ﻲ ﻣﻦ ﺍﻟﺤﺮﺍﻡ .. ﻋﺸﺎﻥ ﻛﺪﻱ ﺑﻬﻀﺮﺏ ﺑﺎﻟﻌﺮﺱ .. ﻟﻜﻦ ﺷﺒﺎﺏ ﺍﻟﺰﻣﻦ ﺩﻩ ﻣﺎﺑﻔﻜﺮﻭ ﻓﻲ ﺍﻟﻌﺮﺱ ﻻﻧﻮ ﺍﺳﺎﺳﺎ، ﻣﺴﺄﻟﺔ ﺍﻟﻌﺮﺱ ﺑﻘﺖ ﻣﻌﺠﺰﺓ ﻣﻦ ﺍﻟﻠﻪ .. ﺍﻭ ﺭﺑﻨﺎ ﻳﺪﻳﻚ ﻟﻴﻠﺔ ﺍﻟﻘﺪﺭ

ﻋﺸﺎﻥ ﻛﺪﺍ ﺍﻟﺸﺒﺎﺏ ﺑﻘﻮ ﻣﺪﻓﻮﻋﻴﻦ ﺩﻓﻊ ﻟﻠﺤﺮﺍﻡ .. ﻃﺒﻌﺎ" ﻣﺎﻣﻤﻜﻦ ﺍﻟﻮﺍﺣﺪ ﻳﺼﻮﻡ ﻋﻤﺮﻭ ﻛﻠﻮ .. ﻣﻊ ﻣﻜﺎﺑﺴﺔ ﺍﻟﺸﻐﻞ ﺩﻱ

ﻳﻌﻨﻲ ﺳﺒﺤﺎﻥ ﺍﻟﻠﻪ .. ﺍﺭﺗﻔﺎﻉ ﺗﻜﺎﻟﻴﻒ ﺍﻟﺰﻭﺍﺝ ﺳﺒﺐ ﻓﻲ ﺍﻟﻔﺴﺎﺩ ﺍﻻﺧﻼﻗﻲ ﺍﻟﺤﺎﺻﻞ ﻓﻲ ﻭﺳﻂ ﺍﻟﺸﺒﺎﺏ .. ﻭﺩﻱ ﻣﻌﺎﺩﻟﺔ ﻭﺍﺍﺍﺍﺿﺤﺔ

ﻏﺎﻳﺘﻮ ﺍﻧﺎ ﺍﻥ ﺷﺎﺀ ﺍﻟﻠﻪ ﺭﺑﻨﺎ ﻳﺴﺘﺮﻧﻲ ﻻﻣﻦ ﺍﻟﻢ ﻓﻲ ﺣﻼﻟﻲ .. ﺍﻧﺎ ﺩﺍﻳﺮ ﺍﺣﻠﻒ ﻟﻲ ﻣﺮﺗﻲ ﻭﺍﻗﻮﻝ ﻟﻴﻬﺎ ﻭﺍﻟﻠﻪ ﺍﻧﺎ ﻣﺎﻣﺴﻴﺖ ﻗﺒﻠﻚ ﻭﺍﻓﺘﺨﺮ ﻟﻲ ﺍﻭﻻﺩﻱ ﺍﻧﻲ ﻣﺎﻋﻤﻠﺖ ﺣﺮﺍﻡ ﻓﻲ ﺣﻴﺎﺗﻲ .. ﻭﺍﻻﻗﻲ ﺭﺑﻨﺎ ﻭﺻﺤﻴﻔﺘﻲ ﻧﻀﻴﻔﺔ ﻣﻦ ﺍﻟﺤﺎﺟﺎﺕ ﺩﻱ

ﺍﻟﺰﻭﻝ ﺩﻩ ﻣﺎﺷﻲ ﻭﺑﺘﻜﻠﻢ ﺑﻴﺪﻳﻬﻮ ﻭﻋﻴﻮﻧﻮ .. ﻟﻐﺎﻳﺔ ﻣﺎﺭﻛﺐ ﺍﻟﻤﻮﺍﺻﻼﺕ ﻓﻲ ﺷﺎﺭﻉ ﻭﺍﺣﺪ ﺍﻟﺤﺎﺝ ﻳﻮﺳﻒ .. ﻭﻣﺎﺷﻲ ﺑﺤﺮﻱ ﺟﻮﺓ ﻣﻨﻬﺎ ﻳﻼﻗﻲ ﻫﻨﺪ ﺍﻟﻮﺍﻗﻔﺔ ﻣﻨﺘﻈﺮﺍﻫﻮ ﻣﻦ ﺍﻟﺴﺎﻋﺔ 12 ﻭﻧﺺ .. ﻭﻟﻮ ﻣﺎﻟﻘﺎﻫﺎ ﻳﻨﺘﻈﺮ ﺗﻠﻔﻮﻥ ﺯﻭﻝ ﺍﻟﺸﻐﻞ ﻭﻳﺮﺟﻊ ﻟﻴﻬﻮ ﺗﺎﻧﻲ .. ﺍﻟﻤﻬﻢ

ﻣﺸﻰ ﻧﺰﻝ ﻓﻲ ﺍﻟﻤﻮﻗﻒ .. ﻭﻣﺸﻰ ﻃﻮﺍﻟﻲ ﻋﻠﻰ ﻃﻠﻤﺒﻪ ﺍﺳﻤﻬﺎ ﺍﻟﺒﺤﺎﺭ ﺍﻟﺪﺍﻓﻴﺔ .. ﺍﻟﻤﻔﺮﻭﺽ ﻫﻨﺪﻭﻳﺔ ﺗﻜﻮﻥ ﻗﺮﻳﺐ ﻣﻨﻬﺎ ﻫﻨﺎﻙ ﻋﻠﻰ ﺣﺴﺐ ﺍﻟﻤﻮﻋﺪ ﺍﻟﻤﻀﺮﻭﺏ

ﻫﻨﺪﻭﻳﺔ ﻣﻦ ﺑﻨﺎﺕ ﺑﺤﺮﻱ .. ﺑﺖ ﻣﻦ ﻧﻮﺭ .. ﺗﺸﺒﻪ ﺍﻟﻔﺮﺡ ﺍﻟﻤﺸﺮﺷﺮ ﺗﺸﺒﻪ ﺍﻟﻀﺤﻜﺔ ﺍﻟﺒﺮﻳﻪ ﻣﻦ ﻭﺟﻪ ﺍﻟﻄﻔﻞ .. ﻓﻲ ﻳﻮﻣ ﻏﻴﻮﻣﻮ ﻣﻠﺒﺪﻩ ﻫﻨﺪﻭﻳﻪ ﺍﻛﺘﺮ ﻣﻦ ﻛﺪﺍ ..

ﺯﻭﻟﺔ ﻣﻤﺘﺎﺯﺓ ﺟﺪﺍ" .. ﻭﻣﺮﺓ ﺳﺘﺮﺓ .. ﻭﺍﻟﻠﻪ ﻣﺎﻋﻨﺪﻫﺎ ﺍﻱ ﻗﺼﺪ ﻓﻲ ﻣﻠﻌﺒﺔ .. ﻳﻌﻨﻲ ﺑﺎﺧﺘﺼﺎﺭ ﺩﺍﻳﺮﺓ ﻋﺮﺱ .. ﻭﺑﺮﺍﻛﻢ ﺑﺘﺸﻮﻓﻮ ﻛﻼﻣﻬﺎ ﻟﻤﻦ ﺧﺪﺭ ﻳﺼﻞ

ﺍﻫﺎ ﻓﻲ ﺍﻟﻌﺮﺑﻴﺔ ﻛﺎﻥ ﺑﺘﻮﺍﺻﻞ ﻣﻌﺎﻫﺎ ﻭﻟﻤﻦ ﻭﺻﻞ

ﻗﺎﻝ ﻟﻴﻬﺎ : ﺍﻧﺎ ﻭﺻﻠﺖ ..

ﻭﻫﻲ ﻃﺒﻌﺎ" ﻛﺎﻧﺖ ﺯﻋﻼﻧﺔ .. ﻭﺩﺍﻳﺮﺓ ﺗﻤﺸﻲ ﺑﺲ ﻋﺮﻓﺖ ﺍﻧﻮ ﻟﻮ ﻣﺸﺖ ﺡ ﺗﺨﺴﺮ ﺍﻟﺠﻮﻟﺔ .. ﻓﻜﺮﺕ ﺑﻤﻨﻄﻖ ﺍﻟﺬﻛﺎﺀ ..

ﻭﻗﺎﻟﺖ ﻟﻴﻬﻮ ::ﺑﻨﺘﻈﺮﻙ ..

ﻭﺍﻧﺘﻈﺮﺗﻪ ﻓﻲ ﺍﻟﻨﺎﺣﻴﺔ ﺍﻟﺸﺮﻗﻴﺔ ﻟﻤﻮﻗﻒ ﺣﺎﻓﻼﺕ ﺍﻟﺤﺎﺝ ﻳﻮﺳﻒ

ﺍﻟﻤﻬﻢ ﻗﻌﺪﺕ ﻣﻌﺎﻫﻮ ﻭﺑﺪﺕ ﺗﺘﻜﻠﻢ

ﻗﺎﻟﺖ ﻟﻴﻬﻮ : ﻭﺍﻟﻠﻪ ﻳﺎﺧﺪﺭ ﺻﺮﺍﺣﺔ .. ﺍﻧﺎ ﺗﻌﺒﺖ ﻣﻦ ﻛﻼﻡ ﺍﻟﻨﺎﺱ ﻭﺍﺳﺌﻠﺔ ﺍﻣﻲ ﻭﺍﺧﻮﺍﺗﻲ .. ﻭﻣﺮﺍﺕ ﺍﻟﺴﺆﺍﻝ ﺗﻠﻘﺎﻫﻮ ﻣﻄﺮﻭﺡ ﻓﻮﻕ ﺍﻟﻌﻴﻮﻥ ﻟﻜﻦ ﻣﺎﺑﻘﻮﻟﻮﻫﻮ .. ﺍﻧﺎ ﻣﻦ ﻛﻠﻤﺘﻬﻢ ﻗﻠﺖ ﻟﻴﻬﻢ ﺧﺪﺭ ﺡ ﻳﺠﻴﻨﺎ ﻓﻲ ﺍﻟﺒﻴﺖ .. ﺍﻟﻠﻴﻠﺔ ﻟﻴﻬﺎ ﺷﻬﺮﻳﻦ ﻭﺍﻧﺖ ﻛﻞ ﻳﻮﻡ ﺗﻘﻮﻝ ﻟﻲ ﺍﺻﺒﺮﻱ ﻟﻲ

ﻗﺎﻝ ﻟﻴﻬﺎ : ﻳﺎﻫﻨﺪﺓ ﺍﻧﺘﻲ ﺑﺮﺍﻙ ﺍﻟﻤﺴﺘﻌﺠﻠﺔ .. ﻭﻣﺸﻴﺘﻲ ﻛﻠﻤﺘﻲ ﺍﻣﻚ ﺑﻲ ﻋﻼﻗﺘﻨﺎ .. ﻭﻗﻠﺖ ﻟﻴﻬﺎ ﻗﺮﻳﺐ ﺑﺠﻴﻨﺎ ﻓﻲ ﺍﻟﺒﻴﺖ .. ﻭﺧﺘﻴﺘﻴﻨﻲ ﺍﻣﺎﻡ ﺍﻻﻣﺮ ﺍﻟﻮﺍﻗﻊ .. ﺍﻧﺎ ﻗﻠﺖ ﻟﻴﻚ ﻣﺎﺟﺎﻫﺰ ﻭﺍﻟﻠﻪ

ﻗﺎﻟﺖ ﻟﻴﻬﻮ : ﺗﺠﻬﺰ ﻟﻲ ﺷﻨﻮ؟ ﻳﻌﻨﻲ ﻛﻮﻧﻚ ﺗﺠﻴﺐ ﺍﻫﻠﻚ ﻭﺗﺠﻮ ﺗﻄﻠﺒﻮ ﺭﺳﻤﻲ ﺩﻱ ﺩﺍﻳﺮﻩ ﻟﻴﻬﺎ ﺟﻬﻮﺯﻳﻪ؟

ﻗﺎﻝ ﻟﻴﻬﺎ : ﻭﺍﻟﻠﻪ ﻳﺎﻫﻨﺪ ﺍﻧﺎ ﻣﺎﻋﺎﻳﺰ ﺍﺩﺧﻠﻚ ﻓﻲ ﺣﺘﺔ ﺿﻴﻘﺔ .. ﻭﺍﻋﻤﻞ ﺧﻄﻮﺑﺔ ﺑﻌﺪﻳﻦ ﺍﻫﻠﻚ ﻳﻘﻌﺪﻭ ﻳﻨﻘﻨﻘﻮ ﻣﻌﺎﻙ ﻓﻲ ﺍﻟﺘﺎﺧﻴﺮ .. ﻭﺍﻟﻠﻪ ﺍﺣﺴﻦ ﻟﻴﻚ ﺗﺼﺒﺮﻱ ..

ﻗﺎﻟﺖ ﻟﻴﻬﻮ : ﺍﻧﺖ ﻣﺎﻟﻚ ﺑﺲ؟؟ ﻋﻠﻰ ﺍﻻﻗﻞ ﻧﻘﺪ ﻋﻴﻦ ﺍﻟﺸﻴﻄﺎﻥ ﻫﺴﻲ ﻧﺤﻦ ﺑﻨﺘﻼﻗﻰ .. ﻟﻴﻨﺎ ﺗﻼﺕ ﺷﻬﻮﺭ ﻭﺍﻫﻠﻲ ﻋﺎﺭﻓﻴﻨﻚ ﻭﻣﺘﻮﻗﻌﻴﻦ ﻓﻲ ﺍﻱ ﻟﺤﻈﺔ ﺗﺼﻠﻬﻢ

ﻗﺎﻝ ﻟﻴﻬﺎ : ﻭﺍﻟﻠﻪ ﺣﺘﻰ ﻭﺻﻮﻟﻲ ﻟﻴﻜﻢ ﻣﺤﺘﺎﺝ ﻟﻲ ﻣﺼﺎﺭﻳﻒ ﻣﺎﻫﻴﻨﺔ ﺍﻧﺘﻲ ﻣﻌﺎﻱ ؟ ﻳﻌﻨﻲ ﺍﻟﻨﺎﺱ ﻣﺎﺑﻘﺒﻠﻮ ﺍﺟﻴﻜﻢ ﻳﺪﻱ ﻓﺎﺿﻴﻪ .. ﺯﻱ ﻣﺎﺑﻘﻮﻟﻮ ﻳﺪ ﻭﺭﺍ ﻳﺪ ﻗﺪﺍﻡ .. ﻭﺍﻧﺎ ﻭﺍﻟﻠﻪ ﻫﺴﻲ ﻓﻲ ﻳﺪﻱ ﻣﺎﻓﻲ ﺍﻻ ﻣﻴﺔ ﻭﺧﻤﺴﻴﻦ ﺟﻨﻴﻪ

ﻗﺎﻟﺖ ﻟﻴﻬﻮ : ﺍﻗﻮﻝ ﻟﻴﻚ ﺣﺎﺟﺔ .. ﺍﻧﺖ ﺣﺎﻭﻝ ﺗﻤﻬﻦ ﺧﻤﺴﻤﻴﺔ ﻭﺍﻧﺎ ﺑﺪﺑﺮ ﻟﻴﻚ ﺧﻤﺴﻤﻴﺔ .. ﻭﻧﺘﺸﺎﻳﻞ ﺍﻻﺗﻨﻴﻦ ﻳﺎ ﺧﺪﺭ .. ﺍﻟﺤﻴﺎﺓ ﺗﻌﺎﻭﻥ

ﻗﺎﻝ ﻟﻴﻬﺎ : ﺍﻓﻮ ﺍﻧﺎ ﺍﺧﻮﻙ ﺃﺳﻌﺎﺩ ؟

ﻋﻠﻰ ﺍﻟﻴﻤﻴﻦ ﻗﺮﺵ ﻣﺎ ﺍﺷﻴﻠﻮ ﻣﻨﻚ؟

ﻳﻌﻨﻲ ﺍﺷﻴﻞ ﻣﻨﻚ ﻗﺮﻭﺵ ﻭﺍﺟﻴﺒﺎ ﺭﺍﺟﻌﺔ ﻋﺸﺎﻥ ﺍﺩﻓﻌﺎ ﻟﻴﻜﻢ .. ﻗﻮﻟﺔ ﺧﻴﺮ ؟

ﻻﻻ ﺩﻱ ﺍﻧﺎ ﻣﺎﺑﺴﻮﻳﻬﺎ .. ﺑﺲ ﺍﻧﺘﻲ ﻫﺴﻲ ﺍﻣﺸﻲ ﺷﻮﻓﻲ ﻟﻲ ﻣﺼﺎﺭﻳﻒ الموضوع ﺩﻩ ﻛﻢ؟ .. ﻳﻌﻨﻲ ﻻﺯﻡ ﺍﺩﻓﻊ ﻗﺮﻭﺵ ﻟﻠﻤﻮﺿﻮﻉ ﺩﻩ ﺻﺎﺡ؟

ﻗﺎﻟﺖ ﻟﻴﻬﻮ : ﺍﻳﻮﺓ ﻻﺯﻡ .. ﻻﺯﻡ ﺍﻧﺖ ﺗﺸﺪ ﻟﻲ ﻭﺷﻲ ﻗﺪﺍﻡ ﻧﺎﺱ ﺑﻴﺘﻨﺎ .. ﻭﺻﺎﺣﺒﺎﺗﻲ ﻣﺎﻳﻘﻮﻟﻮ ﻣﻦ ﺍﻭﻝ ﻳﻮﻡ ﺑﺸﺘﻨﻪ .. ﻭﻧﺎﺱ ﺍﻣﻲ ﺫﺍﺗﻬﻢ ﻣﺎﻳﻘﻮﻟﻮ ﻟﻲ ﺍﻧﺘﻲ ﺻﻤﺘﻲ ﺍﻟﺴﻨﻴﻦ ﻭﻓﻄﺮﺗﻲ ﻋﻠﻰ ﺑﺼﻠﺔ

ﻗﺎﻝ ﻟﻴﻬﺎ : ﺍﻫﻮ ﺩﻩ ﺍﻟﻜﻼﻡ ﺍﻻﻧﺎ ﺧﺎﻳﻒ ﻣﻨﻮ ..

ﻭﺍﻟﻠﻪ ﺍﻧﺎ ﺧﺎﻳﻒ ﺍﺳﺘﺴﻠﻢ ﻟﻠﻀﻐﻂ ﺑﺘﺎﻋﻚ ﺩﻩ .. ﻭﺍﻣﺸﻲ ﻣﻌﺎﻙ ﻭﺑﻌﺪﺍﻙ ﺍﺗﺨﻮﺯﻕ ﺍﻧﺎ ﻭﺗﺘﺨﻮﺯﻗﻲ ﺍﻧﺘﻲ

ﻗﺎﻟﺖ ﻟﻴﻬﻮ : ﻳﺎﺯﻭﻝ ﻧﺠﺎﺯﻑ ﻣﻮﺵ ﺍﻟﺤﻴﺎﺓ ﻣﺠﺎﺯﻓﺔ ..

يتبع....

#الأصابع_الشريفة
بقلم: طارق اللبيب

الجزء 02

ﺧﺪﺭ ﻗﺎﻝ ﻟﻴﻬﺎ : ﻭﺍﻟﻠﻪ ﻳﺎﻫﻨﺪ ﺍﻟﻤﺠﺎﺯﻓﺔ ﺩﻱ ﻣﺎﺣﺒﺎﺑﺎ .. ﻻﺯﻡ ﺧﻄﻮﺍﺗﻨﺎ ﺗﻜﻮﻥ ﻣﺤﺴﻮﺑﺔ .. ﻛﺪﻱ ﺍﻧﺘﻲ ﺍﺳﻤﻌﻲ ﻛﻼﻣﻲ .. ﻭﺍﻣﺸﻲ ﺍﻟﺒﻴﺖ ﺍﺳﺄﻟﻲ ﺍﻟﻮﺍﻟﺪﺓ .. ﻋﻦ ﺗﺼﻮﺭﺍﺗﻬﺎ ﻟﻠﻮﺿﻊ ﺑﺘﺎﻉ ﺟﻴﺘﻨﺎ ﺩﻩ .. ﺑﻜﻮﻥ ﻛﻴﻒ ﻭﺍﻟﺨﺴﺎﺭﺍﺕ .. ﺍﻧﺘﻲ ﻗﺎﻳﻠﺔ ﻧﺠﻲ ﻓﻲ ﺍﻟﺒﻴﺖ ﺩﻱ ﻫﻴﻨﺔ ﻛﺪﻱ؟

ﺍﻧﺎ ﻭﺍﻟﻠﻪ ﻣﻦ ﺟﻮﻩ ﻗﻠﺒﻲ ﺩﺍﻳﺮﻙ .. ﻭﻣﺸﺘﺎﻕ ﻟﻤﺘﻴﻦ ﻳﻠﻤﻨﺎ ﺑﻴﺘﻨﺎ ﺑﺎﻟﺤﻼﻝ .. ﻟﻜﻦ ﺑﺮﺿﻮ ﻣﺎ ﺩﺍﻳﺮ ﺍﺳﺘﻌﺠﻞ ﻭﺍﺧﺴﺮﻙ .. ﻫﺴﻲ ﺍﻟﻌﻴﻦ ﺑﺼﻴﺮﺓ ﻭﺍﻟﻴﺪ ﻗﺼﻴﺮﺓ

ﻗﺎﻟﺖ ﻟﻴﻬﻮ : ﻃﻴﺐ ﻣﻮﺵ ﺩﻩ ﻃﻠﺒﻚ .. ﺍﻧﺎ ﺑﻌﻤﻞ ﺍﻟﻘﻠﺖ ﻋﻠﻴﻬﻮ ﻭﺍﻧﺎ ﻣﺘﺎﻛﺪﻩ ﺍﻣﻲ ﻣﺎﻋﻨﺪﻫﺎ ﻣﺎﻧﻊ ﻣﻦ ﺍﻱ ﺷﻲ

ﺳﻜﺖ ﻣﺴﺎﻓﺔ ﻭﻃﻠﻊ ﺗﻠﻔﻮﻧﻮ .. ﺑﻘﻰ ﻳﻌﺎﻳﻦ ﻟﻼﺭﻗﺎﻡ .. ﻭﺑﺘﻜﻠﻢ ﺑﺮﺍﻫﻮ .. ﺑﻘﻮﻝ ﻫﺴﻲ ﺍﻟﺰﻭﻝ ﺩﻩ ﺍﺑﺎ ﻳﺘﺼﻞ ﻣﺎﻟﻮ ﻳﺎﺭﺏ؟ ﻣﺨﻠﻴﻨﻲ ﻣﻨﺘﻈﺮ ﻣﻦ ﺍﻟﺼﺒﺎﺡ

ﻗﺎﻟﺖ ﻟﻴﻬﻮ : ﻣﻨﻮ ﺍﻟﺰﻭﻝ ﻳﺎ ﺧﺪﺭ ..

ﻗﺎﻝ ﻟﻴﻬﺎ : ﺯﻭﻝ ﻋﻨﺪﻭ ﺷﻐﻞ ﻓﻲ ﺍﻟﺠﺮﻳﻒ ..

ﻗﺎﻟﺖ ﻟﻴﻬﻮ : ﻃﻴﺐ ﻳﺎﺧﻲ ﺍﺗﺼﻞ ﻋﻠﻴﻬﻮ ﺍﻧﺖ ..

ﻗﺎﻝ ﻟﻴﻬﺎ : ﻧﺎﺱ ﺍﻟﺸﻐﻞ ﺍﻧﺘﻲ ﻣﺎﻋﺎﺭﻓﺎﻫﻢ .. ﺍﻟﻮﺍﺣﺪ ﻟﻮ ﺍﺗﺼﻠﺖ ﻋﻠﻴﻬﻮ ﻳﻘﻮﻝ ﻣﻔﻠﺲ .. ﻭﻳﻘﻮﻡ ﻳﻌﺼﺮﻧﻲ ﻓﻲ ﺍﻟﺴﻌﺮ .. ﺍﻟﺒﻠﺪ ﺩﻱ ﻓﻴﻬﺎ ﻗﻮﺍﻧﻴﻦ ﻋﺠﻴﺒﺔ ﺧﻼﺹ .. ﺍﻟﺘﺎﺟﺮ ﻳﺒﺘﺴﻢ ﻣﻌﺎﻙ ﺗﻘﻮﻝ ﺩﺍﻳﺮ ﻳﻐﺸﻨﻲ .. ﺍﻟﺰﻭﻝ ﻳﺘﻌﺎﻣﻞ ﻣﻌﺎﻙ ﻛﻮﻳﺲ .. ﺗﻘﻮﻝ ﺑﻜﺴﺮﻟﻲ ﻓﻲ ﺗﻠﺞ ﺩﺍﻳﺮ ﻳﺎﻛﻞ ﺭﺍﺳﻲ .. ﺗﺘﺼﻞ ﻋﻠﻰ ﺯﻭﻝ ﻳﻘﻮﻝ ﺩﺍﻳﺮ ﻣﻨﻲ ﺣﺎﺟﺔ ﻳﻌﻨﻲ ﺍﻟﺒﻠﺪ ﺑﻘﺖ ﻓﻴﻬﺎ ﻗﻮﺍﻧﻴﻦ ﻓﺮﺿﻮﻫﺎ ﺍﻟﻨﺎﺱ ﺿﺪ ﺍﻟﺬﻭﻕ ﻭﺍﻻﺩﺏ ﻭﻧﺤﻦ ﻣﺠﺒﻮﺭﻳﻦ ﻧﻤﺸﻲ ﺑﻴﻬﺎ

ﻟﻜﻦ ﺍﻗﻮﻝ ﻟﻴﻚ .. ﺧﻠﻴﻬﻮ ﻳﻘﻮﻝ ﺍﻟﻌﺎﻳﺰ ﻳﻘﻮﻟﻮ .. ﻭﺍﻟﻠﻪ ﻛﺎﻥ ﺍﺗﺼﻞ ﻋﻠﻴﻬﻮ ﻭﺍﺷﻮﻓﻮ ﻟﻴﻪ ﻣﺎ ﻳﺘﺼﻞ ﻋﻠﻲ

ﺿﺮﺏ ﻟﻴﻬﻮ ﺩﺍﻙ ﻓﺘﺢ ﺍﻟﺨﻂ .. ﺍﻟﻮ ﺳﻼﻡ ﻋﻠﻴﻜﻢ

ﻣﻌﺎﻙ ﺧﻀﺮ ﺑﺘﺎﻉ ﺍﻟﺒﻴﺎﺽ .. ﺍﻧﺖ ﻳﺎﺧﻲ ﻣﺪﻳﻨﻲ ﻣﻮﺍﻋﻴﺪ ﺍﻟﻠﻴﻠﺔ ﺍﻟﺼﺒﺎﺡ ﻭﺍﻧﺎ ﻗﺎﻋﺪ ﻣﺘﻜﺴﺮ ﻓﻲ ﺍﻟﺒﻴﺖ ﺭﺍﺟﻴﻚ

ﻗﺎﻝ ﻟﻴﻬﻮ : ﻭﺍﻟﻠﻪ ﻳﺎﺧﺪﺭ ﺍﻧﺎ ﺿﺮﺑﺖ ﻟﻴﻚ ﻛﺘﻴﺮ ﻭﺑﺠﻴﻨﻲ ﺯﻭﻝ ﻓﻲ ﺗﻠﻔﻮﻧﻚ ﺑﻘﻮﻝ ﻟﻲ ﺍﻟﻨﻤﺮﺓ ﻏﻠﻂ ﻳﺎﻫﻮ ﻧﻔﺲ ﺍﻟﺮﻗﻢ ﺍﻻﺩﻳﺘﻨﻲ ﻟﻴﻬﻮ

ﺧﺪﺭ ﻗﺎﻝ ﻟﻴﻬﻮ : ﻣﺴﺘﺤﻴﻞ ﺗﻠﻔﻮﻧﻲ ﺩﻩ ﻗﺎﻋﺪ ﻣﻌﺎﻱ .. ﻣﺎ ﺷﺎﻟﻮ ﺍﻱ ﺯﻭﻝ ﻛﺪﻱ ﻣﻠﻴﻨﻲ ﺍﻟﺮﻗﻢ ﺍﻟﻤﻌﺎﻙ .. ﻣﻼﻫﻮ ﺍﻟﺮﻗﻢ ﻟﻘﻰ ﻓﻲ ﻏﻠﻂ ﻓﻲ ﺍﻟﺮﻗﻢ

ﻗﺎﻝ ﻟﻴﻬﻮ : ﻻﻻ ﻳﺎﺥ .. ﺍﻟﺮﻗﻢ ﺍﻟﻘﺒﻞ ﺍﻻﺧﻴﺮ ﺩﻩ ﺗﻼﺗﺔ ﻣﺎﺳﺘﺔ ﺧﻼﺹ ﻳﺎﺯﻭﻝ ﻣﺎﻓﺮﻗﺖ ﺍﺟﻴﻚ ﻣﺘﻴﻦ؟

ﻗﺎﻝ ﻟﻴﻬﻮ : ﺑﻜﺮﺓ ﺍﻥ ﺷﺎﺀ ﺍﻟﻠﻪ .. ﺍﻟﻤﻬﻢ ﻳﺎﺯﻭﻝ ﺍﺻﻼ" ﻣﺎﻗﻌﺪﻭ ﻛﺘﻴﺮ ﻻﻧﻮ ﻫﻨﺪ ﺍﺻﻼ" ﺍﺗﺎﺧﺮﺕ

ﺍﻟﻤﻬﻢ ﺑﻜﺮﺓ ﺍﺗﺼﻞ ﻋﻠﻰ ﺍﻟﻌﻤﺎﻝ ﺍﻻﺗﻨﻴﻦ .. ﺍﻟﻤﻔﺮﻭﺽ ﻳﺸﺘﻐﻠﻮ ﻣﻌﺎﻫﻮ .. ﻭﻣﺸﻰ ﻭﺻﻞ ﻟﻠﺰﻭﻝ ﻫﻨﺎﻙ ﻓﻲ ﺍﻟﺠﺮﻳﻒ .. ﻭﻟﻘﻮ ﺍﻟﺮﺍﺟﻞ ﻗﺎﻋﺪ ﺑﺮﺍﻫﻮ .. ﺧﺎﺗﻲ ﻟﻴﻬﻮ ﻛﺮﺳﻲ ﻗﺪﺍﻡ ﺍﻟﺒﻴﺖ .. ﻭﻗﺎﻋﺪ ﻻﺑﺲ ﺟﻼﺑﻴﺔ ﻧﻀﻴﻔﺔ ﻭﻣﻜﻮﻳﺔ ﻭﻃﺎﻗﻴﺔ .. ﻭﻣﻮﻟﻊ ﺳﺠﺎﺭﺗﻮ .. ﻭﻣﺮﻛﺐ ﺍﻟﺴﻤﺎﻋﺔ ﺑﺘﺎﻋﺔ ﺍﻟﺘﻠﻔﻮﻥ .. ﻭﺑﺘﻜﻠﻢ

ﻭﺍﻟﺒﻴﺖ ﻛﺒﻴﺮ ﻣﺎﺷﺎﺀ ﺍﻟﻠﻪ .. ﻭﺍﻻﺗﻔﺎﻗﻴﺔ ﻋﻠﻰ ﺍﻟﺸﻐﻞ ﻛﺎﻧﺖ ﺑﺤﺴﺎﺏ ﺍﻻﻣﺘﺎﺭ

ﺣﺴﺐ ﺍﻻﻣﺘﺎﺭ ﺑﺘﺎﻋﺔ ﺍﻟﺒﻴﺖ ﻛﻠﻮ ﻭﺭﺍﻫﻮ ﺍﻟﺤﺴﺎﺏ ..

ﺍﻟﺒﻴﺖ ﺳﻄﻮﺡ .. ﻓﻴﻬﻮ ﻗﺴﻤﻴﻦ ﻗﺴﻢ ﺭﺟﺎﻟﻲ ﻭﻗﺴﻢ ﻧﺴﺎﺋﻲ ﻭﺍﻟﻈﺎﻫﺮ ﺍﻟﻘﺮﻭﺵ ﻛﻮﻳﺴﻪ ﻣﻊ ﺧﺪﺭ ﻳﻌﻨﻲ

ﺑﻌﺪ ﺷﻮﻳﺔ ﺟﺎﺕ ﺑﺖ .. ﺧﺪﺭ ﻗﺎﻳﻠﻬﺎ ﺩﻱ ﺍﻟﻤﻬﻨﺪﺳﺔ .. ﺑﻘﺖ ﺗﺘﻜﻠﻢ ﻣﻊ ﻋﺎﺩﻝ ﺳﻴﺪ ﺍﻟﺒﻴﺖ .. ﺳﻠﻤﺖ ..

ﻭﻗﺎﻟﺖ ﻟﻴﻬﻮ : ﻟﻮ ﺳﻤﺤﺖ ﻳﺎﻋﺎﺩﻝ .. ﻣﻤﻜﻦ ﺍﺗﻜﻠﻢ ﻣﻌﺎﻙ ؟

ﻗﺎﻝ ﻟﻴﻬﺎ : ﺟﺪﺍ" ..

ﻗﺎﻝ ﻟﻨﺎﺱ ﺧﺪﺭ ﺧﺸﻮ ﺍﺑﺪﻭ ﻓﻲ ﺍﻻﻭﺿﺔ ﺩﻱ .. ﺩﺧﻠﻮ ﻋﻠﻰ ﺍﻻﻭﺿﺔ ﻭﺑﺪﻭ ﻳﻌﺠﻨﻮ ﻓﻲ ﺍﻻسمنتي ﻭﺍﻟﺮﻣﻠﺔ

ﺍﺗﺨﻴﻞ ﺍﻻﻭﺿﺔ ﺷﺒﺎﻛﺎ ﻓﺎﺗﺢ ﻓﻲ ﺍﻟﺸﺎﺭﻉ .. ﻭﺧﺪﺭ ﺳﺎﻣﻊ ﻛﻼﻡ ﺍﻟﺒﺖ ﻣﻊ ﻋﺎﺩﻝ ﺳﻴﺪ ﺍﻟﺒﻴﺖ

ﻗﺎﻟﺖ ﻟﻴﻬﻮ : ﺍﻧﺖ ﺷﻜﻠﻚ ﺑﺘﻐﺶ ﻋﻠﻰ .. ﻭﺑﺘﻜﺬﺏ ﻛﺬﺏ ﺑﺪﻭﻥ ﻫﻮﺍﺩﻩ ﻭﻣﺎﺻﺎﺩﻕ ﻣﻌﺎﻱ ﻧﻬﺎﺋﻲ ..

ﻗﺎﻝ ﻟﻴﻬﺎ : ﺍﻧﺎ ﺑﻌﺪ ﻗﺒﻀﺖ ﺍﻟﺮﺳﺎﻳﻞ ﻓﻲ ﺗﻠﻔﻮﻧﻚ .. ﺗﺎﻧﻲ ﻟﻮ ﺑﻘﻴﺘﻲ ﻗﺒﻠﺔ ﻣﺎﺑﺼﻠﻲ ﻋﻠﻴﻚ .. ﺍﻧﺘﻲ ﺍﻧﺴﺎﻧﺔ ﻣﺎعندك ﺫﺭﺓ ﻭﻓﺎﺀ ..

ﻭﺑﺪﻭ ﻳﺘﻨﺎﻗﺸﻮ ﻣﻨﻔﻌﻠﻴﻦ .. ﻭﺍﻟﺼﻮﺕ ﻋﺎﻟﻲ ﻭﺍﻟﻌﻤﺎﻝ ﺟﻮﺓ ﻳﺴﻤﻌﻮ ﺧﺪﺭ ﻣﺪﺍ ﺭﺍﺳﻮ ﺑﺎﻟﺸﺒﺎﻙ ..

ﻭﻗﺎﻝ ﻟﻴﻬﻮ : ﻳﺎ ﺍﺳﺘﺎﺫ ﻋﺎﺩﻝ ﺍﺗﻜﻠﻤﻮ ﺑﺮﺍﺣﺔ .. ﺧﻔﻀﻮ ﺻﻮﺗﻜﻢ ﺍﻟﺠﻴﺮﺍﻥ ﺳﺎﻣﻌﻴﻦ ﻛﻼﻣﻜﻢ ﺩﻩ

ﺍﻟﻤﻬﻢ ﺍﻟﺒﺖ ﺯﻋﻠﺖ ﻭﻧﻔﻀﺖ ﻳﺪﻳﻬﺎ ﻛﺪﺍ .. ﻭﻓﺎﺗﺖ ..

ﻭﻋﺎﺩﻝ ﻭﻻﻫﻤﺎﻫﻮ .. ﻳﺼﻠﺢ ﻓﻲ ﺳﻤﻌﺎﺗﻮ .. ﻭﻻ ﻋﺎﻳﻦ ﻟﻴﻬﺎ .. ﻭﻫﻲ ﺷﻜﻠﻬﺎ ﺯﻋﻼﻧﺔ ﺯﻋﻞ ﻏﺮﻳﺐ

ﺍﻟﻤﻬﻢ ﺧﺪﺭ ﺑﺎﺷﺮ ﺍﻟﺸﻐﻞ ﻋﺎﺩﻱ ..

ﺑﻌﺪ ﺳﺒﻊ ﺩﻗﺎﻳﻖ ﻣﻦ ﺍﻟﺒﺖ ﺩﻱ ﻓﺎﺗﺖ .. ﺟﺎﺕ ﺭﻛﺸﺔ .. ﻧﺰﻟﺖ ﻣﻨﻬﺎ ﻣﺮﺍﺓ .. ﻓﻲ ﻋﻤﺮ ﺍﻟﺘﻼﺗﻴﻦ ﺗﻘﺮﻳﺒﺎ" .. ﻭﺍﻧﺴﺎﻧﺔ ﺟﻤﻴﻠﺔ ﻭﺍﻧﻴﻘﺔ ﻻﺑﺴﺔ ﺗﻮﺏ ﻭﻣﺘﺤﻨﻨﺔ .. ﻣﺎﺷﺔ ﺯﻱ ﺍﻟﻀﺎﺑﻂ ﻓﻲ ﻣﺮﺍﺳﻢ ﺍﻟﺴﻼﻡ ﺍﻟﺠﻤﻬﻮﺭﻱ

ﺟﺎﺕ ﻭﻗﻔﺖ ﻗﺪﺍﻡ ﻋﺎﺩﻝ ..

ﻭﻗﺎﻟﺖ ﻟﻴﻬﻮ ﺧﻠﻴﻚ ﻳﻮﻡ ﻭﺍﺣﺪ ﺻﺎﺩﻕ ﻣﻌﺎﻱ .. ﺍﻟﻜﺎﻥ ﻣﻌﺎﻙ ﻫﻨﺎ ﻣﻨﻮ؟ ﻭﻛﺎﻧﺖ ﺑﺘﻌﻤﻞ ﻓﻲ ﺷﻨﻮ؟

ﻭﺷﻨﻮ ﻳﻌﻨﻲ ﻳﻌﻨﻲ ﺑﺖ ﺗﺠﻴﻚ ﻓﻲ ﺑﻴﺖ ﻓﺎﺿﻲ ؟ ﺍﺗﻜﻠﻢ ﻳﺎﻋﺎﺩﻝ

ﻋﺎﺩﻝ ﺩﻩ ﺧﺎﻑ ﺧﻮﻑ .. ﻻﻣﻦ ﺑﻘﻰ ﻳﺒﻠﻊ ﻓﻲ ﺭﻳﻘﻮ ..

ﻗﺎﻝ ﻟﻴﻬﺎ : ﻳﺎﻣﺮﺍﺓ .. ﺍﻧﺘﻲ ﺍﻟﻠﻴﻠﺔ ﻣﺎﻃﺒﻴﻌﻴﺔ ﻭﻻﺷﻨﻮ؟ ﺑﺖ ﺷﻨﻮ؟ ﻣﺎﻓﻲ ﺑﺖ ﺟﺎﺕ ﻫﻨﺎ ﻧﻬﺎﺋﻲ

ﺍﻫﻮ ﺩﻳﻞ ﺍﻟﻌﻤﺎﻝ ﺍﺳﺄﻟﻴﻬﻢ ..

