واول ماعطيناه الاسم وكم وصف اخذنا دلانا عليه ووكفنا عند قبرهم ..

دحكتلها تتمشى بهداوه لعند قبر ابوها انا تركتها ووكفت بعيد عنها قلت تاخذ راحتها بالحكي عندو ..

عيني عليها وهي واكفه بجمود كدام هالقبر
سمعتها حكت بصوت عالي ..
- مرتااااح
وضلت تكررها بحركه وهي تضرب على حجر القبر بجنطتها وانهارت بالبكي وهي تقلو ...
- مرتااح عفتني عدهم ورحت مرتااح
رضيت اهلك ونسيتني .. فرحت الكل على تعاستي .. ليييييش لييييييش مو جنت مدللتك حبيبتك ليييش كسرتني هالكسره يابه لييييش
لييييش خليتهم يبيعوني بينهم ليش ماسمعتنننني مو جنت اكلك اخاااااف مو كتلك اخاااااف والله اخااااف ليش ماصدكتننني

انا واكف بعيد عنها واسمعو لصياحها وبكيها
وادحكلها تكضب صدرها من تحكي ورجعت انهارت بالبكي وتقلو ...

- شفتتتت خوفي بمكااانه طلع وانته ماسمعتني وجبرتني امشي لموتي برجليه طايعه مافكرت بيه ليييش همتك الناس الي تعاونو على ذبحي وماهميتك اني الي اعيش بالموت كل يووووم .. كل ييوووووم والله كل يووم
اعيشه للموت انته خلصت منه مره وحده واني اتجرعه كل يووم يرضييييك هذااا يرضيك .. هوو هذا الي ربيتني وتفاخرت بيه علموده ! هيييج لهاليوم انته تعبت عليه حتى تذبني بجهنم وتروووح ... ليييييش يااابه ليييش عاونتهم وخليتهم يركصون على جرحي ليييييش ... مو كلك ماتنسعد مووو كلك شوف الموت بعينها معقووول ماشفته بعيني ياااابه ماشفته .. ماهمتك دمعتي من بجيتها كدامك اتوسل ردتك سند مثل ماعرفتك وتخليت وتخلت عني الدنيا باكملها كلها تكالبت عليه وانته السببب كله منك انتتتته السببببب .. سلمتني بيده ينهش بلحمي مثل الجلب ويتلذذ بييييي .. وسمعت كلام المره الي هي بايعتني اله برخص الترااااب باايعتنننني ..
ماتدررررري انته ماتدررري شنو عشششت يابه تشوووهت بسببك بسبب اهلك الذبحتني بيهم اني احترك عمري كدامي وماكفى كل هذاااا ماكفى رجع ربطني بي هالطفل دتسسسسسمع انته دتسسسمع شديصير بيييه
بنتك حامل بابن كتالهه ياااابه كله بسببببببك
والله كله بسببك .. ماااااسامحك ماااااسامحك
ولا سامحهم مااااسامح احد بيكممممم والله ماساااامحكم ضووووكو لوووعتي ماسامحكم
انتم سبب كلششششي انته وامي ماسامحكم
اثنينكم بعتوني لمصالحكم وماسمعتو صيحتي ولا نقذتوووووني .. انته حتى بدعاء ماساعدتنننني واني اصرخ واصيح باسمك
لييييييش ليييييش شذنبي اني انذبح هيج لخاطر اهلك .. ضحييييت بيه المن الممممن
منو هذا اليستاهل اكثر مني تخااااف علييييه
منووووو .. خوااااالك !! همه الذبحوني
ولدهم ماااابقو بعمرررري شي ماحركو
وعافوني مهجره بحيرتي بالي بنص بطني
لييييش ليييش شسووويت من ذنب وهيج عاقبتني شسوووويت ليييييش يابه لييش
ماااسامحك ماسااااامحك

ادحكلها تصرخ وتضرب بقبضه يدها الصغيره على هالحجر مشيت لعندها وانا مدمي كلبي عليها .. كضبت يدها وبعدتها
وهي مستمره تريد تضرب وانا ابعدها
- مايجوز هالفعل يابه تهدي الميت الو حرمتو مايجوز
- ماااااعليك وخرررر
- يابت الناس انا فاهم تعبك لكن هاذ ميت مايجووز حرام عليكي
- حراااام عليه علييييييه هو سو بيه هيييج هوو كله منننه مارحمنيي وكت احتاجيت رحمته
- كلشي قدر ربك كاتبو ماهو بيدو لوالدك لا تحملي ذنبك .. كلشي ينسي مع الزمن
- مااااتفهم انتتتتته مااااتفهم بداااخلي طفل طففففل يذكرني بكلشي عشته يذكررررني حتى لووونسسيت

جرت يدها من يدي وخلتها على وجهها وبكت
جيرت حسره وكمت تمشيت شوي ورجعتلها
كعدت حدرها ومنطيها ظهري سمعتها حكت

- اني اسفه شيخ .. عليت صوتي بوجهك
وحجيت كلام مو لائق بحضرتك اعتذر
- ماصار شي المهم انك تعقلي وتهدي شوي
- هدأت اي

درت وجهي عليها ودحكتها لامه ركبتها لصدرها وحاطه راسها عليها وعينها ناحيه القبر .... حكيتلها ...
- الحين وش نسوي ؟

رفعت راسها ودحكتلي بعيونها الوارمه
الي محاوط سوادها حمار مخيف ..
نزلت راسها وجرت جنطتها لعندها وحكتلي.
- شيخ هسه خلص تكدر تاخذ راحتك وترجع لحديثتك واني ادبر نفسي
- وش هالحكي يالاخت ما هيك قصدنا
- اي اعرف قصدك بس صدكني مامحتاجه شي بعد تسلم انته تعبت وياي هواي وصبرت عليه ايام .. بعد ماريد اتعبك بمشاكلي اكثر
-لاااا مابه تعب هاذ واجب عليا فعلو
الحين احكيلي وين نمشي سوا انا قصدت هيك بنضل هينه على هالتراب اليوم كلو ؟
- لا مانبقى هنا انته روح لاهلك واني لاهلي
- لوين بتقصدي ! دليني المكان الي تروحيلو
- ارجوك لاتضغط عليه اني بعدني ماقررت اي مكان
- عجل ماقررتي لوين وترديني اتركك هين !
- شيخ ماكدر ارجع وياك بعد
- ولييييه ماترجعي حد زعجك ببيتنا؟
- لاا الكل عاملني باحترام وطيب بس ماترهم
ارجع
- عجل لوين تروحي؟
- كلتلك ماقررت شوف احد من اهلي يعني هيج
- خطر عليكي ماضنهم ينفعوكي لو انهم ينفعو كنتي مشيتيلهم من الاول مابتخليهم خيار ثاني
- مو بكيفي هسه اني محكومه بطفل يحتم علي رجعتي الهم لعد شلون اعيش ابني بالغربه بدون اهل !
- انا اكفلو لابنك

-لاااا تسلم
- لااا ماودي اسلم ودي اكفلو لابنك واكفلك بكل شي انا قلتلك انك دخيلتي للممات ماتفهمي!
- افهمك شيخ بس ماكدر .. ادري بيك كد كلمتك ومو متعاجز مني او من ابني بس
اني مارتاح نفسي مامتعوده على ان اكون ثكل على احد اني متعوده اعيش نفسي بنفسي ماكدر اصير بينكم دخيله وتضلون شايلين همي هالشي يصعب عليه رجاءاً تفهم موقفي

دحكت لمعانيها المتوسله ان اتفهمها وانا بداخلي اعرف حكيها صح اعرف يصعب عليها تكون دخيله حد لانها عزيزه نفس

- انا لو ماعرف طينتك وشو ماخليكي والله
لكن جرالك الي تطلبي راح اتركك تمشي لعند اهلك ويحميكي الله
- مشكور شيخ مشكور على كلشي قدمته الي
ربي يحفظك لاهلك
- ماعملنا الا الواجب .. امشي معاي اوصلك وين ماتريدي
- لاااا اني اروح بعدين ازور وارجع على راحتي انته ارجع لايضل بالك

دحكتلها وشفت ماضل شي نحكي سلمت عليها ومشيت ....

عبرت المقبره ومشيت لمكان سيارتي
وانا امشي احكي اني بروح ازور واخذ دهين للاهل وارجع لحديثه بعد صلاه الظهر
ووكت ماصعدت بسيارتي متعود اكضب سبحتي اليمانيه واعلكها بالمرايه ووكت مانزل اخذها .. وهالمره مديت ايدي بجيبي ادورها مالكيتها دورتها بالسياره شبر شبر
وانا اذكر انها كانت معي من الصلاه مانسيتها بغرفتي ...
بعد ماايست الاكيها هين شغلت ومشيت
وبفكري بعدو صوتها المبحوح من البكي
وكلماتها النابعه من كبير وجعها وانتبهت
خطف من كدامي ارنب ..
بعادات اهلنا توارثناها منهم ان الارنب وكت
مايخطف من حدر سياره او قافله فهذا يجلب نحس وشؤوم ونبعدو بفدا درهم ..
انا مجربو وكت اسافر ومحصل منو كوارث
فتفاديتها هالمره وجريت محفظتي وطلعت منها درهم وشمرتو من جامه السياره
وصارت عيني على هالدينار الي اخذتو بدل التين .. انا مطبكو وحاجزو لوحدو ..
طبكت سيارتي على اليمين وصفنت عليه
وتذكرت بكيها وحكيها ..
امي باعتني بالرخص .. خوالك ذبحوني
انته كسرتني ...
حكيت مع هالدينار ...
- يول وين بتمشي هالمره واهلها مساكيط
وانا من كل عقلي امنت عليها عند اهلها ؟
عجل ماهي جت هاربه وشاكيه الويل منهم
الحين بترجع مذلوله عندهم لخاطر الولد
والله عار على هالشوارب لو سلمتها للذل

ديورت هالسياره ورجعت لشارع المقبره
وطبكتها ونزلت اهرول لعندها وانا ادعي انها كاعده بمكانها .. ووكت وصلت لقبر ابوها مالكيتها لكن لكيت سبحتي على طرف القبر
اخذتها ووكت دنكت دحكت كدام وره قبرين
مره قلت جايز هي .. مشيت لعندها وادحكها حاطه راسها على القبر وحاضنتو .. دحكت هذا اسم مره عرفتها جدتها ..

حكيتلها وانا اتنفس سريع ..
- يالاخت حمدلله انك كذبتي علي ومامشيتي

رفعت راسها ودحكتلي وهي تمسح دموعها
- ليش رجعت ؟
- رجعت متندم لاني تصرفت بغبى
يولو انا ماسلمك للذل ولا اخليكي تمشيلو
طايعه انا عاهدت نفسي احميكي واخذ حكك
ماتنازل عنو
- شييخ اني فهمتك
- اشش انا مافهمو لحكيك هاذ مايمشي مع مبادئي
-بس مهما يكون ماكدر
- كومي الحين
-شنو وين
- امشي معاي يلا

كامت وهي مترنحه ردت اكضبها اسندها رفعت ايدها تمنعني وقالتلي ..
- اني اعرف اسند نفسي بنفسي

وبالفعل مشت كدامي بثكل وتكضب براس القبر الي حدرها لحين ماوكفت حدر قبر ابوها
لاني وكفت عندو .. رفعت راسها تدحكلي وهي مضيقه عينها من الشمس .. صرت انا كدامها وحجبتها للشمس من عينها وهي صفنت بعيني هذيك الصفنه التعودت عليها منها ..قطعتها عليها وقلتلها...

- دحكي يابه انا اليوم امام الله ونبيو وهالخلق الي نايمه بمنيتها هين و والدك هين يسمعني
وانا هالحين كدامهم كلهم اعاهدك مااتركك للذل ومن هالحين انا اسندك بدل نفسك وانتي وابنك معلكين هين بركبتي ليوم مايدفنوها وتطلعين على قبري انا اشيل يدي منك
ووالله وجلاله اسمو لالله مااحيل عن بنت الاصول الي حملتها يديني والي تهذي بحمتها وضعفها وتطلب الرحمه وجت لكاعي تطلب ملاذ ونامت بامان ماتخلى عنها ولو انك منعتيني وتماديتي بحكيك معاي انا ماتغير بكلمتي وهذا عهد علي وعهد الحر دين

دحكتلها نصت راسها وبكت .. تقربت حدرها
وقلتلها ..
- ارفعي راسك يولو انتي بمسند شيخ للحين انتي ماتعرفين سيطو وكدرو
- هالشيخ هيبته سابقته مايحتاج اسال عنه
- عجل ماتبكي بحضرتو هذا ماهو بهين حريمي تبكي وانا راسي يشم الهوا

تبسمت بخجل وانا تقربت رفعت عباتها الي على كاتفها نازله وخليتها على شعرها
وقلتلها ...
- من هالحين تمشين معاي مرفوعه الراس وتعيشين بينه بعز وكرامه
- بس شيخ صعبه ادخل عائلتك واني غريبه
- انتي اخت الشيخ مانك غريبه
- يحفظك الله ياشيخ بس اني مو وحدي راح يجيني طفل
- ماتكملي حكيك ابنك اسجلو باسمي واحسبو بحساب جراح ولدي وقلتلك ما قصر معكم
والله لو يضل عندي كسره خبز اتقاسمهه بينك وبين ابنك وما امد يدي عليها
- ربي يعزك
- يالاخت صوتك المبحوح هذا رادلو دوا
ودواكِ يبدي بتركك لكل هالعيشه وتمشين معاي فارغه من كل ماضي ..
اتركي ناسك وايامك واتركي عذابك هان كلو

ارميه وامشي معاي بحياه جديده انا اصنعها لك من طيب ماخلق ربي ومكني عليه وان شاء الله ماتندمي على جيتك معاي بيوم
- متخوفه صراحه
- يولو انتي كبل كلتي الشيخ مايرد ضيفو الحين الضيف يعصي امر شيخو ؟

دحكتلي وابتسمت وانا ااشر ليها بيدي
حكتلي..
- امرك .. بس لحظه .. لازم اعتذر من ابويه قللت احترام وياه وهاي مو عادتي
- زين واسمعي ياا .. والله ماعرف شناديكي
قليلو انك مسامحتو اجلبيلو الراحه بيها

هزت براسها ومشت لعندو حكت معو ورجعت لعندي ودحكتلي ... وقالت..
- متوتره احس هالشي صعب
- سلميني امرك وانا اسهلو لك
- شيخ قبل كل شي اريدك تعرف تره انته مامجبور بيه وبتعبي ومشاكلي ليش ماتدور راحتك
- اي صدكتي انا مامجبور انا جيتك بشور راسي وهذا يزيد اصراري على انك تمشي معي

تبسمت ودارت وجهها ورجعت دحكتلي وانا رفعت اليشمغ عن ركبتي وحكيتلها ..
- ماتسلميني امرك الحين. !
- راح اخليك تكون ولي امري الوحيد
بس عندي طلب واحد منك ماريد اي شي غيره
- يا فرحي والله اني افرح لو تطلبين ابشري وش طلبك
- هو يعني
- ايه وش احكي !
- نكون اصدقاء
- والله ماحكيتي الا الي بالي انا من اول بالي هالشي .. ابشري جرالك يابنت العز
- شكراً شيخ
- الا وش هو اسمك ماعرفتو

دحكتلي وهي حاطه يدها فوك عينها من الشمس وقالتلي ...
- كيفك شنو تريد سميني

ضحكت وانا افر بسبحتي وحكيتلها ..
- لو بكيفي اسميك تين على مكان مالكيتك
- اي هاهيه لعد تين
- لاا من جد وش اسمك
- زهراء
- ريتك تزهرين كل عمرك

دنكت بخجل ومشت كدامي وانا وعيت على روحي وش حكيت انا هالحرف منها ماهو بزين لي ابد ماهو بزيين ...

