🌹 *خاطرة الجمعة..*



*اللهُ أرســلـهُ لنـَا*
*قبـَسـاً..*
*هـذي خُطــاهُ وذلك*
*الــدربُ ..!*

*عـوّد لسـانكَ* *بِالصـلاةِ..*
*عسى تُكفى الهمـومَ ويُغفر* *الذنـبُ..!*

*اللهم صل وسلم على نبينا محمد وعلى آله وصحبه وسلم..*
*ﷺُ*

ﻣﺎﺳﻨﻴﻦ ﻭﺳﻨﻴﻦ ﺇﺳﺘﻨﻴﺖ ..
ﺟﺮﻭﻑ ﺍﻟﺒﻴﻨﺎ ﻟﻮ ﻳﻨﺪﻥ...
ﻋﻠﻲ ﻗﻴﻔﻚ ﺿﻔﺎﻑ ﻗﻴﻔﻚ..
ﻣﻦ ﺍﻟﺸﻤﺎﺕ ﺍﺑﻦ ﻳﺒﻄﻦ..
ﺑﻨﺎﺕ ﺍﻟﺸﻮﻕ ﻳﻼﻭﺯﻥ ﻓﻮﻕ...
ﻣﻦ ﺍﻷﻣـــــﻮﺍﺝ ﻣﺎﺑﻴﺮﺩﻥ..
ﻓﻴﺎ ﺑﺤﺮ ﺍﻟﺮﺟﺎ ﺍﻟﻤﻘﻄﻮﻉ ﺃﺟﺮ
ﻳﺎﺭﻳﺢ ﻭﻣﺎﺗﻬـــــــﺪﻥ...
ﻭﺟﻞ ﻳﺎ ﻣﺸﺮﻋﻲ ﺍﻟﻤﻤﻨﻮﻉ
ﻣﺮﺍﻛﺐ ﺭﻳﺪﻱ ﻣﺎﻳﻌﺪﻥ
ﺇﺫﺍ ﺟﻴﺔ ﺍﻟﺤﺒﻴﺒﺔ ﺩﻣﻮﻉ ﺧﻄﺎﺍﺍﺍﺍﺍﺍﺍﺍﺍﺍﺍﺍﻱ
ﺗﺎﻻﻫﺎ ﻻ ﺗـــــﻮﺩﻥ...
ﻭﺃﻗﻮﻝ ﻳﺎﻗﻠﺒﻲ ﺧﻠﻮ ﺍﻟﺰﻭﻝ
ﺇﺫﺍ ﻣﺎ ﻛﺎﻥ ﺳﺤﺎﺑﺔ ﺗﻀﻦ..
ﻋﻠﻲ ﺍﻟﻌﺸﻤﺎﻧﻠﻮ ﻓﻲ ﻗﻨﺪﻭﻝ..
ﻳﺤﺎﺣﻲ ﺍﻟﻄﻴﺮ ﺭﻳﺎﺣﻮ ﺗﺰﻥ..
ﻭﺃﻧﺎ ﺍﻟﻔﻮﻕ ﺍﻟﺘﺮﺍﺏ ﻣﻜﺘﻮﻝ ..
ﻓﺮﻗﻲ ﻣﻦ ﺍﻟﺴﺤﺎﺑﺔ ﺑﺌﻦ...
ﻣﻮﻫﻄﺔ ﻛﻨﻲ ﻳﺎﺍﻟﺠﻮﺍﻱ ﻛﻤﺎ
ﺑﻴﻦ ﺍﻟﻐﻨﺎﻭﻱ ﻟﺤﻦ...
ﻋﻘﺐ ﺷﺮﻳﺖ ﻋﻠﻴﻜﻲ ﺭﺟﺎﻱ
ﺑﻴﺎﺽ ﻧﻴﺔ ﻭﻃﻮﻳﺘﻚ ﺣﻦ..
ﻓﻠﻴﺶ ﺯﺍﻝ ﺇﻓﺘﻘﺎﺩﻱ ﻭﺟﺎﻱ..
ﻭﻃﻮّﺣﻚ ﺍﻟﺰﻣﺎﻥ ﻟﻲ ﺷﻦ ..
ﺑﺨﺎﻓﻠﻚ ﻣﻦ ﺣﻘﻴﻖ ﻣﻈﻠﻮﻡ
ﺑﺨﺎﻓﻠﻚ ﻳﺎ ﻋﻘﻮﻕ ﺍﻟﺤﻦ ..
ﺑﺨﺎﻓﻠﻚ ﻣﻦ ﺣﺴﺎﺏ ﺍﻟﻴﻮﻡ
ﻭﻗﺖ ﻛﻞ ﺍﻟﻨﻔﻮﺱ ﻳﺼﻔﻦ..
ﺳﺆﺍﻝ ﻣﻨﻮ ﺍﻟﻘﻴﺎﻣﺔ ﺗﻘﻮﻡ ..
ﺑﻘﻴﺖ ﻧﺎﻛﺮ ﺟﻤﻴﻞ ﻛﻴﻔﻦ؟

بخاف لوبرضي غبت عليك
تقول ناسيك وجافيتك
بَهـِم لو صدفه لاقيتك
درب حِـِلـِّتنا جابك يوم
تشيل ياروحي ترمي اللوم
عليّ وتزيد همومي هموم
تقول جافيك وأنا نسيتك ؟🧡🌸