ﻗﺎﻟﺖ ﻟﻴﻬﻮ : ﻳﺎﻋﺎﺩﻝ ﺍﻟﺒﺖ ﺩﻱ ﺍﻧﺎ ﺑﻌﺮﻓﻬﺎ .. ﻭﻣﺘﺎﺑﻌﺎﻫﺎ ﻟﻲ ﺯﻣﻦ ﺍﻭﻋﻚ ﺗﻜﺬﺏ ﻋﻠﻲ .. ﺍﻧﺎ ﺧﻼﺹ ﺍﻟﻠﻴﻠﺔ ﺍﺧﺮ ﻟﻲ ﻳﻮﻡ ﻣﻌﺎﻙ .. ﺑﺲ ﺗﻨﺘﻬﻲ ﻣﻦ ﺍﻟﺸﻐﻞ ﻭﺗﻮﺩﻳﻨﻲ ﺑﻴﺘﻨﺎ .. ﻳﺠﻲ ﺍﺑﻮﻱ ﻳﺘﻔﺎﻫﻢ ﻣﻌﺎﻙ

ﻗﺎﻝ ﻟﻴﻬﺎ : ﻗﻠﺖ ﻟﻴﻚ ﻣﺎﻓﻲ ﺑﺖ ﺟﺎﺕ ﻫﻨﺎ .. ﻭﻛﻮﺭﻙ ﻟﻲ ﺧﺪﺭ ﺗﻌﺎﻝ ﻳﺎﺧﺪﺭ

ﺧﺪﺭ ﺟﺎ ﻃﺎﻟﻊ ..

ﺍﻟﻤﺮﺍﺓ ﻗﺎﻟﺖ ﻟﻲ ﺧﺪﺭ : اﺳﻤﻊ ﻳﺎ ﺍﻧﺖ .. ﻣﻊ ﺍﻧﻲ ﻋﺎﺭﻓﺔ ﺍﻧﻚ ﻣﺎﺣﺘﻘﻮﻝ ﺍﻟﺤﻘﻴﻘﺔ .. ﺷﻮﻓﺖ ﺍﻟﺒﺖ ﺍﻟﻜﺎﻧﺖ ﻫﻨﺎ ﺩﻱ ؟؟

ﻋﺎﺩﻝ ﻗﺎﻝ ﻟﻴﻬﻮ : ﻋﻠﻴﻚ ﺍﻟﻠﻪ ﻳﺎ ﺧﺪﺭ .. ﻓﻲ ﺑﺖ ﺟﺎﺕ ﻫﻨﺎ؟ ﺍﻟﻤﺮﺍﺓ ﺩﻱ ﺑﺘﻬﻠﻮﺱ ﺷﻜﻠﻬﺎ؟؟

ﺧﺪﺭ ﻗﺎﻝ ﻟﻴﻬﺎ : ﻭﺍﻟﻠﻪ ﺍﻟﺤﻘﻴﻘﺔ ﻳﺎﺑﺖ ﺍﻟﻌﻢ ... ﺍﻟﺰﻭﻝ ﺩﻩ ﻛﺬﺏ ﻋﻠﻴﻚ ﻭﺍﻟﻤﻔﺮﻭﺽ ﻳﻘﻮﻝ ﺍﻟﺤﻘﻴﻘﺔ .. ﻭﺍﻟﻴﺤﺼﻞ ﻳﺤﺼﻞ

ﺍﻱ ﺻﺢ ﺟﺎﺕ ﺑﺖ ﻫﻨﺎ .. ﻭﻭﻗﻔﺖ ﻫﻨﺎ ﺑﺮﺓ .. ﻭﻧﺤﻦ ﻛﻨﺎ ﺷﻐﺎﻟﻴﻦ ﺟﻮﺓ ﻓﻲ ﺍﻻﻭﺿﺔ ﺩﻱ ..

ﻭﻗﺎﻟﺖ ﻟﻴﻬﻮ : ﺍﻧﺖ ﺷﻜﻠﻚ ﺑﺘﻐﺶ ﻋﻠﻰ ﻭﺑﺘﻜﺬﺏ ﻭﻣﺎﺻﺎﺩﻕ ﻣﻌﺎﻱ ﻧﻬﺎﺋﻲ ..

ﻗﺎﻝ ﻟﻴﻬﺎ : ﺍﻧﺎ ﺑﻌﺪ ﻗﺒﻀﺖ ﺍﻟﺮﺳﺎﻳﻞ ﻓﻲ ﺗﻠﻔﻮﻧﻚ ..

ﺗﺎﻧﻲ ﻟﻮ ﺑﻘﻴﺘﻲ ﻗﺒﻠﺔ ﻣﺎﺑﺼﻠﻲ ﻋﻠﻴﻚ .. ﺍﻧﺘﻲ ﺍﻧﺴﺎﻧﺔ ﻣﺎعندك ﺫﺭﺓ ﻭﻓﺎﺀ .. ﻭﺑﺪﻭ ﻳﺘﻨﺎﻗﺸﻮ ﻣﻨﻔﻌﻠﻴﻦ ﻭﺍﻟﺼﻮﺕ ﻛﺎﻥ ﻋﺎﻟﻲ .. ﻭﻧﺤﻦ ﺟﻮﺓ ﻧﺴﻤﻊ ﺣﺘﻲ ﺍﻧﺎ ﻣﺪﻳﺖ ﺭﺍﺳﻲ ﺑﺎﻟﺸﺒﺎﻙ .. ﻭﻗﻠﺖ ﻟﻴﻬﻮ ﻳﺎ ﺍﺳﺘﺎﺫ ﻋﺎﺩﻝ ﺍﺗﻜﻠﻤﻮ ﺑﺮﺍﺣﺔ .. ﺍﻟﻤﻬﻢ ﺍﻟﺒﺖ ﻓﺎﺗﺖ ﺯﻋﻼﻧﺔ .. ﻭﺷﻜﻠﻬﺎ ﺍﻟﺒﻴﻨﺎﺗﻬﻢ ﺧﺮﺑﺖ

ﺩﻩ ﺍﻟﺤﺼﻞ ﺑﺎﻟﺘﻔﺼﻴﻞ

ﺍﻟﻤﺮﺍﺓ ﺧﻠﺖ ﺭﺍﺟﻠﻬﺎ .. ﻭﺑﻘﺖ ﺗﻌﺎﻳﻦ ﻟﻲ ﺧﺪﺭ ﻣﺴﺘﻐﺮﺑﺔ ..

ﻭﻗﺎﻟﺖ ﻟﻴﻬﻮ : ﺍﻧﺖ ﻟﻴﻪ ﻛﺸﻔﺖ ﻟﻲ ﺍﻟﻤﻮﺿﻮﻉ ﺩﻩ ﻳﻌﻨﻲ؟؟ ﺳﺒﺤﺎﻥ ﺍﻟﻠﻪ !! ﺍﻧﺖ ﻣﺎﺧﺎﻳﻒ ﺍﻧﻮ ﺍﻟﺮﺍﺟﻞ ﺍﻟﻈﺎﻟﻢ ﺩﻩ ﻳﻄﺮﺩﻙ ﻣﻦ ﺍﻟﺸﻐﻞ ؟؟

ﺧﺪﺭ ﻗﺎﻝ ﻟﻴﻬﺎ : ﻳﻄﺮﺩﻧﻲ ﻳﻄﺮﺩﻧﻲ .. ﻣﺎﺑﻜﻀﺐ ﻭﺍﻻﺭﺯﺍﻕ ﺑﻴﺪ ﺍﻟﻠﻪ ﻣﺎﺑﻜﻀﺐ ﻟﻮ ﻛﺘﻠﻨﻲ .. ﺧﻠﻲ ﻳﻄﺮﺩﻧﻲ

ﺍﻟﻤﺮﺍﺓ ﻗﺒﻠﺖ ﻋﻠﻰ ﺭﺍﺟﻠﻬﺎ ..

ﻗﺎﻟﺖ ﻟﻴﻬﻮ : ﻳﻌﻨﻲ ﻓﻴﻬﺎ ﺷﻨﻮ ﻟﻮ ﺑﻘﻴﺖ ﺷﺠﺎﻉ ﻭﻗﻠﺖ ﻟﻲ ﺍﻟﺤﻘﻴﻘﺔ ﺯﻱ ﺍﻟﻌﺎﻣﻞ ﺩﻩ ..

ﻋﻠﻰ ﺍﻻﻗﻞ ﻛﺎﻥ ﺍﻧﺎ ﻃﻠﻌﺖ ﺍﻟﺸﻚ ﺍﻟﻔﻲ ﻗﻠﺒﻲ .. ﻭﺍﻧﺎ ﻛﻨﺖ ﺍﺣﺘﺮﻣﺘﻚ .. ﺍﻧﺎ ﻫﺴﻲ ﻛﻨﺖ ﻣﻔﻜﺮﺓ ﺍﻧﻚ ﻋﻤﻠﺖ ﺍﻛﺒﺮ ﻣﻦ ﻛﺪﺍ ﻭﻛﺪﺍ ﺍﻃﻤﺄﻧﻴﺖ ﻭﻋﺮﻓﺖ ﺍﻟﺤﻘﻴﻘﺔ .. ﻟﻜﻦ ﻧﻜﺮﺍﻧﻚ ﻭﻛﺬﺑﻚ .. ﻛﺎﻥ ﺣﻴﺨﻠﻲ ﺍﻟﺸﻚ ﻓﻲ ﻗﻠﺒﻲ ﻟﻴﻞ ﻭﻧﻬﺎﺭ

ﺍﺗﻌﻠﻢ ﻣﺮﺓ ﻓﻲ ﺣﻴﺎﺗﻚ ﺗﻜﻮﻥ ﺻﺎﺩﻕ ﻭﺷﺠﺎﻉ .. ﻭﻓﺎﺗﺖ ﻃﻮﺍﻟﻲ ﺍﺧﺪﺕ ﻟﻴﻬﺎ ﺧﻄﻮﺍﺕ ﻭﺟﺎﺗﻮ ﺭﺍﺟﻌﺔ ..

ﻗﺎﻟﺖ ﻟﻴﻬﻮ : ﺍﻟﺰﻭﻝ ﺩﻩ ﻟﻮ ﻃﺮﺩﺗﻮ ﻣﻦ ﺍﻟﺸﻐﻞ ﺑﺘﻜﻮﻥ ﻏﻠﻄﺖ ﻣﻌﺎﻱ ﺍﻧﺎ

ﺧﺪﺭ ﻃﺒﻌﺎ " ﺧﻼﺹ ﺍﺳﺘﻌﺪ ﻟﻲ ﺍﻧﻮ ﻳﻨﻬﻲ ﺍﻟﺸﻐﻞ .. ﻻﻧﻮ ﺿﻤﺎﻥ ﺿﻤﺎﻥ ﻳﻨﻄﺮﺩ ﺍﻟﻠﻴﻠﺔ .. ﻻﻧﻮ ﺧﻼ ﺍﻟﺮﺍﺟﻞ ﻗﺪﺍﻡ ﻣﺮﺗﻮ ﺍﻗﻞ ﻣﻦ ﺳﻤﺴﻤﺔ

ﻟﻜﻦ ﺣﺼﻞ ﺍﻟﻌﻜﺲ .. ﻋﺎﺩﻝ ﺟﺎﻫﻮ ﺟﻮﺓ

ﻗﺎﻝ ﻟﻴﻬﻮ : ﻭﺍﻟﻠﻪ ﻳﺎﺧﺪﺭ ﻣﻊ ﺍﻧﻚ ﺯﻭﻝ ﻣﺎﺑﺘﺤﺴﺐ ﻟﻠﻌﻮﺍﻗﺐ .. ﻟﻜﻦ ﻣﺮﻗﺘﻨﻲ ﻣﻦ ﻭﺭﻃﺔ

ﺍﻧﺎ ﺑﺸﻜﺮﻙ ﻣﻦ ﺟﻮﺓ ﻗﻠﺒﻲ ﻭﺍﻟﻠﻪ .. ﻃﺒﻌﺎ" ﺍﻟﻤﺮﺍﺓ ﺩﻱ ﻣﺮﺍﺗﻲ ﻭﺑﺖ ﻋﻤﻲ ﻭﻋﻤﻲ ﺍﻟﺮﺑﺎﻧﻲ .. ﻭﺧﻴﺮﻱ ﻛﻠﻮ ﻣﻦ ﻳﺪﻭ .. ﻭﺑﺨﺎﻑ ﻣﻦ ﺯﻋﻠﻬﺎ ﺟﺪﺍ"ﺟﺪﺍ".. ﻭﻟﻮ ﻋﻤﻲ ﺳﻤﻊ ﺑﺤﺎﺟﺔ ﺯﻱ ﺩﻱ ﺑﻐﻄﺲ ﺣﺠﺮﻱ

ﺧﺪﺭ ﻗﺎﻝ ﻟﻴﻬﻮ : ﻳﺎﻋﺎﺩﻝ .. ﻭﺍﻟﻠﻪ ﻣﺮﺗﻚ ﺩﻱ ﻣﺮﺍﺓ ﻇﺎﻫﺮ ﻋﻠﻴﻬﺎ ﺑﺖ ﺭﺟﺎﻝ .. ﻳﺎﺧﻲ ﻣﺎﺗﺨﻮﻧﻬﺎ ﻭﻻﺗﻜﺬﺏ ﻋﻠﻴﻬﺎ ..

ﻗﺎﻝ ﻟﻴﻬﻮ : ﺧﻼﺹ ﺍﺷﺘﻐﻞ ﺍﺷﺘﻐﻞ .. ﻭﺍﻟﻠﻪ ﺍﻧﺎ ﺣﻴﻠﻲ ﻛﻠﻮ ﻣﻴﺖ ﻣﻦ ﺍﻟﺨﻮﻓﺔ

ﺧﺪﺭ ﻗﺎﻝ ﻟﻴﻬﻮ : ﺍﺳﻤﻊ ﻳﺎ ﻣﺪﻳﺮ .. ﺍﻟﺼﺢ ﻛﺎﻥ ﻣﺎﻣﺮﻗﻚ ﺍﻟﻜﻀﺐ ﻣﺎﺑﻤﺮﻗﻚ

ﺍﺭﺡ ﺍﺭﺡ ﻳﺎﺟﻤﺎﻋﺔ ﺍﻟﺸﻐﻞ .. ﻭﺍﺳﺘﻤﺮ ﻓﻲ ﺷﻐﻠﻮ .. ﻭﻣﺎﺣﺼﻞ ﻟﻴﻬﻮ ﺍﻱ ﺷﻲ .. ﻭﺣﺲ ﺍﻧﻮ ﺳﻌﻴﺪ ﻣﻦ ﺟﻮﺓ .. ﻭﺍﺗﻜﻴﻒ ﻣﻦ ﺭﻭﺣﻮ ﻭﺍﺯﺩﺍﺕ ﺛﻘﺘﻮ ﻓﻲ ﻧﻔﺴﻮ .. ﻭﺑﻘﻰ ﻳﺘﺒﺴﻢ ﺑﺮﺍﻫﻮ

ﻭﻳﻘﻮﻝ : ﺍﻛﻀﺐ ؟؟ ﻭﺍﻟﻠﻪ ﻣﺎ ﺍﻛﻀﺐ .. ﺍﻧﺎ ﺧﺎﻳﻒ ﻣﻦ ﺷﻨﻮ ﻋﺸﺎﻥ ﺍﻛﻀﺐ .. ﺍﻻﻗﺪﺍﺭ ﺑﻴﺪ ﺍﻟﻠﻪ .. ﻭﺍﻻﺭﺯﺍﻕ ﺑﻴﺪ ﺍﻟﻠﻪ .. ﺍﻧﺎ ﻛﺎﻥ ﻛﻀﺒﺖ ﺍﻭﻝ ﺣﺎﺟﺔ ﺑﺤﺘﻘﺮ ﻧﻔﺴﻲ .. ﻭﺑﺸﻮﻑ ﻧﻔﺴﻲ ﺍﻧﺎ ﺍﻟﺠﺒﺎﻥ .. ﻭﺍﻧﺎ ﺍﻟﻀﻌﻴﻒ .. ‏( ﻟﻠﻪ ﺩﺭﻙ ﺍﻳﻬﺎ ﺍﻟﺨﻀﺮ ‏) !!

ﻃﺒﻌﺎ" ﻫﻨﺪﻭﻳﺔ ﻣﺸﺖ ﻟﻠﺒﻴﺖ .. ﻭﻫﻨﺎﻙ ﻭﺯﺍﺭﺓ ﺍﻟﺪﺍﺧﻠﻴﻪ ﻟﻴﻬﺎ ﺍﻟﺴﻄﻮﺓ ﻭﺍﻟﺠﺒﺮﻭﺕ

ﻗﺎﻟﺖ ﻟﻲ : ﺍﻣﻬﺎ ﻳﺎ ﺍﻣﻲ ﺍﻧﺎ ﺑﻌﺪﻳﻦ ﻋﺎﻳﺰﻩ ﺍﺗﻜﻠﻢ ﻣﻌﺎﻙ ..

ﻗﺎﻟﺖ ﻟﻴﻬﺎ : ﻛﻼﻡ ﺷﻨﻮ .. ﺍﻧﺎ ﻋﺎﺭﻓﺔ ﻛﻼﻣﻚ ﺍﻟﻤﻜﺤﻠﺔ ﻣﺎﻳﻤﻼﻫﺎ ﺳﻤﺢ

ﺍﻟﻤﻬﻢ ﺑﻌﺪ ﺍﻟﻤﻐﺮﺏ ﻛﺪﻱ .. ﻧﺎﺩﺕ ﺍﻣﻬﺎ ﻓﻲ ﺍﻻﻭﺿﺔ ﺑﺮﺍﻫﺎ .. ﻋﺸﺎﻥ ﺗﻘﺪﺭ ﺗﻘﻨﻌﻬﺎ ﺑﺎﻟﺰﻭﻝ ﺍﻟﺒﺘﺤﺒﻮ

ﻗﺎﻟﺖ ﻟﻴﻬﺎ : ﻳﺎ ﺍﻣﻲ ﻭﺍﻟﻠﻪ ﺧﺪﺭ ﺩﻩ ﺍﻛﺘﺮ ﺯﻭﻝ ﺟﺎﺩﻱ .. ﻭﻣﺎﻋﻨﺪﻭ ﻣﺎﻧﻊ ﻳﺠﻴﻨﺎ ﻓﻲ ﻟﺤﻈﺔ .. ﺑﺲ ﺍﻟﻈﺮﻭﻑ ﻭﺍﻗﻔﺔ ﻗﺪﺍﻣﻮ ..

اﻣﻬﺎ ﻗﺎﻟﺖ ﻟﻴﻬﺎ : ﺍﻟﻜﻼﻡ ﺩﻩ ﻛﻞ ﻣﺮﺓ ﺑﺘﻘﻮﻟﻴﻬﻮ ﻭﻳﻄﻠﻊ ﺯﻱ ﺭﻓﺎﻗﺘﻮ ﺍﻧﺘﻲ ﺍﻱ ﺯﻭﻝ ﻳﺘﻘﺪﻡ ﻟﻴﻚ ﻳﻄﻴﺮ .. ﺗﺎﻧﻲ ﻣﺎﻳﺠﻲ ﺭﺍﺟﻊ .. ﺷﻜﻠﻚ ﻋﻨﺪﻙ ﻋﺎﺭﺽ ﺍﻻ ﻧﺸﻮﻑ ﻟﻴﻚ ﺷﻴﺦ

ﻗﺎﻟﺖ ﻟﻴﻬﺎ : ﻳﺎ ﺍﻣﻲ ﻭﺍﻟﻠﻪ ﺍﻧﺎ ﻋﺎﺭﺿﻲ ﻣﻌﺮﻭﻑ .. ﻋﺎﺩﺍﺗﻜﻢ ﻭﺗﻘﺎﻟﻴﺪﻛﻢ ﻭﺍﻟﻤﺒﺎﻫﺎﻩ ﻭﺍﻟﻤﺒﺎﻟﻐﺔ .. ﻳﺎﺧﻮﺍﻧﺎ ﺍﻟﻌﺮﺱ ﺩﻩ ﻣﻮﺵ ﻋﻘﺪ ﻭﻛﺮﺍﻣﺔ ﻭﺧﻼﺹ؟؟ ﻳﻌﻨﻲ ﻓﻲ ﺩﺍﻋﻲ ﺍﻟﻨﺎﺱ ﺗﺼﺮﻑ ﻓﻲ ﺍﻟﺰﻭﺍﺝ ﻣﻴﺘﻴﻦ ﻭﺗﻠﺘﻤﻴﺔ ﻣﻠﻴﻮﻥ

ﻫﺴﻲ ﻓﺪﻭﻯ ﺑﺖ ﺧﺎﻟﺘﻲ ﺩﻱ .. ﻋﻠﻴﻚ ﺍﻟﻠﻪ ﻋﺮﺳﻬﺎ ﺩﻩ ﺑﻜﻮﻧﻮ ﺧﺴﺮﻭ ﻓﻴﻬﻮ ﻛﻢ ؟

ﻗﺎﻟﺖ ﻟﻴﻬﺎ : ﻣﺎﻟﻮ ﻳﺎ ﻳﻤﻪ .. ﺻﻼﺓ ﺍﻟﻨﺒﻲ .. ﻋﺮﺱ ﺍﻟﻬﻨﺎ ﻭﺍﻟﻤﻨﻰ ﺍﺭﻳﺘﻮ ﻳﺎﻳﻤﺔ ﺣﺎﻝ ﺑﻨﻴﺎﺗﻲ

ﻗﺎﻟﺖ ﻟﻴﻬﺎ : ﺍﻟﻤﻬﻢ ﻳﺎ ﺍﻣﻲ .. ﺍﻧﺎ ﻣﺎﻋﺎﻳﺰﺓ ﺷﻴﻠﺔ .. ﺍﻧﺎ ﻣﺎﻋﺎﻳﺰﺓ ﺻﺎﻟﺔ .. ﺍﻧﺎ ﻣﺎﻋﺎﻳﺰﺓ ﺍﻱ ﺑﺰﺥ ﻭﻣﺒﺎﻟﻐﺎﺕ .. ﺍﻧﺎ ﻋﺎﻳﺰﺓ ﻋﻘﺪ ﻭﻛﺮﺍﻣﺔ ﻭﺑﺲ .. ﺣﺘﻰ ﻟﻮ ﻓﻲ ﺷﻲ ﻋﻠﻰ ﺣﺴﺐ ﻗﺪﺭﺓ ﺍﻟﺰﻭﻝ .. ﻣﺎﻓﻲ ﺩﺍﻋﻲ ﻧﺤﻦ ﻧﻤﺤﻖ ﺍﻟﺒﺮﻛﻪ .. ﺍﻧﺎ ﻣﺎﻋﺎﻳﺰﺍﻙ ﺗﻘﻴﻔﻲ ﻟﻲ ﻓﻲ ﺍﻟﻤﻮﺿﻮﻉ ﺩﻩ .. ﺩﻱ ﺣﻴﺎﺗﻲ .. ﻭﺍﻧﺎ ﻋﺎﻳﺰﺓ ﻛﺪﺍ

ﻗﺎﻟﺖ ﻟﻴﻬﺎ : ﻳﺎﺑﺖ ﺍﻟﻠﻬﻴﻪ ﺍﻟﺘﻠﻮﻱ ﺧﺸﻤﻚ .. ﺩﺍﻳﺮﺓ ﺗﺴﻮﻳﻨﻲ ﺿﺤﻜﺔ ﻗﺪﺍﻡ ﺍﻟﺤﺮﻳﻢ .. ﻫﺴﻲ ﻭﺭﻳﻨﻲ ﻣﻨﻮ ﻫﻲ ﺍﻟﺒﺖ ﻓﻲ ﺍﻟﺰﻣﻦ ﺩﻩ ﺍﻟﺒﺘﺮﺿﻰ ﺑﻲ ﻛﻼﻣﻚ ﺩﻩ .. ﺍﻧﺘﻲ ﺧﺪﺭ ﺍﻟﺒﺘﻘﻮﻟﻴﻬﻮ ﺩﻩ .. ﻣﻮﺵ ﻗﻠﺘﻲ ﻟﻲ ﺷﻐﺎﻝ ﻣﻘﺎﻭﻝ ؟؟ ﺻﺎﺡ ﻭﻻ ﺍﻧﺎ ﻏﻠﻄﺎﻧﻪ ؟

ﻗﺎﻟﺖ ﻟﻴﻬﺎ : ﺍﻳﻮﺓ ﻣﻘﺎﻭﻝ ﻭﺷﻐﻠﻮ ﺑﺎﻟﻤﻼﻳﻴﻦ .. ﺑﺲ ﺍﻟﻴﻮﻣﻴﻦ ﺩﻳﻞ ﺷﻐﻞ ﻣﺎﻓﻲ .. ﻭﻇﺮﻭﻓﻮ ﺻﻌﺒﺔ .. ﻟﻜﻦ ﺍﻥ ﺷﺎﺀ ﺍﻟﻠﻪ ﺑﻌﺪ ﻧﻌﺮﺱ ﻛﻞ ﺍﻻﻣﻮﺭ ﺗﻤﺸﻲ ﺗﻤﺎﻡ

ﻗﺎﻟﺖ ﻟﻴﻬﺎ : ﺍﺳﻤﻌﻲ ﻳﺎﻋﺪﻳﻤﺔ ﺍﻟﻔﻬﻢ .. ﺍﻟﻌﺮﺱ ﺩﻩ ﻳﺎﻫﻮ ﺍﻟﺒﻮﺭﻱ ﺍﻟﻨﺎﺱ ﺣﻴﺎﺗﻚ ﻭﻣﺴﺘﻘﺒﻠﻚ .. ﺍﻥ ﺑﻘﻰ ﻋﺮﺱ ﻣﺠﻴﻪ .. ﻣﻌﻨﺎﻫﺎ ﺍﻧﺘﻲ ﺑﺘﺘﻤﺘﻌﻲ ﻭﺗﺘﺮﺗﻌﻲ .. ﻭﺍﻥ ﺑﻘﻰ ﻋﺮﺳﺎ" ﻣﺒﺸﺘﻦ ﻭﻣﺨﻮﺯﻕ ﺍﻟﻨﺎﺱ ﻛﻠﻬﻢ ﺑﻌﺮﻓﻮﻭﻙ ﺍﻧﻚ ﺧﻼﺹ ﺑﺘﻌﻴﺸﻲ ﻋﻄﺸﺎﻧﺔ ﻭﺟﻴﻌﺎﻧﺔ ﻭﻣﻘﻄﻌﺔ

ﻗﻮﻟﻲ ﻟﻲ ﺯﻭﻟﻚ ﺩﻩ .. ﺍﺟﻬﺰ ﺗﺐ ﻭﺗﻌﺎﻝ ﻟﻴﻨﺎ ..

ﻗﺎﻟﺖ ﻟﻴﻬﺎ : ﻃﻴﺐ ﻳﺎ ﺍﻣﻲ ﺳﺆﺍﻝ .. ﺍﻧﺘﻲ ﻗﻮﻟﺔ ﺧﻴﺮ ﺩﻱ ﺑﺪﻓﻌﻮ ﻓﻴﻬﺎ ﻛﻢ ؟

ﻗﺎﻟﺖ ﻟﻴﻬﺎ : ﻛﺎﻥ ﻋﺸﺮﺓ ﻛﺎﻥ ﻋﺸﺮﻳﻦ ﻋﻠﻰ ﺣﺴﺐ ﺍﻟﻮﺿﻊ؟

ﻓﻲ ﻧﺎﺱ ﺑﺪﻓﻌﻮ ﻋﺸﺮﻳﻦ .. ﻭﺍﻟﻤﻘﻄﻌﻴﻦ ﺑﺪﻓﻌﻮ ﺧﻤﺴﺔ ﺑﺲ

ﺍﻟﺒﺖ ﺑﻲ ﻗﻠﺒﻬﺎ ﻗﺎﻝ ﻭﺣﺤﺢ ﻭﻗﺎﻟﺖ ﻓﻲ ﺳﺮﻫﺎ .. ﺍﻭﻭﻭﻭﺏ ﻋﻠﻲ ﺍﻧﺎ ﻣﻦ ﺍﻟﻤﻼﻳﻴﻦ ﺩﻱ .. ﻣﻦ ﻫﺴﻲ ﺑﺪﺕ؟؟ ﺧﺪﺭ ﻳﺠﻴﺒﻬﺎ ﻟﻴﻬﻢ ﻣﻦ ﻭﻳﻦ ﺍﻟﻤﺴﻜﻴﻦ ؟؟

يتبع....

#الأصابع_الشريفة
بقلم: طارق اللبيب

الجزء 03

هند قالت احتارت في كلام امها وقعدت تتكلم بي دواخلها قالت انا ماعندي حل غير اتكلم مع ابوي.. لكن ابوي ذاتو ما فاضي لي.. الم فيهو كيف ..انتظر ابوي ان شاء الله الليلة بس يجي بدري .. اتلفتت على امها قالت ليها انا ح اتكلم مع ابوي ..

امها قالت ليها ابوك الدخلو في امور الحريم شنو؟ .. وتتكلمي تقولي ليهوشنو وريني ..

قالت انا بعرف يا امي اقول ليهو شنو ..قالت ليها مخيرة يهو داك ابوك كلميهو .. قولي ليهو انا في زول داير يعرسني بالفاتحة .. ويسوقني بالمجان شوفيهو بوافق؟

اها الابو وقت جاء.. البت ارتبكت .. وماعرفت تكلم ابوها كيف وتقول ليهو شنو؟ ومافي زول من ناس البيت ممكن يساعدها.. اخوانها اتنين اكبر منها .. واحد اصغر .. وفي بتين صغار .. يعني حتى مافي اخت قريبة ليها في العمر .. عشان تقعد تنفس معاها ..

في النهاية قوت قلبها.. وجات لابوها في غرفتو.. لقتو قاعد لقتو عندو دفاتر قديمة بقلب فيها ..

قالت ليهو ابوي انا عايزة اتكلم معاك .. قال ليها مرحب ياهند .. اتفضلي .. قعدت في الكرسي كدا.. وابوها مازال مشغول بي دفاترو

وهي قاعدة منصرة ومتكرفسه وتفرك في يديها وشكلها متوترة شديد ..

وهو خاتي دفتر في السرير .. ودفتر شايلو في يدو.. وقلم وبعاين في الدفتر الفي السرير وبكتب .. شكلو بنقل ليهو في حاجة من هنا لي هنا ..

قالت ليها ياهند ما بتتكلمي مالك؟.. قالت ليهو شايفاك مشغول .. قال ليها انا سامعك بي اضني ..

قالت ليهو كويس يا ابوي .. انا في زول اتكلم معاي وعايز يجي البيت .. قال ليها خدر ولا منو؟.. امك حكت لي .. اها المشكلة وين؟ مرحب بيهو في اي لحظة .. قالت ليهو والله يا ابوي الزول ده زول ممتاز وانا عرفتو كويس .. المشكلة يا ابوي الزول ده اليومين دي ظروفو شوية كدا ما تمام ..

وهو بس جاي يتقدم .. ونتم الموضوع لي قدام .. ان شاء الله

قال ليها وهو وكت ظروفو ماتمام المستعجل ليها شنو؟.. قالت ليهو بس نحن عايزين الكلام يكون رسمي.. ويكون كلام رجال ابوها خت الدفتر .. وخت فوقو القلم وعاين ليها كدا وشكلو بقى مركز ..قال ليها والله يابتي كلامك صح .. طيب خلاص خليهو يجي في اي لحظه .. مرحب بيهو .. قالت ليهو المشكلة امي مطالبة بي حق قولة خير والحاجات الماليها داعي دي .. قال ليها قولة خير دي اصلا .. لامفروضة في دين ولافي اعراف وناس امك ديل ياهم الناس البزيدو الطين بله .. وماعارف الزول يعمل معاها شنو؟.. بس دايرة تنفذ الفي راسها لو غلط ولا صاح .. انا بقول ليك ما تشتغلي بيها .

لاقولة خير ولا غيرو .. خليهو يجي في اي لحظة حبابو .. وما طالبين منو قرش لاتعريفة .. الا الحقوق الاساسية المعروفة مهرك وشيلتك وغيرها ..

بس لي علمك انا ابوك .. والابو ماعليهو اي مصاريف في زواج بتو .. يعني زوجك هو البقوم بي كل شي .. لانو هو البياخد قروش الكشف .. نحن في زواج البت ماعندنا دفتر .. فهمتي ؟

قالت ليهو طبعا" طبعا يا ابوي .. اها هنا في اللحظة دي جات امها داخلة .. قالت ليهو البت اللذيذة قالت ليك شنو؟

قال ليها كلام بيني وبينها .. قالت ليهو اسمع ياسيف الزولة دي دايرة تجيب لينا زول مقطع.. وماعندو حق العشاء .. عشان يعرسها التقول بالله هي بايرة .. ولا فوقها عيبه .. يعني هسي يا سيف زول ماقدر يدفع قولة خير.. كيف يعني يفكر ليهو في بت ناس عشان يعرسها .. والله انا الم فيهو اكان اوريهو الكلام المابعرف ليهو ..

قال ليها ح يجي.. ويجيب اهلو.. وبدون قولة خير ولاغيرها ..

قالت ليهو اصلا قولة خير دي مصاريف الضيافة البنضيفهم بيها .. تدفعها ليهم انت ليه يعني ؟

قال ليها والله انا ذاتي نفسي مابتسمح لي اشيل قروش من ضيفي عشان اضيفو بيها .. ياناس ماتخافو من ربنا .. ده شنو العوارة دي ؟

طبعا" هند حست بانو ابوها واقف معاها.. واطمأنت جدا .. لكن ماعارفة انو وزارة الداخلية ممكن تطوع القصر الرئاسي .

في النهاية امها قالت ليهو انتو يعني بتعاندو فيني ولاشنوياسيف ؟ انتو عارفين انا ممكن اعمل شنو .. واطفش الزول ده من افكاركم .

سيف الدين ابو هند.. راجل حكيم ومتعلم.. لكن زيو زي 90 في المية من الرجال .. بخافو من المراة .. ومابقدرو يمشو رايهم عليها .. ودي الحاجة المخليه العادات والتقاليد المضرة مسيطرة علي الوضع .. بسبب جهل النساء وضعف الرجال .. وعجز الابناء والبنات .. اللهم لطفك ..

اها بعد الام طلعت زعلانة تهرج .. سيف الدين قبل على بتو قال ليها شفتي امك زعلانة .. واي موضوع زي ده يكون فيهو غضب الوالدين ربنا ماببارك فيهو .. خليها تعمل الفي راسها .. ويكون كل شي برضاها.. انتي مابتفهمي الامور اكتر منها .. قالت ليهو لكن يا ابوي ...... ...........

ماخلاها تمت كلامها قال ليها اسمعيني.. هم الناس ديل جاين يطلبو؟

قالت ليهو ايوة .. قال ليها خليهم يجو ويتوكلو على الله .. انا بديهم واليحصل يحصل .. بس اليحددو لينا المواعيد ..

قالت ليهو بس انا خايفة من امي تعمل لي مشكلة.. والله ماعندها مانع تذ

لهم وتطردهم ..

قال ليها طيب والحل؟ .. انا في يدي شنو اعملو ليك.. ؟ قولي لي وانا جاهز .. قالت ليهو والله يا ابوي انت ماقصرت .. مافي مشكلة الفيها خير ربنا يسويها .. خير يا ابوي انا ماشة اجهز العشاء ..

وطلعت وراسها جايط وماعارفة تعمل شنو .. دخلت تعمل في العشاء .. وجواها الاصوات تتزاحم والافكار .. طيب .. بس خدر لو لقا ليهو ستة مليون وجابهن سكت بيهن امي دي .. انا على الاقل بعيش مطمئنة اني .. بقيت على بر من الجهجهة دي .. والله العنوسة دي شبح واقف لي كدا قدر الفيل .. ومخوفني خوف شديد خلاص .. لكن انا اعمل شنو؟ ومخها يودي ويجيب والهم كايل راسها وما مركزة لي اخر دقيقة كانت عايزة تكب الملح في اللبن .. لكن انتبهت في اخر ثانية ..

طبعا اخونا خدر اشتغل اليوم داك لاقريب المغرب .. وهو راجع البيت .. في الشارع جاهو تلفون من واحدة اسمها نسرين .. قالت ليهو وين انت يافره .. منتظرينك بعد المغرب في الحدايق.. ولو ماجيت .. بتكون بايخة ومسيخة .. عليك الله عشان خاطري انا تجي ..

قال ليها عشان خاطرك اشرب البحر المالح .. جدا بس اصل البيت.. واستحم واغير هدومي.. وطوالي عليكم ..

نسرين دي واحدة من خمسة .. كلهن عندهم علاقة بي الود المصيبة الاسمو خدر ده .. بس الوحيدة الجادي معاها ومديها وعود اللهي هندويه.. كل مرة يعاين للتلفون منتظر تلفون منها وماداير يدق ليها هو .. المهم وصل البيت واول ما وصل لي امو .. قال ليها ابشري الليلة لقيت شغل كويس .. واحتمال يجيب لي قريشات .. قالت ليهو والفايدة شنو.. تاني شهر مابجيك شغل .. وبتقعد تصرف فيهن لامن يكملن والدايرة تدور .. قال ليها لالا المرة دي بسلمك ليهن على داير المليم ومابشيل منهن قرش ..

قالت ليهو نشوف . قال ليها انا طالع عندي اصحابي في الحدايق دقو لي تلفون ماشي ليهم ..

قالت ليهو ياخدر انت شغال من صباح الرحمن.. ياولدي ما تطرح ضهرك عشان تقوم على شغلك بدري .. قال ليها الحمد لله في عافية ياحجة .

لبس طلع مشى الحدايق .. ولقى اتنين من اصحابو ومعاهم نسرين ووسام .. وسام دي مثبتها علاء . ونسرين دي منتظراهو وعمار جاي بدون رفيقه ..

انا شخصيا ماعارف البنات ديل بطلعو من اهليهم بالليل كيف؟.. بي علم ابواتهم ولا لا؟ .. وين اولياء امورهم ؟ وين المسؤولين عنهم؟ .. وين اخوانهم .. كيف الراجل برقد مرتاح في البيت.. وبتو فتاة حايمة في الحدايق وشارع النيل .. مع ناس علاء وخدر وغيرو .. لانصاص الليالي ..

وين كلكم را وكلكم مسؤل عن رعيته ؟ ربنا يسترنا ويحفظ بناتنا واخواتنا من الزيغ والضلال .. ويقدرنا على تحمل المسؤولية ..

نرجع للقصة .. خدر طوالي سأل عمار قال ليهو اها يا اخونا معالي وينها ماجات ؟ قال ليهو والله امها عيانة ..

قال ليهو والله طلعتو ناس ماعندكم اي عشرة.. البت امها عيانة وانتو جاين تشربو قهوة؟ ....

خدر بتكلم ونسرين بتعاين ليهو في وشو .. هو ملاحظ ليها .. لكن ماشغال بيها .. بعد شوية قالت ياجماعة انا ماشة اجيب رصيد .. يلا معاي يا خدر .. قال ليها جدا لبس شبشبو وقام معاها ..

هم ماشين .. قالت ليهو ممكن اسالك سؤال يا خدر؟؟ ..انا شنو بالنسبة ليك؟ .. قال ليها انتي صديقه وفيه وفردة صاقعة وبت حربية ..

قالت ليهو يعني بتحبني ؟

قال ليها ايوة بحبك جدا والله .. لكن بحبك كصديقة .. عمري مافكرت فيك غير كدا .. قالت ليهو انا ماشايفة صداقة بين البت والولد .. يا اما علاقة حب هدفو زواج يا اما مافي علاقة .. لانو المجتمع بسميها علاقة مشبوهة ..

قال ليها انا عايز اقول ليك كلام ياننو .. الحب ده شي في القلب .. ومافي زول بقدر يتحكم فيهو .. والزواج ده قسمة برضو مافي يدنا .. يعني حكاية انك تربطي الحب بالزواج .. دي زي العايزة تتصرفي في حاجة انتي مابتملكيها .. يعني حتى لو حبيتي زول .. ماحتقولي اناقررت احب فلان .. لانو الحب بهجم على القلب بدون مفاهمة ولاقرار .. ثم ثانيا لو الحب اتهجم على قلبك وملكك .. مابتقدري تجزمي انك ح تتزوجي الزول الحبيتيهو.. لانو الزواج برضو قدر ومافي يدنا وفي كتير محبين ماتو من دون مايلقو حبايبهم .. لو الحب نتيجتو الحتمية الزواج ده ماكان الحال ..

قالت ليهو دقيقة ماتتفلسف لي ي خوي .. انا من زمان حاسة بانك بتحبني وماشاكه في الموضوع ده .. بس منتظراك تفتح خشمك تقول دايرني .. هسي يا خدر.. انت بتحبني ودايرني.. تجي بيتنا ..

عندك اي راي غير كدا ..ده اخر يوم نتلاقى فيهو ..وتاني وشي ده مابتشوفو .. عايزاك تقول لي رايك هسي

يتبع....

