ..

بس حمد رفض يسمع مني .. وقال لي تاني ماتتصلي علي .. وامسحي المكالمة ..ده كلو كلام فدوي مع الحجة

ومن وقتها عرفت انو الزاكي اتكلم مع حمد واحرجو ..

اها كان فدوى لمن حجة نصرة ودتا الدكتور واكتشفت انو الزاكي داسي عليها كلام

الدكتور عن القلب ..

زعلت زعل شديد خلاص واي امل جواها في عيشة مع الزاكي اتلاشت ..

وفكرت طوالي تطلب الطلاق .. لكن في النهاية ماعندها قبلة تمشي عليها .. والزاكي

مستقل النقطة دي .. وعارف انو فدوى مهما حصل ليها لايمكن تطلب الطلاق ..

خصوصا بعد ما افسد العلاقة بينها وبنين اختها ..

اها يازول في حتة صغيرة مهمة جدا ..

اها يومها الكان مودنها المستشفى .. قالت لحاجة نصرة انا مابقدر امشي المستشفى خليني اموت بس وارتاح .. قالت ليها ليه ؟ قالت ليها الزاكي لو عرف بطلقني قالت ليها اها مايطلقك .. انتي هاملة ولا هاملة .؟قالت ليها اي طبعا ماعندي مكان اقبل عليهو .. حجة نصرة قالت ليها انتي غلطانة يا بتي .. انا امك وبيتي بيتك .. الله لاجاب عيشة زلة واهانة .. وقالو يابتي عيشة العولاق اخيرمنها الطلاق ..

ومتيمنة اليمين السدادو عمري .. تمشي المستشفى وكان طلقك اليطلقك كان ماشالك بيتي اشيلك في عويناتي ديل انت ووليداتك ..

طوالي هنا فدوى صرة وشها وقالت اها يا الزاكي ربنا فرجها علي تاني بتلقى شنو عاد تزلني بيهو .. وفي قلبها قالت عيشة مع مرة غريبة واكون عزيزة ومكرمة افضل لي من اعيش مع راجل زالني وهايني وشاكي فيني ..

اها قامت فجاة فدوى اتذكرت حاجة ..

قالت ليها طيب ياحجة انتي ماعندك قروش لدرجة انك دايرة تبيعي التياب عشان تتسرفي انتي وبناتك حتجيبي لي مصاريف المستشفى من وين .. قالت ليها ربنا فرجها اخوهو لي راجل بتي جاب لنا قروش وافرة الحمد لله وبتعالجك وتفضل ..

اها مشت المستشفى بي قلب قوى مع خالتها حجة نصرة ،،

يوم ودوها المستشفى .. طبعا لمن حجة نصرة اتصلت على حمد .. وصديق وادتهم سلمى اتكلمت معاهم وطمنتهم على فدوى .. فدوى سمعت المكالمة .. وعرفت انو حمد تابع علاجها من على البعد ..

وهي طبعا عرفت انو رحل من الحلة بي كلام الزاكي .. بس ماعرفت مكانه وماكانت

عارفة انو حجة نصرة بتعرف حمد .. ولاكانت عارفة انو هو ورا كل الحاصل ليها ..

وسالت حجة نصرة وحجة نصرة مادست عليها اي شي وفدوى راسها جاط جوطة شديدة خلاص

بعد عرفت انو راجلها اتخلا عنها ولا اشفق غليها ..وحمد هو الرسل ليها حجة نصرة عشان تمشي تعمل تخطيط القلب .وهو الاهتم بعلاجها ..وعرفت انو قصة التياب عبارة عن خدعة من حجة نصرة عشان تدخل عليها ..

وبعد عرفت انو حمد عندو ليها المكانة دي ..

اصرت على حاجة معينة .. اها مشت البيت اليوم داك وانتظرت الزاكي يجي .. قامت جاتها واحدة من بنات الجيران قالت ليها .. انا امبارح شفتك في المستشفى الفلاني

ومعاك مرتين وخالة كبيرة .. وسالت منك وعرفت انو زوجك الزاكي .. وانا عايزة اقول ليك كلام بس توعديني ما تدخليني في

مشكلة .. الزاكي عندو علاقة مع واحدة اسمها بسمات صاحبتي شديد لكن اكتشفت انها هي زولة خاينة ..وهي اخت صاحبو اسمو نميري .. وكانت بتسمع نميري بحكي لامو بي اخبار اصحابو .. وعرفت منو مشكلتك انتي والزاكي ..لانو الزاكي بحكي لاصحابو مشاكل بيتو وبسمات استغلتها استغلال سي،،مشت قالت للزاكي انو فدوى عندها علاقه مع حمد.. وانها شافتكم مع بعض كم مرة في الامجاد .. وفعلا الزاكي صدقها ..

وبقى طالع ونازل معاها وهي كمان بتصرف عليهو لما يكون مفلس لانها شغالة شغل كويس وهسي اتفقوا على الزواج ..وفدوى الكلام ما اثر فيها نهائي ..