مشينا وشويه وهي تعثرت بطرف عباتها وقبل ماتمسك الحايط الي حدرها انا مديت لها يدي ومسكتها واستندت عليها وهي تدحكلي وانا مقلص يدي حتى تكون لها قويه وتسندها
عدلت عباتها وهي تدحكلي باستغراب وانا حكيتلها ...
- قلتلك انا اسندك بدل نفسك ماتستغربي انا مانسى كلمتي

دحكتلي ومعانيها بانت بالتفهم ومشت حدري
حكيتلها ..
- اخذك بالاول نزور الامير علي وتباركين بزيارتو حياتك الجديده وبعدها نطلع لحديثتنا

تبسمت ومشينا للسياره صعدنا ومشيت لعند الامير طبكتها بالكراج ودخلنا اخذتها للحمامات خليتها تدخل وانا مشيت بالي حدرو للرجال جددت الوضوء وطلعت وضليت واكف لحين مااجت لعندي دحكتها غاسله عباتها من التراب الي كان فيها وشعرها تحاول تخفي بالعباه ويرجع يبان .. قلتلها ..

- دامو مضايقك هيك شعرك خليني اشتريلك حجاب تلبسي تحتو ماترهم هيك العباه بدونو
- اي ماعرفلها وهيج يعني

ضحكت على خجلها من مسكتها وحكيتلها
- اعرف انك مو ماخذه عليها امشي معاي

مشت حدري وانا ضليت ادور بالسوك على بياع وتالي لكيت واحد عندو ربطه بيضه
اشرتلها عليها وهي حكتلي ...
- لاااا لااااا مالبسها
-ليه
- موو حلووه عفيه
ضحكت وسألتو شو عندو غيرها وطلع لنا
شال اسود خفيف ملمسو دحكتلها وهي اشرتلي اي واخذتو لها ..
كضبتو وحكتلي ..
- وين البسه
-امشي معاي ندحك وين

مشينه ودحكت محل مافيو حد قلتلها هين ادخلي ..كان المحل للسجاد والفرش الخفيف
خليتها تدخل للمحل وانا وكفت كدامها
نزلت عباتها على كتافها ورفعت شعرها لوره
واخذت الشال حطتو على راسها وهو يتمزلك على راسها مايثبت .. قلتلها ...
- دحكي اطبكي اثنين وقربي كدام

طبكتو وصارت تحكيلي هيك! وهي تلبسو وتدحك لوجهي وانا انبهها وش تسويلو
انا ماعندي خبره به لكن انبهها لحتى يكون مضبوب عليها .. وهي خلتني اكون مراتها
وكت قلتلها زين وحلو عليكي تبسمت وهي واثقه انها ضبطتو ولبست العباه عليه ومشت بثقه اكتفت فيها بحكيي ...

افترقنا عند المزار وبعد الصلاه تلاقينا
وطلبت منها نكعد شوي واخذتها وكعدنا بمكان حدر الحمام ..
اخذت من رجل كف حنطه واشرتلها تفتح يدها وحطيتو فيها وكعدت حدرها ..قلتلها ..

- تين تعرفي انا ليه اخرت مشيتنا
- ليش
- ردتك تحكي كلشي ماتبغينو يكون معك بحديثه حتى هين ندفنو وننسى شرو

جمدت معانيها ووكفت يدها عن زت الاكل للحمام وقلتلي ..
- الحجي هواي شيخ مو بسهوله اكوله ويندفن
- ليه ماهو بسهل! كلشي انا معك به احكي ماتخافي
- شيخ هي مو سالفه حجي هي نار بعدهه ماخمدت والي خمد منها تارك اثره بيه
وهالنار تدفن رمادها بيه اني شلون احجيها الك بكلمتين شوصفلك من ناري
- والله انا عارف انها نار وتحركك بسكات لهيك انا طلبتك تشاركيني نارك عسى واكدر اطفيها لك
- صعبه شيخ صعبه ازيدك هم لو حجيتها
خليها الها ربها والايام مثل مايكولون دوا الجروح
- والنعم بالله .. زين انا ودي احكي معك الحين بصفه شيخ وضيف ونتفاهم بقضيتك
تاذنين لي ؟
- طبعاً ااذن الك
-زين .. دحكي يابه انا ودي اخذلك حكك
من ظلامك ..انا ما انتخيت لقضيه ماخذت حكها واضعافو لهيك انا رايدك تحكيلي عن اهلو لزوجك و وش عملو فيك وانا برسل ناس يجلبوهم لعندي واخذلك الحك وانتي بيتي مايمسك شر
- لاا ياشيخ لا اني ماريد منهم حق او باطل

- ول وش ماتريدي
- شيخ انته رجل عندك مخافه الله والحق مثل حد السيف انته عندك ميزانك تتعامل بي ويه الي يؤمن بهالميزان ويخاف هالحد بس الي هو مامعترف بي انته تكدر تقيم هالقوانين عليه وتحاسبه عليه ؟
- تقصدي انه شو؟
-اقصد انه كافر اي لا تستغرب حجيي الناس الي تريد تقيم القصاص وياهم همه كفره اني جنت على مدى شهور اسمعهم يكفرون بالله بكل صبح ومسيه وبكل اذان يزعجهم صوته ويكفرون ويسبون بالمؤذن ولايغرك كونهم من فئه الاسلام همه اصلاً مايعترفون بشي اسمه حق وحرام وحلال تره عدهم الدنيا بس يعني عذراً منك بس شرب وبنات وحتى لو صارت يعني وصار بينكم لقاء شراح يكون الحق الي تاخذه منهم ؟ فلوس ! هو اني جنت اصرف عليهم وحتى لو دبرو فلوس مستحيل اخذهه منهم .. اني جرحي ياشيخ اكبر من ان يتشافى بكم فلس يتعذرون بي كدام هالناس
- والله انك صدمتيني هذا ربنا بعظمتو يكفرو به استغفر الله
- يعاقبهم ربنا بهالضلاله تره
- ظليمه والله ظليمه .. عجل وش بالك تبغينو
ودك نمشي بالقانون والمحاكم انا حاضر ومعك
- لااا ياشيخ مو كدهم اني
- ووووش هالحكي تيييين اناا مارضى مااارضى هيك تحكي لاتعصبيني عليكي
انتي بظهرك رجااال قبيله كامله انا امشيها معك وش مو كدهم !!!
- اعتذر بس
- لاا بس ولاا شي هالحكي ماااينعاااااد هيك انتي تسيئين لي انااا سمعتتتي ..هالمره اعديها لكونها الاولى
- ماتنعاد شيخ وعد
-ايه زين

درت وجهي منها وانا متماسك اعصابي عنها
انا بطبعي ماسكت عن حكي والكلمه الي تغثني اردها بعشر لكن هين عندها اخاف انها تاخذ رد فعل مني مو لايق وتصير تخاف مني
دحكت يدها نمدت لناحيه عيني .. رفعت حاجبي مستغرب فعلها ودحكتلها وهي
تأشرلي ان نوكل الحمام وتبتسم .. تغير مزاجي كلو ولكيت نفسي ماخذ الحنطه من يدها وازتو للحمام ..قلتلي ..

- شيخ اني افهم حرصك على اخذ القصاص من الظلام وافهم ان الحق عندك مايضيع
بس اني ماريد ادخل عشاير او محاكم وتصير سالفتي على كل لسان لان لو صارت لازم احجي كل المضموم بكلبي عنهم وبهالحجي اني ماافضح الا روحي وماازيد لنفسي الا وجع واني ماريد القصاص منهم اني اريد اداوي جرحي هذا الي يأذيني ..الي بيه انترك اثره هو الي لازم اهتمله واخلص منه

اندارت علي ودحكتلي وحكت ..
- اني اريد انسى حتى اعيش
- وانا معك .. دوا جرحك انا اخلقو لك لو لزم
- تسلم .. اني اريد اتركهم بخيرهم وشرهم وحتى الطفل ما خليهم يدرون عنه لان اكيد راح يلوعون كلبي بي
- وانا لالك ولابنك حافظ وساند وانا قلتلك ابنك اسجلو باسمي والو مثل ما لجراح ماينقص عنو بقيد شعره
- ربي ينطيك راحه البال مثل ماريحت بالي وطمنتني
- انا معك تين لاخر هالعمر انا ولي امرك وصديقك وسندك وبيتك ومأمنك من هاليوم نمشي بدون خوف ولا تحملي معك ولا حتى ذكرى وحده لسنين عمرك الي مضت كل
شي انا اصنعو لك من جديد

ضحكت هالمره وبانت سنونها الناعمه ودكه حنكها هيك تقسمو نصين وتزيد حسنها

زتيت كل الي بيدي للحمام وقلتلها نمشي
واخذتها اشترينا دهين وانا من عادتي اخذ
كثير واخذت خمس علب منها ومشينا وانا عيني تدور على مطعم وهي حكتلي ..
- هذا مو نفس الطريق الي اجينه بي
- تيين وكت الاكل
- ماريد مالي نفس
- يول انتي خالقينك تشتغلي على الهوا انتي حاسبه كم يوم ماكلتي شي
-لا ماذكر شكد !
- ماتذكري من صدك؟
- اي والله كتلك اخربط بالحسابات
- صارلك ثلاث ايام على ريوك الي اكلناه سويه هذاك الصباح انا متعجب شلون تمشين
- ههه عادي
- دحكي انا الوجبه لو فاتتني اعوضها مرتين
وانا الحين ماعرف اسوي شي والجوع يضرب براسي
- حقك لعد اختار مطعم بكيفك
- انا حبيت طلعتي معك
- ليش
- تين انتي ماتخسري انا لو ماخذ حريمي الحين اصير ادورلي رجال يحملون غراضهم ومطعمين اكون مكعدهم واحد يتريكو فيه والثاني يتغدو
- ههههههههه

من سمعت صوت ضحكتها توكفت ودحكتلها
لحتى اشوف هالدكه الي بحنكها وحفظت تقاسيمها مامتعود على سماع صوتها واليوم سمعتو وتمعنت بلهجتها الي احس كأني عند الحكاوتي هيك يحكيلنا بهداوه وكثير من الفصيح فيه ..

كملنا مشينا للمطعم واخذت مكان ماحدرو حد
هي نزلت العباه لعند كتفها ودحكت كل شعرها باين من تحت هالشال ماحبيتو وماحبيت انبها عليه خليتها براحتها ..
طلبت الاكل وصرت اشرب المي بين ماينزلو
وهي تدحكلي بكل حركه ..

دحكتهم طولو بالمشاوي وانا الجوع اشر عندي كثير .. قلتلها ..

- يولو جيبي هالدهين من عندك اسلي بي بين ماينزلو الاكل

تبسمت وحطت وحده من العلب كدامي
اخذت منها وقدمتها لها وهي اخذت شوي
منها وصرت ادحكلها كيف اكلتها بهداوه
يادوبني الاحظ حركه فكها مدري انا متعود
على الكثير والهرج بكل شي مدري انها
هاديه وترفه بكل شي !!!!

لبين مانزلو الاكل انا ماخليت غير الربع من الدهين .. وسميت بالله واكلت وهي ماخلت بفمها غير الخبز .. كملت لكمتي وقلتلها..
- تين اطلبلك شي ثاني ماعجبك !
- لااا بس اخاف اكل والطريق يعني

- لاا ماعليكي اكلي وانا ادبرلك سالفه الطريق
-شلون !
- قلتلك ماعليكي انا ادبرها ..كلي يلاا
.

⭐️⭐️

#شقراء_بغداد

بارت_٢٧



- لاا ماعليكي اكلي وانا ادبرلك سالفه الطريق
-شلون !
- كلتلك ماعليكي انا ادبرها ..كلي يلاا

اكلت براحتها وانا عجبني منها ثقتها بكلمتي
زدت هينه اصرار على حمايتها وضلتها معاي ..

وكت الي طلعنه من المطعم مشينا لعند البقال اخذت منو برتقالتين عطيتها وحده ولي الثانيه
انا قسمتها بالنص واكلتها باربع لكمات وهي بعدها تكشر فيها .. قلتلها ..
- عطيني يولو نبات هين عله هالحال

ضحكت وعطتها لي فتحتها وعطيتها والكشر خليتو بجيبتي وبعدها مشينا للسياره وهي تاكل بالبرتقاله .. غسلت يدها يلا صعدت بالسياره واول ماحركت عطيتها الكشر وقلتلها ..
- دحكي يولو هالكشر يبعد عنك الغثيان خليه بيدك وكلي منو على طول هالدرب
- اممم مجربه.؟
- مجربي اهلنه
- ماشي راح اكله

خلتو بيدها وكل شوي تدحكلي تبتسم وترجع تعض منو شوي ... انا كان عندي طاقه عجيبه .. كأني احس ان هالجسد الو قابليه يجابه كون بصدر منشرح وماعرفت وش اصلها ! لكني قررت استغلها لخاطرها واحزم على ترتيب راحتها ببيتي ...