#الأصابع_الشريفة
بقلم: طارق اللبيب

الجزء 04

خدر قال ليها .. اجي في بيتكم؟؟ لشنو؟؟ عشان زواج يعني؟ قالت ليهو امال عشان شنو؟ .. قال ليها اسف والله .. انتي معناها فهمتيني غلط .. انا مرتبط مع انسانه .. وباني عليها كل امالي .. ورغبتي في الزواج منها هي بالذات.. ولاغيرا .. ولو انتي خوتك معاي .. للموضوع ده .. ممكن تقطعيها من هسي مافي مشكلة بس انا لايمكن اخدعك بي حاجة.. هي اصلا مافي حساباتي ..

البت قعدت في الواطة.. في نص النجيلة .. ودموعها ديل يقعن اربعة اربعه. قالت ليهو انت انسان سخيف يا خدر .. وماعندك احساس ولاتقدير لاحاسيس الناس ..

يعني الكلام ده .. ماكان ممكن تقولو لي بطريقة احسن من كدا ؟

خدر شكلو مستغرب في تصرفات البت .. قال ليها والله انا اصلا ما متوقع منك تقولي لي كلام زي ده .. لاني في بداية الكلام قلت ليك انا بعتبرك صديقة واخت .. ومافكرت فيك غير كدا..

قالت ليهو انا بقول ليك .. مافي حاجة اسمها خوة وصداقة مع بت اجنبيه عنك .. كل اصحابنا المعانا ديل.. فاهمين انك عايزني امشي اسألهم ..

قال ليها والله ما اظن .. وحتى لو افتكرو كدا .. ده شي بخصهم هم.. انا وريتك حقيقة الموضوع ..

قالت ليهو المهم .. برضو شكرا ليك يا خدر.. كونو كشفت لي الحكاية .. عشان ما اعيش على امل كاذب .. يلا ارجعاكا انا خليتو الرصيد ..

خدر مشى معاها راجعين .. جاهو تلفون من هندوية .. قالت ليهو انت وين ياخدر؟ .. قال ليها انا في الحدايق .. قالت ليهو معاك منو ؟.. قال ليها معاي اصحابي .. قالت ليهو طيب.. انا عايزة اتكلم معاك .. قال ليها جدا .. بس برجع ليك بعد عشرة دقايق .. ونسرين تاني قعدت في الواطة تبكي ..

قفل التلفون.. وقال لي نسرين ..

يا نسرين عليك الله قومي .. وقشي دموعك دي .. وارح الناس ديل ما يقلقو .. يشوفوك بتبكي .. يفتكرو ام معالي ماتت .. ارح قومي ..

قامت على حيلها .. قالت ليهو الاتصل عليك ده منو؟.. قال ليها دي الزولة الحكيت ليك بيها قبل شوية دي ..

قالت ليهو انت عارف ياخدر العاجبني فيك شنو؟

انك مابتكذب نهائي.. ياخي انت اكتر زول مريح في الدنيا دي ياريت الناس لو كلهم زيك ..

احكي ليك قصة حصلت علي قبل سنتين .. قال ليها قومي احكي ونحن ماشين .. قامت تتبسم.. وباقي الدموع على جفونها ..

قالت ليهو .. واحدة صحبتي جابت لي واحد.. الله لايبارك فيهو ورشحتني ليهو.. وهو لاقاني معاها .. انت بتعرفها صحبتي دي بس مافي داعي اقول ليك هي منو ..

المهم ياخدر .. الولد ده كان جادي معاي شديد .. وونسات ولقاءات وبقول لي انتي اغلا حاجة في حياتي .. وانتي عمري.. وانا لو ما اتزوجتك بموت وكدا يعني .. ومكالمات لغاية الصباح ورسايل ..

المهم .. يوم ناس البيت اتكلمو معاي.. قلت ليهم ده انسان جادي وبينا اتفاق .. قالو لي لو جادي يجي البيت .. قلت ليهم جدا .. ومشيت كلمتو .. وهو دق صدرو.. وقال لي بجيكم بي اسرتي واعمامي وخيلاني يوم الخميس ..

وكل يوم بنتصل مع بعض .. ونأكد المواعيد .. والله نحن ظروفنا في الوقت داك كانت صعبة شديد .. عارف لملمنا كل العندنا عشان نكفي الضيوف.. لقيناها مافايتة اتنين مليون.. واتدينا عليها تاني اربعة .. ودعينا اعمامي وخيلاني وكل الاسرة.. وفي ناس من قرايبنا ماكانو قبلانين حكاية انا اتزوج واحد غريب ..

المهم يازول اول ماجات المواعيد .. وهم المفروض يجونا المغرب اتصلت عليهو .. يا قصي انت انت وين؟ .. قال لي قريب خلاص نحن ركبنا .. خلاص .. بس الحريم بتاعتنا ديل حركتهن تقيلة .. مسافة السكة ونحن معاكم ..

ونحن انتظرنا وكل الاسرة والقرايب منتظرين لغاية صلاة العشا.. ماجو ..!!!!

اتصلنا عليهو .. تلفون لقينا تلفوناتو الاتنين مقفلات .. وانا بقيت زي المجنونة ماعارفة اسوي شنو ؟

واهلنا ديل بقو يهرجو.. وشتموني لامن ارتاحو .. وشاكلو ابوي وقالو ليهو انت مدلع بتك.. وطالقها لليسوي والمايسوى

وقصي لغاية الصباح مافتح تلفونو .. انا اتصلت على الزولة صاحبتي الجابتو لي .. وحكيت ليها .. وانا ببكي لغاية ما الشمش شرقت.. دمعتي ماوقفت .. قالت لي والله ماعارفة الحاصل .. ومامعروف ظروفهم شنو .. لكن انا بسأل وبعرف .. قلت ليها ماتسألي ولاتعرفي ..

خلاص انا اتحطمت .. انا ادمرت ..

والناس الجو للدعوة.. ما اكلو ولالقمة من الحاجات الجاية بالدين دي.. وكبيناها في الوساخة .. وبقينا ماعارفين نسدد الاربعة مليون من وين ..

والله ياخدر.. انا حصلت لي حالة نفسية.. وبقيت لاباكل ولابشرب.. ولابنوم .. يمكن تلاتة شهور انا ماطبيعية ..بس الحمد لله بوقفة بابا معاي.. وتخفيفو علي .. اتجاوزتا المحنة الحمد لله ..

عشان كدا ياخدر انا دايما" بقول.. الكذب مافي اضرا منو.. والحقيقة مافي اجمل منها مهما كانت مرة .. وانا ان شاء الله خوتي معاك ماتنقطع لايوم الدين ..

وعليك الله ناس عمار ديل .. مايعرفو حاجة من الكلام القلناهو اتفقنا؟؟ قال ليها ان شاء الله ..

ومشو قعدو .. بعد شوية قال ليهم ياجماعة عن اذنكم عندي اتصال .. مشى بعيد .. واتص

ل على هند.. وسلم عليها وبسأل فيها .. من االامور والاحوال ..

حكت ليهو الحصل بالتفصيل ..

قال ليها والله كلو مافي هو مشكلة .. المشكلة في حتة واحدة بس ..

انتي كيف تقولي لي امك انو انا مقاول؟؟ بشتغل بالملايين؟؟ انتي عارفة انو انا اوسطى بشتغل بي ضراعي .. وده بختلف عن المقاول ..

قالت ليهو ياخي ماتكون زول نظرتك ضيقة .. وبتعاين تحت كرعيك .. انت برضو بسموك مقاول.. موش بتقاول صاحب العمل على الشغل؟

قال ليها ده اسمو تزوير معلومات ياهند .. انتي قولي الحقيقة عشان الامور تكون واضحة .. واي حاجة مبنية على الخداع والتزوير ما بتنفع .. ولابتتقدم ..

قالت ليهو بس كدا بالطريقة دي.. الموضوع بتاعنا ماح يتم.. انا متأكدة .. قال ليها والله انا غايتو دي حاجة مافي يدي .. كونو يتم ولا مايتم ده عند الله .. الفي يدي اني ما اقول كلام خلاف الحقيقة .وبعدين اتكشف قدام نسابتي زول كضاب.. وبتاع لف ودوران .. والكضب حبلو قصير .. قريب بتكشف ..

قالت ليهو اها كدا ح تطلعني انا كضابة .. قال ليها بس صححي المعلومة .. احسن من تستمري على الكضب ..

قالت ليهو كويس خلاص مافي مشكلة يا خدر .. بوريهم .. اها هسي انت رايك شنو؟.. انا وريتك الحصل .. ابوي قال تجي في لحظة .. وماطالب منك حاجة .. وامي داقة جرس وانا خايفة تبوظ لينا المواضيع ..

قال ليها والله كمان انا امي .. زولة ابرتها مابتشيل خيطين.. لو جاتكم وامك سمعتها كلام ماياهو ..بنزين وجدعو فوقو قشة كبريت مولعة .. وعينك ماتشوف الا النور ..

قالت ليهو اها وانت رايك شنو؟ الحل؟؟ .. وريني يا خدر ..

قال ليها اصبري شوية .. اديني فرصة .. خليني الم لي قريشات.. الله يخليك ..

قالت ليهو لكن ياخدر الزمن مافي صالحنا .. الزمن مافي صالحي انا

قال ليها يا هند .. قولي بسم الله.. انتي اتخرجتي ليك شهرين .. ولسع ياددوبك تميتي التلاتة وعشرين .. يعني شنو الشفقة دي .. البسمع كلامك ده يقول قربتي للاربعين ..

قالت ليهو انت قايل الاربعين بعيدة .. هسي بتكبس والسنين بقت تجري .. قال ليها ابوي عندو مثل قاعد يقولو طوالي .. بقول (العجله على الغنى فقر) ..

وبيت الشعر بقول .. قد يدرك المتأني بعض حاجته .. وقد يكون مع المستعجل الزلل.. كدي هسي انتي اصبري.. خليني اصل البيت واشاور الوالدة والوالد في الكلام ده .. واشوف الراي شنو ..

قالت ليهو اصلك ما اديتني كلام يطمن القلب.. بس شغال لي الصبر الصبر .. خلاص صبرت ..

اخد ليهو ضحكة صغيرة كدي.. وقال ليها خلاص تصبحي على خير .

طبعا خدر قاعد بعيد.. وبتكلم في التلفون مع هند .. ونسرين بس بالها معاهو .. واصلا ماختت بالها في الونسة .. وقهوتها بردت ولا شالت منها رشفه .. وطبعا ناس علاء بعاينو ليها.. وبعلقو وهي ماجايبة خبر.. بس بالها هناك .. لامن لفتوها .. علاء قال ليها شنو يانسرين؟؟ نحن قاعدين هنا .. انتي الزول ده .. مبارياهو بي عيونك كدي .. الحاصل شنو ؟

قالت ليهو والله انتو ماعارفين حاجة ساي .. قالو ليها وبعد ده كلو ماعارفين؟؟ .. نحن لازم بعد كدا نفكر في المناسبة.. لانو شايفين الجنون بدت تزيد .. قالت ليهو ياحليلي انا يايمة ..

الماعارفو يقول عدس ..

اها لمن جا خدر .. علاء طوالي نطا ليهو.. قال ليهو شنو يا فره ماتتحرك ياخي .. ننو ماخلاص بعد كدا .. فات فيها الفوات ؟

خدر قال ليهو في شنو ياعلاء؟؟ .. وبقى يعاين لي نسرين نظرة لوم..

يعني انتي شكلك حكيتي ليهم الكلام الدار بينا .. يعاين ليها بدون مايتكلم .. هي فهمت نظرة اللوم .. قالت ليهو ابدا يا خدر..

والله انا خشمي مافتحتو اهو ديل اسألهم ..

طبعا" ياجماعة .. حقيقة خدر اتضايق جدا .. لمن عرف طريقة تفكير نسرين تجاهو .. انها كانت بانيه امال في زواج .. وهو معتبرها صديقة واخت وكدا .. على حسب فهمو .. وبقى ماقادر يقعد مع الشلة ..

وكلام هندويه وترو زياده ..

قام قال ليهم ماتجيبو لي قهوة .. ماعندي فيها مزاج .. انا حاسي بي توتر وماشي البيت .. علاء قال ليهو مايكون كلامي اثر معاك.. نحن بنهظر يا اصلي ..

قال ليهو ابدا" والله انا بس حاسي اني متضايق.. وماشي البيت ..

نسرين قالت ليهو انا ذاتي ماشه .. وصلني معاك على المواصلات ..

قال ليها جدا قومي ارح ..

قالو ليها طيب اشربي قهوتك .. قالت ليهم لالا خلاص .. طبعا" نسرين بصراحة .. بعد الحقيقة القالها ليها خدر.. ازدات تعلقا" وحبا" ...

واصرت انها تستولى على قلبو باي طريقة.. لانو الانسان الصادق ده.. في مجتمع اليوم عملة نادرة نادرة جدا .. والبنات عارفات كدا ..

فعايزة تعمل اي حاجة .. عشان يكون من نصيبها .. وتابعو النشوفها ح تعمل شنو ..

بعد قامت معاهو .. وهم ماشين على المواصلات .. قالت ليهو قلت لي سعيدة الحظ دي اسمها منو؟

قال ليها اسمها هند .. من بحري حلة حمد .. قالت ليهو والله نفسي اتعرف عليها.. واكون صاحبتها .. عندك مانع صديقتك تكون صديقة خطيبتك؟

قال ليها ابدا" مافي مانع .. لكن هسي نحن ماقلنا مافي صداقة بين ولد وبت اجنبية .. وانا اقتنعت بالموض

وع .. مالك رجعتي في كلامك؟؟ ..

قالت ليهو صراحة انت زول صداقتك مكسب.. وخسارتك اكبر خسارة .. المهم حتديني تلفون هند ولالا؟؟ .. قال ليها اكتبي معاك .. ملاها الرقم .. ودي شكلها دقسه من امها ياخدر.. و غلطه تمنها غالي ..

يتبع....

#الأصابع_الشريفة
بقلم: طارق اللبيب

الجزء 05

ﻧﺴﺮﻳﻦ ﻓﺮﺣﺎﻧﻪ .. ﺷﺎﻟﺖ ﺍﻟﺮﻗﻢ ﻭﺭﻛﺒﺖ ﺍﻟﻤﻮﺍﺻﻼﺕ ..

ﻣﺸﺖ ﻋﻠﻲ ﺍﻫﻠﻬﺎ .. ﻭﺧﺪﺭ ﺭﻛﺐ ﺍﺗﺨﺎﺭﺝ ﻋﻠﻲ ﺍﻟﺤﺎﺝ ﻳﻮﺳﻒ ﺍﺻﻼ" ﻣﺎ ﺍﺗﺎﺧﺮ ﻓﻲ ﺍﻟﺤﺪﺍﻳﻖ .. ﻳﻌﻨﻲ ﺍﻟﻤﺴﺎﻓﺔ ﺍﻻﺧﺪﻫﺎ ﻓﻲ ﺍﻟﺤﺪﺍﻳﻖ ﻛﻠﻬﺎ ﻣﺎﺗﺎﻣﻪ ﻟﻴﻬﺎ ﺍﺭﺑﻌﻴﻦ ﺩﻗﻴﻘﻪ .. ﺧﺪﺭ ﻭﺻﻞ ﺍﻟﺒﻴﺖ ﺯﻱ ﺍﻟﺴﺎﻋﺔ ﻋﺸﺮﺓ ﺍﻻ .. ﻭﻟﻘﻲ ﻧﺎﺱ ﺍﻟﺒﻴﺖ ﻛﻠﻬﻢ ﻗﺎﻋﺪﻳﻦ .. ﻳﺘﻌﺸﻮ ﻋﻤﻚ ﺣﺴﻴﺐ ﺍﻟﻠﻪ ﻭﺩ ﺣﺎﺝ ﺍﻟﻀﻮ .. ﻭﺍﻣﻮ ﻏﺎﻟﻴﻪ ﺑﺖ ﻣﻮﺳﻲ .. ﻭﺍﺧﻮﺍﻧﻮ ﻛﻠﻬﻢ ﺑﺘﻌﺸﻮ ﻓﻲ ﺻﻴﻨﻴﺔ ﻭﺍﺣﺪﺓ .. ﻗﻌﺪ ﺍﺗﻌﺸﻰ ﻣﻌﺎﻫﻢ .. ﻭﻓﻮﻕ ﺍﻟﻌﺸﺎﺀ

ﻗﺎﻝ ﻻﺑﻮﻩ : ﻳﺎ ﺍﺑﻮﻱ ﺍﻧﺎ ﻋﺎﻳﺰﻙ ﻓﻲ ﻛﻼﻡ ..

ﻗﺎﻝ ﻟﻴﻬﻮ : ﻛﻮﻳﺲ ﺍﺗﻌﺸﻰ ﺑﻌﺪ ﺍﻟﻌﺸﺎ ﺗﻌﺎﻝ ﻟﻲ ﺑﻬﻨﺎﻙ

ﺍﻫﺎ ﺑﻌﺪ ﺍﺗﻌﺸﻮ ﺣﺴﻴﺐ ﺍﻟﻠﻪ ﻣﺸﻰ ﻏﺮﻓﺘﻮ .. ﺟﺎﺕ ﻏﺎﻟﻴﺔ ﺍﻡ ﺧﺪﺭ ﻻﺣﻘﺎﻫﻮ

ﻗﺎﻡ ﻗﺎﻝ ﻟﻴﻬﺎ : ﻳﺎ ﻏﺎﻟﻴﺔ .. ﺍﻟﺨﺪﺭ ﺩﺍﻳﺮ ﻳﺘﻜﻠﻢ ﻣﻌﺎﻱ ﻓﻲ ﻣﻮﺿﻮﻉ ﻭﺍﻧﺎ ﺫﺍﺗﻲ ﺩﺍﻳﺮ ﺍﺗﻜﻠﻢ ﻣﻌﺎﻫﻮ ﻋﻠﻴﻚ ﺍﻟﻠﻪ ﺍﻣﺸﻲ ﺑﻲ ﻏﺎﺩﻱ .. ﻭ ﻣﺎﺗﺠﻲ ﺑﻲ ﺟﺎﻱ ..

ﺍﻟﻤﺮﺍﺓ ﻗﺎﻟﺖ ﻟﻴﻬﻮ : ﺣﻜﻢ ﺍﻟﻘﻮﻱ ﻋﻠﻰ ﺍﻟﻀﻌﻴﻒ .. ﻋﺎﺩ ﻧﻘﻮﻝ ﺷﻨﻮ؟ ﻭﻣﺸﺖ ﻃﻮﺍﻟﻲ .. ﻭﻛﺎﻥ ﻧﻔﺴﻬﺎ ﺗﻌﺮﻑ ﺧﺪﺭ ﺩﺍﻳﺮ ﻳﻘﻮﻝ ﻻﺑﻮﻫﻮ ﺷﻨﻮ؟

ﺍﻫﺎ ﺍﻟﺨﺪﺭ ﻭﻛﺖ ﺟﺎ ..

ﻗﺎﻝ ﻻﺑﻮﻫﻮ : ﻳﺎ ﺍﺑﻮﻱ ﻭﺍﻟﻠﻪ ﺍﻧﺎ ﺩﺍﻳﺮ ﺍﺗﺰﻭﺝ .. ﻭﻟﻘﻴﺖ ﻟﻲ ﺑﺖ ﺣﻼﻝ ﻭﻣﺎﻋﺎﻳﺰ ﺍﻓﺮﻁ ﻓﻴﻬﺎ .. ﺑﺲ ﻋﺎﻳﺰﻙ ﺗﻘﻨﻊ ﺍﻣﻲ ﺗﻤﺸﻲ ﻣﻌﺎﻧﺎ ﻭﺍﻧﺎ ﻫﺴﻲ ﻋﻨﺪﻱ ﺷﻐﻞ ﻛﻮﻳﺲ .. ﻛﻠﻬﺎ ﺷﻬﺮ .. ﺷﻬﺮ ﻭﻧﺺ ﺑﻠﻤﻠﻢ ﻭﺍﻥ ﺷﺎ ﺍﻟﻠﻪ ﺭﺑﻨﺎ ﻳﺴﺎﻋﺪﻧﻲ .. ﻭﺍﻋﻘﺪ

ﻫﻮ ﺑﺘﻜﻠﻢ ﻭﺍﺑﻮﻫﻮ ﺧﺎﺗﻲ ﻳﺪﻭ ﻓﻮﻕ ﺧﺸﻤﻮ ﻭﺑﻌﺎﻳﻦ ﻟﻴﻪ .. ط

ﻗﺎﻝ ﻟﻴﻬﻮ : ﺧﻠﺼﺖ ﻳﺎ ﺍﻟﺨﺪﺭ؟

ﻗﺎﻝ ﻟﻴﻬﻮ : ﻧﻌﻢ ﻳﺎ ﺍﺑﻮﻱ ..

ﻗﺎﻝ ﻟﻴﻬﻮ : ﺍﻧﺎ ﻣﺎﻋﺎﻳﺰ ﺍﻗﻮﻝ ﻟﻴﻚ ﺍﺧﻮﻙ ﺍﻻﻛﺒﺮ ﻣﻨﻚ .. ﻗﺎﻋﺪ ﻟﺴﻊ ﻃﺒﻌﺎ" ﻣﻦ ﺣﻘﻚ ﺗﺘﺰﻭﺝ ﻓﻲ ﺍﻟﺰﻣﻦ ﺍﻟﺒﻌﺠﺒﻚ .. ﺍﻧﺎ ﻣﺎ ﺡ ﺍﻋﺘﺮﺽ ﻟﻜﻦ ﺍﻧﺖ ﻋﺎﺭﻑ ﻧﺤﻦ ﻇﺮﻭﻓﻨﺎ ﺯﻱ ﺍﻟﺰﻓﺖ .. ﻭﻣﺎﻋﻨﺪﻧﺎ ﻟﻴﻚ ﺍﻱ ﻣﺴﺎﻋﺪﻩ .. ﻟﻮ ﺑﺘﻘﺪﺭ ﺗﻜﻤﻞ ﻣﻮﺿﻮﻋﻚ ﺑﺮﺍﻙ .. ﻳﺒﻘﻰ ﻣﺎﻓﻲ ﻣﺸﻜﻠﻪ

ﻗﺎﻝ ﻟﻴﻬﻮ : ﺍﻧﺎ ﻋﺎﺭﻑ ﻛﺪﺍ ﻛﻮﻳﺲ ﺑﺲ .. ﺍﻧﺎ ﻋﺎﻳﺰﻛﻢ ﺗﻜﻮﻧﻮ ﻣﻌﺎﻱ ﺍﻧﺎ ﺧﺎﻳﻒ ﺍﻣﻲ ﺗﺮﻓﺾ ..

ﻗﺎﻝ ﻟﻴﻬﻮ : ﺍﻣﻚ ﺩﻱ ﺧﻠﻴﻬﺎ ﻋﻠﻲ .. ﺑﺲ ﺟﻬﺰ ﺍﻣﻮﺭﻙ .. ﻭﻧﺤﻦ ﻣﺴﺘﻌﺪﻳﻦ ﻧﻤﺸﻲ ﻣﻌﺎﻙ .. ﻭﺑﺮﺳﻞ ﻟﻌﻤﻚ ﺣﺴﻴﻦ ﻭﻋﻤﻚ ﺍﺳﻤﺎﻋﻴﻞ ﻭﻟﻮ ﺩﺍﻳﺮ ﺧﻴﻼﻧﻚ ﺍﻟﺘﻼﺗﻪ ﺑﻨﻤﺸﻲ ﻣﻌﺎﻙ ﺑﻨﻌﺰﻙ ﺗﺐ .. ﺍﻟﺒﺖ ﻣﻦ ﻭﻳﻦ ﻭﺟﻨﺴﻬﺎ ﺷﻨﻮ؟

ﻗﺎﻝ ﻟﻴﻬﻮ : ﻭﺍﻟﻠﻪ ساﻛﻨﻴﻦ ﻓﻲ ﺑﺤﺮﻱ ﺣﻠﺔ ﺣﻤﺪ .. ﻭﻗﺒﻴﻠﺘﻬﺎ ﺩﻱ ﻣﺎﺑﺘﻬﻤﻨﻲ ..

ﻗﺎﻝ ﻟﻴﻬﻮ : ﻛﻴﻔﻦ ﻳﻌﻨﻲ؟؟ ﺍﻧﺖ ﻣﺎﻙ ﻋﺎﺭﻑ ﻧﺤﻦ ﻓﻲ ﺍﺟﻨﺎﺱ ﻣﻌﻴﻨﻪ ﻣﺎ ﺑﻨﻌﺮﺭﺱ ﻣﻨﻬﺎ؟؟

ﻗﺎﻝ ﻟﻴﻬﻮ : ﺍﺑﻮﻱ ﺍﻧﺖ ﻗﺒﻞ ﻛﺪﺍ ﻗﻠﺖ ﺍﻱ ﺯﻭﻝ ﺣﺮ ﻓﻲ ﻧﻔﺴﻮ .. ﻓﻲ ﺍﺧﺘﻴﺎﺭ ﺷﺮﻳﻜﺔ ﺣﻴﺎﺗﻮ .. ﻻﺑﺖ ﻻ ﻭﻟﺪ ﻣﺎ ﺑﺘﺴﻴﻄﺮ ﻓﻴﻬﻮ ..

ﻗﺎﻝ ﻟﻴﻬﻮ ' ﻳﺎﺯﻭﻝ ﺍﻥ ﺷﺎء ﺍﻟﻠﻪ ﺗﺠﻴﺒﻬﺎ ﻣﻦ ﺑﻠﺠﻴﻜﺎ .. ﻣﺎ ﺗﻜﺘﺮ ﻛﻼﻣﻚ .. ﻭﺗﻘﻌﺪ ﺗﺮﻏﻲ ﻟﻲ .. ﺟﺎﻫﺰ ﻧﺤﻦ ﺟﺎﻫﺰﻳﻦ ..

ﻗﺎﻝ ﻟﻴﻬﻮ : ﺧﻼﺹ ﺍﺗﻔﻘﻨﺎ ﻳﺎ ﺍﺑﻮﻱ .. ﻋﻠﻰ ﺑﺮﻛﺔ ﺍﻟﻠﻪ ﺗﺼﺒﺢ ﻋﻠﻰ ﺧﻴﺮ

ﺍﻟﻤﻬﻢ ﻳﺎﺯﻭﻝ ﺑﺎﺧﺘﺼﺎﺭ ﺧﺪﺭ ﺑﻘﻰ ﻳﻮﻣﻴﺎ" ﻳﻤﺸﻲ ﺍﻟﺸﻐﻞ ﻭﺍﻟﺸﻐﻞ ﺑﺘﺎﻋﻮ ﺍﺧﺪ ﻓﻴﻬﻮ ﺍﺳﺒﻮﻉ ﻋﺪﻳﻞ .. ﻭﻛﻞ ﺍﻻﺳﺒﻮﻉ ﺍﺗﺼﺎﻻﺗﻪ ﻣﻊ ﻫﻨﺪ ﻣﺘﻮﺍﺻﻠﻪ

ﻳﻮﻡ ﻓﻲ ﻧﺺ ﺍﻻﺳﺒﻮﻉ ﺩﺍ .. ﻓﻲ ﺗﻠﻔﻮﻥ ﺟﺎ ﻟﻲ ﻫﻨﺪ

ﺍﻟﻮ ﺳﻼﻡ ﻋﻠﻴﻜﻢ .. ﻫﻨﺪ؟

ﻗﺎﻟﺖ : ﻋﻠﻴﻜﻢ ﺍﻟﺴﻼﻡ ﻧﻌﻢ ﻣﻌﺎﻱ ﻣﻨﻮ؟

ﻗﺎﻟﺖ ﻟﻴﻬﺎ : ﻣﻌﺎﻙ ﺍﻧﺎ ﻧﺴﺮﻳﻦ

ﻗﺎﻟﺖ ﻟﻴﻬﺎ : ﻭﺍﻟﻠﻪ ﻣﺎﻋﺮﻓﺘﻚ ؟

ﻗﺎﻟﺖ ﻟﻴﻬﺎ : ﻧﻌﻢ ﻣﺎﺑﺘﻌﺮﻓﻴﻨﻲ ﻳﺎﻫﻨﺪ .. ﻟﻜﻦ ﺍﻧﺎ ﺑﻌﺮﻓﻚ ﻛﻮﻳﺲ ﻻﻧﻨﺎ ﻧﺤﻦ ﺍﻻﺗﻨﻴﻦ ﻣﺨﺪﻭﻋﻴﻦ ﻣﻦ ﺯﻭﻝ ﻭﺍﺣﺪ

ﻫﻨﺪ ﻗﺎﻟﺖ ﻟﻴﻬﺎ : ﻋﻔﻮﺍ" ﻭﺍﻟﻠﻪ ﻣﺎﻓﺎﻫﻤﺔ ﺣﺎﺟﺔ ..

ﻗﺎﻟﺖ ﻟﻴﻬﺎ : ﻳﺎﺣﺒﻴﺒﺘﻲ ﺩﻩ ﻛﻼﻡ ﺳﺮﻱ .. ﻟﻮ ﺑﺘﻮﻋﺪﻳﻨﻲ ﻳﻔﻀﻞ ﺳﺮ ﺑﻴﻨﺎ ﺑﺤﻜﻲ ﻟﻴﻚ ﺑﺎﻟﺪﻻﻳﻞ .. ﻭﻟﻮ ﻋﺎﻳﺰﺓ ﺗﻘﺎﺑﻠﻴﻨﻲ ﺑﻘﺎﺑﻠﻚ

ﻗﺎﻟﺖ ﻟﻴﻬﺎ : ﻃﻴﺐ ﺍﺣﻜﻲ ..

ﻧﺴﺮﻳﻦ ﻗﺎﻟﺖ ﻟﻴﻬﺎ : ﺍﻧﺎ ﺣﺒﻴﺒﺔ ﺧﺪﺭ ﻳﺎ ﻫﻨﺪ .. ﻭﺍﺧﻴﺮﺍ" ﻋﺮﻓﺖ ﺍﻧﻚ ﺍﻧﺘﻲ ﺑﺮﺿﻮ ﺣﺒﻴﺒﺘﻮ .. ﻭﻭﺍﻋﺪﻧﻲ ﺑﺨﻄﻮﺑﺔ ﺯﻱ ﻣﺎ ﻫﻮ ﺍﻋﺪﻙ ﻭﺑﻼﻗﻴﻨﺎ ﺍﻻﺗﻨﻴﻦ ﻭﺑﺤﺒﻨﺎ ﺍﻻﺗﻨﻴﻦ

ﺍﺩﻳﻚ ﺍﻟﺪﻟﻴﻞ ؟

ﻗﺎﻟﺖ ﻟﻴﻬﺎ : ﺍﺣﻜﻲ ..

ﻗﺎﻟﺖ ﻟﻴﻬﺎ : ﺗﺘﺬﻛﺮﻱ ﻳﻮﻡ ﺍﻻﺭﺑﻌﺎ .. ﺍﻟﻠﻬﻮ ﺍﻭﻝ ﺍﻣﺲ ﺑﺎﻟﻠﻴﻞ ﺍﻧﺘﻲ ﺍﺗﺼﻠﺘﻲ ﻋﻠﻰ ﺧﺪﺭ .. ﻭﻗﺎﻝ ﻟﻴﻚ ﺍﻧﺎ ﻓﻲ ﺍﻟﺤﺪﺍﻳﻖ ﻣﻊ ﺍﺻﺤﺎﺑﻲ ؟ ﺑﺘﺼﻞ ﻋﻠﻴﻚ ﺑﻌﺪ ﻋﺸﺮﺓ ﺩﻗﺎﻳﻖ؟

ﻣﺘﺬﻛﺮﺓ ﻳﺎﻫﻨﺪ؟

ﻗﺎﻟﺖ ﻟﻴﻬﺎ : ﺍﻳﻮﺓ ﺣﺼﻞ ..

ﻗﺎﻟﺖ ﻟﻴﻬﺎ : ﻣﺎ ﻛﺎﻥ ﻣﻊ ﺍﺻﺤﺎﺑﻮ ﻭﻻﺷﻲ .. ﻛﺎﻥ ﻣﻌﺎﻱ ﺍﻧﺎ .. ﻭﻛﻨﺎ ﻓﻲ ﺟﻮ ﻛﻠﻮ ﺭﻭﻣﺎﻧﺴﻴﺔ .. ﺑﺲ ﻟﻤﻦ ﺍﻧﺘﻲ ﺍﺗﻜﻠﻤﺘﻲ ﻣﻌﺎﻫﻮ .. ﻏﻠﻂ ﻭﻓﺘﺢ ﺍﻟﺴﻤﺎﻋﺔ ﺍﻟﺨﺎﺭﺟﻴﺔ .. ﻭﺍﻧﺎ ﺳﻤﻌﺖ ﺻﻮﺗﻚ .. ﻭﺍﻧﻔﺼﻤﺖ ﻓﻴﻬﻮ ﻭﻫﺠﺖ ﻓﻴﻬﻮ .. ﻭﻗﻌﺪﺕ ﺍﺑﻜﻲ .. ﺑﻄﻮﻝ ﺣﺴﻲ .. ﻗﺎﻡ ﺣﻜﻰ ﻟﻲ ﻋﻼﻗﺘﻮ ﺑﻴﻚ

ﻭﻗﺎﻝ ﻟﻲ : ﺍﻧﺎ ﻣﺎﻋﻨﺪﻱ ﻟﻴﻬﺎ ﺣﺎﺟﺔ .. ﺑﺠﺮﺟﺮ ﻓﻴﻬﺎ ﺳﺎﻱ .. ﻟﻐﺎﻳﺔ ﻣﺎﺗﻄﻠﻊ ﻣﻦ ﺣﻴﺎﺗﻲ

ﻫﻨﺪ ﻗﺎﻟﺖ ﻟﻴﻬﺎ : ﻭﺍﻟﻠﻪ ﺣﻘﻴﻘﺔ ﻳﺎ ﻧﺴﺮﻳﻦ .. ﻛﻼﻣﻚ ﺻﺢ .. ﺩﻩ ﺣﺼﻞ ﻓﻌﻼ" ﻗﺎﻝ ﻟﻲ ﻣﻊ ﺍﺻﺤﺎﺑﻲ .. ﻭﻗﺎﻝ ﻟﻲ ﺑﺘﺼﻞ ﻋﻠﻴﻚ ﺑﻌﺪ ﻋﺸﺮﺓ ﺩﻗﺎﻳﻖ

ﻟﻜﻦ ﺍﻧﺘﻲ ﺟﺒﺘﻲ ﺭﻗﻤﻲ ﻣﻦ ﻭﻳﻦ ؟

ﻧﺴﺮﻳﻦ ﻗﺎﻟﺖ ﻟﻴﻬﺎ : ﺟﺒﺘﻮ ﻣﻨﻮ ﻫﻮ ..

ﻫﻮ ﺍﺻﻼ" ﻣﺎﺑﻜﺴﺮ ﻟﻲ ﻛﻼﻡ ..

ﻗﻠﺖ ﻟﻴﻬﻮ : ﺍﺩﻳﻨﻲ ﺭﻗﻢ ﺍﻟﺒﺖ ﺩﻱ .. ﺍﻻﻗﻴﻬﺎ ﻭﺍﺷﻮﻓﺎ ..

ﻗﺎﻝ ﻟﻲ : ﺑﺪﻳﻚ ﻟﻴﻬﻮ ﻟﻜﻦ ﻋﻠﻴﻚ ﺍﻟﻠﻪ ﻣﺎﺗﺤﻜﻲ ﻟﻴﻬﺎ ..

ﻗﺎﻟﺖ ﻟﻴﻬﺎ : ﺧﻼﺹ ﻳﺎ ﻧﺴﺮﻳﻦ ﺷﻜﺮﺍ" ﻟﻴﻚ .. ﺍﻧﺘﻲ ﺍﺩﻳﺘﻴﻨﻲ ﺣﻘﻴﻘﺔ ﺍﻧﺎ ﻛﻨﺖ ﻏﺎﻓﻠﺔ ﻣﻨﻬﺎ .. ﺑﺎﻟﺠﺪ ﻣﺎﻋﺎﺭﻓﺔ ﺍﺷﻜﺮﻙ ﻛﻴﻒ

ﺍﻟﺤﻘﻴﻘﺔ ﻳﺎﺟﻤﺎﻋﺔ ﻧﺴﺮﻳﻦ ﻟﻌﺒﺖ ﺍﻟﻠﻌﺒﺔ ﺻﺢ .. ﻭﺍﺳﺘﺪﻟﺖ ﻋﻠﻰ ﺍﻻﻛﺎﺫﻳﺐ ﺑﺎﻟﺤﻘﺎﻳﻖ ﺯﻱ ﻣﺎﺑﻘﻮﻟﻮ .. ﻭﺭﺗﻬﺎ ﺣﺎﺟﺎﺕ ﺣﺎﺻﻠﺔ ﻓﻌﻼ" ﻋﺸﺎﻥ ﺗﺼﺪﻕ ﺍﻟﻜﻀﺒﻪ .. ﻭﺩﻱ ﺍﺧﺒﺚ ﻃﺮﻳﻘﺔ ﻣﻦ ﻃﺮﻕ ﺍﻟﻜﺬﺏ ﻭﺍﻻفترﺍﺀ .. ﻧٍﺴﺄﻝ ﺍﻟﻠﻪ ﺍﻟﺴﻼﻣﺔ

ﺍﻟﻤﻬﻢ ﻫﻨﺪ ﻋﺎﺷﺖ ﺳﺎﻋﺎﺕ ﻋﺼﻴﺒﺔ .. ﻣﻦ ﺍﻻﻧﻬﻴﺎﺭ ﺍﻟﻌﺼﺒﻲ ﻭﺍﻟﺪﺧﻮﻝ ﻓﻲ ﻋﺎﻟﻢ ﺷﺒﻴﻪ ﺑﺎﻟﺠﻨﻮﻥ ﻣﻦ ﺍﻟﻐﻀﺐ ﻭﺍﻻﺣﺒﺎﻁ

ﺑﺲ ﺑﺎﻟﻠﻴﻞ ﺍﺗﺼﻠﺖ ﻋﻠﻰ ﺧﺪﺭ .. ﻭﺧﺪﺭ ﺣﺴﻪ ﺍﻧﻬﺎ ﺻﻮﺗﻬﺎ ﻣﺘﻐﻴﺮ ﻭﺍﺻﻠﻮ ﺍﺑﺎ ﻳﺴﺄﻟﻬﺎ ﻋﻦ ﺷﻲ

ﻗﺎﻟﺖ ﻟﻴﻬﻮ : ﻳﺎﺧﺪﺭ ﺍﻧﺎ ﻻﺯﻡ ﺑﻜﺮﺓ ﺍﻻﻗﻴﻚ ..

ﻗﺎﻝ ﻟﻴﻬﺎ : ﻣﻌﻠﻴﺶ ﺍﻧﺎ ﺑﻜﺮﺓ ﺷﻐﺎﻝ ﺑﺪﺭﻱ ..

ﻗﺎﻟﺖ ﻟﻴﻬﻮ : ﺑﺘﻘﺪﺭ ﺗﺠﻴﻨﻲ ﺑﺎ

ﻟﻤﺴﺎﺀ ﻓﻲ ﺍﻟﺰﻭﺍﺩﺓ؟

ﻗﺎﻝ ﻟﻴﻬﺎ : ﻳﺎ ﻫﻨﺪ ﻓﻲ ﺷﻨﻮ ﺍﻟﻀﺮﻭﺭﻱ ﺷﺪﻳﺪ ﻛﺪﺍ؟؟

ﻗﺎﻟﺖ ﻟﻴﻬﻮ : ﻓﻲ ﻛﻼﻡ ﻋﺎﻳﺰﺓ ﺍﻗﻮﻟﻮ ﻟﻴﻚ .. ﻭﻣﺎﻳﻨﻔﻊ ﺍﻗﻮﻟﻮ ﻓﻲ ﺍﻟﺘﻠﻔﻮﻥ

ﻻﺯﻡ ﺍﻻﻗﻴﻚ ﻭﺟﻬﺎ" ﻟﻮﺟﻪ .. ﻻﻧﻮ ﻛﻼﻡ ﻣﺼﻴﺮﻱ ﻭﺑﺘﻌﻠﻖ ﺑﻲ ﺣﻴﺎﺗﻨﺎ ﻭﻣﺴﺘﻘﺒﻠﻨﺎ ..