اساسا قنعت من زول اسمو الزاكي وبطنها طمت منو نهائي ..

اها يازول بالليل شديد جا الزاكي وقال لي فدوى .. فدوى انا ماعايزك .. وانا خطبت وعايز اتزوج .. وانتي عندك خيارين تقعدي في البيت وتربي اولادك وماعندي معاك علاقة ..او تسوقي اولادك وتشوفي ليك حتة ..تعيشي فيها انا عايز اتهنا مع الانسانة البحبها وبثق فيها ،،

قالت ليهو ..

يتبع....

#عشان_قلبي
بقلم: طارق اللبيب

الجزء 15

قالت ليهو جدا ح أختار ..

طبعا" فدوى كانت اصلا" زعلانة من كلام بت الجيران .. وكيف انو الزاكي ينحدر للمستوى الغريب ده ..

اها لقت الفرصة سانحة لمن وضع ليها الخيارات ..

قالت ليهو بس في سؤال مهم قبل ما اختار من الخيارات يا الزاكي ..

كلامك اكون قاعدة في البيت مع اولادي وماعندك معاي علاقة دي يعني شنو ؟؟

حأكون مرتك وماعندك معاي علاقة ولا حتكون مطلقني ..؟؟

قال ليها حأطلقك ايوة ..

قالت ليهو تطلقني واكون قاعدة في البيت مع اولادي مش؟

قال ليها ايوة ..

قالت ليهو خلاص موافقة طلقني طوالي يا الزاكي وامشي عرس الزوله البتحترمها وبتثق فيها .. دي راحتك وانا بعرف محل راحتي .. واي زول بعرف راحة نفسو ..

بس اقل حاجة حاجة ارتاح من تجريحاتك وشكوكك .. والقى حريتي وراحتي ..

قال ليها صح انا عارف كدا .. بعد اطلقك دي فرصتك تمشي طوالي تفتشي لي حمد

النحلة . ابتسمت ابتسامة ساخرة كدا .. وقبلت كدا ..

البيت كان فيهو تلاتة غرف ومطبخ وحمامين .. جاب ليهو زول فصل البيت بي حيطة

خلا غرفة وحمام مفصولات .. وغرفتين وحمام ومطبخ براهم ..

وقال ليها ده مكان سكنك .. الغرفة الواحدة دي انتي واولادك ..

قالت ليهو طيب اطبخ لاولادي وين؟ قال ليها تطبخي في غرفتك .

قالت ليهو ماعندي مانع .. كونك ما طردتني من البيت ..دي براها فايدة ..

قال ليها اطردك تمشي وين ؟

المهم ياجماعة للاسف الكبير ..يوم من الصباح الزاكي جاب الورقة لي فدوى وجابمعاهو نفرين من اصحابو .. وقال ليها فدوى انتي طالق ..

ومشى طوالي فرحان عايز يكلم بسمات بالخبر السعيد .. لانو بسمات قبل فترة قالت ليهو .. انا لايمكن اقبل مراة خاينة انها تشاركني في راجل واحد ..

وهو قال ليها انا زاتي لايمكن امشي على مراة خاينة واخليها لي حرمة ..

ناداها قال ليها يابسمات انا طلقت فدوى .. قالت ليهو طيرتها وين؟

قال ليها امبارح فصلت البيت جزئين .. قالت ليهو يعني حتسكن معانا برضو في البيت ؟

انا كدا مابنفع معاي يا الزاكي ..لازم تطلعها من البيت ..

بسمات انسانة جميلة وفاهمة.. وذكية جدا ..ومحامية تابعة لشركة .. وزولة شخصيتها قوية شديد .. وعلاقاتها مع الناس حره ..وعندها اصحابها رجال ونساء ..

وبتهرش ناس بيتها كلهم بي نميري وابوه ..

المهم قال ليها حاضر يابسمات انا بطلعها من البيت بس ماهسي ..

هسع الناس يقولو فيني شنو؟ واختها زعلانة منها ..وماعندها حتة تمشي عليها ..

قالت ليهو اضرب لاختها قول ليها اختك انا طلقتها ..تعالي سوقيها ..

خليهم يتصرفو ياخ ماتعمل لينا ضيق في بيتنا ..

قاليها بس انا قبل كدا كلمت اختها بعمايلها واختها قاطعتها وقالت ليها تاني لا اختي ولابعرفك ..

قالت ليهو انا غايتو مابعرف المهم الزولة دي لازم تتلاشى من حياتنا ..

قال ليها بسمات ماتستعجلي ..خليها كم يوم وانا بتصرف ..

والطلاق هسي ليهو تلاتة يوم .. وفدوى ماكلمت حجة نصرة ..

وحمد ماعندو اي خبر ..

وبسمات بتماطل في اجراءات الزواج.. وعايزة الزاكي يتصرف يطير فدوى من البيت ..يوم فكرت في حاجة ..

قالت لي الزاكي انت لو عايز ترتاح من فدوى اديني تلفون اختها الفي سنجة اسمها منو هي قال ليها اسمها هدى ..