ساعه الدخلنا الانبار حكتلي ..
- شيخ اطلب منك شي ممكن
- آمري ياتينه اطلبي
- ههه ليش تصيحلي تين مو عرفت اسمي
- هيك انا ارتاحلو اكثر خليني بكيفي اناديكي
- ماشي على راحتك
- ايه وش طلبك
- ها اي اريد منك ان الي سمعته مني اليوم يعني الي صار كله مايعرفه غيرك
- افاااا ياتينه توصيني انا بهالشي يولو سدك امين انا دفنتو هالحكي هنيك عند المقبره وراح بساعتو
- اصيل والله بس يعني مثل مايكولون ليطمئن قلبي
- ههه اطلبي شي يسوه ماعتبر اني سمعتو لهالحكي اطلبي من جديد
- امم .. عرفني على العائله يعني اريد اعرفهم من نظرك مو من الي راح اشوفه
- هاا ليه
- عيوني دائماً تغشني
- لا طيبتك تطغى على شوفك انتي تعرفي وش طينه البشر لكنك ماتريدي تصدكيها
- اي محتمل هالشي .. زين هسه احجيلي عن حياتكم وعائلتكم بنفسي اعرف بينمن راح اعيش
- زين اسمعي يابه ..

عدلت كعدتها وصارت مايله لجنبي وتدحكلي
وانا عيني على الشارع وارجع ادحكلها وهيك
وقلتلها ..
- دحكي انا والدي كان شيخ قبيله وكان له شغلو بالتجاره مع حدود سوريا والاردن
ويشاركو فيها عمامي الاربع وتطور شغلهم
وصار عند عمي الاكبر مكتب لخط نقل بين الحدود و والدي الله يرحمو بنى بنص من ارضو معمل الاخشاب هذا تسلمو بالاول اعمامي الاثنين الصغار ومن بعدها انا تسلمتو مع ولد اعمامي .. هالحين المعمل باسمي انا لاني ورثتو عن ابي وانا ولدو الوحيد وشغلو ماشي بصناعه الاثاث عنا حرفيين ماشاءالله حولهم بيذهلو العين كان والدي مشغلهم هينه من السبعينات وانا حافظت عليهم من بعدو وماتركتهم يروحو من هين .. والخشب الي نستعملو بيوفرو لنا من مكتب النقل لعمي الكبير وهيك متداول بينه شغلنا .. وعمي الثاني هو الي يشرف على خط نقل بين محافظات بلدنا يعني بالمختصر شغلنا منا وفينا

- ماشاء الله ربي يزيد ويبارك الكم بي

- ايه وانا حياتي ماشيه بين هالمعمل والمشيخه وهاي حكايتها طويله بعدين احكيها لك .. الحين احكيلك عن عايلتنه ككل وبعدها اصنفهم لك
- ماشي
- دحكي انا ماعندي غير هالاختين الي عرفتيهم مناسك وصفيه وزوجتي هذول الخط الاحمر بالعيله ماترفع عليهم حتى العين والحين انتي منهم ولك مثل مالهن ..
اعمامي الاربعه .. كامل الكبير وهو الحين مريض بفرشتو وسلطان الي يصغرو وعكاب وصخر هذول ساكنين اطراف حديثه
وعندي منهم اولاد عم خير من الله لان كل واحد من اعمامي متزوج ٢ و٣ وكل وحده ببيت وكل وحده عندها خير من بنات وولاد
ويشهد الله عندي بنات عم للحين مالحكت على شوفتهن سامع عندهم ومامدحكهن
- ههههه ماشاء الله
- يجيكي يوم وتعرفيهم زين .. وماقلك كلهم اجاويد بيهم الزين والشين
- هالشي عادي الناس اصناف
- ايه .. نجي على خوالي هين ركزي معي
عندي ١١ خال و٦ خالات
- ماشااااء الله
- تدرين كيف عايشين
- شلون!
- بالخيام
— مفهمت!
- خوالي بدويين انا من ام بدويه
- عزااا صدددك بدوي انته !!!
- اي بدوي وحديثي اثنيهن مخلوط عندي مادحكتي حكيي مره هين ومره هين
- هههه اييي .. يالله بدوي اوووف ربي
- هه وش فيك
- اني امووت ع البدويين احبهم احبهم بشكل ماتتخيله احبهم

ادحكلها وهي تأشر بيدها بالهوا وضحكتها علت وجهها وبانت دكه حنكها .. انا بس مبتسم ومتفاجىء كثر حبها للبدو ماظنيتها من بنت بغداديه تهيم بالبداوه هالكثر !
قلتلها ..
- يولو هيك حبك للبدو وانتي بنت بغداد وش دراكِ فيهم
- مو مهم شلون المهم اني وكعت بحبهم
- انا بخاطري اسمع حكايتك مع حديثه
- كملي بالاول ليش تكطع عليه السالفه من وصلت لاجمل شي
- هههه اييه يابه نكمل ..
ايه قلتلك خوالي ساكنين البدو ببيت الشعر
بالصحرا الي على حدود سوريا وهنيك خوالي لهم قبيله لحالهم كل واحد منهم جد مألف احفاد ولاد وبنات ..

ومنهم الي عندو زوجتين وثلاث واربع ومنهم الي عندو ميته وحده من زوجاتو وجاب فوكها ثالثه او خامسه ماتعرفي شجرتهم كيف خابطه من اصول ... والله انا من كنت امشي لهم اخلصلي ٣ ايام انا بس اسير على اخوالي من كل واحد عندو وجبه اكضيها وامشي للثاني ويصدف بيهم الاكيهم عند واحد من الخوال
وهيك انا ٣ ايام بس اسلم واعرف حالهم بالرابع انا ابدا اسير للبريه وادحك حالها
تدرين الخيمه الي نكعد فيها تطلع بطول
بيتنا مرتين وهالخيمه كل وكت تلكينها مليانه رجال اذا ماهو بغريب فتلكيهم ولد الخال وولد العم وهيك والله فلا يوم دخلتلها ودحكتها بيهه اربع ولا خمس رجال .. وكلها وكت الي امشي لبيت خال ثاني نصهم يمشو معي
- صددك ليش يجون وياك !
- يولو عجل كلهم ولد خالي وهمه يصيرو بينهم ولاد عم وولاد خال الديره هنيك مابيدخلها غريب لو عتب حد من حدودها بينساك لعند الشيخ هنيك وماينترك الا يعرف عن اصلو وفصلو ومنين جاي ولوين رايح
- امممم شلون حلو واكول ليش يطلعون استخبارات
- وش تقصدي!
- هيج سالفه ببالي اسفه قاطعتك كملي شيخ
- ايه اما عن خالاتي منهن الي موجوده للحين هنيك بديرتهم ومنهن الي طلعو لديره الشام
وماعاد عرفت عنهن شي .. وهيك عشيرتي متشعبه كثير الا انا عيلتي صغيره مافيها غير امي وهالاختين لان والدي مات على بكره وكت اختي صفيه حتى ماتذكرو كان عمرها
٤ سنوات وكت الي توفى
- الله يرحمه
- ويرحم موتاكِ .. الحين انا عرفتك عيلتي
وحكيتلك عيشتها لكن انا عندي اثنين ابغى اوصيكي فيهون
- من عيني وصي
- الشيخه امي هاي كل فؤادي تعمى عيني من النظر لو تضيك خاطرها بشي ماتكدري تخيلي كيف الها معزتها هين بهالكلب
لهيك انا ودي اوصيكي فيها انا ماودي تخدميها بشي لااااا والله ماودي هالشي انا ودي تأنسيها وتكوني لها خليله
- من عيني ليش هاي تحتاج وصيه
- انا عارف من اول انك كد ماانا ابغى اوصلو
- وشنو مبتغاك ؟
- بعدين تعرفيه .. لكن حطي ببالك انا عمري ماوصيت حد يكون خليل وصاحب لامي انا دايماً احب انا اكون هالشخص لكن هالمره ودي انك تكونيه .. وهااا خلها ببالك تراها ماهي بهينه هاذي شيخه كويه وحاده ذكى
وخلكها صغير لكن كلبها كبير فيها من التناقض كثير وبمعدنها جوهر مايصلو الا الي يعجب مزاجها
- ومنو كال اني راح اعجبها وتكدر تخليني هيج قريبه منها ! وبعدين يعني شنو الي تستفاده من هذا كله مافهمت ؟
- الفايده انا هين اعرفها بعكلي زين وانتي
يالتين لو دحكتك نجحتي انا بكعد احكيلك وش فايدتي من وصيتي لك فيها
- ان شاء الله اكدر .. بس سؤال الله عليك شيخ جاوبني بصراحه
- انا دايماً صريح يولو احكي
- ليش هلكد تثق بيه وبهالسرعه هم .. يعني مادري مستغربه بصراحه ماجذب عليك لان من جهه احس من شخصيتك وفكرك انك ماتنطي الثقه لاحد الا ماتختبره وتوزنه عدل بافعاله يلا ومن جهه اشوف اني ماسويت شي كدامك يستحق هالثقه كلها يعني جبتني لبيتك وحجيتلي عن شغلك وعائلتك ووصيتني بشي جبير واختاريتني بي من دون الكل ! ارجوك كولي ليش

وكفت السياره بازدحام السير ورجعت راسي وانا ادحكلها واتبسم وحكيتلها ...

- اسألي نفسك انتي ليه تثقي فيا ؟ ليه كلمتي عندك من احكيها تمشين عليها مغمضه ومأمنه وماتشككي فيها .. ساعه القلتلك عن حجابك مشيتي متطمنه منو كأني مراتك وساعه الاكلتي ووثقتي من كلمتي اني ادبر لك وجع معدتك على الدرب هذا كلو ليه !
عطيني جواب لالو وانا بجاوب سؤالك

صفنت على حكيي وصارت تدحك لعيني
وحكتلي ...
- لان ماعرف بس احس انك صادق وياي بكل شي و تريدلي الزين يعني احساسي يكولي انك ماتخذلني ابد وبالاخص انك حديثي اعرف صفاتك مااشكك بيها
- هاا يعني لاني حديثي وثقتي فيي
- يعني نص الثقه لانك حديثي والثاني لاني احس بصدق كلامك واني اثق باحساسي
دائماً
- ايه زين حلو هالحكي عجبني دامو احساسك مأشر لي بالثقه خليني احكيلك ان احساسي انا مأشرلك عليها بعد
- لااا عن الشقى ليش تثق بيه يعني انته ششفت مني بله اني ماشفت منك الا كل زين يكبرك بعيني بس انته ماشفت مني شي
- يولو انا اختبرتك و وزنتك بعكلي من كبل ماتفتحتي عينك وتدحكي علي .. انا نومتك بفراش شيوخ وانا كلبي مطمن من حكيك الي بوكت الهذيان انا عرفتك بنت اصول وكل حركه عملتيها كدام هالعين مازادتك الا عز وثقه عندي .. انا مقياسي غير عن ماهو تعرفي فاكتفي بأن بينه ثقه متبادله واخلصي

- ههه ماشي

- دحكي وصلنا اطراف حديثه

- بالله احس روحي بحلم مامصدكه رجلي راح تدوس ترابها من جديد

ضحكت وانا ادحكلها وهي لزكت بالجامه تدحك للدرب بعين حالمه ووجه مبسم

وكت الي وصلنا ديرتنا بلشت بالسلام على طول الدرب يدحكون لها معي ويرفعو يدهم بالسلام وانا اردو لهم لحين ما وصلنه كاعنا
دحكت رجال ملتمه عند باب الديوان .. اخذت
نفس مستعد لكثر الهرج لنص الليل ..

طبكت السياره وهي تدحك للبيت ومتمسكه بطرف عباتها الي كانت نازعتها ولامتها بحضنها .. فزت على صوتي وانا احكيلها..
- تين يلا ترجلي من عندك

دحكتلي بعين متوسله ومميله راسها ..
- مو تعوفني رأساً استحي عفيه
- ما عليكي بشي انا معك انزلي يلا

نزلت ورفعت يدي اسلم من بعيد على الرجال
الي كانت عينهم علينا .. مشيت لناحيتها وهي نزلت تمشي بهداوه بكعبها الي بس صوتو بالارجاء كلها هدئت وكت الي نزلت تمشي حدري بنعومتها بهالتنوره والكصيبه الي نازله عن خصرها وهي ماتدحك الا علي
وانا امشي عن يمينها واخذتها دخلتها للربعه
ودحكت امي كاعده هين ومعها حريم
وهي من دحكتهن رجعت لوره وختلت بظهري ..
انا تبسمت وانا ادحك لامي وهي عندها نفس بسمتي .. ترخصت ودرت وجهي عليها ونزلت لعند اذنها حكيتلها ...

- تين امشي حدري وماعليكي من احد زين

هزت براسها ومشت معي وانا اخذتها لغرفه امي .. كعدت على فراشها واشرتلها تكعد حدري .. واجت كعدت بمسافه عني ..

انا صرت امدد يديني وظهري تعبت من السياقه والدرب طويله .. كان ودي لو انام ساعه لكن هالديوان واكف على رجلو ينتظر
من الصبح انا هادو وماشي ...

دحكتلها ماسكه طرف كصيبتها وتلعب به باصبعها .. تبسمت على خوفها الي تخفي بالحركه ذي .. ناديت ..