ﻗﺎﻝ ﻟﻴﻬﺎ : ﻃﻴﺐ ﻣﺎ ﻧﺤﻦ ﻳﻮﻣﻴﺎ" ﺑﻨﺘﻜﻠﻢ ﻋﻦ ﺣﻴﺎﺗﻨﺎ ﻭﻣﺴﺘﻘﺒﻠﻨﺎ ﺑﺎﻟﺘﻠﻔﻮﻥ .. ﺍﻟﺠﺪ ﺷﻨﻮ .. ﻋﻠﻰ ﺍﻧﻚ ﻻﺯﻡ ﺗﻼﻗﻴﻨﻲ ؟؟

ﻗﺎﻟﺖ ﻟﻴﻬﻮ : ﻻﻧﻮ ﺍﻟﻜﻼﻡ ﺩﻩ ﺣﺴﺎﺱ .. ﻭﻳﻤﻜﻦ ﻳﻜﻮﻥ ﺍﺧﺮ ﻛﻼﻡ ﻳﺤﺼﻞ ﺑﻴﻨﺎ .. ﻭﻋﻠﻴﻬﻮ ﺍﻧﺎ ﺑﺤﺪﺩ ﺍﺳﺘﻤﺮ ﻣﻌﺎﻙ ﻭﻻﻻ .. ﺍﻧﺖ ﺡ ﺗﻼﻗﻴﻨﻲ ﻭﻻ ﻳﻔﺘﺢ ﺍﻟﻠﻪ ؟؟

ﻗﺎﻝ ﻟﻴﻬﺎ : ﺟﺪﺍ" ﺑﻜﺮﺓ ﺍﻟﺴﺎﻋﺔ ﻛﻢ ؟

ﻗﺎﻟﺖ ﻟﻴﻬﻮ : ﺍﻱ ﻭﻗﺖ ﻻﻧﻲ ﺑﺠﻴﺐ ﻣﻌﺎﻱ ﺍﺧﻮﻱ ﺍﻻﺻﻐﺮ ﻣﻨﻲ ﻃﻮﺍﻟﻲ ﺣﺘﻲ ﻟﻮ ﺑﻌﺪ 9 ﻣﺴﺎﺀ ﻣﺎﻋﻨﺪﻱ ﻣﺸﻜﻠﺔ

ﻗﺎﻝ ﻟﻴﻬﺎ : ﻻﻻ .. ﺍﻧﺎ ﺑﻄﻠﻊ ﻣﻦ ﻫﻨﺎﻙ ﺑﺪﺭﻱ .. ﻭﺑﻼﻗﻴﻚ ﻗﺮﻳﺐ ﺍﻟﻤﻐﺮﺏ .. ﺍﻧﺖ ﺑﻌﺪ ﺍﻟﻤﻐﺮﺏ ﻣﺒﺎﺷﺮﺓ ﺗﻼﻗﻮﻧﻲ ﻓﻲ ﺍﻟﺰﻭﺍﺩﺓ

ﺧﺪﺭ ﻋﺮﻑ ﺍﻧﻮ ﻧﺴﺮﻳﻦ ﺍﺗﺼﻠﺖ ﻋﻠﻰ ﻫﻨﺪ .. ﻭﺻﺎﻃﺖ ﻟﻴﻬﺎ ﺭﺍﺳﻬﺎ ﻭﻋﺎﻳﺰ ﻳﻌﺮﻑ ﺭﺩﺓ ﻓﻌﻞ ﻫﻨﺪ .. ﻣﻊ ﻗﻮﺍﻻﺕ ﺍﻟﻨﺎﺱ ﻭﺍﻟﻔﺘﻦ ﺑﺘﺘﺼﺮﻑ ﻛﻴﻒ ؟

ﻟﻜﻦ ﺑﺮﺿﻮ ﻋﺎﻣﻞ ﻓﻴﻬﺎ ﺭﺍﻳﺢ .. ﻭﻋﺎﻣﻞ ﻓﻴﻬﺎ ﻣﺎﻓﺎﻫﻢ ﺍﻱ ﺣﺎﺟﺔ

ﻭﻫﻲ ﺑﻘﺖ ﻣﺎﻋﺎﺭﻓﺔ ﺍﻟﺤﻘﻴﻘﺔ ﻭﻳﻦ .. ﻭﻛﺎﻧﺖ ﻣﻔﺘﻜﺮﺓ ﺍﻧﻮ ﺧﺪﺭ ﺍﺻﺪﻕ ﺯﻭﻝ ﻋﻠﻰ ﻭجه ﺍﻻﺭﺽ .. ﻭﻫﺴﻲ ﺑﻲ ﻛﻼﻡ ﻧﺴﺮﻳﻦ ﻋﺮﻓﺖ ﺍﻧﻬﺎ ﻣﺨﺪﻭﻋﺔ ﻓﻲ ﺧﺪﺭ .. ﺍﻟﻜﺎﻧﺖ ﻣﻔﺘﻜﺮﺍﻫﻮ ﻣﻼﻙ .. ﻭﻃﻠﻊ ﺯﻭﻝ ﺍﻱ ﻛﻼﻡ

ﺍﻟﻤﻬﻢ ﺑﻘﺖ ﻃﻮﻝ ﺍﻟﻴﻮﻡ ﺗﻔﻜﺮ ﻓﻲ ﺍﻟﻜﻼﻡ ﺍﻟﺒﺘﻘﻮﻟﻮ ﻟﻴﻬﻮ .. ﻋﺸﺎﻥ ﺗﻘﺪﺭ ﺗﺜﺒﺖ هل ﺍﻟﺰﻭﻝ ﺩﻩ ﺣﻴﺴﺘﻤﺮ ﻳﻜﺬﺏ ﻋﻠﻴﻬﺎ؟؟ ﻭﻻ ﺡ ﻳﻌﺘﺮﻑ ﺑﺎﻟﺤﻘﺎﻳﻖ ﺍﻟﻘﺎﻟﺘﻬﺎ ﻧﺴﺮﻳﻦ ؟؟

ﻭﻓﻌﻼ"ﻧﺴﺠﺖ ﻓﻜﺮﺓ ﻛﻮﻳﺴﺔ .. ﺑﺘﻮﺿﺢ ﻟﻴﻬﺎ ﺍﻻﻣﻮﺭ ﺷﺪﻳﺪ

ﺑﺎﻛﺮ ﺍﻟﻤﺴﺎﺀ ﺟﺎﺑﺖ ﺍﺧﻮﻫﺎ ﺍﺳﻤﻮ ﻋﺒﺪﺍﻟﻬﺎﺩﻱ ﺍﺻﻐﺮ ﻣﻨﻬﺎ ..

ﻗﺎﻟﺖ ﻟﻴﻬﻮ : ﻋﺎﻳﺰﺍﻙ ﺗﻤﺸﻲ ﻣﻌﺎﻱ ﻟﻤﻮﺿﻮﻉ ﻳﻜﻮﻥ ﺳﺮﻱ ﺑﻴﻨﻲ ﻭﺑﻴﻨﻚ ..

ﻋﺒﺪ ﺍﻟﻬﺎﺩﻱ ﻗﺎﻝ ﻟﻴﻬﺎ ﺷﻨﻮ ؟؟

ﻗﺎﻟﺘﻠﻴﻬﻮ : ﻣﺎﺷﺔ ﺍﻗﺎﺑﻞ ﺧﻄﻴﺒﻲ .. ﻭﻋﺎﻳﺰﺓ ﺍﻗﻄﻊ ﻋﻼﻗﺘﻲ ﻣﻌﺎﻫﻮ

ﺍﺻﻼ" ﺍﻣﻲ ﺩﺍﻗﺔ ﻓﻴﻬﻮ ﺟﺮﺱ ﻭﻫﻮ ﻇﺮﻭﻓﻮ ﻣﺎﻣﺴﺎﻋﺪﺍﻫﻮ .. ﻭﺍﺧﻴﺮﺍ ﻃﻠﻌﺖ ﻟﻲ ﻛﻼﻣﺎﺕ .. ﺑﺘﻤﺸﻲ ﻣﻌﺎﻱ ؟؟

ﻗﺎﻝ ﻟﻴﻬﺎ : ﻳﻼ .. ﻭﺍﻟﻠﻪ ﻣﺎﻳﻤﺸﻲ ﻣﻌﺎﻙ ﺍﻻ ﺍﻧﺎ

ﻭﺭﻛﺒﻮ ﺭﻗﺸﺔ ﻭﻣﺸﻮ ﺍﻧﺘﻈﺮﻭﻫﻮ ﻣﻦ ﻗﺒﻞ ﺍﻟﻤﻐﺮﺏ ﻓﻲ ﺍﻟﺰﻭﺍﺩﺓ

ﺍﻟﺰﻭﺍﺩﺓ ﺩﻱ ﺣﺪﻳﻘﺔ ﻓﻲ ﺑﺤﺮﻱ .. ﻗﺮﻳﺒﺔ ﻣﻦ ﻛﻮﺑﺮﻱ ﺍﻟﺤﺪﻳﺪ

ﻭﺍﻧﺘﻈﺮﻭ ﺷﻮﻳﺔ .. ﻟﻐﺎﻳﺔ ﺑﻌﺪ ﺍﻟﻤﻐﺮﺏ .. ﺧﺪﺭ ﻃﺒﻌﺎ ﻣﻦ ﺍﻟﺸﻐﻞ ﻏﺸﺎ ﺑﻴﺘﻬﻢ ﻓﻲ ﺍﻟﺤﺎﺝ ﻳﻮﺳﻒ ﺷﺎﺭﻉ ﻭﺍﺣﺪ .. ﻭﻏﻴﺮ ﻭﻟﺒﺲ ﺳﺮﻳﻊ ﺭﻛﺐ ﺟﺎﻫﺎ

ﺍﻭﻝ ﻣﺎﺷﺎﻓﺘﻮ ﺟﺎﻱ ﺩﺍﺧﻞ ﺍﻟﺰﻭﺍﺩﺓ ..

ﻗﺎﻟﺖ ﻟﻲ ﺍﺧﻮﻫﺎ ﻋﺒﺪ ﺍﻟﻬﺎﺩﻱ : ﺍﻭﻝ ﻣﺎ ﺗﺴﻠﻢ ﻋﻠﻴﻬﻮ .. ﺍﺳﺘﺎﺫﻥ ﻭﺍﻣﺸﻲ ﺍﻗﻌﺪ ﻓﻲ ﺍﻟﻜﺮﺳﻲ ﺩﺍﻙ .. ﻋﺸﺎﻥ ﻣﺎﺗﺴﻤﻊ ﺍﻟﻜﻼﻡ ..

ﻗﺎﻝ ﻟﻴﻬﺎ : ﺷﻜﻠﻚ ﺍﻟﻠﻴﻠﺔ ﻋﺎﻳﺰﺓ .. ﺗﻌﺼﺮﻳﻬﻮ ﻭﺗﻤﺼﺮﻳﻬﻮ ..

ﻗﺎﻟﺖ ﻟﻴﻬﻮ : ﺍﺻﺒﺮ ..

ﺍﻭﻝ ﻣﺎﺟﺎ ﺧﺪﺭ ﻭﺳﻠﻢ .. ﻭﻋﺒﺪ ﺍﻟﻬﺎﺩﻱ ﻗﺎﻝ ﻋﻦ ﺍﺫﻧﻜﻢ ﻳﺎﺟﻤﺎﻋﺔ ﻋﻨﺪﻱ ﺍﺗﺼﺎﻝ

ﺍﻭﻝ ﻣﺎﻗﻌﺪﺕ ﻭﺳﺄﻟﺘﻪ ﻣﻦ ﺍﺧﺒﺎﺭﻭ ﻭﺍﺧﺒﺎﺭ ﺍﻟﺸﻐﻞ ..

ﻗﺎﻟﺖ ﻟﻴﻬﻮ : ﻳﺎﺧﺪﺭ .. ﻃﺒﻌﺎ" ﺍﻧﺖ ﻋﺎﺭﻑ ﺍﻣﻲ ﻣﺎﻋﺎﻳﺰﺍﻙ ﻛﻠﻮ ﻛﻠﻮ ﻭﺍﻧﺎﻣﺎﻋﺎﻳﺰﺓ ﺍﺩﺧﻞ ﻓﻲ ﻣﻮﺿﻮﻉ ﻓﻴﻬﻮ ﻏﻀﺐ ﺍﻣﻲ .. ﻭﻫﺴﻲ ﻣﺮﺷﺤﻴﻦ ﻟﻲ ﻭﺍﺣﺪ ﻣﻐﺘﺮﺏ .. ﻭﺍﻣﻲ ﻋﺎﻳﺰﺍﻫﻮ ﺷﺪﻳﺪ .. ﻭﺍﻧﺎ ﺷﻜﻠﻲ ﻋﺎﻳﺰﺓ ﺍﺭﺿﺦ ﻟﻠﻤﻮﺿﻮﻉ ﺩﻩ

ﻗﺎﻝ ﻟﻴﻬﺎ : ﺣﺮﺍﻡ ﻋﻠﻴﻚ ﻳﺎ ﻫﻨﺪ .. ﻧﺤﻦ ﻣﺘﻔﻘﻴﻦ .. ﻭﺍﻧﺎ ﺑﺎﻧﻲ ﻋﻠﻴﻚ ﻛﻞ ﺍﻣﺎﻟﻲ

ﻟﻴﻪ ﻋﺎﻳﺰﺓ ﺗﺒﻴﻌﻨﻲ ﺑﺎﻟﺴﻬﻮﻟﺔ ﺩﻱ ..

ﻗﺎﻟﺖ ﻟﻴﻬﻮ ' ﻻﻧﻚ ............... ﻭﻻ ﺧﻠﻴﻚ .. ﻣﺎﻓﻲ ﺩﺍﻋﻲ ﺍﺗﻜﻠﻢ

ﻗﺎﻝ ﻟﻴﻬﺎ : ﺍﺗﻜﻠﻤﻲ ﻣﺎﻓﻲ ﻣﺸﻜﻠﺔ ..

ﻗﺎﻟﺖ ﻟﻴﻬﻮ : ﻣﻤﻜﻦ ﺍﺳﺄﻟﻚ ﺳﺆﺍﻝ ؟ ﺍﻧﺖ ﻳﻮﻡ ﺍﻧﺎ ﺍﺗﺼﻠﺖ ﻋﻠﻴﻚ ﻭﺍﻧﺖ ﻗﻠﺖ ﻟﻲ ﺍﻧﺎ ﻓﻲ ﺍﻟﺤﺪﺍﻳﻖ .. ﻗﻠﺖ ﻟﻲ ﻣﻌﺎﻱ ﻣﻨﻮ ؟؟

ﻗﺎﻝ ﻟﻴﻬﺎ : ﻗﻠﺖ ﻟﻴﻚ ﻣﻌﺎﻱ ﺍﺻﺤﺎﺑﻲ .. ﻭﻓﻌﻼ" ﻛﺎﻥ ﻣﻌﺎﻱ ﺍﺻﺤﺎﺑﻲ ﺍﻧﺎ ﻣﺎﺑﻜﺬﺏ ﻋﻠﻴﻚ ﻗﺎﻟﺖ ﻟﻴﻬﻮ ﺍﺻﺤﺎﺑﻚ ﻣﻨﻮ؟

ﻗﺎﻝ ﻟﻴﻬﺎ : ﻋﻼﺀ ﻭﻋﻤﺎﺭ ﻭﻧﺴﺮﻳﻦ ﻭﻭﻭ ﺍﻟﻤﻬﻢ ﻋﺪﺍﻫﻢ ﻛﻠﻬﻢ

ﻭﻗﺎﻝ ﻟﻴﻬﺎ : ﻓﻲ ﺍﻟﻠﺤﻈﺔ ﺍﻻﻧﺘﻲ ﺍﺗﺼﻠﺘﻲ ﻋﻠﻲ ﺑﺎﻟﺬﺍﺕ .. ﻛﺎﻧﺖ ﻧﺴﺮﻳﻦ ﻣﺎﺷﺔ ﺗﺠﻴﺐ ﺭﺻﻴﺪ .. ﻭﺍﻧﺎ ﻣﺸﻴﺖ ﻣﻌﺎﻫﺎ .. ﻭﺍﺣﻜﻲ ﻟﻴﻚ ﺑﺎﻟﺘﻔﺼﻴﻞ ﻛﻤﺎﻥ

ﻧﺴﺮﻳﻦ ﻗﺎﻟﺖ ﻟﻲ : ﺍﻧﺎ ﺑﺎﻟﻨﺴﺒﺔ ﻟﻴﻚ ﺷﻨﻮ؟

ﻗﻠﺖ ﻟﻴﻬﺎ : ﺻﺪﻳﻘﺔ ﻭﺍﺧﺖ ..

ﻗﺎﻟﺖ ﻟﻲ : ﻣﺎﻓﻲ ﺻﺪﺍﻗﺔ ﺑﻴﻦ ﺍﻟﺒﺖ ﻭﺍﻟﻮﻟﺪ ..

ﻭﻗﺎﻟﺖ ﻟﻲ : ﻳﺎ ﺍﻣﺎ ﺗﺠﻲ ﺑﻴﺘﻨﺎ ﺗﻄﻠﺒﻨﻲ .. ﻳﺎ ﺍﻣﺎ ﺗﺎﻧﻲ ﻣﺎﺑﺘﺸﻮﻑ ﻭﺷﻲ ..

ﻭﺍﻧﺎ ﺗﻔﺎﺟﺄﺕ ﻣﻦ ﻛﻼﻣﻬﺎ

ﻭﻗﻠﺖ ﻟﻴﻬﺎ : ﺍﻧﺎ ﻣﺮﺗﺒﻂ ﺑﻮﺍﺣﺪﺓ ﻭﻣﺎ ﺑﻘﺪﺭ ﺍﺭﺗﺒﻂ ﺑﻴﻚ .. ﻭﻗﻌﺪﺕ ﺗﺒﻜﻲ وﻭﻭﻭﻭ ﺍﻟﻤﻬﻢ ﺣﻜﺎ ﻟﻴﻬﺎ ﺍﻟﺤﻘﻴﻘﺔ ﺑﺎﻟﺘﻔﺼﻴﻞ ﺍﻟﻤﻤﻞ

ﻟﻐﺎﻳﺔ ﻣﺎﻗﺎﻝ ﻟﻴﻬﺎ : ﻭﻃﻠﺒﺖ ﻣﻨﻲ ﺭﻗﻤﻚ ﻋﺸﺎﻥ ﺗﺘﻌﺮﻑ ﻋﻠﻴﻚ ﻟﻜﻦ ﺍﻧﺎ ﻋﺮﻓﺖ ﻫﺪﻓﻬﺎ .. ﻭﺍﺩﻳﺘﻬﺎ ﺭﻗﻤﻚ .. ﻭﻋﺎﻳﺰ ﺍﺷﻮﻓﻚ ﺑﺘﻮﺍﺟﻬﻲ ﺍﻟﻨﻮﻋﻴﺔ ﺩﻱ ﻛﻴﻒ .. ﻭﻳﺎ ﻟﻼﺳﻒ ﻣﻊ ﺍﻭﻝ ﺍﻣﺘﺤﺎﻥ ﺍﻧﻬﺮﺗﻲ ﻳﺎﻫﻨﺪ

ﻫﻨﺪ ﻗﻌﺪﺕ ﺗﺒﻜﻲ .. ﻭﻏﻠﺒﻬﺎ ﺗﻤﺴﻚ ﻧﻔﺴﻬﺎ ﻣﻦ ﺍﻟﺒﻜﺎ .. ﻟﻐﺎﻳﺔ ﻣﺎ ﺍﺧﻮﻫﺎ ﻻﺣﻆ ﻟﻴﻬﺎ ..

ﻭﺟﺎ ﻗﺎﻝ ﻟﻴﻬﺎ : ﻣﺎﻟﻚ ﻳﺎﻫﻨﺪ؟؟

ﺍﻟﺰﻭﻝ ﺩﻩ ﻗﺎﻝ ﻟﻴﻚ ﺷﻨﻮ؟

ﻗﺎﻟﺖ ﻟﻴﻬﻮ : ﺍﺭﺟﻊ ﻣﻜﺎﻧﻚ ﻳﺎ ﻫﺎﺩﻱ .. ﻟﻮ ﺳﻤﺤﺖ

ﻭﻗﺒﻠﺖ ﻋﻠﻰ ﺧﺪﺭ ﻗﺎﻟﺖ ﻟﻴﻬﻮ : ﺍﻧﺎ ﺍﺳﻔﺔ ﻳﺎﺧﺪﺭ ﺳﺎﻣﺤﻨﻲ .. ﺳﺎﻣﺤﻨﻲ ﺍﻧﻲ ﺷﻜﻴﺖ ﻓﻴﻚ ﻟﻲ ﻟﺤﻈﺔ .. ﺣﺮﺍﻡ ﻋﻠﻴﻬﺎ ﺍﻟﺒﺖ ﺩﻱ ﻋﻴﺸﺘﻨﻲ ﻓﻲ ﻏﻢ ﺍﻧﺎ ﻗﺮﺑﺖ ﺍﺟﻦ ..

ﻗﺎﻝ ﻟﻴﻬﺎ : ﻭﻻﻳﻬﻤﻚ .. ﺑﺲ ﺍﻟﻤﻔﺮﻭﺽ ﻣﺎﺗﺼﺪﻗﻲ ﻛﻞ ﻣﺎﻳﻘﺎﻝ .. ﺣﺘﻰ ﻟﻮ ﺣﻜﻮ ﻟﻴﻚ ﺍﻟﺤﻘﻴﻘﺔ ﻣﺨﻠﻮﻃﺔ ﺑﺎﻟﻜﺬﺏ ﺍﺗﺄﻛﺪﻱ ﺍﻭﻝ ..

ﻳﺎﻫﻨﺪ ﻋﻤﺮﻭ ﺍﻟﻜﺬﺏ ﻭﺍﻟﻠﻒ ﻭﺍﻟﺪﻭﺭﺍﻥ .. ﺑﻌﻘﺪ ﺍﻟﻤﺸﺎﻛﻞ ﺍﻛﺘﺮ .. ﻭﺍﻟﺤﻘﻴﻘﺔ ﻣﻬﻤﺎ ﻛﺎﻧﺖ ﻫﻲ ﺍﻟﺒﺘﺨﻠﻲ ﺍﻻﻣﻮﺭ ﺯﻱ ﻓﻠﻖ ﺍﻟﺼﺒﺎﺡ ﺍﻟﺒﺎﻫﻲ ..

ﺍﻧﺎ ﻳﺎﻫﻨﺪ ﺑﻌﺸﻖ ﺍتنين ﻓﻲ ﺍﻟﺪﻧﻴﺎ .. ﻭﺍﺣﺪﺓ ﻫﻨﺪ .. ﻭﺍﻟﺘﺎﻧﻴﺔ ﺍﻟﺤﻘﻴﻘﺔ ..

ﺍﻫﺎ ﺍﺧﺒﺎﺭ ﺍﻟﻤﻐﺘﺮﺏ ﺷﻨﻮ؟؟ ﻭﻗﻌﺪ ﻳﻀﺤﻚ ..

ﺑﻘﺖ ﺗﻀﺤﻚ ﻭﺩﻣﻮﻋﻬﺎ ﻓﻲ ﻋﻴﻮﻧﻬﺎ .. ﻭﺍﻻﻣﻮﺭ ﺍﺗﻀﺤﺖ ﺑﺴﺒﺐ ﺍﻟﺼﺪﻕ .. ﻭﺍﻟﺸﻔﺎﻓﻴﺔ

ﻭﻟﻮ ﺧﺪﺭ ﻛﺬﺏ ﻭﻟﻒ ﻭﺩﻭﺭ .. ﻛﺎﻥ ﺿﻴﻊ ﺍﻱ ﺷﻲ ﻓﻲ ﻟﺤﻈﺔ .. ﺍﻟﻤﻬﻢ ﺍﻟﻘﻌﺪﺓ ﺍﺗﺤﻮﻟﺖ ﻟﻲ ﻭﻧﺴﺔ ﺣﻠﻮﺓ .. ﻭﻛﻼﻡ ﺟﻤﻴﻞ .. ﻭﻭﻋﺪﻫﺎ ﺍﻧﻮ ﻓﻲ ﺍﺧﺮ ﺍﻻﺳﺒﻮﻉ ﺡ ﻳﺴﺘﻠﻢ ﻗﺮﻭﺵ ﻭﺍﺣﺘﻤﺎﻝ ﻛﺒﻴﺮ ﻳﺠﻴﻬﻢ

ﻓﻲ ﺍﻟﺒﻴﺖ ﻗﺮﻳﺐ

ﻭﻓﺮﺣﺖ ﺟﺪﺍ" ﻭﻭﺩﻋﺘﻮ ﻭﻣﺸﺖ ﻓﺮﺣﺎﻧﺔ ﺩﺍﻳﺮﺓ ﺗﻄﻴﺮ

ﻓﻬﻞ ﺗﺪﻭﻡ ﻫﺬﻩ ﺍﻟﻔﺮﺣﺔ ..

يتبع....

#الأصابع_الشريفة
بقلم: طارق اللبيب

الجزء 06

ﺧﺪﺭ ﻓﻲ ﺍﻟﻨﻬﺎﻳﺔ ﻭﺩﻋﻬﻢ .. ﻭﻫﻨﺪ ﻭﺍﺧﻮﻫﺎ ﺭﻛﺒﻮ .. ﻣﺸﻮ ﺍﻟﺒﻴﺖ ﻭﻫﻮ ﺭﻛﺐ ﻣﺸﻰ ﺍﻟﺤﺎﺝ ﻳﻮﺳﻒ ﺷﺎﺭﻉ ﻭﺍﺣﺪ ..

ﻛﺎﻥ ﻣﺮﺗﺎﺡ ﻭﻣﺒﺴﻮﻁ ﻣﻦ ﻫﻨﺪ .. ﺑﺲ ﻓﻲ ﺣﺎﺟﺔ ﺟﻮﺓ ﻓﻲ ﻗﻠﺒﻮ ﻣﺎﺍﺍﺍﺍﺍﺍﺍ ﻣﺮﻳﺤﺎﻫﻮ .. ﺯﻱ ﺍﻟﻜﺎﻧﻮ ﻓﻲ ﺣﺎﺟﺔ .. ﻣﺎ ﻣﺰﺑﻮﻃﺔ ﻓﻲ ﻣﻮﺿﻮﻋﻮ ﻣﻊ ﻫﻨﺪ .. ﻟﻜﻦ ﻳﻌﻨﻲ ﻣﺎﻣﻬﺘﻢ ﺑﻴﻬﺎ ﺷﺪﻳﺪ .. ﺍﻟﻤﻬﻢ ﻫﻮ ﻋﺎﻳﺰﻫﺎ ﻭﺧﻼﺹ .. ﻭﺍﻟﺤﺎﺟﺔ ﺍﻟﻤﺮﻳﺤﺎﻫﻮ ﺍﻛﺘﺮ .. ﺍﻧﻮ ﻫﻲ ﺑﺖ ﻭﻓﻴﺔ ﻟﻴﻬﻮ ﻭﺷﺎﺭﻳﺎﻫﻮ .. ﻭﺍﻟﺤﻜﺎﻳﺔ ﺩﻱ ﻣﻐﻄﻴﻪ ﻋﻠﻰ ﻛﻞ ﺷﻲ .. ﻣﺮﺕ ﺍﻻﻳﺎﻡ .. ﻭﺍﻻﺳﺒﻮﻉ ﺍﻧﺘﻬﻰ ..

ﻓﻲ ﺍﺗﺼﺎﻝ ﺍﻟﺼﺒﺎﺡ ﺟﺎﺀ ﻻﻡ ﻫﻨﺪ .. ﻣﻦ ﺑﺖ ﺧﺎﻟﺘﻬﺎ .. ﺍﺳﻤﻬﺎ ﺳﻤﻴﺔ

ﻗﺎﻟﺖ ﻟﻴﻬﺎ .. ﻳﺎ ﺍﻧﺎ ﻳﺎ ﺍﻗﺒﺎﻝ ﻋﺎﻳﺰﺓ ﺍﺗﻜﻠﻢ ﻣﻌﺎﻙ .. ﻭﻛﻼﻡ ﻣﻬﻢ ﺷﺪﻳﺪ ﺧﺘﻲ ﻟﻲ ﺑﺎﻟﻚ ﻛﻮﻳﺲ ..

ﺍﻧﺎ ﻋﻨﺪﻱ ﺣﻤﺎﻱ ﺍﺧﻮ ﺭﺍﺟﻠﻲ .. ﻣﻬﻨﺪﺱ ﺷﻐﺎﻝ ﻓﻲ ﺷﺮﻛﺔ ﻣﻘﺎﻭﻻﺕ ﻓﻲ ﺍﻟﺴﻌﻮﺩﻳﺔ .. ﻭﻟﺪ ﺻﻐﻴﺮ ﻋﻤﺮﻭ 28 ﺳﻨﺔ .. ﻣﺎﺷﺎﺀ ﺍﻟﻠﻪ ﺍﻱ ﺑﺖ ﺗﺘﻤﻨﺎﻫﻮ .. ﺍﻟﺰﻭﻝ ﺩﻩ ﻗﺎﻝ ﺩﺍﻳﺮ ﻟﻴﻬﻮ ﻋﺮﻭﺱ ﻋﻠﻰ ﻣﺴﺆﻭﻟﻴﺘﻨﺎ .. ﻭﺍﻧﺎ ﻭﺍﻟﻠﻪ ﻗﺪﺭ ﻣﺎﻓﻜﺮﺕ ﻣﺎﻟﻘﻴﺖ ﺑﺖ ﺑﺘﺴﺘﺎﻫﻠﻮ ﻏﻴﺮ ﻫﻨﺪﻭﻳﺔ ﺍﻟﻌﺴﻮﻟﺔ ..

ﻭﻋﺎﻳﻨﻲ ﺍﺻﻼ ﻧﺤﻦ ﻣﺎﺩﺍﻳﺮﻳﻦ ﻣﻨﻬﺎ ﺭﺍﻱ .. ﺍﻻ ﺗﺸﻮﻓﻮ ﻭﺑﻌﺪﻳﻦ ﺗﺪﻳﻨﺎ ﺭﺍﻳﻬﺎ ..

ﻭﺍﻧﺎ ﻣﺘﺎﻛﺪﺓ ﺍﻧﻬﺎ ﺣﺘﺠﻦ ﻓﻴﻬﻮ .. ﺍﻟﻮﻟﺪ ﻭﺟﺎﻫﺔ .. ﻭﻃﻮﻝ ﻭﻋﺮﺽ ﻭﺭﺍﺣﺎﺕ .. ﻭﻗﺮﻭﺵ .. ﻭﺍﻟﻠﻪ ﺑﺘﻚ ﺗﺴﻌﺪ ﻓﻲ ﺣﻴﺎﺗﻬﺎ ﺩﻱ .. ﻭﺗﻌﻴﺶ ﻣﻠﻜﺔ ﻓﻲ ﺯﻣﺎﻧﻬﺎ ..

ﻳﺎﺯﻭﻝ ﺍﻗﺒﺎﻝ ﺍﻡ ﻫﻨﺪ ﺑﻘﺖ ﺗﺘﻤﻄﻖ .. ﻭﺗﻐﺮﻳﺪ ﻓﻲ ﻋﻴﻮﻧﻬﺎ .. ﻟﻜﻦ ﻣﺎ ﺩﺍﻳﺮﺓ ﺗﻈﻬﺮ ﺍﻟﺮﻏﺒﺔ ﺍﻟﻌﺎﺭﻣﺔ ﺩﻱ ﻟﻲ ﺳﻤﻴﺔ ..

ﻗﺎﻟﺖ ﻟﻴﻬﺎ ﺣﺎﺿﺮ ﻳﺎ ﺳﻤﻴﺔ .. ﺑﺲ ﻭﺍﻟﻠﻪ ﻃﺒﻌﺎ .. ﺍﻧﺘﻲ ﻋﺎﺭﻓﺔ ﻫﻨﺪ ﻭﻗﻮﺓ ﺭﺍﺳﻬﺎ .. ﻭﻻﺑﻌﺠﺒﻬﺎ ﺍﻟﻌﺠﺐ ﻭﻻ ﺍﻟﺼﻴﺎﻡ ﻓﻲ ﺭﺟﺐ .. ﻭﺍﻧﺎ ﺧﺎﻳﻔﺔ ﺗﻘﻮﻡ ﺗﺨﺬﻟﻨﻲ ﻣﻌﺎﻛﻢ .. ﺍﻧﺘﻮ ﻧﺎﺱ ﻣﺎﺑﺘﺴﺘﺎﻫﻠﻮ ﺍﻻﺣﺮﺍﺝ

ﻗﺎﻟﺖ ﻟﻴﻬﺎ ﺍﺳﻤﻌﻲ ﻳﺎ ﺍﻗﺒﺎﻝ .. ﻣﺎﻓﻲ ﺍﺣﺮﺍﺝ ﻭﻻ ﺣﺎﺟﺔ .. ﺧﻠﻴﻬﺎ ﺗﺸﻮﻓﻮ ﻟﻮ ﻗﺎﻟﺖ ﻣﺎﻋﺎﻳﺰﺍﻫﻮ .. ﻧﺤﻦ ﻣﺎﻋﻨﺪﻧﺎ ﺍﻱ ﻣﺸﻜﻠﺔ .. ﺍﻟﺰﻭﺍﺝ ﺑﺎﻟﺘﺮﺍﺿﻲ .. ﻟﻜﻦ ﻭﺍﻟﻠﻪ ﺍﻧﺎ ﻣﺘﺄﻛﺪﺓ ﺍﻧﻬﺎ ﺗﺸﻮﻓﻮ .. ﺗﺠﻦ ﺑﻲ ﺷﻮﻗﻮ ﻳﺎﺧﻲ ﺩﻩ ﺍﻟﺒﻨﺎﺕ ﻛﻠﻬﻦ ﻣﻜﺴﺮﺍﺕ ﻓﻴﻬﻮ .. ﻭﻣﻜﺴﺮﺍﺕ ﻓﻴﻬﻮ ﻣﻦ ﻗﺒﻞ ﻣﺎﻳﻐﺘﺮﺏ .. ﻭﺍﻱ ﻭﺍﺣﺪﺓ ﻣﺎﻋﻨﺪﻫﺎ ﻣﺎﻧﻊ ﺗﻌﺮﺳﻮ ﻭﻫﻮ ﻣﻔﻠﺲ .. ﺍﻫﺎ ﺑﻌﺪ ﻣﺎ ﻣﺸﻰ ﻭﺟﺎﺏ ﺍﻟﻘﺮﻭﺵ .. ﻭﺍﺷﺘﺮﻯ ﺑﻴﺖ ﻓﻲ ﺣﻲ ﺍﻟﻨﺼﺮ ﺑﻘﻦ ﺍﻟﺒﻨﺎﺕ ﺑﺮﺍﻫﻦ ﻳﺘﺼﻠﻦ ﻋﻠﻴﻬﻮ .. ﻭﺍﻟﻠﻪ ﺯﻱ ﻣﺎ ﺍﻗﻮﻟﻚ .. ﻭﻫﻮ ﻃﺒﻌﺎ " ﻣﺎﺑﻴﺜﻖ ﻓﻲ ﺍﻱ ﻭﺍﺣﺪﺓ ..

ﻣﺎﺑﻴﺜﻖ ﻓﻴﻨﺎ ﺍﻻ ﻧﺤﻦ .. ﻭﻣﻌﺠﺐ ﺑﻲ ﺷﺨﺼﻴﺘﻲ ﺍﻧﺎ .. ﻭﻗﺎﻝ ﻟﻲ ﺑﺲ ﺍﻧﺎ ﺩﺍﻳﺮ ﻟﻲ ﻭﺍﺣﺪﺓ .. ﺗﺠﻴﺒﻴﻬﺎ ﻟﻲ ﺍﻧﺘﻲ .. ﻭﺍﻧﺎ ﻳﺎ ﺍﻗﺒﺎﻝ ﺷﺨﺼﻴﺎ " ﻣﺎﺑﺜﻖ ﻓﻲ ﺑﻨﺎﺕ ﺍﻟﺰﻣﻦ ﺩﻩ .. ﺛﻘﺘﻲ ﺷﻠﺘﻬﺎ ﻭﻛﺒﻴﺘﻬﺎ ﻓﻲ ﻫﻨﺪﻭﻳﺔ ﺣﺒﻴﺒﺘﻲ .. ﻭﺍﻧﺎ ﻣﺘﺎﻛﺪﺓ ﺡ ﺗﻜﻮﻥ ﻋﻠﻰ ﻗﺪﺭ ﺛﻘﺘﻲ ﻓﻴﻬﺎ ..

ﺍﻫﺎ ﺍﻧﺘﻲ ﺭﺍﻳﻚ ﺷﻨﻮ؟ ﻗﺎﻟﺖ ﻟﻴﻬﺎ ﺍﻧﺎ ﻳﺎﺳﻤﻴﺔ ﺍﻗﺘﻨﻌﺖ ﺑﻲ ﻛﻼﻣﻚ ﻟﻜﻦ ﺍﻟﺒﻴﻘﻨﻊ ﻫﻨﺪﻭﻳﺔ ﻣﻨﻮ؟

ﻗﺎﻟﺖ ﻟﻴﻬﺎ ﺍﻧﺘﻲ ﺣﺎﻭﻟﻲ ﺍﺗﻜﻠﻤﻲ ﻣﻌﺎﻫﺎ .. ﻟﻮ ﻗﺒﻠﺖ ﺧﻼﺹ .. ﻭﻟﻮ ﻣﺎﻗﺒﻠﺖ ..

ﺧﻠﻴﻨﻲ ﻟﻴﻬﺎ ﺍﻧﺎ .. ﺑﺲ ﻫﻲ ﺗﻘﺒﻞ ﺗﻘﻌﺪ ﻣﻌﺎﻫﻮ . ﻭﺗﺘﻌﺮﻑ ﻋﻠﻴﻬﻮ .. ﻭﺗﺎﻧﻲ ﻗﺮﺍﺭﻫﺎ ﺍﻟﺒﺘﺒﻘﻰ ﻋﻠﻴﻬﻮ .. ﻧﺤﻦ ﺑﻨﻘﺒﻠﻮ ..

ﻗﺎﻟﺖ ﻟﻴﻬﺎ ﻭﺍﻟﻠﻪ ﻳﺎﺳﻤﻴﺔ .. ﺍﻧﺘﻲ ﺷﻜﻠﻚ ﺍﻟﺰﻭﻝ ﺩﻩ ﻭﺍﺛﻘﺔ ﻓﻴﻬﻮ ﺷﺪﻳﺪ .. ﻗﺎﻟﺖ ﻟﻴﻬﺎ ﻭﺍﻟﻠﻪ ﻳﺎ ﺍﻗﺒﺎﻝ ﺍﻟﻮﻟﺪ ﻣﺒﺎﻟﻐﺔ .. ﺭﺑﻨﺎ ﻳﺤﻔﻈﻮ ﻣﻦ ﻋﻴﻮﻥ ﺍﻟﺤﺴﺎﺩ ..

ﺍﻫﺎ ﺑﺘﻜﻠﻤﻴﻬﺎ؟؟ .. ﻗﺎﻟﺖ ﻟﻴﻬﺎ ﻫﺴﻲ ﺍﻟﻮﻗﺖ ﺍﺗﺎﺧﺮ ﺑﻜﻠﻤﻬﺎ ﺑﻜﺮﺓ ..

ﺑﺎﻛﺮ ﻣﻦ ﺍﻟﺼﺒﺎﺡ ﻭﺍﻟﺒﻴﺖ ﻓﺎﺍﺍﺿﻲ ﺍﻗﺒﺎﻝ ﻧﺎﺩﺕ ﺑﺘﻬﺎ ﺍﻟﻠﻬﻲ ﻫﻨﺪﻳﻪ .. ﻗﺎﻟﺖ ﻟﻴﻬﺎ ﺍﺳﻤﻌﻴﻨﻲ ﺍﻧﺎ ﺍﻟﻠﻴﻠﺔ ﻋﻨﺪﻱ ﻣﻨﻚ ﻃﻠﺐ .. ﻟﻮ ﺳﻤﻌﺘﻴﻬﻮ ﻭﻧﻔﺬﺗﻴﻬﻮ ﻟﻲ .. ﺍﻧﺎ ﻣﺎﻋﻨﺪﻱ ﻣﺎﻧﻊ ﻣﻦ ﺍﻱ ﺯﻭﻝ ﺗﺨﺘﺎﺭﻳﻬﻮ .. ﻗﺎﻟﺖ ﻟﻴﻬﺎ ﻳﻌﻨﻲ ﺡ ﺗﻘﺒﻠﻲ ﺑﻲ ﺧﺪﺭ ؟ ﻗﺎﻟﺖ ﻟﻴﻬﺎ ﺍﻳﻮﺓ ﺑﻘﺒﻞ ﺑﻴﻬﻮ ..