شالت تلفونها وضربت ليها .. قالت ليها انا اسمي عابده .صديقة فدوى اختك وعايزة اشتكي ليك الحاصل عليها اختك راجلها ظلمها ظلم شديد ..

وهسي طلقها وقسم ليها اوضة واحدة من البيت .. وهسي عايز يعرس وهي قاعدة تبكي الليل والنهار ..

هدى قالت ليها تستاهل يعمل ليها اكتر من كدا .. لانها عملت علاقة مع صاحبو ..

قالت ليها كذب والله .. بس الزاكي راجل كلب .. قال ليك كدا عشان يلقى مبرر يتزوج .. عندو علاقة مع واحدة سمحة وعندها قروش ..

وانا وانتي بنعرف فدوى كويس ..الله يسألك ممكن فدوى تعمل كدا؟

قالت ليها انا زاتي مستغربة.. لكن قلت في نفسي مافي راجل بتكلم في مرتو ..

قالت ليها الزاكي الاناني بعملها ..

هدى اخت فدوى قعدت تبكي .. وقالت كرعلي يا فدوى بت امي.. والله انا كنت ظالماها ..

خلاص ياعابدة يابتي كلمي فدوى قولي ليها هدى قالت ليك باكر كان بعد باكر انا بجيك ..

وبسمات كدا نفذت الخطة بكل دقة .. وطبعا الزاكي ماعندو اي خبر بالموضوع ده ..

وفعلا ..

وهدى جات تسوق فدوى ..وحكت لفدوى الاتصال الجاها من صاحبتها عابده ..

وفدوى ابت تقول ليها ماعندي صاحبة اسمها عابدة .. لانها عندها رغبة شديدة تمشي مع اختها ..

هدى قالت ليها لازم تقومي تمشي معاي سنجة ..

ونحن من سنجة زاتو بعد خمستاشر يوم راحلين كسلا ..

لانو ابو الاولاد نقلوهو كسلا ..

ودايراك تساعديني في الرحول .. وجاء الزاكي وهدى ولا سلمت عليهو ..

وعرف انو هدى عرفت الحقيقة وكشفت كذبو .. وسافرو ولا قالو ليه مع السلامة ..

..بالاختصار ياجماعة فدوى سافرت مع اختها وقفلت تلفونها وتاني ماضربت لي حجة نصرة .. ومافي زول عارف عنهاي تفاصيل ..

وبي هنا الزاكي عرس البت بسمات وتم ليها المراد ..

وكان عرس مسيخ ومافيهو ا

ي طعم سعادة .. والعروس يوم ليلة زفافها تلفوناتها شغالة مع اصحابها .. والزاكي ماقادر يتكلم .. وعادي بجي يلقى معاها كم نفر في البيت وبشربو في القهوة ويتونسو .. ومابتكلم .. لانو مرة اتكلم معاها قالت ليهو انا انسانة مثقفة وحرة وماتقيدني بالخرافات والتقاليد واستعباد الراة في المجتمع الشرقي .. دي حياتي كان عجبتك .. وهو طبعا لانو متيم بي جمالها وكاسرة عينو بالقروش غيرتو ديك كلها راحت شمار في مرقة ..

والايام طالت والمدة مشت ..

وحمد انشغل في اعمالو .. وشغال دوامين .. والقروش جرت في يدو .. وعلاقتو وصداقتو مع الصديق . ماشة متطورة .. ومشغول جدا زي النحلة .. وماعندو خبر عن فدوى وماقادر يضرب لي حجة نصرة يسأل منها .. وسماح والده في بيت ناس امها جابت ليها بت ..

وحجة نصرة كل ماتضرب تلفون فدوى تلقاهو خارج الخدمة .. لغاية ماقررت تمشي ليها باكر بنفسها

اما الزاكي كان متأكد انو حمد حيلحق فدوى ويعرسها ..

وكان مغيوظ من القصة دي ..وحاسي بالظلم والحقارة ..

انو حمد نزع منو زوجته . وجاتو نفسية انتقام من حمد .. مشى يسال لغاية ماعرف بيت ناس سماح في الهجرة ..

واتحصل على رقم تلفونها من صاحبة اختها .. موظفة في الكهربا ..

واتصل على سماح قال ليها ياسماح انا الزاكي الكهربجي صاحب حمد ..

قالت ليهو وين انت ياخ .. لي زمن ماسمعت حمد جاب سيرتك ..

قال ليها انا فارقت حمد لانو حمد خاين .. وغدار .. قالت ليهو كيفن ؟

قال ليها حمد عمل علاقة مع زوجتي لغاية ما انا طلقتها وارتحت عشان يعرسها ويرتاح بدل يعيش معاها بالحرام ..

يتبع....

#عشان_قلبي
بقلم: طارق اللبيب

الجزء 16

بعد سماح سمعت كل الشكوى والفتنة ..من الزاكي .. قالت ليهو..