- مناسك ياخيه احدري هان

رفعت راسها بعجل ودارتو ناحيتي ورجعت تدحك على الباب لحين مادخلت مناسك ..
- هلا بالشيخ هلا ياخوي كوى الله حيلك
- ربي يكويك وشلون حالك
- بالخير الحمدلله
- دحكي ياخيه انا بوصيك على ضيفتي خليكي معها لحين ماعاود من الديوان
- بهالعين اشيلها ياخويه ضيفتنا عزيزه على كلبنا
- ماتكصرين .. ابغى حين اعاود الاكي الراحه بمعانيها زين
- زين ياخوي تآمر

تدنيت لحدر التين وشاورتها ..
- انا رجالي بينتظرو بره من الصبح وجوب امشي لعندهم ..انتي تريحي ونامي ولحين ماعاود نجلس كلنا ونحكي

هزت براسها بانها تفهمت وانا كمت طلعت ومشيت لحتى اغسل لاكتني ام جراح
- كوى الله حيلك ياشيخ
- الله يكويكي وشلون حالك
- بخير ونعمه .. الا وين كنت من الصبح رجالك ينتظرو عند هالباب
- كان عندي شغله بعيده كضيتها ورديت
- وهالبنت ليه عاودت معك
- ام جرااح البت امرها عندي ماتسألي حرف عنو زين !
- ايه ياشيخ زين

تركتها ومشيت لعند الرجال وبدا صوت السلام من عند باب البيت يعلى لحد مادخلت الديوان وكعدت بينهم ..
بعد ماتسالمنا كلها سألتني عن غيبتي عنهم هاليوم وانا اردهم ب..
الواجب يحتم علي هالغيبه

وبدأ الحكي باحوال هاليوم والي يطلبوه من شور وحكم وكضينا صلاه الغروب سويه
ومن بعدها تعشينا والي مشى لاهلو والي ضل لحاجه عندو خاصه يحكيها وماعاودت
للبيت الا عكب الساعه عشر بالليل ..

وكت دخلت للربعه ناديت ...
- يهالحريييم احدرو هان

اول مادخلت امي .. مشيت لعندها بوست راسها ويدها وختمت يومي ببسمه رضاها
وبعدها دخلت ام جراح وصفيه وانا زتيت عباتي وكعدت وسألتهم ..

- ضيفتي وينها ؟
ام جراح - الحين تصحيها مناسك وبتجي
-ايه زين

انتظرتها لحين مااجت رفعت راسي ادحكلها بعد ماسمعت صوت سلامها الناعم الي غريب عن اذني لهالحين ..

كانت مغيره ثيابها ولابسه ثوب طويل اسود ومطرز بالوان وشكلو عريض عليها شوي وبارزه عظمات ركبتها منو ..

كعدت حدر امي ولزكت فيها تبسمت وانا احكي بداخلي ..للحين تخاف من دونا ..

فريت سبحتي وحطيتها بالكاع بشكل حد مستقيم هاذي حركتي وكت اريد احكي بشي مهم ... وكلها تفهمها وانصتت لي وعينها علي ..
حكيتلهم ....

- انا هالحين جمعتكم لاجل امر يسرني ويشرح صدري و يرفع راسي لو انكم عملتوه على اصولو لاجلي
- ان شاء الله الله يكدرنا عليه يابني وش هو
- ان شاء الله ... يا شيخه انا اخذت قرار بدون درايتك لكوني اعرفك راضيه عنو
- فهمتك يابني بارك الله بيك زين ماسويت
- البركه فيكي .. اسمعوني زين ..
من هاليوم انا صار عندي ٣ خوات .. اخيتنه زهرا من هالحين هي بينه مكانها وبيتنا بيتها
الها وعليها مثل ماهو لكم وعليكم ..
رضاها من رضاي واحترامها من احترامي
الي تقلل منو عندها معناه انها تقللو مني
انا تأمنت عليها وانا ماخون الامانه واعرفكم بعد ماتخونو الامانه لهيك انا بأمنها بينكم لو اني مشيت لشغلي او سافرت او مت هي تضل هين معززه ومدللـه بينكم وهالحكي
توصلون لكل من يزورنا ويسأل عنها بتحكولو انها اخيتنا المدللـه وحكيي هاذ بالحرف تنقلوه لعماتنه لاني اعرف انهن بالزايد يومين وبيزورو بيتنا يسمعو خبرها
وانا ماودي اسمع غير حكيي الي اناا قلتو الحين عندهم لان همه بدورهم بينقلوه لغيركو وانا ودي كل ديرتي وناسي تعرف ان في بيتي حرمه تسر خاطري برضاها بينا
مفهوم هالحكي ياحريم

— ايه مفهوم ياشيخ
- زين .. يمه انا ودي اخصص الغرفه الثالثه الي فوك لاخيتنه ومن بكرا انا بشوف لها اخشاب تليق فيها
- اي يابني زين ماسويت
- يمه ضل عليكي الفرش ولوازمها بكرا بتنزلي السوك معها وعلى مد عينها خليها تشتري .. ماتنكصي عليها الابره كلو جديد لها تاخذينو والفلوس بتصلك الصبح كبل ماطلع
- بعون الله يمه

- وانتي ارسلي لحد من الي تعرفينو ينظف المكان ويهيئو لاني بالزايد يومين واجلب الاخشاب لهين
- ماتشيل هم كلو امرو كضى عندي يابني
ماتوصي
- يمه بعينك شيليها بعينك لو كصرتو معها انا بطلع بالوجه الاسود كدام ربنا وابوها انا عاهدت كدامهم اني اصونها لكطع النفس الحرمه مشت وياي بثقه وامان تفهمو وش اماان .. انا تعبت يلا حصلتو منها ماتهدمو بتكصير منكم لها ترى والله تشوفو مني مالي عمركم ماتخيلتوه عندي من غضب من هالحين الكل تسمع
كل شي اسامح فيه الااااااا زهرا هين مابينفذ من عقابي حد كريب كان ولا بعيد
- يابني تهدا وسمي بالرحمن هاذي بنيتنا محفوظه ومستوره بينه ماعليها شر تطمن
انا هين لليضرها شوكه اكف بلهاتو ماتخاف امانتك محفوظه بينا
- الحذر واجب يايمه الحذر واجب
هالحين انا بصعد انام تصبحو على خير
- نومك هني يابني

كمت مشيت لعند الباب ولمحتها تدحكلي
وصلت لعند الدرج كضبت المحجل وماهلي اصعد ناديت عليها ..
- تييين احدري هان ياخيه

شويه واجت لعندي وكفت كدامي ورفعت راسها تدحكلي قلتلها ..
- كأني حسيت بنظرتك الي لمحتها في حكي ماهلي انام من غير ماسمع وش هو

تبسمت بخجل وقالتلي ..
- ردت اكلك ان هذا هواي كلش الي وصيت الشيخه عليه اني ماريد شي والله خليني انام بغرفتها ومامحتاجه شي ثاني
- يولو انتي تكذبين علي عينك عينك
- اني لا والله بشنو اجذب !!
- عجل انتي هين بطرك ثوبك وتحكيلي مامحتاجه شي !
- اي هو يعني هذا شي بسيط اني اكدر اشتري بغير وكت مامستعجله عليه
- هاا .. ايه عجل بكرا انزلي السوك واشتري من مانعك
- اي بس انته كلت اخشاب وفرش وهالسوالف يعني مالها لزوم شيخ اني ماحب اكلفك واتعبك وياي
- يولو هاذي خصوصيتك لزوم تاخذيها بهالبيت
- ابقى ويه الشيخه ارجوك ماريد هالخصوصيه
- ان انتي ماتبغينها الشيخه تبغاها يولو انتي بعدك ماتعرفي ان غرفه الشيخه ماهي بفارغه كل يوم وكت جمعات حريمنا كلو عندها وانتي وين تنامي !! هاا مافكرتي بهالشي لكن انا افكرلو وهالقرار انا اخذتو ماينزلو رفضك زيين !
- ماشي زين
- عندك شي ماحكيتي
- هو اي ردت اكولك شُكراً لكل هالكرم وياي

انا هين من اسمعو لهالحرف منها اعرفو ماهو بزين عندي واتفاداه لكن هالمره خش في بالي اسمعو واركز فيه بعد .. تدنيت حدرها وهي دنكت راسها وانا حكيتلها بصوت ناصي ..
- وش حكيتي ماسمعتك زين

كنت ادحكها وهي منزله عينها بخجل وكاضبه طرف كصيبتها وحكت ..
- شُكراً لكل هالكرم شيخ

كنت مركز على حركه شفاها وكت تنطقو بتدخل لفمها وتكسر الكلمه بصوت هادي قريب لصوت دلع البنوتات الصغار مامسكت ضحكتي الا بالكوه وحتى مارديت عليها تركتها وصعدت على الدرج وانا ضاغط على شفتي لاضحك كدامها .. دخلت غرفتي وزتيت العكال على الميز وانا محرر ضحكتي
ودخلت علي ام جراح وحكت ..
- وش هاذ الي نال ضحكتك ياشيخ
- امر في بالي
- يابختو والله
- الا جراح وينو مادحكتو اليوم
- ويه ابنو لولد عمك كان يلعب ونام عندهم
- ها زين زين

ذبيت دشداشتي ودخلت الحمام غسلت وزلت تعب اليوم من جسمي وطلعت تمددت على
فراشي وانا عيني مثكله للنوم واسمع ام جراح تحاكيني وانا اغفي لحين ما نمت وانا مدري وش حكت معي ...

كعدت ثاني يوم على صوت الاذان لبست ومشيت الجامع صليت معهم الفجر وقرينا القرآن لساعه بعد الصلاه وعاودت البيت
تريكت مع الوالده وعطيتها الفلوس ووصيتها عليها وطلعت للمعمل اتفقد احوالو ..

عاودت وكت الغدا للبيت وبعد ماتغدينا دحكت تينه تمشي مع امي مثل خيالها ان كامت تكوم وان كعدت تكعد ..

مشيت انا لعند غرفت امي وناديت لها اجتني وكعدت حدري قلتلها ..
- ها يمه ابشريني كيف دحكتيها اليوم معك
- مثل النسيم بارد ومالو حس وخفيفه يابني على كلبي خفيفه
- اي بالله صدكتي
- دحك يابني اليوم وكت ماطلعنا للسوك
كل من تلاكيني تسألني عنها بالله حتى البت طفش خلكها منهم
- ايه وانتي وش تكولي
- انا وش اكول بعد غير انها بنيتنا وضيفه الشيخ
- ايه زين .. خذتيلها كل لوازمها يمه ناكصها شي ؟ فلوس كفتك !
- دحك يحكيلي فلوس ! يول انا نصهم رديتهم معي ماخذت شي البت نفسها عزيزه
- يمه وش هالحكي وش ماخذت
- وحك الله ماخذت غير فرشتين وبرده ومن بياع القماش خذت قطعتين ومارضت الا اللون الاسود قال شو انها ماتهوى غيرو من لون وخذت لوازم داخليه وعداه مارضت حتى انها تدحك للغرض والمحلات الي حدرها وبعدها مشينه لعند الخياطه وهنيك لاكت ثوب مخيطتو اسود واشتريناه من عندها وهاذ وينو تدحكها لابستو
- مو حك هذا مو حك .. انا عطيت ووصيت ليه ماتمشي بوصيتي
- والله يايمه انا علي سويتو اخذتها وخليت كدام عينها كل زينه وهي مارضت
- ليه يايمه لييييه ماعرفتي منها
- اي سألتها تحكيلي ان نفسها ماتهوى حاكيها انت جايز انها ماينه عليك ازيد مني
- ايه بحاكيها لزوم احاكيها .. من رخصتك

كمت مشيت لعندها بالربعه كاعده لحالها
وكفت حدرها وقلتلها ..
- تين دحكي علي
- نعم شيخ
- يولو وش هالسويتي اليوم انا هيك وصيتك

- شنو تقصد مافهمت؟

كانت واكفه حدري وتدحكلي ..
- يولو انا وصيت انك تاخذي كل مايلزمك وعطيت مايكفي لجهازك من راسك لجدامك
ليه ماخذتي شي ورجعتي الفلوس مع امي
هيك انتي بتكسري كلمتي ووصيتي عندك

تبسمت ولا كأنها بتسمع بهذله مني وحكتلي
وهي تأشر بيدها ..
- شيخ ممكن تكعد ونحجي على راحتنا
- ايه احكي علميني وش بلاكِ هيني كعدت

كعدت حدري ولافه جسمها ناحيتي وتدحك لعيني وتبتسم من تحكي بهداوه ..
- ياشيخ اني ماكسرت كلمتك ولا عصيت امرك ووصيتك ..انته كلت اخذ كل الي يلزمني واني اخذت على كده .. اني من البدايه كلتلك مامحتاجه شي اني مكتفيه حتى
بالقطعه الوحده الي اجيت بيها وهذا كان زياده الهن واخذتهن واني مكتفيه ومالازمني اي شي ثاني ليش ضايج
- لكن انا ما هيك ودي تعملي .. انا ودي ادحكك بابهى طله وزينتك من احسنها وغرفتك مليانه بكل مايتمناه غيرك

نزلت نظرها ورجعت دحكتلي وحكت ..
- شيخ احجيلك شي
-ايه
- اني مايهمنى الغوى هذا كله تره اني شبعانه منه عمري كله كضيته بارقى لبس وعطور وكشختي ماقلت لابليل ولا نهار .. شايف هالشعر ماجان بيوم فارغ من الزينه الي كلها لولو وكرستالات ولا ايدي فرغت من الاساور والمحابس بيوم ذهب وبيوم فضه وبيوم الكزاز الملون وحتى اظافري كل يوم اصبغها حسب لون الملابس الي جنت اتحير بينهم من كثرتهم .. البنات جانو يشترون اقلام كحل بكم فلس واني عندي مكاحل مطحونه ومزيته حسب الاصول ..شعري ماامشطه اذا مو بزيت ورد ملكي عن اب وجد توارثته
ممكن مايعنيك كثر هالكلام الي كلته بس حبيت ابينلك نوع عيشتي قبل حتى تصدكني وتفهمني من اكلك هالغوى واللبس والاحتياجات هاي كلها ماتلزمني اني مو بحاجه الها حتى اعيش .. ولاني جربتها وشبعت منها فاليوم اني مو ماشوف الها قيمه كبيره تكدر تنطيها لحياتي الجديده .. اني اريد اعيش ببساطه وهدوء من دون اي تكلف

كنت اسمع حكيها وانا ادحك امي وام جراح ومناسك واكفات عند الباب يدحكن علينا ويسمعو حكيها .. بداخلي زدت بيها فخر وكشفتلي عن كبير عزها ورقيها بنفسها عن ملذات الدنيا .. قلتلها...
- والله والنعم منك ومن اصلك .. وانا ماكنت قاصد شي غير اني ودي تضلين مدللـه ومايتغير عليكي شي هين
- مادام عندي هالاهتمام فاني مدللـه

ابتمستلي وانا قلتلها..
- عجل السواد وش قصتو ليه مادحك لون غيرو عندك ؟
- كلتلك اني اكتفيت ونفس الوكت لاحظت اليوم عين الناس عليه عبالهم اني صغيره من نعومتي وماحبيتها بصراحه فقررت التزم بالسواد وابعد هالانظار واعيش براحه بال

درت راسي لعند امي وانا اتبسم واعدل بشواربي وهي بعد تبتسم بفخر رجعت دحكتلها وقلتلها ...
- وعز الله الا ان من رباكِ رجل ما مثلو رجل ..انا الحين زايد فخر فيك اكثر من ابوكِ لو انه كان حاضر وسامع حكيك يسلمك الله ياخيه يسلمك الله

تبسمت بخجل ونصت راسها وانا حكيت ..
- دحكي يمه وش جبتلك من رزينه عكل في بيتك
- بنت الاجواد يايمه معروفه من صوتها ومشيتها وهاذي عاكل ازيد من الي انته توصفو لي وبتثبتلك الايام

كنت اتبسم بفخر وراحه بال لكونها مرتاحه وماكاصر عليها شي ولكون الي في بيتي بنت اجواد مو حي الله بنت فرحان كوني لكيتها

صعدت نمت الظهيره وانا خالي البال مرتاح
وليوم كلو كضيتو براحه وصدر مشروح
ولثاني يوم رحت للمعمل وكنت ابغى اتفكد الاخشاب الي طلبتهم لها ودحكت باقي من صبغها كثير .. عفتهم ورديت البيت
وبعد الغدا دحكت عينها تلاحكني وهيك انا افهم انها ودها تكلمني بشي ..