سهران معاك..
. انا والنجوم..
حاجات كتيرة.. معايا
برضوا بتشبهك
وتنادي ليك...
جوه القلب تسال عليك
سفن الحنين
الجايه منك وخلتك
مشدوه علي جزر الضياع
الشاربة من سفر النعاس
الفيهو نامت ودستك
واتعمدت تسال عليك..
لون الرزاز
الطله من كل الشرف
واتمنى يسرق بسمتك
ويودرك بين السحاب
واللسة في رحم المطر
يحلم يدفق في الخريف
احزانو يسرق دهشتك
واتخيلك انك براك
مصلوب علي كل الخطوط
الجايا منك ماشا ليك
والجوه تحلم انو بيك
حاجاته تصبح حقتك
سهران معاك لسع كتير
واتخيلك
تسرج فرح كل الخيول
الجاية من زمنا بحن
وحنينو شايل فرحتك
وانا بي وراك شايلني
موج كل البحر واتشابى ليك
والموية تمسح في الضفاف
وانا بين ضفافي وقسوتك
اتوسد الهم الوقف
ما بيني بين صوتك واقيف
لو بس الامس دنيتك
بي حتة جواي تشتهيك
وتنادي ليك تفضل معاي
زي الفواصل في المدار
جواها ترسم منيتك
لي دنيا برضو تودي ليك
وتودرك جوه العيون
الديمة تسال عن عينيك
الفيها شاتل روعتك
زخة مطر تنده تقيف
عطشانة لي كل الحروف
الديمه برضو تودي ليك
بي فرحة تغسل لوعتك
واتخيلك سهران معاك
واتخيلك

نكــــر صــوتك صـــداك ... غــالــطــني الـزمن فيك
شــهرت عــلى الجــفاف ... وعدك بطاقاتنا الخريفيـة
رجــع فاضـي الكــلام مليان ... معــاك إتــبـرجـت غـيـمة
وشهق جوايا صوت جدول ... مـرقت على المطر حفيان
لـقـيـتــك والــرذاذ مــدخـل ...
ونـاديـتـك …
أقـيـفـي مـعاي نشيل كتف الغنى الميل ..
ونتخيل ... ونتخيل حلم دونك بيتحقق ..
وقبلك خيل دماي واقفة علي شرياني تتشهق ..
وبرق صوتك صداك غنيتي ...
D D D D D
رشحت حلقك لي إذاعات الشجر ...
والمنتظر من عودة المدعو المطر ..
وللمسادير و الطنابير ..
واللسة في رحم القصيد ... والدابو هسة وفي سوق عكاظ
بين مزادات الحروف غيبت رسمك وإحتكرتك للظروف
للزمان الجاي واللحظة اللي فاتت مني هسة ..
يا واقفه بين جرح السحاب وبين شهقة الأرض البكر ..
ما كان ده ريد ..
كان إحتمال تغيير قوانين حركتك ..
ما بين حديثنا ولحظة الفعل الحقيقي ..
وإنتباهك إنت للشارع البيرجع تاني لي نقطة بدايتو ..
و إنحيازك إنت للشارع البيرشح في مسام رمل التوقع ..
وما إتعرف قانون نهايتو ...
غايتوا أمشى في الدرب البطابق ..
فيه خطوك صوت حوافرك ...
يا فرس كل القبيلة تلجموا ..
ويكسر قناعاتا ..
ويفر يسكن مع البدو في الخلا ..
ما برضى غير الريح تجادلهُ وتقنعهُ ..
D D D D D
إفترضتك لون أساسي ...
يمنح اللوحة إزدواجية القراية ..
ويفتح الضوء بين خطوط الريشة والخط الإضافي ..
الجاي من شبكية الزول البشاهد ..
وإكتشفنا الرسمك وأنا برضو التوارد في الخواطر ..
نفس أرقام التذاكر ..
البيها سافرنا وشهدنا ...
إنفجارك في الأرض ..
يا سمرة يا واضحة ..
D D D D D
ما غنيت يوم جيتك صدفة ..
قبل أبداك كان غصنك بشر ..
يوم ما كان إحساسك مسى ..
عرج غيمك فيني ومطر ..
لحظة طار عصفور من صدرك ..
رتب فينا إحساس بالإلفة ..
ودوزن عصب الزمن الأشتر ..
وإتوكلت عليك وقلت ..
المارق منك داخل جرح الوردة ..
وراسم فوقه غناوي الطل ..
المارق منك ...
رجع للغابات العرب العاربة ..
وللعتمور الزنج الهاربة ..
وأدى الكون مفتاح الحل ..
المارق منك ...
شادد عصب الورقة وحرفي وراصد ..
في اللاوعي سكون مواعيد ..
صحوة ... وحلمه... ولونه ..
وشاري يقينك في زندي ...
وسارق لحظة إني أفكر ..
المارق منك ... مارق منك ..
أو مت شهيد ...
D D D D D
ما تتضاري ورى الدعوات ... وما تتلبسي فرح الفات
يسكن فيك النغم الزايف ... ويسرق حاسة شوفنا الواقفة
على رجلين جوانا ..
ونحن الهاويه والمطامن من الأرض ..
آه من نحلك ساعة يرحل ..
ولمن يكتب فينا الحنضل ..
ويختم عمره بفعل الشهد ..
D D D D D
قال الجدول :
طلوع النخلة مرور الريح واحد
لاكين الريح بتعانق حقل ..
ونحنا بنطلع نخلة وننزل ..
ونكتب في ذاكرة الصفق الأخضر ..
سجنا الريح في الورق الأبيض ..
وجهناها ضد التمر الناعس ..
يسقط زي قبعة الحارس ..
زي الكان بيناتنا وفات ..
D D D D D
قالت غيمة (غيمة لئيمة) :
أولاد الشارع فهرس لي كل المدن ..
التهرس جوفك بالأسمنت ..
قالت ريح :
شوف الناس قنديل ..
لو ما نور يحرق كوخ ... وباقي الحلة تنور ..
أو جبة جوخ أو ينزل بوخ ... يقول للنسمة الزايفة أقيفي ..
لو تتفرد ريح ... تتشرد ريح ... ريح الخوف ... لو تتفرد ريح
تبدأ تفرتق ضفائر المدن الكاذبة ... تعيد تسريحتك ..
D D D D D
يوم سمايتك شكل قامتك ..
كيف تموتي وتحي تاني ..
ويوم قيامتك ..
هو البيدينا الثبات ..
يا مجلوبه في قافلة رق ..
ما بستحمل صدرك رصاصة ظلم ..
يا صابت رحم الفال يا قطعت حبل الحلم ..
يا كنا نبيعك يا نسرق ..
إخترنا النار الضلها بيحرق ..
طمناك إنو الدنيا بخشها ضو ..
يجرح جلد العتمة ..
لما الليل قربان فجرك ..
D D D D D
يا بت يا نيل ... يا بت يا نيل ..
لو نامت قمحة على الأبيض ... تتشرد زيه ..
وزاد الأبيض في غية ..
ومدد رجلة اليسرى ..
ما كان الكسرة جاتك من بره .... صفرا ومنكسرة
D D D D D
زوجناك الشهداء أولاد الكد ..
الماتو عشان الشعب ..
زوجناك ما عندك ضرة ..
زوجناك ما جاتك ضرة ..
ما إنشاف ماعونك ... في الحلة يساسق
ويلقى فتات ...
D D D D D
قال الأبيض للأزرق :
يبقى ضد الانتباه ..
وضد تواريخ التمازج ..
بيني بينك ..
وده البشوفك في مراهقة الخرائط ..
وفينا من وجع المسافرين ..
واطه مالاقت هوية ..
D D D D D
رد الأزرق :
مطر الحبش لو كان نبش ... جواك سقف
وهد حيلك في الدواخل ... وشد عصبك في المداخل
صوت مراكبي ويد بتسأل في القمح ..
وفينا من فرح المسافرين ..
قصة الشمس القضية ..
D D D D D
يا أعشاب النيل الأبيض ..
ماتتضاري ورى الدعوات ..
أقرا تاريخك ... أخاف ..
أقرا تاريخي … أخاف ..
أسأل جبين الفجر ...
ألقى الفجر مطعون في القفا ..
هل سافرت في دمعك المحقون جفا ..
حبة غضب ..
ما شلنا جمرك وإنطفا ..
جوانا نارك والمطر ..
جايين بالكتابة ..
وضربة الناس المهابة ..
لو هز نخلك باشبزق ..
ما فارق التمر السبيط ..
وما سارو الطورية شك ..
إنو الأرض أنثي ... وبتحمل بالحلال
مين القال إنو المسافة .