( اسكت ياراجل ياجبان ..

يا وسخان.. انت بتشبه حمد؟؟ ..وللا بتجي في نعالو ؟؟.. انت مرتك مابتساهل

تعيش مع كلب زيك .. انا راجلي مابمد عينو على مراة متزوجة .. ده راجلي.. وانا بعرفو

.. انا راجلي واثقة فيهو ..صحيح انت شفتني عندي حالة شكوك.. في وقتي الحامل ..

وده من الوحم .. وانا و حمد اكتشفنا كدا .. وانا لامن كنت بشك فيهو .. كنت خايفة عليهو من الفتوات ..ما من المتزوجات يا واطي ..

بالمناسبة انا قبل يومين.. حمد حكا لي كل القصة .. من يوم

نسيت تلفونك في الامجاد .. وحكا لي كيف احساسو بفدوى الطيبة..وانها زي اختو وخوفو عليها يومها العيانة .. وانت شكيت

فيهو .. وخنت ثقتو .. كان بحكي لي وببكي .. وخلا ليك الحلة ..ورحل ..عشان مايسبب لاختو مشكلة.. يا غبي لكن انت مابتفهم .. وحمد خلاص قنع منك ..وقطع علاقتو معاك ..ومع اختو لانك انت شكيت فيهو ..هسي داير تجي تفتن بيني وبين راجلي ؟؟

دي امشي كوسها عند الهبل والمغفلات ....وتوت توت توت توت ..

قفلت الخط في وشو ؟؟

الزاكي طبعا" اتفاجا مفاجأة كبيرة.. وراسو بقى يودي ويجيب .. معقول ؟؟ معقول حمد حكا لسماح؟؟ .. معناها فعلا حمد علاقتو مع فدوى علاقة نزيهة؟؟

.. تاني يقول لالالا .. حمد بغش في مرتو ساي .. تاني يقول لالا هو اساسا يحكي ليها ليه لو عايز يغشها ..

المهم الرد بتاع سماح ..ضرب الزاكي بي ماس كهربائي في راسو .. عمل ليهو خلل في التوازن .. ودي بركة من بركات الصراحة بين الزوجين .. وحمد كونو يحكي القصة من اولها لاخرها لسماح . جابت الفوائد دي كلها ..

اها بهناك حجة نصرة الصباح مشت لي بيت فدوى ودقت الباب .. ومافي زول فتح

ليها الباب ..

وعادة لمن تجي في الوقت ده ..بتلقى فدوى قاعدة ..ومتزينة ..ومتعطرة ..وبيتها نضيف

وتتبسم زي صباح الخير .. وكت نصره دقت الباب كتير .. في مراة من الجيران .. جاتها قالت ليها انت دايرة العرسان؟

قالت ليها عرسان شنو؟؟ .. انا خالة فدوى فدوى مافيشة؟؟

قالت ليها انتي خالتها.. وماعندك خبر فدوى طلقوها .. والزاكي عرس ليهو واحده

يخسي.. يخسي ..لامن يخسي تكمل ..

قالت ليها ده كلام شنو؟ كدي احكي لي .. قالت ليها فدوى طلقوها .. ومشت اهلها ..

الحريم قالن جات اختها من سنجة وساقتها معاها ..

والزاكي عرس ليو واحدة ..بس سماحة جمل الطين .. كل يوم يجيبها راجل بالعربية ..

ويسوقها راجل تاني .. بتسوي في شنو الله اعلم .. لكن مرتن قاهرة كلو كلو ..

لابتنحاش ولابتقدر ..

حجة نصرة ماعرفت تندهش ولاعرفت تبكي ولاعرفت تزعل .. المهم حست انو

كرعيها ما شايلتنها ..

وقعدت طوالي في الواطة.. وقالت ياحليلك يابنيتي فدوى.. حتى مشيتي بلا تكلميني ..

وخايفة علي من الزعل والصدمة ..

وانا هسع اكلم حمد وصديق كيف..؟ واكلم بتي سلمى كيف .. ؟الولاد ديل بريدو فدوى زي اختهم .. وحات ربي الا يسووهو فراش بكا .. كرعلي يابنيات امي .. وااا شريري عليك يافدوى ياسمحة البنوت .. ودموع الحجة الحنينة دفقن ..

اما الحاصل مع الزاكي لايسر العدو ولايسر الصليح .. المراة مستعبداهو .. وعاملاهو

مضحكة .. ولما يجوها ناس من صحبانها في البيت ..ترسلو يجيب ليها البارد من البقالة ..

وبقى شغال مقارنات بين فدوى وبين بسمات ..

فدوى مابتمرق بيتها .. بسمات تجي داخلة البيت انصاص الليالي ومع راجل غريب..

ولسه هي عروس ليها شهر ونص ..

فدوى مهتمة بي بيتها وبتعمل اكلها وشرابها في البيت وبتفرح بي ضيوف الزاكي ..

بسمات بتجيب معاها بيرقر وبيتزا من الشارع ..على قدرها وقدر راجلها ..