مشيت لغرفه امي و وصيتها تجلبلي الجاي لهنيك ..
كعدت انتظرها لحين مااجت وحطت الصينيه كدامي ووكفت .. قلتلها...
- تينه اكعدي هين تريحي انا جيت هين لخاطر اسمعك

كعدت حدري وضحكت وقالتلي..
- حلوه هالصفه بيك تفهم المقابل من عيونه
- الغير انا اتعبهم بالحكي الا انتي انا ادورك متى تبغي تحكي .. الحين احكيلي وش امرك
- شيخ وظيفتي خايفه من امرها
- وش بها
- مو اني هسه ينحسبلي حوالي ٦ شهور متغيبه عنها بدون عذر رسمي ولا دزيت خبر بيد وحده من الموظفات حتى تبلغهم عني واخاف عليها تبعات قانونيه ممكن تسألي عنها لو مايتعبك هالموضوع رجاءاً
- سهله ابشري لليل انا اجيبلك الخبر

ضحكت وبانت دكه حنكها وهي تحكيلي بلكنتها الفريده ..
- شُكراً

اجتي بوكتها ام جراح وعينها عليها وهي ترخصت ومشت من عندي وابتدت اسألتها لام جراح ..
- شيخ السموحه منك لكن مانك مزودها معها
يعني هيك لزوم تنفرد فيها كل حين
- ايه لزوم كون في مواضيع ماحب غيري يسمعها لهيك بنفرد فيها
- ايه ولييه كل هالاهتمام عليها مانكاصها شي والحمدلله ليه تدقق عليها كل حين
- الحرمه بامانتي وماتعرف غيري كيف مااهتم فيها
- الا هي وش كصتها سمعت انها حامل عجل وين زوجها
- وانتي وش خصك بزوجها يامره مالك خص فيها كل العليكي تكومي بواجبها
وتجفين شرك عنها
- الله يسامحك اي شر هذا الي انا عملتو لها
هي شاكيتلك عني !

- هالحين انا كلت انها شكتك ! ليه بتخربطي من حالك بالله عليكي خليني اشرب هالجاي وانام براحه سدي ع السالفه

اشرتلها تمشي وانا اشرب الجاي وراحت وهي متكدره ...
وكت ماكعدت بالديوان ارسلت من يسأل عن امرها ولوكت الغروب اجاني الجواب ولليل وكت رديت دحكتها مع الوالده بيتسامرو وهي ضحكتها عاليه وجهها .. وكت الي دحكتني جيت كامت وكفت سلمت علي وبعد ماكعدت هي كعدت ..
- كيف حالك ياشيخه
- نحمد الله يابني بكل خير
-عساكِ دايماً وانتي ياتينه كيف حالك مرتاحه هين
-الحمدلله مرتاحه كولش
- يمه تذكري والدي الله يرحمو وش كان يحكي عن اهل بغداد
-اييه وشلون ماذكر
-تينه والدي كان يحكيلي ان البنت تعرفها بغداديه من شغلتين
- اي شنو

ادحك امي تضحك وحاطه يدها على فمها وتدحكلي وانا اضحك وقلتلها..
- كان يحكي انها تنعرف من كوره فمها بالحكي ومن رفاع اصابعها وطولها
- ههههههههه كولش مركز
- ههههه دحكيها يمه وين في مثل لهجتها بالله
- هههه بالله صدكت مفرده فيها
- شيخ يعني هسه اني مكوره بالكلام هيج مبين عليه
- ايييه حيييل
- ياا يعني مبالغ بيهه او عاديه
- كيف الشيخه وش رايها
- انا يابني ادحكها زينها كونهم كلهم هيك
مكورين الفم وكت الحكي
- هههههه والاصابع شيخه لاتنسيهن بس شلون مركزين صدك هو اغلب الي اعرفهن صاحبات اصابع رفيعه وطويله اكثر تصير بطول اظافرهن
-ايييه هو هين المغزى هالاظافر يكصدها الوالد انكن طوال الاصابع بطول الاظافر
- ايييي بس لا تكرهوهن
-لا يمه ليه نكرهن كلمن وكيفو وبيئتو

دحكتلي تنتظر جواب وانا قلتلها..
- انا ما مدحكهن لاكرهن .. دحكي تين جبتلك الخبر
-صدك شيخ فدوا لعينك كولي شنو

تبسمت وانا ادحك لامي الي تضحك بسكات
كونها مستغربه ناعم صوتها ولكنها مثلي
درت وجهي عنها وحكيت ..
- الحاصل من الخبر ياتينه انك لزوم ترجعي لمكان عملك وتنظري وش مصدرين في امرك وبالمضمون خلها في بالك انك خسرتيها للوظيفه باتميتها
- اممم مو مهم خليها تروح اصلاً ماحبها
بس هسه لازم يعني لازم اروح مابيها مجال !
- لااا لزوم تمشي لعندون وتنظري وش الامر المرسل لهم عنك
- وشلون شيوديني
- اخذك انا ماتهمي
- شيخ وشغلك والديوان كلهم يتعطلون
- ويتعطلو انتي اهم منهم تين

دحكتلي هالنظره العدتها منها تصير كانها تتمعن بمعالمي وبعدها تحكي بهداوه ..
- شُكراً لكل هالاهتمام شيخ
- دحكي يابه مايلزم تشكري بكل سالفه يكفيك تضحكي
-هههههههه
-ايه هيك خلك

ميلت راسها لكتف امي وتمسكت بيدها بخجل
وانا اتبسم على حالها وامي تمسد على كتفها

اخذتها ثاني يوم لبغداد وطلعنا من الفجر وكت الي دخلنا شارع الرشيد كانت تحكيلي عنو
- شيخ شايف هالشارع والشوارع الي راح تتبعه هاي كلها اني جنت افتر بيها يوميه بعد مااكمل دوام كليتي واعرفها ركن ركن
- كأنها روح بغداد
- اي بالضبط هنا بغاده اصليين بيها
- تدرين انا الحين من اسمعو لحكيهون هاد المكور صرت ماستغرب حكيك
- ههههه لا تستغرب حجيي ولكنتي الزايده بالبرود والمياعه تره منطقتي كلها هالشكل
- هاا من اي منطقه انتي ؟
- من باب الشيخ لو تسمع صوتهم ولكنتهم ااكدلك تضحك اضعاف ماتضحكه على صوتي الي احاول ماخليه مثل مامتعوده
- لااا بالله في هيك انعم من هذا كلو
- مو قضيه انعم بس اللكنه ومخرج الصوت
- والحين انتي بتحكي مثل اهلك ولا بتغيري
- لا اغير طبعاً
- ليه ؟
- لان المكان يتطلب هالشي ماحب اكون موضع انظار الي حولي لذلك اتجنب قدر الامكان لكنتي
- ههه تين بالله عليكي معي خلك بغداديه اصيله ماتغيري فيك شي
- لاااا بالاخص انته شيخ ابد مستحيل
-ليه يولو
- تضحك بسرعه اعرف بيك
- من اول مرتين ايه بعدها بتعود عليها
- لاا نلغيها احسن لامره ولا مرتين
- تيييييين
- نعم شيخ
- لااا بلكنتك
- ههه ما
- وشو ؟
- قصدي لا
- هههه لا بالله عيدي وش حكيتي بالاول

كانت تضحك وخلت اصابعها الناعمه على انفها بميلان وهي تضحك ..
- تيييينه ليه ماتسمعي كلمتي من المره الاولى
- ماا استحي شيخ
- زين خلي نتفك على شي
- اي شنو
- الحين نسد السالفه لكن ودي من تحكي بشي ثاني تحكي بلكنتك ودي اسمعها منك وماضنك ترديني
- ههه تمام
- زين الحين منين هالمصرف
- قريب مابقى شي .. شوف شيخ هالقُراء هذوله بدونهم هالشارعين الرشيد والمتنبي مايسوى شي
- ايييه عجل هم لبتو
- اي شلون لعد عيوني هذوله روح هالشارع
اني ماعرف امر بيوم من هنانه اذا مو اشتري من مكاتبهم واوكف على بسطاتهم اتصفحلي كم كتاب من عدُهم

كنت انصتلها وهي تحكي باريحيه .. بحيث
صوتها فرق صار اعلى لكن مستخدمه هالواو كثير والكلمه تحكيها بهداوه وتعطيها تاكيد ماتحكي ع الماشي هيك لا بتعطي لكل كلمه حكها وتخليك تنسط وتتمعن معها بالكلام
كملت حكيها وانا ماقاطعتها بشي ...

- باوع هالبياع صديقي
- من بياع البلبي هذا؟
- بلي هو هذا كل شتا اني اكل عنده ونسولف شويونه واني اكُل .. تعال نسلم عليه

تبعتها وهي مشت لعند عربانتو البيضه وكفت حدرو وابتسمت ابتسامه عريضه وحكتلو ..
- يسعد صباحك عمو شلونك

تبسمت من صدك هالحرمه ماتكذب وكت حكت ان صوتها تغيرو عندنا .. هالحين غييير عن هالكانت معانا متحفظه بصوتها ولفظها وقليله حكي ... دحكت لنظرتو المليانه فرح وكت شافها ونزع طاقيتو احتراماً لالها
وحكالها ...
- يااهلاً وسهلاً عمو شلونج شلون صحتج احوالج وين هالغيبه كل يوميه امُر من هنانه ماشوفج ولا لحكتي على المرطبات التازه شلون سويتها اييااااه تلوك لهالحلك
- هههههه حرامااات فاتتني واني منتظره الصيفيه حتى اضوكها
- دتعالي ضوكي هالبلبي شلونه تازه تهديره الصبح
- ايييي عمو ريحته تشهدله دصبلنه بلا زحمه كاستين
- اييي تدللون اغاتي شلونك

يدحكلي بوجه مبسم وهو يصب بالكاسات
- الحمدلله كوى الله حيلك ياعم
- يعزك الله اغاتي من وين بلا زحمه
- انباري انا
- يااااا اهلااااً وسهلااااً باهل الانبار يابه نورتو بغداد على راسنه نحطكم اهلنا عزاز والله
- يعز غاليك يابه

ادحك للتينه تضحك وتنصي براسها لحين ماعطانا الكاستين حكتلو ..
- عمو بلا زحمه من يمك الحامض دا احُط للشيخ
- اي عمو صارادللي وهذا الحامض لعيون شيخنا اليوم ضيفنا انباري اليوووم شلون استفتاح حلو بهالوجوه الكريمه الطيبه اليوم اني ملك اليوم

ضحكنا لفرحتو فينا ونفسو الطيبه وحتى هالكاسه كانت تذوب بالفم من حلاتها وانا طلبت الثانيه وهو يزود عليها ويرحب كل شوي فيني ويحيي باصلي .. ووكت كملنا فتح جدر ثاني وحكالها ...
- ها يزهرتنا اليوم ماسألتي على محبوبك
- لاا عمو معقول انساه ! اذا ماختمها بهالمدبس النص مُر ماتكمل عندي وداعتك

دحكتها وهي تلتاف لجهتو وهي فاتح لها القبق وهي شمت البخار ودحكت هذا شلغم وريحتو فاحت دافيه .. وهو عطاها الشوكه واخذت تغمسها فيه وتختار وهي تضحك معو واخذت قطعتين واجت لعندي قدمتهن لي بفرحه وانا مارديتها رغم اني ماحبو لكن اخذت وحده منها والثانيه دحكتها اكلتها بطارف اسنانها
وصارت تهوي على فمها من حرارتو وبكل هذا هي ماتركت بسمتها وتعابير الفرح عليها
ردت احاسبو حكتلي ...
- لاااا مايرضى والله اني اتصرف
- وش تصرفي يولو اسكتي
- امم كيفك

حكتها وهي واثقه من كلمتها وانا مشيت لعندو وسألتو ..
- كم تطلبنا ياعم
- شنو هالحجي اغاتي هاي سالفه بله انتو ماتدفعون شي انتو تشيلون هالعربانه وتمشون كدامكم كلها
- لااااا ياعم والله مارضاها اكرمتني وضيفتني وهذا رزقك منو مارضاها والله
- من رخصتك اغاتي

دفع عربانته ومشى وهي تبعتو وكفت ضحكت معو شوي وعطتو كيس صغير
ورجعت لعندي انا قلتلها ...
- يولو وش هالهرج ليه هيك
- مو كلتلك مايرضى ماسمعتني
- وانتي كيف رضى ياخذ منك هالكيس الي مدري وش به
- كلمن اله طُرقه عيوني لعد صديقي ونتحاجى كل يووم ومااعرف شلون اعوضه
- بالله عليكي احكيلي وش حكيتيلو
- ههه شوف عيني شيخنا اني جنت من قبل احضر كم جُكليته على حامض حلو وحلقوم واشدهن بالجيس هالشكل واضمهن اله واكوله
هذني حلى للجهال ومرات اخلي بيهن دراهم
وهالمره هم سويت نفس الشي
- والله مانك هينه والله وعزو لالله مانك هينه
- شلووون لعَد الاسلوب كلشي نحصل منه لو عرفنا نستخدمه شيخنا
- تعرفي انا عجبتني اللعد بلكنتك
- ههههه مانتبهت اخذت راحتي وياك بالحجي
- ايه وش عليه
- وصلنا المصرف