.
البينا بين الشمس طاقة ..
أو مياه النيل بتدخل ..
في عروق السنبلة ..
المسقية بي عرق ..
الجعانين والمساهرين بالبطاقة ..
D D D D D
أقرى تاريخي وأقيف ..
أقرا تاريخك وأقيف ..
جواك والزمن النضيف ..
جواي من جواك غضب ..
سلم مفاتيح السؤال ..
جيل الشمس موكب حريق ..
واقف على باب الدخول ..
بيناتو بينات الوصول ...
لحظة شهيق ... لحظة شهيق

عينيك مدن
منسية فى كتب التواريخ والزمن
عينيك وطن
مشدود على وتر التباريح والشجن
مشدود على حروف الكتابة
مكدود عَنا .. ومكتول صبابة
وفيهو حطّ النيل .. سكنْ
💫 💫 💫💫💫💫

عينيك سفر
مكتوب أعيش فى غربتو
وأعشق عذابو .. وحُرقَتو
وليلو الطويل
وأتخيـّلك يا حلوة زى نسمة سحر
جيتى ومعاك .. حلمى المطوِّل منتظر .. وعدو الجميل
عشقك زمان .. جوّاى رحل
وإتناهى فى الأعماق .. أمل
ضمخ رؤاى .. إحساس نبيل
أذهل طيوف خاطرى القبيل
.. جاشت ملامحك روعتو
وضجّ السكون .. فى وحشتو
والكان أمل فى عيونى .. لاح
ذوب مدارات فرحة الوهج النضير
المزدهر .. بالإرتياح
.. فجأة إنحصد قبضة رياح
وسكت الكلام يا حلوة .. فى القول المباح
وغام الصباح .. بعدِك رحل
💫💫💫💫💫💫💫💫

والكان أمل فى غيم سماك .. أيقنت إنـّو عدم بلاك
وإنـِّك قدر
وإنـّو البيحلم بى عُلاكْ
بختار ظروف أحلاها .. مُر
عينيكى لو تصدق معايا الأمنية
عينيكى .. لو أعرف خِتام الأغنية
بدء الكلام .. والمنتهى .. المستطاب والمشتهى
كل المباهج الفى المواويل .. والغنا
والعاشقيك قلبى .. وأنا
هزتنا فى عينيك تصاوير المنى
يا أمنيات من كم سنة
يا أغنيات كل الأماسى .. المستحيلة .. وممكنة
المستحيل عينيك تهون
البستحيل قلبك .. يخون
ما الغدر ما طبع الوفا
والصدق ما شرط .. إنتفى
وأنا حالى فى بعدك .. كفى
وأنا حالى من بعدك كفاهو ..
المغنى والحب .. والشجن
والوحشة والشوق للوطن
ما العمر قبلك ضاع سدىً
والعمر بعدك أيه يكون
... لو يبقى بى حساب الزمن
💞
💞
💞