وبتأكلو في خشمو زي الشافع .. ولو جا اي ضيف الا يعشوهو بي عيش وزبادي من

الدكان ..

فدوى ماعندها اي صداقة مع راجل الا احساسها الوحيد بي خوة حمد ..

بسمات عندها شلة اصحاب لا أول ليهم ولا اخر .. وبتمشي تقعد معاهم في شارع النيل ..

وحاجات الزاكي زاتو مافاهمها .. دي كلها اضطرابات في عقل الزاكي وافكار بقت تزعجو ..

والهوس بالغيرة والوساوس ديك ماتت كلو كلو سبحان الله ..

الزول ده بقى قلبو ميت.. مع ان بينو وبين نفسو متأكد انو بسمات مانضيفة ..

بس بقى يتجاهل في الموضوع.. لغاية ماقلبو مات.. وبقى زول خيخة ساي ..

وبقى عايش في غم لايعلم به الا الله .. والغريبة مازال شاكي في علاقة حمد بي فدوى.. شكك وظن ..بس بسمات تاكيد ويقين ..

والشي الصدمو كلام سماح الكان زي الرصاص في قلبو .. كلو مايتذكرو .. تتفتت

الظنون وتتلاشى . وترجع مرة تانية ..

اها يا جماعة الخير حجة نصرة مشت البيت وكانت منهارة وزعلانة من الزاكي انو

طلق فدوى ..وجاب ليو مره لامنها لاعليها.. مابتجي في جزمة فدوى ..

وقالت لازم اضرب لحمد وصديق واكلمهم بالطلاق والعرس واليحصل يحصل ..

ولازم فدوى تعرس ..وتقطعلو قلبو الزاكي .. تنضم براها حجة نصرة ..

لكن ياربي البعرسها فيهم منو ؟ ..وشالت التلفون وركبت نضارتها ..وتفتش لي رقم حمد

.. وتنضم براه

ا .. الله يخيبك آالزاكي .. الله يخيبك نعمنك ما بتعرف فدوى بتي ..

بت الاصل والفصل .. اهااا يهودي نمرة حمد .

جبق .. داست اتصال ..

حمد ولدي ..

جاري الاتصال..

يتبع....

#عشان_قلبي
بقلم: طارق اللبيب

الجزء 17

حجه نصرة : الو ياحمد .. كيف حالك ياولدي ؟؟

حمد : عليكم السلااااااااااام ياخاله كيف صحتك ؟ والله انا تمام ومالك قطعتي مننا اخبارك وكيف سلمى ووليداتها؟

قالت ليهو سلمى طيبه ..مالك ماسعلت من اختك فدوى ؟

قال ليها السؤال جاييك ياحجه اها كيف اختي فدوى ؟..

قالت ليهو والله ياولدى جايبالك خبرا" موسمح تب .. قال ليها في شنو ياحجة .. ؟ان شاء الله خير .؟ او عا يكون فدوى عيانة ؟

قالت ليهو ابدا لاعيانة ولاحاجة .. شال نفسو وختاهو .. قال ليها اها مالا؟

قالت ليهو صاحبك الزاكي .. طلق فدوى .. وعرس المراة اخت صاحبو الحكيت لك بيها ..

قال ليها ..لاحول ولاقوة الا بالله .. اكيد الزول ده جن ولاحصل لمخو حاجة ..

وهسي فدوى وين؟

قالت ليهو ساقتها اختها لي سنجه .. قال ليها الحمد لله انها في يد امينه ..

قالت ليهو اها ؟؟

يعني شنو كلامك يا ولدي نخليهو بي مغستو دي ؟؟

قال ليها ياخالة (العايمة بتدق القيف) .. براهو بندم وبجي يكوس لي فدوى شيلي الصبر ..

قالت ليهو بس هو مابستاهلها .. قال ليها خير انا هسي مشغول شديد .. برجعلك تاني ..

قفلت منو التلفون وبقت عارفه انو حمد ماحيسكت ..

فعلا حمد بعد استقبل المكالمة دي زعل زعل شديد من الزاكي .. وبقى يصفق في ايديهو ويتحسر .. بالله الزاكي ده عاقل ؟

هسي عليك الله فدوى دي بفارقوها .. ؟سبحان الله غايتو ...

وبقى شايل همها من جديد .. بعد مابدا يتناسى .. ومشى البيت بدري .وحكى الخبر كلو لسماح .

سماح هنا حكت ليهو الاتصال الحصل من الزاكي وقالت ليهو

انا كنت بفتش لي فرصة اكلمك بالموضوع .. وكنت خايفة من ردة فعلك .. وتمشي تعمل معاهو مشكله .. بس سالتك بالله لاتسأله ولا تجيب ليهو خبر ..

قال ليها .. هاهاهاهاها. اساله بعد كلامك ده تاني اقول ليهو شنو؟

انتي هسي خليتي ليهو صفحة يرقد عليها ؟

لكن هسي عليك الله ماشايفه مغسة الزول المابفهم ده .. يطلق الانسانة الطيبانة وكريمة ويتزوج واحدة زي دي .. قالت ليهو فدوى زاتها مابتستاهل . تكون مع زول زي ده ..