دخلنا المصرف وهي هينه خفتت ملامحها
ومشت منصيه راسها لعند غرفه المدير
انتظرنا شوي ودخلنا وهو اول مادخلنالو قال..
- ياااهلاً وسهلااااً خلص السباات عند حضرتج شرفتينا عيني

رفعت عينها تدحكلي بارتباك وانا حكيت
- عمي الله بالخير
- الله بالخير منو حضرتك
- انا اخوها وما رضاني هالتعامل لو بالاول تسمعنا كبل ماتحكي
- ايي عيني اكعدو بله خلوني افهم شسالفتكم اريد افهم احنه مفتحين بنك لو بسطيه خضره
اكُعدي دكعدي واحجيلي مو انهجمت من وراج
- ياحضره المدير هالله هالله علينا
- اخي اني مشعول اهل اهلي الا هيج احجيلكياهه النقابه تفتر فوك راسي كل يوم
واني الي واكع بيهه اختك وين جانت هالشهور ليش ماراجعت على وظيفتها
- ظرفها ماسمح لها هي ماتهاونت لكن الوضع ماساعد والبني ادم اشكال تمر عليه
- هي ماكدرت انته ليش مااجيت وبلغت بشي عنها
- كلمن عندو سرو وعذرو
- استغفر الله واني شلون بيه بهالنقابه
شوفو عيني وظيفه ماكوو بعد زييين عيني
- ايييييه فهمنا الحين عليها شي ولا نمشي
- هههه لاااا يابه لااا وين تمشووون ماصدكت لكيتكم صارلي شهرين ادز على عنوانها وحتى عند الشرطه مخبرين عنها
- وش لزوووووم وش هالحكي انته شجاريلك
- الخاتون عليها امر قضائي ماجبته من جيبي
هذا قانون ونمشي عليه هسه راح اخابر رئيس اللجنه الي متفرعن فوك راسي وخلي يجي ويشوف شغله وياهه

هالمدير كان عصبي وايدو ترجف من كثر اعصابو وانا ردت اهد عليه اكضبو من خوانيكو لكن وكفني عنو كضبتها لعباتي وهي خايفه والدموع تصب من عينها وتدحكلي
.

#شقراء_بغداد

بارت_٢٨


تمسكت بطرف عباتي وهي تدحكلي وتبكي
وانا هين شعلت ناار وحكيتلها وانا صاك اسناني ...
- تين بطلي بكي لا ادفنك انتي ومعو
ماانا معك ليه تبكي وتخافي
- شيخ شسوي هسه وياهم شسووي
- بطلي بكي وانا اتصرف ماعليكي

درت وجهي لعند هالمدير وقلتلو ...
- ايييه وين هاللجنه الصرعتنا عليها مادحكهم هين
- هااا عيني شكلكم مستعجلين مو بالله
- اي والله صدكت دكلهم هالتلفون خلهم يستعجلو بجيتهم
- ايييي صاار يابه ليش لااا خليهم يجون ويفكوني عااد بزعتو روحي
- اي بالله بزعنا يلا دكلهم

كنت استفزو لحتى ماينفخ ريشو علينا وهو حكى معهم مره ثانيه وبعدها بدقايق اجوي اثنين رجال وبيدهم ملفات .. وهالمدير حكالهم..
- يلا يابه هذوله همه وشوفو شغلكم وياهم وفكو عني زيين

دحكلي واحد منهم وقلي ..
- تفضلو وياي بلا زحمه

طلع كدامنه واحنه تبعناه لمكتب ثاني كعدنا ثلاثتنا مقاربين بعضنا وهو كان بيفرش اوراق كدامنه وبعدها حكى ..
- شوفو عيني هاي الاوراق هي الاوامر الي صدرت بحق الاخت هذيج الشهور
اولها عدم دفع ديون متراكمه حول القرض من خمس شهور وهو باقي عليه بس شهرين
ليش هاللاموبالاه ممكن اعرف من حضرتج

رفعت راسها ودحكتلي وبعينها الحيره
ومن بعدها حكت ...
- اني ماناسيه امره بس ظروفي ماسمحتلي بعد ان اداوم
- هذا قانون اختي وظيفه دوله هاي مو عذر هذا لهالتصرف تدرين هسه عليج دفع الدين نقداً وتنتظرج مسائله للجنه تحقيقيه تأديبيه
حتى تنظر بموضوع التغيب عن الوظيفه لكل هالشهور

قبل ماتحكي شي انا حكيتلو ...
- الديون امرو سهل بيندفع الحين .. وهاللجنه كيف نصلها وايمتى
- انتظرو لباجر يتواجدون من ساعه ١٠
وهذا العنوان ورقم سجلها الخاص
- جزاك الله خير يارجل
- واجبنا هذا .. وهسه امشو للحسابات ادفعو الدين المتراكم حتى تسهل عليكم بجلسه باجر ان شاء الله
- ان شاء الله ..يالاخو ولو تعبناك لكن ماتكدر تفهمنا وش بيصير بجلسه بكرا ..اكيد مارين بهيك حالات وتعرفو وش الحكم فيها
- اي طبعاً هو على الاغلب الي ماشي عدنا
سجن شهر للمتغيب بدون عذر رسمي لان يعتبر الموظف اجير عند الدوله وبهالتصرف يعتبر تهرب وتخاذل عن العمل واله حسابه
طبعاً

دحكتلها شهكت وخلت يدها على فمها وانا حكيتلو...
- وغيرو
- شوفو تره الوظيفه انسوها منا بعد انكطعت عنها وبعد ماعرف اذا يسوون الها تجميد لملفها الوظيفي اذا ابعدوها عن عقوبه الشهر الواحد.
- مايهم اذا لغو ملفها المهم نخلص من هالحال
- اللجنه تقرر بعد
- مشكور يالاخو مشكور .. من رخصتك

وكفنا لحتى نطلع وهو كام وكف حدري وشاورني ..
- خلي فلوس جوه ايدك يجوز يحولوهه دفع غرامه اذا تعذرتو بشي يسوه

حكاها ومشى لمكتبو وانا ترخصت واخذتها ومشينا طلعنه وهي ماحكت شي .. مشينا طول الشارع وهي سارحه بفكرها وانا امشي حدرها وادحكلها كل حين وهي ماخلت عينها علي .. ضلت تمشي لحين ما وصلت لساحه كعدت هنيك على الارض وانا مشيت كعدت حدرها وادحك للناس تتمشى بهداوه هينه ومتبسمين ومتأنقين وادحكها هي سارحه بفكرها تالي قلتلها ....
- تينه وين سارحه دحكي علي احاكيكي

ماردت علي وخلت يدها على راسها ودنكت بقهر وصارت تضغط على راسها وبعدين قالتلي ..
- شنو المضموم بعد شنو الي مابقى ويصير
- اذكري الله ياخيه السالفه ماتستاهل كل هالحزن
- مخنوكه والله احسها جبل على صدري
اني بيا حال واضل افتر بين اللجان واتعذر لفلان وعلان والله مابيه حيل مابيه
- كوي حيلك وشدي همتك هذا حكك لزوم تدافعين عنو انتي ماذنبتي بشي لاتضعفي
- هو لاني ماذنبت بشي مقهوره صعبه تره وكفتي هيج بينهم
- انا معك ياتينه ماتخافي وبعون الله تسهل انتي مظلومه وربك ماينسى عبدو يسهلها ان شاء الله
- الله كريم ان شاء الله هالمره تعدي سلامات
- ان شاء الله .. دحكي كيف نسيتينا نمشي للحسابات وندفع الفلوس
- اي والله نسيت انشده بالي ..هسه اروح ادفعهن واجيك ماتاخر
- وييييين يولوووو ويييييين
- شنو وين
- انتي كانك تدحكيلي بالعين الصغيره
- لااا حشاك شيخ شنو هالحجي
- عجل تمشين تدفعين ولوحدك وانا اضل هين ! وش لزوم جيتي معك عجل !!!
بالله ان عكلك ضرب
- لاا شيخ شنو هم تريد تدفعهن
- خلك من هالسالفه الحين امشي يلا كدامي
- لااا لحظه تره والله ماقبل تدفع الفلوس انته ممجبور تدفعهن هو ديني واني عندي فلوس ادفعه
-خلهن تحت يدك ينفعوكي لاتجادلي
- والله ماامشي منا ماتحرك ومانروح ولا ندفع شي
- يولو وكت عناد هذاااا وكت عناااااد امشي عااااد
- ما مااروح
- يوووولي تييييينه امشي لاتخلين صوتتتي يعلى هين
- شيخ مال تدفع الدين انته مااارضاهه ابد والله ماارضى شذنبك انته وتدفع ديني !!
والله حتى عيب عليه لو خليتك تدفعه
- يولو العيب علي اناااا لو مشيت ويه حرمه وهي تدفع
- بس هذا مو شرى هذا دين عليه اني واني ملزمه بدفعه .. مثل مااخذته على عمى عيني لهذاك الملعون اني اتحمل تسديده انته مالك ذنب تتحمله وتدفعه

- يولو اليسمعك بدفع الالاف هنه كلهن كم دينار وانا تعاهدت اكفلك بكل شي وش هالحكي المالو لزوووم الحين
- شيخ الله يخليك الله يخليك لا .. والله تزيد همي همين لو دفعتهن اني مااعرف اتكل على احد رجاءاً رجاءاً افهمنني

دحكتلها وهي تتوسل لحتى ماادفعو .. فريت سبحتي وقلتلها ...
- كم عندك ؟
- ها
- فلوسك كم .. كم شايله معك
- اا يعني خير من الله
- كمممم عطيني رقم كم دينار
- ااا هو شسوي بيهن ليش تريد تعرف
- قلتلك كم جاوبي
- ست الاف دينار
- ودينك كم ؟
- هو ست الاف
- و انتي ودك تعطي كل الي عندك وتصفين بلا فلس بجيبتك
- لا اكدر ادبر نفسي
- كيف بالله علميني
- يعني ادبر نفسي لا تشيل هم
- انتي جايبه ذهبك معك
- ا اا اي
- بتبيعي ما هيك !
- شيخ عفيه
- دحكي يولو ذهبك هذا لو بعتي منو حلق بتخسري رفكتي فهمتي

كمت على عجل ونفضت عباتي ورادت تكوم اشرتلها تكعد وقلتلها ...
- مكااااانك اكعدددي هين وانا بروح ادفعو وارجع لهين الاكيك مامتزحزحه من ارضك مفهووووم
- شيخ
- مفهووووووم
- ايي مفهوم

تركتها ومشيت وانا ازفرو للنفس بحركه
هالحرمه كويه راس ماتمشي الا كذا ..
ودها تدفع هالاف الي عندها وتكعد مصفره الجيب وبعدها تعند وماتاخذ مني لو عطيتها

دخلت المصرف وصرت اسأل وين بدفعو لهالدين وبعد مادلوني عليه مشيت دفعتو باسمها ورجعت لعندها ولاكيتها على نفس كعدتها وتكطع بالثيل بملل .. رفعت راسها دحكتلي وانا قلتلها ...
- يلا نمشي

وكفت وتنافخ بغضب وقالت ..
- يعني اني هسه شنو اكولك شكراً رحت خلصتني من ديني لو اتعارك وياك لان دفعته عني واني ماارضى والله حيرتني ليش تستخدم وياي هالاسلوب وتخليني اسكت واكعد غصب عني
- يولو لو يسون تعالي عاتبي واحكي يولو هنه كلهن ست الاف دينار انا مسواك البيت بعطيه مصرف ازيدن منو
- انته فلوسك هواي وتشوفهن قليلات تره اني عندي هذني هواي وخير من الله
- بالله لاتحكي حكي اكبر منك زمااان كان الهن قيمه هالاف الحين وش بيسوو
- شنو شيسون تره القرض اني اخذته على نص راتبي وجنت اعيش بالنص الثاني و وفرت منه هم
- ايييييه حكيتلك هذااا زمااان يولو هالحين الحصار خانك العالم والالف هذا اتحداكي لو شريتي به كيلو موز
- يا حصار ؟

دحكت عليها متعجب وعاكد حواجبي وتالي سألتها ...
- انتي فيكي شي ؟
- لا
- لا بالله فيكي انتي كنتي مسافره عن البلد !
- لا
-عجل ماتعرفي وش بلدنا فيه !
- لا شبي
- دخيل الله انتيييي وين كنتتتي ماتحكيلي

تمشيت شوي عنها ورديت لها قلتلها...
- تينه انتي من ايمتى اخر مره دريتي فيها عن الدنيا وش بلاها ؟؟ احكيلي وش اخر شي تعرفيه او تذكريه !