جات داخلة زي مرقة غضب
من جوف حليم في زمناً صعبْ
رمت السلام ... "رررب"
زي شنطة من كتف المسافر
بي تعب
زي ردخة "رررب" الله يا رب
قعدت علي طرف العنقريب
المحازي الواطة ضايرت التراب
كسر العويش الفوقو شالت باصبعا
وشختت شخيت الله يا ربْ
عاينا فيها نكوس سبب
للكفرنة وفورة الزهج
من دورة البال الوهيط
ما عودتنا تدس عوج
تكتم فرح زي حالة الزول البسيط
صنقعنا في قعدتنا ...
راجعت الوشوش
دنقرنا عن رفعة وشيها
المتعب الجاد الرحيم
الطيب السمح المعافى رهاب رهاب
ينشاف وسيم
اتوهطت فوق العنقريب القديم
من تاني ضايرت التراب
كسر العويش الفوقو
شالت باصبعا وشختت شخيت
قالت : تصدقوا آولاد ...
بقيت أبيت الليل أفكر ...
في التميرات القدر ....
فوق راسا ما شالت سبيط
عليها الجرورة الفوق ضهرنا تنزلا
تطلق ضهرنا مع الجماعة
شن دهانا ؟ دي كم سنة ؟
والحال وقف جف وحلف
ما فيهو من نقاط بسيط
كان بي وشنا في حش التمور
الليلة دوشنا مع اللقيط
أي لا حكت دي ولا بقت
ما كان قايلين ...
في حياتنا بيجينا أقسى من المضى
ساعة مروق الإنجليز...
قلنا الظلم راح وانقضى
تاريهو كمتر قام دقون
حلفا وعُشر ... معيوقا نال
دمسييس ... ضريسا حسكنيت
شوك جمال
الله يا رب العالمين ...
الما جحدنا نعمتو في الشوف والسمع
راحة الولادة لا قلوبنا عمن
ولا غيرنا دين
في الجابو ما قصر حمد
في الشالو ما قلنالو وين ؟
وين ماشيبو وين ؟
عدلت نعال مقلوبة في الجيهة اليمين
حدرت شمال
زمنا مو دا
الحيكومة كانت بت حلال
بي حالا بي حرب الجنوب
بي قلة المال في الجيوب
كانت رخية العيشة
إلا العوين الكبرو كبرو مليسين
عِلمن يطير فهمن يطير
إن هو ما صلح عوج
ما فادنا شيء
محق القبيل لمينا هين في هين
يا حليل رجال سكتن قدر
غشاهن بالقفا
ولي الليلة سيفن في الجراب ...
يهرج سَنين
دا زمن قواسي زمن ضلالة
أوانطجية زمن مهين
لاقين هواكن ضروا عيشكم..
ضر يا عسكريا ما اتعظ
كتل الرقاب بيودي وين ؟
ضر يا جلاليب الرهاف
ذمما خفاف
ضر يا ضرر ضر يادقين
منصلبطين عرق النبي ؟
وبالنار بتلعبوا يا عوين ؟
لي الحول قريب درب السلامة ...
تخوجوا بي درب الحرب ؟
غي قلب ولا الحرب بقرة حلب
والأرض صين ؟
ما كان عمل ... ما كان دا دين
يا أرزقية تخمجو دم
والدم مو موية ومانا طين
منصلبطين في الناس دحين ؟
لامن يجيء اليوم الفصل والحق يبين
وين تمشو وين ؟ تنسلو وين ؟
كان طال وكان قصر الزمن ...
الحين بحين
كب يا رجالا سكتن قدر
غشاهن بالقفا
ولي الليلة سيفن في الجراب...
يهرج سنين
وإتاوهت ...
حسيت بأعماق الشوارع
والتواريخ المجيدة اتاوهت
وادتني عين
صنت شويتين كوركت ...
يا بت شمسنا ادهدهت
شوفيلي شافع ود فطين
جا من الطحين ؟
الله ... فترنا من الطحين
وكان الوكت زالف عصر
عين الشمس مشدوهة
بي دوشة سحاب
عرق المراكبية البعاد
راحل مع ريحة التساب
ما تدري من البيوت الحلة ...
ولة من التراب
الناس تقول مدقوقة
طالعة على الحقاب
مفلوقة بي حجر الصعاب
المرة نازلة على البحر
مشروقة بي موية السراب
الفرة مشروقة عقاب
يا الحرة كيف بقت الرقاب
مسيوقة بي قيد السلاب ؟
منشرة من نشر الحجاب
في عروقا واشتد الخراب
من بعد ما انبلج الفرج من ضيقا ...
خدعوها بي حيلة كتاب
رفعوهو فوق سن الحراب
ودهت الهزائم فرقتا
فالناس بدل عن نقتا
التنلقى فكة ريقتا
وبدل القصور الفي الخيال التبقى
ماهلة كريقتا
وما جاتا راحة طلقتا إلا التعمر طلقتا
بي بناديقاً حقتا بي ها الشوارع وبقتا
تنسد منك دقتا ودم خلقتا ومر شرقتا
ونار شنقتا يا دقن ... دينك سِرقتا؟
قطعت وضوها انشرقت ...
مسحت وشيها اتشهقت
قالت نست ما تاكت الاوضة التحت
عن مرقتا
دارت تقوم
جبد العنيقريب الحنين طرقتا
رجعت بشيش عن نتقتا
رجعت بشيش من الغضب
ولة التعب فتر السنين
ولة الكبر دا الما قدر يمسح
سماحة خلقتا
زي نيتا البيضا الشعر ...
زي موج بحر كان الجبين
مديت يميني اساعدا
ردت يسارا تباعدا
قالت لي : آبوي وفِّر ضراعك للبلد
وادخر مروتك آولد لي يوم بحين
أحفض كرامتك تحفضك
الموت ولا العيش المهين
الموت نفاد الما نفد
الموت حياة الميتين
أختاها جنة مع الفِقَر
وأدخل جحيم المتعبين
وإن ما قدرت على دا آبوي...
ربيلك دقين
وصنت ... ربيلك دقين
وضحكت ... حمدنا الله الحنون
جِيدن خلقنا بلا دقون وضحكنا زييين
ساقت حديثا على الخراب
الشوفتو ما دايرالا عين
رفعت قرن راس السنط ...
ساسوية جاية من المراح
يا خيري ودي المستراح
والشوكة تحت الدوكة يا داك الركين
الشوك بمرق الشوك ...
شوكاً فينا شين
مراقو رب العِزة شعبا ما بيلين
الجاية حيكومتنا
لكن الزمن دبوية داير النهمة
وينكم يالخزين ؟؟
ما كلَّ حاشا صبرنا ... لكن لامتين
دعكت عيونا وصنقعت ...
كل العيون اتجمعت
تقلت على الريح النصيحة ...
كان المطور شووو ترَّعت
زي باكي فوق دم الحسين
لكن دا وين؟ والتاني وين؟
وا