الحمد لله ربنا فكاها منو ؟

قال ليها ابدا والله ياسماح .. الغيرة ممكن تعمل اكتر من كدا .. لكن الزاكي من جواهو زول كويس ..

هسع انا متاكد كل الحاجات العملا دي كانت بدافع الغيرة ..

بس ماقدر عمل ترشيد للغيرة .. وخلاها تتطور للشكوك .. هسه انتي لمن كنتي حامل ماشفتي الحالة الكانت عندك ؟

قالت ليهو لكن الزاكي قاعد يتوحم؟ هههههه

قال ليها ابدا بس انا يتخيلي الزول ده بحب فدوى شديد ..

لانو قالو الحب والغيرة وجهان لعملة واحدة ..

قالت ليهو عليك الله ياحمد خليني من وهمك ده .. انت غير طيبتك دي وسلامة نيتك دي مافي شي مخلي الناس يطلعو ليك في راسك ..

قال ليها بس انتي اصبري .. انا بكتشف لو الزاكي لسع داير فدوى وللا لا؟

قالت ليهو والمشكلة انو تكون فدوى كرهتو .. وتاني ما حترجع ليهو ابدا"

قال ليها والله فعلا دي تبقى اكبر مشكلة ..

قال ليها كويس اصبري ايام كدا ونشوف الحاصل ..

كدي دقيقة اضرب لي صديق احكي ليهو واشوف رايو .. واتصل على صديق واتكلمو كتير واتفقو على شنو مامعروف ..

ومررت الايام .

تعالو نمشي بيت الزاكي

..في الفترة دي كانت بسمات منجضة الزاكي نجاض اللقيمات .. وشغالة على كيفها عربي وافرنجي ..

يوم الزاكي جا البيت لقاها تتونس مع واحد .. ولابسة لبس شفاف .. يعني هدوم النوم عديل .. وتتونس وتضحك ..والزاكي جا ..ولاغيرت قعدتها ولا اشتغلت بيهو الشغلة ..

الزاكي طلع برة ودمو فار وخلاص فاضت بيهو ..

ودخل الاوضة التانية الكان فصلها لي فدوى ..ووقف قدام المرايه الفي توليت التسريحة بتاع فدوى .. وعاين لروحو في المراية وقال (توف عليك ) انت حرام يسموك الزاكي .. انت الخايس ..

بتكلم مع روحو في المرايه ..

بالله عليك الله تشك في فدوى العمرها ما عملت عمل مشكك..وتقعد من واحدة هابطة واخلاقها زي الواطة .. يخسي عليك يا الزاكي ..

وقعد فوق السرير حق فدوى الكان فاضي ومافيهو لحاف.. وخت يديهو فوق راسو وبكى بكى لامن حيلو مات .. ورقد في السرير .. ويسمع في ضحك بسمات مع الراجل ..

طوالي قام على حيلو ..وجاها قال للزول اللهو زميلها في الشغل تقريبا .. قالت كدا بس مامعروف الحقيقة ..

قال ليهو لو سمحت.. قوم اطلع .. وللا انا بكسر ليك راسك ده ..

بسمات قالت ليهو سجمي يا الزاكي .. انت مالك الليلة .. ؟في زول بتعامل مع ضيوفو كدا؟ ..

قال ليها انتي اسكتي بس ..

الزول قام لبس نعلاتو ولاقال ولا كلمة ..

وطلع طوالي ..

قالت ليهو ده شنو يا الزاكي العملتو ده .. (وهو يرجف من راسو لي كرعيهو )

مو معروف زعلان ولاخايف من نتيجة فعلتو ..

قال ليها انا خلاص ..خلاااااااص ..خلاص ياسجم ..انا زهجت منك ومن عمايلك ..

ياخي المفروض تراعي لي شعوري انا راجلك ..انتي ماعندك احساس وللا ماشايفاني راجل ..

قالت ليهو .. انت ما راجل فعلا .. وعارفاك العملتو لي مرتك ح يجي يوم وتعملو فيني ..

وكنت عاملة احتياطاتي ..

ل

كن والله يا الزاكي انا اندمك على تصرفك ده لامن تسف التراب ..

امشي بيغادي .. وماعايزة اشوف وشك ده .. امشي مني.. وقعدت تكورك وتصرخ في وشو .. ولاعاملة اي حساب الجيران يسمعو ولا مايسمعو .. ولاشغالة باي شي ..

قال ليها كملي صراخك وكواريكك .. وانا عايز اقول ليك كلام ..

انا عندي نيه ارجع اولادي .. واجيب فدوى في البيت ده .. (تم سكتت.. وقعدت تعاين ليهو)

قالت ليهو .. عليك الله؟؟ ... بالله؟؟.. واحلاتي يايمة .. عليك الله كرر الكلام تاني .. قلت شنو؟ انا ماسمعتك .. !! اسمع يا عاطل .. والله تاني كان تشوف فدوى.. تشوف حلمة اضانك .. وانت اصبر شوف البحصل عليك قبل ماتفكر في قشرة ..