ﻗﺎﻟﺖ ﻟﻴﻬﺎ ﺑﺎﻱ ﺷﻜﻞ ﻛﺎﻥ ؟ ﻗﺎﻟﺖ ﻟﻴﻬﺎ ﺑﺎﻱ ﺷﻜﻞ ﻛﺎﻥ .. ﺑﺲ ﺍﻧﺘﻲ ﺍﻋﻤﻠﻲ ﺍﻟﺒﻘﻮﻝ ﻟﻴﻚ ﻋﻠﻴﻬﻮ .. ﻗﺎﻟﺖ ﻟﻴﻬﺎ ﻳﻼ ﻳﺎ ﺍﻣﻲ ﻭﺍﻟﻠﻪ ﺍﻟﺒﺘﻘﻮﻟﻴﻬﻮ ﺑﻌﻤﻠﻮ .. ﻗﺎﻣﺖ ﺣﻜﺖ ﻟﻴﻬﺎ ﻛﻼﻡ ﺧﺎﻟﺘﻬﺎ ﺳﻤﻴﺔ ﻋﻦ ﺍﻟﻮﻟﺪ ﺍﻟﻤﻐﺘﺮﺏ ﺍﻻﺳﻤﻮ ﻣﻌﺘﺰ .. ﻭﺣﻜﺖ ﻟﻴﻬﺎ ﻋﻨﻮ .. ﻭﻋﻦ ﺷﻜﻠﻮ ﻭﺷﻐﻠﻮ ﻭﺣﺎﺟﺎﺗﻮ ﻛﻠﻬﺎ ﻟﻜﻦ ﻫﻨﺪ . ﺍﺻﻼ ﻣﺎﺩﺧﻞ ﺭﺍﺳﻬﺎ ﺍﻟﻜﻼﻡ ..

ﺍﻫﺎ ﻗﺎﻟﺖ ﻟﻴﻬﺎ ﺑﺲ ﺍﻧﺘﻲ ﻗﺎﺑﻠﻴﻬﻮ .. ﻭﺍﺗﻜﻠﻤﻲ ﻣﻌﺎﻫﻮ ﻭﺑﻌﺪﻳﻦ ﺍﻟﻘﺮﺍﺭ ﺍﻟﺒﺘﻘﻮﻟﻴﻬﻮ .. ﺍﻧﺎ ﺑﻜﻮﻥ ﺭﺿﻴﺎﻧﺔ ﻣﻦ ﻛﻞ ﺷﻲ .. ﻭﺍﻟﻠﻪ ﻣﺎ ﺍﻋﺎﺭﺿﻚ ﻓﻲ ﻛﻠﻤﺔ ..

ﻗﺎﻟﺖ ﻟﻴﻬﺎ ﺟﺪﺍ ﺣﺎﺿﺮ .. ﻭﻫﻨﺪﻭﻳﺔ ﻧﻮﺕ ﺑﺲ ﺗﻘﻌﺪ ﻣﻌﺎﻫﻮ ﻋﺸﺎﻥ ﺗﺮﻓﻀﻮ .. ﻻﻧﻬﺎ ﺭﻏﺒﺘﻬﺎ ﺑﺲ ﻓﻲ ﺧﺪﺭ .. ﺗﺎﻧﻲ ﻣﺎﻓﻲ ﻏﻴﺮﻭ ..

ﺍﻟﻤﻬﻢ ﺍﺗﻮﻋﺪﻭ ﻣﻌﺎﻫﻮ .. ﺍﻧﻮ ﻳﺠﻴﻬﻢ ﻧﺺ ﺍﻟﻨﻬﺎﺭ ﻭﻣﻌﺎﻫﻮ ﺳﻤﻴﺔ ﺑﺲ ﻋﺸﺎﻥ ﻳﻘﻌﺪ ﻣﻊ ﺍﻟﺒﺖ .. ﻭﻳﺘﻔﺎﻫﻤﻮ .. ﻭﻳﺸﻮﻓﻮ ﺑﻌﺾ ﺑﻌﺪﻳﻦ ﺍﻱ ﺯﻭﻝ ﻣﻨﻬﻢ ﻳﺪﻱ ﻗﺮﺍﺭﻩ ..

ﺳﻤﻴﺔ ﺣﻜﺖ ﻟﻲ ﻣﻌﺘﺰ .. ﻋﻦ ﻫﻨﺪ ﻭﻋﻦ ﺍﺩﺑﻬﺎ ﻭﻋﻦ ﺍﻟﺘﺰﺍﻣﻬﺎ ﻭﺍﺧﻼﻗﻬﺎ

ﻭﻃﺒﻌﺎ" ﻣﻌﺘﺰ .. ﻋﻘﺪﺗﻮ ﺍﻟﻮﺣﻴﺪﺓ ﻓﻲ ﺍﻟﺪﻧﻴﺎ ﺍﻻﺩﺏ ﻭﺍﻻﺣﺘﺮﺍﻡ ﻳﻌﻨﻲ ﻣﺎﺷﻐﺎﻝ ﺑﺎﻟﺴﻤﺎﺣﺔ ﻛﺘﻴﺮ ﺷﺮﻃﻮ ﺍﻻﻟﺘﺰﺍﻡ ﺯﻱ ﻛﻞ ﺍﻟﺸﺒﺎﺏ

ﻃﺒﻌﺎ ﻳﺎﺟﻤﺎﻋﺔ ﺍﻟﺒﻨﺎﺕ ﻏﺎﻟﺒﻴﺘﻦ ﻓﺎﻫﻤﺎﺕ ﻏﻠﻂ .. ﻗﺎﻳﻼﺕ ﺍﻟﺘﺒﺮﺝ ﻭﺍﻟﺘﻌﺮﻱ ﻭﺍﻟﺠﻠﺒﻄﺔ ﺍﻟﻔﻲ ﺍﻟﻮﺵ ﻫﻲ ﺍﻟﺒﺘﺠﻴﺐ ﺍﻟﺮﺟﺎﻝ ﻟﻠﻌﺮﺱ

ﻻﻻ ﺩﻩ ﺍﺳﺆﺃ ﻣﻔﻬﻮﻡ ﻳﺎ ﺑﻨﺎﺗﻲ .. ﺍﻱ ﺭﺟﻞ ﺭﻏﺒﺘﻮ ﻳﺨﺘﺎﺭ ﺷﺮﻳﻜﺔ ﺣﻴﺎﺗﻮ ﺗﻜﻮﻥ ﺍﻧﺴﺎﻧﺔ ﺫﺍﺕ ﺍﺧﻼﻕ ﻭﻋﻔﺔ ﻭﺍﻟﺘﺰﺍﻡ .. ﻭﺗﻜﻮﻥ ﻣﺘﺴﺘﺮﺓ ﺩﻱ ﺍﻟﺒﺜﻖ ﻓﻴﻬﺎ ﻭﻳﻄﻤﺌﻦ ﻟﻴﻬﺎ .. ﺍﻱ ﻭﺍﺣﺪ ﺗﻠﻘﺎﻫﻮ ﺑﺎﺭﻱ ﻟﻴﻬﻮ ﻭﺍﺣﺪﻱ ﻣﺘﺒﺮﺟﺔ ﻭﻣﺘﻌﺮﻳﺔ .. ﺍﻋﺮﻑ ﺍﻧﻬﺎ ﻋﻼﻗﺔ ﻣﺆﻗﺘﺔ ﻭﻣﺤﻜﻮﻡ ﻋﻠﻴﻬﺎ ﺑﺎﻟﻨﻬﺎﻳﺔ .. ﺑﻤﺠﺮﺩ ﻣﺎﻳﻠﻘﻰ ﺍﻟﺒﺖ ﺍﻟﺒﺘﺼﻮﻥ ﺷﺮﻓﻪ .. ﺑﺨﻠﻲ ﺩﻱ ﻭﻳﻤﺸﻲ ﻟﻴﻬﺎ .. ﻋﺸﺎﻥ ﻛﺪﺍ ﺍﻟﻔﻜﺮﺓ ﻳﺎﺑﻨﺎﺕ .. ﺍﻻﻟﺘﺰﺍﻡ ﻭﺍﻻﺧﻼﻕ ﻫﻲ ﺍﻟﺒﺘﺠﻴﺐ ﻟﻴﻚ ﻭﺩ ﺍﻟﺤﻼﻝ ..

ﺍﻫﺎ ﺑﻜﺮﺓ ﻧﺺ ﺍﻟﻨﻬﺎﺭ ﻭﺍﻟﺒﻴﺖ ﺑﺘﺎﻉ ﻧﺎﺱ ﻫﻨﺪ ﻓﺎﺍﺍﺿﻲ .. ﺑﺲ ﻫﻲ ﻭﺍﻣﻬﺎ ..

ﻃﻮﺍﻟﻲ ﺍﻟﻮﻟﺪ ﻭﺻﻞ ﻣﻊ ﻣﺮﺓ ﺍﺧﻮﻩ ﺳﻤﻴﻪ ﺑﺲ ﺍﻻﺗﻨﻴﻦ .. ﻭﻛﺎﻥ ﻛﻼﻡ ﺳﺮﻱ ﻭﻣﺘﻜﺘﻤﻴﻦ ﻋﻠﻴﻬﻮ ,, ﻳﻌﻨﻲ ﻛﺎﻧﻬﻢ ﺟﺎﻳﻴﻦ ﻓﻲ ﺷﻜﻞ ﺯﻳﺎﺭﺓ ﻋﺎﺩﻳﺔ .. ﺍﻗﺒﺎﻝ ﻓﺘﺤﺖ ﻟﻴﻬﻢ ﺍﻟﺒﺎﺏ .. ﻭﺭﺣﺒﺖ ﺑﻲ ﻣﻌﺘﺰ ﻭﺩﺧﻠﺘﻮ ﺑﻲ ﻏﺎﺩﻱ ..

ﻗﻌﺪﺗﻮ ﻓﻲ ﺍﻟﺼﺎﻟﻮﻥ ﺑﺘﺎﻉ ﺍﻟﻀﻴﻮﻑ .. ﻭﺩﺧﻠﺖ ﺳﻤﻴﺔ ﺑﻲ ﺟﻮﺓ .. ﻭﻋﻤﻠﺖ ﺍﻟﻌﺼﻴﺮ .. ﻗﺎﻟﺖ ﻟﻲ ﻫﻨﺪ ﺷﻴﻠﻲ ﻟﻴﻬﻮ ﺍﻟﻌﺼﻴﺮ ﺩﻩ .. ﻭﺷﻮﻓﻴﻬﻮ ﻛﻮﻳﺲ ﻭﺍﺗﺎﻛﺪﻱ .. ﺍﻫﺎ ﻫﻨﺪ ﺷﺎﻟﺖ ﻟﻴﻬﻮ ﺍﻟﻌﺼﻴﺮ ..

ﻳﺎﺧﻲ ﺍﻟﺒﺖ ﺩﻱ ﻭﻛﺖ ﺷﺎﻓﺘﻮ ﻻﻣﻦ ﺩﺍﻳﺮﺓ ﺗﻘﻊ ﺑﻲ ﺻﻴﻨﻴﺘﻬﺎ .. ﺍﻟﻮﺩ ﻛﺎﻥ ﻭﺟﺎﻫﺎﺕ ﺑﺎﻟﻄﺮﻳﻘﺔ ﺍﻟﺼﺎﺡ .. ﻭﻻﺑﺲ ﻟﺒﺲ ﻭﻣﺘﻘﻴﻒ ﻭﻃﺒﻌﺎ ﻋﻠﻰ ﺍﺳﺎﺱ ﺍﻧﻮ ﺯﻭﻝ ﻣﻨﻐﻨﻎ ﻭﻣﺮﺗﺎﺡ ﻭﺷﻮ ﺩﻩ ﻧﺎﺍﺍﺍﻋﻢ ..

ﺧﺘﺖ ﻟﻴﻬﻮ ﺍﻟﻌﺼﻴﺮ ﻭﺑﻘﺖ ﺗﺘﻜﺒﻜﺐ .. ﻗﻌﺪﺕ ﺧﺠﻼﻧﺔ ﻭﺗﺘﺒﺴﻢ ﻭﻛﻞ ﻣﺮﺓ ﺗﺴﺮﻕ ﻧﻈﺮﺓ ﻧﻈﺮﻩ ﺑﻲ ﻃﺮﻑ ﻋﻴﻨﻬﺎ .. ﻭﺍﻟﻮﻟﺪ ﺩﻩ ﻋﺠﺒﻬﺎ ﻋﺠﺐ ﺷﺪﻳﺪ .. ﻟﻜﻦ ﺟﻮﺍﻫﺎ ﺧﺪﺭ .. ﺑﻌﺪ ﻣﺎﻛﺎﻧﺖ ﺟﺎﻳﺔ ﻧﻴﺘﻬﺎ ﺑﺲ ﺗﺮﻓﻀﻪ ﻟﻜﻦ ﻣﻦ ﺷﺎﻓﺘﻮ ﺭﺍﺳﻬﺎ ﺟﺎﻁ .. ﻭﺑﻘﺖ ﻣﺎ ﻃﺒﻴﻌﻴﺔ .

ﻣﻌﻘﻮﻝ ﻓﻲ ﻧﺎﺱ ﻛﺪﺍ ﻳﺎﻫﻨﺪﻭﻳﻪ ؟؟؟

ﺍﻟﻤﻬﻢ ﻳﺎﺯﻭﻝ ﻗﻌﺪﺕ .. ﻭﺑﻘﻰ ﻳﺘﻜﻠﻢ ﻣﻌﺎﻫﺎ ﺑﺎﺳﻠﻮﺏ ﺳﺎﺣﺮ .. ﻭﻛﻼﻣﻮ ﺫﺍﺗﻮ ﺯﻱ ﻧﻘﻂ ﺍﻟﻌﺴﻞ .. ﻟﻤﺎ ﻳﺘﻜﻠﻢ ﺗﺘﻤﻨﻰ ﺍﻧﻮ ﻣﺎﻳﺴﻜﺖ

ﻗﺎﻝ ﻟﻴﻬﺎ ﻣﺎﺷﺎﺀ ﺍﻟﻠﻪ ﺗﺒﺎﺭﻙ ﺍﻟﻠﻪ ﻃﺒﻌﺎ .. ﺳﻤﻴﺔ ﺣﻜﺖ ﻟﻲ ﻋﻨﻚ .. ﻟﻜﻦ ﻭﺍﻟﻠﻪ ﺣﻜﺎﻳﺘﻬﺎ ﻣﺎﺗﺴﺎﻭﻱ ﻭﺍﺣﺪ ﻓﻲ ﺍﻟﻤﻴﺔ ﻣﻦ ﺍﻻﻧﺎ ﺷﻔﺘﻮ ﻗﺪﺍﻣﻲ ﺩﻩ .. ﻭﻫﻲ ﻃﺒﻌﺎ ﺧﺠﻼﻧﺔ ﻭﺗﺘﺒﺴﻢ ..

ﻭﻗﻌﺪ ﻳﺤﻜﻲ ﻟﻴﻬﺎ ﻋﻦ ﺍﻧﺠﺎﺯﺍﺗﻮ .. ﻃﺒﻌﺎ ﻳﺎ ﻫﻨﺪ ﺍﻧﺎ ﻣﻤﺎ ﻗﻤﺖ .. ﻗﻤﺖ ﻣﻌﺘﻤﺪ ﻋﻠﻰ ﻧﻔﺴﻲ .. ﻭﺍﻟﺤﻤﺪ ﻟﻠﻪ ﺭﺑﻨﺎ ﻳﻮﻓﻨﻲ ﻃﺒﻌﺎ ﺟﻼﻝ ﺍﺧﻮﻱ .. ﺯﺭﺝ ﺧﺎﻟﺘﻚ ﺳﻤﻴﺔ ﺍﻛﺒﺮ ﻣﻨﻲ ﺑﻲ 7 ﺳﻨﻮﺍﺕ .. ﻭﺍﺑﻮﻱ ﺑﻘﻰ ﺭﺍﺟﻞ ﻛﺒﻴﺮ ﺍﻟﺤﻤﺪ ﻟﻠﻪ ﺭﺑﺎﻧﺎ ﺍﺣﺴﻦ ﺗﺮﺑﻴﺔ .. ﻓﺎﻧﺎ ﺑﻤﺠﺮﺩ ﻣﺎ ﺗﺨﺮﺟﺖ .. ﻃﻮﺍﻟﻲ ﺣﺎﻭﻟﺖ ﺍﺗﺨﺎﺭﺝ ﻣﻦ ﺍﻟﺒﻠﺪ ﺩﻱ .. ﻻﻧﻬﺎ ﺑﺎﻟﺠﺪ ﺑﻘﺖ ﺑﻠﺪ ﻃﺎﺭﺩﺓ .. ﻭﺍﻻﻣﻮﺍﻝ ﻓﻴﻬﺎ ﺑﻘﺖ ﻣﻜﺪﺳﺔ ﻋﻨﺪ ﻧﺎﺱ ﻣﻌﻴﻨﻴﻦ ﻭﺍﻟﻠﻪ ﺍﻧﺎ ﻟﻮ ﻣﺎ ﺍﻣﻲ ﻭﺍﺑﻮﻱ ﻭﺍﺧﻮﺍﻧﻲ .. ﺗﺎﻧﻲ ﻣﺎﺑﺮﺟﻊ ﺍﻟﺒﻠﺪ ﺩﻱ ﻧﻬﺎﺋﻲ .. ﻳﺎﺧﻲ ﺍﻧﺎ ﻓﻲ ﺍﻟﻐﺮﺑﺔ ﻟﻤﻦ ﺍﺗﺬﻛﺮ ﺍﻧﻲ ﻣﻦ ﺍﻟﺴﻮﺩﺍﻥ ﺑﻘﺮﺏ ﺍﺑﻜﻲ ..

ﺍﻫﺎ ﺍﻟﺤﻤﺪ ﻟﻠﻪ ﺍﺷﺘﻌﻠﺖ ﻓﻲ ﺷﺮﻛﺔ ﻣﻘﺎﻭﻻﺕ .. ﻭﺍﻟﺤﻤﺪ ﻟﻠﻪ ﺍﺷﺘﺮﻳﺖ ﺑﻴﺖ ﻣﻦ ﻃﺎﺑﻘﻴﻦ ﻭﺍﺳﺴﺘﻮ ﻣﻦ ﻣﺠﺎﻣﻴﻌﻮ .. ﻭﺣﺠﺠﺖ ﺍﻣﻲ ﻭﺍﺑﻮﻱ .. ﻭﺍﺳﺴﺖ ﺷﺮﻛﺔ ﺻﺮﺍﻓﺔ ﻓﻲ ﺍﻟﺴﻮﻕ ﺍﻟﻌﺮﺑﻲ .. ﺣﺘﻲ ﺑﻌﺪ ﻛﺪﺍ ﻓﻜﺮﺕ ﻓﻲ ﺑﺖ ﺍﻟﺤﻼﻝ .. ﻭﺍﻟﻠﻪ ﻫﺴﻲ ﺍﻧﺎ ﻓﺮﺣﺎﻥ ﺑﻴﻚ ﺟﺪﺍ ﺑﺲ ﻳﺎﺭﻳﺖ ﺍﻛﻮﻥ ﻋﻨﺪ ﺣﺴﻦ ﻇﻨﻚ .. ﻻﻧﻲ ﻭﺍﻟﻠﻪ ﺑﺎﻟﺠﺪ ﻟﻘﻴﺖ ﻓﻴﻚ ﻧﻔﺲ ﻣﻮﺍﺻﻔﺎﺕ ﺍﻟﺒﺤﻠﻢ ﺑﻴﻬﺎ ..

ﻃﺒﻌﺎ " ﻫﻨﺪﻭﻳﻪ ﺑﻘﺖ ﺗﺒﻠﻊ ﻓﻲ ﺭﻳﻘﻬﺎ .. ﻭﺣﺴﺖ ﺍﻧﻮ ﺩﻱ ﻧﻌﻤﺔ ﻣﻦ ﺭﺑﻨﺎ ﺟﺎﺗﻬﺎ ﻓﻲ ﻣﻜﺎﻧﻬﺎ .. ﻭﻫﻲ ﺍﺳﺎﺳﺎ " ﻣﺴﺘﻌﺠﻠﺔ ﻟﻠﺰﻭﺍﺝ .. ﻭﺧﺪﺭ ﻟﺴﻊ ﻗﺪﺍﻣﻮ ﺯﻣﻦ .. ﻭﺑﺪﺕ ﺗﺤﺴﺐ ﻓﻲ ﺍﻻﻣﻮﺭ ﺣﺴﺎﺑﺎﺕ ﻣﻨﻄﻘﻴﺔ .. ﻗﺪﺭ ﺍﻟﻜﻤﻴﺔ ﺍﻟﻜﺎﻧﺖ ﺟﻮﺍﻫﺎ ﺑﻌﺪ ﺷﺎﻓﺘﻮ .. ﻟﻤﻦ ﺳﻤﻌﺖ ﻭﺿﻌﻮ ﺍﻟﻤﺎﺩﻱ ﺍﺗﺰﻋﺰﻋﺖ ﺯﻳﺎﺩﻩ ..

ﻟﻜﻦ ﺑﺮﺭﺭﺭﺿﻮ ﺟﻮﺍﻫﺎ ﻣﻦ ﺍﻟﻤﻌﺰﺓ ﻭﺍﻟﻤﺤﺒﺔ ﻟﻲ ﺧﻀﺮ ﺣﺴﻴﺐ ﺍﻟﻠﻪ ﻣﺎﻗﺎﺩﺭﺓ ﺗﺘﺨﻠﻰ ﻋﻨﻬﺎ ..

ﺻﺮﺍﺣﺔ ﻫﻨﺪ ﺑﻘﺖ ﻓﻲ ﻣﻨﺎﺯﻋﺔ ﻏﺮﻳﺒﺔ .. ﺑﻴﻨﻬﺎ ﻭﺑﻴﻦ ﻧﻔﺴﻬﺎ .. ﺑﻴﻦ ﺍﻟﻌﻘﻞ ﻭﺍﻟﻘﻠﺐ .. ﺑﻴﻦ ﺍﻟﺤﺐ ﻭﺍﻟﺴﻌﺎﺩﺓ ﺍﻟﺠﺎﺗﻬﺎ ﺗﺠﺮﻱ .. ﻭﺑﻘﺖ ﺗﺘﻜﻠﻢ ﺑﺮﺍﻫﺎ .. ﻳﺎﺧﻲ ﺣﺐ ﺑﻼ ﻫﻢ .. ﻋﻠﻴﻚ ﺍﻟﻠﻪ ﺩﻩ ﺯﻣﻦ ﺣﺐ؟ ﻟﻜﻦ ﻳﺎﻳﻤﻪ ﺧﺪﺭ ﺍﻟﺰﻳﻮ ﻣﻨﻮ؟ .. ﺗﺎﻧﻲ ﺗﻘﻮﻝ ﻫﻮﻱ ﺑﻼ ﺧﺪﺭ ﺑﻼ ﻓﻠﺲ؟؟ ﻭﺍﻟﻠﻪ ﺧﺪﺭ ﺩﻩ ﻳﺪﻳﻨﻲ ﺍﻟﺒﻮﺭﺓ ﺳﺎﻱ ﻳﺎﻳﻤﻪ .

ﺍﻫﺎ ﻳﺎﺯﻭﻝ ﺑﻌﺪ ﺷﻮﻳﺔ ﺟﺎﺕ ﺳﻤﻴﺔ ﻗﻌﺪﺕ ﻣﻌﺎﻫﻢ .. ﻭﺍﻣﻬﺎ ﺍﻗﺒﺎﻝ ﺑﺘﻌﻤﻞ ﻓﻲ ﺷﺎﻱ .. ﺳﻤﻴﺔ ﺟﺎﺕ ﻗﻌﺪﺕ ﻣﺨﺼﻮﺹ .. ﻋﺸﺎﻥ ﺗﺸﻮﻑ ﺍﻟﻤﻨﻈﺮ ﻭﺗﺤﺎﻭﻝ ﺗﻘﺮﺍ ﺍﻟﻤﺸﻬﺪ ﻗﺮﺍﺀﺓ ﺻﺎﻣﺘﻪ ..

ﺍﻟﻤﻬﻢ ﻫﻨﺪ ﻓﻲ ﺍﻟﻘﻌﺪﺓ ﺑﻘﺖ ﺯﻱ ﺍﻟﺤﻴﻄﺔ .. ﻣﺎﻗﺎﺩﺭﺓ ﺗﺘﻜﻠﻢ ﺑﻲ ﻛﻠﻤﺔ ﻭﻋﺎﻣﻠﺔ ﻓﻴﻬﺎ ﺍﻟﺒﺖ ﺳﺖ ﺍﻻﺩﺏ ﻭﺍﻟﺬﻭﻕ ..

ﻫﻨﺪ ﺍﺳﺎﺳﺎ " ﻣﺎﺑﺘﻌﺮﻑ ﺗﺴﻜﺖ .. ﻟﻜﻦ ﻫﻨﺎ ﻫﻮﻝ ﺍﻟﻤﻔﺎﺟﺄﺓ ﻭﺍﻟﻔﺮﺣﺔ ﺍﻟﺤﺴﺖ ﺑﻴﻬﺎ ﺑﺎﻟﻮﻟﺪ ﺍﻟﻠﻘﻄﺔ ﺩﻩ .. ﺍﺻﻼ ﻣﺒﻜﻤﺎﻫﺎ ﻛﻠﻮﻛﻠﻮ

ﺑﻌﺪ ﺍﻟﺠﻠﺴﺔ ﺍﻧﺘﻬﺖ .. ﺳﻤﻴﺔ ﻗﺎﻟﺖ ﻟﻴﻬﻢ ﺍﻫﺎ ﻳﺎﺟﻤﺎﻋﺔ .. ﻧﺤﻦ ﺑﻨﻤﺸﻲ ﻳﺎ ﻫﻨﺪ ﻗﺒﻞ ﺍﺑﻮﻙ ﻭﺍﺧﻮﺍﻧﻚ ﻳﺠﻮ ﻫﺴﻲ .. ﻫﺴﻲ ﺑﻌﺪ ﻛﻞ ﺯﻭﻝ ﻓﻴﻜﻢ ﺷﺎﻑ ﺍﻟﺘﺎﻧﻲ ﺍﺧﺪﻭ ﺭﺍﺣﺘﻜﻢ .. ﻓﻲ ﺍﻟﺘﻔﻜﻴﺮ ﺍﻻﺗﻨﻴﻦ ﻭﺳﺮﻳﻊ ﺗﺪﻳﻨﺎ ﺭﺍﻳﻜﻢ ﻋﺸﺎﻥ ﺍﻟﻮﻟﺪ ﺩﻩ ﺩﺍﻳﺮ ﻳﺘﺰﻭﺝ ﻓﻲ ﺍﺟﺎﺯﺗﻮ ﺩﻱ ﻳﺎﻫﻨﺪ ..

ﻣﻌﺘﺰ ﻗﺎﻝ ﻟﻴﻬﺎ ﺍﻧﺎ ﻳﺎﺳﻤﻴﻪ ﻣﺎﻋﻨﺪﻱ ﺭﺍﻱ .. ﻗﺒﻼﻥ ﺑﻴﻬﺎ .. ﻭﻣﻮﺍﻓﻖ ﻣﻠﻴﻮﻥ ﻓﻲ ﺍﻟﻤﻴﺔ ﻧﺸﻮﻑ ﺭﺍﻳﻬﺎ ﻫﻲ ..

ﻫﻨﺪ ﻗﺎﻟﺖ ﻟﻴﻬﺎ ﺧﻼﺹ ﻳﺎﺧﺎﻟﺘﻲ ﺳﻤﻴﺔ ﺍﺩﻭﻧﻲ ﻓﺮﺻﺔ ﻳﻮﻣﻴﻦ ﻛﺪﺍ ﻭﺍﺭﺩ ﻟﻴﻜﻢ ﺍﻥ ﺷﺎﺀ ﺍﻟﻠﻪ ..

ﻫﻨﺎ ﺍﻡ ﻫﻨﺪ ﺟﺎﺑﺖ ﺍﻟﺸﺎﻱ ﻭﺍﺻﺮﺕ ﺍﻧﻬﻢ ﻳﺸﺮﺑﻮ ﻭﻳﻄﻠﻌﻮ ..

ﺍﻫﺎ ﻳﺎﺯﻭﻝ ﺑﻌﺪ ﺍﻟﺠﻤﺎﻋﺔ ﻃﻠﻌﻮ ﻫﻨﺪ ﻗﻌﺪﺕ ﺗﺘﺴﻬﻰ ﻭﺗﺴﺮﺡ ﻫﻨﺎﺍﺍﺍﺍﺍﺍﺍﻙ ﻭﺍﻣﻬﺎ ﺗﻌﺎﻳﻦ ﻟﻴﻬﺎ .. ﻭﻋﺮﻓﺖ ﺍﻧﻮ ﺍﻟﺒﺖ ﺩﻱ ﺧﻼﺹ ﺿﺎﻋﺖ ﻓﻲ ﺑﺤﺮ ﻣﻌﺘﺰ .. ﻭﺍﻗﺒﺎﻝ ﺷﻜﻠﻬﺎ ﺍﻃﻤﺄﻧﺖ ﻭﻗﻨﻌﺖ ﺗﺐ ﻣﻦ ﻗﺼﺔ ﺧﺪﺭ ..

ﻗﺎﻟﺖ ﻟﻴﻬﺎ ﺍﻫﺎ ﻳﺎﻫﻨﺪﻭﻳﺔ .. ﺭﺍﻳﻚ ﺷﻨﻮ ﻓﻲ ﺍﻟﻌﺮﻳﺲ ﺩﻩ .. ﺍﺭﻳﺘﻮ ﻳﺎ ﻳﻤﺔ ﻋﺮﻳﺲ ﺍﻟﺒﻨﻴﺎﺕ .. ﻏﺎﻳﺘﻮ ﺩﻩ ﻣﺮﻗﺘﻮ ﻛﺪﻱ ﻓﻲ ﺍﻟﺸﺎﺭﻉ ﻳﻜﺴﺮ ﺍﻟﺪﻧﻴﺎ .. ﺩﻩ ﻛﺎﻧﻮ ﺩﺍﺳﻨﻮ ﻭﻳﻦ ؟؟

ﻭﻫﻨﺪ ﺗﻌﺎﻳﻦ ﻟﻲ ﺍﻣﻬﺎ ﻭﻻ ﺭﺩﺕ ﺑﻲ ﻛﻠﻤﺔ .. ﻭﺍﻟﻤﻨﺎﺯﻋﺔ ﺟﻮﺍﻫﺎ ﻛﺒﻴﺮﺓ ..

ﻭﻣﺎﻋﺎﺭﻓﺔ ﺗﺮﺳﻰ ﻋﻠﻰ ﺭﺍﻱ .. ﺑﺮﻫﺎ ﻗﺎﻟﺖ ﻣﺎﻓﻲ ﺯﻭﻝ ﻣﻤﻜﻦ ﻳﻬﺪﻳﻨﻲ ﻭﻳﺮﺳﻴﻨﻲ ﻋﻠﻰ ﺑﺮ ﻏﻴﺮ ﺧﺎﻟﺪﺓ .. ﺧﺎﻟﺪﺓ ﺩﻱ ﺻﺪﻳﻘﺘﻬﺎ ﺍﻟﻌﺰﻳﺰﺓ .. ﻭﺟﺎﺭﺗﻬﺎ .. ﻭﺑﺘﺤﺐ ﻟﻴﻬﺎ ﺍﻟﺨﻴﺮ .. ﻭﺣﺰﻣﺖ ﺍﻣﺮﻫﺎ .. ﺍﻟﻜﻼﻡ ﺍﻟﺒﺘﻘﻮﻟﻮ ﻟﻴﻬﺎ ﺧﺎﻟﺪﺓ ﻫﻲ ﺣﺘﻌﻤﻞ ﺑﻴﻬﻮ .. ﻻﻧﻬﺎ ﺑﻘﺖ ﺯﻱ ﺍﻟﻘﺸﻪ ﻓﻲ ﻣﻬﺐ ﺍﻟﺮﻳﺢ ﻭﻣﺎﻋﺎﺭﻓﺔ ﺗﺮﺳﻰ ﻋﻠﻰ ﺭﺍﻱ ..

يتبع....

#الأصابع_الشريفة
بقلم: طارق اللبيب

الجزء 07

ﻗﺒﻞ ﻣﺎﻧﺸﻮﻑ ﺍﺧﺒﺎﺭ ﻫﻨﺪ ﻣﻊ ﺻﺎﺣﺒﺘﻬﺎ ﺧﺎﻟﺪﺓ .. ﺧﺪﺭ ﺑﻲ ﻏﺎﺩﻱ ﺍﻟﺤﻤﺪ ﻟﻠﻪ .. ﺧﻠﺺ ﺍﻟﺸﻐﻞ ﺗﻤﺎﻡ .. ﻭﻟﻤﻦ ﻋﺎﺩﻝ ﻟﻘﻰ ﺍﻟﺸﻐﻞ ﺑﺘﺎﻉ ﺧﺪﺭ ﺷﻐﻞ ﻣﺘﻘﻦ ﻭﺑﺎﺧﻼﺹ .. ﻗﺮﺭ ﻳﻤﺴﻜﻮ ﺍﻟﻨﻘﺎﺷﺔ ﺑﺮﺿﻮ .. ﺧﺪﺭ ﻓﻲ ﺍﻟﻨﻘﺎﺷﺔ ﺑﺮﺿﻮ ﻓﻨﺎﻥ ﻓﻨﺎﻥ .. ﻭﺍﺗﻔﻖ ﻣﻌﺎﻫﻮ ﺑﻲ ﺳﻌﺮ ﻛﻮﻳﺲ ﻭﻋﺎﺩﻝ ﺑﺎﻟﺠﺪ ﻣﺎﻗﺼﺮ ﻣﻊ ﺧﺪﺭ .. ﺧﺪﺭ ﻗﺎﻝ ﻟﻴﻬﻮ ﻭﺍﻟﻠﻪ ﺍﻋﻤﻞ ﻟﻴﻚ ﻋﻤﻠﻴﺔ ﻓﻲ ﺍﻟﺒﻴﺖ ﺩﻩ .. ﺍﺧﻠﻲ ﺍﻟﻨﺎﺱ ﻛﻠﻬﺎ ﺗﺘﻔﺮﺝ ﻭﺗﺘﻌﺠﺐ .. ﺍﻟﻤﻬﻢ ﺑﻌﺪ ﺳﻠﻤﻮ ﻗﺮﻭﺵ ﺍﻟﺒﻴﺎﺽ .. ﻛﺎﻥ ﻧﺼﻴﺐ ﺧﺪﺭ ﻣﻦ ﺍﻟﺤﻜﺎﻳﺔ ﺩﻱ ﺧﻤﺴﺔ ﻣﻠﻴﻮﻥ ﻭﺷﻮﻳﺔ .. ﻭﺍﺗﻔﻖ ﻣﻌﺎﻫﻮ ﻋﻠﻰ ﺍﻧﻮ ﻣﻦ ﺍﻻﺳﺒﻮﻉ ﺍﻟﺠﺎﻱ ﻳﺒﺪﺍ ﻓﻲ ﺍﻟﻨﻘﺎﺷﺔ .. ﺑﺮﺓ ﻭﺟﻮﺓ .. ﺍﻟﻤﻬﻢ ﻳﺎﺯﻭﻝ ﺍﻭﻝ ﻣﻦ ﺧﺪﺭ ﺍﺳﺘﻠﻢ ﺍﻟﻘﺮﻭﺵ .. ﺍﺗﺬﻛﺮ ﻛﻼﻡ ﻫﻨﺪ ﻗﺎﻟﺖ ﻟﻴﻬﻮ ﺍﻣﻲ .. ﻗﺎﻟﺖ ﺍﻟﺒﺪﻓﻌﻮ ﺧﻤﺴﺔ ﻣﻠﻴﻮﻥ ﻓﻲ ﻗﻮﻟﺔ ﺧﻴﺮ ﺩﻳﻞ ﺍﻟﻤﻘﻄﻌﻴﻦ ..

ﻗﺎﻝ ﺍﻧﺎ ﻻﺯﻡ ﺍﺷﻮﻑ ﻟﻲ ﺗﻤﺎﻣﺔ ﻟﻠﻘﺮﻳﺸﺎﺕ ﺩﻳﻞ .. ﻋﺸﺎﻥ ﻫﻨﺪﻭﻳﺔ ﻣﺎ ﺗﻨﺬﻻ ﻗﺪﺍﻡ ﺍﻫﻠﻬﺎ ..

ﻣﺸﻰ .. ﻟﻠﺼﺎﺩﻕ ﺍﺧﻮﻫﻮ .. ﻗﺎﻝ ﻟﻴﻬﻮ ﻳﺎ ﺍﻟﺼﺎﺩﻕ ﺍﻧﺎ ﻋﻨﺪﻱ ﻣﻌﺎﻙ ﻛﻼﻡ ﺳﺮﻱ ﻟﻠﻐﺎﻳﺔ .. ﺑﺲ ﻟﻮ ﺑﺘﻮﻋﺪﻧﻲ ﺍﺑﻮﻱ ﻣﺎﻳﻌﺮﻑ .. ﺑﻘﻮﻝ ﻟﻴﻚ ..

ﻗﺎﻝ ﻟﻴﻬﻮ ﺍﺣﻜﻲ ﻳﺎﺧﺪﺭ .. ﻣﺘﻴﻦ ﺍﻧﺎ ﻗﺎﻋﺪ ﺍﺷﻴﻞ ﺍﻟﻘﻮﺍﻻﺕ؟ ..

ﻗﺎﻝ ﻟﻴﻬﻮ ﺍﻧﺎ ﻃﺒﻌﺎ ﻣﺎﺷﻲ ﺍﻭﺩﻱ ﻗﻮﻟﺔ ﺧﻴﺮ ﻟﻲ ﻧﺎﺱ ﻫﻨﺪ .. ﻭﺍﻟﺤﻤﺪ ﻟﻠﻪ ﻓﻲ ﺍﻟﻔﺘﺮﺓ ﺍﻟﻔﺎﺗﺖ ﺩﻱ ﺍﺷﺘﻐﻠﺖ ﻛﻮﻳﺲ .. ﻭﻟﺴﻊ ﺍﻟﺸﻐﻞ ﻣﺎﺷﻲ ..

ﻓﻌﺎﻳﺰ ﻣﻨﻚ ﺗﺴﻠﻔﻨﻲ ﻣﻠﻴﻮﻥ ﻭﻧﺺ ﺑﺲ .. ﺍﺗﻤﻬﺎ ﻟﻴﻬﻢ ﺳﺒﻌﺔ .. ﻋﺸﺎﻥ ﺍﻣﻬﺎ ﻣﺮﺍﺓ ﻃﻤﺎﻋﺔ .. ﻭﺩﺍﻳﺮﺓ ﻗﺮﻭﺵ ﻓﻲ ﻗﻮﻟﺔ ﺧﻴﺮ ..

ﻗﺎﻝ ﻟﻴﻬﻮ ﺍﻧﺖ ﺍﻫﺒﻞ ؟ ﻓﻲ ﻗﻮﻟﺔ ﺧﻴﺮ ﺑﻲ ﺳﺒﻌﺔ ﻣﻠﻴﻮﻥ ؟

ﻗﻮﻟﺔ ﺧﻴﺮ ﺩﻱ ﺷﻨﻮ ﺫﺍﺗﻬﺎ ﻋﺎﺩﺓ ﺳﻴﺌﺔ .. ﻭﺣﺘﻲ ﺍﻟﻨﺎﺱ ﺍﻟﺒﻌﻤﻠﻮﻫﺎ ﺑﺪﻓﻌﻮ ﻗﻴﻤﺔ ﺭﻣﺰﻳﺔ .. ﻳﻌﻨﻲ ﻣﺎ ﺍﻛﺘﺮ ﻣﻦ ﻣﻠﻴﻮﻥ ﻟﻮ ﺑﺎﻟﻐﺖ .. ﺣﺎﺟﺔ ﺗﻌﺒﻴﺮﻳﺔ ﻛﺪﺍ .. ﻟﻜﻦ ﺍﻟﻜﺘﻴﺮ ﺩﻩ ﺍﻟﻤﻬﺮ ﻳﺎﻣﻌﻠﻢ .. ﺍﻧﺖ ﺷﻜﻠﻚ ﻓﺎﻫﻢ ﻏﻠﻂ ..

ﻗﺎﻝ ﻟﻴﻬﻮ ﻻﻻ ﻭﺍﻟﻠﻪ .. ﻗﺎﻟﺖ ﺩﻱ ﻗﻮﻟﺔ ﺧﻴﺮ .. ﻗﺎﻝ ﻟﻴﻬﻮ ﺩﻩ ﻣﺎﺳﻤﻌﻨﺎ ﺑﻴﻬﻮ ﻳﺎﺧﻮﻱ ..