تلوعت ...
معقول في ناساً ما وعت ؟
لي الليلة بالم بين بين ؟
وكيف انتو نوحنا من الدعت
...مؤمنا من جُحر الدقون
الكاكي يلدغ مرتين ؟
والتالتة قرصة أبو الحصين
حسيت بأنها دمعت ..
شهقت عيونا الدمعتين
حسيت إني زي حجر
جدعوهو في نص بحر
قام البحر بنى فوقو طين
حسيت بأعماق الشوارع
والتواريخ البعيدة
اتوهت وادتني عين
ومرقت زي
دخلة غضب صدر المسامح والحليم
في أيام عجاف
مرقت ... دي السرة بت عوض الكريم
مرة ما بتلاوز ...لا بتخاف
.... زي الضفاف
الما بتخاف ضنب التماسيح والكلاب
قومة البحر ... ولة الجفاف
مرة من قديم ... مرة بت قبائل
قالولا "لا"
واختاروا في الحق الجحيم
من رفقة الفسل الخلا
كانت نعم تدي النعيم
مرة من صميم ضهر الغلابة
الما بتنكس راسها
غير ساعة الصلاة...
أو ترمي تيراب في التراب
أو تستشف وجه الأديم
السرة بت عوض الكريم
ما فيها من عادة الحريم غير...
السماحة القدمت
قدم الدهب
حافضنو في حُق قديم في أقصى كيم
ما فيها من طبع الرجال
غير الأيادي الخشنة
زي قولة النصيحة
وكتين يكرب في الصميم
ساعة يكون الحكم ضيم
تسعين سنة ...
ويا السرة بت عوض الكريم
بصرك بصير ...
سمعك سميع نضمك نضيم
بالك محلو صبي وسليم
تسعين سنة ... عودك أمد مانحنى
شامخ بلا البان القديم
تسعين سنة
ومن فتنك ....أستغفر الله العظيم
جوك الرجال
يا السرة بت عوض الكريم
من وين ووين
لا الكلو طين أغراك ...
لا السمح الوسيم
السرة صديت المشايخ والعمد
مرسالا ليك
ضيعت بي ألف البشارة عليهو ..
كيف قلبك صمد
يا بت قصاد المغريات ؟ ...
الجان يجب والهام يهيم
والبشروك بالجنة من فقر البلد ...
أسقوك بالغفلة المحايات ... مانفع
رتباً كبار قلتيلا "لا"
شعراء ومغنين ختا فيك ...
دوداي غناهو وما شفع ..
الجان يجن والهم يهيم
والإنجليزي أسلم في شان هواك...
ساعة طلعتي تجيبي عود السيسبان
اتصيدك آلسرة بت عوض الكريم
مرقنو كرعين الحصان
والجاك ناط كتفتي باليل في اللمين
مع الصبح طلب عفو وسترة
وعفيتي وسترتي يا السرة القوية
بقتلو توبة سوية من هتك العرض
يا بت ها كيف بعد الحسن ما تاورك
قلبك على زول في الأرض
ستين سنة ؟ ويا بت بلا النيل وحدك
واقفاها هو النيل انحنى
ستين سنة ؟ ما جهجهك فقد الحسن
لا يفقهك فجع الجنا ؟
فجع الجنا الويحيد
تحت خيل ميجر السجم الرماد
الإنجليزي وكت مرورو على العباد
وجناكي ناش عين الحصان
بالنبلة ... ناش طربوشو
قيح العسكري إنحم
وحمَّ بالسوط جناكي
في إطن المسيمح ما أتلفت
والهاشم الواقف وقع ... والدم هدر
وكان زي محمِّر في الكجر
في إيدو قابض نبلتو
وفي التانية غامت الحجر
صرخت صليحة وشكعت
فوق قيحو كلبينو الزرق
ومن يوم داك ما شافتن
ساعة البطان قيح البقل
نهمت غنا غضب البنات عن زفتن
فس يا كديس الإنجليز
كلب الترك يطفر من الفارة وينيص
يا مكري صبرك يا رخيص ...
الفافنوس البوص لحاية الهردبيس
كوس لك بلد
بلدك وأباك رفسك رفيس
نفضك نفض ...
بلدك تضادي ولا مغيث
قَلَبْ عليك بطن الرجال
شقيش تقبل يا خسيس
حظك في الحياة وفي الميتة
مافي وموت تعيس
عفنت كرشك دون تُرب
منفوخة للغربان فطيس
فوق سكة الماظ الصعب ..
هاشم .. حلالي قدل عريس
هيلة آرجال عسكرن
شمش المشارق ليها ميس
هية آرجال هتفت نفيسة
وحرَّقت توبا الوحيد
عقدت شديد ... قرقابا
حافي ودون قميص
جرت الكرارق زي برق
ختفت من السحارة...
لي هاشم حريرة وقرمصيص
وكان الفريق إنخمَّ ما فضل بشر
ما هزا زلزال الفجيعة المُرة
والدماع طفر
دايرات يولولن الحريم ...
صنن وكت صوتك نهر
وكيف زفتي وشي
ونعلتي قفاهو شيخ الحلة عن قالك
"قدر"
ولميتي هاشمك ونبلتو
وفي إيدو الحجر
صبغ الحريرة ... القرمصيص ...
الدم ملاك .. لميتي زي لمة ملاك
آخر عمل خير في البشر
جاك الصبر من وين؟ لا قلبك رجف
...لا آهة لا دمعا طفر ؟
رشرشتي بي إبريق أبو
وبي دمو نبلتو والحجر
خيط الحرية القرمصيص ...
كفنتي بي رفت القماش
الساكبويس الخاتا لي يوم الطهورة
ومرقت لاقوك الرجال
بين الغلب يتقلبو
ومتحزمين زي يوم أبو
دمع الرجال هزاكي
آه خارت قواكي
طفرت دموعك
والحريم كسرن عليك
قلدوك رجالات الفريق
فوقك ضو الشمس إتكا
وبعض المراضى المقرفين
قلدوكي لي شيء بلا البُكا
وكانت دي أول مرة تبكي في الفريق
وبي حرقة زي كل الرجال الخيرين
درفون ضرب
بالنبلة طربوش إنجليز
عوَّر حصان الإنجليز
لا إنزح لا زاح لا جرى
وكانت دي أول مرة
شافع في الفريق بي حرقة...
الناس تشق الودلحد في مقبرة
سبلتي .. ما انقطع الدرب
دفقتي بي قرعو الطشت
فنيتي في الليد النحاس
جا طشت جديد
وقدح جديد ونحاس جديد
وما انتروا ناس ...
ناسا تقلب الواطة من فوق لي تحت
لو لاقية راس
دور والمعاك ما اتفرقو
وين وشك الصعب الصلب
إن صرَّ في الريح فرقو
وإن صرَّ في الموج غرقو
يا بت كضب ...
معروفة ما من قوة تحمي الفرح ...
...حين إندلاقو على القلب
ل