قال فدوى قال !!!

الزاكي قال ليها دايرة تعملي شنو؟؟

والظاهر ياجماعة الزولة دي فعلا حقدت على الزاكي .. وناويه على شر .

الله يستر ماتقوم تنتقم فيهو عمايلو في فدوى بالاضعاف ..

يتبع....

#عشان_قلبي
بقلم: طارق اللبيب

الجزء 18

بكرية المشكلة الحصلت بين الزاكي ومرتو الجديدة .. طلع الزاكي على شغلو .. وطلعت بسمات على شغلها .. وماكانت زعلانة .. كانت بتتبسم بس ..

هناك حمد وصديق قاعدين مع بعض ..في الفرع بتاع الشركة الفي امدرمان ..

طبعا ياجماعة صديق خلا حمد يمسك الفرع ده بي نسبة الارباح .. عشان كان حمد بشتغل اكتر من مايلزم ..وكان قبل كم يوم قال ليهو انا عايز ابيع ليك سهم من الشركة في زول اخلى طرفو .. سهمو 15 في المية لملم اطرافك نبعو ليك انت تستاهلو .. قال ليهو وشغلي الهنا ؟ قال ليهو شغلك هنا يمشي وسهمك يمشي بي دربو ..

اها نرجع للمشورة قاعدين الاتنين بتشاورو وبتشاورو في الظلم الحصل لفدوى .. من الزاكي ..

حمد قال ليهو عليك شوف الزول الغريب ده .. يشرد المراة بي اولادها .. وهو يقعد هنا مع واحدة زي دي ؟

هسي تلقى فدوى ماعندها حق مصاريف الاولاد .. والزاكي قحطان وفلسان .. والمرة الجديده هي الممول للبيت .. وماحيكون رسل ليها ولاتعريفة .. .وطبعا فدوى مابتقدر تطلب من اختها ولاراجل اختها ..

صديق قال ليهو ده كلو حاصل ياحمد .. بس نحن دورنا شنو؟

قال ليهو ليهو بيدنا مافي حاجة نعملا .. المهم اتكلمو كتير .. في النهاية اتفقو على حاجة.. اتصل حمد على حجة نصرة .. وقالها ياخالتي طالبنك في عمل خير . .. تمشي للزاكي وتتصرفي ..تجيبي لينا منو تلفون هدى اخت فدوى ؟

قالت ليهو ده ياهو زاتو اللكنتا مفكرة فيهو .. هسه من دربي ده بمشي ليهو .. قال ليها لالا هسع مابتلقيهو .. الا زي الساعة خمسة مساء كدا .. قالت ليهو انت اديني تلفونو .. وانا بضرب ليهو اشيلو منو .. المهم مللاها تلفون الزاكي .. وكتبتو في الواطه رقم رقم ..

حجة فاهمة ماشاء الله عليها..

وما اخدت ليها دقايق .. رجعت لحمد .. وقالت ليهو نمرة هدى هديليها معاي ..

قالها اضربي ليها .. وقولي ليها انا جاية سنجة .. وصفو لي البيت ..

حجة نصرة قالتلو . لكن انا البوديني سنجة شنو؟

قال ليها لالا انتي مابتمشي .. نحن دايرين نلز ليها امانة من هنا .. قالت له لا لا مابكضب بعد العمر يا ولدي .. لكن انت ان بقى داير تعرف بيتها بجيب لك خبرو تب ..

قال ليها خلاص بس .. ده العاوزينو انتي اتصرفي ..

المهم يازول في بالمساء رجعت ليهو بالتلفون .. ووصفت ليهو الحي الساكنين فيهو ناس هدى ..

باكر من الصباح صديق وحمد ربطو ربطة قروش .. ورسلو نفرين من الناس الشغالين معاهم لي سنجه .. ووصفو ليهم البيت .. وقالو ليهم تسالو من واحدة اسمها فدوى .. في بيت ناس فلان .. وتسلموها القروش دي .. وتقولو ليها القروش دي من الزاكي لي اولادو ..

وفعلا الجماعة شالو القريشات وسافرو ..

نرجع بيت الزاكي .. ونشوف الافلام .. في الحياة الزوجية الجديدة دي .. امبارح طلعت بسمات مبسوطة ليه مامعروف .. اها لمن جات راجعة اتعاملت مع الزاكي عادي ..

والزاكي قال في نفسو .. خلاص بت الكلب عرفت اني مابسكت ليها .. واتأدبت ..

اها يازول الليلة الصباح وهي طالعة .. قالت ليهو ..عليك الله يا الزاكي الليلة تعال بدري .. انا عازماك غدا بتحبو .. انت موش بتموت في البيتزه .؟

قال ليها أيوة .. قالت ليهو الليلة عازماك بتزا . قال ليها جدا .. وطلعو الاتنين ..