بعدت نظرها عني وقالت ..
- شيخ هو اني من وكت وفاه اهلي تيهت كلشي وماجنت اهتم لشي او اسمع اخبار
ومن بعدها اخر مااذكر اني جنت واعيتله هو بشهر الرابع من بعدها تخربطت عندي الامور
- اييييه يعني من شهر الرابع للحين ماتعرفي وش صاير معنا هالحولك ماحكولك ماكنتي تسمعي من الجيره

دحكتلي بغضب وهي حكت نزلت دمعتها
- اااااني شمس ماااجنت اشووووف تفهمممم شنوو شمس وانته جاي تكولي جيران وبلد
!!!!!! استهزائك خليه بعيد عن جرووووحي

كانت تدحكلي بعصبيه والدموع تجري وبعدها خلت يدها على عينها ودارت وجهها عني ومشت .. تندمت بهاللحظه على حكيي
معها وكنت ناسي حكيها وقت قالت انها ماتعرف تاريخ اليوم .. مشيت لعندها وحكيتلها...
- تيييين تيييينه وكفي بالله عليكي

وكفت وهي دايره ظهرها لي مشيت لكدامهه
وهي دحكتلي بنظره عتب وانا حكيتلها..
- دحكي انا بتعذر بالله ماكصدت اجرحك بحكيي
كانت تمسح دمعه عينها وبعدها حكتلي ..
- مايحتاج التعذر اني ماالومك على شي انته حقك تحجي هيج قابل انته شعرفك شبيه حتى تعتذر

كنت ادحكلها وهي تنطك الم ويه كل كلمه
بعدها رفعت شعرها عن عينها واخذت نفس وحكتلي ..
- اي بله احجيلي شنو هذا الحصار شكو منين اجه وليش

ريحني تفهمها وضبطها لنفسها .. مشينا وانا احكيلها..
- انفرض على بلدنا بسبب دخولنا على الكويت وحربنا معهم وفيه كثير تشعبات وتدخلات من دول الخارج وكلمن يجر ويعر من جنب
- يعني هسه شنو شبي البلد
- متحاصر مافيو استيراد الا من منفذ مع الاردن قالو انهن بيفتحو معهن بهالشهرين
هذا بدا من يوم ٤ بشهر الثامن والاسعار صعدت كلشي بالسوك غلى كثير وصار الالف الي كنا بنزت فيو طول الشهر ومابيخلص الحين مابيجيبلو كيلو فواكه
الرواتب قليله ومابتكفي اهلها والاجارات صعدت ومافي ادويه كافيه هين والطيران في عليو حضر ومابنعرف للحين وش قصتو
- يالله دخيلك ليييش هيج ،،، وهاي لشوكت نظل هيج
- العلم عند الله
- هم رجعنه لحال الحرب مانعرف مصيرنا وين !! اووف شفتهمنا من حياتنا بعدنا تونا كلنا بسم الله وطبينا بالاكبر منها
- بلدنا محط نظر للاجانب واغلب الدول المجاوره .. نفط بلدنا صار علينا نقمه من حسدون لالنا عليه
- اي والله صحيح كله من هالنفط كلهه حاطه عينهه عليه واحنه ممتهنين بي
- عسى وان بتفرج بيوم

- ان شاء الله
- هالحين بنمشي لحديثه ولا بنضل هين
- كيفك شنو الانسب الك
- انا بفضل لو نضل هين اليوم لان الدرب بعيده واخاف مانوصل على الموعد بكرا او بيعرضلنا شي هنيك
- و وين نبقى هالليله !!
- بعد هاذي مدينتك انتي بتعرفيها اكثر مني
- امممممم اول شي خلي نطلع من هالمنطقه لان ممرتاحه هنا بصراحه
-ليه؟؟؟
- اهلي كلهم قريبين من هالمكان واخاف اصادف احد منهم
- يعني منطقتك باب الشيخ قريبه من هين
- مو كلش بس مسافه دقايق بس اقاربي هنا متواجدين دائماً لان مناطقهم اقرب
- زين عجل خلي نمشي للسياره

مشينا بسرعه وادحكها تتلفت عن يمنتنا ويسرتها وتوترها باين عليها لحين ماصعدنا بالسياره اخذت نفس وصفنت شوي بعدها حكتلي...
- اكيد جعت شيخ
- اي بالله
- شنو بالك تاكل واني اكولك اي مكان احسن لهاي الاكله
- انا بهيك طلعات بحب المشاوي
- طيب امشي ناكل مشاوي على دجله
- يالله توكلنا

تبسمت وانا حركت السياره ومشيت على خطى الدرب الي تدليني عليه وبعدها نزلنا
على حدر دجله كان في كثير من المطاعم هنيك ومنها الي كعدتها بتصير بره على حدر الجرف ومنها الي بداخل بنايات ...
انا طبكت السياره من حدر بنايات المطاعم وبعدها تمشينا على الحدايق المقابله للجرف
وهنيك كان ودها نكعد .. كعدنا ورحب فينا
رجل اربعيني العمر وحكالنا ....
- ياهلاً وسهلاً اغاتي شرفتونا والله
- اهلا بيك ياخي
- شتطلبون حضرتكم

دحكتلها وهو حكالنا ..
- مايحتاجلها سؤال وحيره هنا ماتلكون احسن من المسكوف وداعت هالشوارب الشُكر لاوكلكم سمج ماضايكينه بعمركم
- عجل توكل يابه
- انباري عيييني كل الهلا اليوم شلون ادللكم دلال لعد ياهلا وميه مرحبا
- ربي يعزك ياغالي

مشى وهو مخبوص يصيح للولد يجهزو السمك ... دحكتلها وقلتلها..
- لسانكو حلو ونفسكو طيبه يااهل بغداد
- مو اقل منكم ياهل الانبار
- هههه ادحك مزاجك عال الحين
- اييي ارتااح كولش بهوا دجله
- لكن انا خايف يصيبك برد منو وانتي ماتلبسي الي يدفي عظمك
- احجيلي بصراحه شيخ انته ضايج من لبسي هذا ؟
- هههه لا يولوو ماهيك الكصد
- لا والله احس انك دتريدني مالبسه بصوره غير مباشره .. لان دائماً تنبهني على انه لازم اغيره والبس شي ثخين رغم اني ماابرد بي
- ههههه يولي انا وش خصني بلبسك البسي الي يحلالك ومابه شي معيب لبسك حتى اطلبك تغيري لكن اخاف عليكي من برد الجو
- ماتخاف اني كل بروده اريد الاكثر منها
جسمي حار دائماً

حكتها وهي ترفع بشعرها لوره اذنها وانا تبسمت على اخر كلمتين .. مثل ماعهدتها
نقيه وفكرها على كدها .. صارت تدحكلي
وعاكده حواجبها بتساؤل لاني صفنت عليها وانا ااتبسم على حكيها من فطاريتو للكنتو وكسره رائها .. بعدها درت نظري عنها وصرت ادحك للمكان هينه .. مايقل جمالو عن حديثتنا وانا عيني ماخذه على الجو هذا
وبفرقو هنيك عندنا الفرات بدل دجله ....

نزلو الاكل وكان على نفس كلمه الرجل ان نكهتو فريده وانا من جوعي نزلت عليها كلها اكلتها والتينه يادوبها تلكط من هان وهان
ماصرت احثها على الاكل لاني عرفت هذا مكدورها وخليتها براحتها تاكل الي ودها اياه

بعدها شربنا الجاي على نفس كعدتنا وهي حكتلي ...
- شيخ هسه شنسوي لا صلاه صلينه وراح يأذن العصر
- والله ياتينه هو كان ردينا وارتحنا لكنها ماتسوه لحين مانوصل صاير الليل
- اي صح ماتسوه هم وراهه نطلع من الفجر
ويصير التعب تعبين
- ايييه .. خلينا الحين نمشي وتالي بندبرها

كمنا مشينا لعند السياره واول ماصعدنا هي رجعت راسها لوره وغمضت ..قلتلها ..
- خير فيكي شي
- نعسست كولش

ضحكت بسكات وانا اشغل السياره واحاكي نفسي .. انا وش تاليه ضحكي على حكيها
عدلت كعدتها ودحكتلي وحكت ...

- وين نروح هسه
- تدرين انا بعد نعست وودي انجضع الحين
- ههههههه تعبنه والله اليوم جان طويل
ومتعب
- لااا ماهو بمتعب لكن انا ماشبعان نوم
- اممم

كانت تدحكلي بتمعن وحتى عينها من ادحكها ماهي على عيني لا احسها تدحك فيي تفاصيل ثانيه ومافهم ليه ؟
بعد فره طويله بالسياره قلتلها ...
- تينه انا ودي احجز بفندق هالليله
- فندق!
- عجل وين ننام بالشارع لو هين ونتكسر
- اي صحيح افف مادري كيفك اني بالي مو وياي
- عجل وينو بالك
- بلجنه باجر موترتني كولش
- هههههه يولوووو
- شنو شيخ ؟
- هيك مابه شي
- لا والله احجيلي شنو
- هو كصدي يكفيك تفكير فيها بيرتبها ربك ماتشيلي همها
- اي الله كريم
- اييه

للحظه انا انفجرت بضحكتي كدامها والله ان هالراء والواو الكثيره بحكيها بتجيب اجلي

مشينا لفندق وطلبت غرفه بسريرين منفصله
دخلنه فيها وانا نزعت العباه والعكال واليشمغ
زتيتهن على الفراش وكعدت اعدل بشعري ولحظتها تدحكلي ومتبسمه معانيها .. تبسمت وقلتلها ..
- وش فيك يولو على شو بتدحكي
- ههههه ماكو شي عادي

مشت لسرير الثاني واستندت على المخاد وتدحك للمكان ... انا مشيت للحمام غسلت واجيت تمددت وعطيتها ظهري وماطولت لغفيت .....

وكت ماكعدت دحكتها ساعه ٦ كمت للشباك ودحكت الدنيا توها تظلم .. اندرت ودحكتها
فاكه شعرها وهو على طولو ممدود فوك الغطى وادحكها كل شوي تحط يدها على قميصها من عند ركبتها وتبعد بياختو الي تصعد لعند فكها .. تكلبت بفراشها وهي عاكده حواجبها وشكلها مامرتاحه بنومتها ..

تبسمت على منظرها ومشيت اخذت اليشمغ لبستو وعدلت العكال ونزلت اتمشى بهالشارع واشوفلي مكان زين اجلب منو العشى ..
كانت هالمنطقه راقيه باينه من هداوتها ورزانه اهلها .. وكفت اخذت لفات كباب وبعدها مشيت ادورلي محل يبيع لبن انا بحب اشربو معو وعلى دربي دحكت بياع البسه
دخلت وصرت ادحك للالبسه هين وسألتو
على هيك لبس خفيف بيتي .. وعطاني
اثنين بقماش بهاري ناعم .. اخترت وحده
بتكون ثوب طولو ثلث ارباع للرجل وردانو
بتوصل لنص العكس بلون نيلي وفيو دكه ملونه ناعمه .. اخذت القياس الاصغر ومشيت
وانا كل حين بدحك للعلاكه بيدي واكول انها راح ترتاح بنومتها فيه بدل التنوره والقميص الي مبهذلينها ....

اخذت اللبن ورجعت للفندق من فتحت باب الغرفه دحكتها كاعده وتظفر بشعرها وترجع تفكه وبالعجل كامت واجت لعندي واخذت من ايدي العلاليك وحكتلي...

- ضل بالي عليك شيخ ليش مكلتلي راح تطلع
- يولو صغيرون وتخافين اضيع
- هههههه لااا بس حتى اعرف يعني وين تروح
- مامتعلم انا احكي لحد وين بروح واجي
- امممم .. شنو هاي جبت عشه !
- ايييه نزلت تمشيت وكلت اجيبو معي احسن ماننزل ونحير وين ناكل
- عشت والله زين سويت لان مالي نفس اطلع

كعدت وصرت ادحكها تدور على شي تحط به اللبن وماتلاكي ..وكفت متخصره وتدحكلي وهي تحكي..
- هاي بيمن اخلي هسه

مشيت لعندها وقلتلها..
- جيبي الكلاصات لهين

حطتهن على الميز كدامي وانا فتحت طرف الكيس وصرت اصبو بالكلاصات وبعدها شديتو وقلتلها..
- دحكي رهمتها
-هههه عقلك مدبر
- اشكال ماره فيي مواقف وندبرها هاذي سهله لو تدحكي الي عشتها بالعسكريه وش تقولي
- اييييي الله يساعدكم

رجعت كعدت وهي اجتي وعطتني لفتين وكلاص اللبن اخذتهم منها وقلتلها...
- تينه دحكي هذا الكيس فيه شي لك خذي

دحكتلي مستغربه ومشت بهداوه اخذتو وهي تدحكلي وترجع تدحكلو .. كضبت الثوب وتبسمت وبعفويتها خلتو على وجهها وهي متبسمه ورجعت دحكتلي وحكت ..
- يعني عرفت بيه ممرتاحه هيج
- ايييه دحكتك تاففين وانتي نايمه .. خذيه البسيه واكعدي اكلي براحتك
- اوووي عفيييه شكد حباب انته شُكررراً
-ههههه يولوووو امشي البسي واسكتي

بالله انا ماتحمل حكيها والنعويصه هاذي بتفجرني ضحك عليها ...

مشت للحمام وانا ذبيت العكال واليشمغ وكفيت رداني وكعدت براحتي على السرير
وصرت اكل .. كملت اللفه الاولى وهي لساعها ما طلعت من الحمام واخذت كلاصي لحتى اصب فيه اللبن مره ثانيه ورجعت كعدت واكلت لفتي الثانيه وهي طلعت لابستو وسابحه ولافه المنشفه لفوك راسها ومرجعتها لوره .. دحكتلي وتبسمت وحكتلي..
- مشكور شيخ نقذتني بي وعاشت ايدك القياس مضبوط ومثل ذوقي
- بالعافيه
- الله يعافيك ... طبعاً قبل شويه جنت كولش ضايجه ومتكأبه بس هالحمام رجع عدل مزاجي
- اييييه عجل زين حتى تاكلين براحه
- اييي مدام اكو لبن راح اكل براحتي وماخاف من معدتي
- الا وش سالفه معدتك اخذك طبيب
- لاااا عاديه مال حمل
- هاااا تصدكي انا بنسى احيان كثيره انك حامل
-ههه لييش
- ماادحكك مثل حريمنا وكت يحبلو بيصيرو بكبر الثور ومابيوكفو اكل ومشتهى انتي حتى مادحكك تشربي مي
-هههههههه لاااا مو لهدرجه شبيه اشرب لعد شلون عايشه
-انا هم مستغرب كيف عايشه