ي دور حديث المنغلين...
أندلَّ من فورتو وهبد
دماً صعد من ها التراب ...
لابدَّ من ينزل مطر ... رحمة وسعد
ما بروح سراب ...
هاشم نجمة الفنجرة ... نشهد علي إنك ولد
طمنت بي فعلك بلد ... من أولها ولي آخرها
رجعت أبوك من القبر
قصرت لسنات الكتر
سكت خشم المسخرة
نزيت رجال جوقة غريق ...
بس كيف نضيق ضيقاً عميق
يبقى الحجر فلخة جبل
والنبلة تصبح منجنيق
أو بندقية معمرة
ساق نخلة في الطين الطري
نازف يفج المقبرة
قصب التواريخ ينبري
ودمك عمار المحبرة
نشهد على إنك ولد
بركان جسارة وفنجرة
زي ما شهدنا على أبوك
فرسان قبيلتك من ورا
ويا السرة بت عوض الكريم ... إنك مرة
ولدك جدع ما بندبوا
حتى في وليداتنا ... الدشر لعبن ... طعيم النوم أبو
ولدك بخيت ... ما دام رقد في صدر أبو
ولدك شفيعنا مع النبي
ولدك يمين يكفينا كلنا مغفرة
وهنا الدرب ... حِرة قلب
صرة وشي
ولدك وعدنا بكل شيء
وما في إيدنا حاجة بنخسرا
يا السرة بت عوض الكريم
مع إنو كم سنوات لا بحراً طمح
لا سمانا كانت ممطرة
كان كل ما نحفر ... يلاقينا الترا
عن جينا لي دفن الترب ...
حسينا كم ملك إندفن
جات غيمة من دون الوقت ...
جات نسمة هبهبت الكفن
بي دمو نبلتو والحجر ...
خيت الحرير ... القرمصيص
دخرينا نام آ السرة في صدر الحسن
فاتونا بي قدم الصلاح ...
سبقوك لي جنة عدن
سابوكي نخلة وسط رياح ... بين الزمن
لكن ضراعك هو الضراع
على رغم أقداراً قسن
ماسكي الشباطين في الصراع
لا بودة لا سوس لا وهن
تعبر قليبك زي شعاع
ما غيرن لونو المحن
ضلك متل بالك وهيط ...
عبرت مراكبك بي شراع
صبر احتمالك كم محيط
السرة بت عوض الكريم
الله أيا مرة من قديم
سلطان وعن ساعة الفزع مملوك نشيط
عادية زي قولة سلام
حلوة لسان ... لكن إذا تغضب سليط
مرة ما بتفرط في الزمن
وفيها الزمن لحظاتو أبن
ساعة مروق الإنجليز
ضبحت غنيماية اللبن
طلعت علي ناس القبور
كشحت ورا طرف القبب...
عيشا المجودا للطيور
ومن زمزميتا والدموع ...
رشت قبر هاشم .. عقب قبر الحسن
والباقي لي كل القبور
في توبا صرت هين من القبرين ...
بعدما انبركت
بركة عشق ... بركة شكر ...بركة وفا
غيبة الشمش جبرت خطاها على الرجوع
والقلب من شوق ما أكتفى
لسع في غيمة من الدموع تبراها لي طرف الفريق
شيلة نفس تطلع مطر ...
ختة نفس تطفي الحريق
آ السرة يا دوب بين الضلوع جرحاً غريق
فاتو إنجليز فوق دمها ... وعمت إنجليز
مبروك وحمديل السلامة يذكرك ...
ليلة الحسن سارلك عريس
أم من ضراوتو يذكرك ...
كتل المنيحيس التعيس
ناس تملأ في الأزيار ...
وناس في كل كيم واقدالا نار
ناس نازلة في الحيشان تقش
ناساً ترجع في المضى ...
والجايي سودانية مش ؟
السرة ليلة قلب نهار ..
الواطة غبشة الناس غبش
والروح خدار في حلتها ... النوم فر طار
باكر دغش شدت على ضنب الحمار
حموها للميجر تخش
عقبت على ضيفاً عصر ...
قصرت مع بتو الحديث
دهت المشايخ والعمد ...
سفهت عمايل الإنجليز
ظلم الحُكم ياهو الظلم...
كان من جوامع كان كنيس
يبرا السما ...يبرا محمد سيدي
يبرا المسيح
ورجعت بلا الموية الروت ... حيضانها لي جدول فسيح
لي دور معلقة للبخور
في بيتها عامر بالمديح
لي دور تزغرد ما انقرش يا السرة ...
حسها ...كيف نصيح
لي دور مع والشاي والزلابية مع الضبيحة
الجوكي بالخرفان سمان ... والجارلو تور
لي دور طبيقاتك تدور
ما قصر الطمبارى ... جاك ملك الدليب
رحلت بروش الزاوية عندك في الفريق
آ السرة ما فضي عنقريب
آ السرة بينات الخلوق ...
مراتاً الليل آبحوق
لي دور على كتف الفرح ...
تتعب عيونك وتستريح
لي دور وتكلك فاتح تكية ...
آ السرة دارك ماج ضريح
ويومين بعد سقت الخدار
بي إيدا ... جيهت العقاب
قامت معاها تسع رجال ...
بي نوبة فوق ضهر البخار
قالت عليها نذر قديم ...
واقع عليها نذر عزيز
إن حية في الدنيا ونصيحي ...
إن كان تشوف بي عينا فوت الإنجليز
إن كان كان تطق زغرودة في ضل العلم
خلوها تدخل للختم ...
حرموها يكفيها الضريح
شوف عين تشوف الأزهري وزي ما يكون
صح النذر ... النذر ما راح وهم
دمَّاعا رقرق في العيون ...
عن ساعة المحجوب نضم
وإنشر في زروق بزم
ما كان تكون آ قيحي حي ...
وأنا أفش مغستي وأصفي دم
من تاني يا رخم الوهم
ما دام حرتناها الأرض ... سنَّدنا ..
تيربنا ...بوغنا ومسحنا قمحنا ...
هسع الوحم
هاشم ولا أسفاً عليك ...
وعلى رفاقتك لا ندم
ما دام بقينا أسياد بلد ...
ما فات يوم أبداً قسم
والفوتك يا الإنجليز ...
يعقب على باقي السجم
آفاتن أولاد الحرام ...
أكبر من آفات العجم
دي السرة بت عوض الكريم ... سرة عقاب
سرة تواصل بينا بين رحم التراب
والجاية في الزمن الرحيم
مرة من قديم
ما فيها من علقنة الرجال ...
ما فيها من دلقنة الحريم
مرة بت قبائل قالولا لا
ما أختاروا في الحق الجحيم
ومن رفقة الفسل الخلا ...
كانت نعم تدي النعيم
مرة من صميم ضهر الغلابة