ﺍﻟﻨﺎﺱ ﺩﻳﻞ ﺷﻜﻠﻬﻢ ﺩﺍﻳﺮﻳﻦ ﻳﺴﺘﻐﻠﻮﻙ .. ﻳﺴﻔﻮﻙ ﻭﻋﻜﺲ ﺍﻟﻬﻮﺍﺀ ﻳﻔﻜﻮﻙ .. ﺧﺪﺭ ﻗﺎﻝ ﻟﻴﻬﻮ ﻻﻻ ﻳﺎ ﺍﻟﺼﺎﺩﻕ .. ﺍﻧﺖ ﻣﻌﻨﺎﻫﺎ ﻣﺎﺑﺘﻌﺮﻑ ﻫﻨﺪ ..

ﻗﺎﻝ ﺍﻫﻮ ﺑﻨﺘﻌﻠﻢ ﻧﻌﺮﻑ .. ﺍﻟﻤﻬﻢ ﻳﺎﺧﻮﻱ .. ﺍﻧﺖ ﻋﺎﻳﺰ ﻛﻢ؟ ﻗﺎﻝ ﻟﻴﻬﻮ ﻣﻠﻴﻮﻥ ﻭﻧﺺ ﻭﺗﺴﻠﻢ .. ﻭ ﺍﻧﺎﺑﻮﻋﺪﻙ .. ﺍﻭﻝ ﻣﺎ ﺍﺧﻠﺺ ﻣﻦ ﺷﻐﻠﻲ ﺑﺘﺎﻉ ﺍﻟﺠﺮﻳﻒ .. ﺑﺴﻠﻤﻚ ﻗﺮﻭﺷﻚ .. ﻭﺍﻧﺖ ﻋﺎﺭﻓﻨﻲ ﻣﺎ ﺑﺪﻳﻦ ﻗﺮﻭﺵ .. ﻟﻮ ﻣﺎ ﺿﻤﻨﺖ ﺍﻧﻲ ﺑﺴﺪﺩﻫﺎ ﻓﻲ ﻣﻮﺍﻋﻴﺪﻫﺎ .. ﻭﺍﻟﻠﻪ ﺍﻻ ﺍﻛﻮﻥ ﻣﻴﺖ ..

ﻗﺎﻝ ﻟﻴﻬﻮ ﻋﺎﺭﻓﻚ ﻳﺎﺧﻮﻱ .. ﻣﺎﺗﻘﻌﺪ ﺗﻬﻀﺮﺏ .. ﺍﻟﻤﻬﻢ ﻳﺎﺯﻭﻝ ﺳﻠﻤﻮ ﻟﻴﻚ ﺍﻟﻘﺮﻳﺸﺎﺕ .. ﺗﻤﺖ ﺳﺒﻌﺔ ﻣﻠﻴﻮﻥ .. ﻭﺑﻘﻰ ﻗﺎﻋﺪ ﻓﺮﺣﺎﻥ .. ﻣﻨﺘﻈﺮ ﺍﻟﻤﺴﺎﺀ ﻳﺘﻠﻘﻰ ﺗﻠﻔﻮﻥ ﻣﻦ ﻫﻨﺪﻭﻳﺔ .. ﻭﻫﻮﻣﺎﻋﺎﺭﻑ ﻫﻨﺪﻭﻳﺔ ﺷﻐﺎﻟﺔ ﻓﻲ ﺍﺟﺮﺍﺀﺍﺕ ﺍﻟﺒﻴﻊ ﺍﻻﺧﻴﺮﺓ ..

ﻃﺒﻌﺎ ﻫﻨﺪ ﻣﺸﺖ ﻟﻲ ﺧﺎﻟﺪﻩ ... ﻭﺣﻜﺖ ﻟﻴﻬﺎ ﻣﻦ ﺍﻟﺒﺪﺍﻳﺔ ﺍﻟﺤﺼﻞ ﺷﻨﻮ .. ﻭﺣﻜﺖ ﻟﻴﻬﺎ ﻋﻦ ﻣﻌﺘﺰ .. ﻭﻋﻦ ﻭﺳﺎﻣﺖ .. ﻭ ﻭﻟﺒﺴﻮ .. ﻭﻗﻮﺍﻣﻮ .. ﻭﻗﺮﻭﺷﻮ .. ﻭﺑﻴﺘﻮ .. ﻭﺍﻏﺘﺮﺍﺑﻮ .. ﻭﺯﺍﺩﺕ ﺣﺎﺟﺎﺕ ﻣﻦ ﺭﺍﺳﻬﺎ ..

ﺧﺎﻟﺪﺓ ﻗﺎﻟﺖ ﻟﻴﻬﺎ ﺍﻧﺘﻲ .. ﻳﺎ ﻫﻨﺪ ﻣﻌﺘﺰ ﺩﻩ ﻋﺮﻓﺘﻴﻬﻮ ﻣﺘﻴﻦ .. ؟

ﻗﺎﻟﺖ ﻟﻴﻬﺎ ﻟﺴﻊ ﻣﺎﻋﺮﻓﺘﻮ .. ﺍﻭﻝ ﻣﺮﺓ ﺍﺷﻮﻓﻮ .. ﻗﺒﻴﻞ ﺍﻟﻨﻬﺎﺭ ..

ﻗﺎﻟﺖ ﻟﻴﻬﺎ .. ﻳﻌﻨﻲ ﻣﺎﻋﺎﺭﻓﺔ ﻟﻮ ﺍﻧﺴﺎﻥ ﺻﺎﺩﻕ ﺯﻱ ﺧﺪﺭ .. ﺍﻭ ﻛﺬﺍﺏ ﺯﻱ ﺑﻘﻴﺔ ﺍﻟﺮﺟﺎﻝ .. ؟؟

ﻗﺎﻟﺖ ﻟﻴﻬﺎ ﻣﺎﻋﺎﺭﻓﺔ ﻭﺍﻟﻠﻪ .. ﻟﻜﻦ ﺯﻭﻝ ﺻﺎﺩﻕ ﺯﻱ ﺧﺪﺭ ﺍﻧﺎ ﻣﺎﻻﻗﺎﻧﻲ ﻃﺒﻌﺎ"

ﻗﺎﻟﺖ ﻟﻴﻬﺎ ﻃﻴﺐ .. ﻳﺎﺧﺘﻲ ﺍﻧﺖ ﻋﺮﻓﺘﻲ ﺧﺪﺭ ﻣﻦ ﺯﻣﻦ .. ﻭﻋﺮﻓﺘﻲ ﺷﺨﺼﻴﺘﻮ .. ﻭﺍﺧﺘﺮﺗﻴﻬﻮ ﻻﻧﻮ ﺷﺨﺼﻴﺘﻮ ﻭﺍﺧﻼﻗﻮ ﻧﺎﺩﺭﺓ .. ﻭﻫﻲ ﺍﻟﺒﺘﻨﻔﻊ ﻣﻌﺎﻙ؟؟

ﻛﻴﻒ ﺗﺨﻠﻲ ﺍﻟﺤﺎﺟﺔ ﺍﻻﻧﺘﻲ ﻣﺘﺄﻛﺪﺓ ﻣﻦ ﻗﻴﻤﺘﻬﺎ .. ﻭﺗﺮﻣﻴﻬﺎ ﻓﻲ ﺍﻟﺸﺎﺭﻉ .. ﻭﺗﺸﻴﻠﻲ ﺣﺎﺟﺔ ﺍﻧﺘﻲ ﻣﺎﻋﺎﺭﻓﺔ ﻋﻨﻬﺎ ﺷﻲ ؟؟ ﺍﻧﺘﻲ ﻳﺎ ﻫﻨﺪﻭﻳﺔ ﻋﺮﻓﺘﻲ ﺧﺪﺭ .. ﻭﻋﺮﻓﺘﻲ ﺍﺧﻼﻗﻮ ﻭﺣﺒﻴﺘﻴﻬﻮ ﻋﺸﺎﻥ ﺟﻮﻫﺮﻭ ﻭﻋﺸﺎﻥ ﺻﺪﻗﻮ ﻭﺻﺮﺍﺣﺘﻮ .. ﺗﺠﻲ ﺗﻐﺮﻙ ﺍﻻﺷﻜﺎﻝ ﻭﺍﻟﻘﺮﻭﺵ ؟ ﺍﻧﺘﻲ ﻫﺴﻲ ﻟﻮ ﺍﺗﻔﺎﺟﺄﺕ ﺑﺎﻧﻮ ﺍﻻﻧﺴﺎﻥ ﺩﻩ ﻋﺒﺎﺭﺓ ﻋﻦ ﺻﻮﺭﺓ ﻭﺍﻛﺎﺫﻳﺐ .. ﺗﺎﻧﻲ ﺑﺘﻠﻤﻲ ﻓﻲ ﺯﻭﻝ ﺯﻱ ﺧﺪﺭ ﺩﻩ ﺑﺎﻟﻬﻴﻦ؟

ﻗﺎﻟﺖ ﻟﻴﻬﺎ ﻟﻜﻦ ﻳﺎ ﺧﺎﻟﺪﺓ .. ﺧﺪﺭ ﻗﺪﺍﻣﻮ ﻛﺘﻴﺮ .. ﻭﻟﺴﻊ ﻣﺎﻋﻤﻞ ﺣﺎﺟﺔ ﻭﺷﻐﻠﻮ ﺫﺍﺗﻮ ﻣﺎ ﻣﺎﺷﻲ ﻛﻮﻳﺲ .. ﻭﺡ ﻳﺄﺧﺮﻧﻲ ﻭﻳﺪﻳﻨﻲ ﺍﻟﺒﻮﺭﺓ ﺳﺎﻱ .. ﺧﻠﻴﻨﻲ ﺍﺟﺮﺏ ﺣﻈﻲ .. ﺍﺣﺘﻤﺎﻝ ﺗﻀﺒﻂ .. ﻭﺍﻟﺰﻭﻝ ﺩﻩ ﻳﻜﻮﻥ ﻛﻮﻳﺲ ..

ﻗﺎﻟﺖ ﻟﻴﻬﺎ ﻳﻌﻨﻲ ﺷﺨﺘﻚ ﺑﺨﺘﻚ .. ﺑﻄﻴﺨﺔ ﻣﻘﻔﻮﻟﺔ .. ﻳﺎﻫﻨﺪﻭﻳﺔ؟؟؟

ﻫﻨﺪ ﻗﺎﻟﺖ ﻟﻴﻬﺎ ﺑﺎﻟﻀﺒﻂ ﻛﺪﺍ؟ .. ﻗﺎﻟﺖ ﻟﻴﻬﺎ ﻋﻠﻰ ﻛﻴﻔﻚ ﻳﺎ ﻫﻨﺪ .. ﻟﻜﻦ ﻭﺍﻟﻠﻪ ﻟﻮ ﺍﻧﺎ ﻋﻨﺪﻱ ﺧﺪﺭ .. ﻣﺎﺑﺒﻴﻌﻮ ﺑﻲ ﻗﺮﻭﺵ ﺍﻟﺪﻧﻴﺎ ..

ﻫﻨﺪ ﺻﺮﺕ ﻭﺷﻬﺎ .. ﻭﻗﺎﻟﺖ ﻟﻴﻬﺎ ﻳﻬﻮﺩﺍﻙ ﺧﺪﺭ .. ﺍﻣﺸﻲ ﻋﻠﻴﻬﻮ .. ﺍﻧﺘﻲ ﻣﻦ ﺯﻣﺎﻥ ﻛﺎﻥ ﺗﻘﻮﻟﻲ ﺧﺎﺗﻪ ﻋﻴﻨﻚ ﻋﻠﻴﻬﻮ .. ﻛﻨﺖ ﺑﺨﻠﻴﻬﻮ ﻟﻴﻚ

ﻗﺎﻟﺖ ﻟﻴﻬﺎ ﺍﺳﻤﻌﻲ ﻫﻨﺎ ﻳﺎ ﺍﻟﻐﺒﻴﺎﻧﺔ .. ﺍﻧﺎ ﺯﻭﻝ ﻛﺎﻥ ﺑﺤﺐ ﺻﺤﺒﺘﻲ ﻣﺴﺘﺤﻴﻞ ﺍﻓﻜﺮ ﻓﻴﻬﻮ .. ﻟﻜﻦ ﺍﻧﺎ ﺑﻀﺮﺏ ﻟﻴﻚ ﻣﺜﻞ ..

ﺧﺎﻟﺪﺓ ﺳﻜﺘﺖ ﻣﺴﺎﻓﺔ .. ﻭﻗﺎﻟﺖ ﺑﻴﻨﻬﺎ ﻭﺑﻴﻦ ﻧﻔﺴﻬﺎ .. ﻳﺎﺟﻤﺎﻋﺔ ﻫﻨﺪ ﺩﻱ ﻣﺎﺩﺍﻡ ﺟﺎﻳﺔ ﺗﺸﺎﻭﺭﻧﻲ .. ﻭﺩﺍﻳﺮﺍﻧﻲ ﺍﺩﻳﻬﺎ ﺍﻟﻜﻼﻡ ﺍﻟﺼﺎﺡ .. ﻟﻴﻪ ﻣﺎﻋﺎﻳﺰﺓ ﺗﻘﺒﻞ ﻛﻼﻣﻲ .. ﻣﻌﻨﺎﻫﺎ ﻫﻲ ﺍﺻﻼ ﻗﻨﻌﺖ ﻣﻦ ﺧﺪﺭ .. ﻭﺩﺍﻳﺮﺓ ﺯﻭﻝ ﻳﺪﻋﻤﻬﺎ ﻋﺸﺎﻥ ﻣﺎﺗﺤﺲ ﺑﺎﻟﺬﻧﺐ ﺑﻌﺪﻳﻦ ..

ﻛﻮﻳﺲ ﺍﻧﺎ ﺑﺪﻳﻬﺎ ﻛﻼﻣﻲ ﺍﻻﺧﻴﺮ ..

ﻗﺎﻟﺖ ﻟﻴﻬﺎ ﻳﺎﻫﻨﺪ .. ﻣﻤﻜﻦ ﺗﺴﻤﻌﻴﻨﻲ ؟ ﺍﻧﺘﻲ ﻣﻮﺵ ﺟﻴﺘﻲ ﺗﺸﺎﻭﺭﻳﻨﻲ ﻓﻲ ﺍﻟﻤﻮﺿﻮﻉ ﺩﻩ .. ﻭﻻ ﺟﻴﺘﻲ ﺗﺪﻳﻨﻲ ﺧﺒﺮ ..

ﻗﺎﻟﺖ ﻟﻴﻬﺎ ﺟﻴﺖ ﺍﺷﺎﻭﺭﻙ ﻭﺍﻟﻠﻪ ..

ﻗﺎﻟﺖ ﻟﻴﻬﺎ ﻣﺎﺗﺘﺨﻠﻲ ﻋﻦ ﺧﺪﺭ .. ﻣﻬﻤﺎ ﻛﺎﻧﺖ ﺍﻟﻈﺮﻭﻑ ﻭﺍﻻﺳﺒﺎﺏ .. ﻭﺑﻌﺪﻳﻦ ﻗﻮﻟﻲ ﺧﺎﻟﺪﺓ ﺿﺮﺗﻨﻲ ..

ﻗﺎﻟﺖ ﻟﻴﻬﺎ ﻃﻴﺐ ﻳﺎ ﺧﺎﻟﺪﺓ .. ﻟﻮ ﻛﺎﻧﺖ ﺍﻣﻲ ﻣﺎﺭﺿﻴﺎﻧﺔ ﺑﻲ ﺧﺪﺭ .. ﻭﻋﺎﻳﺰﺓ ﻣﻌﺘﺰ .. ﻣﻮﺵ ﺍﻧﺎ ﺍﻟﻤﻔﺮﻭﺽ ﺍﻋﻤﻞ ﺍﻟﺨﻄﻮﺓ ﺍﻟﺒﺘﺮﺿﻲ ﺍﻣﻲ ﻋﻠﻲ ؟

ﻗﺎﻟﺖ ﻟﻴﻬﺎ ﺍﻧﺘﻲ ﻳﺎﻫﻨﺪ ﺑﺘﻐﺸﻲ ﻓﻲ ﻣﻨﻮ ؟ ﺑﺘﻐﺸﻲ ﻓﻴﻨﻲ ﺍﻧﺎ .. ﻭﻻ ﺑﺘﻐﺸﻲ ﻓﻲ ﺭﻭﺣﻚ .. ﺍﻧﺎ ﻋﺎﺭﻓﺎﻙ ﻭﻋﺎﺭﻓﺔ ﻋﻨﻚ ﺍﻱ ﺣﺎﺟﺔ .. ﺍﻣﻚ ﻣﻦ ﺯﻣﺎﻥ ﻣﺎﻋﺎﻳﺰﺓ ﺧﺪﺭ .. ﺑﺲ ﺍﻧﺘﻲ ﻣﺼ

ﺮﻩ ﻋﻠﻴﻬﻮ .. ﻭﻗﺎﻋﺪﺓ ﺗﻘﻨﻌﻲ ﻓﻲ ﺍﻣﻚ ..

ﻭﻫﺴﻲ ﺍﻣﻚ ﻭﻋﺪﺗﻚ .. ﻗﺎﻟﺖ ﻟﻴﻚ ﻟﻮ ﻗﻠﺘﻲ ﻣﺎﻋﺎﻳﺰﺓ ﻣﻌﺘﺰ .. ﺍﻧﺎ ﺑﻘﺒﻞ ﺑﻲ ﺧﺪﺭ . ﻗﺎﻟﺖ ﻟﻴﻬﺎ ﻣﺎﻳﺎﻫﻮ ﺩﻩ ﻳﺎﺧﺎﻟﺪﺓ ﺍﻟﺸﻲ ﺍﻟﻤﺤﻴﺮﻧﻲ .. ﻭﺍﻟﻠﻪ ﺍﻧﺎ ﺧﺎﻳﻔﺔ ﺍﻓﻮﺕ ﻣﻌﺘﺰ .. ﻭﺑﻌﺪﻳﻦ ﺍﻧﺪﻡ ﻣﻊ ﺧﺪﺭ ﻭﺍﻟﺒﻬﺪﻟﺔ .. ﻭﺍﻟﻠﻪ ﻣﺎﻋﺎﺭﻓﺔ ﺍﻋﻤﻞ ﺷﻨﻮ؟

ﻗﺎﻟﺖ ﻟﻴﻬﺎ ﺍﻧﺘﻲ ﻫﺴﻲ ﻋﻨﺪﻙ ﺭﻏﺒﺔ ﻓﻲ ﺧﺪﺭ ﺍﻛﺘﺮ؟ .. ﻭﻻ ﻓﻲ ﻣﻌﺘﺰ .. ؟ ﺑﻐﺾ ﺍﻟﻨﻈﺮ ﻋﻦ ﺍﻟﻮﺿﻊ ﺍﻟﻤﺎﺩﻱ؟ ..

ﻗﺎﻟﺖ ﻟﻴﻬﺎ ﺍﻟﺼﺮﺍﺣﺔ ﺳﻮﺍ ﺳﻮﺍ ..

ﻗﺎﻟﺖ ﻟﻴﻬﺎ ﻭﺍﻟﻠﻪ ﻃﻠﻌﺘﻲ ﺯﻭﻟﺔ ﺣﻘﻴﺮﺓ .. ﻭﻣﺎﻋﻨﺪﻙ ﻋﺸﺮﺓ ﺑﻲ ﺗﻌﺮﻳﻔﺔ .. ﻳﺎﺧﻲ ﺣﺮﺍﻡ ﻋﻠﻴﻚ .. ﺍﻟﺒﺸﻮﻓﻚ ﺯﻣﺎﻥ ﺗﺘﻜﻠﻤﻲ ﻋﻦ ﺧﺪﺭ ﻳﻘﻮﻝ ﻟﻮ ﺟﺎﻙ ﺍﻟﺴﻠﻄﺎﻥ ﺳﻠﻴﻤﺎﻥ ﻣﺎ ﺡ ﺗﻘﺒﻠﻲ ﺑﻴﻬﻮ ..

ﻗﺎﻟﺖ ﻟﻴﻬﺎ ﻭﺍﻟﻠﻪ ﻳﺎ ﺧﺎﻟﺪﺓ .. ﺍﻧﺘﻲ ﺣﺒﻴﺒﺘﻲ .. ﻣﺎﺑﻜﺬﺏ ﻋﻠﻴﻚ .. ﺍﻧﺎ ﻣﻦ ﻣﺎ ﺷﻔﺖ ﻣﻌﺘﺰ .. ﺣﺴﺎﺑﺎﺗﻲ ﺍﺗﻠﺨﺒﻄﺖ ..

ﻗﺎﻟﺖ ﻟﻴﻬﺎ ﺧﻼﺹ .. ﻳﺒﻘﻰ ﻣﺎﻓﻲ ﺩﺍﻋﻲ ﺗﻌﻠﻘﻲ ﺧﺪﺭ .. ﺍﻛﺘﺮ ﻣﻦ ﺍﻟﻼﺯﻡ ﺍﻣﺸﻲ ﺍﻧﻬﻲ ﻣﻌﺎﻫﻮ ﺍﻟﻤﻮﺿﻮﻉ .. ﺧﻠﻴﻬﻮ ﻳﺸﻮﻑ ﺣﻴﺎﺗﻮ

ﻗﺎﻟﺖ ﻟﻴﻬﺎ ﺍﻳﻮﺓ ﺍﺻﻠﻲ ﻧﺎﻭﻳﺔ ﻋﻠﻰ ﻛﺪﺍ ..

ﺍﻫﺎ ﻳﺎﺟﻤﺎﻋﺔ ﻫﺴﻲ ﻣﺮﺕ ﺗﻼﺕ ﺍﻳﺎﻡ .. ﻭﻣﺎ ﺍﺗﺼﻠﺖ ﻋﻠﻰ ﺧﺪﺭ .. ﻭﺧﺪﺭ ﻣﺘﻌﻮﺩ ﺍﻧﻮ ﻣﺎﻳﺘﺼﻞ ﻋﻠﻴﻬﺎ .. ﺍﻻ ﻫﻲ ﺗﺪﻳﻬﻮ ﺧﺒﺮ ﺑﻈﺮﻭﻓﻬﺎ ﻓﻲ ﺍﻟﺒﻴﺖ ﻛﻴﻒ .. ﻳﻌﻨﻲ ﻣﺎ ﺑﺘﺼﻞ ﻋﻠﻴﻬﺎ ﻫﻮ .. ﻣﺘﻔﻘﻴﻦ ﻋﻠﻰ ﻛﺪﺍ

ﺍﻟﻤﻬﻢ ﻳﺎﺳﻴﺪﻱ .. ﺧﺪﺭ ﻣﺠﻬﺰ ﺍﻟﺴﺒﻌﺔ ﻣﻠﻴﻮﻥ .. ﻭﻣﻨﺘﻈﺮ ﺍﻟﺒﺖ ﺗﺘﺼﻞ ﻋﻠﻴﻬﻮ .. ﻋﺸﺎﻥ ﻳﺪﻳﻬﺎ ﺍﻟﺒﺸﺎﺭﺓ .. ﻭﻣﺴﺘﻐﺮﺏ ﺍﻟﺒﺖ ﺩﻱ ﻃﻮﻟﺖ ﻛﺪﺍ ﻟﻴﻪ؟

ﻭﻫﻲ ﻃﺒﻌﺎ " ﺍﺗﺼﺎﻻﺗﻬﺎ ﻛﻠﻬﺎ ﻣﻊ ﺧﺎﻟﺘﻬﺎ ﺳﻤﻴﺔ ..

ﻭﺳﻤﻴﻪ ﺷﻐﺎﻟﺔ ﻓﻴﻬﺎ ﻏﺴﻴﻞ ﻓﻲ ﺍﻟﺪﻣﺎﻍ .. ﻟﻐﺎﻳﺔ ﻣﺎ ﺍﻟﺒﺖ ﺍﺳﺘﻮﺕ ﻋﻠﻲ ﻧﺎﺭ ﻫﺎﺩﻳﻪ .. ﻭﺑﻘﺖ ﻳﻮﻣﻬﺎ ﻛﻠﻮ ﺗﺘﺨﻴﻞ ﻓﻲ ﻣﻌﺘﺰ .. ﻭﻗﻌﺪﺗﻮ ﻭﻃﺮﻳﻘﺔ ﻛﻼﻣﻮ .. ﻭﺗﺘﺒﺴﻢ ﺑﺮﺍﻫﺎ .. ﺍﻭﻝ ﻣﺎﻳﻤﺮ ﻋﻠﻴﻬﺎ ﺧﻴﺎﻝ ﺧﺪﺭ .. ﺗﺸﻴﻞ ﻧﻔﺴﻬﺎ ﻭﺗﺨﺘﻮ ..

ﻭﺣﺎﺳﻪ ﺑﺎﻟﻬﻢ .. ﻭﻣﺎﻋﺎﺭﻓﺔ ﺍﻟﻬﻢ ﺩﻩ ﻣﺼﺪﺭﻩ ﺷﻨﻮ؟

ﻃﺒﻌﺎ " ﺩﻱ ﺭﺩﺓ ﻓﻌﻞ ﻃﺒﻴﻌﻴﺔ .. ﺍﻻﺣﺴﺎﺱ ﺑﺎﻟﺘﺨﻠﺺ ﻣﻦ ﺍﻧﺴﺎﻥ ﻣﺨﻠﺺ .. ﻭﺍﻻﺻﺮﺍﺭ ﻋﻠﻰ ﻇﻠﻤﻪ .. ﻭﺍﻟﺘﻔﻜﻴﺮ ﻓﻲ ﻃﺮﻳﻘﺔ ﻟﻠﺘﺨﻠﺺ ﻣﻨﻪ ﺑﻐﻴﺮ ﺟﺮﺡ ﻭﻻﺣﺮﺝ ..

ﻭﻫﻤﻬﺎ ﻛﻠﻮ .. ﺗﺘﺼﻞ ﻋﻠﻴﻪ ﻛﻴﻒ؟؟ ﻭﺗﻘﻮﻝ ﻟﻴﻬﻮ ﺷﻨﻮ؟؟

ﺍﻟﻤﻬﻢ ﻳﻮﻡ ﺑﺎﻟﻤﺴﺎﺀ .. ﻗﻮﺕ ﻗﻠﺒﻬﺎ .. ﻭﺍﺩﺗﻮ ﺟﺮﺱ ﻭﺍﺣﺪ .. ﺧﺪﺭ ﻟﻤﻦ ﺷﺎﻑ ﺭﻗﻤﻬﺎ ﻓﻲ ﺍﻟﺸﺎﺷﺔ . ﺍﻟﺪﻧﻴﺎ ﻛﻠﻬﺎ ﻧﻮﺭﺕ ﻓﻲ ﻭﺷﻮ .. ﻭﺣﺴﻪ ﺑﻲ ﻫﻮﺍ ﺑﺎﺭﺩ ﺩﺧﻞ ﻓﻲ ﺍﻧﻔﺎﺳﻪ .. ﻭﺍﺑﺘﺴﻢ ﺍﺑﺘﺴﺎﻣﺔ ﻟﺬﻳﺬﻩ ﺧﻼﺹ ..

ﻃﻮﺍﻟﻲ ﺭﺟﻊ ﻟﻴﻬﺎ .. ﺍﻭﻝ ﻣﺎﻓﺘﺤﺖ ﺍﻟﺨﻂ ..

ﻗﺎﻝ ﻟﻴﻬﺎ ﺷﺮﻓﺘﻲ ﻭﻧﻮﺭﺗﻲ ..

ﻳﺸﻬﺪ ﺍﻟﻠﻪ ﺍﺷﺘﻘﺖ ﻟﻴﻚ ﺷﻮﻕ .. ﻟﺪﺭﺟﺔ ﺣﺎﺳﻲ ﺍﻧﻲ ﺯﻱ ﺍﻟﻌﻴﺎﻥ .. ﻭﻣﺎﻓﻲ ﻟﻲ ﺩﻭﺍﺀ ﻏﻴﺮ ﺻﻮﺗﻚ .. ﺍﻟﺒﺖ ﺩﻱ ﻗﻠﺒﻬﺎ ﻋﻤﻞ ﻓﺮﺍ . ﻭﺟﺎﺗﻬﺎ ﻭﺟﻌﺔ ﻭﻏﻤﻪ ﻓﻲ ﻗﻠﺒﻬﺎ .. ﻻﻧﻬﺎ ﻋﺎﺭﻓﺔ ﺧﺪﺭ ﺻﺎﺩﻕ ﻓﻲ ﺍﻱ ﻛﻠﻤﺔ ﺗﻄﻠﻊ ﻣﻨﻮ ..

ﺑﻘﺖ ﺗﺘﻜﻠﻢ ﻣﻌﺎﻫﻮ ﻭﺑﺎﻻ ﺑﺮﻩ ..

ﻛﻴﻔﻚ ﻳﺎﺧﺪﺭ .. ﺍﻥ ﺷﺎﺀ ﺍﻟﻠﻪ ﻛﻮﻳﺲ .. ﺍﻧﺎ ﺍﺳﻔﺔ ﻓﻲ ﺍﻟﻴﻮﻣﻴﻦ ﺍﻟﻔﺎﺗﻦ ﺩﻳﻞ ﻣﺎ ﺍﺗﺼﻠﺖ ﻋﻠﻴﻚ .. ﻭﺍﻟﻠﻪ ﻧﻔﺴﻴﺎﺗﻲ ﻓﻲ ﺍﻟﻮﺍﻃﺔ ..

ﻗﺎﻝ ﻟﻴﻬﺎ ﻣﺎﻟﻚ؟ ﺍﻥ ﺷﺎﺀ ﺍﻟﻠﻪ ﺧﻴﺮ .. ﺍﻧﺎ ﻃﺒﻌﺎ " ﻋﻨﺪﻱ ﻟﻴﻚ ﻣﻔﺎﺟﺄﺓ ﺡ ﺗﺮﻭﺡ ﻣﻨﻚ ﻛﻞ ﺍﻟﻨﻔﺴﻴﺎﺕ ﻭﺍﻟﻤﻌﺎﻧﺎﺓ ..

ﻗﺎﻟﺖ ﻟﻴﻬﻮ ﺷﻨﻮ ﺍﻟﻤﻔﺎﺟﺄﺓ؟ .. ﻗﻞ ﻟﻲ ﺍﻥ ﺷﺎﺀ ﺍﻟﻠﻪ ﺗﻔﺮﺝ ﻋﻠﻲ ﺷﻮﻳﺔ ..

ﻗﺎﻝ ﻟﻴﻬﺎ ﺍﻧﺎ ﺍﺣﺘﻤﺎﻝ ﺍﺟﻴﻜﻢ ﻓﻲ ﺍﻟﻴﻮﻣﻴﻦ ﺍﻟﺠﺎﻳﺎﺕ ﺩﻳﻞ .. ﻗﺎﻟﺖ ﻟﻴﻬﻮ ﻳﻬﺪﻱ ﺍﻟﻤﺸﻜﻠﺔ ﻳﺎﺧﺪﺭ .. ﻳﺎﺧﻲ ﺍﻧﺎ ﻧﻔﺴﻴﺎﺗﻲ ﻓﻲ ﺍﻻﺭﺽ .. ﺑﻲ ﺳﺒﺐ ﺍﻣﻲ .. ﺍﻣﻲ ﻳﺎﺧﺪﺭ .. ﺑﻘﺖ ﺿﺎﻏﻄﺎﻧﻲ ﺿﻐﻂ ﻋﺠﻴﺐ .. ﻋﺸﺎﻥ ﺍﺳﻴﺒﻚ ..

ﺣﺘﻲ ﺑﻘﺖ ﻻﺑﺘﺎﻛﻞ ﻭﻻﺑﺘﺸﺮﺏ .. ﻻﻣﻦ ﺑﻘﺖ ﻋﻴﺎﻧﺔ .. ﺑﻲ ﺳﺒﺐ ﺍﺻﺮﺍﺭﻱ ﻋﻠﻴﻚ .. ﺍﻣﻲ ﻳﺎﺧﺪﺭ ﻣﺎﻋﺎﻳﺰﺍﻙ ﻛﻠﻮ ﻛﻠﻮ .. ﺍﻧﺎ ﺍﻋﻤﻞ ﺷﻨﻮ ﻳﺎﺧﺪﺭ؟ ..

ﻗﺎﻝ ﻟﻴﻬﺎ .. ﺍﻧﺎ ﻟﻜﻦ ﻳﺎ ﻫﻨﺪ ﺟﻬﺰﺕ ﻗﻮﻟﺔ ﺧﻴﺮ .. ﺳﺒﻌﺔ ﻣﻠﻴﻮﻥ ﻭﺍﻟﻠﻪ ﻭﺍﻟﻠﻪ ﺍﻟﺸﻐﻞ ﻣﺎﺷﻲ ﻛﻮﻳﺲ .. ﻗﺎﻟﺖ ﻟﻴﻬﻮ ﻭﺍﻟﻠﻪ ﺍﻣﻲ ﺍﻟﺸﺎﻳﻔﺎﻫﺎ ﺩﻱ .. ﻟﻮ ﺩﻓﻌﺖ ﻟﻴﻬﺎ ﻣﻠﻴﺎﺭ ﻣﺎﻋﺎﻳﺰﺍﻙ ..

ﺍﻧﺎ ﺍﻋﻤﻞ ﺷﻨﻮ ؟ ﻭﺍﻟﻠﻪ ﺗﻌﺒﺖ ﻣﻌﺎﻫﺎ .. ﻗﺎﻝ ﻟﻴﻬﺎ ﻃﻴﺐ ﺧﻠﻴﻨﻲ ﺍﻗﻌﺪ ﻣﻌﺎﻫﺎ

ﺍﻧﺎ ﺑﺘﻜﻠﻢ ﻣﻌﺎﻫﺎ .. ﺑﺤﺎﻭﻝ ﺑﻘﻨﻌﻬﺎ ﻭﺍﻟﻠﻪ .

ﻗﺎﻟﺖ ﻟﻴﻬﻮ ﻣﺎﻋﺎﻳﺰﺓ ﺗﺸﻮﻓﻚ .. ﺍﻧﺎﺍﻗﺘﺮﺣﺖ ﻟﻴﻬﺎ .. ﻗﻠﺖ ﻟﻴﻬﺎ ﺑﺨﻠﻲ ﺧﺪﺭ ﻳﻘﻌﺪ ﻣﻌﺎﻙ .. ﻭﺗﺴﻤﻌﻲ ﻣﻦ ﺧﺸﻤﻮ .. ﺭﻓﻀﺖ ﻭﻗﺎﻟﺖ ﻟﻲ ﻟﻮ ﺟﺒﺘﻲ ﻟﻲ ﺧﺪﺭ ﺩﻩ ﻓﻲ ﺍﻟﺒﻴﺖ .. ﺍﻧﺎ ﺑﺸﺮﺏ ﺻﺒﻐﺔ ﻭﺍﻣﻮﺕ ﻭﺍﺭﻳﺤﻚ ﻣﻨﻲ ..

ﻗﺎﻝ ﻟﻴﻬﺎ ﻃﻴﺐ ﻧﺼﺒﺮ ﺷﻮﻳﺔ ﺍﻣﻜﻦ ﺗﻘﺘﻨﻊ ﻳﺎﻫﻨﺪ .. ﻭﺍﻟﻠﻪ ﺍﻧﺎ ﺑﺼﺒﺮ ﻭﻋﻨﺪﻱ ﻇﻦ ﻓﻲ ﺭﺑﻨﺎ ﻳﻔﺘﺤﻬﺎ ﻋﻠﻲ .. ﻭﺍﻟﻠﻪ ﺍﻟﺸﻐﻞ ﻣﺎﺷﻲ ﻣﻌﺎﻱ ﻛﻮﻳﺲ ..

ﻗﺎﻟﺖ ﻟﻴﻬﻮ ﻣﺎﻓﻲ ﻃﺮﻳﻘﺔ .. ﻭﺍﻟﻠﻪ ﻳﺎﺧﺪﺭ ﻫﺴﻲ ﺍﻣﻲ ﻛﻠﻤﺖ ﺍﺑﻮﻱ ﻭﻗﺎﻟﺖ ﻟﻴﻬﻮ ﺍﻗﺮﺏ ﺯﻭﻝ ﻳﺠﻲ ﻳﺘﻘﺪﻡ ﻟﻴﻬﺎ .. ﻧﺤﻦ ﺑﻨﺪﻳﻬﻮ .. ﻭﺍﺑﻮﻱ ﺫﺍﺗﻮ ﺑﻘﻰ ﻭﺍﻗﻒ ﻣﻌﺎﻫﺎ .. ﻭﺍﻧﺎ ﻣﺎﻋﺎﺭﻓﺔ ﺍﻋﻤﻞ ﺷﻨﻮ .. ؟ ﻭﻗﻌﺪﺕ ﺗﺒﻜﻲ ﺑﻘﻰ ﻣﺼﻄﻨﻊ ﻭﻣﻔﺘﻌﻞ .. ﺍﻧﺎ ﻣﻀﻄﺮﺓ ﻳﺎﺧﺪﺭ .. ﺍﻥ ﺷﺎﺀ ﺍﻟﻠﻪ ﺭﺑﻨﺎ ﻳﻘﺴﻢ ﺍﺧﻴﺮ ﻣﻨﻲ .. ﻭﺍﻧﺎ ﻟﻲ ﺍﻟﻠﻪ .. ﻭﺍﻥ ﺷﺎﺀ ﺍﻟﻠﻪ ﺭﺑﻨﺎ ﻳﺼﺒﺮﻧﻲ .. ﻭﻃﻮﺍﻟﻲ ﻗﺎﻟﺖ ﻟﻴﻬﻮ ﻣﻊ ﺍﻟﺴﻼﻣﺔ ﻳﺎﺧﺪﺭ .. ﻋﺸﺎﻥ ﺍﻣﺸﻲ ﺍﻛﻠﻢ ﺍﻣﻲ .. ﺍﻗﻮﻝ ﻟﻴﻬﺎ ﺍﻧﺎ ﺧﻠﻴﺖ ﺧﺪﺭ .. ﻋﺸﺎﻥ ﺗﺎﻛﻞ ﻟﻴﻬﺎ ﻟﻘﻤﺔ .. ﺍﻣﻲ ﺑﻘﺖ ﻋﻴﺎﻧﺔ ﻳﺎﺧﺪﺭ ..

ﻗﺎﻝ ﻟﻴﻬﺎ ﺧﻼﺹ ﺍﻣﺸﻲ ﻛﻠﻤﻴﻬﺎ .. ﻋﺸﺎﻥ ﺗﺎﻛﻞ .. ﻟﻜﻦ ﻣﺎﺗﻘﻨﻌﻲ ﺍﻧﺘﻲ .. ﻣﺎﺗﺴﺘﻠﻤﻲ .. ﺣﺎﻭﻟﻲ ﺭﺿﻴﻬﺎ ﺑﺎﻱ ﻃﺮﻳﻘﺔ .. ﻗﺎﻟﺖ ﻟﻴﻬﻮ ﺣﺎﻭﻟﺖ ﻛﺘﻴﺮ ﺣﺎﻭﻟﺖ .. ﻏﻠﺒﻨﻲ ﻏﻠﺒﻨﻲ ﻏﻠﺒﻨﻲ .. ﻗﺎﻝ ﻟﻴﻬﺎ ﻳﻌﻨﻲ ﺧﻼﺹ ﻛﺪﺍ ﻳﺎﻫﻨﺪ؟

ﻗﺎﻟﺖ ﻟﻴﻬﻮ ﺍﻳﻮﻩ ﺧﻼﺹ ﻳﺎﺧﺪﺭ .. ﻣﻊ ﺍﻟﺴﻼﻣﺔ ﻳﺎﺧﺪﺭ .. ﺧﺪﺭ ﻣﺎﻗﺪﺭ ﻳﺮﺩ ﻋﻠﻴﻬﺎ .. ﺑﻘﻰ ﺳﺎﻛﺖ ﻣﺘﺒﻜﻢ ﺑﺲ .. ﻭﻗﻔﻠﺖ ﻣﻨﻮ ﺍﻟﺘﻠﻔﻮﻥ .. ﺧﺪﺭ ﻃﺒﻌﺎ ﻣﺼﺪﻭﻡ ﺻﺪﻣﺔ .. ﺍﻟﻤﻜﺎﻟﻤﺔ ﺧﻠﺼﺖ ﻭﻟﺴﻊ ﺧﺎﺗﻲ ﺍﻟﺘﻠﻔﻮﻥ ﻓﻲ ﺍﺿﺎﻧﻮ .. ﻭﻣﺒﻬﻮﺕ .. ﺯﻱ ﺍﻟﺰﻭﻝ ﺍﻟﻤﺎﺕ ﺟﻨﺎﻫﻮ ﻗﺪﺍﻡ ﻋﻴﻨﻮ .. ﻭﻃﻠﻊ ﻣﻦ ﺍﻟﺒﻴﺖ .. ﺍﻟﻜﻼﻡ ﺩﻩ ﺑﺎﻟﻤﺴﺎﺀ .. ﻃﻠﻊ ﻣﺸﻰ ﺑﺎﻟﺸﺎﺭﻉ .. ﻭﻫﻮ ﻣﺎﻋﺎﺭﻑ ﻣﺎﺷﻲ ﻭﻳﻦ .. ﻭﻃﻠﻊ ﻟﻐﺎﻳﺔ ﻣﺎ ﻭﺻﻞ ﺍﻟﺰﻟﻂ .. ﻭﻗﻄﻊ ﺍﻟﺰﻟﻂ ﺑﺪﻭﻥ ﻣﺎﻳﻌﺎﻳﻦ ﻟﻠﻌﺮﺑﺎﺕ ﺍﻟﻤﺎﺭﺓ ..