اخذت اكلها وانتجت على المخده وصارت تاكل بهداوه وبعدها حكتلي ...
- خلي احجيلك حتى لاتستغرب عيشتي هيج
- ايه بالله احكي وش ورانا
- باوع اني من قبل جنت اتريك كيك او كعك ابو السمسم او كليجه ويه كهوه او جاي مر
- هااا عجل انا ماظنيت نمطك بدوي بتحبيها بمرارتها
- اي احبها مُره حتى اشتم ريحتها الدافيه باصولها بدون تغيير
- عجل وكت مانرد لحديثتنا بشربك كهوتنا ودحكي الاصول كيف بتكون فيها
- اييي ان شاء الله
- ايييه
- اي اما عن طريقه اكلي ليش هيج بطيئه فهذا تعليم اهلي
- كيف يعني
- يعني ابويه قبل من جنه صغار جان يكوللنا
ان الاكل لازم يتقطع زين بالحلك قبل مايدخل المعده وينهضم حتى جان يكوللنا احسبو لحد ال ٣٠ يلا تبلعوه حتى متصيرلكم مشاكل بالهضم
- اهااا
- وهيج احنه من جنه صغار بدينا نحسب بداخلنا لحد ٣٠ ونبلع لكمه وهو كولش جان يأكد على اداب الطعام والهداوه بالاكل واحنه
نراقبه بطريقه اكله بدون صوت وبدون استعجال ومن ضلينه نعلم نفسنه على هاي الطريقه لكينه روحنه ويه الايام احنه ماخذين عليها بدون مانحسب يعني هي جانت بس حتى نتعلم .. ولهالسبب كميه كافيه من الاكل تشبعني بسرعه لان تعودت على وقت معين وكميه معينه
- والدك باشاواتي
- هههه يعني هيج شي ،، يحب الهدوء واجواءه خاصه وعلمنا عليهه

- انا عجبتني فكرتو بالاكل لانو هيك مابيتعب المعده بالهضم يتكل على انو يذوبو بالفم ويسهل هضمو هالشي كثير صحي
- اي كولش
- عجل لهيك بدحكك هاديه بكل شي طلعتي تعليم الوالد
- ههه لاا ابويه شاف كل واحد منا شنو بذرته ونماها بالطريق الصح .. اني من طفولتي هادئه وانجذبت اله اكثر من بقيه اخوتي
وهو عزز هالهدوء بيه اكثر يعني لو تكعد يمنه وكت الي نحجي اني وياه لازم تركز ويانه دتسمع حجينه وتفهمه لان صوتنا ناصي وماعدنا الانفعال بحركات الايد او الملامح وكت الحجي
- هذا برود بيسموه هذا زايد عن الهدووء
- اي هو طبعنا بارد بس حنين
- وش هالحنين الي تكصديه
- ههه الحنييين راح احجيلك موقف يشوفك هالحنين
- ايه احكيلي
- من جنت بالسادس الابتدائي وكت الامتحانات الشهريه تمرضت ورسبت بماده الجغرافيه والرياضيات واجتني النتيجه محمره باثنينهن واني كضيتهه بجي اليوم كله لااكل ولا اشرب بس ابجي ولازمه الشهاده
وخجلانه شكوله لابويه لو رجع من دوامه
ووكت الي رجع اني جنت خاتله استحي اواجهه .هو شاف شهاده اخواني وصاح عليه
رحتله وبيدي الشهاده ومدنكه راسي هو حس بيه شي فقبل ماياخذهه مني شالني كعدني بحضنه وكالي ...
اليوم اني جان عندي شغل هواي مكلفيني بي وماكدرت اسويه عدل وخسرته ولازم ارجع من جديد ابحث واشتغل
اني مافهمت بوكتهه شيقصد ليش هيج يحجيلي يعني اني شعليه بهالشغل وضليت صافنه عليه جان يجر الشهاده من ايدي ومن باوعهه ضيق عيونه وجان يضحك ويكولي..
هاااي شنو اني وياج متوالمين اليوم اثنينه مو زينين مو باباتي
جان اني دمعت عيني وهو مسحهه وكالي ..
لتبجين هسه انتي راح ترجعين تدرسين وتتعبين على نفسج وتعدليهه بنص السنه انتي شاطره ومثل مااني هم رسبت بشغلي وراح اعيده انتي هم مابيهه شي باباتي لا تخافين
اني وياج نكعد نكتب ونقرا سويه
وصار كل يوميه يكعدني يمه بالليل وهو يقريني الرياضيات بكل هداوه وينطيني سؤال احله وهو يكعد يكلب باوراقه والصبح من ساعه بالخمسه يجي يكعدني وننزل جوه للمطبخ الكاه محضرلي كلاص حليب وكعك
وهو يحط استكان الجاي ويكعد يمي ناكل
ويحجيلي ..
شلون دااكتب افكار حلوه بالشغل متاكد هالمره راح انجح بي لان على واهسج
صارلي حافز ابدع وافكر احسن من قبل

واني اكوله ... اني هم صرت افهم الماده احسن من قبل وراح اغلبهم بالامتحان لان اني قريت الكتاب من بدايه قبلهم

وهو يكولي .. اي عفيه سبقتيهم واستغليتي وقتج . ويكولي ... هسه هذا ريوك خفيف حتى تكعدين تستغلين هالساعتين قبل المدرسه اريد من ارجع واشوفج ششتغلت اليوم انتي هم تشوفيني شحليتي من اسئله وشكتبتي تلخيصات من الجغرافيه ..

وضل وياي هيج بالليل يكعد يحط اوراقه يمي وناكل فواكه سوه ونقرا ومن الخمسه اكعد هم اتريك واقرا كدامه لحد مايطلع للشغل وامتحنت نص السنه وجبت رياضايات ٩٧ وجغرافيه ٩٨ واجيت شوفتهه اله جان يحضني ويكولي
اني هم اليوم نجحت بشغلي واخذت ترقيه بي هم .. واني فرحت اكثر لان نجح بشغله ومن كبرت اكتشفت ان هو اصلاً ماعنده شغل يعيده وجان يدري بيه راجعه راسبه وماخلاني احس بالفشل وسوالي واهس وياه حتى اتشجع واجيب درجه عاليه وهو قصد انه نجح وترقى على نجاحي وفرحتي
- والله ونعم الاب علمك باسلوبو عن الف درس وحكمه
- ايي فعلاً اني بسبب هالتشجيع وحنيته بتعامله وياي وكت الي اخاف لو انه يقسى عليه صرت كلشي يصيرلي اتجهله واحجيله كلشي بحياتي بدون خوف لاني اعرفه حنين عليه بطريقه ذكيه
- هذا دليل على حسن اخلاقو وكبير وعيو وثقافتو
- هو جان يكولي تهذيب النفس صلاح المجتمع والاسره
- وعز الله اني متحسف ماعرفتو وعاشرتو

دنكت وهي تتبسم ورجعت كملت اكلها وانا ادحكلها واحكي بداخلي .. وش عندو هالاب
من خلق وهيك زرعو بهالبنت وخلاها هيك رزينه وذاكرتلو بكل خير ؟؟؟.

كامت تغسل وانا انجضعت وادحك للسكف
وبعدها رجعت كعدت بمكانها وصارت تشيل المنشفه من على شعرها وتفاكك فيه وهو على طولو ممدود على جنبها درت وجهي عنها
وصرت ادعي لتيسير امرنا بكرا وبعدها قلتلها ...
- تينه ابغى منك شي
- تأمر شيخ شنو كولي
- بكرا عند اللجنه ابغى منك تحكيلهم انك كنتي مريضه على فقد اهلك واخذك المرض هالشهور وبتحكيلهم انك الحين منفصله عن زوجك وعايشه مع اخوتك وبتذكريلهم حملك
لانو هالشي ممكن بيلين عندهم شوي
- ماشي احجيهن بس اني متخوفه من شي
- وش هو
- اخاف محمد او علي يعرفون بجيتي لهنا
- وليعرفو وش عليه ماانا معك مابتركك معهون
- مااريد اشوفهم هذوله كابوس حياتي مااريد يختل توازني بعد كل هالتعب الي بذلته حتى اسيطر وارجع اوكف على حيلي
- مابيجو ان شاء الله بكرا بيمشي كل شي بهدوء وسلامه
- ان شاء الله
-دحكي انتي امشي بكرا بزود ماتخافي هاي كلا اجراءات اعتياديه مافيها شي بيخوف
انا اكره اسمع منك كلمه خوف من حين مادخلتي بظهر شيخك وعيلتو بتنسي شي اسمو خوف ..بكلمه وحده بمليلك الارض رجال عفاريت راسهم مايكصو السيف

تبسمت وقالتلي ...

- اني شسوي واجازيك على هالاهتمام والامان كله
- عيشي براحه هذا جزاي
- ماادري ليش دااحس الله عوضني بيك عن هواي اشياء وكلها وجعت كلبي بس انته دالكاك مثل بلسم الهن

صفنت عليها وهي تحكي وبعدها قالتلي..
- اني عندي اخوه اثنين بس بعمرهم ماكدرو ينطوني ربع احساس الامان الي حسيته بخوتك شيخ
- عجل الرجال وش لزومها لو ماكدرو يوفرو الامان لحريمهم
- من زينه الرجال انته شيخنا

تبسمت وهي تدحكلي ومن بعدها حكتلي
- اطفي الضوا لو تضوج ؟
-لاا اطفي اطفي

طفتو واجتي انجضعت وتغطت وضلينه ساكتين واخذتنا النومه للصبح كعدت على صوت حركتها بالغرفه ودحكتها واكفه وتمشط بشعرها دحكتلي وقالت..
- صباح الخير شيخنا
- صباح النور ..من ايمتى كعدتي
-من قبل نص ساعه تقريباً
- هاا عجل كم لساعه الحين
- سبعه وربع
- مااضل وكت والله وخذتنا النومه

كمت للحمام تسبحت وتوضيت طلعت صليت وتحضرنا ونزلنا طلعنه تريكنا وشربنا الجاي
المهيل بهالصباح وبعدها مشينا للعنوان وصرنا ننتظر دورنا .. لحين مادخلنه لعندهم
وتسالمنا وكعدنا كدام اللجنه الي كانت متكونه من ٣ رجال وحرمه كبيره بالعمر ..
واحد من الرجال حكالنا...
- عيني هنا بالملف التقصير من حضرتكم واضح جداً ومذكور ان اكو لجنه طالعه للبيت المذكور عنوانه هنا وماكو اي احد يرد عليهم
وهذا الشي متكرر ٣مرات يعني تسجلت ضدكم نقطه بخصوص هالوضع

دحكتلها متوتره ووجها مصفر وانا احاول اطمنها لكنها متخوفه كثير .. حكيتلو ...
- يااستاذ العنوان تغير والحين احنه ساكنين الانبار والظرف ماسمح لنا برجعه لبغداد الا هاليومين
- كلشي اله اصوله كان المفروض تدزون تبليغ بعذر او طلب اجازه لمده معينه او الابلاغ بالوضع الي تحتم عليكم بهالتاخير
المهم هسه نسمع من حضرتها شنو السبب وراء كل هالتقصير مع الدوله

دحكتلها واشرتلها تحكي وهي اخذت نفس وحكتلو ...
- تمرضت من فتره بسبب وفاه اهلي ومن بعدها صارتلي مشاكل جبيره خلتني انفصل عن زوجي وارجع اعيش ويه اخوتي
- يعني هسه انتي مطلقه
- لا ماكدرت اطلك لان حامل
- واخوتج بالانبار مو
-اي
- يعني بهالحال اني شراح احكم اذا انتي حامل !!!!!

تدخلت الحرمه وحكت ...
- بما انها امرأه وحامل وبعدها صغيره فتسقط عنها عقوبه الحبس الافضل ان ننتقل للبنود الاخرى

ضلو يدحكولنا ويتشاورون بينهم وبعدها
رجع الرجل حكالنا....
- بعد النظر بموضوع حضرتج ومراعاة
لوضعك الصحي قررت اللجنه اسقاط الاحكام الغير ملائمه لظرفك الحالي والاكتفاء بفرض
عقوبه تمنعك من مزاوله العمل بالدوائر الحكوميه لمده لاتقل عن سنتين

رادت تحكي وتعترض وانا وكفتها وهي دمعت عينها وانا اشرلها تسكت والرجل كمل حكيو ...
- احنه لازم نكتب بحقك قرار مانكدر نترك الموضوع بدون عقوبه هذا عليه تفتيش ومسائلات قانونيه وهالسنتين انتي تحتاجيها للتفرغ لطفلج اشكري ربج على هالحكم البسيط مقارنه بغيرج

وكفنا وحكيتلهم ..
- شكراً لتفهمكم وضعنا يابه وجزاكم الله خير

اخذتها وطلعنه وبعد مابعدنا من الناس حكيتلها...
- يوووولو انا شووصيتك ليه البكي ليييه مادحكتي الرجل وش يقلك ماعرفتي تبطلي بكي
- عوفني عوفني

راحت مشت بسرعه وانا استغفرت ربي وتبعتها ودحكتها كعدت بحديقه وحاطه راسها بين يدها وتبكي .. وكفت حدرها وقلتلها...

- دحكي بالله لو مابطلتي بكي لاكسرو لراسك يكفيك عاد تبكين على شو هاذي الحمدلله خلصنه ومابه شي مو زين حصل
- شنو مو زين شنوو .. هاي اني ضاع تعبي ودراستي واحلامي كلها .. ما تحس بيه لان ماشايف شكد تعبت وسهرت حتى انجح واصنع لنفسي حياه ومستقبل زين
- اييييه وش الي خربها لحياتك الحين وش فيه
- مايوظفىني بعد محد يقبل يوظفني من يقرون اني متعاقبه بفصل سنتين ... ماكدر بعد اشتغل اي شي ولا راح اكدر ارجع اعتمد على نفسي واسس حياتي من جديد
- انتي من كل عكلك كاعده الحين وتبكين على الشغل !!! يولو من حكالك انا برضى تشتغلي ! انتي مابحاجه الوظيفه كلهاااا
ماتلزمك يولي لا تصرعين راسي ببكيك
افهمي عاد
- افهمني انته ارجووك اني ماعرف اتكل على احد بعيشتي ومصرفي امووت ماكدر تفهم شنو ماااكدر ماتحمل انته تضل تصرف عليه كل العمر
- تحمليها وترضين غصب عنك عجل انا زلمه البيت ولا رجل كرسي بخليكي تمشي تشتغلي بين هالغرب ... امشي كدامي يلاا
وبطلي بكي ومناحه على هالوظيفه الي مابتجيب لكمه العشى بالله ان ماسكتي الحين ومشيتي لاطلع غضبي كلو عليكي امشي لاتتعبيني بعنادك هاي خلصنه من السالفه الحمدلله الحين انتي حره احمدي ربك وكبري عكلك

مسحت دمعها ومشت حدري وهي عافسه الوجه ... صعدنا بالسياره وهي ساكته وعاكده الحواجب ومتكتفه وبعدها قلتلي ...
- ماريد ارجع هسه
-ليه
- اريد اروح لبيت اهلي
.
⭐️⭐️⭐️