الما بتنكس راسا غير ساعة الصلاة
أو ترمي تيراب في التراب
أو تستشف وجه الأديم
جات داخلة زي مرقة غضب
من جوف حليم ... في زمناً صعب
ومرقت متل دخلة غضب ..
يا السرة ليم
آ السرة ليم

على وجه العموم أراك نورا .. يحاصرني على وجه الخصوصِ
فكيف أفرّ من حب وشيك .. وأي وصية للقلب أوصي
أطل بشرفتي فأراك فجرا .. يغازل للورود على الأصيص
ففي كل الحروف نفخت روحا .. وأحييت المحبة في نصوصي

محمود الجيلي

حركت بيك عصب السكون
جلبت ليك الغيم رحط
طرزت ليك النيل زفاف😍
حرقت ليك الشوق بخور
فرشت ليك الريد لحاف
لا السكة بيك بتنتهي
ولا معاك مليت طواف
ياريتني لو اقدر اطولك
وضاحة يافجر المشارق

وين أشـواقك وين أحـلامك
ووين حُـباً كُت بيهو تـفٱخِر
ولا أيـامك ديك نِـسيته
وزي أصبح مـا ليهِن فـاكر ؟

إستنيتك يـامـا ليـالي
في أنفـاس الصبح البـاهِر
وأصلو الزول الغـالي
غـلاوتو في حِنيتو وطيبة الخـٱطر

نحنا بينا الأمنيات والتضحية
بينا المعزات .. والعذابات فى الحياة
بينا الهوى ..
إخلاص على قلب إنكوى
وكلام قديم
قلناهو آخر الليل .. سوا
إنو راح نتلاقى لو طال النوى
لكن كلامنا الكان .. وكان
خايف يكون شالو الهواء

اﺗﻤﻨﻴﺘﻮ ﻳﺒﻘﻰ ﺣﺒﻴﺒﻲ ﺍﻧﺎ
ﻟﻜﻦ ﺑﺲ ﻣﻨﺎﻱ ﻣﺎﺗﻤﺎ
ﻭﺍﻟﺠﺮﺡ ﺍﻻﺻﺎﺑﻮ ﻗﻠﻴﺒﻲ
ﻳﺎﺧﻼﻱ ﻏﻮﺭ ﻭﺩﻣﻰ
ﺳﻘﺖ ﺧﻄﺎﻱ ﻭﺑﺪﻳﺘﻮ ﻃﺮﻳﻘﻲ
ﺩﺍﻳﺮ ﻓﻲ ﺍﻟﻨﻬﺎﻳﺔ ﺍﻧﺠﻤﺔ
ﻣﺎﻋﺎﺭﻑ ﺍﻟﻤﺨﺒﻲ ﻣﺼﻴﺮﻱ
ﺍﻧﻮ ﺧﻄﺎﻱ ﻣﺎﻧﺘﻠﻤﻰ
ﻛﺎﻧﺖ ﺻﺪﻣﺔ ﻗﺎﺳﻴﺔﻋﻠﻴﺎ ﺍﻧﺎ
ﺍﻟﻘﺎﻫﺎ ﺍﻟﺒﺪﺍﻳﺔ ﻧﻬﺎﻳﺔ
ﺍﺍﺍﻩ ﻛﺎﻧﺖ ﺻﺪﻣﺔ ﻗﺎﺳﻴﺔ ﻋﻠﻴﺎ
ﻭﺍﻻﺧﺘﺮﺗﻮ ﺟﻤﺒﻲ ﻭﻟﻴﺎ
ﻳﺒﻘﻰ ﺳﺒﺐ ﻋﺰﺍﻱ ﻭﺍﺳﺎﻳﺎ
ﺩﻱ ﺍﻟﻌﻘﺪﺓﺍﻟﻌﻘﺪﺗﺔ ﻟﻴﺎ
ﺳﻮﻫﺎ ﺍﻟﺸﻤﺎﺗﺔﺣﻜﺎﻳﺔ
ﻗﺴﻤﺔﻭﺭﺍﺿﻲ ﻗﺴﻤﺘﻲ ﻟﻴﺎ
ﻣﺎﺗﻤﺎﻫﻮ ﺍﻟﻠﻪ ﻣﻨﺎﻱ
ﺑﻠﻘﺎﻫﺎ ﺍﻧﺎ ﻃﺮﻳﺢ ﺑﺎﻟﻲ
ﺑﺎﺣﺮﺓﻭﻓﻲ ﺟﻤﺎﻟﺔﻓﺮﻳﺪﺓ
ﺗﺴﺘﺮﻧﻲ ﻭﺗﻐﻴﺮ ﺣﺎﻟﻲ
ﺗﺴﻜﻦ ﻓﻲ ﻗﻠﻴﺒﻲ ﻭﺣﻴﺪﺍ
ﻣﺎﺧﻄﺮﺕ ﺗﻜﻮﻥ ﻓﻲ ﺑﺎﻟﻲ
ﺩﻱ ﺍﻟﻤﻜﺘﻮﺑﺔ ﻟﻴﺎ ﺍﻛﻴﺪﺓ
ﻭﻳﻦ ﺭﺍﺡ ﺗﻤﺸﻮ ﻳﺎﻋﻮﺯﺍﻟﻲ
ﻳﻮﻡ ﺍﻻﻟﻘﺎ ﺗﺮﻳﺪﻧﻲ ﻭﺭﻳﺪﺍ
ﻣﻌﺮﻭﻑ ﺍﻟﺒﻴﺼﺒﺮ ﺑﻠﻘﻰ
ﺩﺍﻳﻤﺎ ﻓﻲ ﺍﻟﻨﻬﺎﻳﺔ ﻣﺮﺍﺿﻮ
ﻭﺍﻟﻤﻜﺘﻮﺏ ﻟﻴﺎ ﺍﻟﺘﺒﻘﻰ
ﺭﺍﺿﻲ ﺍﻧﺎ ﺑﻲ ﺍﻟﻪ ﺍﺭﺍﺿﻮ
ﻳﺎﺍﻟﻘﻠﺘﻮ ﻟﻴﺎ ﺣﺎﺭﺓﺍﻟﻔﺮﻗﺔ
ﻣﺎﻋﺎﺭﻓﻴﻦ ﻗﻠﻴﺒﻲ ﺍﻧﺎ ﺭﺍﺩﻭ
ﻣﺆﻣﻦ ﺑﺎﻟﻘﺴﻢ ﻣﻜﺘﻮﺑﺔ
ﻟﻠﺰﻭﻝ ﻣﻦ ﻗﺒﻞ ﻣﻴﻼﺩﻭ
ﺍﺗﻤﻨﻴﺘﻮ ﻳﺒﻘﻰ ﺣﺒﻴﺒﻲ ﺍﻧﺎ ﻟﻜﻦ ﺑﺲ ﻣﻨﺎﻱ ﻣﺎﺗﻤﻰ