اها يازول مشى حام بيجاي وبيجاي .. ومستعجل لمتين يجي البيت ..

ولا اشتغل اي شغلة .. واساسا مامشى تجمع الكهربجية .. بس الساعة 2 جا كاشت على البيت .. ومبسوط الليلة بي رجوع المياة الى مجاريها ..

فتح البيت .. وخش الغرفة بتاعة بسمات .. وشغل المكيف . وشال ليهو جريدة بتاعة امس بيقرا فيها .. الباب دقه .. مشى فتح الباب .. لقاها شافعة كدا عمر 13 سنة ..

قالت ليهو ازيك ياعمو .. خالتو بسمات موجودة ؟

قال ليها لا لا مافيشة .. انتي عايزة شنو ؟ .. قالت ليهو .. خالتو قالت لي تجي تنضفي البيت لغاية ما ارجع .

ممكن اخش .. ؟؟ قال ليها خشي .؟

خشت الشافعة .. وشالت المكنسة .. تكنس وتنضف وتنوني ..بعد شوية دخلت البرندة .. ونضفت .. تاني خشت الغرفة .. اللهو قاعد فيها..

و قالت ليهو عن اذنك ياعمو .. عايزة اسعف في الاوضة دي براحة كدا ..

قاليها سغفي برة .. .. الحيطان ديل نضاف ..

طلعت تسعف في البرندة .. وفجأة كدا الشافعة قعدت تصرخ .. وماسكة عينها ..

وبتقول ياعموووو .. الحقني ياعموو عيني .. عيني وقعت فيها حاجة حااارة ..

وجاتو جارية جوة .. وهو قام مخلوع .. مسك للشافعة راسها .. وقال ليها افتحي عينك .

اشوف فيها شنو .. هسي بنفخها ليك بتطلع ..

وهي بس تكورك وتفنجط .. وقعدت في السرير الفي الاوضة .. هو جري برة يجيب ليهو موية عشان تغسل وشها .. وهي انتظرتو راقدة وتكورك .. وقالت ليهو الموية لا ياعمو .. عيني اتقدت ياعمو .. قعد جمبها وهي تصرخ .. وهو بقول ليها شيلي يدك من عينك النشوفها ..وهي صراخها ماشي زايد ..وهو في الحالة دي ..

دخلو تلاتة انفار .. وشافوهو في المشهد ده .. البت راقدة وبتصرخ .. وهو بحاول يشيل يديها .. عشان ينفخ ليها عينها من الوقيعة ..

الشافعة لمن شافت الناس .. شالت يدها من عينها .. ووبقت تقول ليهم .. امسكوهو مني .عمو عايز ياذيني .. انا خايفة منو عمو ده شرير .. وررررر تصرخ .. طوالي مسكوهو ليك وصررر صج ..

كف بيهنا وكف بيهنا ورفعوهو من جمب الشافعة ..

وبشتمو فيهو .. ياراجل ياكلب هسي البت دي ماقدر بتك ..؟

معاك افراد جهاز الامن .. وطلعو ليهو البطاقات .. وهو يسوي ليهم .. ياجماعة الموضوع مازي ما انتو فاهمين ..

قالو ليهو نحن جانا بلاغ .. انك طوالي بتجيب الشفع في البيت .. وزوجتك مافي .. والليلة رصدنا ليك مخصوص يا وهم ..

سألو البت قالو ليها انتي جيتي هنا ليه ؟..

قالت ليهم عمو قال لي تعالي نضفي ..وقام مسكني رقدني في السرير بالغصب ..

قال ليهم ياجماعة البت دي رسلتها زوجتي .. والشافعة تقول لالا .. انا ماشفتها زوجتو .. فجأة كدا بسمات جات خاشة .. وشايلة اتنين بيتزا ..

وقالت في شنو ياجماعة؟.. طوالي الزاكي قام ماشي عليها .. قال ليها بسمات .. انتي مش رسلتي البت دي ؟

قالت ليهو انا؟ .. متين؟ .. يابت انا رسلتك؟ .. قالت ليها لالا ياخالتو .. انا مابعرفك .. عمو دخلني هنا .. عشان انضف .. وتاني مسكني كدا .. وثبتني في السرير ..

بسمات قالت ليها معقول ؟؟ يخسي عليك يا الزاكي .. يخسي عليك ..

وقعدت تبكي .. ومرقت مشت بره .. الجماعة مسكو الزاكي وساقوهو ..

وطلعو بيهو برة .. وهو يقول .. يابسمات البت دي كضابة والله .. انا مستحيل اكون كدا ..

حرام عليك يابسمات .. كيف تصدقي فيني كلام البت دي ؟..؟و انتي يعني ماعندك فيني ثقة .. وسايقنو لابرة وكانت العربية وصلت .. عربية الطارة ... .

وحشروهو في العربية بي عنف .. والعربية اتحركت بحركة تفحيطيه ..

يتبع...