يتبع....

#الأصابع_الشريفة
بقلم: طارق اللبيب

الجزء 08

ﺭﺑﻚ ﺭﺏ ﺍﻟﺨﻴﺮﺧﺪﺭ ﻗﻄﻊ ﺍﻟﺸﺎﺭﻉ ﺑﻲ ﺳﻼﻣﺔ .. ﺑﺎﻟﺮﻏﻢ ﻣﻦ ﺍﻧﻮ ﻓﻲ ﻭﺍﺣﺪ ﺑﺘﺎﻉ ﺑﻮﻛﺴﻲ ﺣﻚ ﻓﺮﻣﻠﺔ .. ﻻﻣﻦ ﻟﺴﺎﺗﻜﻮ ﺟﺎﺑﻦ ﺩﺧﺎﻥ ﺑﻲ ﺳﺒﺐ ﺍﻟﺰﻭﻝ ﺍﻟﻘﺎﻃﻊ ﺍﻟﺸﺎﺭﻉ ﺑﺪﻭﻥ ﻣﺎﻳﻌﺎﻳﻦ ﺩﻩ .. ﻛﻮﺭﻙ ﻓﻴﻬﻮ ﻳﺎﺯﻭﻝ ﺍﻧﺖ ﺍﻋﻤﻰ ﻭﻻﺷﻨﻮ ؟؟ ﻭﻃﺒﻌﺎ" ﺑﺘﺎﻉ ﺍﻟﺒﻮﻛﺴﻲ ﻣﺎﻋﺎﺭﻑ ﺍﻟﺤﺎﺻﻞ ﻋﻠﻴﻬﻮ .. ﻟﻮ ﻋﺎﺭﻑ ﺍﻟﺤﺎﺻﻞ ﻛﺎﻥ ﻋﺬﺭﻭ

ﻛﺎﻥ ﺍﻟﻤﻔﺮﻭﺽ ﻓﻲ ﺷﺎﺭﻉ ﺯﻱ ﺷﺎﺭﻉ ﻭﺍﺣﺪ .. ﺷﺎﺭﻉ ﻗﺎﻃﻊ ﻧﺺ ﺣﻲ ﺳﻜﻨﻲ .. ﻧﺎﺱ ﺍﻟﻌﺮﺑﺎﺕ ﻳﻤﺸﻮ ﺑﻬﺪﻭﺀ ﺷﻮﻳﺔ

ﻻﻧﻚ ﻣﺎﺑﺘﻌﺮﻑ ﻇﺮﻭﻑ ﺍﻟﻨﺎﺱ .. ﻭﻧﻔﺴﻴﺎﺗﻬﻢ ﻭﻣﻼﺑﺴﺎﺗﻬﻢ ﻭﻣﺸﺎﻛﻠﻬﻢ

ﺧﺪﺭ ﻗﻄﻊ .. ﻭﻣﺸﻰ .. ﻣﺎﺷﻲ ﻟﻲ ﺟﻴﻬﺔ ﺍﻟﺸﺮﻕ .. ﻻﻣﻦ ﻗﺮﺏ ﻟﻲ ﺷﺎﺭﻉ ﺍﻟﺮﺩﻣﻴﺔ .. ﻭﺟﺴﻤﻮ ﻣﻨﻬﺎﺭ ﻭﻭﺻﺪﺭﻭ ﻣﺴﺨﻦ .. ﻭﻋﻴﻮﻧﻮ ﻣﻮﻟﻌﺔ ﻧﺎﺭ .. ﻭﺣﺎﺳﻲ ﺑﻲ ﺍﻧﻮ ﺟﺎﺗﻮ ﺣﻤﻰ .. ﻓﺠﺄﻩ ﻗﻌﺪ ﻓﻲ ﻧﺺ ﺍﻟﺸﺎﺭﻉ .. ﺍﻟﻔﻲ ﻧﺺ ﺍﻟﺤﻠﺔ .. ﻭﺧﺎﺗﻲ ﻳﺪﻳﻬﻮ ﻓﻲ ﺭﺍﺳﻮ .. ﻭﻛﻞ ﺍﻻﻟﻢ ﺍﻟﺠﻮﺍﻫﻮ ﻣﺮﻛﺰ ﻓﻲ ﺣﺘﺔ ﻭﺍﺣﺪﺓ .. ﺑﻘﻮﻝ ﻳﺎﺭﺑﻲ ﺍﻟﺘﻐﻴﻴﺮ ﺍﻟﺤﺼﻞ ﻟﻲ ﻫﻨﺪﻭﻳﺔ .. ﻭﺧﻼﻫﺎ ﺗﺴﺘﺴﻠﻢ ﺑﻲ ﺳﻬﻮﻟﺔ ﻛﺪﺍ ﺷﻨﻮ؟

ﺣﺘﻤﺎ" ﺍﻟﺴﺒﺐ ﻣﺎ ﺍﻣﻬﺎ .. ﺍﻧﺎ ﻣﺘﺎﻛﺪ ﺍﻟﺴﺒﺐ ﻣﺎ ﺍﻣﻬﺎ .. ﻫﻨﺪﻭﻳﺔ ﻛﺎﻧﺖ ﻣﺼﺮﺓ ﻋﻠﻲ ﻭﻣﺎ ﻛﺎﻧﺖ ﺷﺎﻳﻠﺔ ﻫﻢ ﻣﻦ ﺍﻣﻬﺎ .. ﻫﻨﺪ ﺷﻜﻠﻬﺎ ﻗﻨﻌﺎﻧﺔ ﻣﻨﻲ ﺷﺪﻳﺪ .. ﻭﻣﺴﺘﻌﺠﻠﺔ ﺗﻘﻔﻞ ﻣﻨﻲ ﺍﻟﺘﻠﻔﻮﻥ ﻋﻠﻰ ﻏﻴﺮ ﺍﻟﻌﺎﺩﺓ

ﻫﻨﺪﻭﻳﺔ ﻗﺒﻞ ﻛﺪﺍ ﻗﺎﻟﺖ ﻟﻲ ﻳﺎ ﺍﻧﺖ ﻳﺎ ﺍﻟﻤﻮﺕ .. ﻭﻟﻮ ﻓﺮﺿﻨﺎ ﻣﻦ ﺍﻣﻬﺎ ﻣﻌﻘﻮﻝ ﺍﻣﻬﺎ ﺗﻜﻮﻥ ﻭﺻﻠﺖ ﺍﻟﺪﺭﺟﺔ ﺩﻱ ؟ ﻭﻟﻴﻪ ؟ ﺍﻟﺴﺒﺐ ﺷﻨﻮ؟

ﻳﻌﻨﻲ ﺍﻧﺎ ﻓﻴﻨﻲ ﺷﻨﻮ ﻋﺸﺎﻥ ﺍﻣﻬﺎ ﺗﻨﺘﺤﺮ ﻋﺸﺎﻧﻲ ﺍﻧﺎ ؟ ﻻﺯﻡ ﺍﻟﺤﻜﺎﻳﺔ ﺩﻱ ﻭﺭﺍﻫﺎ ﻛﻼﻡ

ﺍﻧﺎ ﻏﺎﻳﺘﻮ ﻣﺘﺄﻛﺪ ﺍﻧﻮ ﻓﻲ ﺣﺎﺟﺔ ﻏﻴﺮﺕ ﻫﻨﺪﻭﻳﺔ . ﻫﻨﺪﻭﻳﺔ ﻣﺎ ﺩﺍﻳﺮﺓ ﺗﻘﺒﻞ ﻣﻨﻲ ﺍﻱ ﺍﻗﺘﺮﺍﺡ .. ﻫﻨﺪﻭﻳﺔ ﺷﻜﻠﻬﺎ ﻗﻨﻌﺖ ﻣﻨﻲ .. ﻳﺎﺭﺑﻲ ﺗﻜﻮﻥ ﺩﻱ ﻧﺴﺮﻳﻦ ﺭﺟﻌﺖ ﺗﺎﻧﻲ ﺗﺨﺒﺰ ﻭﺗﻌﺠﻦ ﺑﻲ ﻭﺭﺍﻱ ؟

ﻭﺍﻟﺘﻔﻜﻴﺮ ﺩﺍﻳﺮ ﻳﺸﻞ ﺭﺍﺳﻮ .. ﺧﺪﺭ ﺑﺎﻟﺠﺪ ﻛﺎﻥ ﺣﺰﻳﻦ ﻭﻣﺎﻫﺎﻳﻦ ﻋﻠﻴﻬﻮ ﺍﻧﻮ ﻳﻔﻘﺪ ﺍﻟﺒﺖ

ﺍﻫﺎ ﻓﻲ ﺳﺒﻴﻞ ﺍﺯﻳﺎﺭ ﻛﺪﺍ ﻗﺮﻳﺐ ﻣﻨﻮ ﻣﺸﻰ ﻏﺴﻞ ﻭﺷﻴﻬﻮ ﻭﻛﺐ ﻛﻮﺯ ﻣﻮﻳﺔ ﻓﻮﻕ ﺭﺍﺳﻮ .. ﻭﺭﺟﻊ ﺍﻟﺒﻴﺖ .. ﺍﻟﻠﻴﻞ ﺩﺍﻙ ﻛﻠﻮ ﻣﺎﻧﺎﻡ ﻭﻻ ﻧﻌﺲ .. ﻳﺘﻘﻠﺐ ﻓﻲ ﺍﻟﺴﺮﻳﺮ ﺯﻱ ﺍﻟﻤﻠﺪﻭﻍ

ﻭﻗﺎﻡ ﺍﻟﺼﺒﺎﺡ ﺑﺪﺭﻱ ﻗﺒﻞ ﺍﻻﺫﺍﻥ ﻗﻌﺪ ﻓﻲ ﻧﺺ ﺍﻟﺴﺮﻳﺮ .. ﻭﺧﺎﺗﻲ ﻳﺪﻳﻬﻮ ﻓﻲ ﺭﺍﺳﻮ .. ﻻﻣﻦ ﺟﺎﺕ ﺻﻼﺓ ﺍﻟﺼﺒﺢ .. ﻗﺎﻡ ﺻﻠﻰ ﻭﺗﺎﻧﻲ ﻣﺎﻧﺎﻡ .. ﺷﺎﻝ ﺍﻟﺘﻠﻔﻮﻥ ﺩﺍﻳﺮ ﻳﻀﺮﺏ ﺍﻟﺘﻠﻔﻮﻥ ﺑﺘﺎﻉ ﻫﻨﺪﻭﻳﺔ .. ﺍﺗﺮﺩﺩ ﻛﺘﻴﺮ .. ﻃﻠﻊ ﺍﻟﺮﻗﻢ ﺗﻼﺕ ﻣﺮﺍﺕ ﻭﻗﻔﻠﻮ ﺭﺍﺟﻊ ﻛﻠﻮ ﻣﺮﺓ ﻳﺪﻭﺭ ﻳﺘﺼﻞ ﻋﻠﻴﻬﺎ ﻳﻐﻴﺮ ﺭﺍﻳﻮ ..

ﻣﺸﻰ ﺷﺎﻝ ﺍﻟﻤﻠﻴﻮﻥ ﻭﻧﺺ ﺭﺟﻌﻦ ﻟﻲ ﺍﻟﺼﺎﺩﻕ .. ﻭﻗﺎﻝ ﻟﻴﻬﻮ ﺧﻼﺹ ﻣﺎﻋﻨﺪﻱ ﻟﻴﻬﻦ ﺣﻮﺟﺔ ..

ﺍﻟﺼﺎﺩﻕ ﻗﺎﻝ ﻟﻴﻬﻮ : ﻳﺎﺯﻭﻝ ﻣﺎﻟﻚ ﻓﻲ ﺷﻨﻮ؟

ﻗﺎﻝ ﻟﻴﻬﻮ : ﺍﻟﻤﻮﺿﻮﻉ ﺍﻧﺘﻬﻰ .. ﺍﻟﺒﺖ ﺍﻣﻬﺎ ﺭﺍﻓﻀﺔ .. ﻭﺧﻠﻴﻨﺎﻫﻮ ﺍﻟﻤﻮﺿﻮﻉ ﺭﺑﻨﺎ ﻳﺴﻬﻞ

ﻭﻟﺒﺲ ﻭﻃﻠﻊ ﻣﻊ ﺍﻧﻮ ﺍﻟﻠﻴﻠﺔ ﻣﺎﻋﻨﺪﻭ ﺷﻐﻞ .. ﻣﺎﻋﺎﺭﻑ ﻧﻔﺴﻮ ﻣﺎﺷﻲ ﻭﻳﻦ .. ﻭﻻ ﺍﻧﺎ ﻋﺎﺭﻓﻮ ﻣﺎﺷﻲ ﻭﻳﻦ ﺍﻟﻤﻬﻢ ﻣﺮﻕ

ﺑﻬﻨﺎﻙ ﻃﺒﻌﺎ ﻫﻨﺪﻭﻳﺔ .. ﺍﻟﺼﺒﺎﺡ ﺑﺘﺤﻀﺮ ﻓﻲ ﺍﻟﻜﻼﻡ ﻋﺸﺎﻥ ﺗﻮﺻﻞ ﺍﻟﺨﺒﺮ ﺑﺘﺎﻉ ﺍﻟﻤﻮﺍﻓﻘﺔ ﻟﻲ ﺍﻣﻬﺎ .. ﻭﻟﻲ ﺧﺎﻟﺘﻬﺎ ﺳﻤﻴﺔ .. ﻭﻓﻌﻼ ﺍﻟﻨﻬﺎﺭﻳﺔ ﻛﺪﺍ ﻭﺍﻣﻬﺎ ﻗﺎﻋﺪﺓ ﺑﺮﺍﻫﺎ ..

ﻗﺎﻟﺖ ﻟﻴﻬﺎ : ﻳﺎ ﺍﻣﻲ ؟

ﻗﺎﻟﺖ ﻟﻴﻬﺎ : ﻧﻌﻢ ﻳﺎﻫﻨﺪﻭﻳﺔ ..

ﻗﺎﻟﺖ ﻟﻴﻬﺎ : ﺍﻧﺘﻲ ﻫﺴﻲ ﺷﺎﻳﻔﺔ ﻣﻌﺘﺰ ﺩﻩ ﻣﻨﺎﺳﺐ ﻟﻲ ؟

ﻗﺎﻟﺖ ﻟﻴﻬﺎ : ﻋﺎﺩ ﻳﺎﺑﺘﻲ ﻋﻨﺪﻙ ﺍﻟﻤﺤﻦ .. ﺍﻧﺘﻲ ﻣﻦ ﻣﺘﻴﻦ ﺑﺘﺴﺄﻟﻴﻨﻲ ﻋﻦ ﺭﺍﻱ ﻓﻲ ﺍﻟﺒﻨﺎﺳﺐ ﻟﻴﻚ ﻭﺍﻟﻤﺎﻣﻨﺎﺳﺐ ﻟﻴﻚ؟؟

ﺩﻱ ﺣﻴﺎﺗﻚ ﻭﺍﻧﺘﻲ ﻣﺨﻴﺮﺓ ﻓﻴﻬﺎ .. ﻭﺍﻓﻘﺘﻲ ﺧﻠﻴﻨﺎ ﻧﻀﺮﺏ ﻫﺴﻲ ﻟﻲ ﺧﺎﻟﺘﻚ ﺳﻤﻴﺔ .. ﺩﺍﻳﺮﺓ ﺧﺪﺭ ﺑﺘﺎﻋﻚ ﺩﻩ ﺍﻧﺎ ﻣﺎﻋﻨﺪﻱ ﻣﺎﻧﻊ .. ﺳﺒﺤﺎﻥ ﺍﻟﻠﻪ ﺷﻮﻑ ﺍﻻﻡ .. ﻟﻤﻦ ﻟﻘﺖ ﺍﻟﺒﺖ ﺭﺍﺧﻴﺔ .. ﺩﺍﻳﺮﺓ ﺗﻌﻤﻞ ﻓﻴﻬﺎ ﻣﺎﻫﺎﻣﻴﻬﺎ ﺍﻟﻤﻮﺿﻮﻉ ... ﻟﻜﻦ ﺍﻟﺤﻘﻴﻘﺔ ﺍﻗﺒﺎﻝ ﺩﺍﻳﺮﺓ ﻣﻌﺘﺰ ﺍﻛﺘﺮ ﻣﻦ ﺑﺘﻬﺎ .. ﻭﺍﻟﺒﺖ ﻓﺎﻫﻤﺔ ﺍﻣﻬﺎ ﻛﻮﻳﺲ .. ﻭﻋﺎﺭﻓﺎﻫﺎ ﻋﺎﻣﻠﺔ ﺗﻘﻴﻠﻪ

ﻗﺎﻟﺖ ﻟﻴﻬﺎ : ﺧﻼﺹ ﻳﺎ ﺍﻣﻲ .. ﺍﻧﺎ ﻣﻮﺍﻓﻘﺔ ﺑﻲ ﻣﻌﺘﺰ .. ﻭﺧﺪﺭ ﺧﻠﻴﺘﻮ ﻣﻮﺵ ﺩﻱ ﺭﻏﺒﺘﻚ؟

ﻗﺎﻟﺖ ﻟﻴﻬﺎ : ﻛﺎﻧﺖ ﺭﻏﺒﺘﻲ ﺯﻣﺎﻥ .. ﻭﺍﻧﺘﻲ ﺍﺑﻴﺘﻲ ﺗﺴﻤﻌﻲ ﻛﻼﻣﻲ ﻻﻣﻦ ﺷﻔﺘﻲ ﻣﻌﺘﺰ .. ﺑﻘﺖ ﺭﻏﺒﺘﻚ ﺍﻧﺘﻲ ﻳﺨﺘﻲ .. ﻣﺎﺗﺴﻮﻳﻬﺎ ﻓﻴﻨﻲ ﺍﻧﺎ

ﻫﻨﺪ ﻗﻌﺪﺕ ﺗﻀﺤﻚ ..

ﻭﻗﺎﻟﺖ ﻟﻴﻬﺎ : ﻏﺎﻳﺘﻮ ﺍﻧﺘﻲ ﻳﺎ ﺍﻣﻲ ..

ﺍﻗﺒﺎﻝ ﻗﺎﻟﺖ ﻟﻴﻬﺎ : ﻫﺴﻲ ﺍﻧﺘﻲ ﺧﺪﺭ ﺍﺗﻜﻠﻤﺘﻲ ﻣﻌﺎﻫﻮ؟ .. ﻭﻻ ﺩﺍﻳﺮﺓ ﺗﺨﻠﻴﻬﻢ ﺍﻻﺗﻨﻴﻦ ﻓﻲ ﺍﻟﺨﻂ .. ﻳﻘﺒﺾ ﺍﻟﺒﻘﺒﺾ ﻭﺍﻟﺒﻔﻚ ﻳﻔﻚ؟؟

ﻗﺎﻟﺖ ﻟﻴﻬﺎ ﻻﻻ .. ﺍﻧﺎ ﻣﻦ ﺍﻣﺒﺎﺭﺡ ﻛﻠﻤﺖ ﺧﺪﺭ .. ﻭﺧﻼﺹ ﺍﻧﺘﻬﻴﻨﺎ ﻣﻦ ﺍﻟﺤﻜﺎﻳﺔ ﺩﻱ ..

ﻗﺎﻟﺖ ﻟﻴﻬﺎ ﺧﺪﺭ ﻳﺎﻫﻨﺪﻭﻳﺔ ﻟﻮ ﺯﻭﻻ " ﻓﻴﻬﻮ ﻓﺎﻳﺪﺓ .. ﻛﻨﺖ ﺑﻘﻮﻝ ﻟﻴﻚ ﺧﻠﻴﻬﻮ ﻓﻲ ﺍﻟﺮﻑ .. ﻟﻜﻦ ﺩﻩ ﺍﻟﺮﻑ ﺫﺍﺗﻮ ﻛﺘﻴﺮ ﻋﻠﻴﻬﻮ .. ﺍﺣﺴﻦ ﺷﻲ ﺍﺗﺨﻠﺘﻲ ﻣﻨﻮ ..

ﺧﻼﺹ ﺑﺲ ﺍﺩﻳﻨﻲ ﻓﺮﺻﺔ .. ﺍﺧﻠﺺ ﻣﻦ ﺍﻟﻔﻲ ﻳﺪﻱ .. ﻭﻧﺠﻲ ﻧﻀﺮﺏ ﻟﻲ ﺧﺎﻟﺘﻚ ﺳﻤﻴﺔ ..

ﻓﻌﻼ ﺿﺮﺑﻦ ﻟﻲ ﺳﻤﻴﺔ .. ﻭﺍﺗﻜﻠﻤﺖ ﻣﻌﺎﻫﺎ ﺍﻗﺒﺎﻝ .. ﻗﺎﻟﺖ ﻟﻴﻬﺎ ﻳﺎﺳﻤﻴﺔ ﻫﻨﺪﻭﻳﺔ ﺩﻱ ﺧﻼﺹ ﺍﻗﺘﻨﻌﺖ ﺑﻌﺪ ﺗﻌﺐ ﻭﺍﻟﻠﻪ ..

ﺳﻤﻴﻪ ﻗﺎﻟﺖ ﻟﻴﻬﺎ ﺍﻧﺘﻲ ﻣﺘﺎﻛﺪﺓ ﻳﺎ ﺍﻗﺒﺎﻝ ؟ ﻗﺎﻟﺖ ﻟﻴﻬﺎ ﺗﻤﺎﻡ ﺍﻟﺘﺎﻛﺪ .. ﻋﺎﻳﺰﺓ ﺗﺘﻜﻠﻤﻲ ﻣﻌﺎﻫﺎ؟؟ ﺗﺘﺎﻛﺪﻱ ﺑﻲ ﻧﻔﺴﻚ ؟؟ .. ﻫﺎﻙ ﻟﻴﻬﺎ .. ﻫﺎﻙ ﻳﺎ ﻫﻨﺪﻭﻳﺔ ﺧﺎﻟﺘﻚ ﺳﻤﻴﺔ ..

ﻫﻨﺪﻭﻳﺔ ﺷﺎﻟﺖ ﺍﻟﺘﻠﻔﻮﻥ ﻭﻗﺎﻟﺖ ﻟﻴﻬﺎ .. ﺍﻫﻠﻴﻦ ﻳﺎﺧﺎﻟﺘﻲ ﺳﻤﻴﻪ ﻛﻴﻔﻚ؟

ﺳﻤﻴﺔ ﻗﺎﻟﺖ ﻟﻴﻬﺎ ﺧﻼﺹ ﻳﺎﻫﻨﺪﻭﻳﺔ .. ؟؟ ﺍﺧﺪﺗﻲ ﺭﺍﺣﺘﻚ ﻓﻲ ﺍﻟﺘﻔﻜﻴﺮ؟ ﻗﺎﻟﺖ ﻟﻴﻬﺎ ﺍﻳﻮﺓ ﺧﻼﺹ .. ﺭﺑﻨﺎ ﻳﺴﻮﻱ ﺍﻟﻔﻴﻬﺎ ﺧﻴﺮ ..

ﻗﺎﻟﺖ ﻟﻴﻬﺎ ﺧﻼﺹ .. ﺍﻧﺎ ﺑﺪﻳﻬﻮ ﺗﻠﻔﻮﻧﻚ ﻳﻨﺴﻖ ﻣﻌﺎﻙ .. ﻭﺗﺘﻔﻘﻮ ﻋﻠﻲ ﻛﻞ ﺷﻲ .. ﻋﻠﻰ ﻛﻞ ﺣﺎﻝ .. ﺍﻻﻥ ﻫﻨﺪﻭﻳﺔ ﺍﻣﻮﺭﺓ ﻣﺸﺖ ﺯﻱ ﺍﻟﺒﺎﺳﻄﻪ ..

ﺧﺪﺭ ﺍﻟﻨﻬﺎﺭ ﻛﻠﻮ ﻃﺎﺵ ﺑﻲ ﺑﺤﺮﻱ .. ﻭﺍﺻﻠﻮ ﺑﺲ ﻣﺨﻮ ﻛﻠﻮ ﻛﻠﻮ ﻣﺎﻭﻗﻒ ﻣﻦ ﺍﻟﺘﻔﻜﻴﺮ .. ﺑﺲ ﺍﺧﺮ ﺣﺎﺟﺔ ﺭﺳﻰ ﺗﻔﻜﻴﺮﻭ ﻓﻲ ﻧﺴﺮﻳﻦ .. ﻭﺧﺎﺗﻲ ﺍﻧﻬﺎ ﻫﻲ ﺍﻟﺴﺒﺐ ﻓﻲ ﺍﻟﻤﻮﺿﻮﻉ ﺩﻩ .. ﺗﻜﻮﻥ ﺧﻠﻘﺖ ﻓﺘﻨﺔ ﺗﺎﻧﻲ ..

ﻳﻌﻨﻲ ﺣﻜﺎﻳﺔ ﺍﻧﻮ ﺍﻟﺮﻓﺾ ﻣﻦ ﺍﻻﻡ ﺍﻟﻘﺼﺔ ﺩﻱ ﻣﺎﺭﻛﺒﺖ ﻟﻴﻬﻮ ﻓﻲ ﺭﺍﺳﻮ ..

ﻗﺎﻡ ﺍﺗﺼﻞ ﻋﻠﻰ ﻧﺴﺮﻳﻦ ..

ﻗﺎﻝ ﻟﻴﻬﺎ ﺍﻧﺘﻲ ﻭﻳﻦ؟؟ ﻗﺎﻟﺖ ﻟﻴﻬﻮ ﺍﻧﺎ ﻓﻲ ﺍﻡ ﺩﺭﻣﺎﻥ ﻋﻨﺪ ﻧﺎﺱ ﺧﺎﻟﺘﻲ .. ﻓﻲ ﺍﺑﺮﻭﻑ .

. ﻗﺎﻝ ﻟﻴﻬﺎ ﺍﻧﺎ ﻋﺎﻳﺰ ﺍﻻﻗﻴﻚ ﻫﺴﻲ ﻣﻤﻜﻦ؟؟

ﻗﺎﻟﺖ ﻟﻴﻬﻮ ﻓﻲ ﺷﻨﻮ ﻳﺎﺧﺪﺭ؟؟ ﺻﻮﺗﻚ ﻣﺎﻃﺒﻴﻌﻲ .. ﺍﻧﺖ ﻭﻳﻦ؟ ﺍﻧﺎ ﺑﺠﻴﻚ ﻫﺴﻲ .. ﻗﺎﻝ ﻟﻴﻬﺎ ﺍﻧﺎ ﻓﻲ ﺑﺤﺮﻱ .. ﻗﺎﻟﺖ ﻟﻴﻬﻮ ﻣﺴﺎﻓﺔ ﺍﻟﺴﻜﺔ ..

ﻭﺻﻒ ﻟﻴﻬﺎ ﻫﻮ ﻭﻳﻦ .. ﺑﻌﺪ ﻧﺺ ﺳﺎﻋﺔ ﻛﺎﻧﺖ ﻣﻌﺎﻫﻮ ... ﺍﻭﻝ ﻣﻦ ﺟﺎﺕ ﺷﺎﻓﺘﻮ .. ﻗﺎﻟﺖ ﻟﻴﻬﻮ ﺍﻧﺖ ﻳﺎﺧﺪﺭ ﻣﺎﻟﻚ ؟ ﻣﺎﻟﻮ ﺷﻜﻠﻚ ﻛﺪﺍ؟ ﺍﻧﺖ ﻋﻴﺎﻥ؟ ﻗﺎﻝ ﻟﻴﻬﺎ ﺧﻠﻴﻨﻲ ﺍﻧﺎ ﻣﺎﻟﻲ .. ﻣﺎﻋﻨﺪﻙ ﺷﻐﻠﺔ ﻣﻌﺎﻱ ﺍﻟﻤﺸﻜﻠﺔ ﺍﻧﺘﻲ .. ﺍﻧﺘﻲ ﻳﺎ ﻧﺴﺮﻳﻦ ﺯﻣﻨﻚ ﻛﻠﻮ .. ﻋﺎﻳﺸﺔ ﻣﻌﺎﻧﺎ ﺑﺎﻟﻄﻴﺒﺔ ﻭﺻﻔﺎﺀ ﺍﻟﻨﻴﺔ .. ﺩﻱ ﺷﻨﻮ ﺍﻟﺤﺮﻛﺎﺕ ﺍﻟﺒﺪﻳﺘﻲ ﺗﻌﻤﻠﻲ ﻓﻴﻬﺎ ﺩﻱ ؟ .. ﻗﺎﻟﺖ ﻟﻴﻬﻮ ﺣﺮﻛﺎﺕ ﺷﻨﻮﻳﺎﺧﺪﺭ ﻗﻮﻝ ﺑﺴﻢ ﺍﻟﻠﻪ ؟

ﻃﻮﺍﻟﻲ ﺍﺗﺬﻛﺮﺕ ﺍﻟﻜﻼﻡ ﺍﻟﻘﺎﻟﺘﻮ ﻟﻲ ﻫﻨﺪﻭﻳﺔ ..

ﻗﺎﻝ ﻟﻴﻬﺎ ﻣﻮﺵ ﺍﻧﺖ ﻫﺪﻓﻚ ﺍﻻﺳﺎﺳﻲ ﺍﻧﻮ ﻫﻨﻮﻳﺔ ﺗﺘﺨﻼ ﻋﻨﻲ؟؟ ﺍﻫﻮ ﺧﻼﺹ ﺍﻟﺒﻴﻨﺎ ﺍﻧﺘﻬﻲ .. ﻳﺎﺭﻳﺖ ﺗﻜﻮﻧﻲ ﺍﺭﺗﺤﺘﻲ .. ﻣﺸﻴﺘﻲ ﻓﺘﻨﺘﻲ ﺑﻴﻨﻲ ﻭﺑﻴﻨﻬﺎ ﻋﺸﺎﻥ ﺗﺨﻠﻴﻨﻲ ﻟﻴﻚ .. ﺧﻼﺹ ﻳﺎﻧﺴﺮﻳﻦ ﻫﺪﻓﻚ ﺗﻢ .. ﻗﺎﻟﺖ ﻟﻴﻬﻮ ﺑﺲ ﻣﺘﻴﻦ ﺍﻟﻜﻼﻡ ﺩﻩ ﻃﻮﻝ ﻭﺍﻟﻠﻪ .. ﻭﺍﻧﺘﻮ ﺑﻌﺪﻭ ﻛﻨﺘﻮ ﻋﺎﺩﻳﻴﻦ ﺍﻧﺎ ﻣﺘﺎﺑﻌﺔ ..

ﻗﺎﻝ ﻟﻴﻬﺎ ﺍﻧﺘﻲ ﺍﺻﻼ ﻣﺎ ﻭﻗﻔﺖ ﺧﺴﺎﺳﺘﻚ .. ﻭﻗﻮﺍﻟﺘﻚ .. ﺑﺲ ﻧﻔﺴﻲ ﺍﻋﺮﻑ ﺍﻧﻚ ﻗﻠﺘﻲ ﻟﻴﻬﺎ ﺷﻨﻮ ..

ﻗﺎﻟﺖ ﻟﻴﻬﻮ ﻭﺍﻟﻠﻪ ﻣﺎﺡ ﺍﻛﺬﺏ ﻋﻠﻴﻚ .. ﻭﺩﻩ ﻛﻠﻮ ﻋﺸﺎﻥ ﺍﻧﺎ ﻋﺎﻳﺰﺍﻙ .. ﻣﺎﻋﻨﺪﻱ ﻫﺪﻑ ﺗﺎﻧﻲ ..

ﻗﺎﻝ ﻟﻴﻬﺎ ﺍﻧﺘﻲ ﻋﺎﺭﻓﺔ ﺍﻧﻲ ﺑﺤﺐ ﻫﻨﺪﻭﻳﺔ .. ﻭﻋﺎﻳﺰ ﺍﺗﺰﻭﺟﻬﺎ .. ﻭﺍﻧﺘﻲ ﻣﺎﻋﻨﺪﻱ ﺭﻏﺒﺔ ﻓﻲ ﺯﻭﺍﺝ ﻣﻨﻚ ..

ﻳﻌﻨﻲ ﺡ ﺗﻌﻤﻠﻲ ﺷﻨﻮ ﻏﻴﺮ ﺍﻟﺤﺴﺎﺩﺓ .. ﻳﻌﻨﻲ ﻣﺎﻋﻤﻠﺘﻲ ﺣﺎﺟﺔ .. ﻫﻨﺪﻭﻳﺔ ﺧﻠﺘﻨﻲ .. ﻭﺍﻧﺘﻲ ﻟﻮ ﺑﻘﻴﺘﻲ ﺍﺧﺮ ﻭﺍﺣﺪﺓ ﻓﻲ ﺍﻟﺪﻧﻴﺎ .. ﺍﻧﺎ ﻣﺎﻋﺎﻳﺰﻙ .. ﺑﺲ ﺍﻧﺎ ﻣﺎﺑﺴﻴﺒﻚ .. ﺧﻠﻴﻚ ﻋﺎﺭﻓﺔ ﺍﻧﺎ ﺡ ﺍﻧﺘﻘﻢ ﻓﻴﻚ .. ﺍﻧﺘﻲ ﻋﺎﺭﻓﺔ ﺍﻧﺎ ﻣﺎﺑﺴﻴﺒﻚ ﺗﻨﻔﺪﻱ ﺑﻲ ﻋﻤﻠﺘﻚ ﺩﻱ ..

ﻗﺎﻟﺖ ﻟﻴﻬﻮ ﻃﻴﺐ ﺍﻧﺎ ﺑﺤﻜﻲ ﻟﻴﻚ .. ﺍﻧﺎ ﺑﺲ ﻗﻠﺖ ﻟﻴﻬﺎ ﻳﻮﻡ ﺍﻟﺤﺪﺍﻳﻖ ﺍﻧﺖ ﻛﻨﺖ ﻣﻌﺎﻱ .. ﻗﺎﻝ ﻟﻴﻬﺎ ﻻﻻ ﺑﻌﺪ ﺍﻟﺤﻜﺎﻳﺔ ﺩﻳﻚ .. ﻻﻧﻮ ﺩﻳﻚ ﻻﻗﺘﻨﻲ ﻭﺍﻧﺎ ﻭﺭﻳﺘﻬﺎ ﺍﻟﺤﻘﻴﻘﺔ .. ﻭﻫﻲ ﺍﻗﺘﻨﻌﺖ ﻭﻛﻨﺎ ﻋﺎﺩﻳﻴﻦ ﺻﺎﺡ .

ﻗﺎﻟﺖ ﻟﻴﻬﻮ ﻭﺍﻟﻠﻪ ﻳﺎ ﺧﺪﺭ ﺑﺲ ﻳﺎﻫﺎ ﺩﻳﻚ .. ﻟﻜﻦ ﺗﺎﻧﻲ ﻣﺎ ﺍﺗﺼﻠﺖ ﻋﻠﻴﻬﺎ .. ﺍﻗﺴﻢ ﺑﺎﻟﻠﻪ ﺗﺎﻧﻲ ﻣﺎ ﺍﺗﺼﻠﺖ ﻋﻠﻴﻬﺎ .. ﻟﻦ ﺷﺎﻟﻠﻪ ﺭﺑﻨﺎ ﻳﺸﻞ ﺍﻣﻲ ﻭﺍﺑﻮﻱ .. ﻃﺒﻌﺎ " ﻫﻮ ﻋﺎﺭﻑ ﻟﻤﻦ ﻧﺴﺮﻳﻦ ﺗﻘﻮﻝ ﺍﻥ ﺷﺎﺀ ﺍﻟﻠﻪ ﺭﺑﻨﺎ ﻳﺸﻞ ﺍﻣﻲ ﻭﺍﺑﻮﻱ ﻣﺎﺑﺘﻜﺬﺏ ..

ﻗﺎﻟﺖ ﻟﻴﻬﻮ ﺍﻻ ﻳﻜﻮﻥ ﻋﻨﺪﻛﻢ ﻣﺸﻜﻠﺔ ﺑﺮﺍﻛﻢ ..

ﻃﺒﻌﺎ " ﺻﺪﻗﻬﺎ ﻃﻮﺍﻟﻲ ﻭﺯﻋﻠﻮ ﻣﻨﻬﺎ ﻛﻠﻮ ﺭﺍﺡ ﻓﻲ ﻟﺤﻈﺔ .. ﻭﻗﺎﻝ ﻟﻴﻬﺎ ﻭﺍﻟﻠﻪ ﻣﺎﻓﻲ ﺍﻱ ﻣﺸﻜﻠﺔ ﻳﺎﻧﺴﺮﻳﻦ .. ﻃﻴﺐ ﻟﻮ ﻣﺎ ﺍﻧﺘﻲ ﻋﻤﻠﺘﻴﻬﺎ ﻣﻌﻨﺎﻫﺎ ﻣﺎﻻ ﻳﺎﺭﺑﻲ؟؟ .. ﻭﺣﻜﻰ ﻟﻴﻬﺎ ﺍﻟﺤﺼﻞ .. ﻧﺴﺆﻳﻦ ﻣﺎﻋﺮﻓﺖ ﺗﺸﻤﺖ ﻭﻻ ﺗﺘﺎﺛﺮ ﻟﻲ ﺣﺎﻟﺔ ﺧﺪﺭ ..

ﻗﺎﻟﺖ ﻟﻴﻬﻮ ﺍﻟﻤﻬﻢ ﺍﻧﺖ ﺻﺪﻗﺘﻨﻲ؟ .. ﻗﺎﻝ ﻟﻴﻬﺎ ﺻﺪﻗﺘﻚ .. ﺍﻟﻤﺆﻣﻦ ﺻﺪﻳﻖ .. ﺍﻧﺖ ﻭﻛﺖ ﺗﻜﺬﺑﻲ ﻛﺬﺑﻚ ﻇﺎﻫﺮ ﻻﻧﻚ ﻫﺒﻠﺔ .. ﻭﻣﺎﺑﺘﺘﻤﻨﻲ ﺍﻟﺸﻠﻞ ﻻﻣﻚ ﻭﺍﺑﻮﻙ ..

ﻗﺎﻟﺖ ﻟﻴﻬﻮ ﻛﻮﻳﺲ ﺑﺲ ﺍﻧﺖ ﺍﺩﻳﻨﻲ ﻓﺮﺻﺔ .. ﻭﺍﻧﺎ ﻭﺍﻟﻠﻪ ﺑﻌﺮﻑ ﻟﻴﻚ ﻫﻲ ﻣﺎﻻ .. ﻭﻟﻮ ﻓﻲ ﺍﻱ ﺑﺼﻴﺺ ﺍﻣﻞ ﺑﺮﺟﻌﻬﺎ ﻟﻴﻚ ﺍﻗﺴﻢ ﺑﺎﻟﻠﻪ .. ﺑﺲ ﻭﺻﻒ ﻟﻲ ﺑﻴﺘﻬﻢ .. ﻭﺧﻠﻲ ﺗﻠﻔﻮﻧﻚ ﻓﺎﺗﺢ ..

ﻗﺎﻝ ﻟﻴﻬﺎ ﻻﻻ .. ﺍﺑﺪﺍ .. ﺍﻧﺘﻲ ﻣﺎﺗﺪﺧﻠﻲ ﻓﻲ ﺍﻟﻤﻮﺿﻮﻉ ﺩﻩ .. ﺍﻧﺘﻲ ﻟﻮ ﻋﺎﻳﺰﺓ ﺗﺨﺪﻣﻴﻨﻲ .. ﻫﻨﺪ ﻋﻨﺪﻫﺎ ﺟﺎﺭﺗﻬﺎ .. ﻭﺻﺎﺣﺒﺘﻬﺎ ﺷﺪﻳﺪ .. ﺍﺳﻤﻬﺎ ﺧﺎﻟﺪﺓ ﺑﻌﺮﻓﻬﺎ ﻭﺑﺘﻌﺮﻓﻨﻲ .. ﺑﺲ ﺗﻠﻔﻮﻧﻬﺎ ﻣﺎﻣﻌﺎﻱ .. ﻋﺎﻳﺰﻙ ﺗﺠﻴﺒﻲ ﻟﻲ ﺗﻠﻔﻮﻭﻧﻬﺎ .. ﻭﺑﺲ .. ﻟﻮ ﻗﺪﺭﺗﻲ ﺗﻜﻮﻧﻲ ﻣﺎﻗﺼﺮﺗﻲ ﻣﻌﺎﻱ ..