علم عصافير البلد..
تكتب تقارير الجهاز..
علم شبابيك المدن..
علم فوانيس القرى..
وكل عيدان الذره..
خلي النمل يدخل
صفوف المخبرين..
خلي الرزاز..
يكتب تقارير الجهاز..
أحسن تعبي الشعب
أغلبه في قزاز..
ركز بشده على الجياع..
لو تستطيع..
أو حتى قدر المستطاع..
أخسف بكل الكادحين..
سابع أرض..
وارجم رجم..
صادر من الليل النجم..
صادر من البحر الجزر..
أشطب ولا تقبل عذر..
وش الصباح..
قصقص جناحين الرياح..
جمد شراين الحياه..
ألغي إكتشاف النار..
وتقسيم العمل..
المحتمل تلقى الملاذ
يابلهوي..

محجوب شريف

من طرف الحبيب جات أغرب رسايل ...
يحكي عتابوو فيها وقال ناسينوو قايل.....
يا ما قال حكاوي ما خطرت ببالي ما خطرت ببالي...
قال في كل كلمه اني جفيت وسالي...
لوفي كل لحظه لو تعلم بحالي..
ما ناسيكا والله ذكراك شاغله بالي...
لو انساك انت أكون غدار وخنتا...
أسأل عني غيري وأحكم في مصيري...
ياما تشوف دلايل....
ياما قال كلام مالي دخل بي...
أني بروح لغيرو بهوى وبصطفيه...
أن شاء الله حياتي تفنى لو فكرته في...
لا لا وألف لا لا ده حبك عشت بيه..
بدل أشواق ومحنه ترسل لي مظنه..
كلام يجرح شعوري وما يريح ضميري..
بتقوول عنوووو ساهل ..

ﺳﻨﺘﻴﻦ ﻭ 6 ﺷﻬﻮﺭ ﻏﻴﺎﺏ ﻗﺮﺑﺖ ﻳﺎﺍﺧﻲ ﻋﺪﻳﻞ ﺍﺟﻦ
ﻭﻣﻦ ﺍﻟﻌﺬﺍﺏ ﺟﺎﻧﻲ ﺍﻛﺘﺌﺎﺏ
ﺣﻤﻲ ﻭﺻﺪﺍﻉ ﺣﺎﺱ ﺑﻲ ﻭﺟﻊ
ﻗﻠﺒﻲ ﺩﻗﺎﺗﻮ ﺑﺘﺰﻳﺪ ﻭﻣﻦ ﺍﻟﻌﻠﻲ ﺿﻐﻄﻲ ﺍﺭﺗﻔﻊ
ﻛﻞ ﺍﻟﺪﻛﺎﺗﺮﻩ ﺍﺗﺤﻴﺮﻭ ﺣﺘﻲ ﺍﻟﻌﻼﺝ ﻟﻲ ﻣﺎﻧﻔﻊ
ﻭﺭﻭﻧﻲ ﺑﺲ ﻛﻴﻔﻦ ﺍﻃﻴﺐ ﻭﺍﻟﺤﺎﺑﻲ ﻟﺴﻊ ﻣﺎ ﺭﺟﻊ
ﺍﻟﻠﻴﻞ ﺑﻘﻀﻲ ﺑﻜﺎ ﻭﻧﻮﺍﺡ ﻭﺣﺎﺭﺱ ﺍﻟﻨﺠﻮﻡ ﺣﺪ ﺍﻟﺼﺒﺎﺡ
ﺍﻟﺸﻲ ﺍﻟﻌﻠﻲ ﺯﺍﺩ ﺍﻟﺠﺮﺍﺡ ﻭﺍﻟﺮﺩﺗﻮ ﻣﻦ ﺍﻳﺪﻱ ﺭﺍﺍﺍﺡ
ﻻ ﺭﺳﺎﻟﻪ ﻣﻨﻮ ﻭﻻ ﺍﺗﺼﺎﻝ ﻋﻠﻴﻬﻮ ﻣﺎ ﻣﻠﻴﺖ ﺳﺆﺍﻝ
ﺩﺍﻳﺮﻭ ﻳﺎ ﻧﺎﺱ ﺑﺎﻟﺤﻼﻝ ﻭﺍﻧﺴﺎﻫﻮ ﻣﺎ ﺑﻘﺪﺭ ﻣﺤﺎﻝ