ﻗﺎﻟﺖ ﻟﻴﻬﻮ ﺟﺪﺍ ﺑﺲ ﺍﺟﻴﺒﻮ ﻛﻴﻒ؟ ﻭﺍﻋﺮﻓﻬﺎ ﻛﻴﻒ؟ .. ﻗﺎﻡ ﺧﺪﺭ ﻭﺻﻒ ﻟﻴﻬﺎ ﺑﻘﺎﻟﺔ ﻗﺮﻳﺒﺔ ﻣﻦ ﺑﻴﺖ ﻧﺎﺱ ﻫﻨﻮﻳﺔ .. ﻗﺎﻝ ﻟﻴﻬﺎ ﺍﻣﺸﻲ ﻟﻲ ﺳﻴﺪ ﺍﻟﺒﻘﺎﻟﺔ .. ﺍﺳﺎﻟﻴﻬﻮ ﻣﻦ ﺑﻴﺖ ﺑﺖ ﺍﺳﻤﻬﺎ ﺧﺎﻟﺪﺓ ﻳﻮﺳﻒ .. ﻭﻟﻤﻦ ﺗﺼﻠﻴﻬﺎ ﻗﻮﻟﻲ ﻟﻴﻬﺎ ﺧﺪﺭ ﺧﻄﻴﺐ ﻫﻨﺪﻭﻳﺔ ﺩﺍﻳﺮ ﺭﻗﻤﻚ ﻭﺑﺲ ..

ﻗﺎﻟﺖ ﻟﻴﻬﻮ ﺟﺪﺍ ﺩﻩ ﻣﻮﺿﻮﻉ ﺍﺳﻬﻞ ﻣﻦ ﻣﺎ ﺗﺘﺼﻮﺭ .. ﺍﺧﺪﻣﻚ ﺑﻌﻴﻮﻧﻲ ﻳﺎﺧﺪﺭ ..

ﻭﻓﻌﻼ ﻧﺴﺮﻳﻦ ﺭﻛﺒﺖ ﺭﻛﺸﺔ ﻣﻦ ﺑﺤﺮﻱ .. ﻭﻣﺸﺖ ﺣﻠﺔ ﺣﻤﺪ .. ﻭﺻﻠﺖ ﺍﻟﺒﻘﺎﻟﺔ .. ﻋﻠﻰ ﺣﺴﺐ ﺍﻟﻮﺻﻒ .. ﻭﺳﺄﻟﺖ ﻣﻦ ﺧﺎﻟﺪﻩ ﻳﻮﺳﻒ .. ﻭﺑﺘﺎﻉ ﺍﻟﺒﻘﺎﻟﺔ ﻗﺎﻝ ﻟﻴﻬﺎ ﻭﺍﻟﻠﻪ ﺑﻴﺖ ﻧﺎﺱ ﻳﻮﺳﻒ ﻳﻬﺪﺍﻙ .. ﺍﻟﻔﺎﺗﺢ ﻓﻲ ﻭﺷﻚ ﺩﻩ .. ﻟﻜﻦ ﻟﻮ ﻋﻨﺪﻭ ﺑﺖ ﺍﺳﻤﻬﺎ ﺧﺎﻟﺪﺓ ﻭﻻﻻ ﻣﺎﻋﺎﺭﻑ ..

ﻣﺸﺖ ﻃﻮﺍﻟﻲ ﺩﻗﺖ ﺍﻟﺒﺎﺏ .. ﺟﺎﺕ ﻓﺘﺤﺖ ﻟﻴﻬﺎ ﺍﻟﺒﺎﺏ ﻣﺮﺍﺓ ﻛﺒﻴﺮﺓ .. ﻧﺴﺮﻳﻦ ﻗﺎﻟﺖ ﻟﻴﻬﺎ .. ﺍﻟﺴﻼﻡ ﻋﻠﻴﻜﻢ ﻳﺎﺧﺎﻟﺔ .. ﻗﺎﻟﺖ ﻟﻴﻬﺎ ﻋﻠﻴﻜﻢ ﺍﻟﺴﻼﻡ ..

ﻧﺴﺮﻳﻦ ﻗﺎﻟﺖ ﻟﻴﻬﺎ ﺩﺍ ﺑﻴﺖ ﻧﺎﺱ ﺧﺎﻟﺪﺓ؟ ﻗﺎﻟﺖ ﻟﻴﻬﺎ ﻧﻌﻢ .. ﺣﺒﺎﺑﻚ ﺍﺗﻔﻀﻠﻲ .. ﻃﻮﺍﻟﻲ ﻧﺴﺮﻳﻦ ﺑﻘﺖ ﺧﺎﺷﺔ .. ﻭﺩﺧﻠﺖ ﻟﻘﺖ ﻟﻴﻚ ﺧﺎﻟﺪﺓ ﺭﺣﺒﺖ ﺑﻴﻬﺎ ..

ﻗﺎﻟﺖ ﻟﻴﻬﺎ ﻳﺎﺧﺎﻟﺪﺓ ﺍﻧﺎ ﻋﺎﻳﺰﺓ ﺍﻟﺰﻳﺎﺭﺓ ﺩﻱ ﺗﻜﻮﻥ ﺳﺮﻳﺔ ﻭﻛﺪﺍ .. ﺍﻧﺎ ﻧﺴﺮﻳﻦ ﺑﺖ ﺧﺎﻟﺔ ﺧﺪﺭ .. ﺧﺪﺭ ﺧﻄﻴﺐ ﻫﻨﺪﻭﻳﺔ .. ﻗﺎﻟﺖ ﻟﻴﻬﺎ ﺍﻳﻮﺓ ﺑﻌﺮﻓﻮ ﺗﻤﺎﻣﺎ .. ﻗﺎﻟﺖ ﻟﻴﻬﺎ ﺍﻟﺤﻘﻴﻘﺔ ﻳﺎﺧﺎﻟﺪﺓ .. ﻓﻲ ﻣﺸﻜﻠﺔ ﺣﺎﺻﻠﺔ ﺑﻴﻦ ﺧﺪﺭ ﻭﻫﻨﺪﻭﻳﺔ .. ﻭﺧﺪﺭ ﻣﺎﻻﻗﻲ ﻳﺘﻮﺍﺻﻞ ﻣﻌﺎﻫﺎ .. ﻋﺸﺎﻥ ﻳﻌﺮﻑ ﻣﻨﻬﺎ ﺍﻟﺴﺒﺐ .. ﻭﻃﻠﺐ ﻣﻨﻲ ﺭﻗﻤﻚ ﻣﺨﺼﻮﺹ .. ﻋﺸﺎﻥ ﺗﻜﻮﻧﻲ ﻭﺍﺳﻄﺔ ﺧﻴﺮ . ﻭﺍﻟﻠﻪ ..

ﻗﺎﻟﺖ ﻟﻴﻬﺎ ﺟﺪﺍ .. ﺍﺩﻳﻬﻮ ﻟﻴﻬﻮ .. ﺧﺪﺭ ﺑﻌﺮﻓﻮ ﺷﺪﻳﺪ .. ﺍﻣﻜﻦ ﻻﻗﻴﺘﻮ ﻣﺮﺗﻴﻦ ﻣﻊ ﻫﻨﺪﻭﻳﻪ .. ﻭﻫﻮ ﻭﺍﻟﻠﻪ ﻣﺤﻞ ﺛﻘﺔ ..

ﺑﺲ ﺍﻟﻤﺸﻜﻠﺔ ﺷﻨﻮ؟ .. ﻗﺎﻟﺖ ﻟﻴﻬﺎ ﻭﺍﻟﻠﻪ ﻃﺒﻌﺎ ﻫﻨﺪﻭﻳﺔ ﻗﻄﻌﺖ ﻋﻼﻗﺘﻬﺎ ﻣﻊ ﺧﺪﺭ .. ﻭﺧﺪﺭ ﻣﺎﻗﺎﺩﺭ ﻳﺘﺤﻤﻞ ﺍﻟﻘﺼﺔ ﺩﻱ .. ﻭﻋﺎﻳﺰ ﻳﻌﺮﻑ ﺍﻟﺴﺒﺐ ..

ﻻﻧﻬﺎ ﻗﺎﻟﺖ ﻟﻴﻬﻮ ﺑﺲ ﺍﻣﻲ ﺭﺍﻓﻀﺔ .. ﻭﻣﺎﺑﻴﻪ ﺍﻻﻛﻞ ﻭﺍﻟﺸﺮﺍﺏ .. ﻭﻫﻮ ﺷﻜﻠﻮ ﻣﺎ ﻣﻘﺘﻨﻊ ﺑﺎﻟﺤﺘﺔ ﺩﻱ .. ﻭﻋﺎﻳﺰ ﻳﺸﻮﻑ ﻣﻌﺎﻙ ﻟﻮ ﻓﻲ ﺍﻣﻞ ﻓﻲ ﺍﻟﻌﻼﻗﺔ ﺩﻱ ﺗﺮﺟﻊ ﻭﻻﻻ ..

ﻗﺎﻟﺖ ﻟﻴﻬﺎ ﻭﺍﻟﻠﻪ ﻟﻼﺳﻒ ﻳﺎﻧﺴﺮﻳﻦ .. ﻫﻨﺪﻭﻳﺔ ﻛﺬﺍﺑﺔ .. ﻭﻣﺎﺻﺪﻗﺖ ﻣﻊ ﺍﻟﻮﻟﺪ .. ﻫﻨﺪﻭﻳﺔ ﺧﻠﺖ ﺧﺪﺭ ﺑﻤﺤﺾ ﺍﺭﺍﺩﺗﻬﺎ .. ﻭﻻ ﺍﻣﻬﺎ ﻭﻻﺷﻲ ﺍﺳﺄﻟﻴﻨﻲ ﺍﻧﺎ ﻣﻦ ﺍﻟﻤﻮﺿﻮﻉ .. ﻫﻨﺪﻭﻳﺔ ﺟﺎﻫﺎ ﻋﺮﻳﺲ ..

ﺍﺧﻮ ﺭﺍﺟﻞ ﺧﺎﻟﺘﻬﺎ .. ﻭﻣﻐﺘﺮﺏ ﻭﻭﺿﻌﻮ ﻛﻮﻳﺲ .. ﻭﻫﻨﺪﻭﻳﺔ ﻓﻜﺮﺕ ﺑﻲ ﻣﺴﺘﻘﺒﻠﻬﺎ .. ﻭﻣﺎ ﺧﺘﺖ ﺍﻋﺘﺒﺎﺭ ﻟﻲ ﺧﺪﺭ .. ﻻﻧﻮ ﺻﺮﺍﺣﺔ ﺧﺪﺭ ﻗﺪﺍﻣﻮ ﺯﻣﻦ .. ﻋﺸﺎﻥ ﻳﻜﻮﻥ ﻧﻔﺴﻪ .. ﻭﺍﻧﺘﻲ ﻋﺎﺭﻓﺔ ﺍﻟﺒﺖ ﺍﻟﺰﻣﻦ ﻣﺎﻓﻲ ﺻﺎﻟﺤﻬﺎ ..

ﻏﺎ

ﻳﺘﻮ ﺩﻩ ﺭﺍﻳﻬﺎ .. ﻭﺍﻧﺎ ﺷﺨﺼﻴﺎ " ﺍﻗﺘﻨﻌﺖ ﺑﻴﻬﻮ ..

ﻗﺎﻟﺖ ﻟﻴﻬﺎ ﻛﻼﻣﻚ ﺻﺢ .. ﺑﺲ ﺍﻧﺎ ﻋﺎﻳﺰﺍﻙ ﺗﻘﻮﻟﻲ ﺍﻟﻜﻼﻡ ﺩﻩ ﻟﻲ ﺧﺪﺭ .. ﻻﻧﻮ ﺷﻜﻠﻪ ﻟﺴﻊ ﻣﻨﺘﻈﺮﻫﺎ .. ﻃﺒﻌﺎ " ﻧﺴﺮﻳﻦ ﻋﺎﻳﺰﺓ ﺍﻟﻜﻼﻡ ﻳﺼﻞ ﻟﻲ ﺧﺪﺭ ﻣﻦ ﺯﻭﻝ ﻏﻴﺮﻫﺎ ﻫﻲ .. ﻻﻧﻬﺎ ﻋﺎﺭﻓﺎﻫﻮ ﻣﺎﺑﺜﻖ ﻓﻴﻬﺎ ﻭﺡ ﻳﻘﻮﻝ ﻋﺎﻳﺰﻩ ﺗﻄﻔﺸﻨﻲ ﻣﻨﻬﺎ .. ﻋﺸﺎﻥ ﻛﺪﺍ ﻗﺎﻟﺖ ﻟﻲ ﺧﺎﻟﺪﺓ ﻗﻮﻟﻲ ﻟﻴﻬﻮ ﺍﻟﻜﻼﻡ ﺩﻩ ﺍﻧﺘﻲ ..

ﺧﺎﻟﺪﺓ ﻗﺎﻟﺖ ﻟﻴﻬﺎ ﺍﺩﻳﻨﻲ ﺭﻗﻤﻮ ﺍﺗﺼﻞ ﻋﻠﻴﻬﻮ ﻫﺴﻲ .. ﻭﺍﻭﺿﺢ ﻟﻴﻬﻮ ﺍﻟﻜﻼﻡ ﺍﻟﻤﺎﻋﺎﺭﻓﻮ .. ﻭﺍﺣﻜﻲ ﻟﻴﻬﻮ ﺍﻟﺤﻘﻴﻘﺔ .. ﻻﻧﻮ ﺍﻧﺴﺎﻥ ﺻﺎﺩﻕ ﻭﻳﺴﺘﺤﻖ ﻳﻌﺮﻑ ﺍﻟﺤﻘﻴﻘﺔ ﻭﺗﺘﻜﻠﻢ ﺑﺮﺍﻫﺎ ﺯﻋﻼﻧﺔ .. ﻭﺷﺎﻳﻠﺔ ﺍﻟﺘﻠﻔﻮﻥ ﺗﻨﻘﻞ ﻓﻲ ﺍﻟﺮﻗﻢ .. ﻭﺍﺗﺼﻠﺖ ﻋﻠﻲ ﺧﺪﺭ ..

يتبع....

#الأصابع_الشريفة
بقلم: طارق اللبيب

الجزء 09

ﺧﺪﺭ ﻟﻤﻦ ﺍﻟﺮﻗﻢ ﺟﺎﻫﻮ ﻣﺎ ﺍﻫﺘﻢ ﺑﻴﻬﻮ ﻛﺘﻴﺮ .. ﻻﻧﻮ ﺭﻗﻢ ﻏﺮﻳﺐ .. ﻭﻣﺎ ﻛﺎﻥ ﻣﺘﻮﻗﻊ ﺍﻧﻮ ﺧﺎﻟﺪﺓ ﺗﺘﺼﻞ ﻋﻠﻴﻬﻮ .. ﻛﺎﻥ ﻣﻨﺘﻈﺮ ﻧﺴﺮﻳﻦ ﺗﺠﻴﺐ ﻟﻴﻬﻮ ﺭﻗﻤﻬﺎ ﻋﺸﻦ ﻳﺘﺼﻞ ﻋﻠﻴﻬﺎ ﻫﻮ

ﻋﻠﻰ ﻛﻞ ﺣﺎﻝ ﻓﺘﺢ ﺍﻟﺨﻂ .. ﻭﻗﺎﻝ ﺍﻟﻮﻭ ﻣﺮﺣﺒﺎ ..

ﻗﺎﻟﺖ ﻟﻴﻬﻮ ﺧﺪﺭ ؟ ﺳﻼﻡ ﻋﻠﻴﻜﻢ .. ﻣﻌﺎﻙ ﺧﺎﻟﺪﻩ ﺻﺎﺣﺒﺔ ﻫﻨﺪ ..

ﻗﺎﻝ ﻟﻴﻬﺎ ﻫﻼ ﻫﻼ ﻭﺍﻟﻠﻪ .. ﻣﺮﺣﺐ ﺑﻴﻚ ﻳﺎﺧﺎﻟﺪﺓ ..

ﻗﺎﻟﺖ ﻟﻴﻬﻮ ﻃﺒﻌﺎ " ﺟﺎﺗﻨﻲ ﻧﺴﺮﻳﻦ ﻣﺮﺳﻠﺔ ﻣﻨﻚ .. ﻋﺸﺎﻥ ﺍﺩﻳﻬﺎ ﺍﻟﺮﻗﻢ ﺗﺘﻜﻠﻢ ﻣﻌﺎﻱ .. ﺻﺢ؟ ﻗﺎﻝ ﻟﻴﻬﺎ ﺍﻳﻮﺓ ﺣﺼﻞ ..

ﻗﺎﻟﺖ ﻟﻴﻬﻮ ﺍﺳﻤﻌﻨﻲ ﻳﺎ ﺧﺪﺭ .. ﺍﻧﺖ ﺍﻧﺴﺎﻥ ﻃﺮﻳﻘﻚ ﻭﺍﺣﺪ .. ﻭﻛﻼﻣﻚ ﻭﺍﺣﺪ .. ﻭﺍﻟﻤﻔﺮﻭﺽ ﻫﻨﺪ ﺗﺮﺍﻋﻲ ﻟﻠﻌﺸﺮﺓ .. ﻭﻋﻠﻰ ﺍﻻﻗﻞ ﺗﻜﻠﻤﻚ ﺑﺎﻟﺤﻘﻴﻘﺔ .. ﻋﺸﺎﻥ ﺍﻧﺖ ﺗﻜﻮﻥ ﻋﻠﻰ ﺑﻴﻨﺔ .. ﻫﻨﺪﻭﻳﺔ ﺟﺎﺗﻨﻲ ﻫﻨﺎ .. ﻭﻗﺎﻟﺖ ﻟﻲ ﺍﻧﻮ ﺧﺎﻟﺘﻬﺎ ﺟﺎﺑﺖ ﻟﻴﻬﺎ ﺣﻤﺎﻫﺎ .. ﻣﻐﺘﺮﺏ ﻭﻭﻭﻭ .. ﺍﻟﻤﻬﻢ ﺣﻜﺖ ﻟﻴﻬﻮ ﺍﻟﺤﺼﻞ ﻛﻠﻮ ﺑﻴﻨﻬﺎ ﻭﺑﻴﻦ ﻫﻨﺪﻭﻳﺔ .. ﻭﻃﺮﻳﻘﺔ ﻛﻼﻣﻬﺎ ﻭﺭﺩﻫﺎ ﻟﻴﻬﺎ .. ﻭﻗﺎﻟﺖ ﻟﻴﻬﻮ ﺩﻩ ﺍﻟﺤﻞ ﺑﺎﻟﻀﺒﻂ ﻳﺎﺧﺪﺭ .. ﻭﻫﻨﺪﻭﻳﺔ ﻣﺎﻋﺎﻳﺰﺍﻙ ﻻﻧﻚ ﻣﺎﺟﺎﻫﺰ .. ﻻﻧﻚ ﻣﺎﻋﻨﺪﻙ ... ﺑﺎﻟﻮﺍﺿﺢ ﻛﺪﺍ

ﻭﻃﺒﻌﺎ" ﺩﻱ ﺣﻴﺎﺗﻬﺎ .. ﻭﻫﻲ ﻣﺨﻴﺮﺓ ﻓﻴﻬﺎ .. ﺑﺲ ﺍﻧﺎ ﻣﺎ ﺭﺿﻴﺎﻧﻪ ﻣﻨﻬﺎ ﺍﻧﻬﺎ ﺗﺪﺱ ﻋﻠﻴﻚ ﺍﻟﺤﻘﻴﻘﺔ .. ﻭﺗﺴﻮﻱ ﺍﻟﻠﻮﻡ ﻛﻠﻮ ﻓﻮﻕ ﺍﻣﻬﺎ ﻋﺸﺎﻥ ﻛﺪﺍ ﻳﺎ ﺧﺪﺭ .. ﻳﺎ ﺭﻳﺖ ﺍﻻﻧﺴﺎﻧﺔ ﺩﻱ ﺗﺎﻧﻲ ﻣﺎﺗﺸﺘﻐﻞ ﺑﻴﻬﺎ ﺍﻟﺸﻐﻠﺔ . ﺍﻧﺖ ﻭﺍﻟﻠﻪ ﺯﻭﻝ ﻣﺎﻫﻴﻦ .. ﺍﻧﺖ ﺍﻧﺴﺎﻥ ﺻﺎﺩﻕ ﻭﺻﺮﻳﺢ .. ﻭﻫﻲ ﺫﺍﺗﻬﺎ ﻋﺎﺭﻓﺔ ﻛﺪﺍ .. ﻭﺍﻧﺎ ﻣﺘﺄﻛﺪﺓ .. ﺍﻧﻬﺎ ﺡ ﻳﺠﻲ ﻳﻮﻡ ﻭﺗﻨﺪﻡ ﻭﺗﺴﻒ ﺍﻟﺘﺮﺍﺏ ..

ﺧﺪﺭ ﻗﺎﻝ ﻟﻴﻬﺎ ﺳﺒﺤﺎﻥ ﺍﻟﻠﻪ .. ﻭﺍﻟﻠﻪ ﻳﺎﺧﺎﻟﺪﺓ ﺍﻧﺎ ﻛﻨﺖ ﺗﻌﺒﺎﻥ ﻭﻣﻌﺬﺏ .. ﺷﺪﻳﺪ ﺧﻼﺹ .. ﻟﻜﻦ ﻛﻼﻣﻚ ﺩﻩ ﺭﻳﺤﻨﻲ ﺷﺪﻳﺪ .. ﺍﻟﻠﻪ ﻳﺮﻳﺤﻚ ..

ﻭﻓﻌﻼ ﺍﻧﺎ ﻛﻨﺖ ﺣﺎﺳﻲ ﺍﻧﻮ ﻫﻨﺪ ﻣﺎﺑﻴﺎﻧﻲ ﻣﻦ ﻧﻔﺴﻬﺎ ﻟﻲ ﺳﺒﺐ .. ﻭﺍﻟﺤﻤﺪ ﻟﻠﻪ ﻛﺪﺍ ﻋﺮﻓﺖ ﺍﻟﺤﻘﻴﻘﺔ .. ﻭﺍﻟﺤﻤﺪ ﻟﻠﻪ ﺍﻧﻬﺎ ﺑﺎﻋﺘﻨﻲ ﺑﺮﺍﻫﺎ .. ﻗﺒﻞ ﻣﺎ ﺍﺗﺸﺮﺑﻚ ﻟﻲ ﻓﻲ ﻭﺍﺣﺪﺓ ﻛﺬﺍﺑﺔ ﻭﻣﺨﺎﺩﻋﺔ .. ﺍﻧﺎ ﻟﻮ ﺍﻛﺘﺸﻔﺖ ﺍﻧﻮ ﺍﻟﺰﻭﻝ ﺑﻜﺬﺏ .. ﺗﺎﻧﻲ ﻟﻮ ﺑﻘﻰ ﺍﺧﺮ ﺯﻭﻝ ﻓﻲ ﺍﻟﺪﻧﻴﺎ ﻣﺎﺑﻘﺒﻞ ﻋﻠﻴﻬﻮ ..

ﺍﻧﺎ ﻗﺒﻞ ﻓﺘﺮﺓ ﺍﺗﺸﺎﻛﻠﺖ ﻣﻌﺎﻫﺎ .. ﻻﻧﻬﺎ ﻛﺬﺑﺖ ﻋﻠﻰ ﺍﻫﻠﻬﺎ .. ﻗﺎﻟﺖ ﻟﻴﻬﻢ ﺧﺪﺭ ﻣﻘﺎﻭﻝ .. ﻭﺍﻧﺎ ﺍﻭﺳﻄﻰ ﺑﺲ .. ﻭﺍﻧﺎ ﺷﺎﻛﻠﺘﻬﺎ .. ﻭﻣﻦ ﺍﻟﻴﻮﻡ ﺩﺍﻙ ﺍﻧﺎ ﺛﻘﺘﻲ ﺍﺗﺰﻋﺰﻋﺖ ﻓﻲ ﻫﻨﺪ .. ﻟﻜﻦ ﻗﻠﺖ ﺩﻱ ﺍﻭﻝ ﻣﺮﺓ ﺍﻓﻮﺗﻬﺎ ﻟﻴﻬﺎ ..

ﻟﻜﻦ ﻫﺴﻲ ﻇﻬﺮﺕ ﺍﻧﻬﺎ ﺑﺘﻜﺬﺏ ﻃﻮﺍﻟﻲ .. ﻭﻣﻌﺘﺎﺩﺓ ﻋﻠﻰ ﺍﻟﻜﺬﺏ ﻭﺍﻻﺧﺘﻼﻕ ﻭﺍﻟﺘﺎﻟﻴﻒ .

ﻗﺎﻟﺖ ﻟﻴﻬﻮ ﻋﻠﻴﻚ ﺍﻟﻠﻪ ﻳﺎﺧﺪﺭﻣﺎﺗﺘﺎﺛﺮ .. ﺍﻛﻴﺪ ﺭﺑﻨﺎ ﺡ ﻳﻘﺴﻢ ﻟﻴﻚ ﺍﺣﺴﻦ ﻣﻨﻬﺎ ..

ﻗﺎﻝ ﻟﻴﻬﺎ ﻭﺍﻟﻠﻪ ﻛﺄﻧﻮ ﺟﺒﻞ ﻭﻧﺰﻝ ﻣﻦ ﺿﻬﺮﻱ .. ﺍﻟﺤﻤﺪ ﻟﻠﻪ .. ﺍﺗﺄﺛﺮ ﺑﻲ ﺷﻨﻮ؟؟ ﻭﺍﻟﻠﻪ ﺍﻧﺎ ﻛﺪﺍ ﻓﺮﺣﺖ .. ﻭﺭﺿﻴﺎﻥ ﻣﻦ ﺣﻜﻢ ﺭﺑﻨﺎ .. ﻛﻠﻮ ﻟﻲ ﺧﻴﺮ ..

ﺍﻧﺎ ﻋﻤﺮﻱ ﻣﺎﻇﻠﻤﺖ ﻭﻻ ﺿﺮﻳﺖ ﺯﻭﻝ .. ﻭﻻﻛﺬﺑﺖ ﻋﻠﻰ ﺍﻧﺴﺎﻥ .. ﻣﺴﺘﺤﻴﻞ ﺭﺑﻨﺎ ﻳﺨﻮﺯﻗﻨﻲ ﺑﻲ ﻭﺍﺣﺪﺓ ﺯﻱ ﻫﻨﺪﻭﻳﺔ ..

ﺗﺴﻠﻤﻲ ﻳﺎ ﺧﺎﻟﺪﺓ ﻭﺭﺑﻨﺎ ﻳﺪﻳﻚ ﺍﻟﻌﺎﻓﻴﺔ .. ﻋﻠﻴﻚ ﺍﻟﻠﻪ ﺍﺩﻳﻨﻲ ﻧﺴﺮﻳﻦ ﺩﻱ

ﺍﺩﺗﻬﺎ ﻟﻴﻬﻮ ﻓﻲ ﺍﻟﺘﻠﻔﻮﻥ ..

ﻗﺎﻝ ﻟﻴﻬﺎ ﻳﺎﻧﺴﺮﻳﻦ ﺗﺴﻠﻤﻲ ﻭﺍﻟﻠﻪ .. ﻣﺎﻋﺎﺭﻑ ﺍﺷﻜﺮﻙ ﻛﻴﻒ .. ﺭﺑﻨﺎ ﻳﺪﻳﻚ ﺍﻟﻌﺎﻓﻴﺔ .. ﻭﺧﺪﺭ ﻫﻨﺎ ﺍﻏﻠﻖ ﺍﻟﻤﻠﻒ ﺑﺘﺎﻉ ﻫﻨﺪ ﺍﻟﻰ ﺍﻻﺑﺪ ..

ﺍﻟﻜﻼﻡ ﺩﻩ ﻛﺎﻥ ﻳﻮﻡ 23 ﺷﻬﺮ 2 ﺳﻨﺔ 2010 .. ﻗﻔﻞ ﺍﻟﺘﻠﻔﻮﻥ ﻭﻣﺸﻰ ﻋﻠﻰ ﺍﻟﻤﺴﺠﺪ ﺍﻟﻜﺒﻴﺮ ﻓﻲ ﺑﺤﺮﻱ .. ﻛﺎﻧﺖ ﺻﻼﺓ ﺍﻟﻌﺼﺮ ﺻﻠﻰ ﺍﻟﻌﺼﺮ .. ﻭﻗﻌﺪ ﻳﻘﺮﺍ ﻓﻲ ﺍﻟﻘﺮﺍﻥ ﻟﻐﺎﻳﺔ ﻣﺎﺟﺎﺕ ﺻﻼﺓ ﺍﻟﻤﻐﺮﺏ .. ﺻﻠﻰ ﺍﻟﻤﻐﺮﺏ ﻭﻃﻠﻊ ﻣﺸﻰ ﻋﻠﻰ ﺍﻟﺒﻴﺖ ﻣﻄﻤﺌﻦ .. ﻭﻃﺒﻴﻌﻲ ﺟﺪﺍ .. ﺳﻠﻢ ﺍﻟﻘﺮﻭﺵ ﺍﻟﻌﻨﺪﻭ ﻟﻲ ﺍﻣﻪ .. ﻗﺎﻝ ﻟﻴﻬﺎ ﻳﺎ ﺍﻣﻲ ﺍﻟﻘﺮﻭﺵ ﺩﻱ ﺍﻧﺎ ﺧﺎﻳﻒ ﺍﺿﻴﻌﻬﺎ .. ﺧﻠﻴﻬﺎ ﻟﻲ ﻋﻨﺪﻙ .. ﻗﺎﻟﺖ ﻟﻴﻬﻮ ﺍﻧﺖ ﻣﻮﺵ ﺍﺣﺴﻦ ﻟﻴﻚ ﺗﺪﺧﻠﻬﺎ ﻣﻊ ﻧﺎﺱ ﺍﺑﻮﻙ؟؟ .. ﻗﺎﻝ ﻟﻴﻬﺎ ﻛﻠﻬﺎ ﺧﻤﺴﺔ ﻣﻠﻴﻮﻥ .. ﻳﺎ ﺍﻣﻲ ﺡ ﺗﻌﻤﻞ ﺷﻨﻮ؟ .. ﻗﺎﻟﺖ ﻟﻴﻬﻮ ﺍﻧﺖ ﺟﺮﺏ ﺍﺣﺴﻦ ﻣﻦ ﺗﺨﻠﻴﻬﺎ ﻣﺮﻛﻮﻧﺔ ﻓﻲ ﺍﻟﺒﻴﺖ .. ﻗﺎﻝ ﻟﻴﻬﺎ ﻛﻮﻳﺲ .. ﺍﻧﺘﻲ ﺍﻋﻤﻠﻲ ﺍﻟﺒﺘﺸﻮﻓﻴﻬﻮ .. ﻳﺪﻙ ﻓﻴﻬﺎ ﺍﻟﺒﺮﻛﺔ ﻭﺷﻮﺭﺗﻚ ﻓﻴﻬﺎ ﺍﻟﺒﺮﻛﺔ .. ﻭﻃﺒﻌﺎ " ..

ﺑﻌﺪ ﻳﻮﻣﻴﻦ ﺧﺪﺭ ﺍﻟﻤﻔﺮﻭﺽ ﻳﻤﺸﻲ ﻳﻜﻤﻞ ﺍﻟﺸﻐﻞ .. ﻓﻲ ﺑﻴﺖ ﻋﺎﺩﻝ .. ﻭﻳﺸﺘﻐﻞ ﺍﻟﻨﻘﺎﺷﺔ ..

ﻭﻧﺎﻭﻱ ﺍﻧﻮ ﺩﻩ ﻳﻜﻮﻥ ﺍﺧﺮ ﺷﻐﻞ ﻟﻴﻬﻮ ﻓﻲ ﺍﻟﻤﺠﺎﻝ ﺩﻩ .. ﻻﻧﻮ ﺣﺲ ﺍﻧﻮ ﺍﻟﺸﻐﻞ ﺩﻩ ﻣﺎ ﺡ ﻳﺄﻛﻠﻪ ﻋﻴﺶ .. ﻓﻲ ﺍﻟﺒﻠﺪ ﺍﻟﺒﻘﺖ ﻃﺎﺣﻮﻧﺔ ﻟﻲ ﺳﻌﺎﺩﺓ ﺍﻟﻨﺎﺱ .. ﻭﺍﻻﻧﺴﺎﻥ ﺍﻟﻤﻔﻠﺲ .. ﻳﻀﻮﻕ ﻓﻴﻬﺎ ﺍﻟﻤﺮﺍﻳﺮ ..

ﺧﺪﺭ ﺗﻔﻜﻴﺮﻭ ﻛﻠﻮ ﺑﻘﻰ ﻓﻲ ﻋﻤﻞ ﺗﺎﻧﻲ .. ﻳﻮﻓﺮ ﻟﻴﻬﻮ ﺳﺒﻞ ﺍﻟﺮﺍﺣﺔ ﻭﺍﻟﺴﻌﺎﺩﺓ .. ﻭﻃﺒﻌﺎ ﺣﺎﺳﻲ ﺑﺎﻟﺤﻘﺎﺭﺓ ﻣﻦ ﻋﻤﻠﻴﺔ ﻫﻨﺪ .. ﺍﻟﺒﺎﻋﺘﻮ ﺷﺎﻥ ﺍﻟﻘﺮﻭﺵ ..

ﺑﻌﺪ ﻳﻮﻣﻴﻦ ﻻﻣﻦ ﻣﺸﻰ ﻟﻲ ﻋﺎﺩﻝ .. ﻋﺎﺩﻝ ﻗﺎﻝ ﻟﻴﻬﻮ .. ﺍﺧﻮﻱ ﻓﻀﻞ

ﺩﺍﻳﺮﻙ .. ﺑﻌﺪ ﺗﺨﻠﺺ ﻣﻦ ﻫﻨﺎ ﺗﻤﺸﻲ ﻋﻠﻴﻬﻮ .. ﻋﻨﺪﻭ ﺑﻴﺖ ﺑﺮﺿﻮ ﻭﺟﺎ ﺷﺎﻑ ﺷﻐﻠﻚ .. ﻗﺎﻝ ﻣﺎ ﺣﻴﺪﻳﻬﻮ ﺯﻭﻝ ﻏﻴﺮﻙ ..

ﻭﻣﺮﺕ ﺍﻻﻳﺎﻡ ﻭﺧﻠﺺ ﺷﻐﻞ ﻋﺎﺩﻝ .. ﺑﺘﺎﻉ ﺍﻟﻨﻘﺎﺷﺔ .. ﻭﻋﻤﻞ ﻓﻲ ﺍﻟﺒﻴﺖ ﻋﻤﻠﻴﺎﺕ ﻓﻨﻴﺔ .. ﺍﺑﺪﺍﻋﻴﺔ .. ﻓﻌﻼ ﺍﻟﺒﻴﺖ ﻣﻦ ﺟﻮﺓ ﻭﻣﻦ ﺑﺮﺓ ﺑﻘﻰ ﺷﻜﻠﻪ ﺯﻱ ﻗﺼﻮﺭ ﺍﻟﻨﻤﺴﺎ .. ﻭﺍﻟﻨﺎﺱ ﻛﻠﻬﺎ ﺑﻘﺖ ﺗﻌﻠﻖ ﻋﻠﻰ ﺍﻟﺒﻴﺖ ..

ﻭﺑﻴﺖ ﻋﺎﺩﻝ ﺑﻘﻰ ﺍﻧﻄﻼﻗﺔ ﻟﻲ ﻋﻤﻞ ﻭﺍﺳﻊ ﻟﻲ ﺧﺪﺭ ﺍﻟﻔﺮﺓ .. ﺑﻤﺠﺮﺩ ﻣﺎﺣﺼﻞ ﺍﻟﻔﺮﺍﻕ ﺑﻴﻨﻮ ﻭﺑﻴﻦ ﻫﻨﺪ .. ﺍﻻﻣﻮﺭ ﻓﺘﺤﺖ ﻣﻌﺎﻫﻮ ﻓﺘﺤﺔ ﻏﺮﻳﺒﺔ ﺫﺍﺗﻮ ..

ﻭﺍﺷﺘﻐﻞ ﺑﻴﺖ ﻓﻀﻞ .. ﺑﻲ ﻃﺮﻳﻘﺔ ﻣﺨﺘﻠﻔﺔ ﻭﻓﻨﻴﺎﺕ ﺗﺎﻧﻴﺔ ﺧﺎﻟﺺ ..

ﺣﺘﻰ ﺍﻟﻤﻬﻨﺪﺳﻴﻦ ﻭﺍﻟﻤﻘﺎﻭﻟﻴﻦ .. ﺑﻘﻮ ﻳﺴﺄﻟﻮ ﻣﻦ ﺍﻟﺰﻭﻝ ﺍﻻﺷﺘﻐﻞ ﺑﻴﺖ ﻋﺎﺩﻝ .. ﻭﺍﻟﺸﻐﻞ ﺍﺗﺮﺩﻡ ﻋﻠﻴﻬﻮ .. ﻟﺪﺭﺟﺔ ﺍﻧﻮ ﺯﺍﺩ ﺍﻟﻌﻤﺎﻝ ﺑﺘﺎﻋﻨﻮ ﺍﻟﻀﻌﻒ ﺑﻌﺪ ﻣﺎﻛﺎﻧﻮ ﺗﻼﺗﺔ ﺑﻘﻮ 6 ..

ﻃﺒﻌﺎ ﻧﺴﺮﻳﻦ ﺑﻘﺖ ﻋﻨﺪﻫﺎ ﻋﻼﻗﺔ ﺻﺪﺍﻗﺔ ﺷﺪﻳﺪﺓ ﻣﻊ ﺧﺎﻟﺪﺓ .. ﻭﺑﺘﻼﻗﻦ ﻃﻮﺍﻟﻲ .. ﻭﻻﻗﺖ ﻫﻨﺪ ﻛﻢ ﻣﺮﺓ .. ﻭﺍﺻﻠﻮ ﺍﺑﺖ ﺗﻘﻮﻝ ﻟﻴﻬﺎ ﺍﻧﺎ ﻧﺴﺮﻳﻦ ﺍﻻﺗﺼﻠﺖ ﻋﻠﻴﻚ .. ﺑﺲ ﺩﻱ ﻫﻲ ﺻﺎﺣﺒﺔ ﺧﺎﻟﺪﺓ ﺍﺳﻤﻬﺎ ﻧﺴﺮﻳﻦ .. ﻏﻴﺮ ﻛﺪﺍ ﻫﻨﺪ ﻣﺎﻋﺎﺭﻓﺔ ﻋﻨﻬﺎ ﺍﻱ ﺣﺎﺟﺔ

ﻭﻣﺮﺓ ﻣﺮﺓ ﻧﺴﺮﻳﻦ ﺑﺘﺘﺼﻞ ﻋﻠﻰ ﺧﺪﺭ .. ﻭﺗﺴﻠﻢ ﻋﻠﻴﻬﻮ .. ﻫﻲ ﻃﺒﻌﺎ" ﺍﻟﺤﻘﻴﻘﺔ ﻧﺴﺮﻳﻦ ﺑﺘﺤﺐ ﺧﺪﺭ ﺟﺪﺍ .. ﻟﻜﻦ ﺧﺪﺭ ﺍﺻﻼ ﻣﺎﻋﻨﺪﻭ ﻟﻴﻬﺎ ﺷﻲ

ﻭﺑﻌﺾ ﺍﻻﻃﺒﺎﺀ ﺍﻟﺼﺎﺩﻗﻴﻦ ﺑﻨﺼﺤﻮﻙ ﻋﺪﻳﻞ ﻳﻘﻮﻟﻮ ﻟﻴﻚ ﺍﻣﺸﻲ ﺍﻟﻤﺴﺘﺸﻔﻰ ﺍﻟﻔﻼﻧﻲ ..

ﺍﻟﻤﻬﻢ ﺧﺪﺭ ﻭﺍﻟﺼﺎﺩﻕ ﻧﻘﻠﻮ ﺍﺑﻮﻫﻢ ﺑﻲ ﺍﺳﻌﺎﻑ ﻋﻠﻰ ﻣﺴﺘﺸﻔﻰ ﺧﺎﺹ ..

ﻭﻃﻮﺍﻟﻲ ﺩﺧﻠﻮﻫﻮ ﺍﻟﻌﻨﺎﻳﺔ ﺍﻟﻤﺮﻛﺰﺓ ..

يتبع....